ⴷⴷⴰⵔⴻⵎ ⵉ ⴰⵔⴹⴰ ⵏ ⴰⵔⴻⴱⴱⵉ
4
1 ⵙ ⵓⵢⴻⵏⵏⵉ, ⴰ ⴰⵢⵜⵎⴰ, ⴰⵇⴰ ⵏⴻⵜⵜⵣⴰⵡⴻⴳ ⴽⴻⵏⵏⵉⵡ ⵓ ⵏⴻⵜⵜⵥⴰⴵⴰ ⵉ ⴽⴻⵏⵏⵉⵡ ⴷⵉ ⵙⵉⴷⵉⵜⵏⴻⵖ ⵢⴻⵛⵛⵓ, ⵃⵉⵎⴰ, ⴰⵎ ⵣⵣⴰⵢⵏⴻⵖ ⵜⵍⴻⵎⴷⴻⵎ ⵎⴰⵎⵎⴻⵛ ⵉⵜⵜⵅⴻⵚⵚⴰ ⴰⴷ ⵜⵓⵢⵓⵔⴻⵎ ⵓ ⴰⴷ ⵜⴰⵔⴹⴰⵎ ⵉ ⴰⵔⴻⴱⴱⵉ, ⴰⴷ ⵜⴻⵢⵎⴰⵎ ⴷⵉ ⵎⴰⵏ ⴰⵢⴰ ⴽⵜⴰⵔ, ■ 2 ⵎⵉⵏⵣⵉ ⴽⴻⵏⵏⵉⵡ ⵜⴻⵙⵙⵏⴻⵎ ⵜⵉⵡⴻⵚⵚⴰ ⵏⵏⵉ ⴷ ⴰⵡⴻⵎ ⵏⴻⵡⵛⴰ ⵙ ⵙⵉⴷⵉⵜⵏⴻⵖ ⵢⴻⵛⵛⵓ. 3 ⴰⵇⴰ ⴷ ⵎⴰⵏ ⴰⵢⴰ ⵎⵉⵏ ⵉⵅⵙ ⴰⵔⴻⴱⴱⵉ, ⴰⵇⴰ ⴰⴷ ⵜⴻⵢⵎⴰⵎ ⴷⵉ ⵜⵇⴻⴷⴷⴰⵙⵜ, ⴰⴷ ⵜⵃⴻⵢⵢⴷⴻⵎ ⵅ ⵎⴰⵔⵔⴰ ⴼⴰⵔⵇ-ⵛⵛⵖⴻⵍ, ■ 4 ⵓ ⵎⴰⵃⴻⵏⴷ ⴽⵓⵍ ⵉⵊⵊⴻⵏ ⵣⵣⴰⵢⵡⴻⵎ ⴰⴷ ⵉⵙⵙⴻⵏ ⵎⴰⵎⵎⴻⵛ ⵉⵜⵜⵅⴻⵚⵚⴰ ⴰⴷ ⵢⴰⵡⵉ ⵜⴰⵎⵖⴰⵔⵜ ⵏⵏⴻⵙ ⵙ ⵜⵇⴻⴷⴷⴰⵙⵜ ⴷ ⵛⵛⴰⵏ, 5 ⵡⴰⵔ ⵉⴵⵉ ⴷⵉ ⵛⵛⴻⵀⵡⴰⵜ ⵏ ⵏⵏⴻⵛⵡⴻⵜ, ⴰⵎ ⵍⴻⴳⵏⵓⵙ ⵏⵏⵉ ⵡⴰⵔ ⵉⵙⵙⵉⵏⴻⵏ ⵛⴰ ⴰⵔⴻⴱⴱⵉ. ■ 6 ⴻⵊⵊ ⵓⵍⴰ ⴷ ⵉⵊⵊ ⵣⵣⴰⵢⵡⴻⵎ ⴰⴷ ⵉⵣⵄⴻⵎ ⴰⴷ ⵉⵙⵙⴻⵀⵍⴻⵛ ⵓⵎⴰⵙ ⵏⵉⵖ ⴰⴷ ⵜ ⵉⵖⴻⵛⵛ ⴷⵉ ⵜⵎⴻⵙⵍⴰⵛⵜ-ⴰ, ⵎⵉⵏⵣⵉ ⵙⵉⴷⵉⵜⵏⴻⵖ ⴰⴷ ⵉⵏⴻⵇⵇⴻⵎ ⴷⵉ ⵎⴰⵏ ⴰⵢⴰ ⵎⴰⵔⵔⴰ, ⴰⵎ ⵎⴰⵎⵎⴻⵛ ⵏⵉⵣⵣⴰⵔ ⵏⴻⵏⵏⴰ ⵓ ⵏⴻⵛⵀⴻⴷ ⴰⵡⴻⵎ. 7 ⵎⵉⵏⵣⵉ ⴰⵔⴻⴱⴱⵉ ⵡⴰⵔ ⵅⴰⵏⴻⵖ ⴷⴷ-ⵉⵍⴰⵖⴰ ⵉ ⵍⴻⵅⵎⴻⵊ, ⵎⴰⵛⴰ ⵉ ⵜⵇⴻⴷⴷⴰⵙⵜ. ■ 8 ⵙ ⵓⵢⴻⵏⵏⵉ ⵡⴻⵏⵏⵉ ⵉ ⵖⴰ ⵉⵙⵙⴷⴻⴵⴻⵏ, ⵡⴰⵔ ⵉⵙⵙⴷⴻⴵⵉ ⵛⴰ ⴱⵏⴰⴷⴻⵎ, ⵎⴰⵛⴰ ⴰⵔⴻⴱⴱⵉ, ⵡⴻⵏⵏⵉ ⵉⵡⵛⵉⵏ ⴰⵔⵔⵓⵃ ⵏⵏⴻⵙ ⵉⵇⴻⴷⴷⵙⴻⵏ ⴷⴰⵢⵡⴻⵎ. ■ 9 ⵏⵀⵍⴰ ⵎⴰ ⵏⵓⵔⴰ ⴰⵡⴻⵎ-ⴷⴷ ⵅ ⵜⴰⵢⵔⵉ ⵜⴻⵏⵏⵉ ⵊⴰⵔ ⵡⴰⵡⵎⴰⵜⴻⵏ, ⴰⵇⴰ ⴽⴻⵏⵏⵉⵡ ⵙ ⵢⵉⵅⴻⴼ ⵏⵡⴻⵎ ⵜⵜⵡⴰⵙⵙⵍⴻⵎⴷⴻⵎ ⵣⵉ ⴰⵔⴻⴱⴱⵉ ⵃⵉⵎⴰ ⴰⴷ ⵜⴻⵅⵙⴻⵎ ⴰⵢⴰⵡⵢⴰ. ■ 10 ⵎⴰⵖⴰⵔ ⴰⵎⵎⵓ ⵉ ⵜᵉⵜⵜⴻⴳⴳⴻⵎ ⴰⴽ-ⴷ ⵎⴰⵔⵔⴰ ⴰⵡⵎⴰⵜⴻⵏ ⴷⵉ ⵎⴰⴽⵉⴷⵓⵏⵉⵢⴰ ⵜⵎⵓⵏ. ⵎⴰⵛⴰ ⵜⵜⴰⵔⴻⵖ ⵣⵣⴰⵢⵡⴻⵎ, ⴰ ⴰⵢⵜⵎⴰ, ⵃⵉⵎⴰ ⴰⴷ ⵜⴼⴻⵢⵢⴹⴻⵎ ⴷⵉ ⵎⴰⵏ ⴰⵢⴰ. 11 ⴰⵔⵣⵓⵎ ⴰⴷ ⵜⴻⴷⴷⴰⵔⴻⵎ ⴷⵉ ⵍⵀⵓⴷⵏⴻⵜ, ⴰⴷ ⵜⴻⵡⵛⴻⵎ ⵜⴰⵢⵏⵉⵜ ⵉ ⵎⵉⵏ ⵉⴵⴰⵏ ⵏⵡⴻⵎ, ⴰⴷ ⵜⵅⴻⴷⵎⴻⵎ ⵙ ⵉⴼⴰⵙⵙⴻⵏ ⵏⵡⴻⵎ, ⴰⵎ ⵎⴰⵎⵎⴻⵛ ⴽⴻⵏⵏⵉⵡ ⵏⵓⵎⵓⵔ, ■ 12 ⵃⵉⵎⴰ ⴰⴷ ⵜⵓⵢⵓⵔⴻⵎ ⵙ ⵓⵡⴻⵇⵇⴰⵔ ⴰⴽ-ⴷ ⵢⴻⵏⵏⵉ ⵉⴵⴰⵏ ⴷⵉ ⴱⴰⵔⵔⴰ, ⵓⵛⴰ ⵡⴰⵔ ⵜⴻⵀⴷⴰⵊⴻⵎ ⵓⵍⴰ ⴷ ⵉⵛⵜ ⵏ ⵍⵃⴰⵊⵊⴻⵜ ⵣⵉ ⵛⴰ ⵏ ⵉⵊⵊⴻⵏ.
ⴰⵄⵇⴰⴱ ⵏ ⵢⴻⵛⵛⵓ ⵍⵎⴰⵙⵉⵃ ⵖⴰⵔ ⴷⴷⵓⵏⴻⵛⵜ-ⴰ
13 ⴰ ⴰⵢⵜⵎⴰ, ⴰⵇⴰ ⵅⵙⴻⵖ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵡⴰⵔ ⵉⵜⵜⵅⴻⵚⵚⵉ ⴰⴷ ⵜⴻⴽⵙⵉⵎ ⵙ ⵡⴻⵎⵏⵓⵙ ⵅ ⵢⴻⵏⵏⵉ ⵉⴷⴻⵡⵍⴻⵏ ⵟⵟⵚⴻⵏ, ⴰⵎ ⵜ ⵜⵜⴻⴳⴳⴻⵏ ⵉⵡⴷⴰⵏ ⵉⵏⵏⴻⵖⵏⵉ ⵉⵏⵏⵉ ⵓⵎⵉ ⵉⵇⴹⴻⵄ ⵍⴰⵢⴰⵙ. ■ 14 ⵎⵉⵏⵣⵉ ⵎⴰⵍⴰ ⵏⵓⵎⴻⵏ ⴱⴻⵍⵍⵉ ⵢⴻⵛⵛⵓ ⵜⵓⵖⴰ ⵉⵎⵎⵓⵜ ⵓⵛⴰ ⵉⴽⴽⴰⵔ-ⴷⴷ, ⵅⴻⵏⵏⵉ ⴰⴷ ⴽⵉⴷⴻⵙ ⵢⵉⵡⵉ ⴰⵔⴻⴱⴱⵉ ⵄⴰⵡⴻⴷ ⵉⵏⵏⵉ ⵉⴷⴻⵡⵍⴻⵏ ⵟⵟⵚⴻⵏ ⴰⵎⵎⵓ ⴷⴻⴳ ⵡⴻⵏⴹⴻⵍ ⴷⵉ ⵢⴻⵛⵛⵓ.
15 ⵎⴰⵛⴰ ⴰⴷ ⴰⵡⴻⵎ ⵏⵉⵏⵉ ⴰⵢⴰ ⵙ ⵡⴰⵡⴰⵍ ⵏ ⵙⵉⴷⵉⵜⵏⴻⵖ, ⴰⵇⴰ ⵏⴻⵛⵛⵉⵏ, ⵉⵏⵏⵉ ⵉ ⵖⴰ ⵉⵇⵇⵉⵎⴻⵏ ⴰⵍ ⴷⴷ ⵖⴰ ⵢⴰⵙ ⵙⵉⴷⵉⵜⵏⴻⵖ, ⵉⵏⵏⵉ ⵄⴰⴷ ⵉⴷⴷⴰⵔⴻⵏ, ⵡⴰⵔ ⵏᵉⵜⵜⵉⵣⵣⴰⵔ ⵉ ⵢⵉⵏⵏⵉ ⵉⴷⴻⵡⵍⴻⵏ ⴰⴷ ⵟⵟⵚⴻⵏ ⴷⴻⴳ ⵡⴻⵏⴹⴻⵍ. ■ 16 ⵎⵉⵏⵣⵉ ⵙⵉⴷⵉⵜⵏⴻⵖ ⵙ ⵉⵅⴻⴼ ⵏⵏⴻⵙ ⴰⴷ ⴷⴷ-ⵉⵀⵡⴰ ⵣⴻⴳ ⵓⵊⴻⵏⵏⴰ, ⵅⵎⵉ ⴷⴷ ⵖⴰ ⵉⴼⴼⴻⵖ ⵍⵓⵎⵓⵔ ⴷ ⵜⵎⵉⵊⵊⴰ ⵏ ⵓⵣⴻⴵⵉⴼ ⵏ ⵍⵎⴰⵍⴰⴽⴰⵜ, ⵓ ⵅⵎⵉ ⵉ ⵖⴰ ⵜⵉⵍⵉ ⵜⵎⵉⵊⵊⴰ ⵏ ⵓⵙⵓⴹⵉ ⵙ ⵓⵢⵉⵛⵛ ⵏ ⴰⵔⴻⴱⴱⵉ, ⵓⵛⴰ ⵉⵎⴻⵜⵜⴰⵏ ⵉⵏⵏⵉ ⵉⴵⴰⵏ ⴷⵉ ⵍⵎⴰⵙⵉⵃ ⴰⴷ ⴷⴷ-ⴽⴽⴰⵔⴻⵏ ⴷ ⵉⵎⴻⵣⵡⵓⵔⴰ. ■ 17 ⵅⴰⵙ ⵓⵛⴰ ⵏⴻⵛⵛⵉⵏ, ⵉⵏⵏⵉ ⵉⵇⵇⵉⵎⴻⵏ ⵓ ⵄⴰⴷ ⴷⴷⴰⵔⴻⵏ, ⴰⴷ ⴽⵉⴷⵙⴻⵏ ⵏⴻⵜⵜⵡⴰⴽⴽⴻⵙ ⴷⴻⴳ ⵉⵙⴻⵢⵏⵓⵜⴻⵏ ⵖⴰⵔ ⵓⵎⴻⵍⵇⵉ ⴰⴽ-ⴷ ⵙⵉⴷⵉⵜⵏⴻⵖ ⴷⴻⴳ ⵓⵊⴻⵏⵏⴰ ⵓⵛⴰ ⴰⵎⵎⵓ ⵉ ⵖⴰ ⵏⵉⵍⵉ ⵍⴻⴱⴷⴰ ⴰⴽ-ⴷ ⵙⵉⴷⵉⵜⵏⴻⵖ. ■ 18 ⵙ ⵓⵢⴰ ⴳⴳⴻⵎ ⵓⵍ ⴷⴻⴳ ⵡⴰⵢⴰⵡⵢⴰ ⵙ ⵡⴰⵡⴰⵍⴻⵏ-ⴰ.