ⵜⴰⵢⵔⵉ
13
1 ⵎⴰⵄⵍⵉⴽ ⵏⴻⵛⵛ ⵙⵙⴰⵡⴰⵍⴻⵖ ⵙ ⵉⵍⵙⴰⵡⴻⵏ ⵏ ⵉⵡⴷⴰⵏ ⴷ ⵍⵎⴰⵍⴰⴽⴰⵜ, ⵎⴰⵛⴰ ⵡⴰⵔ ⵖⴰⵔⵉ ⴱⵓ ⵜⴰⵢⵔⵉ,
ⴰⵇⴰ ⴷⴻⵡⵍⴻⵖ ⴷ ⵏⵏⵃⴰⵙ ⵉⵜⵜⴻⵏⵜⵓⵏⴻⵏ,
ⵏⵉⵖ ⴷ ⴰⴵⵓⵏ ⵉⴷⴷⴻⵏⴷⵓⵏⴻⵏ.
2 ⵎⴰⵄⵍⵉⴽ ⵖⴰⵔⵉ ⵜⴰⵡⵀⵉⴱⵜ ⵎⴰⵃⴻⵏⴷ ⴰⴷ ⵏⴰⴱⴱⴻⵖ,
ⴼⴻⵀⵀⵎⴻⵖ ⵎⴰⵔⵔⴰ ⵍⴻⵙⵔⴰⵔ
ⵓ ⵖⴰⵔⵉ ⵎⴰⵔⵔⴰ ⵜⵓⵙⵙⵏⴰ ⴷ ⵎⴰⵔⵔⴰ ⵍ’ⵉⵎⴰⵏ
ⴰⵍ ⴷ ⵙⵙⵎⵓⵟⵟⵉⵢⴻⵖ ⵉⴷⵓⵔⴰⵔ,
ⵎⴰⵛⴰ ⵡⴰⵔ ⴷ ⴰⵢⵉ ⵜⴻⴵⵉ ⵜⴰⵢⵔⵉ,
ⵅⴻⵏⵏⵉ ⵏⴻⵛⵛ ⴷ ⵡⴰⵍⵓ ⵉ ⴵⵉⵖ. ■
3 ⵎⴰⵄⵍⵉⴽ ⴱⴹⵉⵖ ⵎⴰⵔⵔⴰ ⴰⴳⵍⴰ ⵉⵏⵓ ⴷ ⵎⴰⵛⵛⴰ ⵅ ⵉⵎⴻⵥⵍⴰⴹ,
ⵎⴰⵄⵍⵉⴽ ⵡⵛⵉⵖ ⴰⵔⵔⵉⵎⴻⵜ ⵉⵏⵓ ⵃⵉⵎⴰ ⴰⴷ ⵜⴻⵛⵎⴻⴹ,
ⵎⴰⵛⴰ ⵡⴰⵔ ⴷⴰⵢⵉ ⵜⴻⴵⵉ ⵜⴰⵢⵔⵉ,
ⵡⴰⵔ ⴷ ⴰⵢⵉ ⵜⵏⴻⴼⴼⴻⵄ ⴷⵉ ⵡⴰⵍⵓ.
4 ⵜⴰⵢⵔⵉ ⵜⴻⴵⴰ ⵖⴰⵔⴻⵙ ⵜⵜⴰⵙⵉⵄ ⵏ ⵍⵅⴰⴹⴰⵔ ⴷ ⵍⴻⴹⵔⴰⴼⴻⵜ,
ⵜⴰⵢⵔⵉ ⵡⴰⵔ ⴷⴰⵢⴻⵙ ⴱⵓ ⵜⵓⵙⵎⵉ,
ⵜⴰⵢⵔⵉ ⵡⴰⵔ ⵜᵉⵜⵜⴼⴻⵢⵢⴻⵛ ⵙ ⵢⵉⵅⴻⴼ ⵏⵏⴻⵙ,
ⵡⴰⵔ ⴷⴰⵢⴻⵙ ⴱⵓ ⵏⵏⴼⴰⵅⴻⵜ, □ ■
5 ⵜⴰⵢⵔⵉ ⵡⴰⵔ ⵜᵉⵜⵜⴻⴳⴳ ⴱⵓ ⵍⴻⴼⴹⵉⵢⵢⴻⵜ,
ⵡⴰⵔ ⵜⴰⵔⴻⵥⵥⵓ ⵜⵉⵥⵉ ⵏⵏⴻⵙ,
ⵡⴰⵔ ⵜᵉⵜⵜⵡⴰⵙⴰⵔⵥⴰⴳ,
ⵓⵛⴰ ⵡⴰⵔ ⵜᵉⵜⵜⵅⴻⵎⵎⴰⵎ ⴷⵉ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ. ■
6 ⴰⵇⴰ ⵡⴰⵔ ⵜⴼⴰⵔⵔⴻⵃ ⵛⴰ ⵥⵉ ⵍⵖⴻⵛⵛ,
ⵎⴰⵛⴰ ⵜⴼⴰⵔⵔⴻⵃ ⵥⵉ ⵜⵉⴷⴻⵜⵜ. ■
7 ⴰⵇⴰ ⵜⵍⴻⵃⵃⴻⴼ ⵎⴰⵔⵔⴰ,
ⵜᵉⵜⵜⴰⵎⴻⵏ ⴷⵉ ⵎⴰⵔⵔⴰ,
ⵜⴻⵙⵙⴰⵜⴻⵎ ⵎⴰⵔⵔⴰ
ⵓⵛⴰ ⵜⴰⵔⴻⴱⴱⵓ ⵎⴰⵔⵔⴰ.
8 ⵜⴰⵢⵔⵉ ⵡⴰⵔ ⵜⴼⴻⵏⵏⵉ ⵄⴻⵎⵎⴰⵔⵚ,
ⵎⴰⵛⴰ ⴰⵡⴰⵍⴻⵏ ⵏ ⵢⵉⵏⵏⵉ ⵉⵜⵜⵏⴰⴱⴱⴻⵏ ⴰⴷ ⴱⴻⴹⵍⴻⵏ,
ⵉⵍⵙⴰⵡⴻⵏ ⴰⴷ ⴳⵏⵓⵏ,
ⵓ ⵜⵓⵙⵙⵏⴰ ⴰⴷ ⵜⴻⴱⴹⴻⵍ.
9 ⵎⵉⵏⵥⵉ ⴰⵇⴰ ⵏⴻⵙⵙⴻⵏ ⵖⴰⵔ ⵉⵊⵊ ⵏ ⵓⵖⴻⵥⴷⵉⵙ ⵡⴰⵀⴰ,
ⵓⵛⴰ ⵏⴻⵜⵜⵏⴰⴱⴱ ⵎⵖⵉⵔ ⵉⵊⵊ ⵏ ⵡⴻⵥⵢⴻⵏ,
10 ⵎⴰⵛⴰ ⵅⵎⵉ ⴷⴷ ⵖⴰ ⵢⴰⵙ ⵓⴽⴻⵎⵎⴻⵍ,
ⵍⴻⵅⴷⴻⵏⵏⵉ ⵎⵉⵏ ⵉⴵⴰⵏ ⵖⴰⵔ ⵉⵊⵊ ⵏ ⵡⴻⵥⵢⴻⵏ ⴰⴷ ⵉⴱⴹⴻⵍ.
11 ⵍⴰⵎⵉ ⵜⵓⵖⴰ ⴰⵢⵉ ⴷ ⴰⵙⴻⵢⵎⵉ,
ⵙⵙⵉⵡⵍⴻⵖ ⴰⵎⴻⵛⵏⴰⵡ ⴰⵙⴻⵢⵎⵉ,
ⴼⴻⴽⴽⴰⵔⴻⵖ ⴰⵎⴻⵛⵏⴰⵡ ⴰⵙⴻⵢⵎⵉ,
ⵅⴰⵔⵚⴻⵖ ⴰⵎⴻⵛⵏⴰⵡ ⴰⵙⴻⵢⵎⵉ,
ⵎⴰⵛⴰ ⵍⴰⵎⵉ ⴷⴻⵡⵍⴻⵖ ⴷ ⴰⵔⵢⴰⵥ,
ⵊⵊⵉⵖ ⴰⵡⴰⵔⵏⵉ ⴰⵢⵉ ⵎⵉⵏ ⵉⴵⴰⵏ ⵏ ⵓⵙⴻⵢⵎⵉ.
12 ⵍⴻⵅⵅⵓ ⵏⴻⵜⵜⵡⴰⵍⴰ ⵙ ⵉⵛⵜ ⵏ ⵜⵉⵙⵉⵜ
ⵖⴰⵔ ⵉⵊⵊ ⵏ ⵡⴰⵔⵡⴰⵙ ⵏ ⵎⵉⵏ ⵉⴵⴰⵏ,
ⵎⴰⵛⴰ ⵅⴻⵏⵏⵉ ⴰⴷ ⵏⵥⴰⵔ ⵜⵉⴼⵔⴰⵙ ⵖⴰⵔ ⵜⵉⴼⵔⴰⵙ.
ⵍⴻⵅⵅⵓ ⵙⵙⵏⴻⵖ ⵖⴰⵔ ⵉⵊⵊ ⵏ ⵡⴻⵥⵢⴻⵏ ⵡⴰⵀⴰ,
ⵎⴰⵛⴰ ⵅⴻⵏⵏⵉ ⴰⴷ ⵙⵙⵏⴻⵖ ⵎⴰⵎⵎⴻⵛ ⵜⵓⵖⴰ ⵜⵜⵡⴰⵙⵙⵏⴻⵖ ⵏⴻⵛⵛ. ■
13 ⵎⴰⵖⴰⵔ ⵜⵍⴰⵜⴰ ⴰⵢⴰ ⴰⴷ ⵇⵇⵉⵎⴻⵏ:
ⵍⵉⵎⴰⵏ, ⴰⵙⵉⵜⴻⵎ ⴷ ⵜⴰⵢⵔⵉ,
ⵎⴰⵛⴰ ⴰⵎⴻⵇⵇⵔⴰⵏ ⵏⵙⴻⵏ ⴰⵇⴰ-ⵜⵜ ⴷ ⵜⴰⵢⵔⵉ.