ⵉⵔⵓⵎⴰⵏⵉⵢⵢⴻⵏ 11

ⵎⵉⵏ ⵉⵇⵇⵉⵎⴻⵏ ⵏ ⵉⵙⵔⴰⵉⵍ ⴷ ⵍⴻⴼⵔⵓⵄ ⵉⵍⴻⵇⵇⵎⴻⵏ

1 ⵎⴰⵛⴰ ⵏⴻⵛⵛ ⴰⴷ ⵉⵏⵉⵖ: ⵎⴰ ⵢⵓⴳⵉ ⴰⵔⴻⴱⴱⵉ ⵅⴻⵏⵏⵉ ⵍⴳⴻⵏⵙ ⵏⵏⴻⵙ? ⵄⴻⵎⵎⴰⵔⵚ! ⴰⵇⴰ ⵏⴻⵛⵛ ⵙⵉⵎⴰⵏⵜ ⵉⵏⵓ ⵄⴰⵡⴻⴷ ⴷ ⵉⵊⵊ ⵏ ⵡⴻⵔⵢⴰⵣ ⵣⵉ ⵉⵙⵔⴰⵉⵍ, ⵣⵉ ⵣⵣⴰⵔⵉⵄⴻⵜ ⵏ ⵉⴱⵔⴰⵀⵉⵎ, ⵣⵉ ⵜⴻⵇⴱⵉⵍⵜ ⵏ ⴱⵉⵏⵢⴰⵎⵉⵏ. ^■ 2 ⴰⵔⴻⴱⴱⵉ ⵡⴰⵔ ⵉⵏⴻⵟⵟⴰⵔ ⵛⴰ ⵍⴳⴻⵏⵙ ⵏⵏⴻⵙ ⵉ ⵜⵓⵖⴰ ⵉⵙⵙⴻⵏ ⵣⴻⴳ ⵓⵎⴻⵣⵡⴰⵔⵓ. ⵏⵉⵖ ⵡⴰⵔ ⵜⴻⵙⵙⵉⵏⴻⵎ ⵛⴰ ⵎⵉⵏ ⵉⵇⵇⴰⵔ ⵡⴻⴷⵍⵉⵙ ⵉⵇⴻⴷⴷⵙⴻⵏ ⵅ ⵉⵍⵉⵢⴰ, ⴰⵎ ⵎⴰⵎⵎⴻⵛ ⵜⵓⵖⴰ ⵉⴽⵙⵉ ⵜⴰⵏⴼⵓⵍⵜ ⵅ ⵉⵙⵔⴰⵉⵍ ⵖⴰⵔ ⴰⵔⴻⴱⴱⵉ, ⵉⵏⵏⴰ:

3 “ⴰ ⵙⵉⴷⵉ, ⵏⵖⵉⵏ ⵉⵏⴰⴱⵉⵢⵢⴻⵏ ⵏⵏⴻⵛ,

ⴰⵔⴻⴷⴷⴵⴻⵏ ⵉⵄⴰⵍⵟⴰⵔⴻⵏ ⵏⵏⴻⵛ.

ⵇⵇⵉⵎⴻⵖ ⵏⴻⵛⵛ ⵡⴰⵀⴰ,

ⵓⵛⴰ ⵏⵉⵜⵏⵉ ⴰⵔⴻⵣⵣⵓⵏ ⵍⴻⵄⵎⴰⵔ ⵉⵏⵓ.” ^■

4 ⵉⵜⵜⵡⴰⵏⵏⴰ ⴰⵙ ⵙ ⵉⵊⵊ ⵏ ⵍⴻⵡⵃⵉⵢ:

“ⴰⵇⴰ ⵊⵊⵉⵖ ⵉ ⵢⵉⵅⴻⴼ ⵉⵏⵓ ⵙⴻⴱⵄⴰ-ⴰⵍⴰⴼ ⵏ ⵢⴻⵔⵢⴰⵣⴻⵏ,

ⵉⵏⵏⵉ ⵡⴰⵔ ⴹⵔⵉⵏ ⵛⴰ ⵖⴰⵔ ⵉⴹⴰⵔⴻⵏ ⵣⵣⴰⵜ ⵉ ⴱⴰⵄⴰⵍ,

ⵡⴰⵔ ⵄⴻⴱⴷⴻⵏ ⵉ ⴱⴰⵄⴰⵍ.” ^■

5 ⴰⵎⵎⵓ ⴷⵉ ⵍⵡⴻⵇⵜ ⵏ ⵢⵉⴹⴰ ⵄⴰⵡⴻⴷ, ⴰⵇⴰ ⵉⵇⵇⵉⵎ ⵢⵉⵊⵊ ⵏ ⵍⴱⴰⵇⵉ ⴰⵎ ⵜ ⵉⵅⴹⴰⵔ ⵏⴻⵜⵜⴰ ⵅ ⵍⴻⵃⵙⴰⴱ ⵏ ⴰⵔⴹⴰ. ^■ 6 ⵎⴰⵍⴰ ⵜⴻⴵⴰ ⵙ ⴰⵔⴹⴰ, ⴰⵇⴰ ⵡⴰⵔ ⵜᵉⵜⵜⵉⵍⵉ ⵄⴰⴷ ⵙ ⵍⴻⵅⴷⴰⵢⴻⵎ, ⵏⵉⵖ ⵅⴻⵏⵏⵉ ⴰⵔⴹⴰ ⵡⴰⵔ ⵉⴵⵉ ⵄⴰⴷ ⴷ ⴰⵔⴹⴰ. ⵎⴰⵛⴰ ⵎⴰⵍⴰ ⵙ ⵍⴻⵅⴷⴰⵢⴻⵎ, ⵡⴰⵔ ⵜⴻⴵⵉ ⵄⴰⴷ ⴷ ⴰⵔⴹⴰ. ⵎⴰⵍⴰ ⵍⵍⴰ, ⴰⵇⴰ ⵍⵅⴻⴷⵎⴻⵜ ⵡⴰⵔ ⵜⴻⴵⵉ ⵄⴰⴷ ⴷ ⵍⵅⴻⴷⵎⴻⵜ. ^■

7 ⵎⵉⵏ ⵖⴰ ⵏⵉⵏⵉ ⵅⴻⵏⵏⵉ? ⵎⵉⵏ ⵜⵓⵖⴰ ⵜⴰⵔⴻⵣⵣⵓ ⵉⵙⵔⴰⵉⵍ ⵡⴰⵔ ⵜ ⵜᵉⵟⵟⵉⴼ, ⵎⴰⵛⴰ ⵉⵏⵏⵉ ⵉⵜⵜⵡⴰⴼⴰⵔⵣⴻⵏ ⵟⵟⴼⴻⵏ ⵜ ⵓⵛⴰ ⵉⵏⵏⴻⵖⵏⵉ ⴷⴻⵡⵍⴻⵏ ⴷ ⵉⴷⴰⵔⵖⴰⵍⴻⵏ ⴷⴻⴳ ⵡⵓⵍⴰⵡⴻⵏ ⵏⵙⴻⵏ, ^■ 8 ⴰⵎ ⵎⴰⵎⵎⴻⵛ ⵜⵓⵔⴰ:

“ⴰⵇⴰ ⴰⵔⴻⴱⴱⵉ ⵉⵡⵛⴰ ⴰⵙⴻⵏ ⴰⵔⵔⵓⵃ ⵉⴹⴱⴰⵔⴻⵏ

ⴷ ⵜⵉⵟⵟⴰⵡⵉⵏ ⵉ ⵡⴰⵔ ⵉⵜⵜⵡⵉⵍⵉⵏ,

ⴷ ⵉⵎⴻⵣⵣⵓⵖⴻⵏ ⵉ ⵡⴰⵔ ⵉⵜⵜⴻⵙⵍⵉⵏ,

ⴰⵍ ⴰⵙⵙ ⵏ ⵢⵉⴹⴰ.” ^■

9 ⴷⴰⵡⵓⴷ ⵉⵏⵏⴰ ⵄⴰⵡⴻⴷ:

“ⴰⴷ ⵜⴻⴷⵡⴻⵍ ⵜⴰⵣⴻⵡⴹⴰ ⵏ ⵜⵉⵖⴰⵔⵚⵉⵏ ⵏⵙⴻⵏ

ⴷ ⵍⴼⴻⵅ ⵉ ⵏⵉⵜⵏⵉ,

ⵓⵛⴰ ⴰⴷ ⵜⴻⴷⵡⴻⵍ ⵍⵎⵓⵏⴻⵜ ⵏⵙⴻⵏ ⴷ ⵜⵄⴻⵏⴽⵔⵉⴼⵜ. ^■

10 ⴻⵊⵊ ⴰⴷ ⴷⴰⵔⵖⵍⴻⵏⵜ ⵜⵉⵟⵟⴰⵡⵉⵏ ⵏⵙⴻⵏ

ⵃⵉⵎⴰ ⵡⴰⵔ ⵜⵜⵡⵉⵍⵉⵏ ⵏⵉⵜⵏⵉ,

ⵓⵛⴰ ⴻⵊⵊ ⴰⴷ ⵇⴻⵡⵙⴻⵏ ⵉⵄⵓⵔⴰⵔ ⵏⵙⴻⵏ ⵉ ⵍⴻⴱⴷⴰ.” ^■

11 ⵎⴰⵛⴰ ⵏⴻⵛⵛ ⴰⴷ ⵉⵏⵉⵖ ⵅⴻⵏⵏⵉ: ⵎⴰ ⵏⴷⴻⵔⴼⴻⵏ, ⵎⴰⵖⴰⵔ ⵉⵜⵜⵅⴻⵚⵚⴰ ⴰⴷ ⵡⴹⴰⵏ? ⵄⴻⵎⵎⴰⵔⵚ! ⵎⴰⵛⴰ ⵙ ⵓⵡⴻⵟⵟⵓ ⵏⵙⴻⵏ ⵜⵉⵡⴻⴹ-ⴷⴷ ⵜⵓⴷⴰⵔⵜ ⵉ ⵍⴻⴳⵏⵓⵙ, ⵃⵉⵎⴰ ⴰⴷ ⴷⴻⵡⵍⴻⵏ ⵜⵜⴰⵙⵎⴻⵏ. 12 ⵎⴰⵍⴰ ⵉⴷⵡⴻⵍ ⵓⵏⴻⴷⵔⴻⴼ ⵏⵙⴻⵏ ⴷ ⴰⴳⵍⴰ ⴷ ⴰⵎⴻⵇⵇⵔⴰⵏ ⵉ ⴷⴷⵓⵏⴻⵛⵜ ⵓⵛⴰ ⵍⵃⵓⴽⵎ ⵅⴰⵙⴻⵏ ⴷ ⴰⴳⵍⴰ ⵉ ⵍⴻⴳⵏⵓⵙ, ⵎⴻⵛⵃⴰⵍ ⵇⴰⵄ ⵉ ⵖⴰ ⵢⵉⵡⴻⴹ ⵓⵄⴻⵎⵎⴰⵔ ⵏⵙⴻⵏ ⴷ ⴰⴼⴻⵢⵢⴻⴹ. 13 ⴰⵇⴰ ⵙⵙⴰⵡⴰⵍⴻⵖ ⴰⴽⵉⴷⵡⴻⵎ, ⴰ ⵍⴻⴳⵏⵓⵙ, ⵏⴻⵛⵛ ⴷ ⵡⴻⵏⵏⵉ ⴷ ⵔⵔⴰⵙⵓⵍ ⵉ ⵍⴻⴳⵏⵓⵙ, ⴰⵇⴰ ⵜⵜⵙⵙⴻⵎⵖⴰⵔⴻⵖ ⴷⵉ ⵍⵅⴻⴷⵎⴻⵜ ⵏ ⵜⵙⴻⵅⵅⴰⵔⵜ ⵉⵏⵓ: ^□ ^■ 14 ⴰⴷ ⵜⴰⵖ ⴰⴷ ⵣⴻⵎⵎⴰⵔⴻⵖ ⴰⴷ ⵙⵙⴻⴽⴽⴰⵔⴻⵖ ⵜⵓⵙⵎⵉ ⴷⴻⴳ ⴰⵢⵜ ⵏ ⵍⴳⴻⵏⵙ ⵉⵏⵓ ⵓⵛⴰ ⴰⴷ ⵙⵙⵏⴻⵊⵎⴻⵖ ⵛⴰ ⵣⵣⴰⵢⵙⴻⵏ. 15 ⵉⵡⴰ, ⵎⴰⵍⴰ ⴰⵎⴻⵏⴹⴰⵔ ⵏⵙⴻⵏ ⴰⵇⴰ-ⵜ ⴷ ⴰⵚⵍⴰⵃ ⵉ ⴷⴷⵓⵏⴻⵛⵜ, ⵎⴰⵎⵎⴻⵛ ⵖⴰ ⵢⵉⵍⵉ ⵡⴻⴷⵡⴰⵍ ⵏⵙⴻⵏ ⵎⵖⵉⵔ ⴷ ⵜⵓⴷⴰⵔⵜ ⵣⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ! 16 ⵎⴰⵍⴰ ⵜⵓⵖⴰ ⵜⴰⵎⴻⵣⵡⴰⵔⵓⵜ ⵏ ⵚⵚⴰⴱⴻⵜ ⵜⵇⴻⴷⴷⴻⵙ, ⴰⵎⴻⵏⵏⵉ ⵓⵍⴰ ⴷ ⵍⵄⴻⵊⵏⴻⵜ ⵏ ⴰⵔⴻⵛⵜⵉ ⵜⵇⴻⴷⴷⴻⵙ! ⵎⴰⵍⴰ ⵜⵓⵖⴰ ⴰⵥⵡⴰⵔ ⵉⵇⴻⴷⴷⴻⵙ, ⴰⵎⴻⵏⵏⵉ ⵓⵍⴰ ⴷ ⵍⴻⴼⵔⵓⵄ. ^■ 17 ⵓⵛⴰ ⵎⴰⵍⴰ ⵜⵜⵡⴰⵇⴻⵙⵙⴻⵏ ⵛⴰ ⵏ ⵍⴻⴼⵔⵓⵄ ⵓ ⵅⴻⵏⵏⵉ ⵛⴻⴽ, ⴰⵎ ⵢⵉⵊⵊ ⵏ ⵓⵣⴻⵎⵎⵓⵔ ⵏ ⵍⴻⵅⵍⴰ, ⵜᵉⵜⵜⵡⴰⵍⴻⵇⵇⵎⴻⴷ ⴷⴻⴳ ⵡⴻⵎⵛⴰⵏ ⵏⵙⴻⵏ, ⵜⴷⴻⵡⵍⴻⴷ ⵜⵏⴻⴼⵄⴻⴷ ⵣⴻⴳ ⵉⵥⴻⵡⵔⴰⵏ ⴷ ⵣⵣⴻⵛⵜ ⵏ ⵜⵣⵉⵜⵓⵏⵜ, 18 ⵡⴰⵔ ⵜⵓⴼⴼ ⵛⴰ ⵅ ⵍⴻⴼⵔⵓⵄ. ⵎⴰⵍⴰ ⵜⵓⴼⴼⴻⴷ, ⵙⵙⴻⵏ, ⴰⵇⴰ ⵛⴻⴽ ⵡⴰⵔ ⵜⴻⴽⵙⵉⴷ ⵛⴰ ⴰⵥⵡⴰⵔ, ⵎⴰⵛⴰ ⴰⵥⵡⴰⵔ ⵉⴽⵙⵉ ⵛⴻⴽ.

19 ⴰⴷ ⵜⴰⵖ ⴰⴷ ⵜⵉⵏⵉⴷ: “ⴰⵇⴰ ⵜⵜⵡⴰⵇⴻⵙⵙⴻⵏ ⵍⴻⴼⵔⵓⵄ, ⵃⵉⵎⴰ ⵏⴻⵛⵛ ⴰⴷ ⵜⵜⵡⴰⵍⴻⵇⵇⵎⴻⵖ.” 20 ⵉⵡⴰ, ⵏⵉⵜⵏⵉ ⵜⵜⵡⴰⵇⴻⵙⵙⴻⵏ ⵣⵉ ⵙⵙⵉⴱⴱⴻⵜ ⵏ ⴱⵍⴰ ⵍ’ⵉⵎⴰⵏ ⵏⵙⴻⵏ, ⵓⵛⴰ ⵛⴻⴽ ⵙ ⵍ’ⵉⵎⴰⵏ ⵜᵉⵜⵜⵡⴰⵍⴻⵇⵇⵎⴻⴷ ⵓⵛⴰ ⵜⴻⴽⵙⵉⴷ ⴰⵎⵛⴰⵏ ⵏⵙⴻⵏ. ⵡⴰⵔ ⵜⵓⴼⴼ ⵛⴰ, ⵎⴰⵛⴰ ⴳⴳⵯⴻⴷ. 21 ⵎⵉⵏⵣⵉ ⵎⴰⵍⴰ ⵜⵓⵖⴰ ⴰⵔⴻⴱⴱⵉ ⵡⴰⵔ ⵉⵜⵜⵛⴻⵟⵟⴰⵔ ⵛⴰ ⵅ ⵍⴻⴼⵔⵓⵄ ⵏ ⵟⵟⴱⵉⵄⴻⵜ, ⵡⴰⵔ ⵅⴰⴽ ⵉⵜⵜⵛⴻⵟⵟⴰⵔ ⵛⴰ ⵄⴰⵡⴻⴷ. 22 ⴰⵇⴰ ⴷⴰ ⴷ ⵍⴻⴹⵔⴰⴼⴻⵜ ⵏ ⴰⵔⴻⴱⴱⵉ ⴷ ⵍⴻⵡⵄⴰⵔⴻⵜ ⵏⵏⴻⵙ: ⵍⴻⵡⵄⴰⵔⴻⵜ ⵅ ⵢⵉⵏⵏⵉ ⵉⵡⴹⴰⵏ, ⵎⴰⵛⴰ ⵍⴻⴹⵔⴰⴼⴻⵜ ⵅⴰⴽ ⵎⴰⵍⴰ ⵜᵉⵟⵟⴼⴻⴷ ⴷⵉ ⵍⴻⴹⵔⴰⴼⴻⵜ ⵏⵏⴻⵙ, ⵏⵉⵖ ⵓⵍⴰ ⴷ ⵛⴻⴽ ⴰⴷ ⵜᵉⵜⵜⵡⴰⵇⴻⵙⵙⴻⴷ. 23 ⵓⵍⴰ ⴷ ⵏⵉⵜⵏⵉ ⴰⴷ ⵜⵜⵡⴰⵍⴻⵇⵇⵎⴻⵏ, ⵎⴰⵍⴰ ⵡⴰⵔ ⵇⵇⵉⵎⴻⵏ ⴷⵉ ⵜⵉⴽⴽⴻⵙⵜ ⵏ ⵍ’ⵉⵎⴰⵏ ⵏⵙⴻⵏ, ⵎⵉⵏⵣⵉ ⵖⴰⵔ ⴰⵔⴻⴱⴱⵉ ⵜⵉⵣⴻⵎⵎⴰⵔ, ⵃⵉⵎⴰ ⴰⴷ ⵜⴻⵏ ⵉⵍⴻⵇⵇⴻⵎ ⵄⴰⵡⴻⴷ. ^■ 24 ⵎⵉⵏⵣⵉ ⵎⴰⵍⴰ ⵛⴻⴽ, ⵡⴻⵏⵏⵉ ⵉⴵⴰⵏ ⵙ ⵟⵟⴱⵉⵄⴻⵜ ⴷ ⵉⵊⵊ ⵏ ⵓⵣⴻⵎⵎⵓⵔ ⵏ ⵍⴻⵅⵍⴰ, ⵜᵉⵜⵜⵡⴰⵇⴻⵙⵙⴻⴷ ⵓⵛⴰ ⵜᵉⵜⵜⵡⴰⵍⴻⵇⵇⵎⴻⴷ ⴷⵉ ⵜⵣⵉⵜⵓⵏⵜ ⵜⴰⵚⴻⴱⵃⴰⵏⵜ, ⵎⴻⵛⵃⴰⵍ ⵉⵀⴻⵡⵏⴻⵏ ⴽⵜⴰⵔ ⴰⴷ ⵜⵜⵡⴰⵍⴻⵇⵇⵎⴻⵏ ⵏⵉⵜⵏⵉ ⴷⵉ ⵜⵣⵉⵜⵓⵏⵜ ⵏⵏⵉ ⴷⴷ-ⵉⵜⵜⴰⵙⴻⵏ ⴰⴽ-ⴷ ⵟⵟⴱⵉⵄⴻⵜ ⵏⵙⴻⵏ!

25 ⵎⵉⵏⵣⵉ ⵜⵜⴻⵅⵙⴻⵖ ⴰⴷ ⵜⴻⵙⵙⵏⴻⵎ ⵙⵙⵉⵔⵔ-ⴰ, ⴰ ⴰⵢⵜⵎⴰ, ⵃⵉⵎⴰ ⵡⴰⵔ ⵜⵜⵉⵍⵉⵎ ⴷ ⵉⵎⵉⵖⵉⵙⴻⵏ ⴰⴽ-ⴷ ⵢⵉⵅⴻⴼ ⵏⵡⴻⵎ, ⴰⵇⴰ ⵜⴻⵎⵙⴰⵔ ⵉⵛⵜ ⵏ ⵓⵙⴷⴰⵖⴻⵍ ⵏ ⵡⵓⵍ ⵅ ⵉⵙⵔⴰⵉⵍ ⵉ ⴷⵔⵓⵙ ⵏ ⵍⵡⴻⵇⵜ ⴰⵍ ⴷⴷ ⵖⴰ ⵢⴰⴷⴻⴼ ⵓⵄⴻⵎⵎⴰⵔ ⵏ ⵍⴻⴳⵏⵓⵙ, ^■ 26 ⵓⵛⴰ ⵅⴻⵏⵏⵉ ⵎⴰⵔⵔⴰ ⵉⵙⵔⴰⵉⵍ ⴰⴷ ⵜⴻⴷⵡⴻⵍ ⵖⴰⵔ ⵜⵓⴷⴰⵔⵜ ⴰⵎ ⵎⴰⵎⵎⴻⵛ ⵜⵓⵔⴰ:

“ⴰⵎⵙⴻⵏⵊⴻⵎ ⴰⴷ ⴷⴷ-ⵉⴼⴼⴻⵖ ⵣⵉ ⵚⵉⵀⵢⵓⵏ

ⵓⵛⴰ ⴰⴷ ⵉⵙⵙⴱⴻⵄⵄⴻⴷ ⵍⵎⵓⵄⵚⵉⵢⵢⴻⵜ ⵅ ⵢⴰⵄⵇⵓⴱ.” ^■

27 ”ⵅⴻⵏⵏⵉ ⴰⴷ ⵟⵟⴼⴻⵏ ⴷⵉ ⵍⵄⴰⵀⴷ

ⵉ ⴷⴷ-ⵢⵓⵙⵉⵏ ⵣⵣⴰⵢⵉ,

ⵅ ⵎⵉⵏⵏⵉ ⵉ ⵖⴰ ⵖⴼⴰⵔⴻⵖ ⵉ ⴷⴷⵏⵓⴱ ⵏⵙⴻⵏ.” ^■

28 ⵣⵉ ⵊⵊⵉⵀⴻⵜ ⵏ ⵍ’ⵉⵏⵊⵉⵍ ⵏⵉⵜⵏⵉ ⴰⵇⴰ ⴷ ⵍⵄⴻⴷⵢⴰⵏ ⴷⵉ ⵟⵟⵡⴻⵄ ⵏⵡⴻⵎ, ⵎⴰⵛⴰ ⵣⵉ ⵊⵊⵉⵀⴻⵜ ⵏ ⵍⵉⵅⴹⴰⵔⴻⵜ ⵉ ⵣⵉ ⵜⵜⵡⴰⵅⴹⴰⵔⴻⵏ ⵏⵉⵜⵏⵉ, ⴰⵇⴰ ⵏⵉⵜⵏⵉ ⴷ ⵉⵎⵄⵉⵣⵣⴻⵏ ⵅ ⵙⵙⵉⴱⴱⴻⵜ ⵏ ⵍⴻⵊⴷⵓⴷ. 29 ⵎⵉⵏⵣⵉ ⴰⵔⴻⴱⴱⵉ ⵡⴰⵔ ⵉⵜⵜⴱⴻⴷⴷⴰⵍ ⵜⴰⵡⵀⵉⴱⵜ ⵏⵏⴻⵙ ⵏ ⴰⵔⴹⴰ ⵓⵍⴰ ⴷ ⵜⵍⴰⵖⵉⵜ ⵏⵏⴻⵙ. 30 ⵎⵉⵏⵣⵉ ⴰⵎ ⵎⴰⵎⵎⴻⵛ ⵜⵓⵖⴰ ⴽⴻⵏⵏⵉⵡ ⵣⵉⵛ ⵡⴰⵔ ⵜᵉⵟⵟⵉⵄⴻⵎ ⵛⴰ ⴰⵔⴻⴱⴱⵉ, ⵎⴰⵛⴰ ⵍⴻⵅⵅⵓ ⴰⵇⴰ ⵜⴻⴽⵙⵉⵎ ⴰⵔⵔⴻⵃⵎⴻⵜ ⵙ ⵍⵎⵓⵄⵚⵉⵢⵢⴻⵜ ⵏⵙⴻⵏ, 31 ⴰⵎⵎⵓ ⵏⵉⵜⵏⵉ ⵄⴰⵡⴻⴷ ⵡⴰⵔ ⵟⵟⵉⵄⴻⵏ ⵛⴰ ⵍⴻⵅⵅⵓ ⵉ ⴰⵔⵔⴻⵃⵎⴻⵜ ⵜⴻⵏⵏⵉ ⵅⴰⵡⴻⵎ ⴷⴷ-ⵢⵓⵙⵉⵏ, ⵃⵉⵎⴰ ⴰⴷ ⵅⴰⵙⴻⵏ ⴷⴷ-ⵜⴰⵙ ⴰⵔⵔⴻⵃⵎⴻⵜ. 32 ⵎⵉⵏⵣⵉ ⴰⵔⴻⴱⴱⵉ ⵉⵃⴻⴱⴱⴻⵙ ⵉ-ⵜⴻⵏ ⵎⴰⵔⵔⴰ ⵙⴰⴷⵓ ⵍⵎⵓⵄⵚⵉⵢⵢⴻⵜ, ⵃⵉⵎⴰ ⴰⴷ ⵜⴻⵏ ⵢⴰⵔⵃⴻⵎ ⵎⴰⵔⵔⴰ. ^■

33 ⴰ, ⵔⴰⴵⴰⵖ ⵏ ⵡⴰⴳⵍⴰ ⴷ ⵜⵉⵖⵉⵜ ⴷ ⵜⵓⵙⵙⵏⴰ ⵏ ⴰⵔⴻⴱⴱⵉ, ⵎⴰⵎⵎⴻⵛ ⵖⴰ ⵢⴻⴳⴳ ⴱⵏⴰⴷⴻⵎ ⴰⴷ ⵉⵇⴻⴵⴻⴱ ⵍⴻⵃⴽⴰⵎⴰⵜ ⵏⵏⴻⵙ, ⵎⴰⵎⵎⴻⵛ ⵖⴰ ⵢⴻⴳⴳ ⴰⴷ ⵢⴰⴼ ⵉⴱⵔⵉⴷⴻⵏ ⵏⵏⴻⵙ.

34 “ⵎⵉⵏⵣⵉ ⵡⵉ ⵖⴰ ⵉⵙⵙⵏⴻⵏ ⵏⵏⴻⵢⵢⴻⵜ ⵏ ⵙⵉⴷⵉ?”

ⵏⵉⵖ:

“ⵡⵉ ⴷ ⴰⵙ ⵉⴵⴰⵏ ⴷ ⴰⵎⵛⴰⵡⴰⵔ?” ^■

35 ⵏⵉⵖ:

“ⵡⵉ ⴷ ⴰⵙ ⵉⵣⵣⴰⵔⴻⵏ ⵉⵡⵛⴰ ⴰⵙ ⵛⴰ,

ⵓⵎⵉ ⴷ ⴰⵙ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵅⴻⴵⴻⵚ ⵣⵣⴰⵢⴻⵙ?” ^■

36 ⵎⵉⵏⵣⵉ ⵎⴰⵔⵔⴰ ⵣⵣⴰⵢⴻⵙ ⵉ ⵉⴵⴰ, ⵓ ⵎⴰⵔⵔⴰ ⴷⴰⵢⴻⵙ, ⵓ ⵎⴰⵔⵔⴰ ⴰⵇⴰ-ⵜ ⵙ ⵓⴼⵓⵙ ⵏⵏⴻⵙ. ⵉ ⵏⴻⵜⵜⴰ ⵉ ⵖⴰ ⵢⵉⵍⵉ ⵎⴰⵔⵔⴰ ⴰⵙⴻⵎⵖⴰⵔ ⴷ ⵎⴰⵔⵔⴰ ⵍⴱⴰⵔⴰⴽⴰ ⵉ ⵍⴻⴱⴷⴰ ⵇⴰⵄ. ⴰⵎⵉⵏ! ^■