ⵉⵔⵓⵎⴰⵏⵉⵢⵢⴻⵏ 3

ⴰⵔⴻⴱⴱⵉ ⴷ ⵜⵉⴷⴻⵜⵜ ⵓ ⴽⵓⵍ ⴱⵏⴰⴷⴻⵎ ⴷⴰⵢⴻⵙ ⵍⵖⴻⵛⵛ

1 ⵉ ⵅⴻⵏⵏⵉ, ⵎⴰⵏ ⵍⴻⴼⴹⴻⵍ ⵖⴰⵔ ⵡⵓⴷⴰⵢⴻⵏ, ⵏⵉⵖ ⵎⴰⵏ ⵜⵉⵣⵉ ⵏ ⵡⴻⵅⵜⴰⵏ? 2 ⴰⵟⵟⴰⵙ ⵅ ⴽⵓⵍ ⵉⵖⴻⵣⴷⵉⵙⴻⵏ! ⵅⴻⵏⵏⵉ ⵖⴰⵔ ⵓⵎⴻⵣⵡⴰⵔ ⵎⵎⴻⵡⵛⴻⵏ ⴰⵙⴻⵏ ‬ⵡⴰⵡⴰⵍⴻⵏ ⵏ‮ ‬ⴰⵔⴻⴱⴱⵉ.    3 ⵎⴰⵖⴰⵔ ⵎⴰⵍⴰ ⵜⵓⵖⴰ ⵛⴰ ⵣⵣⴰⵢⵙⴻⵏ ⵡⴰⵔ ⵓⵎⵉⵏⴻⵏ ⵛⴰ, ⵎⴰ ⵅⴻⵏⵏⵉ ⴱⴻⴹⵍⴻⵏ ⵏⵉⵜⵏⵉ ⵍⴰⵎⴰⵏ ⵏ ⴰⵔⴻⴱⴱⵉ ⵣⵉ ⵙⵙⵉⴱⴱⴻⵜ ⵏ ⴱⵍⴰ ⵍ’ⵉⵎⴰⵏ ⵏⵙⴻⵏ?    4 ⵄⴻⵎⵎⴰⵔⵚ! ⵎⴰⵖⴰⵔ ⴰⵔⴻⴱⴱⵉ ⴷ ⵜⵉⴷⴻⵜⵜ ⵓⵛⴰ ⴽⵓⵍ ⴱⵏⴰⴷⴻⵎ ⴷ ⴱⵓ-ⵉⵅⴰⵔⵔⵉⵇⴻⵏ, ⴰⵎ ⵎⴰⵎⵎⴻⵛ ⵜⵓⵔⴰ:

“ⵛⴻⴽ ⴰⴷ ⵜⴱⴰⵏⴻⴷ ⴷ ⴰⵎⵙⴻⴳⴳⴻⴷ ⵙ ⵡⴰⵡⴰⵍⴻⵏ ⵏⵏⴻⵛ,

ⴰⴷ ⵜⵉⵍⵉⴷ ⵜⴽⴻⵎⵎⵍⴻⴷ ⴷⵉ ⵍⴻⵚⴼⴰⵢⴻⵜ

ⵅⵎⵉ ⵛⴻⴽ ⵉ ⵖⴰ ⵃⴰⵙⴱⴻⵏ.”   

5 ⵎⴰⵛⴰ ⵎⴰⵍⴰ ⵎⵉⵏ ⵡⴰⵔ ⵉⵙⵙⴻⴳⴳⴷⴻⵏ ⴷⴰⵢⵏⴻⵖ ⴰⵇⴰ ⵉⵙⵙⴱⴻⵢⵢⴻⵏ ⵜⴰⵙⴻⴳⴷⴰ ⵏ ⴰⵔⴻⴱⴱⵉ, ⵎⵉⵏ ⵖⴰ ⵏⵉⵏⵉ ⵄⴰⴷ ⵅⴻⵏⵏⵉ? ⵎⴰ ⴰⵔⴻⴱⴱⵉ ⵡⴰⵔ ⵖⴰⵔⴻⵙ ⴱⵓ ⵍⵃⴻⵇⵇ ⵓⵎⵉ ⵅⴰⵏⴻⵖ ⵉⴳⴳⴰ ⴰⵖⴹⴰⴱ ⵏⵏⴻⵙ? ⵏⴻⵛⵛ ⵙⵙⴰⵡⴰⵍⴻⵖ ⴰⵎ ⵢⵉⵊⵊ ⵏ ⴱⵏⴰⴷⴻⵎ ⴷ ⴰⵎⴻⴷⵏⵓⴱ. 6 ⵡⴰⵔ ⵅⴰⵙ ⵏⴻⵙⵙⵉⵡⵉⵍ! ⵎⴰⵎⵎⴻⵛ ⵉ ⵖⴰ ⵉⵃⴰⵙⴻⴱ ⴰⵔⴻⴱⴱⵉ ⴷⴷⵓⵏⴻⵛⵜ ⵍⴻⵅⴷⴻⵏⵏⵉ? 7 ⵎⴰⵎⵎⴻⵛ ⵎⴰⵍⴰ ⵜⴼⴻⵢⵢⴻⴹ ⵜⵉⴷⴻⵜⵜ ⵏ ⴰⵔⴻⴱⴱⵉ ⵖⴰⵔ ⵓⵄⵓⴵⵉ ⵏⵏⴻⵙ ⵙ ⵓⵅⴰⵔⵔⵉⵇ ⵉⵏⵓ, ⵎⴰⵢⴻⵎⵎⵉ ⵄⴰⴷ ⵉ ⵖⴰ ⵜⵜⵡⴰⵃⴰⵙⴱⴻⵖ ⴰⵎ ⵓⵎⴻⴷⵏⵓⴱ? 8 ⵡⴰⵔ ⵉⵄⴻⴷⴷⴻⵍ ⴰⵇⴰ ⵜⴰⵎⴻⵙⵍⴰⵛⵜ ⵜⴻⴵⴰ ⴰⵎ ⵎⴰⵎⵎⴻⵛ ⵇⵇⴰⵔⴻⵏ ⵉⵏⵏⵉ ⴷⴰⵢⵏⴻⵖ ⵉⵛⴻⵇⵇⴼⴻⵏ ⴱⴻⵍⵍⵉ ⵏⴻⵛⵛⵉⵏ ⵏⴻⵇⵇⴰⵔ: “ⴻⵊⵊ ⴰⵏⴻⵖ ⴰⴷ ⵏⴻⴳⴳ ⵜⵓⵄⴻⴼⴼⵏⴰ, ⵃⵉⵎⴰ ⴰⴷ ⵣⵣⴰⵢⴻⵙ ⴷⴷ-ⵢⴻⴽⴽ ⵎⵉⵏ ⵉⵛⵏⴰⵏ!”?, ⵉⵏⵏⵉ ⴰⵇⴰ ⵍⵃⵓⴽⵎ ⵅⴰⵙⴻⵏ ⴰⴷ ⵉⵜⵜⵡⴰⵅⴻⵎⵎⴻⵍ ⴰⵍ ⵛⵛⵔⴻⵄ ⵉⵙⴻⴳⴳⴷⴻⵏ.

9 ⵉ ⵅⴻⵏⵏⵉ ⵎⴰⵎⵎⴻⵛ? ⵎⴰ ⵏⴻⵛⵛⵉⵏ ⵃⵙⴻⵏ? ⵇⴱⴻⵍ ⴰⵇⴰ ⵏⵓⴼⴰ ⴰⵇⴰ ⵓⴷⴰⵢⴻⵏ ⴷ ⵉⵔⴰⵎⵉⵢⵢⴻⵏ ⵎⴰⵔⵔⴰ ⵙⴰⴷⵓ ⴷⴷⴻⵏⴱ,    10 ⴰⵎ ⵎⴰⵎⵎⴻⵛ ⵜⵓⵔⴰ:

“ⵓⵍⴰ ⴷ ⵉⵊⵊ ⵡⴰⵔ ⵉⴵⵉ ⴷ ⴰⵎⵙⴻⴳⴳⴻⴷ,   

11 ⵓⵍⴰ ⴷ ⵉⵊⵊ ⵡⴰⵔ ⵉⴼⴻⵀⵀⴻⵎ,

ⵓⵍⴰ ⴷ ⵉⵊⵊ ⵡⴰⵔ ⵢⴰⵔⴻⵣⵣⵓ ⵅ ⴰⵔⴻⴱⴱⵉ.

12 ⵎⴰⵔⵔⴰ ⴼⴼⵖⴻⵏ ⵣⴻⴳ ⵡⴻⴱⵔⵉⴷ, ⵎⵎⴻⵏⴹⴰⵔⴻⵏ,

ⵓⵍⴰ ⴷ ⵉⵊⵊ ⵡⴰⵔ ⵉⵜⵜⴻⴳⴳ ⵜⵛⵓⵏⵉ, ⵓⵍⴰ ⴷ ⵉⵊⵊ.   

13 ⵜⵎⵉⵊⵊⴰⵡⵉⵏ ⵏⵙⴻⵏ ⴷ ⵉⵎⴻⴹⵍⴰⵏ ⵢⴰⵔⴻⵣⵎⴻⵏ,

ⵙ ⵉⵍⵙⴰⵡⴻⵏ ⵏⵙⴻⵏ ⵛⴻⵎⵎⵜⴻⵏ,

ⵙⵙⴻⵎ ⵏ ⵉⴼⵉⵖⵔⴰⵏ ⵙⴰⴷⵓ ⵉⵢⴻⵏⵛⵉⵛⴻⵏ ⵏⵙⴻⵏ,   

14 ⴰⵇⴻⵎⵎⵓⵎ ⵏⵙⴻⵏ ⵉⵛⵛⵓⵔ ⵙ ⵏⵏⴻⵄⵍⴻⵜ ⴷ ⵜⴰⵔⵣⵓⴳⵉ,   

15 ⵙ ⵉⴹⴰⵔⴻⵏ ⵏⵙⴻⵏ ⵜⵜⵇⴻⴵⵉⵇⴻⵏ

ⵖⴰⵔ ⵓⵙⵉⵣⵣⴻⵍ ⵏ ⵉⴷⴰⵎⵎⴻⵏ,   

16 ⴰⵔⴻⵢⵢⴻⴱ ⴷ ⵜⴰⵎⴰⵔⴰ ⴷⴻⴳ ⵉⴱⵔⵉⴷⴻⵏ ⵏⵙⴻⵏ,

17 ⴰⴱⵔⵉⴷ ⵏ ⵍⴻⵀⵏⴰ ⵡⴰⵔ ⵜ ⵙⵙⵉⵏⴻⵏ ⵛⴰ,   

18 ⵜⵉⴳⴳⵯⵓⴷⵉ ⵏ ⴰⵔⴻⴱⴱⵉ

ⵡⴰⵔ ⵜⴻⴵⵉ ⵇⵉⴱⴰⵍⵜ ⵉ ⵜⵉⵟⵟⴰⵡⵉⵏ ⵏⵙⴻⵏ.”  

19 ⵏⴻⵛⵛⵉⵏ ⵏⴻⵙⵙⴻⵏ ⴱⴻⵍⵍⵉ ⵎⴰⵔⵔⴰ ⵎⵉⵏ ⵜⴻⵇⵇⴰⵔ ⵛⵛⴰⵔⵉⵄⴰ, ⴰⵇⴰ ⵜⴻⵇⵇⴰⵔ ⵉ-ⵜ ⵉ ⵢⵉⵏⵏⵉ ⵉⴵⴰⵏ ⵙⴰⴷⵓ ⵛⵛⴰⵔⵉⵄⴰ, ⵃⵉⵎⴰ ⴰⴷ ⵉⵜⵜⵡⴰⵇⵇⴻⵏ ⴽⵓⵍ ⴰⵇⴻⵎⵎⵓⵎ ⵓⵛⴰ ⴰⴷ ⵜⴻⴷⵡⴻⵍ ⵎⴰⵔⵔⴰ ⴷⴷⵓⵏⴻⵛⵜ ⴷⴰⵢⴻⵙ ⵍⵄⵉⴱ ⵣⵣⴰⵜ ⵉ ⴰⵔⴻⴱⴱⵉ, 20 ⵎⴰⵖⴰⵔ ⵣⵉ ⵍⴻⵅⴷⴰⵢⴻⵎ ⵏ ⵛⵛⴰⵔⵉⵄⴰ ⵡⴰⵔ ⵉⵜⵜⵡⴰⵙⴻⴳⴳⴻⴷ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵇⵉⴱⴰⵍⵜ ⵏⵏⴻⵙ, ⵎⵉⵏⵣⵉ ⵙ ⵛⵛⴰⵔⵉⵄⴰ ⴰⵇⴰ ⵜⵜⵡⴰⵙⵙⵏⴻⵏ ⴷⴷⵏⵓⴱ.   

ⵜⴰⵙⴻⴳⴷⴰ ⵙ ⵍ’ⵉⵎⴰⵏ ⵡⴻⵃⵃⴷⴻⵙ

21 ⵎⴰⵛⴰ ⵍⴻⵅⵅⵓ ⴰⵇⴰ ⵜⴻⴹⵀⴰⵔ-ⴷⴷ ⵜⵙⴻⴳⴷⴰ ⵏ ⴰⵔⴻⴱⴱⵉ ⴱⵍⴰ ⵛⵛⴰⵔⵉⵄⴰ, ⵜⵛⴻⵀⵀⴻⴷ ⵅⴰⵙ ⵛⵛⴰⵔⵉⵄⴰ ⴷ ⵉⵏⴰⴱⵉⵢⵢⴻⵏ,    22 ⴰⵇⴰ ⵜⴰⵙⴻⴳⴷⴰ ⵏ ⴰⵔⴻⴱⴱⵉ ⵣⵉ ⵍ’ⵉⵎⴰⵏ ⵏ ⵢⴻⵛⵛⵓ ⵍⵎⴰⵙⵉⵃ ⵖⴰⵔ ⵎⴰⵔⵔⴰ ⵓ ⵅ ⵎⴰⵔⵔⴰ ⵉⵏⵏⵉ ⵣⵣⴰⵢⴻⵙ ⵢⵓⵎⵏⴻⵏ, ⵎⵉⵏⵣⵉ ⵡⴰⵔ ⴷⵉⵏ ⴱⵓ ⵍⴼⴰⵔⵣ. 23 ⵎⵉⵏⵣⵉ ⵎⴰⵔⵔⴰ ⵅⴹⴰⵏ ⵓⵛⴰ ⵉⵏⴻⵇⵚ ⵉ-ⵜⴻⵏ ⵓⵄⵓⴵⵉ ⵏ ⴰⵔⴻⴱⴱⵉ, 24 ⵓⵛⴰ ⵜⵜⵡⴰⵙⴻⴳⴳⴷⴻⵏ ⴱⴰⵟⴻⵍ ⵙ ⴰⵔⴹⴰ ⵏⵏⴻⵙ ⵙ ⵓⴼⴻⴽⴽⵉ ⵉ ⵉⴵⴰⵏ ⴷⵉ ⵢⴻⵛⵛⵓ ⵍⵎⴰⵙⵉⵃ.    25 ⴰⵔⴻⴱⴱⵉ ⵉⴳⴳⴰ ⵉ-ⵜ ⴷ ⴰⵚⵍⴰⵃ ⵇⴱⴻⵍ ⵙ ⵍ’ⵉⵎⴰⵏ ⴷⴻⴳ ⵉⴷⴰⵎⵎⴻⵏ ⵏⵏⴻⵙ, ⴷⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏⵏⴻⵖ ⵏⵏⵉ ⵜⵓⵖⴰ ⵏⴻⴳⴳⴰ ⵣⵉⵛ ⴷⵉ ⵍⵎⵉⵊⴰⵍ ⵏ ⵍⵡⴻⵇⵜ ⵉ ⴷ ⴰⵏⴻⵖ ⵉⵡⵛⴰ ⴰⵔⴻⴱⴱⵉ ⵙ ⵜⵜⴰⵙⵉⵄ ⵏ ⵍⵅⴰⴹⴰⵔ ⵏⵏⴻⵙ, ⵃⵉⵎⴰ ⴰⴷ ⵉⵙⵙⵛⴻⵏ ⵜⴰⵙⴻⴳⴷⴰ ⵏⵏⴻⵙ ⴷⵉ ⵍⵡⴻⵇⵜ-ⴰ,    26 ⵎⴰⵃⴻⵏⴷ ⴷⵉ ⵜⵙⴻⴳⴷⴰ ⴰⴷ ⵢⴰⵔⵔ ⴷ ⴰⵎⵙⴻⴳⴳⴰⴷ ⵡⵉ ⵉⴵⴰⵏ ⴷⵉ ⵍ’ⵉⵎⴰⵏ ⵏ ⵙⵉⴷⵉⵜⵏⴻⵖ ⵢⴻⵛⵛⵓ ⵍⵎⴰⵙⵉⵃ.

27 ⵎⴰⵏⵉ ⵉⴵⴰ ⵅⴻⵏⵏⵉ ⵓⵙⴻⵎⵖⴰⵔ? ⵡⴰⵔ ⵅⴰⵙ ⵏⴻⵙⵙⵉⵡⵉⵍ. ⵙ ⵎⴰⵏ ⵛⵛⴰⵔⵉⵄⴰ? ⵙ ⵎⴰⵏ ⵍⴻⵅⴷⴰⵢⴻⵎ? ⵄⴻⵎⵎⴰⵔⵚ, ⵎⴰⵛⴰ ⵙ ⵛⵛⴰⵔⵉⵄⴰ ⵏ ⵍ’ⵉⵎⴰⵏ. 28 ⵙ ⵓⵢⴰ ⵏⴻⵃⵙⴻⴱ ⴱⴻⵍⵍⵉ ⴱⵏⴰⴷⴻⵎ ⴰⴷ ⵉⵜⵜⵡⴰⵙⴻⴳⴳⴻⴷ ⵙ ⵍ’ⵉⵎⴰⵏ, ⵡⴰⵔ ⵉⴵⵉ ⵙ ⵍⴻⵅⴷⴰⵢⴻⵎ ⵏ ⵛⵛⴰⵔⵉⵄⴰ.    29 ⵏⵉⵖ ⴰⵔⴻⴱⴱⵉ ⵏ ⵡⵓⴷⴰⵢⴻⵏ ⵡⴰⵀⴰ, ⵡⴰⵔ ⵉⴵⵉ ⵏ ⵍⴻⴳⵏⵓⵙ ⵄⴰⵡⴻⴷ? ⵡⴰⵀ, ⵓⵍⴰ ⵏ ⵍⴻⴳⵏⵓⵙ! 30 ⵎⵉⵏⵣⵉ ⴰⵔⴻⴱⴱⵉ ⴷ ⵉⵊⵊⴻⵏ ⵡⴻⵏⵏⵉ ⵉ ⵖⴰ ⵉⵙⴻⴳⴳⴷⴻⵏ ⵉⵏⵏⵉ ⵉⵜⵜⵡⴰⵅⴻⵜⵏⴻⵏ ⵙ ⵍ’ⵉⵎⴰⵏ, ⵓ ⵄⴰⵡⴻⴷ ⵉⵏⵏⵉ ⵡⴰⵔ ⵉⵜⵜⵡⴰⵅⵜⵉⵏⴻⵏ ⵙ ⵍ’ⵉⵎⴰⵏ. 31 ⵎⴰ ⵏⴱⴻⵟⵟⴻⵍ ⵛⵛⴰⵔⵉⵄⴰ ⵙ ⵍ’ⵉⵎⴰⵏ? ⵡⴰⵢⵢⴰⵡ, ⵙ ⵍⴻⵎⵇⵍⵓⴱ, ⵏⴻⵛⵛⵉⵏ ⴰⴷ ⵏⴻⴹⵎⴻⵏ ⵛⵛⴰⵔⵉⵄⴰ.