ⵍⵃⵓⴽⵎ ⵅ ⵢⴻⵛⵛⵓ
19
1 ⵅⴻⵏⵏⵉ ⵉⵊⵊⴰ ⴱⵉⵍⴰⵟⵓⵙ ⴰⴷ ⵀⴻⵜⵜⴽⴻⵏ ⵢⴻⵛⵛⵓ ⵙ ⵓⵔⴻⴽⴽⵓⴹ. ■ 2 ⴰⵡⴰⵔⵏⵉ ⵍⴰⵎⵉ ⵎⵓⴷⴻⵏ ⵉⵄⴻⵙⴽⴰⵔⵉⵢⵢⴻⵏ ⵉⵊⵊ ⵏ ⵜⵜⴰⵊ ⵙ ⵉⵙⴻⵏⵏⴰⵏⴻⵏ, ⵙⵙⴰⵔⵙⴻⵏ ⴰⵙ ⵜⵜ ⵅ ⵓⵣⴻⴵⵉⴼ ⵏⵏⴻⵙ ⵓⵛⴰ ⵢⴰⵔⴹⴻⵏ ⴰⵙ ⵉⵊⵊ ⵏ ⵓⵙⴻⵍⵀⴰⵎ ⴷ ⴰⵔⵊⵓⵡⴰⵏⵉ, 3 ⵏⵏⴰⵏ: “ⵙⵍⴰⵎ ⵅⴰⴽ, ⴰ ⴰⵊⴻⴵⵉⴷ ⵏ ⵡⵓⴷⴰⵢⴻⵏ!”, ⵓⵛⴰ ⵡⵜⵉⵏ ⵜ ⵅ ⵉⴳⴻⵎⵎⵉⵣⴻⵏ ⵏⵏⴻⵙ. 4 ⵉⴼⴼⴻⵖ-ⴷⴷ ⵄⴰⵡⴻⴷ ⴱⵉⵍⴰⵟⵓⵙ, ⵉⵏⵏⴰ ⴰⵙⴻⵏ: “ⴰⴷ ⴰⵡⴻⵎ ⵜ-ⵉ-ⴷⴷ-ⵙⵙⵓⴼⴼⵖⴻⵖ, ⵃⵉⵎⴰ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⵡⴰⵔ ⴷⴰⵢⴻⵙ ⵓⴼⵉⵖ ⵙⵙⵉⴱⴱⴻⵜ ⵉ ⵓⵛⴻⵜⵛⵉ, ⵓⵍⴰ ⴷ ⵉⵛⵜ.” 5 ⵅⴻⵏⵏⵉ ⵉⴼⴼⴻⵖ-ⴷⴷ ⵢⴻⵛⵛⵓ ⵙ ⵜⵜⴰⵊ ⵏ ⵉⵙⴻⵏⵏⴰⵏⴻⵏ ⴷ ⵓⵊⴻⴵⴰⴱ ⴰⵊⵓⵔⵡⴰⵏⵉ. ⵉⵏⵏⴰ ⴰⵙⴻⵏ ⴱⵉⵍⴰⵟⵓⵙ: “ⵅⵣⴰⵔⴻⵎ, ⴱⵏⴰⴷⴻⵎ!”
6 ⵍⴰⵎⵉ ⵜ ⵥⵔⵉⵏ ⵉⵎⴻⵇⵇⵔⴰⵏⴻⵏ ⵏ ⵉⴽⴻⵀⵀⴰⵏⴻⵏ ⴷ ⵉⵄⴻⵙⵙⴰⵙⴻⵏ, ⵙⵖⵓⵢⴻⵏ, ⵏⵏⴰⵏ: “ⵚⴻⵍⵍⴱ ⵉ-ⵜ, ⵚⴻⵍⵍⴱ ⵉ-ⵜ” ⵉⵏⵏⴰ ⴰⵙⴻⵏ ⴱⵉⵍⴰⵟⵓⵙ: “ⴰⵡⵢⴻⵎ ⵜ-ⵉ-ⴷⴷ ⴽⴻⵏⵏⵉⵡ, ⵚⴻⵍⵍⴱⴻⵎ ⵜ, ⵎⵉⵏⵣⵉ ⵏⴻⵛⵛ ⵡⴰⵔ ⴷⴰⵢⴻⵙ ⵓⴼⵉⵖ ⵓⵍⴰ ⴷ ⵉⵊⵊ ⵏ ⵍⵄⵉⴱ.” 7 ⴰⵔⵔⵉⵏ-ⴷⴷ ⵅⴰⵙ ⵡⵓⴷⴰⵢⴻⵏ: “ⵖⴰⵔⵏⴻⵖ ⵛⵛⴰⵔⵉⵄⴰ, ⵓ ⵄⵍⴰⵃⵙⴰⴱ ⵛⵛⴰⵔⵉⵄⴰ ⵏⵏⴻⵖ ⵉⵜⵜⵅⴻⵚⵚⴰ ⴰⴷ ⵉⵎⵎⴻⵜ, ⵎⵉⵏⵣⵉ ⵏⴻⵜⵜⴰ ⵉⵜⵜⴰⵔⵔⴰ ⵉⵅⴻⴼ ⵏⵏⴻⵙ ⴷ ⵎⵎⵉⵙ ⵏ ⴰⵔⴻⴱⴱⵉ.” ■
8 ⵍⴰⵎⵉ ⵉⵙⵍⴰ ⴱⵉⵍⴰⵟⵓⵙ ⴰⵡⴰⵍ-ⴰ, ⵢⴰⵔⵏⵉ ⴷⵉ ⵜⵉⴳⴳⵯⵓⴷⵉ. 9 ⵢⵓⴷⴻⴼ ⵄⴰⵡⴻⴷ ⵖⴰⵔ ⵜⴰⴷⴷⴰⵔⵜ ⵏ ⵛⵛⵔⴻⵄ, ⵉⵏⵏⴰ ⵉ ⵢⴻⵛⵛⵓ: “ⵎⴰⵏⵉⵙ ⵛⴻⴽ?” ⵎⴰⵛⴰ ⵢⴻⵛⵛⵓ ⵡⴰⵔ ⵅⴰⵙ ⴷⴷ-ⵢⴰⵔⵔⵉ ⵛⴰ. 10 ⵉⵏⵏⴰ ⴰⵙ ⴱⵉⵍⴰⵟⵓⵙ: “ⵎⴰ ⵡⴰⵔ ⵜⴻⵅⵙⴻⴷ ⴰⴷ ⴽⵉⴷⵉ ⵜⴻⵙⵙⵉⵡⵉⵍⴻⴷ? ⵎⴰ ⵡⴰⵔ ⵜⴻⵙⵙⵉⵏⴻⴷ ⵛⴰ ⴰⵇⴰ ⵖⴰⵔⵉ ⵚⵚⵓⵍⵟⴰ ⵃⵉⵎⴰ ⴰⴷ ⴰⵛ ⵙⵙⴰⵔⵔⵃⴻⵖ ⵓ ⵖⴰⵔⵉ ⵚⵚⵓⵍⵟⴰ ⵃⵉⵎⴰ ⴰⴷ ⵛⴻⴽ ⵚⴻⵍⵍⴱⴻⵖ?” 11 ⵢⴰⵔⵔⴰ-ⴷⴷ ⵅⴰⵙ ⵢⴻⵛⵛⵓ: “ⵡⴰⵔ ⵖⴰⵔⴻⴽ ⵜᵉⵜⵜⵉⵍⵉ ⴱⵓ ⵚⵚⵓⵍⵟⴰ ⵅⴰⴼⵉ, ⵎⴰⵍⴰ ⵡⴰⵔ ⴷ ⴰⵛ ⴷⴷ-ⵜⴻⵎⵎⴻⵡⵛ ⵣⵉ ⵙⴻⵏⵏⴻⵊ. ⵙ ⵓⵢⴰ, ⵡⴻⵏⵏⵉ ⴷ ⴰⵢⵉ ⵉⵙⴻⵍⵍⵎⴻⵏ ⵉ ⵛⴻⴽ, ⴰⵇⴰ ⵅⴰⵙ ⴷⴷⴻⵏⴱ ⵉⵎⵖⴰⵔ ⵣⴻⴳ ⵡⴻⵏⵏⵉ ⵉ ⵉⴵⴰⵏ ⵅⴰⴽ.” 12 ⵣⵉ ⵍⴻⵅⴷⴻⵏⵏⵉ ⵜⵓⵖⴰ ⴱⵉⵍⴰⵟⵓⵙ ⵢⴰⵔⴻⵣⵣⵓ ⴰⴷ ⴰⵙ ⵉⵙⴰⵔⵔⴻⵃ, ⵎⴰⵛⴰ ⵓⴷⴰⵢⴻⵏ ⵙⵖⵓⵢⴻⵏ, ⵏⵏⴰⵏ: “ⵎⴰⵍⴰ ⵜⵙⴰⵔⵔⵃⴻⴷ ⵉ ⵡⴻⵔⵢⴰⵣ-ⴰ, ⵡⴰⵔ ⵜⴻⴵⵉⴷ ⵛⴰ ⴷ ⴰⵎⴻⴷⴷⵓⴽⴽⴻⵍ ⵏ ⵇⴰⵢⵚⴰⵔ. ⴽⵓⵍ ⵉⵊⵊⴻⵏ ⵡⴻⵏⵏⵉ ⵉⵜⵜⴰⵔⵔⴰⵏ ⵉⵅⴻⴼ ⵏⵏⴻⵙ ⴷ ⴰⵊⴻⴵⵉⴷ, ⵉⵜⵜⵄⴻⴽⴽⴰⵙ ⵇⴰⵢⵚⴰⵔ.” ■
13 ⵍⴰⵎⵉ ⵉⵙⵍⴰ ⴱⵉⵍⴰⵟⵓⵙ ⵉ ⵡⴰⵡⴰⵍ-ⴰ, ⵉⵙⵙⵓⴼⴼⴻⵖ ⵢⴻⵛⵛⵓ, ⵉⵇⵇⵉⵎ ⵅ ⵍⴽⵓⵔⵙⵉ ⵏ ⵛⵛⵔⴻⵄ ⴷⴻⴳ ⵡⴻⵎⵛⴰⵏ ⵓⵎⵉ ⵇⵇⴰⵔⴻⵏ ‘ⴰⵣⵣⴰⵢ ⵏ ⵍⵓⵚⴰ’, ⵎⴰⵛⴰ ⵇⵇⴰⵔⴻⵏ ⴰⵙ ⵙ ⵜⵄⵉⴱⵔⴰⵏⵉⵜ ‘ⴳⴱⵉⴱⵜⴰ’. □ 14 ⵜⵓⵖⴰ ⴷ ⴰⵙⵙ ⵏ ⵓⵙⴻⵡⵊⴻⴷ ⵉ ⵜⵖⴰⵔⵚⵜ ⵏ ⵓⵙⴻⵄⴷⵓ. ⵜⵓⵖⴰ ⵄⵍⴰⵃⴰⵍ ⴷ ⵜⵙⴰⵄⵄⴻⵜ ⵡⵉⵙⵙ ⵙⴻⵜⵜⴰ ⵖⴰⵔ ⵜⵓⴼⴼⵓⵜ, ⵍⴰⵎⵉ ⵉⵏⵏⴰ ⵉ ⵡⵓⴷⴰⵢⴻⵏ: “ⵅⵣⴰⵔⴻⵎ, ⴰⵊⴻⴵⵉⴷ ⵏⵡⴻⵎ!” 15 ⵎⴰⵛⴰ ⵏⵉⵜⵏⵉ ⵙⵖⵓⵢⴻⵏ: “ⴽⵙⵉ ⵜ, ⴽⵙⵉ ⵜ, ⵚⴻⵍⵍⴱ ⵉ-ⵜ!” ⵉⵏⵏⴰ ⴰⵙⴻⵏ ⴱⵉⵍⴰⵟⵓⵙ: “ⵎⴰ ⴰⴷ ⵚⴻⵍⵍⴱⴻⵖ ⵅⴻⵏⵏⵉ ⴰⵊⴻⴵⵉⴷ ⵏⵡⴻⵎ?” ⴰⵔⵔⵉⵏ-ⴷⴷ ⵅⴰⵙ ⵉⵎⴻⵇⵇⵔⴰⵏⴻⵏ ⵏ ⵉⴽⴻⵀⵀⴰⵏⴻⵏ: “ⵡⴰⵔ ⵖⴰⵔⵏⴻⵖ ⴱⵓ ⵓⵊⴻⴵⵉⴷ ⵎⵖⵉⵔ ⵇⴰⵢⵚⴰⵔ!” ■ 16 ⵅⴻⵏⵏⵉ ⵉⵙⴻⵍⵍⴻⵎ ⴰⵙⴻⵏ ⵜ ⵃⵉⵎⴰ ⴰⴷ ⵜ ⵚⴻⵍⵍⴱⴻⵏ. ⵓⵛⴰ ⵏⵉⵜⵏⵉ ⴽⵙⵉⵏ ⵢⴻⵛⵛⵓ, ⵉⵡⵢⴻⵏ ⵜ ⵙⵙⴻⵏⵏⵉ. ■
ⵢⴻⵛⵛⵓ ⵢⴰⵔⴻⴱⴱⵓ ⵚⵚⴰⵍⵉⴱ
17 ⵢⴰⵔⴱⵓ ⵚⵚⴰⵍⵉⴱ ⵏⵏⴻⵙ ⵖⴰⵔ ⵡⴻⵎⵛⴰⵏ ⵓⵎⵉ ⵇⵇⴰⵔⴻⵏ ‘ⵜⴰⵛⴻⵇⵇⵓⴼⵜ’, ⵎⴰⵛⴰ ⵙ ⵜⵄⵉⴱⵔⴰⵏⵉⵜ ⵇⵇⴰⵔⴻⵏ ⴰⵙ ‘ⵊⵓⵍⵊⵓⵜⴰ’. □ ■ 18 ⵚⴻⵍⵍⴱⴻⵏ ⵜ ⴷⵉⵏⵏⵉ, ⵓⵛⴰ ⵚⴻⵍⵍⴱⴻⵏ ⴰⴽⵉⴷⴻⵙ ⵜⵏⴰⵢⴻⵏ ⵏⵏⴻⵖⵏⵉ, ⵉⵊⵊⴻⵏ ⵖⴰⵔ ⵉⵊⵊ ⵏ ⵓⵖⴻⵣⴷⵉⵙ ⵓ ⵡⴻⵏⵏⴻⵖⵏⵉ ⵖⴰⵔ ⵓⵖⴻⵣⴷⵉⵙ ⵏⵏⴻⵖⵏⵉ, ⵓ ⵢⴻⵛⵛⵓ ⴷⵉ ⵍⵡⴻⵙⵟ. 19 ⵢⵓⵔⴰ ⴱⵉⵍⴰⵟⵓⵙ ⵄⴰⵡⴻⴷ ⴷⴻⴳ ⵉⵛⵜ ⵜⴻⵍⵡⵉⵃⵜ, ⵉⵙⵙⴰⵔⵙ ⵉ-ⵜⵜ ⵅ ⵚⵚⴰⵍⵉⴱ. ⴰⵎⵎⵓ ⵉ ⵉⵜⵜⵡⴰⵔⵉ ⴷⴰⵢⴻⵙ: ‘ⵡⴰⵏⵉⵜⴰ ⴷ ⵢⴻⵛⵛⵓ ⵏⵏⴰⵚⵉⵔⵉ, ⴰⵊⴻⴵⵉⴷ ⵏ ⵡⵓⴷⴰⵢⴻⵏ’. ■ 20 ⵜⵉⵔⴰ-ⵢⴰ ⵖⵔⵉⵏ ⵜⴻⵏⵜ ⴰⵟⵟⴰⵙ ⵏ ⵡⵓⴷⴰⵢⴻⵏ, ⵎⵉⵏⵣⵉ ⴰⵎⵛⴰⵏ ⵎⴰⵏⵉ ⵜⵓⵖⴰ ⵚⴻⵍⵍⴱⴻⵏ ⵢⴻⵛⵛⵓ ⵢⵓⴷⴻⵙ-ⴷⴷ ⵉ ⵜⴻⵏⴷⵉⵏⵜ. ⵜⵉⵔⴰ-ⵢⴰ ⵜⵜⵡⴰⵔⵉⵏⵜ ⵙ ⵜⵄⵉⴱⵔⴰⵏⵉⵜ ⴷ ⵜⵍⴰⵜⵉⵏⵉⵜ ⴷ ⵜⵢⵓⵏⴰⵏⵉⵜ. 21 ⵏⵏⴰⵏ ⵉⵎⴻⵇⵇⵔⴰⵏⴻⵏ ⵏ ⵉⴽⴻⵀⵀⴰⵏⴻⵏ ⵉ ⴱⵉⵍⴰⵟⵓⵙ: “ⵡⴰⵔ ⵜⵜⴰⵔⵉ ⵛⴰ: ‘ⴰⵊⴻⴵⵉⴷ ⵏ ⵡⵓⴷⴰⵢⴻⵏ’, ⵎⴰⵛⴰ ⴰⵇⴰ ⵉⵏⵏⴰ: ‘ⵏⴻⵛⵛ ⴷ ⴰⵊⴻⴵⵉⴷ ⵏ ⵡⵓⴷⴰⵢⴻⵏ!’ ” 22 ⵢⴰⵔⵔⴰ-ⴷⴷ ⴱⵉⵍⴰⵟⵓⵙ: “ⵎⵉⵏ ⵓⵔⵉⵖ, ⴰⵇⴰ ⵓⵔⵉⵖ ⵜ.”
23 ⵍⴰⵎⵉ ⵚⴻⵍⵍⴱⴻⵏ ⵉⵄⴻⵙⴽⴰⵔⵉⵢⵢⴻⵏ ⵢⴻⵛⵛⵓ, ⴽⵙⵉⵏ ⴰⵔⵔⵓⴹ ⵏⵏⴻⵙ, ⴱⴹⴰⵏ ⵜ ⵅ ⴰⵔⴻⴱⵄⴰ ⵏ ⵜⵙⴻⵇⵇⴰⵔ, ⵉ ⴽⵓⵍ ⴰⵄⴻⵙⴽⴰⵔⵉ ⵉⵛⵜ ⵏ ⵜⴻⵙⵖⴰⵔⵜ. ⵎⴰⵛⴰ ⵜⵛⴰⵎⵉⵔ ⵏⵏⴻⵙ ⵜⵓⵖⴰ ⴱⵍⴰ ⵜⴰⵅⴻⵢⵢⴰⴹⵜ, ⵜᵉⵜⵜⵡⴰⵅⴻⵢⵢⴻⴹ ⵇⴰⵄ ⵣⵉ ⵙⴻⵏⵏⴻⵊ. ■ 24 ⵏⵏⴰⵏ ⵉ ⵡⴰⵢⴰⵡⵢⴰ: “ⵡⴰⵔ ⵜ ⵏⴻⵜⵜⵛⴰⵔⵔⵉⴳ ⵛⴰ, ⴰⴷ ⵅⴰⵙ ⵏⴻⴳⴳ ⴰⴽⴻⵛⵛⵓⴹ, ⴰⴷ ⵏⵥⴰⵔ ⵡⵉ ⵜ ⵖⴰ ⵢⴰⵡⵢⴻⵏ!” ⴰⵎⵎⵓ ⵉ ⵉⵜⵜⵡⴰⴽⴻⵎⵎⴻⵍ ⴰⵡⴰⵍ ⵏ ⵜⵉⵔⴰ ⵉⵇⴻⴷⴷⵙⴻⵏ ⵉ ⵉⵇⵇⴰⵔⴻⵏ: “ⴱⴹⴰⵏ ⴰⵔⵔⵓⴹ ⵉⵏⵓ ⵊⴰⵔ ⴰⵙⴻⵏ ⵓ ⵅ ⵜⵛⴰⵎⵉⵔ ⵉⵏⵓ ⴳⴳⵉⵏ ⴰⴽⴻⵛⵛⵓⴹ.” ⵎⴰⵏ ⴰⵢⴰ ⵉ ⵉⴳⴳⵉⵏ ⵉⵄⴻⵙⴽⴰⵔⵉⵢⵢⴻⵏ. ■
25 ⵖⴰⵔ ⵚⵚⴰⵍⵉⴱ ⵏ ⵢⴻⵛⵛⵓ ⵜⴱⴻⴷⴷ ⵢⴻⵎⵎⴰⵙ, ⴷ ⵓⵍⵜⵎⴰⵙ ⵏ ⵢⴻⵎⵎⴰⵙ, ⴷ ⵎⴰⵔⵢⴰⵎ ⵜⴰⵎⵖⴰⵔⵜ ⵏ ⴽⵍⵉⵢⵓⴱⴰⵙ, ⴷ ⵎⴰⵔⵢⴰⵎ ⵏ ⵎⴰⵊⴷⴰⵍⴰ. ■ 26 ⵍⴰⵎⵉ ⵉⵥⵔⴰ ⵢⴻⵛⵛⵓ ⵢⴻⵎⵎⴰⵙ ⴷ ⵓⵎⴻⵃⴹⴰⵔ ⵡⴻⵏⵏⵉ ⵜⵓⵖⴰ ⵉⵜⵜⴻⵅⵙ, ⵉⴱⴻⴷⴷ ⴷⵉⵏ, ⵉⵏⵏⴰ ⵉ ⵢⴻⵎⵎⴰⵙ: “ⴰ ⵜⴰⵎⵖⴰⵔⵜ, ⵅⵣⴰⵔ, ⵎⵎⵉⵎ!” 27 ⵍⴻⵅⴷⴻⵏⵏⵉ ⵉⵏⵏⴰ ⵉ ⵓⵎⴻⵃⴹⴰⵔ ⵏⵏⵉ: “ⴰⵇⴰ-ⵛ ⵢⴻⵎⵎⴰⵛ!” ⵣⵉ ⵜⵙⴰⵄⵄⴻⵜ ⵏⵏⵉ ⵉⴽⵙⵉ ⵜⵜ ⵓⵎⴻⵃⴹⴰⵔ ⵖⴰⵔ ⵜⴰⴷⴷⴰⵔⵜ ⵏⵏⴻⵙ.
ⵍⵎⴻⵡⵜ ⵏ ⵢⴻⵛⵛⵓ ⵅ ⵚⵚⴰⵍⵉⴱ
28 ⴰⵡⴰⵔⵏⵉ ⵎⴰⵏ ⴰⵢⴰ ⵉⵙⵙⴻⵏ ⵢⴻⵛⵛⵓ ⴰⵇⴰ ⴽⵓⵍⵛⵉ ⵉⵜⵜⵡⴰⴽⴻⵎⵎⴻⵍ, ⵍⴻⵅⴷⴻⵏⵏⵉ ⵉⵏⵏⴰ, ⵃⵉⵎⴰ ⴰⴷ ⵢⵉⵍⵉ ⵎⵉⵏ ⵢⵓⵔⴰⵏ ⴷⵉ ⵜⵉⵔⴰ ⵉⵇⴻⴷⴷⵙⴻⵏ: “ⵏⴻⵛⵛ ⴼⴼⵓⴷⴻⵖ!” ■ 29 ⵉⵜⵜⵡⴰⵎⴰⵔⵙ ⴷⵉⵏ ⵉⵊⵊ ⵏ ⵓⵖⴰⵔⵔⴰⴼ ⵉⵛⵛⵓⵔ ⵙ ⵍⵅⴻⴵ. ⵙⵙⵖⴻⴹⵚⴻⵏ ⵉⵛⵜ ⵏ ⵙⴱⵓⵏⵅⴰ ⵏ ⵀⵉⵙⵓⴱ ⵙ ⵍⵅⴻⴵ ⵓⵛⴰ ⴳⴳⵉⵏ ⵜⵜ ⵅ ⵉⵊⵊ ⵏ ⵓⵖⴰⵏⵉⵎ ⵏ ⵜⵄⴻⵍⴵⴻⵜ, ⵙⵙⵉⵡⴹⴻⵏ ⴰⵙ ⵜⵜ ⵖⴰⵔ ⵓⵇⴻⵎⵎⵓⵎ ⵏⵏⴻⵙ. 30 ⵍⴰⵎⵉ ⵉⵇⵇⴰⵙ ⵢⴻⵛⵛⵓ ⵍⵅⴻⴵ, ⵉⵏⵏⴰ: “ⴰⵇⴰ ⵉⵜⵜⵡⴰⴽⴻⵎⵎⴻⵍ!” ⵓⵛⴰ ⵉⵙⵙⴰⴹⴰⵔ ⴰⵣⴻⴵⵉⴼ ⵏⵏⴻⵙ, ⵉⵙⴻⵍⵍⴻⵎ ⴰⵔⵔⵓⵃ ⵏⵏⴻⵙ.
31 ⵓⵎⵉ ⵜⵓⵖⴰ ⴰⵙⵙ ⵏ ⵓⵙⴻⵡⵊⴻⴷ ⵏ ⵜⵖⴰⵔⵚⵜ ⵏ ⵓⵙⴻⵄⴷⵓ, ⵏⵏⴰⵏ ⵡⵓⴷⴰⵢⴻⵏ: “ⵡⴰⵔ ⵉⵄⴻⴷⴷⴻⵍ ⴰⴷ ⵇⵇⵉⵎⴻⵏⵜ ⴰⵔⵔⵉⵎⴰⵜ ⵏⵙⴻⵏ ⵅ ⵚⵚⴰⵍⵉⴱ ⴷⵉ ⵙⵙⴻⴱⵜ, ⵎⵉⵏⵣⵉ ⵙⵙⴻⴱⵜ ⵢⵓⴷⴻⵙ-ⴷⴷ!”, ⵎⵉⵏⵣⵉ ⴰⵙⵙ ⵏⵏⵉ ⵏ ⵙⵙⴻⴱⵜ ⵜⵓⵖⴰ ⴷ ⴰⵙⵙ ⴰⵎⴻⵇⵇⵔⴰⵏ. ⵙ ⵓⵢⴰ ⵜⵜⴰⵔⴻⵏ ⵡⵓⴷⴰⵢⴻⵏ ⵣⵉ ⴱⵉⵍⴰⵟⵓⵙ, ⵃⵉⵎⴰ ⴰⴷ ⴰⵔⵥⴻⵏ ⵉⴹⴰⵔⴻⵏ ⵏ ⵢⵉⵏⵏⵉ ⵉⵜⵜⵡⴰⵚⴻⵍⵍⴱⴻⵏ, ⴰⴷ ⵜⴻⵏ ⵙⵙⵉⴳⴳⵯⴻⵊⴻⵏ ⵙⵙⴻⵏⵏⵉ. 32 ⵅⴻⵏⵏⵉ ⵓⵙⵉⵏ-ⴷⴷ ⵉⵄⴻⵙⴽⴰⵔⵉⵢⵢⴻⵏ, ⴰⵔⵥⵉⵏ ⵉⴹⴰⵔⴻⵏ ⵏ ⵓⵎⴻⵣⵡⴰⵔⵓ ⵓ ⵏ ⵡⴻⵏⵏⴻⵖⵏⵉ ⵉ ⵜⵓⵖⴰ ⵉⵜⵜⵡⴰⵚⴻⵍⵍⴻⴱ ⴰⴽⵉⴷⴻⵙ. 33 ⵎⴰⵛⴰ ⵍⴰⵎⵉ ⴷⴷ-ⵓⵙⵉⵏ ⵖⴰⵔ ⵢⴻⵛⵛⵓ, ⵡⴰⵔ ⴰⵔⵥⵉⵏ ⵛⴰ ⵉⴹⴰⵔⴻⵏ ⵏⵏⴻⵙ ⵓⵎⵉ ⵥⵔⵉⵏ ⴰⵇⴰ ⵉⵎⵎⵓⵜ. 34 ⵎⴰⵛⴰ ⵉⵊⵊⴻⵏ ⵣⴻⴳ ⵉⵄⴻⵙⴽⴰⵔⵉⵢⵢⴻⵏ ⵉⵙⵙⵏⵓⵇⵇⴻⴱ ⵉ-ⵜ ⵙ ⵉⵛⵜ ⵏ ⵍⴰⵏⵙⴰ ⴷⴻⴳ ⵓⵖⴻⵣⴷⵉⵙ ⵏⵏⴻⵙ ⵓⵛⴰ ⴼⴼⵖⴻⵏ-ⴷⴷ ⵉⴷⴰⵎⵎⴻⵏ ⴷ ⵡⴰⵎⴰⵏ ⴷⴻⵖⵢⴰ. 35 ⵡⴻⵏⵏⵉ ⵉⵥⵔⵉⵏ ⵎⴰⵏ ⴰⵢⴰ, ⵜⵓⵖⴰ ⵉⵛⵀⴻⴷ ⵓ ⵛⵛⵀⴰⴷⴻⵜ ⵏⵏⴻⵙ ⴷ ⵜⵉⴷⴻⵜⵜ ⵓⵛⴰ ⵏⴻⵜⵜⴰ ⵉⵙⵙⴻⵏ, ⴰⵇⴰ ⵉⵏⵏⴰ ⵜⵉⴷⴻⵜⵜ, ⵃⵉⵎⴰ ⴰⴷ ⵜⴰⵎⵏⴻⵎ ⵓⵍⴰ ⴷ ⴽⴻⵏⵏⵉⵡ. 36 ⵜⵉⵎⴻⵙⵍⴰⵢⵉⵏ-ⴰ ⵎⵙⴰⵔⴻⵏⵜ, ⵃⵉⵎⴰ ⴰⴷ ⵜⵜⵡⴰⴽⴻⵎⵎⵍⴻⵏⵜ ⵜⵉⵔⴰ ⵉⵇⴻⴷⴷⵙⴻⵏ ⵉ ⵉⵇⵇⴰⵔⴻⵏ: “ⵡⴰⵔ ⵣⵣⴰⵢⴻⵙ ⵉⵜⵜⴰⵔⴻⵥⵥⵉ ⵢⵉⵖⴻⵙ.” ■ 37 ⵓⵛⴰ ⵉⵊⵊ ⵏ ⵡⴰⵡⴰⵍ ⵏⵏⴻⵖⵏⵉ ⵣⵉ ⵜⵉⵔⴰ ⵉⵇⴻⴷⴷⵙⴻⵏ ⵉⵇⵇⴰⵔ: “ⵏⵉⵜⵏⵉ ⴰⴷ ⵥⴰⵔⴻⵏ ⵡⴻⵏⵏⵉ ⵜ ⵉⵙⵙⵏⵓⵇⵇⴱⴻⵏ.” ■
ⴰⵏⴹⴻⵍ ⵏ ⵢⴻⵛⵛⵓ
38 ⴰⵡⴰⵔⵏⵉ ⵎⴰⵏ ⴰⵢⴰ ⵉⵎⵙⴰⵔ ⴰⵇⴰ ⵢⵓⵙⵓⴼ ⵣⵉ ⵔⴰⵎⵜⴰ, ⵡⴻⵏⵏⵉ ⵜⵓⵖⴰ ⴷ ⵉⵊⵊ ⵏ ⵓⵎⴻⵃⴹⴰⵔ ⵏ ⵢⴻⵛⵛⵓ ⵎⴰⵛⴰ ⵙ ⵜⵏⵓⴼⴼⵔⴰ ⵣⵉ ⵜⵉⴳⴳⵯⵓⴷⵉ ⵣⴻⴳ ⵡⵓⴷⴰⵢⴻⵏ, ⵉⵜⵜⴰⵔ ⴰⵙ ⵉ ⴱⵉⵍⴰⵟⵓⵙ ⵜⵜⴻⵙⵔⵉⵃ ⵃⵉⵎⴰ ⴰⴷ ⵉⴽⵙⵉ ⴰⵔⵔⵉⵎⴻⵜ ⵏ ⵢⴻⵛⵛⵓ, ⵓⵛⴰ ⴱⵉⵍⴰⵟⵓⵙ ⵉⵙⴰⵔⵔⴻⵃ ⴰⵙ. ⵅⴻⵏⵏⵉ ⵢⵓⵙⴰ-ⴷⴷ, ⵉⴽⵙⵉ ⴰⵔⵔⵉⵎⴻⵜ ⵏ ⵢⴻⵛⵛⵓ. ■ 39 ⵢⵓⵙⴰ-ⴷⴷ ⵄⴰⵡⴻⴷ ⵏⵉⴽⵓⴷⵉⵎⵓⵙ ⵡⴻⵏⵏⵉ ⵜⵓⵖⴰ ⴷⴷ-ⵢⵓⵙⵉⵏ ⵇⴱⴻⵍ ⵖⴰⵔ ⵢⴻⵛⵛⵓ ⵙ ⴵⵉⵍⴻⵜ, ⵢⵉⵡⵉ-ⴷⴷ ⴰⴽⵉⴷⴻⵙ ⴰⵅⴻⴵⴻⴹ ⵏ ⵍⴻⴼⵡⴰⵃⴻⵜ ⵏ ⵎⵉⵔⵔⵓ ⴷ ⵡⴻⵛⴼⵉⵔ ⵄⵍⴰⵃⴰⵍ ⵎⵢⴰ ⴰⵔⴹⴻⵍ. □ ■ 40 ⴽⵙⵉⵏ ⵏⵉⵜⵏⵉ ⴰⵔⵔⵉⵎⴻⵜ ⵏ ⵢⴻⵛⵛⵓ, ⵍⴻⵃⵃⴼⴻⵏ ⵜⵜ ⴷⵉ ⵍⴻⵛⴼⵓⵏ ⵏ ⵍⴻⵇⵟⴻⵏ ⴰⵣⴷⴰⴷ ⴰⴽ-ⴷ ⵍⴻⵄⵟⵓⵔ, ⴰⵎ ⵎⴰⵎⵎⴻⵛ ⵏⵏⵓⵎⴻⵏ ⵜⵜⴻⴳⴳⴻⵏ ⵜⵜ ⵡⵓⴷⴰⵢⴻⵏ ⵉ ⵡⴻⵏⴹⴻⵍ. 41 ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵃⵡⵉⵛ ⴷⴻⴳ ⵡⴻⵎⵛⴰⵏ ⵎⴰⵏⵉ ⵚⴻⵍⵍⴱⴻⵏ ⵢⴻⵛⵛⵓ, ⵓⵛⴰ ⴷⴻⴳ ⵡⴻⵃⵡⵉⵛ ⵉⵊⵊ ⵏ ⵡⴻⵏⴹⴻⵍ ⵏ ⵊⴷⵉⴷ, ⵄⴻⵎⵎⴰⵔⵚ ⵡⴰⵔ ⴷⴰⵢⴻⵙ ⵙⵙⴰⵔⵙⴻⵏ ⵓⵍⴰ ⴷ ⵉⵊⵊ. 42 ⵙⵙⴰⵔⵙⴻⵏ ⵢⴻⵛⵛⵓ ⴷⵉⵏ, ⵎⵉⵏⵣⵉ ⵜⵓⵖⴰ ⵢⵉⵡⴻⴹ-ⴷⴷ ⵙⵙⴻⴱⵜ ⵓ ⵎⵉⵏⵣⵉ ⴰⵏⴹⴻⵍ ⵏⵏⵉ ⵜⵓⵖⴰ ⵢⵓⴷⴻⵙ.