ⴰⵢⵜⵎⴰⵙ ⵏ ⵢⴻⵛⵛⵓ ⵡⴰⵔ ⴷⴰⵢⴻⵙ ⵓⵎⵉⵏⴻⵏ
7
1 ⴰⵡⴰⵔⵏⵉ ⵎⴰⵏ ⴰⵢⴰ ⵜⵓⵖⴰ ⵢⴻⵛⵛⵓ ⵉⴳⴳⵓⵔ ⴷⵉ ⵍⵊⴰⵍⵉⵍ, ⵡⴰⵔ ⵉⵅⵙ ⴰⴷ ⵢⵓⵢⵓⵔ ⴷⵉ ⵢⴰⵀⵓⴷⵉⵢⵢⴰ, ⵎⵉⵏⵣⵉ ⵓⴷⴰⵢⴻⵏ ⵜⵓⵖⴰ ⴰⵔⴻⵣⵣⵓⵏ ⴰⴷ ⵜ ⵏⵖⴻⵏ. 2 ⵉⵇⴰⵔⵔⴻⴱ-ⴷⴷ ⵍⵄⵉⴷ ⵏ ⵉⵄⵓⵛⵛⵓⵜⴻⵏ ⵏ ⵡⵓⴷⴰⵢⴻⵏ. ■ 3 ⵏⵏⴰⵏ ⴰⵙ ⴰⵢⵜⵎⴰⵙ: “ⴼⴼⴻⵖ ⵙⵙⴰⵏⵉⵜⴰ, ⵔⵓⵃ ⵖⴰⵔ ⵜⴻⵎⵎⵓⵔⵜ ⵏ ⵢⴰⵀⵓⴷⵉⵢⵢⴰ ⵃⵉⵎⴰ ⵓⵍⴰ ⴷ ⵉⵎⴻⵃⴹⴰⵔⴻⵏ ⵏⵏⴻⵛ ⴰⴷ ⵥⴰⵔⴻⵏ ⵍⴻⵅⴷⴰⵢⴻⵎ ⵏⵏⵉ ⵜᵉⵜⵜⴻⴳⴳⴻⴷ. 4 ⵓⵍⴰ ⴷ ⵉⵊⵊ ⵡⴰⵔ ⵉⵜⵜⴻⴳⴳ ⵛⴰ ⵏ ⵜⵎⴻⵙⵍⴰⵛⵜ ⵙ ⵜⵏⵓⴼⴼⵔⴰ, ⵎⴰⵍⴰ ⵢⴰⵔⴻⵣⵣⵓ ⴰⴷ ⵉⵙⵙⴻⴹⵀⴰⵔ ⵉⵅⴻⴼ ⵏⵏⴻⵙ ⵙ ⴱⵟⴰⵢⵟⴰⵢ. ⵎⴰⵍⴰ ⵜⴻⴳⴳⵉⴷ ⵜⵉⵎⴻⵙⵍⴰⵢⵉⵏ-ⴰ, ⵙⵛⴻⵏ ⵉⵅⴻⴼ ⵏⵏⴻⵛ ⵉ ⴷⴷⵓⵏⴻⵛⵜ.” 5 ⵎⵉⵏⵣⵉ ⵓⵍⴰ ⴷ ⴰⵢⵜⵎⴰⵙ ⵡⴰⵔ ⴷⴰⵢⴻⵙ ⵓⵎⵉⵏⴻⵏ ⵛⴰ. ■ 6 ⵉⵏⵏⴰ ⴰⵙⴻⵏ ⵢⴻⵛⵛⵓ: “ⵍⵡⴻⵇⵜ ⵉⵏⵓ ⵄⴰⴷ ⵡⴰⵔ ⴷⴷ-ⵜⵉⵡⵉⴹ, ⵎⴰⵛⴰ ⵍⵡⴻⵇⵜ ⵏⵡⴻⵎ ⴰⵇⴰ-ⵜⵜ ⵍⴻⴱⴷⴰ ⴰⴽⵉⴷⵡⴻⵎ. 7 ⴷⴷⵓⵏⵏⵉⵜ ⵡⴰⵔ ⵜⵣⴻⵎⵎⴰⵔ ⴰⴷ ⴽⴻⵏⵏⵉⵡ ⵜⵛⴰⵔⵀ, ⵎⴰⵛⴰ ⵏⴻⵜⵜⴰⵜ ⵜⵛⴰⵔⵀ ⴰⵢⵉ, ⵎⵉⵏⵣⵉ ⵏⴻⵛⵛ ⵛⴻⵀⵀⴷⴻⵖ ⵅⴰⵙ ⴱⴻⵍⵍⵉ ⵍⴻⵅⴷⴰⵢⴻⵎ ⵏⵏⴻⵙ ⴷ ⵜⵉⵄⴻⴼⴼⴰⵏⵉⵏ. ■ 8 ⵔⵓⵃⴻⵎ ⴽⴻⵏⵏⵉⵡ ⵖⴰⵔ ⵍⵄⵉⴷ-ⴰ. ⵏⴻⵛⵛ ⵡⴰⵔ ⵜⵜⵔⵉⵃⴻⵖ ⵛⴰ ⵖⴰⵔ ⵍⵄⵉⴷ-ⴰ, ⵎⵉⵏⵣⵉ ⵍⵡⴻⵇⵜ ⵉⵏⵓ ⵄⴰⴷ ⵡⴰⵔ ⵜⴽⴻⵎⵎⴻⵍ.” ■ 9 ⴰⵡⴰⵔⵏⵉ ⵍⴰⵎⵉ ⵉⵏⵏⴰ ⴰⵎⵎⵓ, ⵉⵇⵇⵉⵎ ⴷⵉ ⵍⵊⴰⵍⵉⵍ. ⵢⴻⵛⵛⵓ ⵉⴳⴳⵓⵔ ⵖⴰⵔ ⵍⵄⵉⴷ ⵏ ⵉⵄⵓⵛⵛⵓⵜⴻⵏ
10 ⵎⴰⵛⴰ ⵓⵎⵉ ⴳⴻⵄⵄⴷⴻⵏ ⴰⵢⵜⵎⴰⵙ ⵖⴰⵔ ⵍⵄⵉⴷ, ⵉⵔⵓⵃ ⵓⵍⴰ ⴷ ⵏⴻⵜⵜⴰ ⵖⴰⵔ ⵍⵄⵉⴷ, ⵡⴰⵔ ⵉⴵⵉ ⵙ ⴱⵟⴰⵢⵟⴰⵢ, ⵎⴰⵛⴰ ⵉⴳⴳⴰ ⴰⵅⵎⵉ ⵉⵏⵏⵓⴼⴰⵔ. 11 ⵓⴷⴰⵢⴻⵏ ⴰⵔⴻⵣⵣⵓⵏ ⵅⴰⵙ ⴷⵉ ⵍⵄⵉⴷ, ⵏⵏⴰⵏ: “ⵎⴰⵏⵉ ⵉⴵⴰ ⵡⴰⵏⵉⵜⴰ?” ■ 12 ⴰⵟⵟⴰⵙ ⵣⵉ ⵍⵖⴰⵛⵉ ⵜⴻⵎⵜⵓⵎⴻⵏ ⵅⴰⵙ. ⵛⴰ ⵣⵣⴰⵢⵙⴻⵏ ⵏⵏⴰⵏ: “ⵏⴻⵜⵜⴰ ⴷ ⴰⵚⴻⴱⵃⴰⵏ” ⵎⴰⵛⴰ ⵉⵏⵏⴻⵖⵏⵉ ⵏⵏⴰⵏ: “ⵍⵍⴰ, ⵎⴰⵖⴰⵔ ⵉⵙⵙⵅⴰⵔⵔⵉⵇ ⵅ ⵍⵖⴰⵛⵉ!” ■ 13 ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⵅⴰⵙ ⵉⵙⵙⵉⵡⴻⵍ ⵙ ⴱⵟⴰⵢⵟⴰⵢ ⵣⵉ ⵙⵙⵉⴱⴱⴻⵜ ⵏ ⵜⵉⴳⴳⵯⵓⴷⵉ ⵣⴻⴳ ⵡⵓⴷⴰⵢⴻⵏ. ■
14 ⵎⴰⵛⴰ ⴰⵍⴰⵎⵉ ⵉⵄⴷⵓ ⵡⴻⵣⵢⴻⵏ ⵏ ⵍⵄⵉⴷ, ⵉⴳⴻⵄⵄⴻⴷ ⵢⴻⵛⵛⵓ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⵙⵙⴻⵍⵎⴰⴷ ⴷⵉⵏ. 15 ⵓⴷⴰⵢⴻⵏ ⴷⴻⵀⵛⴻⵏ, ⵏⵏⴰⵏ: “ⵎⴰⵎⵎⴻⵛ ⵉⴳⴳⴰ ⵡⴻⵔⵢⴰⵣ-ⴰ ⵉⵙⵙⴻⵏ ⵉⴷⵍⵉⵙⴻⵏ ⴰⵎ ⵡⴰⵔ ⵉⵖⵔⵉ ⵛⴰ?” 16 ⵢⴻⵛⵛⵓ ⵢⴰⵔⵔⴰ-ⴷⴷ, ⵉⵏⵏⴰ: “ⵜⴰⵖⵓⵔⵉ ⵉⵏⵓ ⵡⴰⵔ ⵜⴻⴵⵉ ⵛⴰ ⵉⵏⵓ, ⵎⴰⵛⴰ ⵏ ⵡⴻⵏⵏⵉ ⴷ ⴰⵢⵉ ⴷⴷ-ⵉⵙⵙⴻⴽⴽⴻⵏ. ■ 17 ⵎⴰⵍⴰ ⵉⵊⵊⴻⵏ ⵉⵅⵙ ⴰⴷ ⵉⴳⴳ ⵎⵉⵏ ⵉⵅⵙ ⵏⴻⵜⵜⴰ, ⴰⴷ ⵉⵙⵙⴻⵏ ⵎⴰ ⴰⵇⴰ ⵜⴰⵖⵓⵔⵉ-ⵢⴰ ⵣⵉ ⴰⵔⴻⴱⴱⵉ ⵏⵉⵖ ⴰⵇⴰ ⵙⵙⴰⵡⴰⵍⴻⵖ ⵄⵍⴰⵃⵙⴰⴱ ⵍⵅⴰⴹⴰⵔ ⵉⵏⵓ. 18 ⵡⴻⵏⵏⵉ ⵉⵙⵙⴰⵡⴰⵍⴻⵏ ⵣⴻⴳ ⵓⵅⴰⵔⵔⴻⵚ ⵏ ⵍⵅⴰⴹⴰⵔ ⵏ ⵢⵉⵅⴻⴼ ⵏⵏⴻⵙ, ⵢⴰⵔⴻⵣⵣⵓ ⴰⵄⵓⴵⵉ ⵏⵏⴻⵙ, ⵎⴰⵛⴰ ⵡⴻⵏⵏⵉ ⵢⴰⵔⴻⵣⵣⵓⵏ ⴰⵄⵓⴵⵉ ⵏ ⵡⴻⵏⵏⵉ ⵜ-ⵉ-ⴷⴷ ⵉⵙⵙⴻⴽⴽⴻⵏ, ⴰⵇⴰ ⵏⴻⵜⵜⴰ ⴷ ⵜⵉⴷⴻⵜⵜ, ⵡⴰⵔ ⴷⴰⵢⴻⵙ ⴱⵓ ⵍⵖⴻⵛⵛ. 19 ⵎⴰ ⵡⴰⵔ ⵉⴵⵉ ⴷ ⵎⵓⵙⴰ ⵉ ⴷ ⴰⵡⴻⵎ ⵉⵡⵛⵉⵏ ⵛⵛⴰⵔⵉⵄⴰ? ⵎⴰⵛⴰ ⵓⵍⴰ ⴷ ⵉⵊⵊ ⵣⵣⴰⵢⵡⴻⵎ ⵡⴰⵔ ⵉⵜⵜⴻⴳⴳ ⵛⵛⴰⵔⵉⵄⴰ? ⵉ ⵎⴰⵢⴻⵎⵎⵉ ⵅⴻⵏⵏⵉ ⵜⴰⵔⴻⵣⵣⵓⵎ ⴰⴷ ⴰⵢⵉ ⵜⴻⵏⵖⴻⵎ?” ■
20 ⵍⵖⴰⵛⵉ ⵢⴰⵔⵔⴰ-ⴷⴷ, ⵏⵉⵜⵏⵉ ⵏⵏⴰⵏ: “ⴷⴰⵢⴻⴽ ⵉⵊⵊ ⵏ ⵛⵛⵉⵟⴰⵏ, ⵡⵉ ⵢⴰⵔⴻⵣⵣⵓⵏ ⴰⴷ ⵛⴻⴽ ⵏⵖⴻⵏ?” ■ 21 ⵢⴻⵛⵛⵓ ⵢⴰⵔⵔⴰ-ⴷⴷ, ⵉⵏⵏⴰ ⴰⵙⴻⵏ: “ⴳⴳⵉⵖ ⵉⵛⵜ ⵏ ⵍⵅⴻⴷⵎⴻⵜ ⵓⵛⴰ ⴽⴻⵏⵏⵉⵡ ⵜᵉⵜⵜⴱⴻⵀⵜⴻⵎ ⵎⴰⵔⵔⴰ. 22 ⵉ ⵓⵢⴰ ⵎⵓⵙⴰ ⵉⵡⵛⴰ ⴰⵡⴻⵎ-ⴷⴷ ⴰⵅⵜⴰⵏ, ⵡⴰⵔ ⵉⴵⵉ ⵎⵉⵏⵣⵉ ⴰⵅⵜⴰⵏ ⵣⵉ ⵎⵓⵙⴰ ⵉ ⵢⴻⴵⴰ, ⵎⴰⵛⴰ ⵎⵉⵏⵣⵉ ⴰⵅⵜⴰⵏ ⵉⴵⴰ ⵣⵉ ⵍⴻⵊⴷⵓⴷ ⵏⵡⴻⵎ, ⵓ ⵅⴻⵏⵏⵉ ⵜⵅⴻⵜⵜⵏⴻⵎ ⵉ ⴱⵏⴰⴷⴻⵎ ⴷⵉ ⵙⵙⴻⴱⵜ. ■ 23 ⵎⴰⵍⴰ ⵉⵇⴱⴻⵍ ⴱⵏⴰⴷⴻⵎ ⴰⴷ ⵉⵜⵜⵡⴰⵅⵜⴻⵏ ⴷⴻⴳ ⵡⴰⵙⵙ ⵏ ⵙⵙⴻⴱⵜ, ⵃⵉⵎⴰ ⵡⴰⵔ ⵜᵉⵜⵜⵡⴰⵔⴻⵥⵥⵉ ⵛⵛⴰⵔⵉⵄⴰ ⵏ ⵎⵓⵙⴰ, ⵎⴰⵎⵎⴻⵛ ⵉ ⵅⴰⴼⵉ ⵉ ⵖⴰ ⵜⵛⴻⵜⵛⴰⵎ ⵍⴰⵎⵉ ⵙⵙⴳⴻⵏⴼⵉⵖ ⴱⵏⴰⴷⴻⵎ ⵉⴽⵎⴻⵍ ⴷⴻⴳ ⵡⴰⵙⵙ ⵏ ⵙⵙⴻⴱⵜ? 24 ⵡⴰⵔ ⵃⴻⴽⴽⵎⴻⵎ ⵅ ⵜⴻⵇⵛⵓⵔⵜ ⵏ ⴱⵏⴰⴷⴻⵎ, ⵎⴰⵛⴰ ⵃⴻⴽⵎⴻⵎ ⵙ ⵢⵉⵊⵊ ⵏ ⵍⵃⵓⴽⵎ ⵉⵙⴻⴳⴳⴷⴻⵏ.” ■
ⵎⴰ ⵢⴻⵛⵛⵓ ⵏⴻⵜⵜⴰ ⴷ ⵍⵎⴰⵙⵉⵃ?
25 ⵏⵏⴰⵏ ⵉⵔⵢⴰⵣⴻⵏ ⵣⵉ ⵓⵔⵛⴰⵍⵉⵎ: “ⵎⴰ ⵡⴰⵔ ⵉⴵⵉ ⴷ ⵡⴰ ⵉ ⵢⴰⵔⴻⵣⵣⵓⵏ ⴰⴷ ⵜ ⵏⵖⴻⵏ? 26 ⵎⴰⵛⴰ ⵅⵣⴰⵔ, ⵉⵙⵙⴰⵡⴰⵍ ⵙ ⴱⵟⴰⵢⵟⴰⵢ, ⵡⴰⵔ ⴷ ⴰⵙ ⵇⵇⴰⵔⴻⵏ ⵡⴰⵍⵓ. ⴰⴷ ⵜⴰⵖ ⴰⵇⴰ ⵙⵙⵏⴻⵏ ⵉⵎⵖⴰⵔⴻⵏ ⵏ ⵍⴳⴻⵏⵙ ⵏⵉⵛⴰⵏ ⴱⴻⵍⵍⵉ ⵙ ⵜⵉⴷⴻⵜⵜ ⵡⴰⵏⵉⵜⴰ ⴷ ⵍⵎⴰⵙⵉⵃ? 27 ⵎⴰⵛⴰ ⵏⴻⵙⵙⴻⵏ ⵡⴰ, ⵎⴰⵏⵉⵙ ⵏⴻⵜⵜⴰ, ⵎⴰⵛⴰ ⵅⵎⵉ ⴷⴷ ⵖⴰ ⵢⴰⵙ ⵍⵎⴰⵙⵉⵃ, ⵓⵍⴰ ⴷ ⵉⵊⵊ ⵡⴰⵔ ⵉⵙⵙⵉⵏ ⵎⴰⵏⵉⵙ ⵏⴻⵜⵜⴰ.” ■ 28 ⵍⴰⵎⵉ ⵜⵓⵖⴰ ⵉⵙⵙⴻⵍⵎⴰⴷ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⵙⵙⴳⴻⵄⵄⴻⴷ ⵢⴻⵛⵛⵓ ⵜⵎⵉⵊⵊⴰ ⵏⵏⴻⵙ ⵙ ⵊⵊⴻⵀⴷ, ⵉⵏⵏⴰ: “ⴽⴻⵏⵏⵉⵡ ⵜⴻⵙⵙⵏⴻⵎ ⴰⵢⵉ ⵓ ⵜⴻⵙⵙⵏⴻⵎ ⵎⴰⵏⵉⵙ ⵏⴻⵛⵛ. ⵏⴻⵛⵛ ⵡⴰⵔ ⴷⴷ-ⵓⵙⵉⵖ ⵙ ⵍⵅⴰⴹⴰⵔ ⵏ ⵢⵉⵅⴻⴼ ⵉⵏⵓ, ⵎⴰⵛⴰ ⵡⴻⵏⵏⵉ ⴷ ⴰⵢⵉ ⴷⴷ-ⵉⵙⵙⴻⴽⴽⴻⵏ ⴰⵇⴰ-ⵜ ⴷ ⵜⵉⴷⴻⵜⵜ, ⴽⴻⵏⵏⵉⵡ ⵡⴰⵔ ⵜ ⵜⴻⵙⵙⵉⵏⴻⵎ ⵛⴰ. ■ 29 ⵎⴰⵛⴰ ⵏⴻⵛⵛ ⵙⵙⵏⴻⵖ ⵜ, ⵎⵉⵏⵣⵉ ⵏⴻⵛⵛ ⵣⵣⴰⵢⴻⵙ ⵓ ⵏⴻⵜⵜⴰ ⴷ ⵡⴻⵏⵏⵉ ⴷ ⴰⵢⵉ-ⴷⴷ ⵉⵙⵙⴻⴽⴽⴻⵏ.” ■
30 ⵅⴻⵏⵏⵉ ⴰⵔⴻⵣⵣⵓⵏ ⴰⴷ ⵜ ⵟⵟⴼⴻⵏ, ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⵅⴰⵙ ⵉⵙⵙⴰⵔⵙ ⴰⴼⵓⵙ, ⵎⵉⵏⵣⵉ ⵜⴰⵙⴰⵄⵄⴻⵜ ⵏⵏⴻⵙ ⵡⴰⵔ ⴷⴷ-ⵜⵉⵡⴻⴹ ⵄⴰⴷ. ■
31 ⴰⵟⵟⴰⵙ ⵣⵉ ⵍⵖⴰⵛⵉ ⵓⵎⵏⴻⵏ ⵣⵣⴰⵢⴻⵙ, ⵏⵏⴰⵏ: “ⵅⵎⵉ ⴷⴷ ⵖⴰ ⵢⴰⵙ ⵍⵎⴰⵙⵉⵃ, ⵎⴰ ⴰⴷ ⵉⴳⴳ ⵍⴻⵄⵍⴰⵎⴰⵜ ⴽⵜⴰⵔ ⵣⵉ ⵜⵉⵏⴰ ⵉ ⵉⴳⴳⴰ ⵡⴰ?” ■
32 ⵙⵍⵉⵏ ⵉⴼⴰⵔⵉⵙⵉⵢⵢⴻⵏ ⵎⴰⵔⵔⴰ ⵎⵉⵏ ⵅⴰⵙ ⵉⵜⴻⵎⵜⴻⵏ ⵍⵖⴰⵛⵉ. ⵓⵛⴰ ⵏⵉⵜⵏⵉ ⴷ ⵉⵎⴻⵇⵇⵔⴰⵏⴻⵏ ⵏ ⵉⴽⴻⵀⵀⴰⵏⴻⵏ ⵙⵙⴻⴽⴽⴻⵏ-ⴷⴷ ⵉⵄⴻⵙⵙⴰⵙⴻⵏ ⵃⵉⵎⴰ ⴰⴷ ⵜ ⵟⵟⴼⴻⵏ. 33 ⵢⴻⵛⵛⵓ ⵉⵏⵏⴰ: “ⵏⴻⵛⵛ ⴰⴷ ⴽⵉⴷⵡⴻⵎ ⵇⵇⵉⵎⴻⵖ ⴷⵔⵓⵙ ⵏ ⵍⵡⴻⵇⵜ ⵄⴰⴷ, ⵅⴻⵏⵏⵉ ⴰⴷ ⵔⴰⵃⴻⵖ ⵖⴰⵔ ⵡⴻⵏⵏⵉ ⴷ ⴰⵢⵉ ⴷⴷ-ⵉⵙⵙⴻⴽⴽⴻⵏ. ■ 34 ⴰⴷ ⵅⴰⴼⵉ ⵜⴰⵔⵣⵓⵎ, ⵡⴰⵔ ⴷⴰⵢⵉ ⵜᵉⵜⵜⵉⴼⴻⵎ, ⵓ ⵎⴰⵏⵉ ⵖⴰ ⵉⵍⵉⵖ ⵏⴻⵛⵛ, ⵡⴰⵔ ⵜⵣⴻⵎⵎⴰⵔⴻⵎ ⴰⴷ ⴷⴷ-ⵜⴰⴷⴼⴻⵎ.” ■ 35 ⵏⵏⴰⵏ ⵡⵓⴷⴰⵢⴻⵏ ⵊⴰⵔ ⴰⵙⴻⵏ: “ⵎⴰⵏⵉ ⵖⴰ ⵉⵔⴰⵃ ⵏⴻⵜⵜⴰ ⴰⵍⴰⵎⵉ ⵡⴰⵔ ⵏⵣⴻⵎⵎⴰⵔ ⴰⴷ ⵜ ⵏⴰⴼ. ⵎⴰ ⵅⴻⵏⵏⵉ ⵉⵅⵙ ⴰⴷ ⵉⵔⴰⵃ ⵖⴰⵔ ⵜⴻⵎⵎⵓⵔⴰ ⵏ ⵍⴻⴳⵏⵓⵙ? ⵎⴰ ⵉⵅⵙ ⴰⴷ ⵉⵙⵙⴻⵍⵎⴻⴷ ⵉ ⵍⴽⵓⴼⴼⴰⵔ? 36 ⵎⵉⵏ ⵉⵄⵏⴰ ⵡⴰⵡⴰⵍ-ⴰ ⵉ ⵉⵏⵏⴰ: ‘ⴰⴷ ⵅⴰⴼⵉ ⵜⴰⵔⵣⵓⵎ, ⵡⴰⵔ ⴷⴰⵢⵉ ⵜᵉⵜⵜᵉⵟⵟⵉⴼⴻⵎ!’, ⵓ ‘ⵎⴰⵏⵉ ⵖⴰ ⵉⵍⵉⵖ ⵏⴻⵛⵛ, ⵡⴰⵔ ⵜⵣⴻⵎⵎⴰⵔⴻⵎ ⴰⴷ ⴷⴷ-ⵜⴰⴷⴼⴻⵎ’?”
ⵢⴻⵛⵛⵓ ⴷ ⵍⵄⵓⵏⵚⴰⵔ ⵏ ⵡⴰⵎⴰⵏ ⵉⴷⴷⴰⵔⴻⵏ
37 ⴷⴻⴳ ⵡⴰⵙⵙ ⴰⵎⴻⵇⵇⵔⴰⵏ, ⴰⵙⵙ ⴰⵏⴻⴳⴳⴰⵔⵓ ⵏ ⵍⵄⵉⴷ, ⵉⴽⴽⴰⵔ ⵉⴱⴻⴷⴷ-ⴷⴷ ⵢⴻⵛⵛⵓ, ⵉⵍⴰⵖⴰ, ⵉⵏⵏⴰ: “ⵎⴰⵍⴰ ⵉⴼⵓⴷ ⵃⴻⴷ, ⴻⵊⵊ ⵉ-ⵜ ⴰⴷ ⵖⴰⵔⵉ ⴷⴷ-ⵢⴰⵙ, ⴰⴷ ⵉⵙⵓ. ■ 38 ⵡⴻⵏⵏⵉ ⴷⴰⵢⵉ ⵉ ⵖⴰ ⵢⴰⵎⵏⴻⵏ, ⴰⵎ ⵎⴰⵎⵎⴻⵛ ⵏⵏⴰⵏⵜ ⵜⵉⵔⴰ ⵉⵇⴻⴷⴷⵙⴻⵏ: ⴰⴷ ⵣⵣⴰⵢⴻⵙ ⴰⵣⵣⵍⴻⵏ ⵉⵖⴻⵣⵔⴰⵏ ⵏ ⵡⴰⵎⴰⵏ ⵉⴷⴷⴰⵔⴻⵏ!” ■ 39 ⵉⵏⵏⴰ ⵎⴰⵏ ⴰⵢⴰ ⵅ ⴰⵔⵔⵓⵃ ⵉ ⵖⴰ ⵇⴻⴱⵍⴻⵏ ⵉⵏⵏⵉ ⴷⴰⵢⴻⵙ ⵉⵜⵜⴰⵎⵏⴻⵏ. ⵎⵉⵏⵣⵉ ⴰⵔⵔⵓⵃ ⵉⵇⴻⴷⴷⵙⴻⵏ ⵡⴰⵔ ⴷ ⴰⵙⴻⵏ ⵉⵎⵎⴻⵡⵛ ⵄⴰⴷ, ⵎⵉⵏⵣⵉ ⵢⴻⵛⵛⵓ ⵡⴰⵔ ⵉⵜⵜⵡⴰⵙⵙⵄⵓⴵⵉ ⵄⴰⴷ. ■
40 ⴰⵟⵟⴰⵙ ⵣⵉ ⵍⵖⴰⵛⵉ, ⵓⵎⵉ ⵙⵍⵉⵏ ⴰⵡⴰⵍ-ⴰ, ⵏⵏⴰⵏ: “ⴷ ⵡⴰ ⴷ ⴰⵏⴰⴱⵉ ⵙ ⵜⵉⴷⴻⵜⵜ!” ■ 41 ⵉⵏⵏⴻⵖⵏⵉ ⵏⵏⴰⵏ: “ⵡⴰ ⴷ ⵍⵎⴰⵙⵉⵃ!”, ⵎⴰⵛⴰ ⵛⴰ ⵏⵏⴻⵖⵏⵉ ⵣⵣⴰⵢⵙⴻⵏ ⵏⵏⴰⵏ: “ⵎⴰ ⴰⴷ ⴷⴷ-ⵢⴰⵙ ⵍⵎⴰⵙⵉⵃ ⵣⵉ ⵍⵊⴰⵍⵉⵍ? ■ 42 ⵎⴰ ⵡⴰⵔ ⵇⵇⴰⵔⴻⵏⵜ ⵜⵉⵔⴰ ⵉⵇⴻⴷⴷⵙⴻⵏ, ⴰⵇⴰ ⵍⵎⴰⵙⵉⵃ ⴰⴷ ⴷⴷ-ⵢⴰⵙ ⵣⵉ ⵣⵣⴰⵔⵉⵄⴻⵜ ⵏ ⴷⴰⵡⵓⴷ, ⵣⵉ ⴱⴰⵢⵜ-ⵍⴰⵃⵎ, ⵣⵉ ⴷⵛⴰⵔ ⵏ ⴷⴰⵡⵓⴷ?” ■ 43 ⵓⵛⴰ ⵉⵎⵙⴰⵔ ⵓⵎⵙⴻⴱⴹⵉ ⵏ ⵍⵖⴰⵛⵉ ⴷⵉ ⵙⵙⵉⴱⴱⴻⵜ ⵏⵏⴻⵙ. 44 ⵛⴰ ⵣⵣⴰⵢⵙⴻⵏ ⵅⵙⴻⵏ ⴰⴷ ⵜ ⵟⵟⴼⴻⵏ, ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⵅⴰⵙ ⵉⵙⵙⴰⵔⵙ ⵉⴼⴰⵙⵙⴻⵏ.
45 ⵅⴻⵏⵏⵉ ⴷⴻⵡⵍⴻⵏ-ⴷⴷ ⵉⵄⴻⵙⵙⴰⵙⴻⵏ ⵏⵏⵉ ⵖⴰⵔ ⵉⵎⴻⵇⵇⵔⴰⵏⴻⵏ ⵏ ⵉⴽⴻⵀⵀⴰⵏⴻⵏ ⴷ ⵉⴼⴰⵔⵉⵙⵉⵢⵢⴻⵏ. ⵉⴽⴻⵀⵀⴰⵏⴻⵏ ⵏⵏⴰⵏ ⴰⵙⴻⵏ: “ⵎⴰⵢⴻⵎⵎⵉ ⵡⴰⵔ ⵜ-ⵉ-ⴷⴷ-ⵜⵉⵡⵢⴻⵎ?” 46 ⴰⵔⵔⵉⵏ-ⴷⴷ ⵅⴰⵙⴻⵏ ⵉⵄⴻⵙⵙⴰⵙⴻⵏ: “ⵄⴻⵎⵎⴰⵔⵚ ⵡⴰⵔ ⵉⵙⵙⵉⵡⴻⵍ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⴰⵎ ⵎⴰⵎⵎⴻⵛ ⵉⵙⵙⴰⵡⴰⵍ ⵡⴻⵔⵢⴰⵣ-ⴰ!” 47 ⵏⵏⴰⵏ ⴰⵙⴻⵏ ⵉⴼⴰⵔⵉⵙⵉⵢⵢⴻⵏ: “ⵎⴰ ⵓⵍⴰ ⴷ ⴽⴻⵏⵏⵉⵡ ⵜⵜⵡⴰⵅⴻⴷⵄⴻⵎ ⵣⵣⴰⵢⴻⵙ? 48 ⵎⴰ ⵅⴻⵏⵏⵉ ⴷⵉⵏ ⵛⴰ ⵏ ⵉⵊⵊⴻⵏ ⵣⴻⴳ ⵉⵎⴻⵇⵇⵔⴰⵏⴻⵏ ⵏ ⵍⴳⴻⵏⵙ ⵏⵉⵖ ⵣⴻⴳ ⵉⴼⴰⵔⵉⵙⵉⵢⵢⴻⵏ ⵢⵓⵎⴻⵏ ⵣⵣⴰⵢⴻⵙ? ■ 49 ⵎⴰⵛⴰ ⵍⵖⴰⵛⵉ-ⵢⴰ ⵉ ⵡⴰⵔ ⵉⵙⵙⵉⵏⴻⵏ ⵛⴰ ⵛⵛⴰⵔⵉⵄⴰ, ⴰⵇⴰ ⵉⵜⵜⵡⴰⵏⵄⴻⵍ.” 50 ⵏⵉⴽⵓⴷⵉⵎⵓⵙ, ⵡⴻⵏⵏⵉ ⵜⵓⵖⴰ ⴷ ⵉⵊⵊⴻⵏ ⵣⵣⴰⵢⵙⴻⵏ ⵓ ⵡⴻⵏⵏⵉ ⴷⴷ-ⵢⵓⵙⵉⵏ ⵖⴰⵔ ⵢⴻⵛⵛⵓ ⵙ ⴵⵉⵍⴻⵜ, ⵉⵏⵏⴰ ⴰⵙⴻⵏ: ■ 51 “ⵎⴰ ⴰⴷ ⵜⴻⵃⴽⴻⵎ ⵛⵛⴰⵔⵉⵄⴰ ⵏⵏⴻⵖ ⵅ ⵉⵊⵊ ⵏ ⴱⵏⴰⴷⴻⵎ, ⴱⵍⴰ ⵎⴰ ⴰⴷ ⵣⵣⴰⵢⴻⵙ ⵙⵍⴻⵏ, ⴰⴷ ⵙⵙⵏⴻⵏ ⵎⵉⵏ ⵉⴳⴳⴰ?” ■ 52 ⴰⵔⵔⵉⵏ-ⴷⴷ, ⵏⵏⴰⵏ ⴰⵙ: “ⵎⴰ ⵓⵍⴰ ⴷ ⵛⴻⴽ ⴰⴷ ⵜⴰⵖ ⵣⵉ ⵍⵊⴰⵍⵉⵍ? ⴰⵔⵣⵓ, ⵅⵣⴰⵔ, ⵓⵍⴰ ⴷ ⵉⵊⵊ ⵏ ⵓⵏⴰⴱⵉ ⵡⴰⵔ ⴷⴷ-ⵉⵜⵜⴻⴽⴽ ⵛⴰ ⵣⵉ ⵍⵊⴰⵍⵉⵍ.” 53 ⵅⴰⵙ ⵓⵛⴰ ⵉⵔⵓⵃ ⴽⵓⵍ ⵉⵊⵊⴻⵏ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. ⵎⴰⵛⴰ ⵢⴻⵛⵛⵓ ⵉⵔⵓⵃ ⵖⴰⵔ ⵡⴻⴷⵔⴰⵔ ⵏ ⵣⵣⵉⵜⵓⵏ.