ⵚⵚⴷⴰⵇⵉ
6
1 “ⵃⴹⴰⵎ, ⵡⴰⵔ ⵜⵚⴻⴷⴷⴰⵇⴻⵎ ⵥⵥⴰⵜ ⵉ ⵉⵡⴷⴰⵏ ⵃⵉⵎⴰ ⴰⴷ ⴽⴻⵏⵏⵉⵡ ⵥⴰⵔⴻⵏ. ⵎⴰⵍⴰ ⴰⵎⵢⴰ, ⵡⴰⵔ ⵖⴰⵔⵡⴻⵎ ⵉⵜⵜⵉⵍⵉ ⴱⵓ ⵍⴰⵊⴰⵔ ⵥⵉ ⴱⴰⴱⴰⵜⵡⴻⵎ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ. 2 ⵎⴰⵍⴰ ⵜⵚⴻⴷⴷⵇⴻⴷ, ⵡⴰⵔ ⵜⵜ ⵜⵜⴻⴳⴳ ⴷⵉ ⵍⴱⵓⵇ ⴰⵎ ⵎⴰⵎⵎⴻⵛ ⵜ ⵜⵜⴻⴳⴳⴻⵏ ⵉⵎⵏⴰⴼⵇⴻⵏ ⴷⵉ ⵜⴻⵎⵥⵉⴷⴰⵡⵉⵏ ⵓ ⴷⵉ ⵥⵥⵏⴰⵇⵉ, ⵃⵉⵎⴰ ⴰⴷ ⵜⴻⵏ ⵛⴻⵏⵄⴻⵏ ⵉⵡⴷⴰⵏ. ⵙ ⵜⵉⴷⴻⵜⵜ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵏⵉⵜⵏⵉ ⴰⵇⴰ ⵓⴼⵉⵏ ⵍⴰⵊⴰⵔ ⵏⵙⴻⵏ ⵥⵉ ⴱⴻⵄⴷⴰ. ■ 3 ⵎⴰⵛⴰ ⵛⴻⴽ, ⵅⵎⵉ ⵉ ⵖⴰ ⵜⵚⴻⴷⴷⵇⴻⴷ, ⵉⵜⵜⵅⴻⵚⵚⴰ ⴰⴼⵓⵙ ⵏⵏⴻⴽ ⴰⵥⴻⵍⵎⴰⴹ ⵡⴰⵔ ⵉⵙⵙⵉⵏ ⵎⵉⵏ ⵉⵜⵜⴻⴳⴳ ⵓⴼⵓⵙⵉ ⵏⵏⴻⴽ, 4 ⵃⵉⵎⴰ ⵚⵚⴻⴷⵇⴻⵜ ⵏⵏⴻⴽ ⴰⴷ ⵜⵉⵍⵉ ⵙ ⵜⵏⵓⴼⴼⵔⴰ ⵓⵛⴰ ⴱⴰⴱⴰⵛ ⵡⴻⵏⵏⵉ ⵉⵜⵜⵡⴰⵍⴰⵏ ⴷⵉ ⵜⵏⵓⴼⴼⵔⴰ, ⴰⴷ ⵛⴻⴽ ⵉⵅⴻⴵⴻⵚ ⵙ ⴱⵟⴰⵢⵟⴰⵢ.” ■ ⵜⴰⵥⴰⴵⵉⵜ
5 “ⵎⴰⵍⴰ ⵜⴻⵥⵥⵓⴵⴻⴷ, ⵡⴰⵔ ⵜⵜⵉⵍⵉⴷ ⵛⴰ ⴰⵎ ⵉⵎⵏⴰⴼⵇⴻⵏ ⵉⵏⵏⵉ ⵓⵎⵉ ⵉⵄⵊⴻⴱ ⴰⵙⴻⵏ ⵍⵃⴰⵍ ⴰⴷ ⵥⵥⴰⴵⴻⵏ ⴰⵎ ⴱⴻⴷⴷⴻⵏ ⴷⵉ ⵜⴻⵎⵥⵉⴷⴰⵡⵉⵏ ⴷ ⵜⵖⴻⵎⵎⵓⵔⴰ ⵏ ⵥⵥⵏⴰⵇⵉ ⵃⵉⵎⴰ ⴰⴷ ⵜⴻⵏ ⵥⴰⵔⴻⵏ ⵉⵡⴷⴰⵏ. ⵙ ⵜⵉⴷⴻⵜⵜ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵏⵉⵜⵏⵉ ⵓⴼⵉⵏ ⵍⴰⵊⴰⵔ ⵏⵙⴻⵏ ⵥⵉ ⴱⴻⵄⴷⴰ. 6 ⵎⴰⵛⴰ ⵛⴻⴽ, ⵎⴰⵍⴰ ⵜⴻⵥⵥⵓⴵⴻⴷ, ⴰⴷⴻⴼ ⵖⴰⵔ ⵡⴻⵅⵅⴰⵎ ⵏⵏⴻⴽ, ⴱⴻⵍⵍⴻⵄ ⵜⴰⵡⵡⴰⵔⵜ, ⵥⵥⴰⴵ ⵉ ⴱⴰⴱⴰⵛ ⵡⴻⵏⵏⵉ ⵉⴵⴰⵏ ⴷⵉ ⵜⵏⵓⴼⴼⵔⴰ ⵓⵛⴰ ⴱⴰⴱⴰⵛ ⵉ ⵉⵜⵜⵡⴰⵍⴰⵏ ⴷⵉ ⵜⵏⵓⴼⴼⵔⴰ ⴷ ⵏⴻⵜⵜⴰ ⵉ ⵛⴻⴽ ⵉ ⵖⴰ ⵉⵅⴻⴵⵚⴻⵏ ⵙ ⴱⵟⴰⵢⵟⴰⵢ. ■ 7 ⵎⴰⵍⴰ ⵜⴻⵥⵥⵓⴵⴻⵎ ⵡⴰⵔ ⵜⵜⵄⴰⵡⴰⴷⴻⵎ ⵉ ⵡⴰⵡⴰⵍ ⵉⵅⵡⴰⵏ ⴰⵎⴻⵛⵏⴰⵡ ⵎⴰⵎⵎⴻⵛ ⵜⵜⵥⴰⴵⴰⵏ ⵉⵏⵏⵉ ⵥⵉ ⵍⴻⴳⵏⵓⵙ, ⵎⵉⵏⵥⵉ ⵉⵜⵜⵖⵉⵍ ⴰⵙⴻⵏ ⵙ ⵡⴰⵡⴰⵍⴻⵏ ⵏⵙⴻⵏ ⴰⵟⵟⴰⵙ ⴰⴷ ⴰⵙⴻⵏ ⵉⵙⴻⵍ. ■ 8 ⵡⴰⵔ ⵜⵜⵉⵍⵉⵎ ⴰⵎ ⵏⵉⵜⵏⵉ, ⵎⵉⵏⵥⵉ ⴱⴰⴱⴰⵜⵡⴻⵎ ⵉⵙⵙⴻⵏ ⵎⵉⵏ ⵜⴻⵃⴷⴰⵊⴻⵎ ⵇⴱⴻⵍ ⴷ ⴰⵙ ⵉ ⵖⴰ ⵜᵉⵜⵜⴰⵔⴻⵎ ⵛⴰ. 9 ⴰⵎⵎⵓ ⵉ ⵖⴰ ⵜⴻⵥⵥⴰⴵⴻⵎ ⴽⴻⵏⵏⵉⵡ:
‘ⴰ ⴱⴰⴱⴰⵜⵏⴻⵖ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ,
ⵉⵙⴻⵎ ⵏⵏⴻⴽ ⴰⴷ ⵢⵉⵍⵉ ⵉⵜⵜⵡⴰⵇⴻⴷⴷⴻⵙ, ■
10 ⴻⵊⵊ ⴰⴷ ⴷⴷ-ⵜⴰⵙ ⵜⴳⴻⵍⴷⵉⵜ ⵏⵏⴻⴽ, ⴰⴷ ⵢⵉⵍⵉ ⵍⵅⴰⴹⴰⵔ ⵏⵏⴻⴽ,
ⴰⵎ ⵎⴰⵎⵎⴻⵛ ⵢⴻⴵⴰ ⴷⴻⴳ ⵓⵊⴻⵏⵏⴰ, ⴰⴷ ⵢⵉⵍⵉ ⵄⴰⵡⴻⴷ ⴷⵉ ⵜⴻⵎⵎⵓⵔⵜ.
11 ⴻⵡⵛ ⴰⵏⴻⵖ ⴰⵙⵙ-ⴰ ⴰⵖⵔⵓⵎ ⵏ ⴽⵓⵍ ⴰⵙⵙ.
12 ⵖⴼⴰⵔ ⴰⵏⴻⵖ ⵉⵎⴰⵔⵡⵓⵙⴰ ⵏⵏⴻⵖ,
ⴰⵎ ⵎⴰⵎⵎⴻⵛ ⵏⵙⴰⵎⴻⵃ ⵄⴰⵡⴻⴷ ⵉ ⵢⴻⵏⵏⵉ ⴷⴷ ⴰⵏⴻⵖ ⵉⵜⵜⵓⵔⵙⴻⵏ,
13 ⵓ ⵡⴰⵔ ⴷ ⴰⵏⴻⵖ ⵙⵉⴷⵉⴼ ⵛⴰ ⴷⴻⴳ ⵓⵖⴻⴽⴽⵡⵉ,
ⵎⴰⵛⴰ ⵙⴻⵏⵊⴻⵎ ⴰⵏⴻⵖ ⵥⴻⴳ ⵓⵎⵄⴻⴼⴼⴰⵏ.
ⵎⵉⵏⵥⵉ ⵜⴰⴳⴻⵍⴷⵉⵜ ⴷ ⵊⵊⴻⵀⴷ ⴷ ⵓⵄⵓⴵⵉ ⴰⴷ ⵉⵍⵉⵏ ⵉ ⵛⴻⴽ
ⵉ ⵍⴻⴱⴷⴰ ⵇⴰⵄ! ⴰⵎⵉⵏ!’ ■
14 ⵎⴰⵖⴰⵔ ⵎⴰⵍⴰ ⴽⴻⵏⵏⵉⵡ ⵜⵙⴰⵎⵃⴻⵎ ⵉ ⵉⵡⴷⴰⵏ ⵉ ⵓⵅⴻⵟⵟⵓ ⵏⵙⴻⵏ, ⵓⵍⴰ ⴷ ⴱⴰⴱⴰⵜⵡⴻⵎ ⵉ ⵉⴵⴰⵏ ⴷⴻⴳ ⵓⵊⴻⵏⵏⴰ ⴰⴷ ⴰⵡⴻⵎ ⵉⵖⴼⴰⵔ. ■
15 ⵎⴰⵛⴰ ⵎⴰⵍⴰ ⴽⴻⵏⵏⵉⵡ ⵡⴰⵔ ⵜᵉⵜⵜⵙⵉⵎⵉⵃⴻⵎ ⵉ ⵉⵡⴷⴰⵏ ⵉ ⵓⵅⴻⵟⵟⵓ ⵏⵙⴻⵏ, ⴰⵇⴰ ⵓⵍⴰ ⴷ ⴱⴰⴱⴰⵜⵡⴻⵎ ⵡⴰⵔ ⵉⵖⴻⴼⴼⴰⵔ ⵛⴰ ⵉⵄⴻⴷⴷⵉⵢⴻⵏ ⵏⵡⴻⵎ.” ■
ⴰⵥⵓⵎⵎⵉ
16 “ⵍⴰⵎⵉ ⵜⵥⵓⵎⵎⴻⵎ, ⵡⴰⵔ ⵜⵜⴻⴳⴳⴻⵎ ⴰⵖⴻⵎⴱⵓⴱ ⴰⴱⴰⵔⵛⴰⵏ ⴰⵎ ⵉⵎⵏⴰⴼⵇⴻⵏ, ⵉⵏⵏⵉ ⵉⵙⵙⵏⴻⵇⵍⴰⴱⴻⵏ ⴰⵖⴻⵎⴱⵓⴱ ⵏⵙⴻⵏ ⵃⵉⵎⴰ ⴰⴷ ⵜⴻⵏ ⵥⴰⵔⴻⵏ ⵉⵡⴷⴰⵏ ⴱⴻⵍⵍⵉ ⴰⵇⴰ ⵥⵓⵎⵎⴻⵏ. ⵙ ⵜⵉⴷⴻⵜⵜ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵇⴰ ⵏⵉⵜⵏⵉ ⵓⴼⵉⵏ ⵍⴰⵊⴰⵔ ⵏⵙⴻⵏ ⵥⵉ ⴱⴻⵄⴷⴰ. ■
17 ⵎⴰⵛⴰ ⵛⴻⴽ, ⵎⴰⵍⴰ ⵜⵥⵓⵎⵎⴻⴷ, ⴷⵀⴻⵏ ⴰⵥⴻⴵⵉⴼ ⵏⵏⴻⴽ ⵓⵛⴰ ⵙⵉⵔⴻⴷ ⴰⵖⴻⵎⴱⵓⴱ ⵏⵏⴻⴽ,
18 ⵃⵉⵎⴰ ⵡⴰⵔ ⵜⴱⵉⵏⵉⴷ ⵛⴰ ⵉ ⵉⵡⴷⴰⵏ ⴱⴻⵍⵍⵉ ⵜⵥⵓⵎⵎⴻⴷ, ⵎⴰⵛⴰ ⵉ ⴱⴰⴱⴰⵛ ⵡⴻⵏⵏⵉ ⵉⴵⴰⵏ ⴷⵉ ⵜⵏⵓⴼⴼⵔⴰ, ⵓⵛⴰ ⴱⴰⴱⴰⵛ ⵉ ⵉⵜⵜⵡⴰⵍⴰⵏ ⴷⵉ ⵜⵏⵓⴼⴼⵔⴰ, ⴰⵇⴰ ⵏⴻⵜⵜⴰ ⵉ ⵛⴻⴽ ⵉ ⵖⴰ ⵉⵅⴻⴵⵚⴻⵏ.”
ⵍⴻⴽⵏⵓⵥ ⴷⴻⴳ ⵓⵊⴻⵏⵏⴰ
19 “ⵡⴰⵔ ⵙⵎⵓⵏⴰⵎ ⵛⴰ ⵍⴻⴽⵏⵓⵥ ⴷⴰ ⴷⵉ ⴷⴷⵓⵏⴻⵛⵜ ⵎⴰⵏⵉ ⵉ ⵜⴻⵏ ⵖⴰ ⵜⴻⵛⵛ ⵜⵛⵉⵏⴷⴰ ⴷ ⴷⴷⵔⴰ, ⵓ ⵎⴰⵏⵉ ⵉ ⵖⴰ ⵙⵙⵏⵓⵇⵇⴱⴻⵏ ⵉⵅⴻⵡⵡⴰⵏⴻⵏ, ⴰⴷ ⵜⴻⵏ ⴰⵛⴰⵔⴻⵏ, ■ 20 ⵎⴰⵛⴰ ⵙⵎⵓⵏⴻⵎ ⵉ ⵢⵉⵅⴻⴼ ⵏⵡⴻⵎ ⵍⴻⴽⵏⵓⵥ ⴷⴻⴳ ⵓⵊⴻⵏⵏⴰ ⵎⴰⵏⵉ ⵡⴰⵔ ⵜⴻⵏ ⵜᵉⵜⵜⴻⵜⵜ ⵛⴰ ⵜⵛⵉⵏⴷⴰ ⴷ ⴷⴷⵔⴰ ⵓ ⵎⴰⵏⵉ ⵡⴰⵔ ⵙⵙⵏⵓⵇⵇⵓⴱⴻⵏ ⵉⵅⴻⵡⵡⴰⵏⴻⵏ, ⵡⴰⵔ ⵜⴻⵏ ⵜⵜⴰⵛⴰⵔⴻⵏ. ■ 21 ⵎⵉⵏⵥⵉ ⵎⴰⵏⵉ ⵉ ⵖⴰ ⵢⵉⵍⵉ ⵍⴽⴻⵏⵥ ⵏⵏⴻⴽ, ⴰⵇⴰ ⴰⴷ ⴷⵉⵏ ⵢⵉⵍⵉ ⵓⵍⴰ ⴷ ⵓⵍ ⵏⵏⴻⴽ.”
ⵍⴻⴼⵏⴰⵔ ⵏ ⴰⵔⵔⵉⵎⴻⵜ
22 “ⵍⴻⴼⵏⴰⵔ ⵏ ⴰⵔⵔⵉⵎⴻⵜ ⵏⴻⵜⵜⴰ ⴷ ⵜⵉⵟⵟ. ⵎⴰⵍⴰ ⵜⵉⵟⵟ ⵏⵏⴻⴽ ⴰⵇⴰ ⵜⴻⵚⴼⴰ, ⴰⴷ ⵜⵉⵍⵉ ⴰⵔⵔⵉⵎⴻⵜ ⵏⵏⴻⴽ ⵎⴰⵔⵔⴰ ⴷ ⵜⴰⴼⴰⵡⵜ. ■ 23 ⵎⴰⵔⴰ ⵜⵉⵟⵟ ⵏⵏⴻⴽ ⴷ ⵜⴰⵄⴻⴼⴼⴰⵏⵜ, ⵅⴻⵏⵏⵉ ⴰⴷ ⵜⵉⵍⵉ ⴰⵔⵔⵉⵎⴻⵜ ⵏⵏⴻⴽ ⵎⴰⵔⵔⴰ ⴷ ⵜⴰⴵⴻⵙⵜ. ⵎⴰⵍⴰ ⵜⴰⴼⴰⵡⵜ ⵜⴻⵏⵏⵉ ⴷⴰⵢⴻⴽ ⴷ ⵜⴰⴵⴻⵙⵜ, ⵎⴻⵛⵃⴰⵍ ⵜⴻⵎⵖⴰⵔ ⵜⴰⴵⴻⵙⵜ! 24 ⵓⵍⴰ ⴷ ⵉⵊⵊ ⵡⴰⵔ ⵉⵥⴻⵎⵎⴰⵔ ⴰⴷ ⵉⵅⴷⴻⵎ ⵉ ⵜⵏⴰⵢⴻⵏ ⵏ ⵉⵙⵉⴷⵉⵜⴻⵏ, ⵎⵉⵏⵥⵉ ⵅⴻⵏⵏⵉ ⵏⴻⵜⵜⴰ ⴰⴷ ⵉⵛⴰⵔⵀ ⵉⵊⵊⴻⵏ, ⴰⴷ ⵉⵅⵙ ⵡⴻⵏⵏⴻⵖⵏⵉ, ⵏⵉⵖ ⴰⴷ ⵉⵡⴻⵇⵇⴰⵔ ⵉⵊⵊⴻⵏ, ⴰⴷ ⵉⵙⵙⴻⵃⵇⴰⵔ ⵡⴻⵏⵏⴻⵖⵏⵉ. ⴽⴻⵏⵏⵉⵡ ⵡⴰⵔ ⵜⵥⴻⵎⵎⴰⵔⴻⵎ ⴰⴷ ⵜⵙⴻⵅⵅⴰⵔⴻⵎ ⵉ ⴰⵔⴻⴱⴱⵉ ⴷ ⵜⴻⵏⵄⴰⵛⵉⵏ.” ■
ⵉⵎⵓⵏⴰⵙ
25 “ⵙ ⵓⵢⴻⵏⵏⵉ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ: ‘ⵡⴰⵔ ⴽⴻⵙⵙⵉⵎ ⴰⵎⵏⵓⵙ ⴷⵉ ⵜⵓⴷⴰⵔⵜ ⵏⵡⴻⵎ ⵎⵉⵏ ⵖⴰ ⵜⴻⵛⵛⴻⵎ ⵏⵉⵖ ⵎⵉⵏ ⵖⴰ ⵜⴻⵙⵡⴻⵎ ⵓⵍⴰ ⵉ ⴰⵔⵔⵉⵎⴻⵜ ⵏⵡⴻⵎ ⵎⴰⵎⵎⴻⵛ ⵜⵜ ⵉ ⵖⴰ ⵜⴻⵙⵙⵢⴰⵔⴹⴻⵎ. ⵎⴰ ⵡⴰⵔ ⵜⴻⵃⵍⵉ ⵜⵓⴷⴰⵔⵜ ⵅ ⵎⴰⵛⵛⴰ ⵏⵉⵖ ⴰⵔⵔⵉⵎⴻⵜ ⵅ ⵡⴰⵔⵔⵓⴹ? ■ 26 ⵅⵥⴰⵔⴻⵎ ⵖⴰⵔ ⵉⵊⴹⴰⴹ ⵏ ⵓⵊⴻⵏⵏⴰ, ⴰⵇⴰ ⵏⵉⵜⵏⵉ ⵡⴰⵔ ⵥⴰⵔⵔⵄⴻⵏ, ⵡⴰⵔ ⵎⴻⵊⵊⴰⵔⴻⵏ ⵓⵛⴰ ⵡⴰⵔ ⵜⵜⵅⴻⵎⵎⵉⵍⴻⵏ ⴷⵉ ⵍⴻⵎⵔⴰⵙⵉ, ⵡⴰⵅⵅⴰ ⴰⵎⴻⵏⵏⵉ ⴱⴰⴱⴰⵜⵡⴻⵎ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ ⵉ ⵜⴻⵏ ⵉⵙⵙⴻⵛⵛⴰⵏ. ⵎⴰ ⴽⴻⵏⵏⵉⵡ ⵡⴰⵔ ⵜⴻⵙⵙⴻⴽⴽⵡⵉⵎ ⵛⴰ ⴽⵜⴰⵔ ⴰⵟⵟⴰⵙ ⵅⴰⵙⴻⵏ? ■ 27 ⵎⴰⵏ ⵡⴻⵏ ⵥⵥⴰⵢⵡⴻⵎ ⵉⵥⴻⵎⵎⴰⵔ ⵙ ⵡⴻⵎⵏⵓⵙ ⵏⵏⴻⵙ ⴰⴷ ⵢⴰⵔⵏⵉ ⵓⵍⴰ ⴷ ⵉⵊⵊ ⵏ ⵓⵖⵉⵍ ⴷⵉ ⵜⵓⵥⵥⴻⴳⴳⴰⵔⵜ ⵏⵏⴻⵙ? 28 ⵓ ⵎⴰⵢⴻⵎⵎⵉ ⵜⴽⴻⵙⵙⵉⵎ ⴰⵎⵏⵓⵙ ⵉ ⵡⴰⵔⵔⵓⴹ? ⵅⵥⴰⵔⴻⵎ ⵎⴰⵎⵎⴻⵛ ⵖⴻⵎⵎⵢⴻⵏⵜ ⵜⵍⵉⵍⵍⵉⵛⵉⵏ ⴷⴻⴳ ⵉⵢⵢⴰⵔ, ⵡⴰⵅⵅⴰ ⵏⵉⵜⴻⵏⵜⵉ ⵡⴰⵔ ⵅⴻⴷⴷⵎⴻⵏⵜ, ⵡⴰⵔ ⵜⵜⵇⴰⵔⴹⵛⴻⵏⵜ, □ 29 ⵎⴰⵛⴰ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵓⵍⴰ ⴷ ⵙⵓⵍⵉⵎⴰⵏ ⴷⵉ ⵎⴰⵔⵔⴰ ⴰⵄⵓⴵⵉ ⵏⵏⴻⵙ ⵡⴰⵔ ⵢⴰⵔⴹ ⵛⴰ ⴰⵎ ⵉⵊⵊⴻⵏ ⵥⵥⴰⵢⵙⴻⵏ. 30 ⵎⴰⵍⴰ ⴰⵔⴻⴱⴱⵉ ⵉⵙⵙⵢⴰⵔⴹ ⵍⴻⵃⵜⵉⵛ ⵏ ⵉⵢⵢⴰⵔ ⵉ ⵉⴵⴰⵏ ⴰⵙⵙ-ⴰ ⵓⵛⴰ ⵜⵉⵡⴻⵛⵛⴰ ⴰⴷ ⵉⵎⵎⴻⵏⴹⴰⵔ ⴷⵉ ⵜⴻⴼⵇⵓⵏⵜ, ⵎⴰ ⵅⴻⵏⵏⵉ ⵡⴰⵔ ⴽⴻⵏⵏⵉⵡ ⵉⵙⵙⵢⵉⵔⵔⴻⴹ ⴰⵟⵟⴰⵙ ⵃⵙⴻⵏ ⵥⵥⴰⵢⴻⵙ, ⴰ ⴽⴻⵏⵏⵉⵡ ⵉ ⴷⵉ ⵉⴵⴰ ⴷⵔⵓⵙ ⵏ ⵍ’ⵉⵎⴰⵏ? 31 ⵙ ⵓⵢⴻⵏⵏⵉ ⵡⴰⵔ ⴽⴻⵙⵙⵉⵎ ⵛⴰ ⴰⵎⵏⵓⵙ, ⵡⴰⵔ ⵇⵇⴰⵔⴻⵎ: ‘ⵎⵉⵏ ⵉ ⵖⴰ ⵏⴻⵛⵛ?’ ⵓ: ‘ⵎⵉⵏ ⵉ ⵖⴰ ⵏⵙⵓ?’ ⵏⵉⵖ: ‘ⵎⵉⵏ ⵉ ⵖⴰ ⵏⵢⴰⵔⴹ?’ 32 ⴰⵇⴰ ⵍⴻⴳⵏⵓⵙ ⴰⵔⴻⵥⵥⵓⵏ ⵎⴰⵏ ⴰⵢⴰ ⵎⴰⵔⵔⴰ, ⵎⴰⵛⴰ ⴱⴰⴱⴰⵜⵡⴻⵎ ⴷⴻⴳ ⵓⵊⴻⵏⵏⴰ ⵉⵙⵙⴻⵏ ⴱⴻⵍⵍⵉ ⵜⴻⵃⴷⴰⵊⴻⵎ ⵎⴰⵏ ⴰⵢⴰ ⵎⴰⵔⵔⴰ. 33 ⴰⵔⵥⵓⵎ ⴰⵎⴻⵥⵡⴰⵔⵓ ⵅ ⵜⴳⴻⵍⴷⵉⵜ ⵏ ⴰⵔⴻⴱⴱⵉ ⴷ ⵜⵙⴻⴳⴷⴰ ⵏⵏⴻⵙ, ⵓⵛⴰ ⵎⴰⵏ ⴰⵢⴰ ⵎⴰⵔⵔⴰ ⴰⴷ ⵖⴰⵔⵡⴻⵎ ⵉⵎⵎⴰⵔⵏⵉ ⵄⴰⵡⴻⴷ. ■ 34 ⵅⴻⵏⵏⵉ ⵡⴰⵔ ⴽⴻⵙⵙⵉⵎ ⴰⵎⵏⵓⵙ ⵉ ⵎⵉⵏ ⵉ ⵖⴰ ⵢⵉⵍⵉ ⵜⵉⵡⴻⵛⵛⴰ, ⵎⵉⵏⵥⵉ ⵜⵉⵡⴻⵛⵛⴰ ⴰⴷ ⵜⴻⴽⵙⵉ ⴰⵎⵏⵓⵙ ⵉ ⵢⵉⵅⴻⴼ ⵏⵏⴻⵙ. ⵉⵛⴼⴰ ⵉ ⴽⵓⵍ ⴰⵙⵙ ⵜⵓⵄⴻⴼⴼⵏⴰ ⵏⵏⴻⵙ.”