ⵣⴰⴽⴰⵔⵉⵢⵢⴰ 13

ⴰⵙⴻⴼⵚⵉ ⴷ ⵓⵙⵉⵥⴷⴻⴳ ⵏ ⵓⵔⵛⴰⵍⵉⵎ

1 “ⴷⴻⴳ ⵡⴰⵙⵙ ⵏⵏⵉ ⴳⴳⵓⵔ ⴰⴷ ⵜⴻⴷⴷⵓⵇⵇⴻⵥ ⵉⵛⵜ ⵏ ⵜⴰⵍⴰ ⵉ ⵜⴰⴷⴷⴰⵔⵜ ⵏ ⴷⴰⵡⵓⴷ ⵓⵍⴰ ⵉ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ, ⴹⵉⴷⴷ ⵉ ⴷⴷⴻⵏⴱ ⵓ ⴹⵉⴷⴷ ⵉ ⵍⴻⵅⵎⴻⵊ.

2 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵏⴻⵛⵛ ⴰⴷ ⵜⴻⵃⵃⵉⵖ ⵉⵙⵎⴰⵡⴻⵏ ⵏ ⵍⴻⵅⵢⴰⵍⴰⵜ ⵏ ⵚⵚⴰⵏⴰⵎ ⵥⵉ ⵜⴻⵎⵎⵓⵔⵜ, ⵃⵉⵎⴰ ⵡⴰⵔ ⵅⴰⵙⴻⵏ ⵄⴻⵇⵇⵍⴻⵏ ⵄⴰⴷ. ⵓⵍⴰ ⴷ ⵉⵏⴰⴱⵉⵢⵢⴻⵏ ⴷ ⴱⵓⵃⴱⴻⵍ ⴰⵎⴻⵏⴳⵓⵙ ⴰⴷ ⵜⴻⵏ ⵊⵊⴻⵖ ⴰⴷ ⴼⴼⵖⴻⵏ ⵥⵉ ⵜⴻⵎⵎⵓⵔⵜ.    3 ⴰⴷ ⵉⵎⵙⴰⵔ, ⵎⴰⵍⴰ ⵛⴰ ⵏ ⵉⵊⵊⴻⵏ ⴰⴷ ⵉⵏⴻⴱⴱⴰ, ⴱⴻⵍⵍⵉ ⴱⴰⴱⴰⵙ ⴷ ⵢⴻⵎⵎⴰⵙ ⵉⵏⵏⵉ ⵜ-ⵉ-ⴷⴷ ⵉⵊⵊⵉⵏ, ⴰⴷ ⴰⵙ ⵉⵏⵉⵏ: ‘ⵛⴻⴽ ⵡⴰⵔ ⵜⵜⵖⵉⵎⵉⴷ ⵜⴻⴷⴷⴰⵔⴻⴷ, ⵎⴰⵖⴰⵔ ⵛⴻⴽ ⵜⴻⵙⵙⵉⵡⵍⴻⴷ ⵉⵅⴰⵔⵔⵉⵇⴻⵏ ⴷⴻⴳ ⵉⵙⴻⵎ ⵏ ⵙⵉⴷⵉ!’ ⴱⴰⴱⴰⵙ ⴷ ⵢⴻⵎⵎⴰⵙ ⵉⵏⵏⵉ ⵜ-ⵉ-ⴷⴷ ⵉⵊⵊⵉⵏ, ⴰⴷ ⵜ ⵙⵙⵏⵓⵇⵇⴱⴻⵏ, ⵅⵎⵉ ⵉ ⵖⴰ ⵉⵏⴻⴱⴱⴰ.   

4 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ ⴰⵇⴰ ⵉⵏⴰⴱⵉⵢⵢⴻⵏ ⴰⴷ ⵙⵙⴻⴹⵃⴰⵏ, ⴽⵓⵍ ⵉⵊⵊ ⵅ ⵜⵎⴻⵥⵔⵉⵡⵜ ⵏⵏⴻⵙ, ⵅⵎⵉ ⵉ ⵖⴰ ⵉⵜⵜⵏⴻⴱⴱⴰ. ⵏⵉⵜⵏⵉ ⵡⴰⵔ ⵜⵜⵉⵔⵉⴹⴻⵏ ⵛⴰ ⴰⴱⴰⵔⵜⴻⵙⵙⵓ ⵏ ⵛⵛⵄⴰⵔ ⵎⴰⵃⴻⵏⴷ ⴰⴷ ⵙⵙⵅⴰⵔⵔⵇⴻⵏ. 5 ⵏⴻⵜⵜⴰ ⴰⴷ ⵢⵉⵏⵉ ‘ⵏⴻⵛⵛ ⵡⴰⵔ ⴵⵉⵖ ⴷ ⴰⵏⴰⴱⵉ, ⵏⴻⵛⵛ ⴷ ⵉⵊⵊ ⵏ ⵡⴻⵔⵢⴰⵥ ⵡⴻⵏⵏⵉ ⵉⵜⵜⴼⴻⴵⵃⴻⵏ ⵉⵢⵢⴰⵔ, ⵎⵉⵏⵥⵉ ⵉⴽⵙⴻⴱ ⴰⵢⵉ ⵉⵊⵊⴻⵏ ⵥⵉ ⵜⴻⵎⵥⵉ ⵉⵏⵓ.’ 6 ⵎⴰⵍⴰ ⴰⴷ ⴰⵙ ⵉⵏⵉⵏ: ‘ⵎⵉⵏ ⵄⵏⴰⵏ ⵅⴻⵏⵏⵉ ⵉⵢⴻⵥⵥⵉⵎⴻⵏ ⵏⵏⵉ ⴷⴻⴳ ⵉⴼⴰⵙⵙⴻⵏ ⵏⵏⴻⴽ?’, ⴰⴷ ⵢⵉⵏⵉ ⵏⴻⵜⵜⴰ: ‘ⴰⵎⵎⵓ ⵉⵜⵜⵡⴰⵡⵜⴻⵖ ⴷⵉ ⵜⴰⴷⴷⴰⵔⵜ ⵏ ⵉⵎⵄⵉⵥⵥⴻⵏ ⵉⵏⵓ.’ ”

7 “ⵙⵙⵉⴼ, ⴽⴽⴰⵔ ⵅ ⵓⵎⴻⴽⵙⴰⵡ ⵉⵏⵓ ⵓ ⵅ ⵡⴻⵔⵢⴰⵥ ⵏⵏⵉ ⵉⴵⴰⵏ ⴷ ⴰⵎⵄⴰⵛⴰⵔ ⵉⵏⵓ!, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. ⵡⵡⴻⵜ ⴰⵎⴻⴽⵙⴰⵡ ⵉⵏⵓ ⵓⵛⴰ ⵅⴻⵏⵏⵉ ⴰⴷ ⵉⵎⵎⵙⴻⴱⴹⴰ ⵡⵓⴵⵉ ⵓ ⵏⴻⵛⵛ ⴰⴷ ⴰⵔⵔⴻⵖ ⴰⴼⵓⵙ ⵉⵏⵓ ⵜⵉⵡⵡⴰ ⵉⵎⵓⵇⵍⵉⵍⴻⵏ.”   

8 “ⴰⴷ ⵉⵎⵙⴰⵔ ⴷⵉ ⵜⴰⵎⵎⵓⵔⵜ ⵎⴰⵔⵔⴰ, ⵉⵇⵇⴰⵔ ⵙⵉⴷⵉ, ⴰⵇⴰ ⵜⵏⴰⵢⴻⵏ ⵏ ⵉⵥⴻⵢⵏⴰⵜ ⴰⴷ ⵜⵜⵡⴰⵇⴻⴹⵄⴻⵏ ⵓ ⵏⵉⵜⵏⵉ ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ, ⵎⴰⵛⴰ ⴰⵥⵢⴻⵏ ⵡⵉⵙⵙ ⵜⵍⴰⵜⴰ ⴰⴷ ⴷⴰⵢⴻⵙ ⵉⵇⵇⵉⵎ. 9 ⴰⵥⵢⴻⵏ ⵡⵉⵙⵙ ⵜⵍⴰⵜⴰ ⴰⴷ ⵜ ⵏⴹⴰⵔⴻⵖ ⴷⵉ ⵜⵎⴻⵙⵙⵉ, ⵃⵉⵎⴰ ⴰⴷ ⵉⵜⵜⵡⴰⵚⴻⴼⴼⴰ ⴰⵎ ⵎⴰⵎⵎⴻⵛ ⵙⵙⴻⵚⴼⴰⵏ ⵏⵏⵓⵇⴰⵔⵜ ⵓ ⵏⴻⵛⵛ ⴰⴷ ⵜⴻⵏ ⵊⴰⵔⵔⴱⴻⵖ ⴰⵎ ⵎⴰⵎⵎⴻⵛ ⵜⵜⵊⴰⵔⵔⴰⴱⴻⵏ ⵓⵔⴻⵖ. ⵏⴻⵜⵜⴰ ⴰⴷ ⵉⵍⴰⵖⴰ ⵙ ⵢⵉⵙⴻⵎ ⵉⵏⵓ ⵓ ⵏⴻⵛⵛ ⴰⴷ ⴰⵙ ⵙⵍⴻⵖ. ⴰⴷ ⵉⵏⵉⵖ: ‘ⵍⴳⴻⵏⵙ ⵉⵏⵓ!’ ⵓ ⵏⴻⵜⵜⴰ ⴰⴷ ⵢⵉⵏⵉ: ‘ⵙⵉⴷⵉ ⴷ ⴰⵔⴻⴱⴱⵉ ⵉⵏⵓ!’ ”