ⵣⴰⴽⴰⵔⵉⵢⵢⴰ 10

ⴰⵄⴷⴰⵍ ⵏ ⵢⴰⵀⵓⴷⴰ ⴷ ⵉⵙⵔⴰⵉⵍ

1 “ⵜⵜⴰⵔⴻⵎ ⴰⵏⵥⴰⵔ ⵣⵉ ⵙⵉⴷⵉ,

ⴷⵉ ⵍⵡⴻⵇⵜ ⵏ ⵡⴻⵏⵥⴰⵔ ⵏ ⵜⴻⴼⵙⵓⵜ.

ⵙⵉⴷⵉ ⵉⵜⵜⴻⴳⴳ ⴰⵙⵙⴰⵎⴻⵏ,

ⵡⴰⵀ, ⵏⴻⵜⵜⴰ ⴰⴷ ⴰⵙⴻⵏ ⵉⵡⵛ

ⵉⴱⵓⴷⴰ ⵏ ⵡⴻⵏⵥⴰⵔ,

ⵉ ⴽⵓⵍ ⵉⵊⵊ ⵏ ⵡⴻⴼⵙⵓ ⴷⴻⴳ ⵉⵢⵢⴰⵔ.   

2 ⵎⴰⵖⴰⵔ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵙⵙⴰⵡⴰⵍⴻⵏ ⵍⵖⴻⵛⵛ,

ⵓ ⵉⴳⴻⵣⵣⴰⵏⴻⵏ ⵜⵜⵡⴰⵍⴰⵏ ⵉⵅⴰⵔⵔⵉⵇⴻⵏ

ⵓ ⵏⵉⵜⵏⵉ ⵜⵜⵄⴰⵡⴰⴷⴻⵏ ⵜⵉⵔⵊⴰ ⵉⵛⴻⵎⵎⵜⴻⵏ,

ⵏⵉⵜⵏⵉ ⵙⵙⴼⴻⵡⵡⴰⵊⴻⵏ ⵙ ⵍⴻⵄⵡⵉⵏ.

ⵅ ⵓⵢⴰ ⵉ ⵜⵜⵡⴰⵙⵙⵉⴳⴳⵯⴻⵊⴻⵏ ⴰⵎ ⵡⵓⴵⵉ,

ⵜⵜⵡⴰⵃⵚⴰⵔⴻⵏ, ⵎⵉⵏⵣⵉ ⴰⵎⴻⴽⵙⴰⵡ ⵡⴰⵔ ⴷⵉⵏ ⵉⴵⵉ.”     

3 “ⵅ ⵉⵎⴻⴽⵙⴰⵡⴻⵏ ⵢⴰⵔⵖⴰ ⵡⴻⵖⴹⴰⴱ ⵉⵏⵓ

ⵓ ⵏⴻⵛⵛ ⴰⴷ ⵅⴻⴵⵚⴻⵖ ⵉⵖⴰⵢⴹⴻⵏ,

ⵎⴰⵖⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ

ⴰⴷ ⵉⵙⵙⵉⵊⵊ ⵅ ⵜⵃⵉⵎⴰⵔⵜ ⵏⵏⴻⵙ,

ⵅ ⵜⴰⴷⴷⴰⵔⵜ ⵏ ⵢⴰⵀⵓⴷⴰ,

ⵓ ⵏⴻⵜⵜⴰ ⴰⴷ ⵜⴻⵏ ⵉⵙⴻⴷⴷ

ⴰⵎ ⵓⵢⵉⵙ ⵏⵏⴻⵙ ⵉⵜⵜⵉⵙⵙⵉⵇⴻⵏ ⵖⴰⵔ ⵓⵎⴻⵏⵖⵉ.

4 ⵣⵣⴰⵢⴻⵙ ⴰⵥⵔⵓ ⵏ ⵜⴻⵖⵎⴰⵔⵜ,

ⵣⵣⴰⵢⴻⵙ ⵍⴻⵡⵜⴻⴷ,

ⵣⵣⴰⵢⴻⵙ ⵍⵇⴻⵡⵙ ⵏ ⵓⵎⴻⵏⵖⵉ,

ⴰⴷ ⵣⵣⴰⵢⴻⵙ ⴷⴷ-ⴼⴼⵖⴻⵏ ⵅⴻⵏⵏⵉ

ⵎⴰⵔⵔⴰ ⵉⵎⵣⴻⵢⵢⴰⵔⴻⵏ ⵊⵎⵉⵄ.   

5 ⵏⵉⵜⵏⵉ ⵎⴰⵔⵔⴰ ⴰⴷ ⴷⴻⵡⵍⴻⵏ

ⴰⵎ ⴰⵢⵜ ⵏ ⴱⵓ-ⵜⴻⵖⵔⵓⴹⵜ

ⵉⵏⵏⵉ ⴷⴻⴳ ⵓⵎⴻⵏⵖⵉ ⴰⴷ ⵄⴻⴼⵙⴻⵏ

ⵅ ⵓⴱⴻⴵⴰⵄ ⴷⵉ ⵣⵣⵏⴰⵇⵉ.

ⵡⴰⵀ, ⵏⵉⵜⵏⵉ ⴰⴷ ⵎⵎⴻⵏⵖⴻⵏ,

ⵎⴰⵖⴰⵔ ⵙⵉⴷⵉ ⴰⴷ ⵢⵉⵍⵉ ⴰⴽⵉⴷⵙⴻⵏ,

ⵓ ⵏⵉⵜⵏⵉ ⴰⴷ ⵙⴻⴹⵃⴰⵏ ⵉⵏⵏⵉ ⵉⵏⵢⵉⵏ ⵅ ⵢⴻⵢⵙⴰⵏ.

6 ⵏⴻⵛⵛ ⴰⴷ ⵙⵙⵊⴻⵀⴷⴻⵖ ⵜⴰⴷⴷⴰⵔⵜ ⵏ ⵢⴰⵀⵓⴷⴰ

ⵓ ⴰⴷ ⵙⵙⵏⴻⵊⵎⴻⵖ ⵜⴰⴷⴷⴰⵔⵜ ⵏ ⵢⵓⵙⵓⴼ

ⵓ ⵏⴻⵛⵛ ⴰⴷ ⴰⵙⴻⵏ ⵡⵛⴻⵖ ⵜⴰⵣⴻⴷⴷⵉⵖⵜ,

ⵎⴰⵖⴰⵔ ⵏⴻⵛⵛ ⴰⵔⵔⴻⵃⵎⴻⵖ ⴷⴰⵢⵙⴻⵏ

ⵓ ⵏⵉⵜⵏⵉ ⴰⴷ ⵉⵍⵉⵏ ⴰⵅⵎⵉ ⵏⴻⵛⵛ

ⵡⴰⵔ ⵜⴻⵏ ⵏⴹⴰⵔⴻⵖ,

ⵎⴰⵖⴰⵔ ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ,

ⵓ ⵏⴻⵛⵛ ⴰⴷ ⵖⴰⵔⵙⴻⵏ ⵙⵍⴻⵖ.”

7 “ⵉⵏⵏⵉ ⵏ ⵉⴼⵔⴰⵢⵉⵎ ⴰⴷ ⵉⵍⵉⵏ

ⴰⵎ ⵢⵉⵊⵊ ⵏ ⴱⵓ-ⵜⴻⵖⵔⵓⴹⵜ

ⵓ ⵓⵍ ⵏⵙⴻⵏ ⴰⴷ ⵉⴼⴰⵔⵃ ⴰⵎ ⵖⴰⵔ ⴱⵉⵏⵓ,

ⵓ ⵉⵃⴻⵏⵊⵉⵔⴻⵏ ⵏⵙⴻⵏ

ⴰⴷ ⵜ ⵥⴰⵔⴻⵏ ⵓ ⴰⴷ ⴼⴰⵔⵃⴻⵏ,

ⵓⵍ ⵏⵙⴻⵏ ⴰⴷ ⵉⴼⴰⵔⵃ ⴷⵉ ⵙⵉⴷⵉ.

8 ⵏⴻⵛⵛ ⴰⴷ ⵅⴰⵙⴻⵏ ⵚⴻⴼⴼⴰⵔⴻⵖ

ⵓ ⴰⴷ ⵜⴻⵏ ⵙⵙⵎⵓⵏⴻⵖ,

ⵎⴰⵖⴰⵔ ⵏⴻⵛⵛ ⴼⴷⵉⵖ ⵜⴻⵏ,

ⵓ ⵏⵉⵜⵏⵉ ⴰⴷ ⴷⴷ-ⴷⴻⵡⵍⴻⵏ ⴷⴻⴳ ⵡⴰⵟⵟⴰⵙ,

ⴰⵎ ⵎⴰⵎⵎⴻⵛ ⵜⴻⵏ ⵜⵓⵖⴰ ⴷⴻⴳ ⵡⴰⵟⵟⴰⵙ.

9 ⵏⴻⵛⵛ ⴰⴷ ⵜⴻⵏ ⵣⴰⵔⵄⴻⵖ ⵊⴰⵔ ⵍⴻⴳⵏⵓⵙ

ⵓ ⵏⵉⵜⵏⵉ ⴰⴷ ⴰⵢⵉ ⵉⴷⴰⵔⴻⵏ

ⴷⵉ ⵊⵊⵡⴰⵢⴻⵀ ⵉⴳⴳⵯⴻⵊⵊⴻⵏ.

ⵅⴻⵏⵏⵉ ⴰⴷ ⴷⴷⴰⵔⴻⵏ ⴰⴽ-ⴷ ⵉⵃⴻⵏⵊⵉⵔⴻⵏ ⵏⵙⴻⵏ

ⵓⵛⴰ ⴰⴷ ⴷⴷ-ⴷⴻⵡⵍⴻⵏ.   

10 ⵏⴻⵛⵛ ⴰⴷ ⵜⴻⵏ ⵊⵊⴻⵖ ⴰⴷ ⴷⴷ-ⵄⴻⵇⴱⴻⵏ ⵣⵉ ⵎⵉⵙⵍⴰ,

ⴰⴷ ⵜⴻⵏ ⴷⴷ-ⵙⵙⵎⵓⵏⴻⵖ ⵣⵉ ⴰⵛⵛⵓⵔ

ⵓ ⴰⴷ ⵜⴻⵏ ⴷⴷ-ⴰⵡⵢⴻⵖ ⵖⴰⵔ ⵜⴻⵎⵎⵓⵔⵜ ⵏ ⵊⵉⵍⵄⴰⴷ

ⵓ ⵖⴰⵔ ⵍⵓⴱⵏⴰⵏ,

ⵎⴰⵛⴰ ⴰⵢⴰ ⵡⴰⵔ ⵜⴻⵏ ⵉⵜⵜⵇⴻⴷⴷⵉ.   

11 ⵏⴻⵜⵜⴰ ⴰⴷ ⵉⵥⵡⴰ ⵍⴻⴱⵃⴰⵔ ⵏ ⵍⴻⵃⵚⴰⵔⴻⵜ ⵏⵙⴻⵏ

ⵓ ⴰⴷ ⵉⵡⵡⴻⵜ ⵍⴻⵎⵡⴰⵊ ⵏ ⵍⴻⴱⵃⴰⵔ

ⵓ ⵎⴰⵔⵔⴰ ⵉⵎⵓⵛⴰⵏ ⵢⵓⴵⵖⴻⵏ

ⵏ ⵉⵖⵣⴰⵔ ⵏ ⵏⵉⵍ ⴰⴷ ⴰⵥⵖⴻⵏ.

ⵏⵏⴼⴰⵅⴻⵜ ⵏ ⴰⵛⵛⵓⵔ ⴰⴷ ⵜᵉⵜⵜⵡⴰⵙⵙⵡⴰⴹⴻⵄ,

ⵓ ⴰⵣⴻⴵⴰⴹ ⵏ ⵎⵉⵙⵍⴰ ⴰⴷ ⵉⵜⵜⵡⴰⵡⴻⴷⴷⴰⵔ.

12 ⵏⴻⵛⵛ ⴰⴷ ⵜⴻⵏ ⵙⵙⵊⴻⵀⴷⴻⵖ ⴷⵉ ⵙⵉⴷⵉ

ⵓ ⵏⵉⵜⵏⵉ ⴰⴷ ⵓⵢⵓⵔⴻⵏ ⴷⴻⴳ ⵢⵉⵙⴻⵎ ⵏⵏⴻⵙ!”,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.