ⴰⵡⴰⵍ ⵡⵉⵙⵙ ⵜⵏⴰⵢⴻⵏ ⵏ ⵙⵉⴷⵉ - ⵙⵉⴷⵉ ⴰⴷ ⵉⴱⴰⵔⴻⴽ ⵓⵔⵛⴰⵍⵉⵎ
8
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵉⵏⵏⴰ:2 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⵙ ⵡⴰⵙⴰⵎ ⴷ ⴰⵎⴻⵇⵇⵔⴰⵏ ⵓⵙⵎⴻⵖ ⵣⵉ ⵚⵉⵀⵢⵓⵏ, ⵙ ⵡⴻⵙⵄⴰⵔ ⵜⴰⵎⴻⵇⵇⵔⴰⵏⵜ ⵓⵙⵎⴻⵖ ⴷⵉ ⵟⵟⵡⴻⵄ ⵏⵏⴻⵙ.’■ 3 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵏⴻⵛⵛ ⵄⴻⵇⴱⴻⵖ-ⴷⴷ ⵖⴰⵔ ⵚⵉⵀⵢⵓⵏ ⵓ ⴰⴷ ⵣⴻⴷⵖⴻⵖ ⴷⵉ ⵍⵡⴻⵙⵟ ⵏ ⵓⵔⵛⴰⵍⵉⵎ ⵓⵛⴰ ⵓⵔⵛⴰⵍⵉⵎ ⴰⴷ ⴰⵙ ⵍⴰⵖⴰⵏ ‘ⵜⴰⵏⴷⵉⵏⵜ ⵏ ⵜⵉⴷⴻⵜⵜ!’, ⵓ ⴰⴷⵔⴰⵔ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⴰⵙ ⵉⵏⵉⵏ ‘ⴰⴷⵔⴰⵔ ⵉⵇⴻⴷⴷⵙⴻⵏ!’ ■
4 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⴰⴷ ⵉⵍⵉⵏ ⵄⴰⵡⴻⴷ ⵉⵡⴻⵙⵙⵓⵔⴰ ⴷ ⵜⵡⴻⵙⵙⵓⵔⴰ ⴷⴻⴳ ⵡⴰⵣⵣⴰⵢⴻⵏ ⵏ ⵓⵔⵛⴰⵍⵉⵎ. ⴽⵓⵍ ⴰⵔⵢⴰⵣ ⴰⴷ ⵖⴰⵔⴻⵙ ⵜⵉⵍⵉ ⵜⴻⵖⵖⴰⵔⵛⵜ ⵏⵏⴻⵙ ⴷⴻⴳ ⵓⴼⵓⵙ ⵏⵏⴻⵙ ⵣⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⵡⵓⵙⵙⴰⵏ ⵉ ⵖⴰ ⵉⴷⴷⴰⵔ. 5 ⴰⵣⵣⴰⵢⴻⵏ ⵏ ⵜⴻⵏⴷⵉⵏⵜ ⴰⴷ ⴷⴻⵡⵍⴻⵏ ⵛⵛⵓⵔⴻⵏ ⵙ ⵉⵃⴻⵏⵊⵉⵔⴻⵏ ⴷ ⵜⵃⴻⵏⵊⵉⵔⵉⵏ ⵉ ⵉⵜⵜⵉⵔⴰⵔⴻⵏ ⴷⴻⴳ ⵡⴰⵣⵣⴰⵢⴻⵏ ⵏⵏⴻⵙ.’
6 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⵎⴰⵖⴰⵔ ⴷ ⵍⴻⵄⵊⴻⴱ ⵇⴰⵄ ⴷⵉ ⵜⵉⵟⵟⴰⵡⵉⵏ ⵏ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ-ⴰ ⴷⴻⴳ ⵡⵓⵙⵙⴰⵏ ⵏⵏⵉ, ⵎⴰ ⴰⴷ ⵢⵉⵍⵉ ⴰⵢⴰ ⵓⵍⴰ ⵉ ⵏⴻⵛⵛ ⴷ ⵍⴻⵄⵊⴻⴱ ⵇⴰⵄ?’, ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.
7 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⵅⵣⴰⵔⴻⵎ, ⵏⴻⵛⵛ ⴰⴷ ⵙⵙⵏⴻⵊⵎⴻⵖ ⵍⴳⴻⵏⵙ ⵉⵏⵓ ⵣⵉ ⵜⴻⵎⵎⵓⵔⵜ ⵏ ⵡⴻⵏⵇⴰⵔ ⵏ ⵜⴼⵓⵛⵜ ⵓ ⵣⵉ ⵜⴻⵎⵎⵓⵔⵜ ⵏ ⵓⵖⴻⴵⵉ ⵏ ⵜⴼⵓⵛⵜ, 8 ⵓ ⵏⴻⵛⵛ ⴰⴷ ⵜⴻⵏ ⴰⵡⵢⴻⵖ ⴷⵉⵏ ⵃⵉⵎⴰ ⴰⴷ ⵣⴻⴷⵖⴻⵏ ⴷⵉ ⵓⵔⵛⴰⵍⵉⵎ. ⵏⵉⵜⵏⵉ ⴰⴷ ⵉⵍⵉⵏ ⴷ ⵍⴳⴻⵏⵙ ⵉ ⵏⴻⵛⵛ ⵓ ⵏⴻⵛⵛ ⴰⴷ ⵉⵍⵉⵖ ⴷ ⴰⵔⴻⴱⴱⵉ ⵉ ⵏⵉⵜⵏⵉ, ⴷⵉ ⵜⵉⴷⴻⵜⵜ ⵓ ⴷⵉ ⵜⵙⴻⴳⴷⴰ.’
9 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⵎⴻⵃⴹⴻⵎ ⵉⴼⴰⵙⵙⴻⵏ ⵏⵡⴻⵎ, ⴽⴻⵏⵏⵉⵡ ⵉⵏⵏⵉ ⵉⵙⵍⵉⵏ ⴷⴻⴳ ⵡⵓⵙⵙⴰⵏ-ⴰ ⴰⵡⴰⵍⴻⵏ-ⴰ ⵣⴻⴳ ⵓⵇⴻⵎⵎⵓⵎ ⵏ ⵉⵏⴰⴱⵉⵢⵢⴻⵏ ⵏⵏⵉ ⴷⵉⵏ ⵉⴵⴰⵏ ⴷⴻⴳ ⵡⴰⵙⵙ ⵏⵏⵉ ⴷⵉ ⵉⵜⵜⵡⴰⵙⵙⴰⵔⵙ ⴷⵙⴰⵙ ⵏ ⵜⴰⴷⴷⴰⵔⵜ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵎⴰⵃⴻⵏⴷ ⴰⴷ ⵅⴰⵙ ⵜᵉⵜⵜⵡⴰⴱⵏⴰ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵣⵉ ⵊⴷⵉⴷ. 10 ⵎⴰⵖⴰⵔ ⵇⴱⴻⵍ ⵉ ⵡⵓⵙⵙⴰⵏ ⵏⵏⵉ ⵡⴰⵔ ⵉⵇⵇⵉⵎ ⵡⴰⵍⵓ ⵣⵉ ⵍⵎⵓⵏⴻⵜ ⵏ ⴱⵏⴰⴷⴻⵎ ⵓ ⵉⵛⵜ ⵏ ⵍⴻⴱⵀⵉⵎⴻⵜ ⵡⴰⵔ ⴷⴷ-ⵜᵉⵜⵜⴰⵡⵉ ⵡⴰⵍⵓ ⵓ ⵡⴻⵏⵏⵉ ⴷⴷ-ⵉⴼⴼⵖⴻⵏ ⴷ ⵡⴻⵏⵏⵉ ⴷⴷ-ⵉⴷⴻⵡⵍⴻⵏ, ⵡⴰⵔ ⵢⵉⵡⵉ ⵍⴰⵎⴰⵏ ⵣⵉ ⵙⵙⵉⴱⴱⴻⵜ ⵏ ⵍⴻⵄⴷⵓ, ⵎⴰⵖⴰⵔ ⵏⴻⵛⵛ ⵙⵙⴻⴽⴽⴰⵔⴻⵖ ⴽⵓⵍ ⵉⵊⵊ ⵅ ⵊⵊⴰⵔ ⵏⵏⴻⵙ. □ 11 ⵍⴻⵅⵅⵓ ⵎⴰⵛⴰ ⵏⴻⵛⵛ ⵡⴰⵔ ⵜⵜⵉⵍⵉⵖ ⵉ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ-ⴰ ⴰⵎ ⵡⵓⵙⵙⴰⵏ ⵉⵎⴻⵣⵡⵓⵔⴰ, ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. 12 ⵎⴰⵖⴰⵔ ⵣⵣⴰⵔⵉⵄⴻⵜ ⵏ ⵍⴻⵀⵏⴰ, ⵜⴰⵣⴰⵢⴰⵔⵜ, ⴰⴷ ⵜⴻⵡⵛ ⵍⵖⵉⴵⴻⵜ ⵏⵏⴻⵙ ⵓ ⵜⴰⵎⵎⵓⵔⵜ ⴰⴷ ⵜⴻⵡⵛ ⵚⵚⴰⴱⴻⵜ ⵏⵏⴻⵙ ⵓ ⴰⵊⴻⵏⵏⴰ ⴰⴷ ⵉⵡⵛ ⵏⵏⴷⴰ ⵏⵏⴻⵙ ⵓ ⵏⴻⵛⵛ ⴰⴷ ⵡⵛⴻⵖ ⵎⴰⵔⵔⴰ ⴰⵢⴰ ⴷ ⵜⴰⵙⵖⴰⵔⵜ ⵉ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ-ⴰ. 13 ⴰⴷ ⵉⵎⵙⴰⵔ, ⴰⵇⴰ ⴰⵎ ⵎⴰⵎⵎⴻⵛ ⵜⵓⵖⴰ ⴽⴻⵏⵏⵉⵡ ⴷ ⵏⵏⴻⵄⵍⴻⵜ ⵊⴰⵔ ⵔⴻⴳⵏⵓⵙ, ⴽⴻⵏⵏⵉⵡ, ⴰ ⵜⴰⴷⴷⴰⵔⵜ ⵏ ⵢⴰⵀⵓⴷⴰ ⴷ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⴰⵇⴰ ⵏⴻⵛⵛ ⴰⴷ ⴽⴻⵏⵏⵉⵡ ⵙⵙⵏⴻⵊⵎⴻⵖ ⵓ ⴰⴷ ⵉⵍⵉⵖ ⴷ ⵍⴱⴰⵔⴰⴽⴰ ⵉ ⴽⴻⵏⵏⵉⵡ. ⵡⴰⵔ ⵜⵜⴻⴳⴳⵯⴻⴷⴻⵎ, ⵎⴻⵃⴹⴻⵎ ⵉⴼⴰⵙⵙⴻⵏ ⵏⵡⴻⵎ!’
14 ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⴰⵎ ⵎⴰⵎⵎⴻⵛ ⵏⴻⵛⵛ ⵅⴰⵔⵔⵚⴻⵖ ⴰⴷ ⴰⵡⴻⵎ ⴳⴳⴻⵖ ⵍⵖⴰⵔ, ⵍⴰⵎⵉ ⴷ ⴰⵢⵉ ⵙⵙⴼⵓⴳⵎⴻⵏ ⵍⴻⵊⴷⵓⴷ ⵏⵡⴻⵎ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵓ ⵏⴻⵛⵛ ⵡⴰⵔ ⵏⴷⵉⵎⴻⵖ ⵣⵉ ⵎⴰⵏ ⴰⵢⴰ, 15 ⴰⵎⵎⵓ ⵉ ⴷⴷ-ⴷⴻⵡⵍⴻⵖ ⵏⴻⵛⵛ ⵍⴻⵅⵅⵓ ⴰⴷ ⵅⴰⵔⵔⵚⴻⵖ ⴷⴻⴳ ⵡⵓⵙⵙⴰⵏ-ⴰ ⵎⴰⵃⴻⵏⴷ ⴰⴷ ⴳⴳⴻⵖ ⵍⵅⴰⵔ ⴷⵉ ⵓⵔⵛⴰⵍⵉⵎ ⵓ ⴷⵉ ⵜⴰⴷⴷⴰⵔⵜ ⵏ ⵢⴰⵀⵓⴷⴰ. ⵡⴰⵔ ⵜⵜⴻⴳⴳⵯⴻⴷⴻⵎ ⵛⴰ! 16 ⵜⵉⵏⴰ ⴷ ⵜⵉⵎⴻⵙⵍⴰⵢⵉⵏ ⵉ ⴽⴻⵏⵏⵉⵡ ⵉⵜⵜⵅⴻⵚⵚⴰⵏ ⴰⴷ ⵜⴻⵏⵜ ⵜⴻⴳⴳⴻⵎ: ⵙⵉⵡⵍⴻⵎ ⵜⵉⴷⴻⵜⵜ ⴽⵓⵍ ⵉⵊⵊ ⴰⴽ-ⴷ ⵊⵊⴰⵔ ⵏⵏⴻⵙ, ⵛⴰⵔⵔⵄⴻⵎ ⴷⵉ ⵜⴻⵡⵡⵓⵔⴰ ⵏⵡⴻⵎ ⵙ ⵜⵉⴷⴻⵜⵜ ⵓ ⵙ ⵢⵉⵊⵊ ⵏ ⵍⵃⵓⴽⵎ ⵉⵍⵉⵇⵇⴻⵏ. ■ 17 ⵡⴰⵔ ⵜⵜⴻⵊⵊⵉⵎ ⴰⴷ ⵉⵅⴰⵔⵔⴻⵚ ⵉⵊⵊ ⵏ ⵡⴻⵔⵢⴰⵣ ⴷⵉ ⵍⵖⴰⵔ ⵅ ⵊⵊⴰⵔ ⵏⵏⴻⵙ ⵓ ⵡⴰⵔ ⵜⵜⴻⵅⵙⴻⵎ ⵜⴰⵊⴰⴵⵉⵜ ⵥⵓⵔ, ⵎⴰⵖⴰⵔ ⵏⴻⵛⵛ ⵛⴰⵔⵔⵀⴻⵖ ⵎⴰⵔⵔⴰ ⴰⵢⴰ!’, ⵉⵇⵇⴰⵔ ⵙⵉⴷⵉ.” ■
18 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵉⵏⵏⴰ:
19 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⴰⵥⵓⵎⵎⵉ ⵏ ⵓⵢⵓⵔ ⵡⵉⵙⵙ ⴰⵔⴻⴱⵄⴰ ⵓ ⴰⵥⵓⵎⵎⵉ ⵏ ⵓⵢⵓⵔ ⵡⵉⵙⵙ ⵅⴻⵎⵙⴰ ⵓ ⴰⵥⵓⵎⵎⵉ ⵏ ⵓⵢⵓⵔ ⵡⵉⵙⵙ ⵙⴻⴱⵄⴰ ⵓ ⴰⵥⵓⵎⵎⵉ ⵏ ⵓⵢⵓⵔ ⵡⵉⵙⵙ ⵄⴻⵛⵔⴰ ⴰⴷ ⴷⴻⵡⵍⴻⵏ ⴷ ⵍⴻⴼⵔⴰⵃⴻⵜ ⵓ ⴷ ⵡⴰⵔⵛⴻⵇ ⵉ ⵜⴰⴷⴷⴰⵔⵜ ⵏ ⵢⴰⵀⵓⴷⴰ. ⴰⴷ ⵉⵍⵉⵏ ⴷ ⵍⴻⵄⵢⵓⴷⴰⵜ ⵛⵏⴰⵏ. ⵅⵙⴻⵎ ⵜⵉⴷⴻⵜⵜ ⴷ ⵍⴻⵀⵏⴰ!’
20 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⴰⵇⴰ ⵍⴻⴳⵏⵓⵙ ⵓⵍⴰ ⴷ ⵉⵎⴻⵣⴷⴰⵖ ⵏ ⵡⴰⵟⵟⴰⵙ ⵏ ⵜⵏⴻⴷⴷⴰⵎ ⴰⴷ ⴷⴷ-ⴰⵙⴻⵏ ⵄⴰⴷ ⴷⴰⵏⵉⵜⴰ! ■ 21 ⵉⵎⴻⵣⴷⴰⵖ ⵏ ⵉⵛⵜ ⵏ ⵜⴻⵏⴷⵉⵏⵜ ⴰⴷ ⵔⴰⵃⴻⵏ ⵖⴰⵔ ⵉⵎⴻⵣⴷⴰⵖ ⵏ ⵉⵛⵜ ⵏ ⵜⴻⵏⴷⵉⵏⵜ ⵏⵏⴻⵖⵏⵉⵜ, ⴰⴷ ⵉⵏⵉⵏ: ⵊⵊⴻⵎ ⴰⵏⴻⵖ ⴰⴷ ⵏⴻⵟⵟⴻⴼ ⴰⴱⵔⵉⴷ ⵃⵉⵎⴰ ⴰⴷ ⵏⴻⵜⵜⴰⵔ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓ ⵃⵉⵎⴰ ⴰⴷ ⵏⴰⵔⵣⵓ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. ⵓⵍⴰ ⴷ ⵏⴻⵛⵛ ⴰⴷ ⵔⴰⵃⴻⵖ. 22 ⴰⵟⵟⴰⵙ ⵏ ⵉⵢⴷⵓⴷⴻⵏ ⴷ ⵡⴰⵟⵟⴰⵙ ⵏ ⵍⴻⴳⵏⵓⵙ ⵉⵊⴻⵀⴷⴻⵏ ⴰⴷ ⴷⴷ-ⴰⵙⴻⵏ ⵃⵉⵎⴰ ⴰⴷ ⴰⵔⵣⵓⵏ ⵅ ⵡⵓⴷⴻⵎ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴷⵉ ⵓⵔⵛⴰⵍⵉⵎ ⵓ ⵃⵉⵎⴰ ⴰⴷ ⵜⵜⴰⵔⴻⵏ ⴰⵔⴹⴰ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ.’
23 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⴷⴻⴳ ⵡⵓⵙⵙⴰⵏ ⵏⵏⵉ ⴰⴷ ⵉⵎⵙⴰⵔ, ⴰⵇⴰ ⵄⴻⵛⵔⴰ ⵏ ⵢⴻⵔⵢⴰⵣⴻⵏ, ⵣⵉ ⵎⴰⵔⵔⴰ ⵜⵓⵜⵍⴰⵢⵉⵏ ⵏ ⵍⴻⴳⵏⵓⵙ ⴰⴷ ⵟⵟⴼⴻⵏ, ⵡⴰⵀ, ⴰⴷ ⵟⵟⴼⴻⵏ ⴰⴱⴻⵃⵍⵓⵍ ⵏ ⵉⵊⵊ ⵏ ⵡⴻⵔⵢⴰⵣ ⴷ ⵓⴷⴰⵢ, ⴰⴷ ⵉⵏⵉⵏ: ‘ⵏⴻⵛⵛⵉⵏ ⴰⴷ ⵏⵔⴰⵃ ⴰⴽⵉⴷⵡⴻⵎ, ⵎⴰⵖⴰⵔ ⵏⴻⵙⵍⴰ ⴰⵇⴰ ⴰⵔⴻⴱⴱⵉ ⴰⴽⵉⴷⵡⴻⵎ!’ ”