ⵣⴰⴽⴰⵔⵉⵢⵢⴰ 6

ⴰⵏⴻⴳⴳⴰⵔ ⵏ ⵜⵎⴻⵥⵔⵉⵡⵜ ⵡⵉⵙⵙ ⴰⵎⴻⵣⵡⴰⵔⵓ - ⴰⵔⴻⴱⵄⴰ ⵏ ⵉⴽⴰⵔⵔⵓⵜⴻⵏ

1 ⵏⴻⵛⵛ ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ ⵜⵡⴰⵍⴰ ⵏⵏⴻⵖⵏⵉ, ⵓ ⵅⵣⴰⵔ, ⴰⵇⴰ ⴰⵔⴻⴱⵄⴰ ⵏ ⵉⴽⴰⵔⵔⵓⵜⴻⵏ ⴼⴼⵖⴻⵏ-ⴷⴷ ⵣⵉ ⵊⴰⵔ ⵜⵏⴰⵢⴻⵏ ⵏ ⵉⴷⵓⵔⴰⵔ ⵓ ⵉⴷⵓⵔⴰⵔ ⵏⵏⵉ ⵜⵓⵖⴰ ⴷ ⵉⴷⵓⵔⴰⵔ ⵏ ⵏⵏⵃⴰⵙ. 2 ⵖⴰⵔ ⵓⴽⴰⵔⵔⵓ ⴰⵎⴻⵣⵡⴰⵔⵓ ⵜⵓⵖⴰ ⴷⵉⵏ ⵉⵢⵙⴰⵏ ⴷ ⵉⵣⴻⴳⴳⵯⴰⵖⴻⵏ, ⵖⴰⵔ ⵓⴽⴰⵔⵔⵓ ⵡⵉⵙⵙ ⵜⵏⴰⵢⴻⵏ ⵉⵢⵙⴰⵏ ⴷ ⵉⴱⴰⵔⵛⴰⵏⴻⵏ, 3 ⵖⴰⵔ ⵓⴽⴰⵔⵔⵓ ⵡⵉⵙⵙ ⵜⵍⴰⵜⴰ ⵉⵢⵙⴰⵏ ⴷ ⵉⵛⴻⵎⵍⴰⵍⴻⵏ ⵓ ⵖⴰⵔ ⵓⴽⴰⵔⵔⵓ ⵡⵉⵙⵙ ⴰⵔⴻⴱⵄⴰ ⵉⵢⵙⴰⵏ ⴷ ⵉⵇⴰⵔⵇⴰⵛⴻⵏ, ⴰⵇⴰ ⴰⵜⴻⵏ ⴷ ⵉⵢⵙⴰⵏ ⵊⴻⵀⴷⴻⵏ. 4 ⵏⴻⵛⵛ ⴰⵔⵔⵉⵖ-ⴷⴷ, ⵏⵏⵉⵖ ⵉ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ: “ⵎⵉⵏ ⵄⵏⴰⵏ ⵉⵏⴰ, ⴰ ⵙⵉⴷⵉ ⵉⵏⵓ?”

5 ⵢⴰⵔⵔⴰ-ⴷⴷ ⵍⵎⴰⵍⴰⴽ, ⵉⵏⵏⴰ ⴰⵢⵉ: “ⵉⵏⴰ ⴷ ⴰⵔⴻⴱⵄⴰ ⵏ ⵉⵙⴻⵎⵎⵉⴹⴻⵏ ⵏ ⵓⵊⴻⵏⵏⴰ ⵏⵏⵉ ⴷⴷ-ⵉⵜⵜⴻⴼⴼⵖⴻⵏ ⵣⵉ ⵎⴰⵏⵉ ⴱⴻⴷⴷⴻⵏ ⵣⵣⴰⵜ ⵉ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ. 6 ⵉⵏⵏⵉ ⵙ ⵉⵢⵙⴰⵏ ⵉⴱⴰⵔⵛⴰⵏⴻⵏ ⴰⴷ ⴼⴼⵖⴻⵏ ⵖⴰⵔ ⵜⴻⵎⵎⵓⵔⵜ ⵏ ⵛⵛⴰⵎⴰⵍ ⵓ ⵉⵢⵙⴰⵏ ⵉⵛⴻⵎⵍⴰⵍⴻⵏ ⴰⴷ ⵜⴻⵏ ⴹⴻⴼⴼⴰⵔⴻⵏ, ⵓⵛⴰ ⵉⵢⵙⴰⵏ ⵉⵇⴰⵔⵇⴰⵛⴻⵏ ⴰⴷ ⴼⴼⵖⴻⵏ ⵖⴰⵔ ⵜⴻⵎⵎⵓⵔⵜ ⵏ ⵍⵊⴰⵏⵓⴱ.” 7 ⵉⵢⵙⴰⵏ ⵉⵊⴻⵀⴷⴻⵏ ⴼⴼⵖⴻⵏ, ⴰⵔⵣⵓⵏ ⴰⴷ ⵥⵡⴰⵏ ⵜⴰⵎⵎⵓⵔⵜ, ⵎⴰⵖⴰⵔ ⵏⴻⵜⵜⴰ ⵉⵏⵏⴰ: “ⴼⴼⴻⵖ, ⵥⵡⴰⵎ ⵜⴰⵎⵎⵓⵔⵜ!” ⵓ ⵏⵉⵜⵏⵉ ⵥⵡⴰⵏ ⵜⴻⵎⵎⵓⵔⵜ. 8 ⵏⴻⵜⵜⴰ ⵉⵍⴰⵖⴰ ⴰⵢⵉ-ⴷⴷ, ⵉⵏⵏⴰ: “ⵅⵣⴰⵔ, ⵉⵢⵙⴰⵏ ⵏⵏⵉ ⵉⴼⴼⵖⴻⵏ ⵖⴰⵔ ⵜⴻⵎⵎⵓⵔⵜ ⵏ ⵛⵛⴰⵎⴰⵍ, ⴰⵇⴰ ⵙⵙⴰⵔⴻⵢⵢⵃⴻⵏ ⴰⵔⵔⵓⵃ ⵉⵏⵓ ⴷⵉ ⵜⴻⵎⵎⵓⵔⵜ ⵏ ⵛⵛⴰⵎⴰⵍ.”   

ⵜⵜⴰⵊ ⵉ ⵓⴽⴻⵀⵀⴰⵏ ⴰⵎⴻⵇⵇⵔⴰⵏ

9 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 10 “ⴽⵙⵉ ⵜⵉⵡⵀⵉⴱⵉⵏ ⵣⴻⴳ ⴰⵢⵜ ⵏ ⵍⵎⴻⵏⴼⴰ, ⵣⵉ ⵃⴰⵍⵉⵎ, ⵟⵓⴱⵉⵢⴰ ⴷ ⵢⴰⴷⴰⵄⵢⴰ ⵓ ⵔⵓⵃ ⴷⵉⵏⵏⵉ ⵓⵍⴰ ⴷ ⵛⴻⴽ ⴷⴻⴳ ⵡⴰⵙⵙ ⵏⵏⵉ ⵓ ⴰⴷⴻⴼ ⵖⴰⵔ ⵜⴰⴷⴷⴰⵔⵜ ⵏ ⵢⵓⵛⵉⵢⴰ, ⵎⵎⵉⵙ ⵏ ⵚⴰⴼⴰⵏⵢⴰ, ⵖⴰⵔ ⵜⴰⴷⴷⴰⵔⵜ ⵉ ⵖⴰⵔⴻⵙ ⴷⴷ-ⵢⵓⵙⵉⵏ ⵣⵉ ⴱⴰⴱⵉⵍ.    11 ⴽⵙⵉ ⵏⵏⵓⵇⴰⵔⵜ ⴷ ⵡⵓⵔⴻⵖ, ⴻⴳⴳ ⵣⵣⴰⵢⵙⴻⵏ ⵜⵜⵉⵊⴰⵏ ⵓ ⵙⴰⵔⵙ ⵉ-ⵜⴻⵏ ⵅ ⵓⵣⴻⴵⵉⴼ ⵏ ⵢⴰⵀⵓⵛⴰⵄ, ⵎⵎⵉⵙ ⵏ ⵢⴰⵀⵓⵚⴰⴷⴰⵇ, ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ, 12 ⵓ ⵙⵉⵡⴻⵍ ⴰⴽⵉⴷⴻⵙ, ⵉⵏⵉ ⴰⵙ:

‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⵅⵣⴰⵔ, ⵉⵊⵊ ⵏ ⵡⴻⵔⵢⴰⵣ, ‘ⴰⵖⴻⴷⴷⵓ’ ⴷ ⵉⵙⴻⵎ ⵏⵏⴻⵙ. ⵏⴻⵜⵜⴰ ⴰⴷ ⴷⴷ-ⵉⴼⴼⴻⵖ ⵣⴻⴳ ⵡⴻⵎⵛⴰⵏ ⵏⵏⴻⵙ ⵓ ⵏⴻⵜⵜⴰ ⴰⴷ ⵉⴱⵏⴰ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⵙⵉⴷⵉ. 13 ⵏⴻⵜⵜⴰ ⴰⴷ ⵉⴱⵏⴰ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⵙⵉⴷⵉ ⵓ ⴰⴷ ⵢⴰⵔⴹ ⵍⵄⴰⴹⴰⵎⴰ. ⵏⴻⵜⵜⴰ ⴰⴷ ⵉⵇⵇⵉⵎ ⵓ ⴰⴷ ⵉⵃⴽⴻⵎ ⵅ ⵍⵄⴰⵔⵛ ⵏⵏⴻⵙ ⵓ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⴽⴻⵀⵀⴰⵏ ⵅ ⵍⵄⴰⵔⵛ ⵏⵏⴻⵙ ⵓ ⴰⴷ ⵢⵉⵍⵉ ⵊⴰⵔ ⴰⵙⴻⵏ ⵛⵛⵡⴰⵔ ⵙ ⵍⴻⵀⵏⴰ.’

14 ⵜⵜⵉⵊⴰⵏ ⴰⴷ ⵉⵍⵉⵏ ⵉ ⵃⴰⵍⵉⵎ, ⵟⵓⴱⵉⵢⴰ, ⵢⴰⴷⴰⵄⵢⴰ ⴷ ⵃⴰⵢⵏ, ⵎⵎⵉⵙ ⵏ ⵚⴰⴼⴰⵏⵢⴰ, ⴷ ⵍⵉⴷⴰⵔⴻⵜ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⵙⵉⴷⵉ.    15 ⵣⵉ ⵍⴰⴳⴳⵯⴰⵊ ⴰⴷ ⴷⴷ-ⴰⵙⴻⵏ ⵉⵡⴷⴰⵏ ⵓ ⵏⵉⵜⵏⵉ ⴰⴷ ⴱⵏⴰⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⵙⵉⴷⵉ ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴰⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵉⵙⵙⴻⴽⴽ ⴰⵢⵉ-ⴷⴷ ⵖⴰⵔⵡⴻⵎ. ⴰⵢⴰ ⴰⴷ ⵉⵎⵙⴰⵔ, ⵎⴰⵍⴰ ⴽⴻⵏⵏⵉⵡ ⵜᵉⵜⵜⴻⵙⵍⴰⵎ ⵙ ⵜⵉⴷⴻⵜⵜ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ.”