ⴰⵎⴻⵏⴹⴰⵔ ⵏ ⵉⵙⵔⴰⵉⵍ ⴷ ⵡⴻⵄⴷⴰⵍ ⵏⵏⴻⵙ
2
1 “ⴰⴷ ⵢⵉⵍⵉ ⵍⵇⴻⴷⴷ ⵏ ⴰⵢⵜ ⵏ ⵉⵙⵔⴰⵉⵍ ⴰⵎ ⵢⴻⵊⴷⵉ ⵏ ⵍⴻⴱⵃⴰⵔ ⵉ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵄⴱⴰⵔ ⵓ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵃⵙⴻⴱ, ⵓⵛⴰ ⴰⴷ ⵜⴰⴼⴻⴷ ⵎⴰⵏⵉ ⴷ ⴰⵙⴻⵏ ⵏⵏⴰⵏ: ‘ⴽⴻⵏⵏⵉⵡ ⵡⴰⵔ ⵜⴻⴵⵉⵎ ⴷ ⵍⴳⴻⵏⵙ ⵉⵏⵓ!’, ⴰⴷ ⴰⵙⴻⵏ ⵉⵜⵜⵡⴰⵏⵏⴰ: ‘ⴽⴻⵏⵏⵉⵡ ⴷ ⵉⵃⴻⵏⵊⵉⵔⴻⵏ ⵏ ⴰⵔⴻⴱⴱⵉ ⵉⴷⴷⴰⵔⴻⵏ!’ ■ 2 ⴰⵢⵜ ⵏ ⵢⴰⵀⵓⴷⴰ ⴷ ⴰⵢⵜ ⵏ ⵉⵙⵔⴰⵉⵍ ⴰⴷ ⵜⵜⵡⴰⵙⵙⵎⵓⵏⴻⵏ, ⴰⴷ ⴳⴳⴻⵏ ⵉⵊⵊ ⵏ ⵓⵎⵖⴰⵔ ⵉ ⵢⵉⵅⴻⴼ ⵏⵙⴻⵏ ⵓ ⴰⴷ ⴳⴻⵄⵄⴷⴻⵏ ⵣⵉ ⵎⴰⵔⵔⴰ ⵜⴻⵎⵎⵓⵔⵜ, ⵎⴰⵖⴰⵔ ⴰⵙⵙ ⵏ ⵢⴰⵣⵔⴰⵄⵉⵍ ⴰⴷ ⵢⵉⵍⵉ ⴷ ⵉⵊⵊ ⵏ ⵡⴰⵙⵙ ⴷ ⴰⵎⴻⵇⵇⵔⴰⵏ. ■ 3 ⵉⵏⵉⵎ ⵉ ⵡⴰⵡⵎⴰⵜⴻⵏ ⵏⵡⴻⵎ: ‘ⵄⴻⵎⵎⵉ!’ ⵓ ⵉ ⵙⵓⵢᵉⵜⵎⴰⵜⵡⴻⵎ ‘ⵔⵓⵃⴰⵎⴰ!’ ”4 “ⴷⵄⴰⵎ ⴰⴽ-ⴷ ⵢⴻⵎⵎⴰⵜⵡⴻⵎ, ⴷⵄⴰⵎ, ⵎⴰⵖⴰⵔ ⵏⴻⵜⵜⴰⵜ ⵡⴰⵔ ⵜⴻⴵⵉ ⴷ ⵜⴰⵎⵖⴰⵔⵜ ⵉⵏⵓ ⵓ ⵏⴻⵛⵛ ⵡⴰⵔ ⴵⵉⵖ ⴷ ⴰⵔⵢⴰⵣ ⵏⵏⴻⵙ. ⴻⵊⵊ ⵉ-ⵜⵜ ⴰⴷ ⵜⴻⴽⴽⴻⵙ ⴼⴰⵔⵇ-ⵛⵛⵖⴻⵍ ⵏⵏⴻⵙ ⵣⴻⴳ ⵓⵖⴻⵎⴱⵓⴱ ⵏⵏⴻⵙ ⵓⵍⴰ ⴷ ⵣⵣⵉⵏⴰ ⵣⵉ ⵊⴰⵔ ⵉⴱⴱⴰⵛ ⵏⵏⴻⵙ. 5 ⵏⵉⵖ ⴰⵇⴰ ⴰⴷ ⴰⵙ ⴽⴽⵙⴻⵖ ⴰⵔⵔⵓⴹ ⴰⴷ ⵜⵜ ⵊⵊⴻⵖ ⴷ ⵜⴰⵄⴰⵔⵢⴰⵏⵜ¸ ⴰⴷ ⵜⵜ ⵙⵙⴰⵔⵙⴻⵖ ⴷⵉⵀⴰ ⴰⵎ ⴷⴻⴳ ⵡⴰⵙⵙ ⴰⵎⴻⵣⵡⴰⵔⵓ ⵉ ⴷⵉ ⴷⴷ-ⵜⴻⵅⵍⴻⵇ, ⵡⴰⵀ, ⴰⴷ ⵜⵜ ⴰⵔⵔⴻⵖ ⴷ ⵉⵛⵜ ⵏ ⵍⴻⵅⵍⴰ, ⴰⴷ ⵜⵜ ⴰⵔⵔⴻⵖ ⴰⵎ ⵢⵉⵛⵜ ⵏ ⵜⴻⵎⵎⵓⵔⵜ ⵢⵓⵥⵖⴻⵏ ⵓⵛⴰ ⴰⴷ ⵜⵜ ⵊⵊⴻⵖ ⴰⴷ ⵜⴻⵎⵎⴻⵜ ⵙ ⵓⴼⴰⴷⵉ. 6 ⵏⴻⵛⵛ ⵡⴰⵔ ⴰⵔⵔⴻⵃⵎⴻⵖ ⵅ ⵉⵃⴻⵏⵊⵉⵔⴻⵏ ⵏⵏⴻⵙ, ⵎⴰⵖⴰⵔ ⵏⵉⵜⵏⵉ ⴷ ⵉⵃⴻⵏⵊⵉⵔⴻⵏ ⵉ ⴷⴷ-ⵉⵅⴻⵍⵇⴻⵏ ⵣⵉ ⴼⴰⵔⵇ-ⵛⵛⵖⴻⵍ. 7 ⵎⴰⵖⴰⵔ ⵢⴻⵎⵎⴰⵜⵙⴻⵏ ⴰⵇⴰ ⵜⴻⴼⵙⴻⴷ ⵉⵅⴻⴼ ⵏⵏⴻⵙ, ⵡⴰⵀ, ⵜⴻⵏⵏⵉ ⵜⵓⵖⴰ ⵙ ⴷⴷⴻⵢⵙⴻⵜ ⵣⵣⴰⵢⵙⴻⵏ, ⵜⴻⴳⴳⴰ ⵍⴻⴼⴹⵉⵃⴻⵜ, ⵎⴰⵖⴰⵔ ⵜⴻⵇⵇⴰⵔ: ‘ⴰⴷ ⴹⴼⴰⵔⴻⵖ ⵉⵏⵏⵉ ⴷ ⴰⵢⵉ ⵉⵄⴻⵛⵛⵇⴻⵏ, ⵉⵏⵏⵉ ⴷ ⴰⵢⵉ ⵉⵜⵜⵉⵛⴻⵏ ⴰⵖⵔⵓⵎ ⵉⵏⵓ ⴷ ⵡⴰⵎⴰⵏ ⵉⵏⵓ ⴷ ⵜⴰⴹⵓⴼⵜ ⵉⵏⵓ ⴷ ⵜⵉⴼⴼⴻⵙⵜ ⵉⵏⵓ ⴷ ⵣⵣⴻⵛⵜ ⵉⵏⵓ ⴷ ⵜⵙⴻⵙⵙⵉⵜ ⵉⵏⵓ.’ 8 ⵙ ⵓⵢⴰ, ⴰⵇⴰ ⴰⴷ ⴱⴻⵍⵍⵄⴻⵖ ⴰⴱⵔⵉⴷ ⵏⵏⴻⵎ ⵙ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ ⵓ ⴰⴷ ⵙⵙⴱⴻⴷⴷⴻⵖ ⴰⵖⴱⴰⵔ ⵏⵏⴻⵙ, ⵃⵉⵎⴰ ⵡⴰⵔ ⵜᵉⵜⵜⵉⴼ ⵄⴰⴷ ⵉⵎⴻⵙⵔⴰⵇ ⵏⵏⴻⵙ. 9 ⵏⴻⵜⵜⴰⵜ ⴰⴷ ⵜⴻⴹⴼⴰⵔ ⵉⵏⵏⵉ ⵜⵜ ⵉⵄⴻⵛⵇⴻⵏ, ⵎⴰⵛⴰ ⵡⴰⵔ ⵅⴰⵙⴻⵏ ⵜⵃⴰⵔⵔⴻⵜ. ⵏⴻⵜⵜⴰⵜ ⴰⴷ ⵅⴰⵙⴻⵏ ⵜⴰⵔⵣⵓ, ⵎⴰⵛⴰ ⵡⴰⵔ ⵜⴻⵏ ⵜᵉⵜⵜⵉⴼ. ⵅⴻⵏⵏⵉ ⴰⴷ ⵜⵉⵏⵉ: ‘ⵏⴻⵛⵛ ⴰⴷ ⵄⴻⵇⴱⴻⵖ, ⴰⴷ ⴷⴻⵡⵍⴻⵖ ⵖⴰⵔ ⵡⴻⵔⵢⴰⵣ ⵉⵏⵓ ⴰⵎⴻⵣⵡⴰⵔⵓ, ⵎⴰⵖⴰⵔ ⴷⴻⴳ ⵡⵓⵙⵙⴰⵏ ⵏⵏⵉ ⵜⵓⵖⴰ ⴰⵢⵉ ⵎⵍⵉⵃ ⵅ ⵍⴻⵅⵅⵓ.’ 10 ⵏⴻⵜⵜⴰⵜ ⵡⴰⵔ ⵜⴻⵄⵇⵉⵍ, ⴰⵇⴰ ⴷ ⵏⴻⵛⵛ ⵉ ⵜⵓⵖⴰ ⴷ ⴰⵙ ⵉⵡⵛⵉⵏ ⵉⵎⴻⵏⴷⵉ ⴷ ⴱⵉⵏⵓ ⵏ ⵊⴷⵉⴷ ⴷ ⵣⵣⴻⵛⵜ, ⵓ ⴰⵇⴰ ⴷ ⵏⴻⵛⵛ ⵉ ⵜⵓⵖⴰ ⴷ ⴰⵙ ⵉⵡⵛⵉⵏ ⵏⵏⵓⵇⴰⵔⵜ ⵙ ⵡⴰⵟⵟⴰⵙ, ⵓⵛⴰ ⵓⵔⴻⵖ ⵉ ⴷ ⴰⵙⴻⵏ ⵡⵛⵉⵖ ⴰⵇⴰ ⴳⴳⵉⵏ ⵜ ⵖⴰⵔ ⴱⴰⵄⵍ. 11 ⵙ ⵓⵢⴰ ⵉ ⵖⴰ ⵄⴻⵇⴱⴻⵖ, ⴰⴷ ⴽⴽⵙⴻⵖ ⵉⵎⴻⵏⴷⵉ ⵉⵏⵓ ⴷⵉ ⵍⵡⴻⵇⵜ ⵏ ⵚⵚⴰⴱⴻⵜ ⵓⵍⴰ ⴷ ⴱⵉⵏⵓ ⵉⵏⵓ ⵏ ⵊⴷⵉⴷ ⴷⵉ ⵍⵡⴻⵇⵜ ⵏⵏⴻⵙ ⵉⵜⵜⵡⴰⴳⴳⴻⵏ ⵓ ⵜⴰⴹⵓⴼⵜ ⵉⵏⵓ ⴷ ⵜⵉⴼⴼⴻⵙⵜ ⵉⵏⵓ ⵉ ⵣⵉ ⵜⴻⴷⴷⴰⵍ ⵜⵓⵄⵄⴰⵔⵢⴻⵏⵜ ⵏⵏⴻⵙ ⴰⴷ ⵜⴻⵏⵜ ⵇⴻⵍⵄⴻⵖ ⵣⵣⴰⵢⴻⵙ. 12 ⵅⴻⵏⵏⵉ ⵍⴻⵅⵅⵓ ⴰⴷ ⵄⴰⵔⵔⵉⵖ ⵅ ⵍⴻⵃⵢⴰ ⵏⵏⴻⵙ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵢⵉⵏⵏⵉ ⵜⵜ ⵉⵜⵜⴻⵅⵙⴻⵏ ⵓⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵣⴻⵎⵎⴰⵔ ⴰⴷ ⵜⵜ ⵉⴼⴻⴽⴽ ⵣⴻⴳ ⵉⴼⴰⵙⵙⴻⵏ ⵉⵏⵓ. 13 ⵏⴻⵛⵛ ⴰⴷ ⵙⵙⴱⴻⴷⴷⴻⵖ ⵎⴰⵔⵔⴰ ⵍⴻⴼⵔⴰⵃⴻⵜ ⵏⵏⴻⵙ, ⵓⵔⴰⵔⴻⵏ ⵏⵏⴻⵙ, ⵓⵙⵙⴰⵏ ⵏⵏⴻⵙ ⵏ ⵓⴱⴻⴷⴷⵉ ⵏ ⵓⵢⵓⵔ ⵓⵍⴰ ⴷ ⵓⵙⵙⴰⵏ ⵏⵏⴻⵙ ⵏ ⵙⵙⴻⴱⵜ, ⵡⴰⵀ, ⵎⴰⵔⵔⴰ ⵓⵙⵙⴰⵏ ⵏⵏⴻⵙ ⵉⵜⵜⵡⴰⴳⴳⴻⵏ. 14 ⴰⴷ ⴰⵔⴻⴷⴷⴵⴻⵖ ⵜⴰⵣⴰⵢⴰⵔⵜ ⵏⵏⴻⵙ ⴷ ⵜⵛⴻⵊⵊⴰⵔⵜ ⵏ ⵡⴰⵔⵜⵓ ⵏⵏⴻⵙ ⵉ ⵣⵉ ⵜⴻⵏⵏⴰ: ‘ⵜⵉⵏⴰ ⴷ ⵍⵎⵓⵏⴻⵜ ⵉ ⴷ ⴰⵢⵉ ⵡⵛⵉⵏ ⵢⵉⵏⵏⵉ ⴷ ⴰⵢⵉ ⵉⵜⵜⴻⵅⵙⴻⵏ.’ ⴰⴷ ⵜⴻⵏⵜ ⴰⵔⵔⴻⵖ ⴷ ⵉⵊⵊ ⵏ ⵡⴻⵣⵖⴰⵔ ⵓ ⵍⵎⴰⵍ ⵏ ⵢⴻⵢⵢⴰⵔ ⴰⴷ ⵣⵣⴰⵢⵙⴻⵏⵜ ⵛⵛⴻⵏ. □ ■ 15 ⵏⴻⵛⵛ ⴰⴷ ⵜⵜ ⵡⵜⴻⵖ ⵅ ⵓⵙⵙⴰⵏ ⵏ ‘ⵉⴱⴰⵄⵍⴻⵏ’, ⵓⵙⵙⴰⵏ ⵉ ⴷⵉ ⵜⵉⵡⵉ-ⴷⴷ ⴰⵙⴻⵏ ⵜⵉⵡⵀⵉⴱⵉⵏ ⵏ ⵍⴻⴱⵅⵓⵔ ⵓ ⵜⴻⴳⴳⴰ ⵜⴰⵅⵔⴰⵣⵜ ⵏⵏⴻⵙ ⴷ ⵜⵙⴻⴷⴷⴻⵛⵜ ⵏⵏⴻⵙ, ⵓ ⵜⴻⴹⴼⴰⵔ ⵉⵏⵏⵉ ⵜⵜ ⵉⵜⵜⴻⵅⵙⴻⵏ, ⵎⴰⵛⴰ ⵏⴻⵜⵜⴰⵜ ⵜᵉⵜⵜⵓ ⴰⵢⵉ!”, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.
16 “ⵙ ⵓⵢⴰ, ⵅⵣⴰⵔ, ⵏⴻⵛⵛ ⴰⴷ ⵜⵜ ⵖⴰⵔⵔⴻⵖ, ⴰⴷ ⵜⵜ ⵏⴻⴷⵀⴻⵖ ⵖⴰⵔ ⵍⴻⵅⵍⴰ, ⵓ ⴷⵉⵏ ⴰⴷ ⵙⵙⵉⵡⵍⴻⵖ ⴰⴽ-ⴷ ⵡⵓⵍ ⵏⵏⴻⵙ. 17 ⵙⵙⴻⵏⵏⵉ ⴰⴷ ⴰⵙ ⵡⵛⴻⵖ ⵉⵎⴰⵔⵊⴰⵄⴻⵏ ⵏⵏⴻⵙ ⵏ ⵓⴹⵉⵍ ⵓ ⴰⴷ ⴰⵔⵔⴻⵖ ⵜⴰⵖⵣⵓⵔⵜ ⵏ ⴰⵅⵓⵔ ⴷ ⵜⴰⵡⵡⴰⵔⵜ ⵏ ⵍⴰⵢⴰⵙ. ⵏⴻⵜⵜⴰⵜ ⴰⴷ ⴷⵉⵏⵏⵉ ⵜⵖⴻⵏⵏⴻⵊ ⴰⵎ ⵜⵖⴻⵏⵏⴻⵊ ⴷⴻⴳ ⵡⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵙ, ⴰⵎ ⵅ ⵡⴰⵙⵙ ⵓⵎⵉ ⴷⴷ-ⵜⴻⴼⴼⴻⵖ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. 18 ⴷⴻⴳ ⵡⴰⵙⵙ ⵏⵏⵉ ⵉⵇⵇⴰⵔ ⵙⵉⴷⵉ, ⴰⴷ ⴰⵢⵉ ⵜⵍⴰⵖⵉⴷ: ‘ⴰⵔⵢⴰⵣ ⵉⵏⵓ!’, ⵓ ⵡⴰⵔ ⴷ ⴰⵢⵉ ⵜⴻⵇⵇⴰⵔⴻⴷ ⵄⴰⴷ: ‘ⴱⴰⵄⵍ ⵉⵏⵓ!’ 19 ⴰⴷ ⴰⵙ ⴽⴽⵙⴻⵖ ⵉⵙⵎⴰⵡⴻⵏ ⵏ ‘ⵉⴱⴰⵄⵍⴻⵏ’ ⵣⴻⴳ ⵓⵇⴻⵎⵎⵓⵎ ⵏⵏⴻⵙ. ⵡⴰⵔ ⵜⵜⴼⴻⴽⴽⴰⵔⴻⵏ ⵄⴰⴷ ⴷⴻⴳ ⵉⵙⵎⴰⵡⴻⵏ ⵏⵙⴻⵏ. 20 ⴷⴻⴳ ⵡⴰⵙⵙ ⵏⵏⵉ ⴰⴷ ⴳⴳⴻⵖ ⵉⵊⵊ ⵏ ⵍⵄⴰⵀⴷ ⴷⵉ ⵟⵟⵡⴻⵄ ⵏⵙⴻⵏ ⴰⴽ-ⴷ ⵍⴻⵡⵃⵓⵛ ⵏ ⵍⴻⵅⵍⴰ, ⴰⴽ-ⴷ ⵉⵊⴹⴰⴹ ⵏ ⵓⵊⴻⵏⵏⴰ ⵓ ⴰⴽ-ⴷ ⵉⵎⵓⴷⴷⴰⵔⴻⵏ ⵏⵏⵉ ⵉⵜⵜⴱⵓⵄⴻⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ. ⴰⴷ ⴽⴽⵙⴻⵖ ⵍⵇⴻⵡⵙ ⴷ ⵙⵙⵉⴼ ⴷ ⵓⵎⴻⵏⵖⵉ ⵣⵉ ⵜⴻⵎⵎⵓⵔⵜ ⵓ ⴰⴷ ⵜⴻⵏ ⵙⵙⴰⵔⵔⴻⵢⵃⴻⵖ ⴷⵉ ⵍⵀⵓⴷⵏⴻⵜ. □ ■ 21 ⵏⴻⵛⵛ ⴰⴷ ⵛⴻⵎ ⵅⴻⴹⴱⴻⵖ ⵉ ⵍⴻⴱⴷⴰ, ⵡⴰⵀ, ⴰⴷ ⵛⴻⵎ ⵅⴻⴹⴱⴻⵖ ⵙ ⵜⵙⴻⴳⴷⴰ ⴷ ⵍⵀⴻⵇⵇ, ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⴰⵔⵔⴻⵃⵎⴻⵜ. 22 ⵏⴻⵛⵛ ⴰⴷ ⵛⴻⵎ ⵅⴻⴹⴱⴻⵖ ⵙ ⵍⴰⵎⴰⵏ, ⵓ ⵛⴻⵎ ⴰⴷ ⵜⴻⵙⵙⵏⴻⴷ ⵙⵉⴷⵉ. ■ 23 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ, ⴰⴷ ⵉⵎⵙⴰⵔ ⴰⵇⴰ ⵏⴻⵛⵛ ⴰⴷ ⵙⵍⴻⵖ ⵖⴰⵔ ⵓⵊⴻⵏⵏⴰ ⵓ ⴰⵊⴻⵏⵏⴰ ⴰⴷ ⵉⵙⴻⵍ ⵖⴰⵔ ⵜⴻⵎⵎⵓⵔⵜ 24 ⵓ ⵜⴰⵎⵎⵓⵔⵜ ⴰⴷ ⵜⵙⴻⵍ ⵖⴰⵔ ⵉⵎⴻⵏⴷⵉ ⵓⵍⴰ ⵖⴰⵔ ⴱⵉⵏⵓ ⵏ ⵊⴷⵉⴷ ⴷ ⵣⵣⴻⵛⵜ, ⵓ ⵉⵏⴰ ⴰⴷ ⵙⵍⴻⵏ ⵖⴰⵔ ⵢⴰⵣⵔⴰⵄⵉⵍ. 25 ⵏⴻⵛⵛ ⴰⴷ ⵜⵜ ⵣⴰⵔⵄⴻⵖ ⵉ ⵏⴻⵛⵛ ⴷⵉ ⵜⴻⵎⵎⵓⵔⵜ ⵓ ⵏⴻⵛⵛ ⴰⴷ ⴰⵔⵔⴻⵃⵎⴻⵖ ⵅ ⵍⵓ-ⵔⵓⵃⴰⵎⴰ, ⵓ ⴰⴷ ⵉⵏⵉⵖ ⵉ ⵍⵓ-ⵄⴰⵎⵎⵉ: ‘ⵛⴻⵎ ⴷ ⵍⴳⴻⵏⵙ ⵉⵏⵓ ⵉ ⵜⴻⴵⵉⴷ!’, ⵓ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵔⴻⴱⴱⵉ ⵉⵏⵓ!’ ” ■