ⴷⴰⵏⵉⵢⴰⵍ 12

1 “ⴷⵉ ⵍⵡⴻⵇⵜ ⵏⵏⵉ ⴰⴷ ⵉⴽⴽⴰⵔ ⵎⵉⵅⴰⵢⵉⵍ, ⵍⵃⴰⴽⴻⵎ ⴰⵎⴻⵇⵇⵔⴰⵏ. ⵡⴻⵏⵏⵉ ⵉⴱⴻⴷⴷⴻⵏ ⴰⴽ-ⴷ ⵍⴳⴻⵏⵙ ⵏⵏⴻⴽ. ⴰⴷ ⵜⵉⵍⵉ ⴷ ⵉⵛⵜ ⵏ ⵍⵡⴻⵇⵜ ⵏ ⵍⴻⵃⵚⴰⵔⴻⵜ ⴰⵎ ⵡⴰⵔ ⵜⴻⴵⵉ ⵥⴻⴳ ⵡⴰⵎⵉ ⵉⴵⴰ ⵉⵊⵊ ⵏ ⵍⴳⴻⵏⵙ ⴰⵍ ⵍⵡⴻⵇⵜ ⵏⵏⵉ. ⵓ ⴷⵉ ⵍⵡⴻⵇⵜ ⵏⵏⵉ ⴰⴷ ⵉⵜⵜⵡⴰⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⴽ, ⴽⵓⵍ ⵉⵊⵊⴻⵏ ⵉ ⵖⴰ ⵉⵜⵜⵡⴰⴼⴻⵏ ⴰⵇⴰ ⵓⵔⵉⵏ ⵜ ⴷⴻⴳ ⵡⴻⴷⵍⵉⵙ. 2 ⴰⵟⵟⴰⵙ ⵥⴻⴳ ⵢⴻⵏⵏⵉ ⵉⵟⵟⵙⴻⵏ ⴷⵉ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ ⴰⴷ ⴼⴰⵇⴻⵏ, ⵉⵏⴰ ⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ ⵓ ⵉⵏⵏⴻⵖⵏⵉ ⴰⴷ ⴼⴰⵇⴻⵏ ⵉ ⵓⴱⴻⵀⴷⴻⵍ ⵓ ⵉ ⵢⵉⵊⵊ ⵏ ⵓⵄⵉⴼⴼⵉ ⵉ ⵍⴻⴱⴷⴰ. 3 ⵉⵏⵏⵉ ⵖⴰⵔ ⵜⴻⴵⴰ ⵍⴻⴼⵀⴰⵎⴻⵜ ⴰⴷ ⴰⵔⵖⴻⵏ ⴰⵎ ⵎⴰⵎⵎⴻⵛ ⵢⴰⵔⴻⵇⵇ ⵓⵊⴻⵏⵏⴰ ⵓ ⵉⵏⵏⵉ ⵜⵓⵖⴰ ⵉⵏⴻⴷⴷⵀⴻⵏ ⴰⵟⵟⴰⵙ ⵖⴰⵔ ⵜⵙⴻⴳⴷⴰ, ⴰⵎⴻⵛⵏⴰⵡ ⵉⵜⵔⴰⵏ, ⵉ ⵍⴻⴱⴷⴰ ⵇⴰⵄ.   

4 ⵓ ⵛⴻⴽ, ⴷⴰⵏⵉⵢⴰⵍ, ⵙⵏⵓⴼⴼⴰⵔ ⴰⵡⴰⵍⴻⵏ-ⴰ ⵓ ⵜⵛⴻⵎⵎⵄⴻⴷ ⴰⴷⵍⵉⵙ ⴰⵍ ⵍⵡⴻⵇⵜ ⵏ ⵓⵏⴻⴳⴳⴰⵔ. ⴰⵟⵟⴰⵙ ⴰⴷ ⴰⵔⵥⵓⵏ ⵓ ⵜⵓⵙⵙⵏⴰ ⴰⴷ ⵜⴻⵎⵖⴰⵔ.”

5 ⵓ ⵏⴻⵛⵛ, ⴷⴰⵏⵉⵢⴰⵍ, ⵥⵔⵉⵖ, ⵓ ⵅⵥⴰⵔ, ⴰⵇⴰ ⴷⵉⵏ ⴱⴻⴷⴷⴻⵏ ⵜⵏⴰⵢⴻⵏ ⵏⵏⴻⵖⵏⵉ, ⵉⵊⵊ ⵖⴰⵔ ⵜⵎⴰ ⴰⵢⴰ ⵏ ⵢⴻⵖⵥⴰⵔ ⵓ ⵡⴻⵏⵏⴻⵖⵏⵉ ⵖⴰⵔ ⵜⵎⴰ ⵏⵏⴻⵖⵏⵉ ⵏ ⵢⴻⵖⵥⴰⵔ. 6 ⵓ ⵏⴻⵜⵜⴰ ⵉⵏⵏⴰ ⵉ ⵡⴻⵔⵢⴰⵥ ⵉ ⵜⵓⵖⴰ ⵢⴰⵔⴹⴻⵏ ⵍⴻⵇⵟⴻⵏ ⴰⵥⴷⴰⴷ, ⵡⴻⵏⵏⵉ ⵉⴱⴻⴷⴷⴻⵏ ⵙⴻⵏⵏⴻⵊ ⵉ ⵡⴰⵎⴰⵏ ⵏ ⵢⴻⵖⵥⴰⵔ: “ⵎⴻⵛⵃⴰⵍ ⵄⴰⴷ ⵉⵇⵇⵉⵎⴻⵏ ⵖⴰⵔⴻⵙ ⴰⵍ ⴰⵏⴻⴳⴳⴰⵔⵓ ⵏ ⵍⴻⵄⵊⴰⵢⴻⴱ-ⴰ?”   

7 ⵓ ⵙⵍⵉⵖ ⴰⵔⵢⴰⵥ ⵏⵏⵉ ⵜⵓⵖⴰ ⵢⴰⵔⴹⴻⵏ ⵍⴻⵇⵟⴻⵏ ⴰⵥⴷⴰⴷ, ⵡⴻⵏⵏⵉ ⵉⴱⴻⴷⴷⴻⵏ ⵙⴻⵏⵏⴻⵊ ⵉ ⵡⴰⵎⴰⵏ ⵏ ⵢⴻⵖⵥⴰⵔ, ⵓ ⵏⴻⵜⵜⴰ ⵉⵙⵙⴳⴻⵄⵄⴻⴷ ⴰⴼⵓⵙ ⵏⵏⴻⵙ ⴰⴼⵓⵙⵉ ⴷ ⵓⴼⵓⵙ ⵏⵏⴻⵙ ⴰⵥⴻⵍⵎⴰⴹ ⵓ ⵉⵊⵊⵓⴵ ⵖⴰⵔ ⵡⴻⵏⵏⵉ ⵉⴷⴷⴰⵔⴻⵏ ⵉ ⵍⴻⴱⴷⴰ, ⴱⴻⵍⵍⵉ ⴰⵡⴰⵔⵏⵉ ⵉ ⵢⵉⵊⵊ ⵏ ⵓⴽⵓⴷ ⴷ ⵉⴽⵓⴷⴻⵏ ⴷ ⵡⴻⵥⵢⴻⵏ ⵏ ⵓⴽⵓⴷ ⵓ ⴰⵡⴰⵔⵏⵉ ⵉ ⵓⵏⴻⴳⴳⴰⵔ ⵏ ⵓⴼⴰⵔⵜⴻⴽ ⵏ ⵓⴼⵓⵙ ⵏ ⵍⴳⴻⵏⵙ ⵉⵇⴻⴷⴷⵙⴻⵏ, ⵅⴻⵏⵏⵉ ⴰⴷ ⵢⵉⵍⵉ ⵓⵇⴻⵟⵟⵓ ⵏ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ.   

8 ⵏⴻⵛⵛ ⵙⵍⵉⵖ ⵜ, ⵎⴰⵛⴰ ⵡⴰⵔ ⴷ ⴰⵙ ⴼⵀⵉⵎⴻⵖ ⵓ ⵏⵏⵉⵖ: “ⴰ ⵙⵉⴷⵉ ⵉⵏⵓ, ⵎⵉⵏ ⵖⴰ ⵢⵉⵍⵉⵏ ⴷ ⴰⵏⴻⴳⴳⴰⵔⵓ ⵏ ⵎⴰⵔⵔⴰ ⴰⵢⴰ?”

9 ⵓ ⵏⴻⵜⵜⴰ ⵉⵏⵏⴰ: “ⵓⵢⵓⵔ, ⴷⴰⵏⵉⵢⴰⵍ, ⵎⴰⵖⴰⵔ ⴰⵡⴰⵍⴻⵏ-ⴰ ⴰⴷ ⵇⵇⵉⵎⴻⵏ ⴱⴻⵍⵍⵄⴻⵏ, ⵛⴻⵎⵎⵄⴻⵏ ⴰⵍ ⵍⵡⴻⵇⵜ ⵏ ⵓⵏⴻⴳⴳⴰⵔ.

10 ⴰⵟⵟⴰⵙ ⵉ ⵖⴰ ⵉⵜⵜⵡⴰⵙⵉⵥⴻⴷⴳⴻⵏ, ⴰⴷ ⴷⴻⵡⵍⴻⵏ ⴷ ⵉⵛⴻⵎⵍⴰⵍⴻⵏ ⵓ ⴰⴷ ⵜⵜⵡⴰⵚⴻⴼⴼⴰⵏ, ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⴳⴳⴻⵏ ⵜⵓⵄⴻⴼⴼⵏⴰ ⵓ ⵎⴰⵔⵔⴰ ⵉⵄⴻⴼⴼⴰⵏⴻⵏ ⵡⴰⵔ ⴷ ⴰⵙ ⴼⴻⵀⵀⵎⴻⵏ, ⵎⴰⵛⴰ ⵉⵎⵉⵖⵉⵙⴻⵏ ⴰⴷ ⴼⴻⵀⵎⴻⵏ.

11 ⵣⵉ ⵍⵡⴻⵇⵜ ⵉ ⴷⵉ ⵜᵉⵜⵜⵡⴰⴽⴽⴻⵙ ⵜⵖⴰⵔⵚⵜ ⵏ ⵍⴻⴱⴷⴰ ⵓ ⵉⵎⵎⴰⵔⵙ ⵏⵏⵄⵉ ⵏ ⵓⵅⴰⵔⵔⴻⴱ, ⴰⵇⴰ-ⵜ ⴰⵍⴻⴼ ⵓ-ⵎⵉⵜⴰⵢⵏ ⵓ-ⵜⴻⵙⵄⵉⵏ ⵏ ⵡⵓⵙⵙⴰⵏ.

12 ⵙⵙⴻⵄⴷ ⵏ ⵡⴻⵏⵏⵉ ⵉⵜⵜⵔⴰⵊⴰⵏ ⵓ ⴰⴷ ⵢⴰⵡⴻⴹ ⴰⵍⴻⴼ ⵓ-ⵜⴻⵍⵜ-ⵎⵢⴰ ⵓ-ⵅⴻⵎⵙⴰ ⵓ-ⵜⵍⴰⵜⵉⵏ ⵏ ⵡⵓⵙⵙⴰⵏ.

13 ⵓ ⵛⴻⴽ, ⵓⵢⵓⵔ ⴰⵍ ⴰⵏⴻⴳⴳⴰⵔ. ⴰⴷ ⵜⴰⵔⴻⵢⵢⵃⴻⴷ ⵓ ⴰⴷ ⵜⴻⴽⴽⴰⵔⴻⴷ ⵎⴰⵃⴻⵏⴷ ⴰⴷ ⵜⴻⴽⵙⵉⴷ ⵜⴰⵇⴻⴷⴷⵓⵃⵜ ⵉ ⴷ ⴰⵛ ⴷⴷ-ⵉⴽⴽⴰⵔⴻⵏ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ.”