ⵃⵉⵥⵇⵉⵢⴰⵍ 15

ⵜⴰⵣⴰⵢⴰⵔⵜ ⵏ ⵓⵔⵛⴰⵍⵉⵎ

1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵎⵉⵏ ⵉⵄⵏⴰ ⵓⴽⴻⵛⵛⵓⴹ ⵏ ⵜⵣⴰⵢⴰⵔⵜ ⴽⵜⴰⵔ ⵣⴻⴳ ⵓⴽⴻⵛⵛⵓⴹ ⵏⵏⴻⵖⵏⵉ, ⴽⵜⴰⵔ ⵣⴻⴳ ⵓⴽⴻⵛⵛⵓⴹ ⵏⵏⵉ ⴷⵉⵏ ⵉⴵⴰⵏ ⵊⴰⵔ ⵜⵛⴻⵊⵊⵓⵔⴰ ⵏ ⵡⴻⵣⵖⴰⵔ?    3 ⵎⴰ ⵉⵣⴻⵎⵎⴰⵔ ⴱⵏⴰⴷⴻⵎ ⴰⴷ ⵣⵣⴰⵢⴻⵙ ⵉⴽⵙⵉ ⴰⴽⴻⵛⵛⵓⴹ ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵉⴳⴳ ⵉⵛⵜ ⵏ ⵍⵇⴻⵛⵄⴻⵜ ⵉⵏⴻⴼⴼⵄⴻⵏ ⵉ ⵍⵅⴻⴷⵎⴻⵜ? ⵎⴰ ⵉⵜⵜⵡⴰⴽⴽⵙⵉ ⵣⵣⴰⵢⴻⵙ ⵉⵛⵜ ⵏ ⵍⴻⵡⵜⴻⴷ ⵃⵉⵎⴰ ⴰⴷ ⴷⴰⵢⴻⵙ ⵜⴰⵢⵍⴻⴷ ⵛⴰ ⵏ ⵍⵇⴻⵛⵄⴻⵜ? 4 ⵅⵣⴰⵔ, ⴰⴷ ⵉⵎⵎⴻⵡⵛ ⴷ ⵎⴰⵛⵛⴰ ⵉ ⵜⵎⴻⵙⵙⵉ. ⵜⵉⵎⴻⵙⵙⵉ ⴰⴷ ⵜⴻⵛⵛ ⵜⵏⴰⵢⴻⵏ ⵏ ⵟⵟⵔⵓⴼⴰ ⵏⵏⴻⵙ ⵓ ⴰⵖⴻⵣⴷⵉⵙ ⵏ ⵍⵡⴻⵙⵜ ⵉⵜⵜⵡⴰⵛⴻⵎⴹ. ⵎⴰ ⴰⴷ ⵉⵚⵍⴻⵃ ⵓⴽⴻⵛⵛⵓⴹ ⵏⵏⵉ ⵄⴰⴷ ⵉ ⵢⵉⵛⵜ ⵏ ⵍⵇⴻⵛⵄⴻⵜ ⵉ ⵍⵅⴻⴷⵎⴻⵜ? 5 ⵅⵣⴰⵔ, ⵓⵎⵉ ⵜⵓⵖⴰ ⵄⴰⴷ ⵉⵎⵓⵏ, ⵡⴰⵔ ⵣⵣⴰⵢⴻⵙ ⵜᵉⵜⵜⵡⴰⴳⴳ ⵉⵛⵜ ⵏ ⵍⵇⴻⵛⵄⴻⵜ ⵉ ⵍⵅⴻⴷⵎⴻⵜ. ⵎⴻⵛⵃⴰⵍ ⵇⴻⵍⵍ ⵄⴰⴷ ⵓⵎⵉ ⵜ ⵜⴻⵛⵛⴰ ⵜⵉⵎⴻⵙⵙⵉ, ⵉⵛⵎⴻⴹ ⵓⴽⴻⵛⵛⵓⴹ. ⵎⴰ ⴰⴷ ⵣⵣⴰⵢⴻⵙ ⴳⴳⴻⵏ ⵄⴰⴷ ⵛⴰ ⵏ ⵍⵇⴻⵛⵄⴻⵜ ⵉ ⵍⵅⴻⴷⵎⴻⵜ?”

6 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵎⴰⵎⵎⴻⵛ ⵉ ⵡⵛⵉⵖ ⴰⴽⴻⵛⵛⵓⴹ ⵏ ⵜⵣⴰⵢⴰⵔⵜ ⵊⴰⵔ ⵓⴽⴻⵛⵛⵓⴹ ⵏ ⵡⴻⵣⵖⴰⵔ ⵉ ⵜⵉⵎⴻⵙⵙⵉ, ⵃⵉⵎⴰ ⴰⴷ ⵉⵜⵜⵡⴰⵛⵛ, ⴰⵎⵎⵓ ⵉ ⵖⴰ ⵙⴻⵍⵍⵎⴻⵖ ⵓⵍⴰ ⴷ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⵉ ⵜⵎⴻⵙⵙⵉ! 7 ⵎⴰⵖⴰⵔ ⵏⴻⵛⵛ ⴰⴷ ⴰⵔⵔⴻⵖ ⵓⴷⴻⵎ ⵉⵏⵓ ⴹⵉⴷⴷ ⵏⵙⴻⵏ. ⵅⵎⵉ ⵉ ⵖⴰ ⵅⵙⴻⵏ ⴰⴷ ⴷⴷ-ⴼⴼⵖⴻⵏ ⵣⵉ ⵜⵎⴻⵙⵙⵉ, ⴰⴷ ⵜⴻⵏ ⵜⴻⵙⵙⴻⵛⵎⴻⴹ ⵜⵎⴻⵙⵙⵉ ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵓⵎⵉ ⴳⴳⵉⵖ ⵓⴷⴻⵎ ⵉⵏⵓ ⴹⵉⴷⴷ ⵏⵙⴻⵏ. 8 ⴰⴷ ⴰⵔⵔⴻⵖ ⵜⴰⵎⵎⵓⵔⵜ ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ, ⵎⵉⵏⵣⵉ ⵏⵉⵜⵏⵉ ⵖⴷⴰⵔⴻⵏ ⴰⵢⵉ ⵙ ⵉⵛⵜ ⵍⴻⵖⴷⴰⵔⴻⵜ ⵉⵇⴻⵙⵃⴻⵏ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.’ ”