ⵉⵥⵍⴰⵏ ⵙ ⵉⴳⴻⵊⴷⵓⵔⴻⵏ 5

ⵉⵣⵍⵉ ⵡⵉⵙⵙ ⵅⴻⵎⵙⴰ - ⵜⴰⵥⴰⴵⵉⵜ ⵉ ⵓⵙⴻⵏⵊⴻⵎ

1 ⵄⵇⴻⵍ, ⴰ ⵙⵉⴷⵉ, ⵅ ⵎⵉⵏ ⵉ ⴷ ⴰⵏⴻⵖ ⵉⵎⵙⴰⵔⴻⵏ,

ⵅⵣⴰⵔ-ⴷⴷ ⵓ ⵡⴰⵍⴰ ⵍⵃⴻⴳⵔⴰ ⵏⵏⴻⵖ.

2 ⵜⴻⵡⴹⴰ ⵜⴻⵙⵖⴰⵔⵜ ⵏ ⵍⵡⴰⵔⵜ ⵏⵏⴻⵖ ⵉ ⵉⴱⴰⵔⵔⴰⵏⵉⵢⵢⴻⵏ,

ⵓⵍⴰ ⴷ ⵜⵓⴷⵔⵉⵏ ⵏⵏⴻⵖ ⵔⵓⵃⴻⵏⵜ ⵜⵜ ⵖⴰⵔ ⵎⵉⴷⴷⴻⵏ.

3 ⵏⴻⵛⵛⵉⵏ ⵏⴻⴷⵡⴻⵍ ⴷ ⵉⵢⵓⵊⵉⵍⴻⵏ ⴱⵍⴰ ⴱⴰⴱⴰⵜⵏⴻⵖ,

ⵜⵉⵢⴻⵎⵎⴰⵜⵉⵏ ⵏⵏⴻⵖ ⴷⴻⵡⵍⴻⵏⵜ ⴰⵎ ⵜⵉⵊⵊⴰⵍ.

4 ⴰⵎⴰⵏ ⵏⵏⴻⵖ ⵏⵙⴻⵙⵙ ⵉ-ⵜⴻⵏ ⵙ ⵜⵎⴻⵏⵢⴰⵜ,

ⴰⴽⴻⵛⵛⵓⴹ ⵏⵏⴻⵖ ⵏⴻⵜⵜⵅⴻⴵⴰⵚ ⵅⴰⵙ.

5 ⴹⴻⴼⴼⴰⵔⴻⵏ ⴰⵏⴻⵖ ⵅ ⵢⵉⵔⵉ ⵏⵏⴻⵖ,

ⵏⴻⵛⵛⵉⵏ ⵏⴻⵎⵎⵓⵜ ⵙ ⵍⵡⴻⵃⵍⴰⵏ,

ⵎⴰⵛⴰ ⵡⴰⵔ ⴷ ⴰⵏⴻⵖ ⵊⵊⵉⵏ ⴰⵔⵔⴰⵃⴻⵜ.

6 ⴰⵇⴰ ⵏⵙⴰⵔⵔⴻⵃ ⴰⴼⵓⵙ ⵖⴰⵔ ⵎⵉⵚⵔⴰ, ⵖⴰⵔ ⴰⵛⵛⵓⵔ,

ⵎⴰⵃⴻⵏⴷ ⴰⴷ ⵏⴻⵊⵊⵉⵡⴻⵏ ⴰⵖⵔⵓⵎ.

7 ⵉⴱⴰⴱⴰⵜⴻⵏ ⵏⵏⴻⵖ ⵅⴹⴰⵏ,

ⵡⴰⵔ ⴵⵉⵏ ⵄⴰⴷ.

ⵓ ⵏⴻⵛⵛⵉⵏ ⵏⴰⵔⴻⴱⴱⵓ ⵍⵎⵓⵄⵚⵉⵢⵢⴻⵜ ⵏⵙⴻⵏ.

8 ⵉⵎⵙⴻⵅⵅⴰⵔⴻⵏ ⴷⴷⴻⴱⴱⴰⵔⴰⵏ ⵅⴰⵏⴻⵖ,

ⵓⵍⴰ ⴷ ⵉⵊⵊ ⵡⴰⵔ ⴷ ⴰⵏⴻⵖ ⵉⵙⵙⴻⵏⴼⴻⴽⴽⵉ

ⵣⴻⴳ ⵉⴼⴰⵙⵙⴻⵏ ⵏⵙⴻⵏ.

9 ⵏⴻⵛⵛⵉⵏ ⵏⵙⴻⴱⴱⴻⵍ ⵜⵓⴷⴰⵔⵜ ⵏⵏⴻⵖ

ⵎⴰⵃⴻⵏⴷ ⴰⴷ ⴷⴷ-ⵏⴰⵡⵉ ⴰⵖⵔⵓⵎ ⵏⵏⴻⵖ,

ⵣⵉ ⵙⵙⵉⴱⴱⴻⵜ ⵏ ⵙⵙⵉⴼ ⴷⵉ ⵍⴻⵅⵍⴰ.

10 ⵜⵉⵍⵎⴻⵛⵜ ⵏⵏⴻⵖ ⵜᵉⵜⵜⴻⵃⴷⵓⴷⵓⵇ ⴰⵎ ⵜⴻⴼⵇⵓⵏⵜ,

ⵣⵉ ⵍⵃⴰⴷⵓⵇ ⵏ ⵜⵎⴻⵙⵙⵉ ⵏ ⵍⴰⵥ.

11 ⵙⵙⵅⴰⵔⴳⴻⵏ ⵜⵉⵎⵖⴰⵔⵉⵏ ⴷⵉ ⵚⵉⵀⵢⵓⵏ,

ⵓⵍⴰ ⴷ ⵜⵉⵄⵣⴰⵔⵉⵢⵢⵉⵏ ⴷⵉ ⵜⵏⴻⴷⴷⴰⵎ ⵏ ⵢⴰⵀⵓⴷⴰ.

12 ⵍⵃⵓⴽⴽⴰⵎ ⵢⵓⵢⵍⴻⵏ ⵜⴻⵏ ⵙ ⵉⴼⴰⵙⵙⴻⵏ ⵏ ⵢⵉⵅⴻⴼ ⵏⵙⴻⵏ,

ⵉⵡⴻⵙⵙⵓⵔⴰ ⵡⴰⵔ ⵜⴻⵏ ⵡⴻⵇⵇⴰⵔⴻⵏ ⵄⴰⴷ.

13 ⵉⵔⵢⴰⵣⴻⵏ ⵉⵊⴻⵀⴷⴻⵏ ⵇⴰⵄ ⴰⵔⴻⴱⴱⵓⵏ ⵉⵥⵔⴰ ⵏ ⵜⵙⵉⵔⵜ,

ⵓ ⵉⵃⵓⴷⵔⵉⵢⵢⴻⵏ ⵜⵜⵏⴻⵇⵔⴰⴹⴻⵏ

ⵙⴰⴷⵓ ⵍⴻⵃⵎⴻⵍ ⵏ ⵓⴽⴻⵛⵛⵓⴹ.

14 ⵉⵎⵖⴰⵔⴻⵏ ⵙⵙⴱⴻⴷⴷⴻⵏ ⴰⵖⵉⵎⵉ ⴷⵉ ⵜⴻⵡⵡⵓⵔⴰ ⵏ ⵜⴻⵏⴷⵉⵏⵜ,

ⵉⵃⵓⴷⵔⵉⵢⵢⴻⵏ ⵙⵙⴱⴻⴷⴷⴻⵏ ⵣⴻⴳ ⵓⵣⴻⵏⵣⵓⵏ ⵏⵙⴻⵏ ⵅ ⵉⴼⵉⵍⴰⵏ.

15 ⵜⵡⴻⴷⴷⴰⵔ ⵍⴻⴼⵔⴰⵃⴻⵜ ⵏ ⵡⵓⵍ ⵏⵏⴻⵖ,

ⵛⵛⴹⵉⵃ ⵏⵏⴻⵖ ⵙ ⵏⵏⵓⴱⵜⴰⵜ ⵉⴷⵡⴻⵍ ⴷ ⴰⵛⴹⴰⵏ.

16 ⵉⵡⴹⴰ ⴰⵏⴻⵖ ⵜⴰⵊⵊ ⵅ ⵓⵣⴻⴵⵉⴼ ⵏⵏⴻⵖ.

ⵓⵛⵜ ⵅⴰⵏⴻⵖ, ⵎⴰⵖⴰⵔ ⵏⴻⵛⵛⵉⵏ ⵏⴻⵅⴹⴰ.

17 ⵙ ⵓⵢⴻⵏⵏⵉ ⵉⵀⵍⴻⵛ ⵡⵓⵍ ⵏⵏⴻⵖ ⴰⵟⵟⴰⵙ,

ⵙ ⵓⵢⴻⵏⵏⵉ ⴱⴱⴰⵔⴻⵛⵏⴻⵏⵜ ⵜⵉⵟⵟⴰⵡⵉⵏ ⵏⵏⴻⵖ,

18 ⵣⵉ ⵙⵙⵉⴱⴱⴻⵜ ⵏ ⵡⴻⴷⵔⴰⵔ ⵏ ⵚⵉⵀⵢⵓⵏ

ⵏⵏⵉ ⵉⵜⵜⵡⴰⵅⴰⵔⵔⴱⴻⵏ,

ⵎⴰⵏⵉ ⵜⵜⴰⵡⵢⴻⵏ ⵜⵜⴰⵔⵔⴰⵏ ⵉⵛⴻⵄⴱⴰⵡⴻⵏ.

19 ⵛⴻⴽ, ⴰ ⵙⵉⴷⵉ, ⴰⴷ ⵜⴻⵇⵇⵉⵎⴻⴷ ⵉ ⵍⴻⴱⴷⴰ,

ⵍⴽⵓⵔⵙⵉ ⵉⴳⴻⵍⵍⴷⴻⵏ ⵏⵏⴻⵛ ⴰⵇⴰ-ⵜ ⵣⵉ ⵊⵊⵉⵍ ⴰⵍ ⵊⵊⵉⵍ.

20 ⵎⴰⵢⴻⵎⵎⵉ ⵜⴻⵅⵙⴻⴷ ⵛⴻⴽ ⴰⴷ ⴰⵏⴻⵖ ⵜᵉⵜⵜⵓⴷ ⵉ ⵍⴻⴱⴷⴰ?

ⵎⴰⵢⴻⵎⵎⵉ ⵉ ⴷⴰⵢⵏⴻⵖ ⵜⵙⴻⵎⵃⴻⴷ ⵇⴰⵄ ⴰⵏⴻⵛⵜ ⵓⵢⴰ ⵏ ⵡⵓⵙⵙⴰⵏ?

21 ⴰ ⵙⵉⴷⵉ, ⴰⵔⵔ ⴰⵏⴻⵖ-ⴷⴷ ⵖⴰⵔⴻⴽ,

ⵅⴻⵏⵏⵉ ⴰⴷ ⵖⴰⵔⴻⴽ ⴷⴷ-ⵏⴻⴷⵡⴻⵍ.

ⴰⵔⵔ ⴰⵏⴻⵖ-ⴷⴷ ⵓⵙⵙⴰⵏ ⵏⵏⴻⵖ ⴷ ⵊⴷⵉⴷ ⴰⵎ ⵣⵉⵛ.

22 ⵎⴰⵖⴰⵔ ⵎⴰ ⵙ ⵜⵉⴷⴻⵜⵜ ⵜⴻⵏⴹⴰⵔⴻⴷ ⴰⵏⴻⵖ ⴽⵓⵍⵛⵉ?

ⵎⴰ ⵜⴻⴼⴼⵓⴳⵎⴻⴷ ⵅⴰⵏⴻⵖ ⴰⵎⵎⵓ ⵇⴰⵄ?