ⵉⵥⵍⵉ ⵡⵉⵙⵙ ⵜⵏⴰⵢⴻⵏ - ⴰⵡⴰⵍ ⵏ ⵓⵏⴰⴱⵉ ⵅ ⵡⴻⵖⴹⴰⴱ ⵏ ⴰⵔⴻⴱⴱⵉ
2
1 ⴰⵍⵉⴼ. ⵎⴰⵎⵎⴻⵛ ⵉⴷⵍⴰ ⵙⵉⴷⵉ ⵉⵏⵓ ⵜⴰⵢⴻⴵⵉⵜ ⵚⵉⵀⵢⵓⵏ ⵙ ⵉⵙⴻⵢⵏⵓⵜⴻⵏ ⵉⴱⴰⵔⵛⴰⵏⴻⵏ? ⴰⵇⴰ ⴰⵄⵓⴵⵉ ⵏ ⵉⵙⵔⴰⵉⵍ ⵉⵏⴹⴰⵔ ⵉ-ⵜ
ⵖⴰⵔ ⵜⴻⵎⵎⵓⵔⵜ ⵥⴻⴳ ⵓⵊⴻⵏⵏⴰ,
ⵏⴻⵜⵜⴰ ⵡⴰⵔ ⵉⵅⴰⵔⵔⴻⵚ ⴷⵉ ⵜⵏⴻⴱⴷⴰⵜ ⵏ ⵉⴹⴰⵔⴻⵏ ⵏⵏⴻⵙ,
ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⵙ.
2 ⴱⵉⵜ. ⵉⵇⴹⴰ ⵙⵉⴷⵉ ⵉⵏⵓ ⵅ ⵎⴰⵔⵔⴰ ⵜⵉⵥⴻⴷⴷⴰⵖ ⵏ ⵢⴰⵄⵇⵓⴱ,
ⵡⴰⵔ ⵜⴻⵏⵜ ⵜⴻⵊⵊⵉ ⴰⴷ ⵏⴻⵊⵎⴻⵏⵜ.
ⴷⴻⴳ ⵓⴷⵓⵇⵇⴻⵥ ⵏ ⵓⴼⵓⴳⴻⵎ ⵏⵏⴻⵙ
ⵉⵀⴷⴻⵎ ⵍⵇⴻⵍⵄⴰⵜ ⵏ ⵢⴻⴵⵉⵙ ⵏ ⵢⴰⵀⵓⴷⴰ,
ⵉⴱⴻⵇⵇⴻⴹ ⵉ-ⵜⴻⵏⵜ ⵅ ⵜⴻⵎⵎⵓⵔⵜ,
ⵉⵙⵙⵄⴰⵔⵔⴰ ⵜⴰⴳⴻⵍⴷⵉⵜ ⴷ ⵍⵃⵓⴽⴽⴰⵎ ⵏⵏⴻⵙ.
3 ⴳⵉⵎⴻⵍ. ⴷⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ ⵉⵇⴻⵙⵙ ⵇⴰⵄ ⵉⵛⵛ ⵏ ⵉⵙⵔⴰⵉⵍ.
ⵢⴰⵔⵔⴰ ⴰⴼⵓⵙⵉ ⵏⵏⴻⵙ ⵖⴰⵔ ⴹⴻⴼⴼⴰⵔ ⵇⴱⴻⵍ ⵎⴰ ⴰⴷ ⴷⴷ-ⵢⴰⵙ ⵍⴻⵄⴷⵓ,
ⵓ ⵏⴻⵜⵜⴰ ⵢⴰⵔⵖⴰ ⴹⵉⴷⴷ ⵉ ⵢⴰⵄⵇⵓⴱ ⴰⵎ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ,
ⵜᵉⵜⵜⴻⵜⵜ ⵎⴰⵔⵔⴰ ⵎⵉⵏ ⵉ ⴷ ⴰⵙ ⴷⴷ-ⵉⵏⵏⴹⴻⵏ.
4 ⴷⴰⵍⵉⵜ. ⵏⴻⵜⵜⴰ ⵉⵎⵃⴻⴹ ⵍⵇⴻⵡⵙ ⵏⵏⴻⵙ ⴰⵎ ⵍⴻⵄⴷⵓ,
ⵉⵙⵙⴳⴻⵄⵄⴻⴷ ⴰⴼⵓⵙⵉ ⵏⵏⴻⵙ ⴰⵎ ⵍⴻⵄⴷⵓ,
ⵡⴻⵏⵏⵉ ⵉⵡⵜⵉⵏ ⵎⴰⵔⵔⴰ ⵎⵉⵏ ⵜⴻⵎⵎⴻⵥⵔⵉ ⵜⵉⵟⵟ.
ⴷⴻⴳ ⵓⵇⵉⴹⵓⵏ ⵏ ⵜⵢⴻⴵⵉⵜ ⵚⵉⵀⵢⵓⵏ ⵉⴼⴰⵔⵔⴻⵖ ⴰⵙⵄⴰⵔ ⵏⵏⴻⵙ ⴰⵎ ⵜⵎⴻⵙⵙⵉ.
5 ⵀⵉ. ⵙⵉⴷⵉ ⵉⵏⵓ ⵉⴷⵡⴻⵍ ⴰⵎ ⵍⴻⵄⴷⵓ,
ⵉⵚⴰⵔⴹ ⵉⵙⵔⴰⵉⵍ,
ⵉⵚⴰⵔⴹ ⵎⴰⵔⵔⴰ ⵍⴻⵇⵚⵓⵔ ⵏⵏⴻⵙ,
ⵉⵀⴷⴻⵎ ⵍⴱⴰⵔⴰⵊⴰⵜ ⵏⵏⴻⵙ,
ⵓ ⵢⴰⵔⵏⵉ ⵄⴰⴷ ⴷⴻⴳ ⵡⴻⵛⴹⴰⵏ ⴷ ⵉⵖⵓⵢⵢⴰⵏ ⵖⴰⵔ ⵢⴻⴵⵉⵙ ⵏ ⵢⴰⵀⵓⴷⴰ.
6 ⵡⴰⵡ. ⵏⴻⵜⵜⴰ ⵉⵇⵍⴻⵄ ⵙ ⵍⵄⵓⵏⴼ ⴰⵄⵉⵛⵛⵓ ⵏⵏⴻⵙ,
ⴰⵎ ⵉⵊⵊ ⵏ ⵡⴻⵃⵡⵉⵛ.
ⵢⴰⵔⴻⵢⵢⴻⴱ ⴰⵎⵛⴰⵏ ⵏ ⵓⵎⵙⴰⴳⴰⵔ.
ⵉⵙⵙⴻⵜⵜⵓ ⵙⵉⴷⵉ ⴷⵉ ⵚⵉⵀⵢⵓⵏ
ⴰⵙⵙ ⵏ ⵍⵄⵉⴷ ⴷ ⴰⵙⵙ ⵏ ⵙⵙⴻⴱⵜ,
ⵓ ⴷⴻⴳ ⵡⴻⵙⵅⴻⴹ ⵏⵏⴻⵙ ⵉⵏⴹⴰⵔ ⴰⵊⴻⴵⵉⴷ ⴷ ⵓⴽⴻⵀⵀⴰⵏ.
7 ⵣⴰⵢⵉⵏ. ⵉⴷⵡⴻⵍ ⵙⵉⴷⵉ ⵉⵏⵓ ⵉⵛⴰⵔⵔⴻⵀ ⴰⵄⴰⵍⵟⴰⵔ ⵏⵏⴻⵙ,
ⵉⵏⴹⴰⵔ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵏⵏⴻⵙ,
ⵉⵡⵛⴰ ⵍⴻⵃⵢⵓⴹ ⵏ ⵢⴻⵅⵅⴰⵎⴻⵏ ⵏ ⵍⴻⵇⵚⴰⵔ
ⴷⴻⴳ ⵓⴼⵓⵙ ⵏ ⵍⴻⵄⴷⵓ.
ⵏⵉⵜⵏⵉ ⴳⴳⵉⵏ ⴰⴷ ⵙⵍⴻⵏ ⵉ ⵜⵎⵉⵊⵊⴰ ⵏⵙⴻⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ,
ⴰⵎ ⴷⴻⴳ ⵉⵊⵊ ⵏ ⵡⴰⵙⵙ ⵏ ⵍⵄⵉⴷ.
8 ⵅⵉⵜ. ⵙⵉⴷⵉ ⵉⵅⴰⵔⵔⴻⵚ ⴰⴷ ⵉⵀⴷⴻⵎ ⵍⵃⵉⴹ ⵏ ⵜⵢⴻⴵⵉⵜ ⵚⵉⵀⵢⵓⵏ,
ⵉⵙⴰⵔⵔⴻⵃ ⵅⴰⵙ ⴼⵉⵍⵓ ⵏ ⵍⴻⵄⴱⴰⵔ,
ⵡⴰⵔ ⴷⴷ-ⵉⵊⴱⵉⴷ ⵖⴰⵔⴻⵙ ⴰⴼⵓⵙ ⵏⵏⴻⵙ ⵥⴻⴳ ⵓⵚⴰⵔⴹ.
ⵉⵊⵊⴰ ⴰⵛⴱⴰⵔ ⵏ ⵥⵥⴰⵜ ⴷ ⵍⵃⵉⴹ ⴰⴷ ⵛⴻⴹⵏⴻⵏ,
ⴰⵇⴰ ⵜⵜⵡⴰⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ.
9 ⵜⵉⵜ. ⵜⵉⵡⵡⵓⵔⴰ ⵏⵏⴻⵙ ⵖⴰⵔⵇⴻⵏⵜ ⴷⴻⴳ ⵓⵛⴰⵍ,
ⵉⵄⵓⵎⴰⴷ ⵏⵏⴻⵙ ⵏ ⵓⴱⴻⵍⵍⴻⵄ ⵢⴰⵔⴻⴷⴷⴻⴵ ⵉ-ⵜⴻⵏ, ⵢⴰⵔⵥⴰ ⵉ-ⵜⴻⵏ.
ⴰⵊⴻⴵⵉⴷ ⵏⵏⴻⵙ ⴷ ⵍⵃⵓⴽⴽⴰⵎ ⵏⵏⴻⵙ ⴰⵇⴰ ⴰⵜⴻⵏ ⵊⴰⵔ ⵍⴻⴳⵏⵓⵙ,
ⵡⴰⵔ ⴷⵉⵏ ⴱⵓ ⵓⵙⴻⵍⵎⴻⴷ ⵏ ⵛⵛⴰⵔⵉⵄⴰ,
ⵉⵏⴰⴱⵉⵢⵢⴻⵏ ⵏⵏⴻⵙ ⵡⴰⵔ ⵜⵜⵉⴼⴻⵏ ⵛⴰ ⵜⴰⵎⴻⵥⵔⵉⵡⵜ ⵏ ⵙⵉⴷⵉ.
10 ⵢⵓⴷ. ⵉⵎⵖⴰⵔⴻⵏ ⵏ ⵜⵢⴻⴵⵉⵜ ⵚⵉⵀⵢⵓⵏ
ⵇⵇⵉⵎⴻⵏ ⵅ ⵜⴻⵎⵎⵓⵔⵜ, ⴱⴻⴽⵎⴻⵏ,
ⵥⵓⵥⵥⴰⵔⴰⵏ ⵓⵛⴰⵍ ⵅ ⵓⵥⴻⴵⵉⴼ ⵏⵙⴻⵏ,
ⴱⴻⵢⵙⴻⵏ ⵉⵅⴻⴼ ⵏⵙⴻⵏ ⵙ ⵜⵅⵓⵏⵛⴰⵢ ⵏ ⵡⴻⵛⴹⴰⵏ.
ⵜⵉⵄⵥⴰⵔⵉⵢⵢⵉⵏ ⵏ ⵓⵔⵛⴰⵍⵉⵎ ⵙⵙⴰⴹⴰⵔⴻⵏⵜ ⴰⵥⴻⴵⵉⴼ ⵏⵙⴻⵏⵜ ⵖⴰⵔ ⵜⴻⵎⵎⵓⵔⵜ.
11 ⴽⴰⴼ. ⵜⵉⵟⵟⴰⵡⵉⵏ ⵉⵏⵓ ⵓⵀⵍⴻⵏⵜ ⵥⴻⴳ ⵉⵎⴻⵟⵟⴰⵡⴻⵏ,
ⵜⴰⴽⵔⵉⵛⵜ ⵉⵏⵓ ⵜᵉⵜⵜⴻⵏⵀⴻⵥⵥⴰ,
ⵜᵉⵜⵜⵡⴰⵥⴻⴵⴻⵄ ⵜⵙⴰ ⵉⵏⵓ ⵅ ⵜⴻⵎⵎⵓⵔⵜ,
ⵅ ⵜⵔⴻⵥⵥⵉⵜ ⵏ ⵢⴻⴵⵉⵙ, ⵏ ⵍⴳⴻⵏⵙ ⵉⵏⵓ,
ⵎⵉⵏⵥⵉ ⴰⵃⴻⵏⵊⵉⵔ ⴷ ⵓⵙⴻⵢⵎⵉ ⵜⵜⵖⴰⵛⴰⵏ ⵅ ⵡⴰⵥⵥⴰⵢⴻⵏ ⵏ ⵜⴻⵏⴷⵉⵏⵜ.
12 ⵍⴰⵎⵉⴷ. ⵏⵉⵜⵏⵉ ⵇⵇⴰⵔⴻⵏ ⵉ ⵢⴻⵎⵎⴰⵜⵙⴻⵏ:
“ⵎⴰⵏⵉ ⵉⴵⴰ ⵄⴰⴷ ⵉⵎⴻⵏⴷⵉ ⴷ ⴱⵉⵏⵓ?”,
ⵅⵎⵉ ⵡⴻⵟⵟⴰⵏ ⵅ ⵉⴱⵔⵉⴷⴻⵏ ⵏ ⵜⴻⵏⴷⵉⵏⵜ ⴰⵎ ⵢⴻⵏⵏⵉ ⵉⵜⵜⵡⴰⵏⵖⴻⵏ,
ⵅⵎⵉ ⵜⵜⵡⴰⴽⴽⵙⴻⵏ ⵥⵉ ⵜⵓⴷⴰⵔⵜ ⵏⵙⴻⵏ ⵅ ⵉⴼⴰⴷⴷⴻⵏ ⵏ ⵢⴻⵎⵎⴰⵜⵙⴻⵏ.
13 ⵎⵉⵎ. ⵎⵉⵏ ⵅⴰⵎ ⵉ ⵖⴰ ⵉⵏⵉⵖ,
ⵎⵉⵏ ⵖⴰⵔ ⵛⴻⵎ ⵉ ⵖⴰ ⵙⵙⴻⵎⵇⵓⴷⴷⵉⵖ,
ⴰ ⵜⴰⵢⴻⴵⵉⵜ ⵓⵔⵛⴰⵍⵉⵎ? ⵎⵉⵏ ⵖⴰⵔ ⵛⴻⵎ ⵉ ⵖⴰ ⵙⵙⴻⵎⵇⵓⴷⴷⵉⵖ,
ⴰⵍⴰⵎⵉ ⵛⴻⵎ ⵉ ⵖⴰ ⵙⵙⴼⴻⵡⵡⵊⴻⵖ,
ⴰ ⵛⴻⵎ ⵜⴰⵄⵥⴰⵔⴻⵛⵜ, ⵜⴰⵢⴻⴵⵉⵜ ⵚⵉⵀⵢⵓⵏ,
ⵎⴰⵖⴰⵔ ⵜⴰⵔⴻⵥⵥⵉⵜ ⵏⵏⴻⵎ ⴷ ⵜⴰⵎⴻⵇⵇⵔⴰⵏⵜ ⴰⵎ ⵍⴻⴱⵃⴰⵔ,
ⵡⵉ ⵉⵥⴻⵎⵎⴰⵔⴻⵏ ⴰⴷ ⵛⴻⵎ ⵉⵙⵙⴳⴻⵏⴼⴰ?
14 ⵏⵓⵏ. ⵉⵏⴰⴱⵉⵢⵢⴻⵏ ⵏⵏⴻⵎ ⵥⵔⵉⵏ ⵜⵉⵎⴻⵥⵔⵉⵡⵉⵏ ⵉⵅⴰⵔⵔⵉⵇⴻⵏ ⴷ ⵉⴱⵓⵃⴰⵍⵉⵢⵢⴻⵏ,
ⵡⴰⵔ ⵙⵙⵄⴰⵔⵔⴰⵏ ⵛⴰ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵎ
ⴰⵍⴰⵎⵉ ⵉ ⵖⴰ ⵙⵙⴻⵏⵇⴻⵍⴱⴻⵏ ⵜⴰⵎⴻⵃⴱⴰⵙⵜ ⵏⵏⴻⵎ.
ⴷⵉ ⵟⵟⵡⴻⵄ ⵏⵏⴻⵎ ⵥⵔⵉⵏ ⵏⵉⵜⵏⵉ ⵎⵖⵉⵔ ⵍⴻⵃⴽⴰⵎⴰⵜ ⵉⵅⴰⵔⵔⵉⵇⴻⵏ ⴷ ⵜⵃⵓⵊⴰ ⵏ ⵓⵖⴰⵔⵔⵉ.
15 ⵙⴰⵎⵉⵅ. ⵎⴰⵔⵔⴰ ⵉⵏⵏⵉ ⵅⴰⵎ ⴷⴷ-ⵉⵜⵜⴻⴽⴽⴻⵏ ⵛⵛⴰⵜⴻⵏ ⴷⴻⴳ ⵉⴼⴰⵙⵙⴻⵏ ⵙ ⵓⵏⴻⵅⵍⵉⵄ ⵥⵉ ⵙⵙⵉⴱⴱⴻⵜ ⵏⵏⴻⵎ.
ⵏⵉⵜⵏⵉ ⵜⵜⵚⴻⴼⴼⴰⵔⴻⵏ ⵓ ⵙⵙⴻⵏⵀⴻⵥⵥⴰⵏ ⴰⵥⴻⴵⵉⴼ ⵏⵙⴻⵏ ⵅ ⵜⵢⴻⴵⵉⵜ ⵓⵔⵛⴰⵍⵉⵎ,
ⵇⵇⴰⵔⴻⵏ: ‘ⵎⴰ ⴷ ⵜⴰ ⴷ ⵜⴰⵏⴷⵉⵏⵜ ⵏⵏⵉ ⵓⵎⵉ ⵏⵏⴰⵏ:
“ⵎⴰ ⵡⴰⵔ ⵉⴵⵉ ⴰⵥⵔⵉ ⵏⵏⴻⵙ ⵉⴽⵎⴻⵍ,
ⴷ ⵍⵄⵓⵏⵚⴰⵔ ⵏ ⵍⴻⴼⵔⴰⵃⴻⵜ ⵉ ⵎⴰⵔⵔⴰ ⴷⴷⵓⵏⴻⵛⵜ!”?
16 ⴱⵉ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵎ ⴰⵔⴻⵥⵎⴻⵏ-ⴷⴷ ⵖⴰⵔⵡⴻⵎ ⵉⵇⴻⵎⵎⵓⵎⴻⵏ ⵏⵙⴻⵏ,
ⵜⵜⵚⴻⴼⴼⴰⵔⴻⵏ ⵓ ⵜⵜⵖⴻⵥⵥⴰⵏ ⵜⵉⵖⵎⴰⵙ,
ⵇⵇⴰⵔⴻⵏ: “ⵏⴻⵛⵛⵉⵏ ⵏⵚⴰⵔⴹ ⵉ-ⵜⵜ.
ⵡⴰ ⴷ ⴰⵙⵙ ⵉ ⵜⵓⵖⴰ ⵏⴻⵜⵜⵔⴰⵊⴰ,
ⵍⴻⵅⵅⵓ ⵏⵓⴼⴰ ⵉ-ⵜ, ⵏⴻⵜⵜⵡⴰⵍⴰ ⵉ-ⵜ!”
17 ⵄⴰⵢⵉⵏ. ⵉⴳⴳⴰ ⵙⵉⴷⵉ ⵎⵉⵏ ⵉⵅⴰⵔⵔⴻⵚ,
ⵉⴽⴻⵎⵎⴻⵍ ⴰⵡⴰⵍ ⵏⵏⴻⵙ
ⵡⴻⵏⵏⵉ ⵢⵓⵎⵓⵔ ⵥⵉ ⵎⴻⵛⵃⴰⵍ ⵓⵢⴰ.
ⵉⵀⴷⴻⵎ ⵉ ⵛⴻⵎ, ⵡⴰⵔ ⵅⴰⵎ ⵉⵃⵉⵡⴻⵍ.
ⵍⴻⵄⴷⵓ ⵉⵊⵊⴰ ⵉ-ⵜ ⵉⴼⴰⵔⵃ ⵥⵥⴰⵢⴻⵎ,
ⵉⵙⵙⴳⴻⵄⵄⴻⴷ ⵉⵛⵛ ⵏ ⵉⵖⵔⵉⵎⴻⵏ ⵏⵏⴻⵎ.
18 ⵜⵙⴰⴷⵉ. ⵓⵍ ⵏⵙⴻⵏ ⵉⵙⵖⵓⵢⵢ ⵖⴰⵔ ⵙⵉⴷⵉ ⵉⵏⵓ,
“ⴰ ⵍⵃⵉⴹ ⵏ ⵜⵢⴻⴵⵉⵜ ⵚⵉⵀⵢⵓⵏ,
ⴻⵊⵊ ⴰⴷ ⴰⵥⵥⵍⴻⵏ ⵉⵎⴻⵟⵟⴰⵡⴻⵏ ⵏⵏⴻⵎ ⴰⵎ ⵜⴻⵖⵥⴰⵔⵜ,
ⴰⵙⵙ ⴷ ⴵⵉⵍⴻⵜ ⴱⵍⴰ ⵎⴰ ⴰⴷ ⵏⴻⵇⵚⴻⵏ,
ⵡⴰⵔ ⵜⵜⴻⵊⵊⵉ ⵎⵓⵎⵎⵓ ⵏ ⵜⵉⵟⵟⴰⵡⵉⵏ ⵏⵏⴻⵎ ⴰⴷ ⵉⴱⴻⴷⴷ!” ■
19 ⵇⵓⴼ. ⴽⴽⴰⵔ, ⵙⵖⵓⵢⵢ ⴷⵉ ⴵⵉⵍⴻⵜ,
ⵖⴰⵔ ⵓⵎⴻⵥⵡⴰⵔⵓ ⵏ ⵜⵄⴻⵙⵙⴰⵙⵜ ⵏ ⴵⵉⵍⴻⵜ,
ⵥⴻⴵⴻⵄ ⵓⵍ ⵏⵏⴻⵎ ⴰⵎ ⵡⴰⵎⴰⵏ
ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵉⵏⵓ.
ⵙⴳⴻⵄⵄⴻⴷ ⵖⴰⵔⴻⵙ ⵉⴼⴰⵙⵙⴻⵏ ⵏⵏⴻⵎ ⵉ ⵜⵓⴷⴰⵔⵜ ⵏ ⵉⵃⴻⵏⵊⵉⵔⴻⵏ ⵏⵏⴻⵎ ⵉⵎⴻⵥⵢⴰⵏⵉⵏ,
ⵉⵏⵏⵉ ⵉⵡⴹⴰⵏ ⵖⴰⵔ ⵜⴻⵎⵎⵓⵔⵜ ⵙ ⵍⴰⵥ,
ⵖⴰⵔ ⵜⵖⴻⵎⵎⴰⵔ ⵏ ⵎⴰⵔⵔⴰ ⵉⴱⵔⵉⴷⴻⵏ.
ⵜⴰⵏⴷⵉⵏⵜ ⵏ ⵓⵔⵛⴰⵍⵉⵎ ⵜⴻⵙⵙⴰⵡⴰⵍ ⵅ ⵍⴻⵃⵚⴰⵔⴻⵜ ⵏⵏⴻⵙ
20 ⵔⵉⵅ. ⵅⵥⴰⵔ, ⴰ ⵙⵉⴷⵉ, ⵡⴰⵍⴰ ⵎⵍⵉⵃ ⵓⵎⵉ ⵜⴻⴳⴳⵉⴷ ⵎⴰⵏ ⴰⵢⴰ?
ⵎⴰ ⵉⵜⵜⵅⴻⵚⵚⴰ ⵅⴻⵏⵏⵉ ⴰⴷ ⵛⵛⴻⵏⵜ ⵜⴻⵎⵖⴰⵔⵉⵏ ⵍⵖⵉⴵⴻⵜ ⵏ ⵓⵄⴻⴷⴷⵉⵙ ⵏⵙⴻⵏⵜ,
ⵉⵃⴻⵏⵊⵉⵔⴻⵏ ⵏⵙⴻⵏⵜ ⵉ ⴷⵉ ⵜⵜⵀⵉⵍⵍⴰⵏⵜ ⵏⵉⵜⴻⵏⵜⵉ?
ⵎⴰ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴻⵖ ⵓⵏⴰⴱⵉ ⴷ ⵓⴽⴻⵀⵀⴰⵏ ⴷⵉ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵏ ⵙⵉⴷⵉ? ■
21 ⵛⵉⵏ. ⵉⵃⵓⴷⵔⵉⵢⵢⴻⵏ ⴷ ⵉⵡⴻⵙⵙⵓⵔⴰ ⴱⵓⵥⵥⵍⴻⵏ ⵅ ⵜⴻⵎⵎⵓⵔⵜ ⴷⴻⴳ ⵉⴱⵔⵉⴷⴻⵏ.
ⵜⵉⵄⵥⴰⵔⵉⵢⵢⵉⵏ ⵉⵏⵓ ⴷ ⵉⵃⵓⴷⵔⵉⵢⵢⴻⵏ ⵉⵏⵓ ⵡⴹⴰⵏ ⵙ ⵙⵙⵉⴼ.
ⵜⴻⵏⵖⵉⴷ ⵜⴻⵏ ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⴽ,
ⵜⵖⴰⵔⵚⴻⴹ ⴰⵙⴻⵏ, ⵡⴰⵔ ⵅⴰⵙⴻⵏ ⵜⵃⵉⵡⵍⴻⴷ ⵛⴰ.
22 ⵜⴰⵡ. ⵜⵄⴰⵔⵔⵏⴻⴷ-ⴷⴷ ⵖⴰⵔⵉ ⵎⵉⵏ ⵉⵙⵙⴰⴳⴳⵯⴰⴷⴻⵏ ⵥⵉ ⵎⴰⵔⵔⴰ ⵉⵖⴻⵥⴷⵉⵙⴻⵏ,
ⴰⵎ ⴷⴻⴳ ⵉⵊⵊ ⵏ ⵡⴰⵙⵙ ⵏ ⵍⵄⵉⴷ.
ⵡⴰⵔ ⵉⵏⵊⵉⵎ ⵓ ⵡⴰⵔ ⵉⵜⵜⵖⵉⵎⵉ ⵓⵍⴰ ⴷ ⵉⵊⵊ
ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏ ⵙⵉⴷⵉ.
ⵉⵏⵏⵉ ⵉ ⴷⵉ ⵜⵀⵉⵍⵍⵉⵖ ⵓ ⴰⵔⴻⴱⴱⵉⵖ
ⵉⵇⴹⴰ ⵉ-ⵜⴻⵏ ⵍⴻⵄⴷⵓ ⵉⵏⵓ.