ⵉⵔⵎⵉⵢⴰ 45

ⴰⵡⴰⵍ ⵏ ⵉⵔⵎⵉⵢⴰ ⵉ ⴱⴰⵔⵓⵅ

1 ⴰⵡⴰⵍ ⵏⵏⵉ ⵉⵙⵙⴰⵡⴰⵍ ⵓⵏⴰⴱⵉ ⵉⵔⵎⵉⵢⴰ ⵉ ⴱⴰⵔⵓⵅ, ⵎⵎⵉⵙ ⵏ ⵏⵉⵔⵉ-ⵢⴰⵀ, ⵓⵎⵉ ⵢⵓⵔⴰ ⵡⴰⵏⵉⵜⴰ ⴰⵡⴰⵍⴻⵏ ⵣⴻⴳ ⵓⵇⴻⵎⵎⵓⵎ ⵏ ⵉⵔⵎⵉⵢⴰ ⴷⴻⴳ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⴰⵔⴻⴱⵄⴰ ⵏ ⵢⴰⵀⵓⵢⴰⵇⵉⵎ, ⵎⵎⵉⵙ ⵏ ⵢⵓⵛⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ. ⵉⵏⵏⴰ: 2 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵅⴰⴽ, ⴰ ⴱⴰⵔⵓⵅ! 3 ⵛⴻⴽ ⵜⴻⵏⵏⵉⴷ: ‘ⴰⵅⴻⵢⵢⴻⴱ ⵉ ⵏⴻⵛⵛ, ⵎⴰⵖⴰⵔ ⵙⵉⴷⵉ ⵢⴰⵔⴻⵏⵏⵉ ⵄⴰⴷ ⴰⵛⴹⴰⵏ ⵅ ⵍⴻⵃⵔⵉⵇ ⵉⵏⵓ. ⵏⴻⵛⵛ ⵓⵃⵍⴻⵖ ⵙ ⵡⴻⵣⵀⴰⵔ, ⵡⴰⵔ ⵓⴼⵉⵖ ⴰⵔⵔⴰⵃⴻⵜ!’ 4 ⵉⵜⵜⵅⴻⵚⵚⴰ ⴰⴷ ⴰⵙ ⵜⵉⵏⵉⴷ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⵅⵣⴰⵔ, ⵎⵉⵏ ⵙⵙⴱⴻⴷⴷⴻⵖ, ⴰⴷ ⵜ ⵖⴻⴹⵍⴻⵖ, ⵓ ⵎⵉⵏ ⵥⵥⵓⵖ, ⴰⴷ ⵜ ⵇⴻⵍⵄⴻⵖ, ⵡⴰⵀ, ⵎⴰⵔⵔⴰ ⵜⴰⵎⵎⵓⵔⵜ-ⴰ. 5 ⵎⴰ ⵜⴻⵅⵙⴻⴷ ⵛⴻⴽ ⴰⴷ ⵜⴰⵔⵣⵓⴷ ⵅ ⵜⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ ⵉ ⵢⵉⵅⴻⴼ ⵏⵏⴻⵛ? ⵡⴰⵔ ⵜⴻⵏⵜ ⵜⴰⵔⴻⵣⵣⵓⴷ ⵛⴰ, ⵎⴰⵖⴰⵔ ⵅⵣⴰⵔ, ⵏⴻⵛⵛ ⴰⴷ ⵙⵙⵉⵡⴹⴻⵖ ⵉⵊⵊ ⵏ ⵍⵖⴰⵔ ⵅ ⵎⴰⵔⵔⴰ ⴷⴷⴰⵜ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⵎⴰⵛⴰ ⴰⴷ ⴰⵛ ⵡⵛⴻⵖ ⵍⴻⵄⵎⴰⵔ ⵏⵏⴻⵛ ⴷ ⵜⴰⴽⴻⵛⵛⴰⴹⵜ ⴷⵉ ⵎⴰⵔⵔⴰ ⵉⵎⵓⵛⴰⵏ ⵎⴰⵏⵉ ⵖⴰ ⵜⵔⴰⵃⴻⴷ.’ ”