43
1 ⵉⵎⵙⴰⵔ ⵓⵎⵉ ⵉⴽⴻⵎⵎⴻⵍ ⵉⵔⵎⵉⵢⴰ ⵍⵀⴰⵔⴷ ⵏⵏⴻⵙ ⵉ ⵎⴰⵔⵔⴰ ⵍⴳⴻⵏⵙ ⵙ ⵎⴰⵔⵔⴰ ⴰⵡⴰⵍⴻⵏ ⵏ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵙ ⵎⵉⵏ ⵣⵉ ⵜⵓⵖⴰ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵉⵙⵙⴻⴽⴽ ⵉ-ⵜ-ⵉ-ⴷⴷ ⵖⴰⵔⵙⴻⵏ, 2 ⴰⵇⴰ ⵉⵙⵙⵉⵡⴻⵍ ⵄⴰⵣⴰⵔⵢⴰ, ⵎⵎⵉⵙ ⵏ ⵀⵓⵛⴰⵄⵢⴰ, ⵓ ⵏⵏⴰⵏ ⵄⴰⵡⴻⴷ ⵢⵓⵃⴰⵏⴰⵏ, ⵎⵎⵉⵙ ⵏ ⵇⴰⵔⵉⵢⴰⵃ, ⴷ ⵎⴰⵔⵔⴰ ⵢⴻⵔⵢⴰⵣⴻⵏ ⵉⵎⵄⴻⴼⴼⴰⵔⴻⵏ ⵉ ⵉⵔⵎⵉⵢⴰ: “ⵛⴻⴽ ⵜⴻⵙⵙⵅⴰⵔⵔⵉⵇⴻⴷ. ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵡⴰⵔ ⵛⴻⴽ ⴷⴷ-ⵉⵙⴻⴽⴽ ⵎⴰⵃⴻⵏⴷ ⴰⴷ ⵜⵉⵏⵉⴷ: ‘ⵡⴰⵔ ⵉⵄⴻⴷⴷⴻⵍ ⴰⴷ ⵜⵔⴰⵃⴻⵎ ⵖⴰⵔ ⵎⵉⵚⵔⴰ ⵎⴰⵃⴻⵏⴷ ⴰⴷ ⴷⵉⵏⵏⵉ ⵜⴻⵇⵇⵉⵎⴻⵎ ⴰⵎ ⵢⵉⴱⴰⵔⵔⴰⵏⵉⵢⵢⴻⵏ!’ 3 ⵎⴰⵛⴰ ⴱⴰⵔⵓⵅ, ⵎⵎⵉⵙ ⵏ ⵏⵉⵔⵉ-ⵢⴰⵀ, ⵉ ⵛⴻⴽ ⵉ ⴷⴷ-ⵉⵃⴰⵔⵔⵛⴻⵏ ⵅⴰⵏⴻⵖ, ⵃⵉⵎⴰ ⴰⴷ ⴰⵏⴻⵖ ⵜⵙⴻⵍⵍⵎⴻⴷ ⵖⴰⵔ ⵉⴼⴰⵙⵙⴻⵏ ⵏ ⵉⴽⴰⵍⴷⴰⵏⵉⵢⵢⴻⵏ, ⵎⴰⵃⴻⵏⴷ ⴰⴷ ⴰⵏⴻⵖ ⵏⵖⴻⵏ ⵓ ⴰⴷ ⴰⵏⴻⵖ ⵏⴻⴷⵀⴻⵏ ⴷⵉ ⵍⵎⴻⵏⴼⴰ ⵖⴰⵔ ⴱⴰⴱⵉⵍ.” 4 ⴰⵎⵎⵓ ⵡⴰⵔ ⵉⵙⵍⵉ ⵢⵓⵃⴰⵏⴰⵏ, ⵎⵎⵉⵙ ⵏ ⵇⴰⵔⵉⵢⴰⵃ, ⴷ ⵎⴰⵔⵔⴰ ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔ ⵓⵍⴰ ⴷ ⵎⴰⵔⵔⴰ ⵍⴳⴻⵏⵙ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ, ⵎⴰⵃⴻⵏⴷ ⴰⴷ ⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ. 5 ⵢⵓⵃⴰⵏⴰⵏ, ⵎⵎⵉⵙ ⵏ ⵇⴰⵔⵉⵢⴰⵃ, ⴷ ⵎⴰⵔⵔⴰ ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔ ⴽⵙⵉⵏ ⵎⴰⵔⵔⴰ ⵎⵉⵏ ⵉⵇⵇⵉⵎⴻⵏ ⵏ ⵢⴰⵀⵓⴷⴰ, ⵉⵏⵏⵉ ⵜⵓⵖⴰ ⴷⴷ-ⵉⴷⴻⵡⵍⴻⵏ ⵣⵉ ⵎⴰⵔⵔⴰ ⵍⴻⴳⵏⵓⵙ ⵖⴰⵔ ⵎⴰⵏⵉ ⵅⴰⵙⴻⵏ ⵓⵥⵥⵍⴻⵏ, ⵃⵉⵎⴰ ⴰⴷ ⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ: 6 ⵉⵔⵢⴰⵣⴻⵏ ⵉⵊⴻⵀⴷⴻⵏ ⴷ ⵜⴻⵎⵖⴰⵔⵉⵏ ⴷ ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⴷ ⵢⴻⵙⵙⵉⵙ ⵏ ⵓⵊⴻⴵⵉⴷ ⴷ ⵎⴰⵔⵔⴰ ⵍⴻⵄⵎⴰⵔ ⵏⵏⵉ ⵜⵓⵖⴰ ⵉⵊⵊⴰ ⵏⴻⴱⵓⵣⴰⵔⴰⴷⴰⵏ, ⵍⵇⴻⴱⵟⴰⵏ ⵏ ⵉⵄⴻⵙⵙⴰⵙⴻⵏ ⵏ ⴰⵔⵔⵉⵎⴻⵜ, ⵖⴰⵔ ⵊⴰⴷⴰⵍⵢⴰ, ⵎⵎⵉⵙ ⵏ ⴰⵅⵉⵇⴰⵎ, ⵎⵎⵉⵙ ⵏ ⵛⴰⴼⴰⵏ, ⵓⵍⴰ ⴷ ⴰⵏⴰⴱⵉ ⵉⵔⵎⵉⵢⴰ ⴷ ⴱⴰⵔⵓⵅ, ⵎⵎⵉⵙ ⵏ ⵏⵉⵔⵉ-ⵢⴰⵀ. 7 ⵏⵉⵜⵏⵉ ⵓⵙⵉⵏ-ⴷⴷ ⵖⴰⵔ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵎⵉⵏⵣⵉ ⵏⵉⵜⵏⵉ ⵡⴰⵔ ⵙⵍⵉⵏ ⵛⴰ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ ⵓⵛⴰ ⵓⵙⵉⵏ-ⴷⴷ ⴰⵍ ⵜⴰⵃⴼⴰⵏⵉⵙ.
ⵉⵔⵎⵉⵢⴰ ⵉⵜⵜⵏⴰⴱⴱⴰ ⴷⵉ ⵜⴰⵃⴼⴰⵏⵃⵉⵙ
8 ⵅⴻⵏⵏⵉ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵉⵔⵎⵉⵢⴰ ⴷⵉ ⵜⴰⵃⴼⴰⵏⵃⵉⵙ, ⵉⵏⵏⴰ: 9 “ⴽⵙⵉ ⵉⵥⵔⴰ ⵉⵎⴻⵇⵇⵔⴰⵏⴻⵏ ⴷⴻⴳ ⵓⴼⵓⵙ ⵏⵏⴻⵛ ⵓⵛⴰ ⵏⵓⴼⴼⴰⵔ ⵉ-ⵜⴻⵏ ⴷⴻⴳ ⵓⴱⴻⴵⴰⵄ ⵏ ⵜⵉⵙⵉ ⵏ ⵍⵓⵚⴰ ⵖⴰⵔ ⵡⴰⴷⴰⴼ ⵏ ⵜⴰⴷⴷⴰⵔⵜ ⵏ ⴼⵉⵔⵄⵓⵏ ⴷⵉ ⵜⴰⵃⴼⴰⵏⵉⵙ. ⴻⴳⴳ ⵉ-ⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵢⴻⵔⵢⴰⵣⴻⵏ ⵏ ⵢⴰⵀⵓⴷⴰ, 10 ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ: ⵅⵣⴰⵔ, ⵏⴻⵛⵛ ⴰⴷ ⴰⵡⵢⴻⵖ ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⴰⵎⵙⴻⵅⵅⴰⵔ ⵉⵏⵓ, ⵓⵛⴰ ⴰⴷ ⴳⴳⴻⵖ ⵍⵄⴰⵔⵛ ⵏⵏⴻⵙ ⵅ ⵢⴻⵥⵔⴰ-ⵢⴰ ⵏⵏⵉ ⵏⵓⴼⴼⴰⵔⴻⵖ ⴷⵉⵏⵏⵉ, ⵓⵛⴰ ⵏⴻⵜⵜⴰ ⴰⴷ ⵉⵡⵡⴻⵜ ⴰⵇⵉⴹⵓⵏ ⵏⵏⴻⵙ ⵉⴳⴻⵍⵍⴷⴻⵏ ⵜⵉⵡⴰ ⵏⵙⴻⵏ. ■ 11 ⵏⴻⵜⵜⴰ ⴰⴷ ⴷⴷ-ⵢⴰⵙ ⵓⵛⴰ ⴰⴷ ⵉⵡⵡⴻⵜ ⵜⴰⵎⵎⵓⵔⵜ ⵏ ⵎⵉⵚⵔⴰ: ⵡⴻⵏⵏⵉ ⵉⴵⴰⵏ ⵉ ⵍⵎⴻⵡⵜ, ⵙ ⵍⵎⴻⵡⵜ, ⴷ ⵡⴻⵏⵏⵉ ⵉⴵⴰⵏ ⵉ ⵜⵎⴻⵃⴱⴰⵙⵜ, ⵉ ⵓⵃⴻⴱⴱⴻⵙ, ⴷ ⵡⴻⵏⵏⵉ ⵉⴵⴰⵏ ⵉ ⵙⵙⵉⴼ, ⵙ ⵙⵙⵉⴼ. ■ 12 ⵏⴻⵜⵜⴰ ⴰⴷ ⵙⵙⴰⵔⴻⵖ ⵉⵛⵜ ⵏ ⵜⵎⴻⵙⵙⵉ ⴷⴻⴳ ⵉⵅⵅⴰⵎⴻⵏ ⵏ ⵍ’ⴰⵚⵏⴰⵎ ⵏ ⵎⵉⵚⵔⴰ, ⴰⴷ ⵙⵙⵛⴻⵎⴹⴻⵖ ⵉⵅⴰⵎⵎⴻⵏ ⵏⵏⵉ ⵓ ⴰⴷ ⴰⵡⵢⴻⵖ ⵍ’ⴰⵚⵏⴰⵎ ⴷ ⵉⵎⴻⵃⴱⴰⵙ. ⵏⴻⵜⵜⴰ ⴰⴷ ⵢⴰⵔⴹ ⵜⴰⵎⵎⵓⵔⵜ ⵏ ⵎⵉⵚⵔⴰ ⴰⵎ ⵓⵎⴻⴽⵙⴰⵡ ⵢⴰⵔⴹ ⴰⵔⵔⵓⴹ ⵏⵏⴻⵙ ⵓⵛⴰ ⵏⴻⵜⵜⴰ ⴰⴷ ⵣⵣⴰⵢⴻⵙ ⴷⴷ-ⵉⴼⴼⴻⵖ ⴷⵉ ⵍⴻⵀⵏⴰ. 13 ⵏⴻⵜⵜⴰ ⴰⴷ ⵢⴰⵔⵥ ⵉⵎⴰⵢⴹⵓⵜⴻⵏ ⵏⵙⴻⵏ ⵉⵇⴻⴷⴷⵙⴻⵏ, ⵏⵏⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵓⵛⴰ ⴰⴷ ⵉⵙⵙⴻⵛⵎⴻⴹ ⵉⵅⵅⴰⵎⴻⵏ ⵏ ⵍ’ⴰⵚⵏⴰⵎ ⵏ ⵎⵉⵚⵔⴰ ⵙ ⵜⵎⴻⵙⵙⵉ.’ ”