ⵉⵛⴰⵄⵢⴰ 62

ⵛⴹⴰⵔⴻⵜ ⵏ ⵙⵉⴷⵉ ⵉ ⵢⴻⴵⵉⵙ ⵏ ⵙⵉⵃⵢⵓⵏ

1 “ⴷⵉ ⵟⵟⵡⴻⵄ ⵏ ⵚⵉⵀⵢⵓⵏ ⵡⴰⵔ ⵣⴻⵎⵎⴰⵔⴻⵖ ⴰⴷ ⵙⵙⴻⵖⴷⴻⵖ, ⴷⵉ ⵟⵟⵡⴻⵄ ⵏ ⵓⵔⵛⴰⵍⵉⵎ ⵡⴰⵔ ⵜⵜⴻⵙⵇⵉⵔⵉⵖ, ⴰⵍ ⴷⴷ ⵖⴰ ⵜⴻⵏⵇⴰⵔ ⵜⵙⴻⴳⴷⴰ ⵏⵏⴻⵙ ⴰⵎ ⵜⵉⵙⵙⵉⵇⵜ ⵓ ⴰⵙⴻⵏⵊⴻⵎ ⵏⵏⴻⵙ ⴰⵎ ⵡⴻⵙⴼⴻⴹ ⵢⴰⵔⴻⵇⵇⴻⵏ. 2 ⴰⴷ ⵥⴰⵔⴻⵏ ⵍⴻⴳⵏⵓⵙ ⵜⴰⵙⴻⴳⴷⴰ ⵏⵏⴻⵎ ⵓ ⵎⴰⵔⵔⴰ ⵉⵊⴻⴵⵉⴷⴻⵏ ⴰⴷ ⵥⴰⵔⴻⵏ ⴰⵄⵓⴵⵉ ⵏⵏⴻⵎ. ⴰⴷ ⴰⵎ ⵍⴰⵖⴰⵏ ⵙ ⵢⵉⵊⵊ ⵏ ⵢⵉⵙⴻⵎ ⵏ ⵊⴷⵉⴷ ⵏⵏⵉ ⴷ ⴰⵎ ⵉ ⵖⴰ ⵉⴳⴳⴰ ⵓⵇⴻⵎⵎⵓⵎ ⵏ ⵙⵉⴷⵉ.    3 ⴰⴷ ⵜⵉⵍⵉⴷ ⴷ ⵜⵜⴰⵊ ⵉⵛⴻⵡⵡⴰⵔⴻⵏ ⴷⴻⴳ ⵓⴼⵓⵙ ⵏ ⵙⵉⴷⵉ ⵓⵍⴰ ⴷ ⴰⵔⴻⵥⵥⴻⵜ ⵉⴳⴻⵍⵍⴷⴻⵏ ⴷⴻⴳ ⵓⴼⵓⵙ ⵏ ⴰⵔⴻⴱⴱⵉ ⵏⵏⴻⵎ. 4 ⵡⴰⵔ ⴷ ⴰⵎ ⵇⵇⴰⵔⴻⵏ ⵄⴰⴷ ‘ⵜⴻⵏⵏⵉ ⴷⵉ ⵙⴻⵎⵃⴻⵏ!’ ⵓ ⵡⴰⵔ ⴷ ⴰⵙ ⵇⵇⴰⵔⴻⵏ ⵄⴰⴷ ⵉ ⵜⴻⵎⵎⵓⵔⵜ ⵏⵏⴻⵎ ‘ⵜⴰⵎⵎⵓⵔⵜ ⵉⵅⵍⴰⵏ!’, ⵎⴰⵛⴰ ⴰⴷ ⴰⵎ ⵍⴰⵖⴰⵏ ‘ⵍⵅⴰⴹⴰⵔ ⵉⵏⵓ!’, ⵓ ⵜⴰⵎⵎⵓⵔⵜ ⵏⵏⴻⵎ ‘ⵜⴰⵏⴻⵎⵍⴰⵛⵜ!’, ⵎⴰⵖⴰⵔ ⵜⵓⵙⵉⴷ-ⴷⴷ ⵅ ⵍⵅⴰⴹⴰⵔ ⵏ ⵙⵉⴷⵉ ⵓ ⵜⴰⵎⵎⵓⵔⵜ ⵏⵏⴻⵎ ⴰⴷ ⵜᵉⵜⵜⵡⴰⵎⵍⴻⵛ. 5 ⵎⴰⵖⴰⵔ ⴰⵎ ⵓⵄⴻⵣⵔⵉ ⵉⵎⵍⴻⵛ ⵜⴰⵄⵣⴰⵔⴻⵛⵜ, ⴰⵎⵎⵓ ⵉ ⴽⵉⴷⴻⵎ ⵖⴰ ⵎⴻⵍⵛⴻⵏ ⵉⵃⴻⵏⵊⵉⵔⴻⵏ ⵏⵏⴻⵎ, ⵓⵛⴰ ⴰⵎ ⵎⵓⵍⴰⵢ ⵉⴼⴰⵔⵔⴻⵃ ⵉ ⵜⴻⵙⵍⵉⵜ, ⴰⵎⵎⵓ ⵉ ⴷ ⴰⵎ ⵖⴰ ⵉⴼⴰⵔⵃ ⴰⵔⴻⴱⴱⵉ ⵏⵏⴻⵎ.”

6 “ⴰ ⵓⵔⵛⴰⵍⵉⵎ, ⵙⵙⴱⴻⴷⴷⴻⵖ ⵉⵄⴻⵙⵙⴰⵙⴻⵏ ⵅ ⵍⴻⵃⵢⵓⴹ ⵏⵏⴻⵎ ⵏⵏⵉ ⵡⴰⵔ ⵙⵙⵖⵉⴷⵉⵏ ⵍⴻⴱⴷⴰ, ⴷⴻⴳ ⵡⴰⵙⵙ ⴷ ⴵⵉⵍⴻⵜ. ⴰ ⴽⴻⵏⵏⵉⵡ ⵉⵏⵏⵉ ⵉⵄⴻⵇⵇⵍⴻⵏ ⵅ ⵙⵉⴷⵉ, ⵡⴰⵔ ⵜⵜⴰⵔⴻⵢⵢⵃⴻⵎ! 7 ⵡⴰⵔ ⵜⵜⴰⵔⴻⵢⵢⵃⴻⵎ ⴷⵉ ⵟⵟⵡⴻⵄ ⵏⵏⴻⵙ, ⴰⵍ ⴷⴷ ⵉⵙⵙⴱⴻⴷⴷ ⵓⵔⵛⴰⵍⵉⵎ ⵓⵛⴰ ⵉⴳⴳⴰ ⵉ-ⵜⵜ ⴷ ⴰⵚⴻⴱⴱⴻⵃ ⵅ ⵜⴻⵎⵎⵓⵔⵜ. 8 ⵙⵉⴷⵉ ⵉⵊⵊⵓⴵ ⵖⴰⵔ ⵓⴼⵓⵙ ⵏⵏⴻⵙ ⴰⴼⵓⵙⵉ ⵓ ⵖⴰⵔ ⵓⵖⵉⵍ ⵏⵏⴻⵙ ⵉⵊⴻⵀⴷⴻⵏ: ‘ⵄⴻⵎⵎⴰⵔⵚ ⵄⴰⴷ ⴰⴷ ⵡⵛⴻⵖ ⵉⵎⴻⵏⴷⵉ ⵏⵏⴻⵎ ⴷ ⵎⴰⵛⵛⴰ ⵉ ⵍⵄⴻⴷⵢⴰⵏ ⵏⵏⴻⵎ, ⵓ ⵄⴻⵎⵎⴰⵔⵚ ⵄⴰⴷ ⴰⴷ ⵙⵙⴻⵙⵡⴻⵖ ⵉⴱⴰⵔⵔⴰⵏⵉⵢⵢⴻⵏ ⴱⵉⵏⵓ ⵏⵏⴻⵎ ⵏ ⵊⴷⵉⴷ ⵉ ⵅ ⵜⴻⴽⵙⵉⴷ ⵜⴰⵎⴰⵔⴰ! 9 ⵎⴰⵖⴰⵔ ⵡⵉ ⵜ ⵖⴰ ⵉⵙⵙⵎⵓⵏⴻⵏ, ⴰⴷ ⵣⵣⴰⵢⴻⵙ ⵛⵛⴻⵏ ⵓ ⴰⴷ ⵙⵙⴻⵎⵖⴰⵔⴻⵏ ⵙⵉⴷⵉ, ⵓ ⵡⵉ ⵖⴰ ⵉⵍⴻⵇⴹⴻⵏ ⴰⴹⵉⵍ, ⴰⴷ ⵣⵣⴰⵢⴻⵙ ⵙⵡⴻⵏ ⴷⵉ ⵍⴻⵎⵔⴰⵃⴰⵜ ⵏ ⵣⵣⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ.’ ”

10 “ⵄⴷⵓⵎ, ⵄⴷⵓⵎ ⵣⵉ ⵜⴻⵡⵡⵓⵔⴰ ⵓⵛⴰ ⵙⵡⴻⵊⴷⴻⵎ ⵉ ⵍⴳⴻⵏⵙ ⴰⴱⵔⵉⴷ. ⵙⴳⴻⵄⵄⴷⴻⵎ, ⵙⴳⴻⵄⵄⴷⴻⵎ ⴰⴱⵔⵉⴷ ⵉⵡⴰⵟⴰⵏ, ⴽⴽⵙⴻⵎ ⵉⵥⵔⴰ, ⵙⴳⴻⵄⵄⴷⴻⵎ ⵜⴰⵄⴻⴵⴰⵏⵜ ⵉ ⵍⴻⴳⵏⵓⵙ!    11 ⵅⵣⴰⵔ, ⵙⵉⴷⵉ ⵉⴳⴳⴰ ⴰⴷ ⵙⵍⴻⵏ ⴰⵍ ⵟⵟⴰⵔⴼ ⵏ ⵜⴻⵎⵎⵓⵔⵜ. ⵉⵏⵉⵎ ⵉ ⵢⴻⴵⵉⵙ ⵏ ⵚⵉⵀⵢⵓⵏ: ‘ⵅⵣⴰⵔ, ⴰⵙⴻⵏⵊⴻⵎ ⵏⵏⴻⵎ ⵢⵓⵙⴰ-ⴷⴷ, ⵅⵣⴰⵔ, ⵍⵎⵓⵏⴻⵜ ⵏⵏⴻⵙ ⵖⴰⵔⴻⵙ ⵓⵛⴰ ⵍⴻⵅⵍⴰⵚ ⵏⵏⴻⵙ ⵖⴰⵔ ⵣⵣⴰⵜⴻⵙ.’ 12 ⴰⴷ ⴰⵙⴻⵏ ⵇⵇⴰⵔⴻⵏ: ‘ⵍⴳⴻⵏⵙ ⴰⵎⵇⴻⴷⴷⴰⵙ, ⵉⵏⵏⵉ ⵉⵜⵜⵡⴰⴼⴻⴽⴽⴻⵏ ⵏ ⵙⵉⴷⵉ!’, ⵓⵛⴰ ⴰⴷ ⴰⵎ ⵇⵇⴰⵔⴻⵏ: ‘ⵜⴻⵏⵏⵉ ⵅ ⵜⵓⵖⴰ ⴰⵔⴻⵣⵣⵓⵏ!’ ⴷ ‘ⵜⴰⵏⴷⵉⵏⵜ ⵉ ⵡⴰⵔ ⵉⵜⵜⵡⴰⵊⵊⴻⵏ!’.”