ⵉⵛⴰⵄⵢⴰ 55

ⴰⵙⴻⵎ-ⴷⴷ ⵖⴰⵔ ⵡⴰⵎⴰⵏ

1 “ⴰ, ⵎⴰⵔⵔⴰ ⵉⵏⵏⵉ ⵉⴼⴼⵓⴷⴻⵏ, ⴰⵙⴻⵎ-ⴷⴷ ⵖⴰⵔ ⵡⴰⵎⴰⵏ, ⵡⴻⵏⵏⵉ ⵡⴰⵔ ⵖⴰⵔ ⴵⵉⵏⵜ ⵜⴻⵏⵄⴰⵛⵉⵏ, ⴰⵙⴻⵎ-ⴷⴷ, ⵙⵖⴻⵎ, ⵛⵛⴻⵎ, ⵡⴰⵀ, ⴰⵙⴻⵎ-ⴷⴷ ⵓⵛⴰ ⵙⵖⴻⵎ ⴱⵉⵏⵓ ⴷ ⵓⵖⵉ, ⴱⵍⴰ ⵜⵉⵏⵄⴰⵛⵉⵏ ⵓ ⴱⵍⴰ ⵜⵜⴰⵎⴰⵏ.    2 ⵎⴰⵢⴻⵎⵎⵉ ⵜⵡⴻⵣⵣⵏⴻⵎ ⵏⵏⵓⵇⴰⵔⵜ ⵉ ⵎⵉⵏ ⵡⴰⵔ ⵉⴵⵉⵏ ⴷ ⴰⵖⵔⵓⵎ ⵓ ⵎⴰⵢⴻⵎⵎⵉ ⵜⵊⴻⵀⴷⴻⵎ ⵉ ⵎⵉⵏ ⵡⴰⵔ ⵉⵊⵊⵉⵡⵏⴻⵏ? ⵙⵍⴻⵎ-ⴷⴷ ⵖⴰⵔⵉ ⵎⵍⵉⵃ, ⵛⵛⴻⵎ ⵎⵉⵏ ⵉⵛⵏⴰⵏ ⵓⵛⴰ ⴻⵊⵊ ⵍⴻⵄⵎⴰⵔ ⵏⵡⴻⵎ ⴰⴷ ⵉⵖⴻⴱⴱⴰ ⵜⴰⴷⵓⵏⵜ. 3 ⵡⵛⴻⵎ ⴰⵎⴻⵣⵣⵓⵖ ⵓⵛⴰ ⴰⵙⴻⵎ-ⴷⴷ ⵖⴰⵔⵉ, ⵙⵍⴻⵎ, ⵅⴻⵏⵏⵉ ⴰⴷ ⵉⴷⴷⴰⵔ ⵍⴻⵄⵎⴰⵔ ⵏⵡⴻⵎ, ⵎⴰⵖⴰⵔ ⵏⴻⵛⵛ ⴰⴷ ⴰⴽⵉⴷⵡⴻⵎ ⴳⴳⴻⵖ ⵉⵊⵊ ⵏ ⵍⵄⴰⵀⴷ ⵉ ⵍⴻⴱⴷⴰ, ⵜⵉⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵏ ⵍⴰⵎⴰⵏ ⵉⵛⴻⵡⵡⴰⵔⴻⵏ ⵏ ⴷⴰⵡⵓⴷ.   

4 ⵅⵣⴰⵔ, ⴳⴳⵉⵖ ⵜ ⴷ ⴰⵛⴻⵀⵀⴰⴷ ⵉ ⵛⵛⵓⵄⵓⴱ, ⴷ ⵍⵃⴰⴽⴻⵎ, ⴷ ⴱⴰⴱ ⵏ ⵍⵓⵎⵓⵔ ⵉ ⵛⵛⵓⵄⵓⴱ. 5 ⵅⵣⴰⵔ, ⴰⴷ ⵜⵍⴰⵖⵉⴷ ⵉⵊⵊ ⵏ ⵍⴳⴻⵏⵙ ⵉ ⵡⴰⵔ ⵜⴻⵙⵙⵉⵏⴻⴷ, ⵓ ⵍⴳⴻⵏⵙ ⵉ ⵡⴰⵔ ⵛⴻⴽ ⵉⵙⵙⵉⵏⴻⵏ ⴰⴷ ⵖⴰⵔⴻⴽ ⴷⴷ-ⵢⴰⵙ ⴷⵉ ⵟⵟⵡⴻⵄ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵓ ⴷⵉ ⵟⵟⵡⴻⵄ ⵏ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ, ⵎⵉⵏⵣⵉ ⵏⴻⵜⵜⴰ ⵉⵙⵙⵄⵓⴵⴰ ⵛⴻⴽ.”

6 “ⴰⵔⵣⵓⵎ ⵅ ⵙⵉⴷⵉ ⵍⴰⵎⵉ ⵏⴻⵜⵜⴰ ⵉⵜⵜⴻⵊⵊⴰ ⵉⵅⴻⴼ ⵏⵏⴻⵙ ⴰⴷ ⵉⵜⵜⵡⴰⴼ, ⵍⴰⵖⴰⵎ ⴰⵙ ⵍⴰⵎⵉ ⴷⴷ-ⵢⵓⴷⴻⵙ ⵏⴻⵜⵜⴰ. 7 ⴻⵊⵊ ⴰⵄⴻⴼⴼⴰⵏ ⴰⴷ ⵉⵙⵎⴻⵃ ⴷⴻⴳ ⵡⴻⴱⵔⵉⴷ ⵏⵏⴻⵙ ⵓⵛⴰ ⴰⵔⵢⴰⵣ ⵏ ⵍⵖⴻⵛⵛ ⴷⴻⴳ ⵉⵅⴰⵔⵔⵉⵚⴻⵏ ⵏⵏⴻⵙ. ⴻⵊⵊ ⵉ-ⵜ ⴰⴷ ⴷⴷ-ⵉⴷⵡⴻⵍ ⵖⴰⵔ ⵙⵉⴷⵉ, ⵅⴻⵏⵏⵉ ⵏⴻⵜⵜⴰ ⴰⴷ ⴰⵙ ⵉⵣⵣⵉⴵⴻⵣ, ⵓ ⵖⴰⵔ ⴰⵔⴻⴱⴱⵉ ⵏⵏⴻⵖ, ⵎⴰⵖⴰⵔ ⵏⴻⵜⵜⴰ ⵉⵖⴻⴼⴼⴰⵔ ⴰⵟⵟⴰⵙ ⵏ ⵜⵡⴰⵍⴰⵡⵉⵏ.

8 ⵎⴰⵖⴰⵔ ⵉⵅⴰⵔⵉⵚⵚⴻⵏ ⵉⵏⵓ ⵡⴰⵔ ⴵⵉⵏ ⴰⵎ ⵢⵉⵅⴰⵔⵉⵚⵚⴻⵏ ⵏⵡⴻⵎ ⵓ ⵉⴱⵔⵉⴷⴻⵏ ⵉⵏⵓ ⵡⴰⵔ ⴵⵉⵏ ⴰⵎ ⵢⵉⴱⵔⵉⴷⴻⵏ ⵏⵡⴻⵎ, ⵉⵇⵇⴰⵔ ⵙⵉⴷⵉ. 9 ⵎⴰⵖⴰⵔ ⴰⵎ ⵎⴰⵎⵎⴻⵛ ⵓⵄⵍⴰⵏ ⵉⵊⴻⵏⵡⴰⵏ ⵅ ⵜⴻⵎⵎⵓⵔⵜ, ⴰⵎⵎⵓ ⵉ ⵢⵓⵄⵍⴰⵏ ⵉⴱⵔⵉⴷⴻⵏ ⵉⵏⵓ ⵅ ⵉⴱⵔⵉⴷⴻⵏ ⵏⵡⴻⵎ ⵓ ⵉⵅⴰⵔⵔⵉⵚⴻⵏ ⵉⵏⵓ ⵅ ⵉⵅⴰⵔⵔⵉⵚⴻⵏ ⵏⵡⴻⵎ. 10 ⵎⴰⵖⴰⵔ ⴰⵎ ⵎⴰⵎⵎⴻⵛ ⵉ ⴷⴷ-ⵉⵀⴻⴽⴽⵡⴰ ⵡⴻⵏⵥⴰⵔ ⴷ ⵡⴻⴷⴼⴻⵍ ⵣⴻⴳ ⵓⵊⴻⵏⵏⴰ ⵓ ⵡⴰⵔ ⵖⴰⵔⴻⵙ ⴷⴷ-ⵉⴷⴷⵉⴽⴽⵡⵉⵍ ⵛⴰ, ⵎⴰⵛⴰ ⵉⵙⵙⵓⴼⴼⴰ ⵜⴰⵎⵎⵓⵔⵜ ⴷ ⴰⵎⴻⵣⵡⴰⵔⵓ ⵓⵛⴰ ⵉⵜⵜⴰⵔⵔⴰ ⵉ-ⵜⵜ ⴰⴷ ⵜⴻⵡⵛ ⵍⵖⵉⴵⴻⵜ, ⴰⴷ ⵜⴰⵡⵉ ⴰⵖⴻⵎⵎⵓⵢ ⵓⵛⴰ ⴰⵡⴰⵔⵏⵉ ⴰⵙ ⵉⵜⵜⵉⵛ ⵣⵣⴰⵔⵉⵄⴻⵜ ⵉ ⵡⴻⵏⵏⵉ ⵉⵥⴰⵔⵔⵄⴻⵏ ⴷ ⵡⴻⵖⵔⵓⵎ ⵉ ⵡⴻⵏⵏⵉ ⵉⵜⵜⴻⵜⵜⴻⵏ, 11 ⴰⵎⵎⵓ ⵉ ⵖⴰ ⵢⵉⵍⵉ ⵓⵍⴰ ⴷ ⴰⵡⴰⵍ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵓⵇⴻⵎⵎⵓⵎ ⵉⵏⵓ. ⵡⴰⵔ ⴷⴷ ⵖⴰⵔⵉ ⵉⴷⴷⵉⴽⴽⵡⵉⵍ ⵉⵅⵡⴰ, ⵎⴰⵛⴰ ⴰⴷ ⵢⴻⴳⴳ ⵎⵉⵏ ⵅⵙⴻⵖ ⵓ ⴰⴷ ⵢⴰⵡⴻⴹ ⵎⴰⵔⵔⴰ ⵎⵉⵏ ⵖⴰⵔ ⵜ ⵙⵙⴻⴽⴽⴻⵖ.”

12 “ⵎⴰⵖⴰⵔ ⴰⴷ ⵜⴻⴼⴼⵖⴻⵎ ⵙ ⵍⴻⴼⵔⴰⵃⴻⵜ ⵓⵛⴰ ⴰⴷ ⴽⴻⵏⵏⵉⵡ ⵙⵙⵇⴻⴱⴱⴹⴻⵏ ⴷⵉ ⵍⴻⵀⵏⴰ. ⵉⴷⵓⵔⴰⵔ ⴷ ⵜⴻⵡⵔⵉⵔⵉⵏ ⴰⴷ ⴷⴷⵓⵇⵇⵣⴻⵏ ⵙ ⵓⵙⵍⵉⵡⵍⴻⵡ ⵣⵣⴰⵜ ⵉ ⵡⵓⴷⴻⵎ ⵏⵡⴻⵎ ⵓ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵢⴻⵢⵢⴰⵔ ⴰⴷ ⵡⵜⴻⵏⵜ ⵛⴰⵎⵅⴰ ⵙ ⵉⴼⴰⵙⵙⴻⵏ.    13 ⴷⴻⴳ ⵡⴻⵎⵛⴰⵏ ⵏ ⵓⵙⴻⵏⵏⴰⵏ ⴰⴷ ⵜⴻⵖⵎⵉ ⵜⵛⴻⵊⵊⴰⵔⵜ ⵏ ⵓⵎⴻⵔⵣⵉ, ⴷⴻⴳ ⵡⴻⵎⵛⴰⵏ ⵏ ⵜⵣⴻⴳⴳⵯⴰⵔⵜ ⴰⴷ ⵜⴻⵖⵎⵉ ⵜⵛⴻⵊⵊⴰⵔⵜ ⵏ ⵜⴰⵔⵉⵃⴰⵏⵜ. ⴰⵢⴰ ⴰⴷ ⵢⵉⵍⵉ ⵉ ⵙⵉⴷⵉ, ⵉ ⵛⵛⴰⵏ ⵏ ⵢⵉⵙⴻⵎ ⵏⵏⴻⵙ, ⵉ ⵍⴻⵄⵍⴰⵎⴻⵜ ⵏ ⵍⴻⴱⴷⴰ ⵉ ⵡⴰⵔ ⵉⵎⴻⵃⵃⵉⵏ ⵄⴻⵎⵎⴰⵔⵚ.”