52
1 “ⴼⴰⵇ, ⴼⴰⵇ, ⴰⵔⴹ ⵙ ⵊⵊⴻⵀⴷ ⴰ, ⵚⵉⵀⵢⵓⵏ, ⴰⵔⴹ ⵙ ⵡⴻⵔⵔⵓⴹ ⵏⵏⴻⵎ ⵉⵛⵛⵓⵡⵡⴰⵔⴻⵏ, ⴰ ⵓⵔⵛⴰⵍⵉⵎ, ⵜⴰⵏⴷⵉⵏⵜ ⵜⴰⵎⵇⴻⴷⴷⴰⵙⵜ! ⵣⵉ ⵙⵙⴰ ⵜⵙⴰⵡⴻⵏⵜ ⵡⴰⵔ ⵖⴰⵔⴻⵎ ⵜ-ⵉ-ⴷⴷ-ⵉⵜⵜⵉⴷⵉⴼ ⵄⴰⴷ ⵡⴻⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ ⴷ ⵓⵎⴻⵅⵎⵓⵊ. 2 ⵣⴻⵔⵣ ⵅⴰⵎ ⵜⴰⵄⴻⵊⵊⴰⵛⵜ, ⴽⴽⴰⵔ, ⵇⵇⵉⵎ ⵛⴻⵎ, ⴰ ⵓⵔⵛⴰⵍⵉⵎ! ⴰⵔⵅⵓ ⵙⵙⵏⴰⵙⴻⵍ ⵣⴻⴳ ⵢⵉⵔⵉ ⵏⵏⴻⵎ, ⴰ ⵜⴰⵎⴻⵃⴱⵓⵙⵜ, ⴰ ⵢⴻⴵⵉⵙ ⵏ ⵚⵉⵀⵢⵓⵏ! 3 ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵜⴻⵎⵎⴻⵏⵣⴻⵎ ⵙ ⴱⴰⵟⴻⵍ, ⴰⴷ ⵜᵉⵜⵜⵡⴰⵙⵙⴼⴻⴽⴽⴻⵎ ⵄⴰⵡⴻⴷ ⴱⵍⴰ ⵜⵎⴻⵏⵢⴰⵜ!’ 4 ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵣⵉⵛ ⵉⵀⵡⴰ ⵍⴳⴻⵏⵙ ⵉⵏⵓ ⵖⴰⵔ ⵎⵉⵚⵔⴰ ⵎⴰⵃⴻⵏⴷ ⴰⴷ ⴷⵉⵏⵏⵉ ⵉⵇⵇⵉⵎ ⴰⵎ ⵍⴱⴰⵔⵔⴰⵏⵉ, ⵓⵛⴰ ⴰⵛⵛⵓⵔ ⵉⵃⵚⴰⵔ ⵉ-ⵜ ⵅ ⵡⴰⵍⵓ!’ ” ■ 5 “ⵓⵛⴰ ⵍⴻⵅⵅⵓ, ⵎⵉⵏ ⵖⴰⵔⵉ ⵄⴰⴷ ⵅⴰⴼⵉ ⴰⴷ ⵜⵜ ⴳⴳⴻⵖ ⴷⴰⵏⵉⵜⴰ, ⵉⵇⵇⴰⵔ ⵙⵉⴷⵉ, ⵎⴰⵖⴰⵔ ⴰⵡⵢⴻⵏ ⵍⴳⴻⵏⵙ ⵉⵏⵓ ⴱⵍⴰ ⵙⵙⵉⴱⴱⴻⵜ ⵓⵛⴰ ⵉⵏⵏⵉ ⵅⴰⵙ ⵉⵜⵜⵚⴻⵍⵍⵟⴻⵏ ⵙⵙⵖⵓⵢⵢⵓⵏ, ⵉⵇⵇⴰⵔ ⵙⵉⴷⵉ, ⴰⵙⵙ ⵎⴰⵔⵔⴰ ⵜⵜⵄⴻⵢⵢⴱⴻⵏ ⴷⴻⴳ ⵢⵉⵙⴻⵎ ⵉⵏⵓ. ■ 6 ⵙ ⵓⵢⴰ ⴰⴷ ⵉⵙⵙⴻⵏ ⵍⴳⴻⵏⵙ ⵉⵏⵓ ⵉⵙⴻⵎ ⵉⵏⵓ, ⵙ ⵓⵢⴰ, ⴰⵇⴰ ⵏⴻⵛⵛ ⵏⴻⵛⵛ, ⵡⴻⵏⵏⵉ ⵉⵇⵇⴰⵔⴻⵏ ⴷⴻⴳ ⵡⴰⵙⵙ ⵏⵏⵉ: ⵏⴻⵛⵛ ⴰⵇⴰ ⴰⵢⵉ ⴷⴰ!”
7 “ⵎⴻⵛⵃⴰⵍ ⵛⵏⴰⵏ ⵅ ⵉⴷⵓⵔⴰⵔ ⵉⵚⵓⵔⴰⴼ ⵏ ⵓⵎⴱⴻⵛⵛⴰⵔ ⵏⵏⵉ ⵉⵜⵜⴱⴰⵔⵔⵃⴻⵏ ⵙ ⵍⴻⵀⵏⴰ, ⵏ ⵓⵎⴱⴻⵛⵛⴰⵔ ⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵏⵏⵉ ⵉⵜⵜⴱⴰⵔⵔⵃⴻⵏ ⵙ ⵓⵙⴻⵏⵊⴻⵎ, ⵡⴻⵏⵏⵉ ⵉⵇⵇⴰⵔⴻⵏ ⵉ ⵚⵉⵀⵢⵓⵏ: ‘ⴰⵔⴻⴱⴱⵉ ⵏⵏⴻⵎ ⴷ ⴰⵊⴻⴵⵉⴷ!’ ■ 8 ⵙⵍⴻⵎ ⵉ ⵜⵎⵉⵊⵊⴰ ⵏ ⵉⵄⴻⵙⵙⴰⵙⴻⵏ ⵏⵏⴻⵎ! ⵏⵉⵜⵏⵉ ⵜⵜⵙⴳⴻⵄⵄⴰⴷⴻⵏ ⵜⵎⵉⵊⵊⴰ ⵏⵙⴻⵏ, ⵜⵜⴻⵙⵍⵉⵡⵍⵉⵡⴻⵏ ⵎⵓⵏⴻⵏ, ⵎⴰⵖⴰⵔ ⵓⴷⴻⵎ ⴷⴻⴳ ⵓⴷⴻⵎ ⴰⴽⵉⴷⴻⵙ ⴰⴷ ⵜⵡⴰⵍⴰⵏ ⵎⴰⵎⵎⴻⵛ ⵉ ⴷⴷ ⵖⴰ ⵉⵙⵙⴻⵄⵇⴻⴱ ⵙⵉⴷⵉ ⵚⵉⵀⵢⵓⵏ. 9 ⵙⵖⵓⵢⵢⴻⵏⵜ ⵙ ⵍⴻⴼⵔⴰⵃⴻⵜ, ⵙⵍⵉⵡⵍⴻⵡⴻⵏⵜ ⵜⵎⵓⵏⴻⵏⵜ, ⴰ ⵍⵅⵉⵔⴱⴰⵜ ⵏ ⵓⵔⵛⴰⵍⵉⵎ, ⵎⴰⵖⴰⵔ ⵙⵉⴷⵉ ⵉⵙⵙⴼⴻⵡⵡⴻⵊ ⵍⴳⴻⵏⵙ ⵏⵏⴻⵙ, ⵉⴼⴻⴽⴽ ⵓⵔⵛⴰⵍⵉⵎ. 10 ⵉⵄⴰⵔⵔⴰ ⵙⵉⴷⵉ ⴰⵖⵉⵍ ⵏⵏⴻⵙ ⴰⵎⵇⴻⴷⴷⴻⵙ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵍⴻⴳⵏⵓⵙ ⵓ ⵎⴰⵔⵔⴰ ⵜⵉⵎⴰⵡⵡⵉⵏ ⵏ ⵜⴻⵎⵎⵓⵔⵜ ⴰⴷ ⵥⴰⵔⴻⵏⵜ ⴰⵙⴻⵏⵊⴻⵎ ⵏ ⴰⵔⴻⴱⴱⵉ ⵏⵏⴻⵖ.” ■
11 “ⵔⵓⵃⴻⵎ, ⵔⵓⵃⴻⵎ, ⴼⴼⵖⴻⵎ-ⴷⴷ ⵙⵙⴻⵏⵏⵉ, ⵡⴰⵔ ⵜⵜⵃⴰⴷⴰⵎ ⵡⴰⵍⵓ ⵏ ⵎⵉⵏ ⵉⵅⴻⵎⵊⴻⵏ, ⴼⴼⵖⴻⵎ ⵙⵙⴻⵏⵏⵉ ⵣⵉ ⵍⵡⴻⵙⵟ ⵏⵏⴻⵙ, ⵙⵉⵣⴻⴷⴳⴻⵎ ⵉⵅⴻⴼ ⵏⵡⴻⵎ, ⴰ ⴽⴻⵏⵏⵉⵡ ⵉⵏⵏⵉ ⵢⴰⵔⴻⴱⴱⵓⵏ ⵍⴻⵇⵛⵓⵄ ⵏ ⵙⵉⴷⵉ! ■ 12 ⵎⴰⵖⴰⵔ ⴽⴻⵏⵏⵉⵡ ⵡⴰⵔ ⵜᵉⵜⵜⴻⴼⴼⵖⴻⵎ ⵙ ⵜⴻⵣⵍⴰ, ⵡⴰⵔ ⵜⴰⵔⴻⴽⴽⵡⴰⵍⴻⵎ, ⵎⴰⵖⴰⵔ ⵙⵉⴷⵉ ⴰⴷ ⵢⵓⵢⵓⵔ ⵣⵣⴰⵜ ⵏⵡⴻⵎ ⵓ ⴰⵔⴻⴱⴱⵉ ⵏ ⵉⵙⵔⴰⵉⵍ ⴰⴷ ⵢⵉⵍⵉ ⴷ ⴰⵖⴻⵣⴷⵉⵙ ⵏⵡⴻⵎ ⴰⵏⴻⴳⴳⴰⵔ.”