ⴰⵡⴻⵟⵟⵓ ⵏ ⵉⵔⴻⴱⴱⵉⵜⴻⵏ ⵏ ⴱⴰⴱⵉⵍ
46
1 “ⵚⵚⴰⵏⴰⵎ ⴱⵉⵍ ⵢⵓⴹⴰⵔ, ⵏⴰⴱⵓ ⵉⵇⵡⴻⵙ ⵖⴰⵔ ⵜⴻⵎⵎⵓⵔⵜ, ⴰⵇⴰ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵏⵙⴻⵏ ⴷⴻⵇⵇⵍⴻⵏⵜ ⵉ ⵍⵎⴰⵍ ⵓ ⵉ ⵍⴻⴱⵀⴰⵢⴻⵎ. ⵎⵉⵏ ⵜⵓⵖⴰ ⵜⴰⵔⴻⴱⴱⵓⵎ ⴽⴻⵏⵏⵉⵡ, ⴰⵇⴰ ⵍⴻⵅⵅⵓ ⴷ ⵍⴻⵃⵎⵓⵍ, ⴷⴷⵇⴻⵍ ⵉ ⵍⵎⴰⵍ ⵉⴼⵏⴰⵏ ⵙ ⵍⵡⴻⵃⵍⴰⵏ. 2 ⴰⵇⴰ ⵇⴻⵡⵙⴻⵏ ⴰⵎ ⴽⴻⵎⵎⵍⴻⵏ, ⵓⴹⴰⵔⴻⵏ, ⵡⴰⵔ ⵣⴻⵎⵎⴰⵔⴻⵏ ⴰⴷ ⵙⵙⵏⴻⵊⵎⴻⵏ ⴷⴷⵇⴻⵍ, ⵓⵛⴰ ⵓⵍⴰ ⴷ ⵏⵉⵜⵏⵉ ⵙⵉⵎⴰⵏⵜ ⵏⵙⴻⵏ ⵓⵢⵓⵔⴻⵏ ⴷⵉ ⵜⵎⴻⵃⴱⴰⵙⵜ.” 3 “ⵙⵍⴻⵎ ⵖⴰⵔⵉ, ⴰ ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⴷ ⵎⴰⵔⵔⴰ ⵎⵉⵏ ⵉⵇⵇⵉⵎⴻⵏ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⴽⴻⵏⵏⵉⵡ, ⵉⵏⵏⵉ ⴽⵙⵉⵖ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵜⵡⴻⵎ, ⵉⵏⵏⵉ ⴰⵔⴱⵓⵔⴻⵖ ⵣⴻⴳ ⵡⴰⵎⵉ ⵜⵙⴻⵎⵃⴻⵎ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵜⵡⴻⵎ. 4 ⴰⵍ ⵜⴰⵡⵙⴰⵔⵜ ⵏⵡⴻⵎ ⵏⴻⵛⵛ ⵏⴻⵛⵛ, ⴰⵍ ⵖⴰ ⵜⵛⴰⴱⴻⵎ, ⴰⴷ ⴽⴻⵏⵏⵉⵡ ⴰⵔⴱⵓⵖ. ⵏⴻⵛⵛ ⴳⴳⵉⵖ ⵜ ⵓ ⵏⴻⵛⵛ ⴰⴷ ⴽⴻⵏⵏⵉⵡ ⴽⵙⵉⵖ, ⴰⴷ ⴽⴻⵏⵏⵉⵡ ⴰⵔⴱⵓⵖ ⵓ ⴰⴷ ⴽⴻⵏⵏⵉⵡ ⵙⵙⵏⴻⵊⵎⴻⵖ.”
5 “ⴰⴽ-ⴷ ⵎⴰⵏ ⵡⴻⵏ ⵜⴻⵅⵙⴻⵎ ⴰⴷ ⴰⵢⵉ ⵜⴻⵙⵙⴻⵎⵇⵓⴷⴷⴰⵎ, ⵓ ⵎⴰⵏ ⵡⴻⵏ ⵜⴻⵅⵙⴻⵎ ⴰⴽⵉⴷⵉ ⵜᵉⵙⵙⴻⴽⴽⵡⵉⵎ ⵎⴰⵃⴻⵏⴷ ⴰⴷ ⵏⴻⵎⵔⴰⵡⴰⵙ? ■ 6 ⵜⵜⴼⴰⵔⵔⴰⵖⴻⵏ ⵏⵉⵜⵏⵉ ⵓⵔⴻⵖ ⵣⵉ ⵜⴻⵛⵢⴰⵔⵜ ⵓ ⵡⴻⵣⵣⵏⴻⵏ ⵏⵏⵓⵇⴰⵔⵜ ⵅ ⵍⵎⵉⵣⴰⵏ. ⵜⵜⵅⴻⴵⵚⴻⵏ ⵉⵊⵊ ⵏ ⵡⴻⵎⵣⵉⵍ ⵏ ⵡⵓⵔⴻⵖ, ⵎⴰⵃⴻⵏⴷ ⵏⴻⵜⵜⴰ ⴰⴷ ⵣⵣⴰⵢⴻⵙ ⵉⴳⴳ ⵉⵊⵊ ⵏ ⴰⵔⴻⴱⴱⵉ. ⵙⴻⵊⵊⴰⴷⴻⵏ, ⵡⴰⵀ, ⴱⴻⵏⴷⵇⴻⵏ ⴰⵙ. 7 ⴰⵔⴻⴱⴱⵓⵏ ⵜ ⵅ ⵜⴻⵖⵔⵓⴹⵜ, ⴽⴻⵙⵙⵉⵏ ⵜ ⴷⴰ ⴷ ⴷⵉⵀⴰ, ⵅⴻⵏⵏⵉ ⵙⵙⴱⴻⴷⴷⴰⵏ ⵜ ⴷⴻⴳ ⵡⴻⵎⵛⴰⵏ ⵏⵏⴻⵙ. ⴷⵉⵏⵏⵉ ⵉⵜⵜⵖⵉⵎⴰ ⵉⴱⴻⴷⴷ, ⵡⴰⵔ ⵉⵜⵜⴻⵏⵀⵉⵣⵣⵉ ⵙⵙⴻⵏⵏⵉ. ⵡⴰⵀ, ⵎⴰⵍⴰ ⵃⴻⴷ ⵉⵍⴰⵖⴰ ⴰⵙ, ⵡⴰⵔ ⴷⴷ-ⵉⵜⵜⴰⵔⵔⵉ, ⵡⴰⵔ ⵜ ⵉⵙⵙⴻⵏⵊⴰⵎ ⵣⵉ ⵍⴻⵃⵚⴰⵔⴻⵜ ⵏⵏⴻⵙ.” ■
8 “ⵄⴻⵇⵍⴻⵎ ⵅ ⵎⴰⵏ ⴰⵢⴰ, ⴷⴻⵡⵍⴻⵎ ⵖⴰⵔ ⵍⴱⴰⵍ ⵏⵡⴻⵎ, ⴽⵙⵉⵎ ⵜ ⵖⴰⵔ ⵡⵓⵍ, ⴰ ⴽⴻⵏⵏⵉⵡ ⵉⵏⵏⵉ ⵉⵜⵜⵄⴻⴷⴷⴰⵏ! 9 ⵄⴻⵇⵍⴻⵎ ⵅ ⵜⵎⴻⵙⵍⴰⵢⵉⵏ ⵜⵉⵎⴻⵣⵡⵓⵔⴰ ⵣⴻⴳ ⵡⴻⵛⵃⴰⵍ ⵓⵢⴰ: ⴰⵇⴰ ⵏⴻⵛⵛ ⴷ ⴰⵔⴻⴱⴱⵉ: ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵏ ⴰⵔⴻⴱⴱⵉ ⵏⵏⴻⵖⵏⵉ, ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⴵⵉ ⴰⵎ ⵏⴻⵛⵛ, ■ 10 ⵡⴻⵏⵏⵉ ⵉⴱⴰⵔⵔⵃⴻⵏ ⵣⴻⴳ ⵓⵎⴻⵣⵡⴰⵔ ⵎⵉⵏ ⵖⴰ ⵢⵉⵍⵉ ⵖⴰⵔ ⵓⵏⴻⴳⴳⴰⵔ, ⵓⵍⴰ ⵣⴻⴳ ⵡⴻⵛⵃⴰⵍ ⵓⵢⴰ ⵎⵉⵏ ⵡⴰⵔ ⵉⵎⵙⴰⵔⴻⵏ ⵄⴰⴷ, ⵡⴻⵏⵏⵉ ⵉⵇⵇⴰⵔⴻⵏ: ‘ⴰⵅⴰⵔⵔⴻⵚ ⵉⵏⵓ ⵢⴰⵔⵛⴻⵎ, ⴰⴷ ⴳⴳⴻⵖ ⵎⴰⵔⵔⴰ ⴰⵔⴹⴰ ⵉⵏⵓ!’, ■ 11 ⵡⴻⵏⵏⵉ ⵉⵍⴰⵖⴰⵏ ⴰⵊⴹⵉⴹ ⵉⵜⵜⴽⴻⵛⵛⴰⴹⴻⵏ ⵣⵉ ⵛⵛⴰⵔⵇ, ⴰⵔⵢⴰⵣ ⵏ ⵓⵅⴰⵔⵔⴻⵚ ⵏⵏⴻⵙ ⵣⵉ ⵜⴻⵎⵎⵓⵔⵜ ⵉⴳⴳⵯⴻⵊⴻⵏ. ⵡⴰⵀ, ⴰⵎ ⵎⴰⵎⵎⴻⵛ ⵙⵙⵉⵡⵍⴻⵖ, ⴰⵎⵎⵓ ⵉ ⵜⵜ ⵖⴰ ⴳⴳⴻⵖ ⴰⴷ ⴷⴷ-ⵢⴰⵙ, ⵏⴻⵛⵛ ⵙⵙⵡⴻⵊⴷⴻⵖ ⵜⵜ, ⴰⴷ ⵜⵜ ⴳⴳⴻⵖ.”
12 “ⵙⵍⴻⵎ ⵖⴰⵔⵉ, ⴽⴻⵏⵏⵉⵡ ⴰⵢⵜ ⵏ ⴱⵓ-ⵚⵚⵓⵍⵟⴰ, ⵉⵏⵏⵉ ⵉⴳⴳⵯⴻⵊⴻⵏ ⵅ ⵜⵙⴻⴳⴷⴰ! 13 ⴰⴷ ⴷⴷ-ⵙⵙⵇⴰⵔⵔⴱⴻⵖ ⵜⴰⵙⴻⴳⴷⴰ ⵉⵏⵓ, ⴰⵇⴰ ⵡⴰⵔ ⵜᵉⵜⵜⴻⴳⴳⵯⵉⵊ, ⵡⴰⵔ ⵉⵜⵜⵄⴻⵟⵟⵉⵍ ⵓⵙⴻⵏⵊⴻⵎ ⵉⵏⵓ. ⴰⴷ ⴰⵡⵢⴻⵖ ⴰⵙⴻⵏⵊⴻⵎ ⴷⵉ ⵚⵉⵀⵢⵓⵏ, ⴰⴷ ⵡⵛⴻⵖ ⴰⵄⵓⴵⵉ ⵉⵏⵓ ⵉ ⵉⵙⵔⴰⵉⵍ.”