ⵉⵛⴰⵄⵢⴰ 12

ⵉⵥⵍⵉ ⵏ ⵓⵚⴻⴱⴱⴻⵃ ⵥⵉ ⵚⵉⵀⵢⵓⵏ

1 “ⴷⴻⴳ ⵡⴰⵙⵙ ⵏⵏⵉ ⴰⴷ ⵜⵉⵏⵉⴷ: ‘ⵏⴻⵛⵛ ⵜⵜⵇⴰⴷⵉⵖ ⵛⴻⴽ, ⴰ ⵙⵉⴷⵉ, ⴰⵇⴰ ⵜⵓⵖⴰ ⵛⴻⴽ ⵜⵅⴻⵢⵢⵇⴻⴷ ⵅⴰⴼⵉ, ⵎⴰⵛⴰ ⴰⵖⴹⴰⴱ ⵏⵏⴻⴽ ⵉⵏⵏⴻⵇⵍⴻⴱ ⵓ ⵛⴻⴽ ⵜⴻⵙⵙⴼⴻⵡⵡⴰⵊⴻⴷ ⵅⴰⴼⵉ. 2 ⵅⵥⴰⵔ, ⴰⵔⴻⴱⴱⵉ ⴷ ⴰⵙⴻⵏⵊⴻⵎ ⵉⵏⵓ, ⵏⴻⵛⵛ ⴰⴷ ⵅⴰⵙ ⵜⵜⴻⵛⵍⴻⵖ, ⵄⴻⵎⵎⴰⵔⵚ ⴰⴷ ⴳⴳⵯⴻⴷⴻⵖ, ⵎⴰⵖⴰⵔ ⵙⵉⴷⵉ, ⵙⵉⴷⵉ, ⴰⵇⴰ-ⵜ ⴷ ⵊⵊⴻⵀⴷ ⴷ ⵓⵥⴻⵀⵀⵉⴷ ⵉⵏⵓ, ⵏⴻⵜⵜⴰ ⵉⴷⵡⴻⵍ ⴰⵢⵉ ⴷ ⴰⵙⴻⵏⵊⴻⵎ.’ 3 ⴽⴻⵏⵏⵉⵡ ⴰⴷ ⵜⴰⵢⵎⴻⵎ ⴰⵎⴰⵏ ⵙ ⵍⴻⴼⵔⴰⵃⴻⵜ ⵥⵉ ⵜⴰⵍⴰⵡⵉⵏ ⵏ ⵓⵙⴻⵏⵊⴻⵎ.”   

4 “ⴷⴻⴳ ⵡⴰⵙⵙ ⵏⵏⵉ ⴰⴷ ⵜⵉⵏⵉⵎ: ‘ⵇⴰⴷⴰⵎ ⵉ ⵙⵉⴷⵉ, ⵍⴰⵖⴰⵎ ⵉⵙⴻⵎ ⵏⵏⴻⵙ, ⵙⴻⵛⵏⴻⵎ ⵜⵉⵎⴻⴳⴳⴰ ⵏⵏⴻⵙ ⵊⴰⵔ ⵍⴻⴳⵏⵓⵙ, ⴱⴰⵔⵔⵃⴻⵎ ⴰⵇⴰ ⵉⵙⴻⵎ ⵏⵏⴻⵙ ⵉⵄⵓⴵⴰ!    5 ⵣⴻⵀⵀⴷⴻⵎ ⵉ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⵉⴳⴳⴰ ⵜⵉⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ. ⴻⵊⵊ ⴰⵢⴰ ⴰⴷ ⵉⵜⵜⵡⴰⵙⵙⴻⵏ ⴷⵉ ⵎⴰⵔⵔⴰ ⵜⴰⵎⵎⵓⵔⵜ. 6 ⵙⵍⵉⵡⵍⴻⵡ ⵓ ⵖⴻⵏⵏⴻⵊ, ⴰ ⵛⴻⵎ ⵜⴻⵏⵏⵉ ⵉⵥⴻⴷⴷⵖⴻⵏ ⴷⵉ ⵚⵉⵀⵢⵓⵏ, ⵎⵉⵏⵥⵉ ⴷ ⴰⵎⴻⵇⵇⵔⴰⵏ ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ ⴷⵉ ⵍⵡⴻⵙⵜ ⵏⵏⴻⵎ.’ ”