ⵜⵉⵖⵉⵜ ⵜⴻⵟⵟⴰⵄ
8
1 ⵡⵉ ⵉⴵⴰⵏ ⴰⵎ ⵓⵎⵉⵖⵉⵙ ⵓ ⵡⵉ ⵉⵙⵙⵏⴻⵏ ⴰⴷ ⵉⴼⴻⴽⴽ ⵉⵛⵜ ⵏ ⵜⵎⴻⵙⵍⴰⵛⵜ? ⵜⵉⵖⵉⵜ ⵏ ⴱⵏⴰⴷⴻⵎ ⵜᵉⵜⵜⴰⵔⵔⴰ ⴰⵖⴻⵎⴱⵓⴱ ⵏⵏⴻⵙ ⵉⵜⵜⵏⴻⵡⵡⴰⵔ ⵓⵛⴰ ⵜⴱⴻⴷⴷⴻⵍ ⵜⵉⴼⵔⴰⵙ ⵏ ⵍⴻⵇⵙⴻⵃ ⵏ ⵓⵖⴻⵎⴱⵓⴱ ⵏⵏⴻⵙ. 2 ⵏⴻⵛⵛ ⵇⵇⴰⵔⴻⵖ: “ⵃⴹⴰ ⴰⴹⴻⴱⴱⴰⵔ ⵏ ⵓⵊⴻⴵⵉⴷ!” ⵓ ⵎⴰⵏ ⴰⵢⴰ ⴷⵉ ⵙⵙⵉⴱⴱⴻⵜ ⵏ ⵜⵊⴰⴵⵉⵜ ⵏ ⴰⵔⴻⴱⴱⵉ. ■ 3 ⵡⴰⵔ ⵜⵜⵉⴳⴳⵯⵉⵊ ⵙ ⵜⴰⵣⵍⴰ ⵅ ⵡⵓⴷⴻⵎ ⵏⵏⴻⵙ, ⵡⴰⵔ ⵜⵜⴻⴳⴳ ⴰⵣⴻⴵⵉⴼ ⵏⵏⴻⵛ ⴷⵉ ⵜⵎⴻⵙⵍⴰⵛⵜ ⵜⴰⵄⴻⴼⴼⴰⵏⵜ, ⵎⴰⵖⴰⵔ ⵏⴻⵜⵜⴰ ⵉⴳⴳⴰ ⵎⴰⵔⵔⴰ ⵎⵉⵏ ⵅⴻⴼ ⵢⴰⵔⴹⴰ. 4 ⴰⵡⴰⵍ ⵏ ⵓⵊⴻⴵⵉⴷ ⴷⴰⵢⴻⵙ ⵚⵚⵓⵍⵟⴰ ⵜⴻⵎⵖⴰⵔ. ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⴰⵙ ⵢⵉⵏⵉ: “ⵎⵉⵏ ⵜᵉⵜⵜⴻⴳⴳⴻⴷ ⵛⴻⴽ?” 5 ⵡⴻⵏⵏⵉ ⵉⵃⴻⵟⵟⴰⵏ ⵜⴰⵡⵚⴻⵢⵢⴻⵜ, ⵡⴰⵔ ⵜ ⵉⵍⴻⵇⵇⴻⴼ ⵡⴰⵍⵓ ⵏ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ. ⵓⵍ ⵏ ⵓⵎⵉⵖⵉⵙ ⵉⵙⵙⴻⵏ ⵍⵃⴰⵍ ⴷ ⵍⵃⵓⴽⵎ. ■ 6 ⵎⴰⵖⴰⵔ ⵉ ⴽⵓⵍ ⴰⵏⵡⴰⵢ ⵉⵊⵊ ⵏ ⵍⵃⴰⵍ ⴷ ⵉⵊⵊ ⵏ ⵍⵃⵓⴽⵎ, ⵎⴰⵖⴰⵔ ⵜⵓⵄⴻⴼⴼⵏⴰ ⵏ ⴱⵏⴰⴷⴻⵎ ⵜⴻⵙⵙⴻⴷⵇⴰⵍ ⵉ-ⵜ.
7 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵙⵙⵉⵏ ⵎⵉⵏ ⵖⴰ ⵉⵎⵙⴰⵔⴻⵏ, ⵎⴰⵖⴰⵔ ⵎⴰⵏ ⵡⴻⵏ ⵉ ⴷ ⴰⵙ ⵜ ⵉ ⵖⴰ ⵉⵙⵙⵛⵏⴻⵏ ⵎⴰⵎⵎⴻⵛ ⵖⴰ ⵢⵉⵍⵉ ⴰⵢⴰ? ■ 8 ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵉⵣⴻⵎⵎⴰⵔ ⵅ ⵓⵙⵓⴹⵉ ⵏ ⵓⵙⴻⵎⵎⵉⴹ ⴰⵍⴰⵎⵉ ⵉⵣⴻⵎⵎⴰⵔ ⴰⴷ ⵅⴰⵙ ⵉⴱⴻⵍⵍⴻⵄ. ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵖⴰⵔⴻⵙ ⵚⵚⵓⵍⵟⴰ ⵅ ⵡⴰⵙⵙ ⵏ ⵍⵎⴻⵡⵜ, ⵓ ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵉⵣⴻⵎⵎⴰⵔ ⴰⴷ ⵉⴽⵙⵉ ⵜⵜⴻⵙⵔⵉⵃ ⴷⴻⴳ ⵓⵎⴻⵏⵖⵉ, ⵓ ⵜⵓⵄⴻⴼⴼⵏⴰ ⵡⴰⵔ ⵜⴻⵊⵊⵉ ⴰⴷ ⵏⴻⵊⵎⴻⵏ ⴰⵢⵜⴱⴰⴱ ⵏⵏⴻⵙ. ■ 9 ⵎⴰⵔⵔⴰ ⴰⵢⴰ ⵥⵔⵉⵖ ⵜ, ⵓⵎⵉ ⵙⵙⴻⵏⵇⴻⵍⴱⴻⵖ ⵓⵍ ⵉⵏⵓ ⵖⴰⵔ ⵎⴰⵔⵔⴰ ⵎⵉⵏ ⵉⵜⵜⵡⴰⴳⴳⴻⵏ ⵙⴰⴷⵓ ⵜⴼⵓⵛⵜ, ⴷⵉ ⵍⵡⴻⵇⵜ ⵍⴰⵎⵉ ⵉⵚⴻⵍⵍⴻⵟ ⴱⵏⴰⴷⴻⵎ ⵅ ⴱⵏⴰⴷⴻⵎ ⵏⵏⴻⵖⵏⵉ ⵉ ⴷⵔⵓⵛⵜ ⵏⵏⴻⵙ.
ⵜⴰⵙⴻⴳⴷⴰ ⵏ ⴰⵔⴻⴱⴱⵉ ⴰⵇⴰ-ⵜⵜ ⵜⵏⵓⴼⴼⴰⵔ
10 ⴰⵎⵎⵓ ⵉ ⵥⵔⵉⵖ ⵉⵄⴻⴼⴼⴰⵏⴻⵏ ⵏⵏⵉ ⵜⵓⵖⴰ ⵉⵜⵜⵡⴰⵏⴻⴹⵍⴻⵏ, ⵓⴷⴼⴻⵏ ⵖⴰⵔ ⵡⴻⵏⴹⴻⵍ, ⵓⵎⵉ ⵢⵉⵏⵏⵉ ⵉⴳⴳⵉⵏ ⵎⵉⵏ ⵉⴵⴰⵏ ⵏⵉⵛⴰⵏ ⴼⴼⵖⴻⵏ ⵣⴻⴳ ⵡⴻⵎⵛⴰⵏ ⴰⵎⵇⴻⴷⴷⴰⵙ, ⵜⵜⵡⴰⵜⵜⵓⵏ ⴷⵉ ⵜⴻⵏⴷⵉⵏⵜ. ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ. 11 ⵎⴰⵖⴰⵔ ⵍⵃⵓⴽⵎ ⵅ ⵜⵄⴻⴼⴼⴰⵏⵜ ⵡⴰⵔ ⵉⵜⵜⵡⴰⴳⴳ ⴷⴻⵖⵢⴰ, ⵅ ⵓⵢⴰ ⵉⵛⵛⵓⵔ ⵡⵓⵍ ⵏ ⵜⴰⵔⵡⴰ ⵏ ⴱⵏⴰⴷⴻⵎ ⵎⴰⵃⴻⵏⴷ ⴰⴷ ⴳⴳⴻⵏ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ. 12 ⵡⴰⵅⵅⴰ ⴰⵎⴻⴷⵏⵓⴱ ⵉⵜⵜⴻⴳⴳ ⵜⴰⵄⴻⴼⴼⴰⵏⵜ ⵎⵢⴰ ⵏ ⵜⵡⴰⵍⴰⵡⵉⵏ ⵓ ⵉⴷⴷⴰⵔ ⴰⵟⵟⴰⵙ, ⵡⴰⵅⵅⴰ ⴰⵎⴻⵏⵏⵉ ⵙⵙⵏⴻⵖ ⴰⵇⴰ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⴰⵔⴻⴱⴱⵉ ⴰⴷ ⴼⴻⵍⵃⴻⵏ, ⵉⵏⵏⵉ ⵣⵣⴰⵢⴻⵙ ⵉⵜⵜⴻⴳⴳⵯⴻⴷⴻⵏ. ■ 13 ⴰⵄⴻⴼⴼⴰⵏ ⵎⴰⵛⴰ ⵡⴰⵔ ⵉⵜⵜⵉⵍⵉ ⵎⵍⵉⵃ ⵓ ⵡⴰⵔ ⵖⴰⵔⴻⵙ ⵜᵉⵜⵜⵉⵍⵉ ⵜⵓⴷⴰⵔⵜ ⴷ ⵜⴰⵣⵉⵔⴰⵔⵜ. ⵏⴻⵜⵜⴰ ⴰⴷ ⵢⵉⵍⵉ ⴰⵎ ⵜⵉⵍⵉ, ⵎⴰⵖⴰⵔ ⵡⴰⵔ ⵉⵜⵜⴻⴳⴳⵯⴻⴷ ⴰⵔⴻⴱⴱⵉ.
14 ⴰⵇⴰ ⴷⵉⵏ ⵛⴰ ⵎⵉⵏ ⵉⵜⵜⵡⴰⴳⴳⴻⵏ ⵅ ⵜⴻⵎⵎⵓⵔⵜ ⵏⵏⵉ ⵉⴵⴰⵏ ⴷⵉ ⵍⴱⴰⵟⴻⵍ: ⴰⵇⴰ ⴷⵉⵏ ⵉⵎⵙⴻⴳⴳⴰⴷⴻⵏ ⵉⵜⵜⴻⵎⵎⵙⴰⵔ ⴰⵙⴻⵏ ⴰⵅⵎⵉ ⵜⵜⴻⴳⴳⴻⵏ ⴰⵎ ⵢⵉⵄⴻⴼⴼⴰⵏⴻⵏ, ⵓ ⴰⵇⴰ ⴷⵉⵏ ⵉⵄⴻⴼⴼⴰⵏⴻⵏ ⵉⵜⵜⴻⵎⵙⴰⵔ ⴰⵙⴻⵏ ⴰⵅⵎⵉ ⵜⵜⴻⴳⴳⴻⵏ ⵜⴰⵙⴻⴳⴷⴰ. ⵏⴻⵛⵛ ⵏⵏⵉⵖ: ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ. 15 ⵙ ⵓⵢⴻⵏⵏⵉ ⵉ ⵜⵜⵚⴻⴱⴱⴰⵃⴻⵖ ⵍⴻⴼⵔⴰⵃⴻⵜ, ⵎⴰⵖⴰⵔ ⵡⴰⵔ ⴷⵉⵏ ⵉⴵⵉ ⵉ ⴱⵏⴰⴷⴻⵎ ⵎⵉⵏ ⵉⴵⴰⵏ ⵃⵙⴻⵏ ⴷⵉ ⵜⵓⴷⴰⵔⵜ ⵏⵏⴻⵙ ⵙⴰⴷⵓ ⵜⴼⵓⵛⵜ ⵎⵖⵉⵔ ⵎⴰⵍⴰ ⵏⴻⵜⵜⴰ ⵉⵜⵜⴻⵜⵜ, ⵉⵙⴻⵙⵙ ⵓ ⵉⴼⴰⵔⵔⴻⵃ. ⵉⵍⵉ ⴰⵢⴰ ⴰⴷ ⵜ ⵉⵄⴰⵛⴰⵔ ⴷⴻⴳ ⵓⵎⴰⵔⵔⴻⵜ ⵏⵏⴻⵙ ⴷⵉ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⵉ ⴷ ⴰⵙ ⵢⴰⵔⵣⴻⴼ ⴰⵔⴻⴱⴱⵉ ⵙⴰⴷⵓ ⵜⴼⵓⵛⵜ. ■
16 ⵓⵎⵉ ⵜⵓⵖⴰ ⴳⴳⵉⵖ ⵓⵍ ⵉⵏⵓ ⵎⴰⵃⴻⵏⴷ ⴰⴷ ⵙⵙⵏⴻⵖ ⵜⵉⵖⵉⵜ ⵓ ⵎⴰⵃⴻⵏⴷ ⴰⴷ ⵅⵣⴰⵔⴻⵖ ⵎⴰⵏ ⵜⴰⵙⴻⴱⴱⴰⴱⵜ ⵉ ⵉⴳⴳⵓⵔⴻⵏ ⵅ ⵜⴻⵎⵎⵓⵔⵜ - ⵎⴰⵖⴰⵔ ⴰⵎ ⵙ ⵡⴰⵙⵙ ⴰⵎ ⵙ ⴵⵉⵍⴻⵜ ⴱⵏⴰⴷⴻⵎ ⵡⴰⵔ ⵉⵜⵜⵉⵛ ⵛⴰ ⴰⵔⵔⴰⵃⴻⵜ ⵉ ⵜⵉⵟⵟⴰⵡⵉⵏ ⵏⵏⴻⵙ - 17 ⵥⵔⵉⵖ ⵎⴰⵔⵔⴰ ⵎⵉⵏ ⵉⴳⴳⴰ ⴰⵔⴻⴱⴱⵉ, ⴰⵇⴰ ⴱⵏⴰⴷⴻⵎ ⵡⴰⵔ ⵉⵣⴻⵎⵎⴰⵔ ⴰⴷ ⵢⴰⴼ ⵎⵉⵏ ⵉⵜⵜⵡⴰⴳⴳⴻⵏ, ⵉⵅⵙ ⴰⴷ ⵢⵉⵏⵉ ⵎⵉⵏ ⵉⵜⵜⵡⴰⴳⴳⴻⵏ ⵙⴰⴷⵓ ⵜⴼⵓⵛⵜ. ⵎⴰⵖⴰⵔ ⵎⴰⵎⵎⴻⵛ ⵉ ⵖⴰ ⵉⵎⴰⵔⵔⴻⵜ ⴱⵏⴰⴷⴻⵎ ⴰⵎ ⵢⴰⵔⴻⵣⵣⵓ, ⵡⴰⵔ ⵉⵜⵜⵉⴼ ⵡⴰⵍⵓ. ⵡⴰⵅⵅⴰ ⴰⵎⵉⵖⵉⵙ ⴰⴷ ⵢⵉⵏⵉ ⴱⴻⵍⵍⵉ ⵏⴻⵜⵜⴰ ⵉⵙⵙⴻⵏ, ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⵎⴰⵛⴰ ⴰⴷ ⵜ ⵢⴰⴼ.