ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⴰⵊⵓⵔ
30
1 ⴰⵡⴰⵍⴻⵏ ⵏ ⴰⵊⵓⵔ, ⵎⵎⵉⵙ ⵏ ⵢⴰⴽⵉ, ⵣⵉ ⵜⴻⵇⴱⵉⵍⵜ ⵏ ⵎⴰⵙⵙⴰ.
ⵏⴻⵛⵛ ⴰⵔⴱⴻⵍⴻⵖ, ⴰ ⴰⵔⴻⴱⴱⵉ,
ⵏⴻⵛⵛ ⴰⵔⴱⴻⵍⴻⵖ, ⴰ ⴰⵔⴻⴱⴱⵉ, ⵓ ⴽⴻⵎⵎⵍⴻⵖ.
2 ⵎⴰⵖⴰⵔ ⵏⴻⵛⵛ ⴷ ⴰⵇⴻⴼⴼⵓⵃ, ⵡⴰⵔ ⵉⴵⵉ ⴷ ⴱⵏⴰⴷⴻⵎ,
ⵍⴻⴼⵀⴰⵎⴻⵜ ⵏ ⴱⵏⴰⴷⴻⵎ ⵡⴰⵔ ⵖⴰⵔⵉ ⵜⴻⴵⵉ.
3 ⵏⴻⵛⵛ ⵡⴰⵔ ⵍⵎⵉⴷⴻⵖ ⵜⵉⵖⵉⵜ,
ⵎⴰⵃⴻⵏⴷ ⴰⴷ ⵖⴰⵔⵉ ⵜⵉⵍⵉ ⵜⵓⵙⵙⵏⴰ
ⵏ ⵓⵎⵇⴻⴷⴷⴰⵙ ⴰⵎⴻⵇⵇⵔⴰⵏ.
4 ⵡⵉ ⵉⴳⴻⵄⵄⴷⴻⵏ ⵖⴰⵔ ⵓⵊⴻⵏⵏⴰ ⵓⵛⴰ ⵉⵀⵡⴰ-ⴷⴷ?
ⵎⴰⵏ ⵡⴻⵏ ⵉⵢⴰⵔⵔⵡⴻⵏ ⴰⵙⴻⵎⵎⵉⴹ
ⴷⴻⴳ ⵉⴼⴰⵙⵙⴻⵏ ⵏⵏⴻⵙ?
ⵡⵉ ⵉⵙⵙⴻⵏⵏⴹⴻⵏ ⴰⵎⴰⵏ ⴷⴻⴳ ⵡⴰⵔⵔⵓⴹ?
ⵡⵉ ⵢⴰⵔⴻⴽⴽⵏⴻⵏ
ⵎⴰⵔⵔⴰ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ?
ⵎⴰⵏ ⵉⵙⴻⵎ ⵏⵏⴻⵙ ⵓ ⵎⴰⵏ ⵉⵙⴻⵎ ⵏ ⵎⵎⵉⵙ?
ⵛⴻⴽ ⵜⴻⵙⵙⵏⴻⴷ ⵜ, ⵎⴰ ⵡⴰⵔ ⵉⴵⵉ ⴰⵎⴻⵏⵏⵉ? ■
5 ⴽⵓⵍ ⴰⵡⴰⵍ ⵏ ⴰⵔⴻⴱⴱⵉ ⵉⵜⵜⵡⴰⵚⴻⴼⴼⴰ,
ⴰⵇⴰ ⵏⴻⵜⵜⴰ ⴷ ⴰⴷⵓⵔⵔⵉ
ⵉ ⵢⵉⵏⵏⵉ ⵖⴰⵔⴻⵙ ⴷⴷ-ⵢⴰⵔⴻⴽⴽⵡⴰⵍⴻⵏ. ■
6 ⵡⴰⵔ ⴰⵔⴻⵏⵏⵉ ⵖⴰⵔ ⵡⴰⵡⴰⵍⴻⵏ ⵏⵏⴻⵙ,
ⵃⵉⵎⴰ ⵏⴻⵜⵜⴰ ⵡⴰⵔ ⵛⴻⴽ ⵉⵜⵜⵡⴻⴱⴱⴻⵅ,
ⵓ ⴰⴷ ⵜⴱⴰⵏⴻⴷ-ⴷⴷ ⵛⴻⴽ ⴷ ⴱⵓ-ⵉⵅⴰⵔⵔⵉⵇⴻⵏ. ■
7 ⵏⴻⵛⵛ ⵜⵜⴰⵔⴻⵖ ⴰⵛ ⵜⵏⴰⵢⴻⵏ ⵏ ⵜⵎⴻⵙⵍⴰⵢⵉⵏ,
ⵡⴰⵔ ⵅⴰⴼⵉ ⵜⴻⵏⵜ ⵇⴻⵟⵟⴻⵄ ⵇⴱⴻⵍ ⵉ ⵖⴰ ⵎⵎⵜⴻⵖ.
8 ⵙⵉⴳⴳⵯⴻⵊ ⵅⴰⴼⵉ ⵎⵉⵏ ⵉⴱⴻⴹⵍⴻⵏ
ⴷ ⵍⵀⴰⵔⴹ ⵉⵅⴰⵔⵔⵉⵇⴻⵏ,
ⵡⴰⵔ ⴷ ⴰⵢⵉ ⵜⵜⵉⵛ ⵣⵣⴻⵍⴹ ⵓⵍⴰ ⴷ ⵡⴰⴳⵍⴰ,
ⵛⴰⵔⵔⴻⴳ ⴰⵢⵉ ⵜⴰⵙⵖⴰⵔⵜ ⵉⵏⵓ
ⵉ ⴷ ⴰⵢⵉ ⴷⴷ-ⵉⵜⵜⴰⵙⴻⵏ ⵣⴻⴳ ⵡⴻⵖⵔⵓⵎ,
9 ⵎⴰⵍⴰ ⵍⵍⴰ, ⵅⵎⵉ ⵖⴰ ⵊⵊⵉⵡⵏⴻⵖ,
ⴰⴷ ⵜⴰⵖ ⴰⴷ ⵛⴻⴽ ⵏⴽⴰⵔⴻⵖ,
ⴰⴷ ⵉⵏⵉⵖ ‘ⵡⵉ ⵉⴵⴰⵏ ⵙⵉⴷⵉ?’,
ⵏⵉⵖ ⵅⴻⵏⵏⵉ, ⵎⴰⵍⴰ ⵣⴻⵍⴹⴻⵖ, ⴰⴷ ⴰⵛⴰⵔⴻⵖ,
ⵓ ⴰⴷ ⴳⴳⴻⵖ ⵍⵄⵉⴱ ⴷⴻⴳ ⵢⵉⵙⴻⵎ ⵏ ⴰⵔⴻⴱⴱⵉ ⵉⵏⵓ.
10 ⵡⴰⵔ ⵛⴻⵇⵇⴻⴼ ⴷⴻⴳ ⵉⵊⵊ ⵏ ⵓⵎⵙⴻⵅⵅⴰⵔ
ⵖⴰⵔ ⵙⵉⴷⵉⵙ ⵏⵏⴻⵙ,
ⵃⵉⵎⴰ ⵏⴻⵜⵜⴰ ⵡⴰⵔ ⵛⴻⴽ ⵉⵏⴻⵄⵄⴻⵍ
ⵓ ⵅⴻⵏⵏⵉ ⵛⴻⴽ ⴰⴷ ⴷⴰⵢⴻⴽ ⵢⵉⵍⵉ ⵍⵄⵉⴱ.
11 ⴰⵇⴰ ⴷⵉⵏ ⵉⵊⵊ ⵏ ⵊⵊⵉⵍ ⵉ ⵉⵏⴻⵄⵄⵍⴻⵏ ⴱⴰⴱⴰⵙ,
ⵓ ⵡⴰⵔ ⵉⵜⵜⴱⴰⵔⴻⴽ ⵢⴻⵎⵎⴰⵙ,
12 ⵉⵊⵊ ⵏ ⵊⵊⵉⵍ ⵉ ⵢⴻⴵⴰⵏ ⴷ ⴰⵎⴻⵣⴷⴰⴳ
ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⵎⴰⵛⴰ ⵡⴰⵔ ⵉⵜⵜⵡⴰⵙⵉⵔⴷ ⵣⵉ ⵍⴻⵅⵎⴻⵊ ⵏⵏⴻⵙ,
13 ⵉⵊⵊ ⵏ ⵊⵊⵉⵍ ⵙ ⵍⵅⴻⵣⵔⴰⵜ ⵉⵏⴻⴼⵅⴻⵏ,
ⵙ ⵡⴰⴱⵍⵉⵡⴻⵏ ⵏⵏⴻⵙ ⵉⴳⴻⵄⵄⴷⴻⵏ, ■
14 ⵉⵊⵊ ⵏ ⵊⵊⵉⵍ ⵙ ⵜⴻⵖⵎⴰⵙ ⴰⵎ ⵍⴻⵙⵢⵓⴼ
ⴷ ⵜⴻⵖⵎⴰⵙ ⵏ ⵜⴻⵖⵎⴰⵔⵜ ⴰⵎ ⵍⴻⵎⵡⴰⵙ,
ⵃⵉⵎⴰ ⴰⴷ ⵚⴰⵔⴹⴻⵏ
ⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵣⵉ ⵜⴻⵎⵎⵓⵔⵜ
ⴷ ⵉⵎⴻⵣⵍⴰⴹ ⵣⴻⴳ ⵉⵡⴷⴰⵏ. ■
15 ⵜⴰⴷⴷⴰ ⵖⴰⵔⴻⵙ ⵜⵏⴰⵢⴻⵏ ⵏ ⵢⴻⵙⵙⵉⵙ:
‘ⴻⵡⵛ!’ ‘ⴻⵡⵛ!’
ⴰⵇⴰ ⴷⵉⵏ ⵜⵍⴰⵜⴰ ⵏⵏⵉ ⵄⴻⵎⵎⴰⵔⵚ ⴰⴷ ⵊⵊⵉⵡⵏⴻⵏ.
ⴰⵔⴻⴱⵄⴰ ⵄⴻⵎⵎⴰⵔⵚ ⴰⴷ ⵉⵏⵉⵏ: “ⵛⴼⴰ!”
16 ⵍⴰⵅⴰⵔⵜ ⴷ ⵍⴻⵎⵍⴰⵡⴻⵜ ⵉⴱⴻⵍⵍⵄⴻⵏ,
ⵜⴰⵎⵎⵓⵔⵜ ⵉ ⵡⴰⵔ ⵉⵊⵊⵉⵡⵏⴻⵏ ⵄⴻⵎⵎⴰⵔⵚ
ⵣⴻⴳ ⵡⴰⵎⴰⵏ,
ⵓⵍⴰ ⴷ ⵜⵎⴻⵙⵙⵉ
ⵡⴰⵔ ⵇⵇⴰⵔⴻⵏⵜ ⵄⴻⵎⵎⴰⵔⵚ: “ⵛⴼⴰ!”
17 ⵜⵉⵟⵟ ⵉ ⵉⵙⵙⵜⴻⵀⵣⴰⵏ ⵣⵉ ⴱⴰⴱⴰⵙ,
ⵓ ⵜⴻⵙⵙⴻⵃⵇⴰⵔ ⵟⵟⴰⵄⴻⵜ ⵉ ⵢⴻⵎⵎⴰⵙ,
ⴰⴷ ⵜⵜ ⵇⴻⵍⵄⴻⵏ ⵉⴱⴰⵖⵍⵉⵡⴻⵏ ⵖⴰⵔ ⵜⴻⵖⵣⴰⵔⵜ,
ⵓ ⵉⵎⴻⵥⵢⴰⵏⴻⵏ ⵏ ⵓⴳⵉⴷⴻⵔ ⴰⴷ ⵜⵜ ⵛⵛⴻⵏ.
18 ⵜⵍⴰⵜⴰ-ⵢⴰ ⵏ ⵜⵎⴻⵙⵍⴰⵢⵉⵏ
ⵄⴷⵓⵏⵜ ⴰⵢⵉ ⵙ ⵍⴻⵄⵊⴻⴱ,
ⴰⵔⴻⴱⵄⴰ ⵡⴰⵔ ⵜⴻⵏⵜ ⵙⵙⵉⵏⴻⵖ:
19 ⴰⴱⵔⵉⴷ ⵏ ⵓⴳⵉⴷⴻⵔ ⴷⴻⴳ ⵓⵊⴻⵏⵏⴰ,
ⴰⴱⵔⵉⴷ ⵏ ⵓⴼⵉⵖⴰⵔ ⵅ ⵜⴻⵚⴹⴰⵔⵜ,
ⴰⴱⵔⵉⴷ ⵏ ⵓⵖⴰⵔⵔⴰⴱⵓ ⴷⴻⴳ ⵡⵓⵍ ⵏ ⵍⴻⴱⵃⴰⵔ,
ⵓ ⴰⴱⵔⵉⴷ ⵏ ⵡⴻⵔⵢⴰⵣ ⴰⴽ-ⴷ ⵜⴻⵄⵣⴰⵔⴻⵛⵜ.
20 ⴰⵎⵎⵓ ⵉ ⵉⵜⵜⴻⴳⴳ
ⴰⴱⵔⵉⴷ ⵏ ⵉⵛⵜ ⵏ ⵜⴻⵎⵖⴰⵔⵜ ⵉⵣⴻⵏⵏⴰⵏ:
ⵏⴻⵜⵜⴰⵜ ⵜᵉⵜⵜⴻⵜⵜ, ⵜⴻⵙⵙⵉⵔⵉⴷ ⴰⵇⴻⵎⵎⵓⵎ ⵏⵏⴻⵙ,
ⵜⴻⵇⵇⴰⵔ: “ⵏⴻⵛⵛ ⵡⴰⵔ ⴳⴳⵉⵖ ⵡⴰⵍⵓ ⴷ ⵍⵖⴻⵛⵛ!”
21 ⵙⴰⴷⵓ ⵜⵍⴰⵜⴰ ⵏ ⵜⵎⴻⵙⵍⴰⵢⵉⵏ-ⴰ
ⵜⴻⵏⵀⴻⵣⵣ ⵜⴻⵎⵎⵓⵔⵜ,
ⵙⴰⴷⵓ ⴰⵔⴻⴱⵄⴰ ⵉ ⵡⴰⵔ ⵜⵣⴻⵎⵎⴰⵔ ⴰⴷ ⵜⴰⵔⴱⵓ:
22 ⵙⴰⴷⵓ ⵉⵊⵊ ⵏ ⵓⵎⵙⴻⵅⵅⴰⵔ
ⵎⴰⵍⴰ ⵏⴻⵜⵜⴰ ⵉⴷⵡⴻⵍ ⴷ ⴰⵊⴻⴵⵉⴷ,
ⵙⴰⴷⵓ ⵉⵊⵊ ⵏ ⵓⴱⵓⵀⴰⵍⵉ
ⵎⴰⵍⴰ ⵏⴻⵜⵜⴰ ⵉⵊⵊⵉⵡⴻⵏ ⴰⵖⵔⵓⵎ,
23 ⵙⴰⴷⵓ ⵉⵛⵜ ⵏ ⵜⴻⵎⵖⴰⵔⵜ ⵜᵉⵜⵜⵡⴰⵙⵙⴻⵃⵇⴰⵔ
ⵎⴰⵍⴰ ⵏⴻⵜⵜⴰⵜ ⵜᵉⵜⵜⵡⴰⵙⵙⴻⵎⵍⴻⵛ,
ⵓ ⵙⴰⴷⵓ ⵉⵛⵜ ⵏ ⵜⴰⵢⵢⴰ
ⵎⴰⵍⴰ ⵜᵉⵟⵟⴻⴼ ⵍⵡⴰⵔⵜ ⵏ ⵍⴰⵍⵍⴰⵙ.
24 ⴰⵔⴻⴱⵄⴰ-ⵢⴰ ⴷ ⵉⵎⴻⵥⵢⴰⵏⴻⵏ ⵇⴰⵄ ⵅ ⵜⴻⵎⵎⵓⵔⵜ,
ⵄⴰⴷ ⵏⵉⵜⵏⵉ ⴷ ⵉⵎⵉⵖⵉⵙⴻⵏ ⵇⴰⵄ:
25 ⵜⵉⴽⴻⴹⴼⵉⵏ ⵡⴰⵔ ⴵⵉⵏⵜ ⴷ ⵍⴳⴻⵏⵙ ⵉⵊⴻⵀⴷⴻⵏ,
ⵎⴰⵛⴰ ⵄⴰⴷ ⵏⵉⵜⴻⵏⵜⵉ ⵙⵙⴻⵡⵊⴰⴷⴻⵏⵜ
ⵎⴰⵛⵛⴰ ⵏⵙⴻⵏ ⴷⴻⴳ ⵓⵏⴻⴱⴷⵓ. ■
26 ⵉⴽⴰⵡⴽⴰⵡⴻⵏ ⵏ ⵜⴻⵚⴹⴰⵔⵜ
ⴷ ⵉⵊⵊ ⵏ ⵍⴳⴻⵏⵙ ⵏⵀⵍⴰ ⵊⵊⵀⴻⴷ,
ⵎⴰⵛⴰ ⵏⵉⵜⵏⵉ ⴱⴻⵏⵏⴰⵏ
ⵜⴰⵣⴻⴷⴷⵉⵖⵜ ⵏⵙⴻⵏ ⵅ ⵜⴻⵚⴹⴰⵔⵜ.
27 ⵜⴰⵎⵓⵖⵔⵉ ⵡⴰⵔ ⵖⴰⵔⴻⵙ ⴱⵓ ⴰⵊⴻⴵⵉⴷ,
ⵡⴰⵅⵅⴰ ⴰⵎⴻⵏⵏⵉ ⵉⴼⴼⴻⵖ ⵙ ⵓⵙⴻⵜⵜⴻⴼ ⵎⴰⵔⵔⴰ.
28 ⴰⵣⴻⵔⵎⵓⵎⵎⵉ ⵜⵣⴻⵎⵎⴰⵔⴻⴷ
ⴰⴷ ⵜ ⵜᵉⵟⵟⴼⴻⴷ ⵙ ⵜⵏⴰⵢⴻⵏ ⵏ ⵉⴼⴰⵙⵙⴻⵏ,
ⵄⴰⴷ ⴰⵇⴰ-ⵜ ⵏⴻⵜⵜⴰ ⴷⵉ ⵍⴻⵇⵚⵓⵔ ⵏ ⵉⵊⴻⴵⵉⴷⴻⵏ.
29 ⵜⵍⴰⵜⴰ-ⵢⴰ ⵚⵚⵓⵔⵓⴼⴻⵏ ⵙ ⵍⵄⴻⵣⵣ,
ⴰⵔⴻⴱⵄⴰ ⴳⴳⵓⵔⴻⵏ ⵙ ⵜⴻⵛⵍⵉ ⵜⴻⵛⵏⴻⵄ:
30 ⴰⵢⵔⴰⴷ, ⴱⵓ-ⵜⴻⵖⵔⵓⴹⵜ ⵊⴰⵔ ⵍⵎⴰⵔ,
ⵡⴻⵏⵏⵉ ⵡⴰⵔ ⵉⵜⵜⵡⴻⵅⵅⵉⵔⴻⵏ ⵣⵣⴰⵜ ⵉ ⵃⴻⴷ,
31 ⵉⵊⵊ ⵏ ⵓⵖⵉⵍⴰⵙ ⵙ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ ⴱⴻⵢⵙⴻⵏⵜ,
ⵏⵉⵖ ⵉⵊⵊ ⵏ ⵓⵎⵢⴰⵏ,
ⵓ ⵉⵊⵊ ⵏ ⵓⵊⴻⴵⵉⴷ ⵏⵏⵉ ⵖⴰⵔ ⵉⴵⴰ
ⵓⵍⴰⵖⵉ ⵏ ⵓⵎⴻⵏⵖⵉ. ■
32 ⵎⴰⵍⴰ ⵛⴻⴽ ⵜⴻⴳⴳⵉⴷ ⵙ ⵜⵓⴱⴱⵓⵀⴻⵍⵢⴰ
ⵓⵎⵉ ⵜⴻⵙⵙⴳⴻⵄⵄⴷⴻⴷ ⵉⵅⴻⴼ ⵏⵏⴻⵛ,
ⵏⵉⵖ ⵜⵅⴻⵎⵎⴻⵎⴻⴷ ⴷⵉ ⵜⴻⵃⵔⴰⵢⵎⴻⵛⵜ:
ⵙⴰⵔⵙ ⴰⴼⵓⵙ ⵅ ⵓⵇⴻⵎⵎⵓⵎ! ■
33 ⵎⴰⵖⴰⵔ ⴰⵙⴻⵏⴷⵓ ⵏ ⵓⵖⵉ ⵉⵜⵜⴰⵡⵉ-ⴷⴷ ⵜⵔⵓⵙⵙⵉ,
ⵓ ⴰⵙⴻⵏⴷⵓ ⵏ ⵡⴻⵏⵣⴰⵔⴻⵏ
ⵉⵜⵜⴰⵡⵉ-ⴷⴷ ⵉⴷⴰⵎⵎⴻⵏ,
ⵓ ⴰⵙⴻⵏⴷⵓ ⵏ ⵓⵅⴻⵢⵢⴻⵇ,
ⵉⵜⵜⴰⵡⵉ-ⴷⴷ ⴰⵎⵛⵓⴱⴱⴻⵛ.