14
1 ⵜⵉⵖⵉⵜ ⵏ ⵜⴻⵎⵖⴰⵔⵉⵏ ⵜⴱⴻⵏⵏⴰ ⵜⴰⴷⴷⴰⵔⵜ ⵏⵏⴻⵙ,
ⵎⴰⵛⴰ ⵜⵓⴱⴱⵓⵀⴻⵍⵢⴰ ⵜⵀⴻⴷⴷⴻⵎ ⵉ-ⵜⵜ
ⵙ ⵉⴼⴰⵙⵙⴻⵏ ⵏⵏⴻⵙ.
2 ⵡⴻⵏⵏⵉ ⵉⴳⴳⵓⵔⴻⵏ ⴷⵉ ⵍⴻⵚⴼⴰⵢⴻⵜ ⵏⵏⴻⵙ,
ⵉⵜⵜⴻⴳⴳⵯⴻⴷ ⵙⵉⴷⵉ,
ⵎⴰⵛⴰ ⵡⴻⵏⵏⵉ ⵉⵜⵜⴻⴼⴼⵖⴻⵏ ⵣⴻⴳ ⵉⴱⵔⵉⴷⴻⵏ ⵏⵏⴻⵙ,
ⵉⵙⵙⴻⵃⵇⴰⵔⴰ ⵉ-ⵜ. ■
3 ⴷⴻⴳ ⵓⵇⴻⵎⵎⵓⵎ ⵏ ⵓⴱⵓⵀⴰⵍⵉ
ⴰⵇⴰ ⴷⵉⵏ ⵍⵎⴻⵛⵄⴻⴹ ⵉ ⵏⵏⴼⴰⵅⴻⵜ ⵏⵏⴻⵙ,
ⵎⴰⵛⴰ ⵉⵢⴻⵏⵛⵉⵛⴻⵏ ⵏ ⵉⵎⵉⵖⵉⵙⴻⵏ ⵃⴻⵟⵟⴰⵏ ⵜⴻⵏ.
4 ⵎⴰⵏⵉ ⵡⴰⵔ ⴵⵉⵏ ⵉⴼⵓⵏⴰⵙⴻⵏ,
ⵉⵜⵜⵖⵉⵎⴰ ⵍⵎⴻⴷⵡⴻⴷ ⵉⵅⵡⴰ
ⵎⴰⵛⴰ ⵙ ⵊⵊⴻⵀⴷ ⵏ ⵓⴼⵓⵏⴰⵙ
ⴰⵇⴰ ⴷⵉⵏ ⵚⵚⴰⴱⴻⵜ ⵜⴻⵎⵖⴰⵔ.
5 ⴰⵛⴻⵀⵀⴰⴷ ⴷ ⵜⵉⴷⴻⵜⵜ ⵡⴰⵔ ⵉⵙⵙⵅⴰⵔⵔⵉⵇ ⵛⴰ,
ⵎⴰⵛⴰ ⴰⵛⴻⵀⵀⴰⴷ ⵉⵙⵙⵅⴰⵔⵔⵉⵇⴻⵏ
ⵉⵜⵜⵙⵓⴹ ⵉⵅⴰⵔⵔⵉⵇⴻⵏ. ■
6 ⵉ ⵓⵎⴻⵙⵜⴻⵀⵣⵉⵢ ⵡⴰⵔ ⴷⵉⵏ ⵜⵉⵖⵉⵜ
ⵅⵎⵉ ⵜⵜ ⵢⴰⵔⴻⵣⵣⵓ,
ⵎⴰⵛⴰ ⵉ ⵓⴼⴻⵀⵀⴰⵎ ⵉⵀⵡⴻⵏ ⵅⴰⵙ,
ⵎⴰⵃⴻⵏⴷ ⴰⴷ ⵢⴰⴼ ⵜⵓⵙⵙⵏⴰ.
7 ⴰⴳⴳⵯⴻⵊ ⵅ ⵡⴻⵔⵢⴰⵣ ⴰⴱⵓⵀⴰⵍⵉ,
ⵎⴰⵖⴰⵔ ⵛⴻⴽ ⵡⴰⵔ ⵖⴰⵔⴻⵙ ⵜᵉⵜⵜⵉⴼⴻⴷ ⵛⴰ
ⵉⵢⴻⵏⵛⵉⵛⴻⵏ ⵉ ⵉⵙⵙⴰⵡⴰⵍⴻⵏ ⵜⵓⵙⵙⵏⴰ.
8 ⵜⵉⵖⵉⵜ ⵏ ⵡⴻⵏⵏⵉ ⵉⴼⴻⵜⵜⵏⴻⵏ
ⴰⵇⴰ-ⵜⵜ ⴷ ⵍⴻⴼⵀⴰⵎⴻⵜ
ⵏ ⵡⴻⴱⵔⵉⴷ ⵏ ⵢⵉⵅⴻⴼ ⵏⵏⴻⵙ,
ⵎⴰⵛⴰ ⵜⵓⴱⴱⵓⵀⴻⵍⵢⴰ ⵏ ⵉⴱⵓⵀⴰⵍⵉⵢⵢⴻⵏ ⴷ ⴰⵛⵎⴰⵜ.
9 ⵉⴱⵓⵀⴰⵍⵉⵢⵢⴻⵏ ⵙⵜⴻⵀⵣⴰⵏ
ⵙ ⵡⴻⵄⴷⴰⵍ ⵏ ⵓⵎⴰⵔⵡⴰⵙ,
ⵎⴰⵛⴰ ⵊⴰⵔ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ
ⵉⵜⵜⵡⴰⴼ ⵍⵅⴰⴹⴰⵔ.
10 ⵓⵍ ⵉⵙⵙⴻⵏ ⵜⴰⵔⵣⵓⴳⵉ ⵏⵏⴻⵙ,
ⵍⴱⴰⵔⵔⴰⵏⵉ ⵡⴰⵔ ⵉⵣⴻⵎⵎⴰⵔ
ⴰⴷ ⵢⴰⵛⴰ ⵙ ⵍⴻⴼⵔⴰⵃⴻⵜ ⵏⵏⴻⵙ.
11 ⵜⴰⴷⴷⴰⵔⵜ ⵏ ⵉⵄⴻⴼⴼⴰⵏⴻⵏ ⴰⴷ ⵜᵉⵜⵜⵡⴰⵔⴻⴷⴷⴻⴵ,
ⵎⴰⵛⴰ ⵜⴰⵇⵉⴹⵓⵏⵜ ⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ
ⴰⴷ ⵜᵉⵏⵏⴻⵡⵡⴰⵔ.
12 ⴰⴷ ⵜⴰⵖ ⵉⵜⵜⵖⵉⵍ ⴰⵙ ⵉ ⵛⴰ ⵏ ⵢⵉⵊⵊⴻⵏ
ⴰⵇⴰ ⴰⴱⵔⵉⴷ ⵏⵉⵛⴰⵏ,
ⵎⴰⵛⴰ ⴰⵏⴻⴳⴳⴰⵔ ⵏⵏⴻⵙ ⵎⵖⵉⵔ ⵉⴱⵔⵉⴷⴻⵏ
ⵉⵜⵜⴰⵡⵢⴻⵏ ⵖⴰⵔ ⵍⵎⴻⵡⵜ. ■
13 ⵡⴰⵅⵅⴰ ⵖⴰⵔ ⵡⴻⴹⵃⴰⵛ ⵓⵍ ⵉⵜⵜⴻⴳⴳ ⵍⴻⵃⵔⵉⵇ,
ⵡⴰⵀ, ⴰⵏⴻⴳⴳⴰⵔⵓ ⵏ ⵍⴻⴼⵔⴰⵃⴻⵜ
ⵜᵉⵜⵜⴰⴽⴽⵡⴰⴹ-ⴷⴷ ⴰⵛⴹⴰⵏ. ■
14 ⵡⴻⵏⵏⵉ ⵖⴰⵔ ⵉⴵⴰ ⵡⵓⵍ ⵉⴼⴼⵖⴻⵏ ⵣⴻⴳ ⵡⴻⴱⵔⵉⴷ,
ⴰⴷ ⵉⵜⵜⵡⴰⵙⵙⵊⵉⵡⴻⵏ ⵙ ⵉⴱⵔⵉⴷⴻⵏ ⵏⵏⴻⵙ,
ⵓ ⴰⵔⵢⴰⵣ ⴰⵚⴻⴱⵃⴰⵏ ⵙ ⵢⵉⵅⴻⴼ ⵏⵏⴻⵙ. ■
15 ⵡⴻⵏⵏⵉ ⵉⴵⴰⵏ ⴷ ⴰⵃⴰⴼⵉ, ⵉⵜⵜⴰⵎⴻⵏ ⴷⵉ ⴽⵓⵍ ⴰⵡⴰⵍ,
ⵎⴰⵛⴰ ⵡⴻⵏⵏⵉ ⵉⴼⴻⵜⵜⵏⴻⵏ ⵉⵃⴻⵟⵟⴰ ⴰⵚⵓⵔⵉⴼ ⵏⵏⴻⵙ.
16 ⴰⵎⵉⵖⵉⵙ ⵉⵜⵜⴻⴳⴳⵯⴻⴷ ⵓ ⵉⵜⵜⵃⴻⵢⵢⴰⴷ ⵅ ⵍⵖⴰⵔ,
ⵎⴰⵛⴰ ⴰⴱⵓⵀⴰⵍⵉ ⵉⵙⴻⵄⵄⴰⵔ,
ⵓⵎⵉ ⵉⵜⵜⵖⵉⵍ ⴰⵙ ⴰⵇⴰ-ⵜ ⴷⵉ ⵍⴰⵎⴰⵏ.
17 ⵡⴻⵏⵏⵉ ⵉⵜⵜⵅⴻⵢⵢⴰⵇⴻⵏ ⴷⴻⵖⵢⴰ,
ⴰⴷ ⵉⴳⴳ ⵜⵓⴱⴱⵓⵀⴻⵍⵢⴰ,
ⵓ ⴰⵔⵢⴰⵣ ⵉⵏⴻⴽⴽⵡⴰⵏ ⵜⴰⵃⵔⴰⵢⵎⴻⵛⵜ,
ⴰⴷ ⵉⵜⵜⵡⴰⵛⴰⵔⵀ.
18 ⵉⵃⴰⴼⵉⵢⵢⴻⵏ ⴰⴷ ⵡⴰⵔⵜⴻⵏ ⵜⵓⴱⴱⵓⵀⴻⵍⵢⴰ,
ⵎⴰⵛⴰ ⵉⵏⵏⵉ ⵉⴼⴻⵜⵜⵏⴻⵏ,
ⴰⴷ ⴰⵙⴻⵏ ⵇⵇⵏⴻⵏ ⵙ ⵉⵊⵊ ⵏ ⵜⵜⴰⵊ ⵏ ⵜⵓⵙⵙⵏⴰ.
19 ⵉⵖⴻⵛⵛⴰⵛⴻⵏ ⴰⴷ ⴰⴹⴰⵔⴻⵏ
ⵣⵣⴰⵜ ⵉ ⵡⵓⴷⴻⵎ ⵏ ⵉⵚⴻⴱⵃⴰⵏⴻⵏ,
ⵉⵄⴻⴼⴼⴰⵏⴻⵏ ⴰⴷ ⴰⴹⴰⵔⴻⵏ
ⵣⵣⴰⵜ ⵉ ⵜⴻⵡⵡⵓⵔⴰ ⵏ ⵉⵎⵙⴻⴳⴳⴰⴷⴻⵏ.
20 ⴰⵎⴻⵣⵍⵓⴹ ⵉⵛⴰⵔⵔⴻⵀ ⵉ-ⵜ ⵄⴰⴷ
ⵓⵎⴻⴷⴷⵓⴽⴽⴻⵍ ⵏⵏⴻⵙ,
ⵎⴰⵛⴰ ⴰⵟⵟⴰⵙ ⴷ ⵉⵏⵏⵉ ⵉⵜⵜⴻⵅⵙⴻⵏ ⴰⵢⵜ ⵏ ⴱⵓ-ⵡⴰⴳⵍⴰ. ■
21 ⵡⴻⵏⵏⵉ ⵉⵙⵙⴻⵃⵇⴰⵔⴰⵏ ⵊⵊⴰⵔ ⵏⵏⴻⵙ,
ⵉⵜⵜⴻⴳⴳ ⴷⴷⵏⵓⴱ,
ⵎⴰⵛⴰ ⵙⵙⴻⵄⴷ ⵏ ⵡⴻⵏⵏⵉ ⵉⵜⵜⵃⵉⵏⵏⴰⵏ
ⵅ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ.
22 ⵉⵏⵏⵉ ⴷⴷ-ⵉⵅⴻⴵⵇⴻⵏ ⵍⵖⴰⵔ,
ⵎⴰ ⵡⴰⵔ ⵜⵜⵡⴻⴷⴷⴰⵔⵉⵏ ⵏⵉⵜⵏⵉ?
ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ
ⴰⵇⴰ ⵖⴰⵔ ⵢⵉⵏⵏⵉ ⵉⵜⵜⵅⴰⵔⵔⴰⵚⴻⵏ
ⴷⵉ ⵎⵉⵏ ⵉⵚⴻⴱⵃⴻⵏ. ■
23 ⴷⵉ ⵎⴰⵔⵔⴰ ⵍⵡⴻⵃⵍⴰⵏ ⵏ ⵡⴰⵔⴱⴻⵔ ⴷⴰⵢⴻⵙ ⵍⴻⴼⴹⴻⵍ,
ⵎⴰⵛⴰ ⵍⵀⴰⵔⴷ ⵏ ⵉⵢⴻⵏⵛⵉⵛⴻⵏ
ⵉⵏⴻⴷⴷⴻⵀ ⵖⴰⵔ ⵡⴻⵃⵡⴰⵊ ⵡⴰⵀⴰ. □
24 ⵜⵜⴰⵊ ⵏ ⵉⵎⵉⵖⵉⵙⴻⵏ ⴷ ⴰⴳⵍⴰ ⵏⵙⴻⵏ,
ⵜⵓⴱⴱⵓⵀⴻⵍⵢⴰ ⵏ ⵉⴱⵓⵀⴰⵍⵉⵢⵢⴻⵏ
ⴷ ⵜⵓⴱⴱⵓⵀⴻⵍⵢⴰ ⵡⴰⵀⴰ.
25 ⴰⵛⴻⵀⵀⴰⴷ ⴰⵎⵜⵉⵇⵇⵉ ⵉⵙⵙⴻⵏⵊⴰⵎ ⵍⴻⵄⵎⵓⵔ,
ⵎⴰⵛⴰ ⵡⴻⵏⵏⵉ ⵢⴰⵔⴻⵅⵅⵓⵏ ⵉ ⵉⵅⴰⵔⵔⵉⵇⴻⵏ,
ⵉⵛⴻⵎⵎⴻⵜ.
26 ⴷⵉ ⵜⵉⴳⴳⵯⵓⴷⵉ ⵏ ⵙⵉⴷⵉ ⴷⴰⵢⴻⵙ ⵜⵜⵉⵇⴻⵜ ⵉⵊⴻⵀⴷⴻⵏ,
ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ
ⵉ ⵉⵃⴻⵏⵊⵉⵔⴻⵏ ⵏⵏⴻⵙ.
27 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⵍⵄⵓⵏⵚⴰⵔ ⵏ ⵜⵓⴷⴰⵔⵜ,
ⵉ ⵓⵙⴻⵏⵊⴻⵎ ⵣⴻⴳ ⵉⵛⴻⴷⴷⵉⵢⴻⵏ ⵏ ⵍⵎⴻⵡⵜ. ■
28 ⴷⴻⴳ ⵡⴰⵟⵟⴰⵙ ⵏ ⵍⴳⴻⵏⵙ
ⵉⵅⴻⵎⵎⴻⵍ ⵓⵛⴻⵡⵡⴰⵔ ⵏ ⵓⵊⴻⴵⵉⴷ,
ⵎⴰⵛⴰ ⴷⵉ ⵜⵉⴽⴽⴻⵙⵜ ⵏ ⵛⵛⴻⵄⴱ
ⵉⵅⴻⵎⵎⴻⵍ ⵓⵀⴻⵍⵍⴻⴽ ⵏ ⵍⵃⴰⴽⴻⵎ.
29 ⵡⴻⵏⵏⵉ ⵖⴰⵔ ⵉⴵⴰ ⵜⵜⴰⵙⵉⵄ ⵏ ⵍⵅⴰⴹⴰⵔ,
ⵖⴰⵔⴻⵙ ⵍⴻⴼⵀⴰⵎⴻⵜ ⵜⴻⵎⵖⴰⵔ,
ⵎⴰⵛⴰ ⵡⴻⵏⵏⵉ ⴷⵉ ⵉⴵⴰ ⴱⵓⵃⴱⴻⵍ ⵉⵃⵚⴰⵔⴻⵏ
ⵉⵙⵙⴻⴽⴽⴰⵔ ⵜⵓⴱⴱⵓⵀⴻⵍⵢⴰ.
30 ⵓⵍ ⵉⵚⵚⴻⵃ, ⴰⵇⴰ ⴷ ⵜⵓⴷⴰⵔⵜ ⵉ ⴰⵔⵔⵉⵎⴻⵜ,
ⵎⴰⵛⴰ ⵜⵓⵙⵎⵉ ⴷ ⴰⵔⴻⵚⵚⵓⴹ ⵏ ⵢⴻⵖⵙⴰⵏ.
31 ⵡⴻⵏⵏⵉ ⵉⵃⴻⵚⵚⴰⵔⴻⵏ ⴰⵎⴻⵃⴷⴰⵊ,
ⵉⵙⵙⴻⵃⵇⴰⵔⴰ ⵡⴻⵏⵏⵉ ⵜ ⵉ-ⴷⴷ-ⵉⵅⴻⵍⵇⴻⵏ,
ⵎⴰⵛⴰ ⵡⴻⵏⵏⵉ ⵉⵜⵜⵃⵉⵏⵏⴰⵏ ⵅ ⵓⵎⴻⵣⵍⵓⴹ,
ⵉⵜⵜⵛⴻⵏⵏⴻⵄ ⵉ-ⵜ. ■
32 ⴰⵄⴻⴼⴼⴰⵏ ⵉⵜⵜⴰⵥⵥⴻⵍ ⵅ ⵢⵉⵅⴻⴼ ⵏⵏⴻⵙ
ⵙ ⵍⵖⴰⵔ ⵏⵏⴻⵙ ⵉ ⵉⵜⵜⴻⴳⴳ,
ⵎⴰⵛⴰ ⴰⵎⵙⴻⴳⴳⴻⴷ ⵖⴰⵔⴻⵙ ⵎⴰⵏⵉ ⵉ ⵖⴰ ⵢⴰⵔⵡⴻⵍ
ⵄⴰⴷ ⴷⵉ ⵍⵎⴻⵡⵜ ⵏⵏⴻⵙ.
33 ⵜⵉⵖⵉⵜ ⵜⴰⵔⵙⴰ ⴷⴻⴳ ⵡⵓⵍ ⵏ ⵉⴼⴻⵀⵀⴰⵎⴻⵏ,
ⵎⴰⵛⴰ ⵎⵉⵏ ⵉⴵⴰⵏ
ⴷⴰⵅⴻⵍ ⴷⴻⴳ ⵉⴱⵓⵀⴰⵔⵉⵢⵢⴻⵏ
ⴰⴷ ⵉⵜⵜⵡⴰⵙⵙⵏⴻⵏ. ■
34 ⵜⴰⵙⴻⴳⴷⴰ ⵜⴻⵙⵙⵄⵓⴵⴰ ⵍⴳⴻⵏⵙ,
ⵎⴰⵛⴰ ⵍⴻⴼⴹⵉⵃⴻⵜ ⵏ ⵛⵛⵓⵄⵓⴱ ⴷ ⴷⴷⵏⵓⴱ.
35 ⵍⵅⴰⴹⴰⵔ ⵏ ⵓⵊⴻⴵⵉⴷ
ⵢⴰⵔⵙⴰ ⵅ ⵓⵎⵙⴻⵅⵅⴰⵔ ⵉⴼⴻⵀⵀⵎⴻⵏ
ⵎⴰⵛⴰ ⵡⴻⵏⵏⵉ ⵉⴼⴻⵟⵟⵃⴻⵏ
ⵉⵍⴻⵇⵇⴻⴼ ⵉ-ⵜ ⵓⴷⵓⵇⵇⴻⵣ ⵏⵏⴻⵙ ⵏ ⵓⴼⵓⴳⴻⵎ.