ⴰⵢⵓⴱ 31

ⴰⵢⵓⴱ ⵉⵛⴻⴼⴼⴻⵄ ⴱⴻⵍⵍⵉ ⵡⴰⵔ ⴷⴰⵢⴻⵙ ⴱⵓ ⵍⵄⵉⴱ

1 ⵏⴻⵛⵛ ⴳⴳⵉⵖ ⵍⵄⴰⵀⴷ ⴰⴽ-ⴷ ⵜⵉⵟⵟⴰⵡⵉⵏ ⵉⵏⵓ,

ⵎⴰⵎⵎⴻⵛ ⵅⴻⵏⵏⵉ ⵉ ⵖⴰ ⵅⵥⴰⵔⴻⵖ ⴷⵉ ⵜⴻⵄⵥⴰⵔⴻⵛⵜ?

2 ⵎⴰⵖⴰⵔ ⵎⵉⵏ ⵉⴵⴰⵏ ⵜⴰⵙⵖⴰⵔⵜ ⵏ ⴰⵔⴻⴱⴱⵉ ⵥⵉ ⵙⴻⵏⵏⴻⵊ,

ⵏⵉⵖ ⵜⴰⵙⵖⴰⵔⵜ ⴷⵉ ⵍⵡⴰⵔⵜ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⵥⴻⴳ ⵉⵊⴻⵏⵡⴰⵏ ⵢⵓⵄⵍⴰⵏ?

3 ⵎⴰ ⵡⴰⵔ ⵉⴵⵉ ⴰⴹⴻⵢⵢⴻⵄ ⵉⴽⴽⴰⵔ-ⴷⴷ ⵉ ⵓⵄⴻⴼⴼⴰⵏ,

ⴰⵔⵥⵉⵢⵢⴻⵜ ⵉ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ?

4 ⵎⴰ ⵡⴰⵔ ⵉⵜⵜⵡⵉⵍⵉ ⵏⴻⵜⵜⴰ ⵉⴱⵔⵉⴷⴻⵏ ⵉⵏⵓ,

ⵎⴰ ⵡⴰⵔ ⵉⵃⴻⵙⵙⴻⴱ ⵏⴻⵜⵜⴰ ⵍⵇⴻⴷⴷ ⵏ ⵎⴰⵔⵔⴰ ⵉⵚⵓⵔⴰⴼ ⵉⵏⵓ?   

5 ⵎⴰⵍⴰ ⵜⵓⵖⴰ ⵓⵢⵓⵔⴻⵖ ⴷⵉ ⵍⴻⵅⴷⴻⵄ,

ⵏⵉⵖ ⵉⵇⴻⴵⴻⵇ ⵓⴹⴰⵔ ⵉⵏⵓ ⵖⴰⵔ ⵍⵖⴻⵛⵛ,

6 ⴻⵊⵊ ⵙⵉⴷⵉ ⴰⴷ ⴰⵢⵉ ⵉⵡⵥⴻⵏ ⵅⴻⵏⵏⵉ ⴷⵉ ⵍⵎⵉⵥⴰⵏⴰⵜ ⵉⵙⴻⴳⴳⴷⴻⵏ,

ⴰⵍⴰⵎⵉ ⵉ ⵖⴰ ⵉⵙⵙⴻⵏ ⴰⵔⴻⴱⴱⵉ ⵍⴻⵚⴼⴰⵢⴻⵜ ⵉⵏⵓ.

7 ⵎⴰⵍⴰ ⵉⵚⵓⵔⴰⴼ ⵉⵏⵓ ⴼⴼⵖⴻⵏ ⵥⴻⴳ ⵡⴻⴱⵔⵉⴷ,

ⵓⵍ ⵉⵏⵓ ⵉⴹⴼⴰⵔ ⵜⵉⵟⵟⴰⵡⵉⵏ ⵉⵏⵓ,

ⵓⵛⴰ ⵅⴻⵏⵏⵉ ⵉⵍⵚⴻⵇ ⵍⵄⵉⴱ ⴷⴻⴳ ⵉⴼⴰⵙⵙⴻⵏ ⵉⵏⵓ,

8 ⵅⴻⵏⵏⵉ ⴰⴷ ⵥⴰⵔⵄⴻⵖ ⵏⴻⵛⵛ, ⵎⴰⵛⴰ ⵉⵊⵊⴻⵏ ⵏⵏⴻⵖⵏⵉ ⴰⴷ ⵉⵛⵛ,

ⵓ ⵎⵉⵏ ⵖⴰⵔⵉ ⴷⴷ-ⵉⵖⴻⵎⵎⴰⵢⴻⵏ ⴰⴷ ⵉⵜⵜⵡⴰⵇⵍⴻⵄ!

9 ⵎⴰⵍⴰ ⵓⵍ ⵉⵏⵓ ⵉⵜⵜⵡⴰⵖⵡⴰ ⵖⴰⵔ ⵉⵛⵜ ⵏ ⵜⴻⵎⵖⴰⵔⵜ,

ⵏⵉⵖ ⵜⵓⵖⴰ ⵜⵜⵃⴰⵎⵉⵖ ⵖⴰⵔ ⵜⴻⵡⵡⴰⵔⵜ ⵏ ⵡⴰⵊⵊⴰⵔ ⵉⵏⵓ,   

10 ⴻⵊⵊ ⵅⴻⵏⵏⵉ ⵜⴰⵎⵖⴰⵔⵜ ⵉⵏⵓ ⴰⴷ ⵜⴻⵃⵔⵉ ⵉⵎⴻⵏⴷⵉ ⵉ ⵢⵉⵊⵊⴻⵏ ⵏⵏⴻⵖⵏⵉ,

ⵓ ⵊⵊⴻⵎ ⵉⵏⵏⴻⵖⵏⵉ ⴰⴷ ⵅⴰⵙ ⴰⴹⴰⵔⴻⵏ.

11 ⵎⴰⵖⴰⵔ ⴰⵢⴰ ⴷ ⵍⴻⴼⴹⵉⵃⴻⵜ,

ⴷ ⵉⵛⵜ ⵏ ⵍⵊⴰⵔⵉⵎⴰ ⵉ ⵅⴰⵙ ⵉ ⵖⴰ ⵡⵜⴻⵏ ⵍⵇⵓⴹⴰⵜ.

12 ⵎⴰⵖⴰⵔ ⴰⵢⴰ ⴷ ⵜⵉⵎⴻⵙⵙⵉ ⵜᵉⵜⵜⴻⵜⵜ ⴰⵍ ⵇⴻⵟⵟⵓ,

ⵜⵇⴻⴵⴻⵄ ⵎⴰⵔⵔⴰ ⵍⵖⵉⴵⴻⵜ ⵉⵏⵓ.

13 ⵎⴰⵍⴰ ⵙⵙⵃⴻⵇⵇⴰⵔⴻⵖ ⵍⵃⴻⵇⵇ ⵏ ⵓⵎⵙⴻⵅⵅⴰⵔ ⵉⵏⵓ ⴷ ⵜⴰⵢⵢⴰ ⵉⵏⵓ,

ⵍⴰⵎⵉ ⵜⵓⵖⴰ ⵜⵜⴻⵎⵛⵓⴱⴱⵓⵛⴻⵏ ⴰⴽⵉⴷⵉ,

14 ⵎⵉⵏ ⵉ ⵖⴰ ⴳⴳⴻⵖ ⵅⴻⵏⵏⵉ, ⵎⴰⵍⴰ ⵙⵉⴷⵉ ⵉⴽⴽⴰⵔ,

ⵎⴰⵍⴰ ⵏⴻⵜⵜⴰ ⵉⵇⴻⴵⴻⴱ ⴰⵢⵉ,

ⵎⵉⵏ ⵅⴰⵙ ⴷⴷ ⵖⴰ ⵢⴰⵔⵔⴻⵖ ⵅⴻⵏⵏⵉ?   

15 ⵡⴻⵏⵏⵉ ⴷ ⴰⵢⵉ ⵉⴳⴳⵉⵏ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ, ⵎⴰ ⵡⴰⵔ ⵜ ⵉⴳⴳⵉ ⵓⵍⴰ ⴷ ⵏⴻⵜⵜⴰ?

ⵎⴰ ⵡⴰⵔ ⵉⴵⵉ ⴷ ⵉⵊⵊ ⵡⴻⵏⵏⵉ ⴷ ⴰⵏⴻⵖ ⴷⴷ-ⵉⵅⴻⵍⵇⴻⵏ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵜⵏⴻⵖ?   

16 ⵎⴰⵍⴰ ⵇⴻⵎⵎⵃⴻⵖ ⴰⵎⴻⵥⵔⵉ ⵏ ⵉⵎⴻⵥⵍⴰⴹ,

ⵏⵉⵖ ⵙⵙⵔⵓⵖ ⵜⵉⵟⵟⴰⵡⵉⵏ ⵏ ⵜⴰⵊⵊⴰⵞ,

17 ⵎⴰⵍⴰ ⵎⵖⵉⵔ ⵏⴻⵛⵛ ⵡⴰⵀⴰ ⵛⵛⵉⵖ ⴰⵍⴻⵇⵇⵓⵥ ⵏ ⵡⴻⵖⵔⵓⵎ ⵉⵏⵓ,

ⴰⵢⵓⵊⵉⵍ ⵎⴰⵛⴰ ⵡⴰⵔ ⵥⵥⴰⵢⴻⵙ ⵢⴻⵛⵛⵉ,

18 - ⵎⴰⵖⴰⵔ ⵥⵉ ⵜⴻⵎⵥⵉ ⵉⵢⵎⴰ ⵏⴻⵜⵜⴰ ⵖⴰⵔⵉ ⴰⵎ ⵉⵢⵎⴰ ⵖⴰⵔ ⴱⴰⴱⴰⵙ,

ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ ⵏⴻⴷⵀⴻⵖ ⵜⵜ -

19 ⵎⴰⵍⴰ ⵥⵔⵉⵖ ⵉⵊⵊⴻⵏ ⵉⵜⵜⵡⴰⵀⴻⵍⵍⴻⴽ ⵎⵉⵏⵥⵉ ⵡⴰⵔ ⵖⴰⵔⴻⵙ ⵉⴵⵉ ⵡⴰⵔⵔⵓⴹ,

ⵏⵉⵖ ⵎⵉⵏⵥⵉ ⵡⴰⵔ ⴷⵉⵏ ⵉⴵⵉ ⴷⴷⵓⵔⵉ ⵉ ⵓⵎⴻⵥⵍⵓⴹ,

20 ⵎⴰⵍⴰ ⵄⴻⵎⵎⴰⵔⵚ ⵡⴰⵔ ⴷ ⴰⵢⵉ ⴱⴰⵔⴽⴻⵏⵜ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ,

ⵎⵉⵏⵥⵉ ⵉⴳⴳⴰ ⴰⴷ ⵉⵙⵙⵉⵃⵎⴰ ⵉⵅⴻⴼ ⵏⵏⴻⵙ ⵙ ⵜⴹⵓⴼⵜ ⵏ ⵉⵛⴰⵔⵔⵉⵢⴻⵏ ⵉⵏⵓ,

21 ⵎⴰⵍⴰ ⴰⴼⵓⵙ ⵉⵏⵓ ⵉⵀⵓⴷⴷ ⵅ ⵓⵢⵓⵊⵉⵍ,

ⵎⵉⵏⵥⵉ ⵥⵔⵉⵖ ⴰⵇⴰ ⴷⵉⵏ ⵜⵡⵉⵥⴰ ⵉ ⵏⴻⵛⵛ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ,   

22 ⴻⵊⵊ ⵅⴻⵏⵏⵉ ⴰⴷ ⴰⵢⵉ ⵜⴻⵡⴹⴰ ⵜⴻⵖⵔⵓⴹⵜ ⵉⵏⵓ ⵥⴻⴳ ⵉⵊⵉⵎⴰⵏ,

ⵓ ⴰⴷ ⴰⵢⵉ ⵢⴰⵔⵥ ⵓⵖⵉⵍ ⵉⵏⵓ ⵥⴻⴳ ⵢⵉⵖⴻⵙ!

23 ⵎⴰⵖⴰⵔ ⵉⵡⴹⴰ-ⴷⴷ ⵅⴰⴼⵉ ⵓⵏⴻⵅⵍⵉⵄ ⴰⵎⴻⵇⵇⵔⴰⵏ,

ⵉⵛⵜ ⵏ ⵍⵎⵓⵚⵉⴱⴻⵜ ⵥⵉ ⵖⴰⵔ ⴰⵔⴻⴱⴱⵉ,

ⵡⴰⵔ ⵥⴻⵎⵎⴰⵔⴻⵖ ⴰⴷ ⴳⴳⴻⵖ ⵡⴰⵍⵓ ⵥⵥⴰⵜ ⵉ ⵓⵄⵓⴵⵉ ⵏⵏⴻⵙ.

24 ⵎⴰⵍⴰ ⴳⴳⵉⵖ ⵏⴻⵛⵛ ⵓⵔⴻⵖ ⴷ ⴰⵜⴻⵛⵍⵉ ⵉⵏⵓ,

ⵏⵉⵖ ⵏⵏⵉⵖ ⵉ ⵡⵓⵔⴻⵖ ⵉⵖⵍⴰⵏ ⴰⵟⵟⴰⵚ: ‘ⵛⴻⴽ ⴷ ⵍⴰⵎⴰⵏ ⵉⵏⵓ!’,   

25 ⵎⴰⵍⴰ ⴼⴰⵔⵃⴻⵖ, ⵓⵎⵉ ⵉⵎⵖⴰⵔ ⵡⴰⴳⵍⴰ ⵉⵏⵓ,

ⵓⵎⵉ ⴰⴼⵓⵙ ⵉⵏⵓ ⵉⵟⵟⴻⴼ ⴰⵟⵟⴰⵙ ⴷ ⴰⴳⵍⴰ,   

26 ⵎⴰⵍⴰ ⵥⵔⵉⵖ ⵜⴰⴼⴰⵡⵜ ⵏ ⵜⴼⵓⵛⵜ ⵅⵎⵉ ⵜᵉⵜⵜⵡⴻⵙⵙⴻⴳ,

ⵏⵉⵖ ⵜⴰⵥⵉⵔⵉ ⵅⵎⵉ ⵜⴻⴳⴳⵓⵔ ⴷⵉ ⵜⵉⵙⵙⵉⵇⵜ ⵏⵏⴻⵙ,   

27 ⵓⵛⴰ ⵉⵜⵜⵡⴰⵖⵡⴰ ⵡⵓⵍ ⵉⵏⵓ ⴷⵉ ⵜⵏⵓⴼⴼⵔⴰ,

ⵓⵛⴰ ⵙⵙⵓⴷⵎⴻⵖ ⵜⴻⵏⵜ ⵙ ⵓⴼⵓⵙ ⴷⴻⴳ ⵓⵇⴻⵎⵎⵓⵎ ⵉⵏⵓ,

28 ⵅⴻⵏⵏⵉ ⵉⵍⵉ ⵓⵍⴰ ⴷ ⵎⴰⵏ ⴰⵢⴰ ⴷ ⵍⵎⵓⵄⵚⵉⵢⵢⴻⵜ ⴰⴷ ⵜⵜ ⵡⵛⴻⵏ ⵉ ⵍⵇⵓⴹⴰⵜ,

ⵎⴰⵖⴰⵔ ⵅⴻⵏⵏⵉ ⴳⴳⵓⵔⴻⵖ ⴰⴷ ⵏⴽⴰⵔⴻⵖ ⴰⵔⴻⴱⴱⵉ ⵏⵏⵉ ⵉⴵⴰⵏ ⵙⴻⵏⵏⴻⵊ.

29 ⵎⴰⵍⴰ ⴼⴰⵔⵃⴻⵖ ⵉ ⴰⵔⵥⵉⵢⵢⴻⵜ ⵏ ⵡⴻⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ,

ⴼⴰⵔⵃⴻⵖ ⵓⵎⵉ ⵜ ⵉⵍⵇⴻⴼ ⵍⵖⴰⵔ!   

30 ⵏⴻⵛⵛ ⵎⴰⵛⴰ ⵡⴰⵔ ⵊⵊⵉⵖ ⴰⵏⴻⵖ ⵉⵏⵓ ⴰⴷ ⵉⵅⴹⴰ,

ⵓⵎⵉ ⴽⴽⵡⴰⵔⴻⵖ ⵍⴻⵄⵎⴰⵔ ⵏⵏⴻⵙ ⵙ ⵏⵏⴻⵄⵍⴻⵜ!   

31 ⵎⴰⵍⴰ ⵉⵔⵢⴰⵥⴻⵏ ⵏⵏⵉ ⵉⴵⴰⵏ ⴷⴻⴳ ⵓⵇⵉⴹⵓⵏ ⵉⵏⵓ ⵡⴰⵔ ⵇⵇⴰⵔⴻⵏ:

‘ⵎⴰⵏ ⵡⴻⵏ ⵅⴻⵏⵏⵉ ⵥⴻⴳ ⵢⴻⵏⵏⵉ ⵉⴽⵙⵉⵏ ⵥⴻⴳ ⵡⴻⵢⵙⵓⵎ ⵉⵏⵓ ⵡⴰⵔ ⵜⵜⵡⴰⵙⵊⵉⵡⵏⴻⵏ?!’

32 ⵓⵍⴰ ⴷ ⵉⵊⵊ ⵏ ⵍⴱⴰⵔⵔⴰⵏⵉ ⵎⴰⵛⴰ ⵡⴰⵔ ⵉⵙⵙⴻⵏⵙ ⴷⵉ ⴱⴰⵔⵔⴰ ⵅ ⵡⴻⴱⵔⵉⴷ,

ⵎⴰⵖⴰⵔ ⵉ ⵓⵎⵙⴻⴱⵔⵉⴷ ⴰⵔⵥⵎⴻⵖ ⵜⵉⵡⵡⵓⵔⴰ ⵉⵏⵓ.  

33 ⵎⴰⵍⴰ ⵏⴻⵛⵛ, ⴰⵎ ⴰⴷⴰⵎ, ⴷⵍⵉⵖ ⴰⵅⴻⵟⵟⵓ ⵉⵏⵓ,

ⵓⵎⵉ ⵙⵙⵏⵓⴼⴼⴰⵔⴻⵖ ⵍⵎⵓⵄⵚⵉⵢⵢⴻⵜ ⵉⵏⵓ ⴷⴻⴳ ⵡⴻⵃⵙⵉⵏ ⵉⵏⵓ,   

34 ⵎⵉⵏⵥⵉ ⴳⴳⵯⴻⴷⴻⵖ ⵥⵉ ⵍⵖⴰⵛⵉ ⴰⵎⴻⵇⵇⵔⴰⵏ,

ⵏⵉⵖ ⵉⵙⵙⵏⴻⵅⵍⴻⵄ ⴰⵢⵉ ⵓⵙⴻⵃⵇⴰⵔ ⵏ ⵍⵡⴰⵛⵓⵏ ⵉⵏⵓ,

ⴰⵍⴰⵎⵉ ⵇⵇⵉⵎⴻⵖ ⵙⵙⴻⵖⴷⴻⵖ, ⵡⴰⵔ ⴼⴼⵉⵖⴻⵖ ⵄⴰⴷ ⵥⵉ ⵜⴻⵡⵡⴰⵔⵜ ⵖⴰⵔ ⴱⴰⵔⵔⴰ ...

35 ⵎⵍⵉ ⵖⴰⵔⵉ ⵉⵊⵊⴻⵏ ⵡⴻⵏⵏⵉ ⴷ ⴰⵢⵉ ⵖⴰ ⵉⵙⵍⴻⵏ.

ⵅⵥⴰⵔ, ⴰⵛⴻⵎⵎⵉⵄ ⵉⵏⵓ - ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⴰⴷ ⵅⴰⴼⵉ ⴷⴷ-ⵢⴰⵔⵔ -

ⵓⵍⴰ ⴷ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ ⵏⵏⵉ ⵜ ⵢⵓⵔⴰ ⵡⴻⵔⵢⴰⵥ ⵏⵏⵉ ⴽⵉⴷⵉ ⵉⵜⵜⴻⵎⵛⵓⴱⴱⵓⵛⴻⵏ.

36 ⵎⴰⵄⵍⵉⴽ ⵓⴼⵉⵖ ⵎⴰ ⵡⴰⵔ ⵜ ⴰⵔⴻⴱⴱⵓⵖ ⵅ ⵜⵖⴰⵔⴹⵜ ⵉⵏⵓ,

ⴰⴷ ⵜ ⵇⵇⵏⴻⵖ ⵉ ⵓⵥⴻⴵⵉⴼ ⵉⵏⵓ ⴰⵎ ⵉⵊⵊ ⵏ ⵜⵜⴰⵊ.

37 ⵉⵡⴰ, ⴰⴷ ⴰⵙ ⵉⵏⵉⵖ ⵍⵇⴻⴷⴷ ⵏ ⵉⵚⵓⵔⴰⴼ ⵉⵏⵓ,

ⴰⴷ ⵖⴰⵔⴻⵙ ⴷⴷ-ⵇⴰⵔⵔⴱⴻⵖ ⴰⵎ ⵉⵊⵊ ⵏ ⵍⵃⴰⴽⴻⵎ.

38 ⵎⴰⵍⴰ ⵍⴻⵄⵔⴰⵚⵉ ⵉⵏⵓ ⵉⵙⵖⵓⵢⵢ ⵅⴰⴼⵉ,

ⵉⵄⴻⵢⵢⴰⴷⴻⵏ ⵏⵏⴻⵙ ⴰⴷ ⵔⵓⵏ ⴰⴽ-ⴷ ⵡⴰⵢⴰⵡⵢⴰ ⵎⴰⵔⵔⴰ,

39 ⵎⴰⵍⴰ ⵛⵛⵉⵖ ⵚⵚⴰⴱⴻⵜ ⵏⵏⴻⵙ ⵏⵀⵍⴰ ⴰⵅⴻⴵⴻⵚ,

ⵓ ⴳⴳⵉⵖ ⵍⴻⵄⵎⴰⵔ ⵏ ⵉⵅⴻⵎⵎⴰⵙⴻⵏ ⵏⵏⴻⵙ ⵉⴹⵍⴻⵇ ⵉ ⴱⵓⵃⴱⴻⵍ,

40 ⴻⵊⵊ ⵅⴻⵏⵏⵉ ⴰⴷ ⵉⵖⵎⵉ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ ⴷⴻⴳ ⵡⴻⵎⵛⴰⵏ ⵏ ⵢⵉⵔⴷⴻⵏ,

ⵓⵍⴰ ⴷ ⵍⴻⵄⵛⵓⴱ ⵢⴰⵔⵚⵓⴷⴻⵏ ⴷⴻⴳ ⵡⴻⵎⵛⴰⵏ ⵏ ⵉⵎⴻⵏⴷⵉ.

ⴰⵇⴰ ⴷⴰ ⵉ ⵇⴹⴰⵏ ⵡⴰⵡⴰⵍⴻⵏ ⵏ ⴰⵢⵓⴱ.