ⴰⵢⵓⴱ 11

ⵍⵃⴰⵔⴹ ⴰⵎⴻⵥⵡⴰⵔⵓ ⵏ ⵚⵓⴼⴰⵔ

1 ⵅⴻⵏⵏⵉ ⵢⴰⵔⵔⴰ-ⴷⴷ ⵚⵓⴼⴰⵔ, ⵡⴻⵏⵏⵉ ⴷⴷ-ⵢⵓⵙⵉⵏ ⵥⵉ ⵏⴰⵄⵎⴰ, ⵉⵏⵏⴰ:

2 ⵎⴰ ⴰⴷ ⵇⵇⵉⵎⴻⵏ ⵡⴰⵟⵟⴰⵙ ⵏ ⵡⴰⵡⴰⵍⴻⵏ ⴱⵍⴰ ⵜⴰⵎⵡⴰⵔⵔⵉⵜ,

ⵓ ⵎⴰ ⴰⴷ ⵖⴰⵔⴻⵙ ⵢⵉⵍⵉ ⵉ ⵢⵉⵊⵊ ⵏ ⴱⵓ-ⵓⵇⴻⵎⵎⵓⵎ, ⵍⵃⴻⵇⵇ ⵍⴻⴱⴷⴰ?

3 ⵎⴰ ⵉⵥⴻⵎⵎⴰⵔ ⵍⵀⴰⵔⴷ ⵏⵏⴻⴽ ⴰⴷ ⵉⵙⵙⵖⴻⴷ ⵉⵡⴷⴰⵏ,

ⴰⵍⴰⵎⵉ ⵜⵥⴻⵎⵎⴰⵔⴻⴷ ⴰⴷ ⵜⴻⵙⵜⴻⵀⵥⵉⴷ ⴱⵍⴰ ⵎⴰ ⵛⴻⴽ ⵉⵙⵙⴻⵃⵛⴻⵎ ⵓⵍⴰ ⴷ ⵉⵊⵊ?

4 ⵛⴻⴽ ⵜⴻⵏⵏⵉⴷ: ‘ⵜⴻⵚⴼⴰ ⵜⵖⵓⵔⵉ ⵉⵏⵓ,

ⵏⴻⵛⵛ ⴰⵇⴰ ⴰⵢⵉ ⴷ ⴰⵎⴻⵥⴷⴰⴳ ⴷⵉ ⵜⵉⵟⵟⴰⵡⵉⵏ ⵏⵏⴻⴽ!’

5 ⵓⵀ, ⵎⵍⵉ ⴰⵔⴻⴱⴱⵉ ⵙⵉⵎⴰⵏⵜ ⵏⵏⴻⵙ ⵉⵙⵙⴰⵡⴰⵍ,

ⵎⵍⵉ ⵢⴰⵔⴻⵥⵥⴻⵎ ⵉⵢⴻⵏⵛⵉⵛⴻⵏ ⵏⵏⴻⵙ ⵇⵉⴱⴰⵞ ⵏⵏⴻⴽ.

6 ⵎⵍⵉ ⵏⴻⵜⵜⴰ ⴷ ⴰⵛ ⵉ ⵖⴰ ⵉⵙⵙⵛⴻⵏ ⵜⵉⵎⴻⵙⵍⴰⵢⵉⵏ ⵉⵅⴻⵎⵎⵍⴻⵏ ⵏ ⵜⵉⵖⵉⵜ,

ⵎⴰⵖⴰⵔ ⵏⵉⵜⴻⵏⵜⵉ ⵙⴻⴽⴽⵡⴰⵏⵜ ⴷⴷⵓⴱⴻⵍ ⵉ ⵓⴼⴻⴽⴽⵉ.

ⵙⵙⴻⵏ, ⴰⵇⴰ ⴰⵔⴻⴱⴱⵉ ⴰⴷ ⵉⵜⵜⵓ ⴰⵟⵟⴰⵙ ⵏ ⵍⵎⵓⵄⵚⵉⵢⵢⴻⵜ ⵏⵏⴻⴽ ⴷⵉ ⵜⵉⵥⵉ ⵏⵏⴻⴽ.

7 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⴰⵔⵥⵓⴷ ⴷⵉ ⵎⵉⵏ ⵢⴰⵔⵥⵓ ⴰⵔⴻⴱⴱⵉ?

ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⴻⵙⵙⵏⴻⴷ ⵎⵉⵏ ⵜⴻⵄⵏⴰ ⵟⵟⴱⵉⵄⴻⵜ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ?

8 ⴰⵇⴰ-ⵜⵜ ⵜⵓⵄⵍⴰ ⵅ ⵓⵊⴻⵏⵏⴰ! ⵎⵉⵏ ⵜⴻⵅⵙⴻⴷ ⴰⴷ ⴷⵉⵏ ⵜⴻⴳⴳⴻⴷ?

ⵜⵓⴵⴻⵖ ⵅ ⵍⴰⵅⴰⵔⵜ! ⵎⵉⵏ ⵜⵥⴻⵎⵎⴰⵔⴻⴷ ⴰⴷ ⵥⵥⴰⵢⴻⵙ ⵜⴻⵙⵙⵏⴻⴷ?

9 ⵍⴻⵄⴱⴰⵔ ⵏⵏⴻⵙ ⴷ ⴰⵥⵉⵔⴰⵔ ⵅ ⵜⴻⵎⵎⵓⵔⵜ,

ⴷ ⵎⵉⵔⵉⵡ ⵅ ⵍⴻⴱⵃⴰⵔ.

10 ⵎⴰⵍⴰ ⵉⵄⴷⵓ, ⵉⴱⴻⵍⵍⴻⵄ ⵓⵛⴰ ⵉⵍⴰⵖⴰ ⵉ ⴷⴷⴻⵄⵡⴻⵜ,

ⵎⴰⵏ ⵡⴻⵏ ⵉ ⵜ ⵖⴰ ⵉⵙⵙⴱⴻⴷⴷⴻⵏ?

11 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵏ ⵉⵖⴻⵛⵛⴰⵛⴻⵏ,

ⵉⵜⵜⵡⴰⵍⴰ ⵍⵖⴻⵛⵛ ⴱⵍⴰ ⵎⴰ ⵜ ⵉⵃⴹⴰ.   

12 ⵎⴰⵛⴰ ⵎⴰⵍⴰ ⴰⴱⵓⵀⴰⵍⵉ ⵉⵥⴻⵎⵎⴰⵔ ⴰⴷ ⵢⴰⴼ ⵍⴻⴼⵀⴰⵎⴻⵜ,

ⵅⴻⵏⵏⵉ ⴰⵖⵢⵓⵍ ⵏ ⵍⴻⵅⵍⴰ ⵉⵥⴻⵎⵎⴰⵔ ⴰⴷ ⵉⴷⵡⴻⵍ ⴷ ⴱⵏⴰⴷⴻⵎ.   

13 ⵎⴰⵍⴰ ⵛⴻⴽ ⵜⵄⴻⴷⵍⴻⴷ ⵓⵍ ⵏⵏⴻⴽ,

ⵅⴻⵏⵏⵉ ⴱⴻⵥⵥⴻⵄ ⵉⴼⴰⵙⵙⴻⵏ ⵏⵏⴻⴽ ⵖⴰⵔⴻⵙ.

14 ⵎⴰⵍⴰ ⵉⵔⵚⴻⵇ ⵍⵖⴻⵛⵛ ⵖⴰⵔ ⵓⴼⵓⵙ ⵏⵏⴻⴽ, ⵙⴰⴳⴳⵯⴻⵊ ⵉ-ⵜ,

ⵡⴰⵔ ⵜⵜⴻⵊⵊⵉ ⴷⴷⴻⴵ ⴰⴷ ⵉⵥⴷⴻⵖ ⴷⵉ ⵜⵇⵉⴷⵓⵏⵉⵏ ⵏⵏⴻⴽ,

15 ⵎⴰⵖⴰⵔ ⵅⴻⵏⵏⵉ ⵜⵥⴻⵎⵎⴰⵔⴻⴷ ⴰⴷ ⵜⴻⵙⵙⴳⴻⵄⵄⴷⴻⴷ ⵓⴷⴻⵎ ⵏⵏⴻⴽ ⴱⵍⴰ ⵍⵄⵉⴱ,

ⴰⴷ ⵜⴱⴻⴷⴷⴻⴷ ⵏⵉⵛⴰⵏ, ⵡⴰⵔ ⵜⵜⴻⴳⴳⵯⴻⴷⴻⴷ ⵛⴰ.

16 ⵎⴰⵖⴰⵔ ⴰⴷ ⵜᵉⵜⵜⵓⴷ ⵍⴻⵖⴱⴻⵏ ⵏⵏⴻⴽ,

ⵓ ⵄⴻⵎⵎⴰⵔⵚ ⵡⴰⵔ ⴷⴰⵢⴻⵙ ⵜᵉⵜⵜⵅⴻⵎⵎⵉⵎⴻⴷ ⵄⴰⴷ,

ⴰⵎ ⵄⴻⵎⵎⴰⵔⵚ ⵡⴰⵔ ⵜᵉⵜⵜⵅⴻⵎⵎⵉⵎⴻⴷ ⵄⴰⴷ ⵖⴰⵔ ⵡⴰⵎⴰⵏ ⵉⵄⴷⴷⵓⵏ.

17 ⴰⴱⵔⵉⴷ ⵏ ⵜⵓⴷⴰⵔⵜ ⵏⵏⴻⴽ ⴰⴷ ⵢⴰⵔⵖ

ⵜⵉⵡⴰ ⵅ ⵟⵟⵃⴰ ⵏ ⵓⵥⵉⵍ,

ⵡⴰⵅⵅⴰ ⴷⵉⵏ ⵜⴰⴵⴻⵙⵜ, ⴰⴷ ⵜⵉⵍⵉ ⴰⵎ ⵜⴻⴼⴼⵓⵜ.   

18 ⴰⴷ ⵜⴰⵛⵉⴷ ⵉⵅⴻⴼ ⵏⵏⴻⴽ ⴷⵉ ⵍⴰⵎⴰⵏ, ⵎⵉⵏⵥⵉ ⴰⵇⴰ ⴷⵉⵏ ⵍⴰⵢⴰⵙ,

ⴰⴷ ⵜⴻⵅⵥⴰⵔⴻⴷ ⴷⴻⴳ ⵡⴻⵏⵏⴻⴹ, ⴰⴷ ⵜᵉⵟⵟⵙⴻⴷ ⴷⵉ ⵍⵀⵓⴷⵏⴻⵜ.   

19 ⴰⴷ ⵜⴻⵥⵥⵍⴻⴷ, ⵏⵀⵍⴰ ⵎⴰ ⵛⴻⴽ ⵉⵙⵙⵏⴻⵅⵍⴻⵄ ⵓⵍⴰ ⴷ ⵉⵊⵊ,

ⵓⵛⴰ ⴰⵟⵟⴰⵙ ⵉ ⵛⴻⴽ ⵉ ⵖⴰ ⵥⴰⵡⴳⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ.   

20 ⵎⴰⵛⴰ ⵜⵉⵟⵟⴰⵡⵉⵏ ⵏ ⵉⵄⴻⴼⴼⴰⵏⴻⵏ ⴰⴷ ⴷⴷⴰⵔⵖⵍⴻⵏⵜ,

ⵇⴰⵄ ⵜⴰⵔⴻⵡⵍⴰ ⴰⴷ ⴰⵙⴻⵏ ⵜⵡⴻⴷⴷⴰⵔ,

ⴰⴷ ⵎⴻⵥⵔⴻⵏ ⴰⴷ ⴷⴻⵍⵇⴻⵏ ⵉ ⴱⵓⵃⴱⴻⵍ.