ⴰⵢⵓⴱ 8

ⵍⵃⴰⵔⴷ ⴰⵎⴻⵥⵡⴰⵔⵓ ⵏ ⴱⵉⵍⴷⴰⴷ ⴰⴽ-ⴷ ⴰⵢⵓⴱ

1 ⵅⴰⵙ ⵓⵛⴰ ⵢⴰⵔⵔⴰ-ⴷⴷ ⴱⵉⵍⴷⴰⴷ, ⵡⴻⵏⵏⵉ ⴷⴷ-ⵢⵓⵙⵉⵏ ⵥⵉ ⵛⵓⵃⴰ, ⵉⵏⵏⴰ:

2 ⵎⴻⵛⵃⴰⵍ ⵉ ⵖⴰ ⵜⴻⴽⴽⴻⴷ ⵜⴻⵙⵙⴰⵡⴰⵍⴻⴷ ⴰⵎⵎⵓ,

ⴰⴷ ⵉⵍⵉⵏ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⴽ ⴰⵎⴻⵛⵏⴰⵡ ⴰⵚⴻⵎⵎⵉⴹ ⵏ ⵜⵀⴰⵔⵢⴰⴹⵜ.

3 ⵎⴰ ⴰⴷ ⵉⵙⵙⴼⴰⵔⵖ ⴰⵔⴻⴱⴱⵉ ⵜⴰⵙⵖⴰⵔⵜ,

ⵏⵉⵖ ⴰⴷ ⵉⵙⵙⴼⴰⵔⵖ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⵜⴰⵙⴻⴳⴷⴰ?   

4 ⵎⴰⵍⴰ ⴰⴽⵉⴷⴻⵙ ⵅⴹⴰⵏ ⵉⵃⴻⵏⵊⵉⵔⴻⵏ ⵏⵏⴻⴽ,

ⴰⵇⴰ ⵉⵙⵙⴻⴽⴽ ⵉ-ⵜⴻⵏ ⴷⴻⴳ ⵓⴼⵓⵙ ⵏ ⵓⵅⴻⵟⵟⵓ ⵏⵙⴻⵏ.

5 ⵎⴰⵍⴰ ⵛⴻⴽ ⵜⴰⵔⴻⵥⵥⵓⴷ ⴰⵔⴻⴱⴱⵉ ⵙ ⵊⵊⴻⵀⴷ,

ⵓ ⵜᵉⵜⵜⵥⴰⵡⴳⴻⴷ ⴰⵃⵉⵏⵏⵉ ⵖⴰⵔ ⵓⵎⵥⴻⵎⵎⴰⵔ ⵅ ⴽⵓⵍⵛⵉ,   

6 ⵎⴰⵍⴰ ⵜⴻⴵⵉⴷ ⴷ ⴰⵎⴻⵥⴷⴰⴳ ⵓ ⵜⵙⴻⴳⴳⵎⴻⴷ,

ⵅⴻⵏⵏⵉ ⴰⴷ ⴰⵛ ⵉⵡⵛⴰ ⵜⴰⵢⵏⵉⵜ ⵏⵉⵛⴰⵏ,

ⴰⴷ ⵉⵄⴷⴻⵍ ⵜⴰⵥⴻⴷⴷⵉⵖⵜ ⵏⵏⴻⴽ ⵉ ⵛⴻⴽ.

7 ⵜⴰⵎⴻⵥⵡⴰⵔⵓⵜ ⵏⵏⴻⴽ ⴰⴷ ⵜⵉⵍⵉ ⴷ ⵜⵓⵇⵍⵉⵞ,

ⵎⴰⵛⴰ ⵜⴰⵏⴻⴳⴳⴰⵔⵓⵜ ⵏⵏⴻⴽ ⴰⴷ ⵜⵉⵍⵉ ⵜⴻⵎⵖⴰⵔ.

8 ⵡⴰⵀ, ⵙⴻⵇⵙⴰ ⵅⴻⵏⵏⵉ ⵖⴰⵔ ⵊⵊⵉⵍ ⵉⵄⴷⵓⵏ,

ⵜⵜⵃⴻⴽⴽⴰⵔⴻⴷ ⴷⵉ ⵍⴻⵊⴷⵓⴷ ⵏⵙⴻⵏ.   

9 ⵎⴰⵖⴰⵔ ⵏⴻⵛⵛⵉⵏ ⵏ ⵉⴹⴻⵏⵏⴰⴹ ⵡⴰⵀⴰ, ⵡⴰⵔ ⵏⴻⵙⵙⵉⵏ ⵡⴰⵍⵓ,

ⵎⴰⵖⴰⵔ ⵓⵙⵙⴰⵏ ⵏⵏⴻⵖ ⵅ ⵜⴻⵎⵎⵓⵔⵜ ⴰⵎ ⵜⵉⵍⵉ.   

10 ⵎⴰ ⵡⴰⵔ ⵛⴻⴽ ⵙⵙⴻⵍⵎⵉⴷⴻⵏ ⵏⵉⵜⵏⵉ, ⵎⴰ ⵡⴰⵔ ⵖⴰⵔⴻⴽ ⵙⵙⵉⵡⵉⵍⴻⵏ,

ⵎⴰ ⵡⴰⵔ ⴷⴷ-ⵙⵙⵓⴼⴼⵓⵖⴻⵏ ⴰⵡⴰⵍⴻⵏ ⵥⴻⴳ ⵡⵓⵍ ⵏⵙⴻⵏ?

11 ⵎⴰ ⵉⵖⴻⵎⵎⵉ ⵓⵖⴰⵏⵉⵎ ⵏ ⴱⴰⴱⵉⵔⵓⵙ ⴱⵍⴰ ⵙⵙⴻⴱⵅⴻⵜ,

ⵎⴰ ⴰⴷ ⵉⵎⵖⴰⵔ ⵓⵖⴰⵏⵉⵎ ⵖⴰⵔ ⵜⵎⴰ ⵏ ⵢⴻⵖⵥⴰⵔ ⴱⵍⴰ ⴰⵎⴰⵏ?

12 ⵅⵎⵉ ⵉⵜⵜⵏⴻⵡⵡⴰⵔ, ⵡⴰⵔ ⵉⵎⵊⴰⵔ ⵄⴰⴷ,

ⵉⵜⵜⴰⵥⴻⵖ ⵇⴱⴻⵍ ⵎⴰⵔⵔⴰ ⴰⵔⵔⴱⵉⵄ ⵏⵏⴻⵖⵏⵉ.   

13 ⴰⵎⵎⵓ ⵉ ⴵⴰⵏ ⵉⵎⴻⵙⵔⴰⵇ ⵏ ⵎⴰⵔⵔⴰ ⵉⵏⵏⵉ ⵉⵜⵜⵓⵏ ⴰⵔⴻⴱⴱⵉ,

ⵍⴰⵢⴰⵙ ⵏ ⵓⵎⵏⴰⴼⴻⵇ ⴰⴷ ⵉⴼⵏⴰ.     

14 ⵎⵉⵏ ⵅⴻⴼ ⵉⵄⴻⵎⵎⴻⴷ, ⴰⴷ ⵉⵜⵜⵡⴰⵇⴹⴻⵄ,

ⵎⵉⵏ ⵅⴻⴼ ⵉⵜⵜⵛⴰⵍ, ⴰⴷ ⴷⴷ-ⵉⴱⴰⵏ ⴷ ⴰⵅⵎⴰⵍ ⵏ ⵇⵓⵏⴷⵄⴰ.

15 ⴰⴷ ⵉⵙⴻⵏⵏⴻⴷ ⵅ ⵜⴰⴷⴷⴰⵔⵜ ⵏⵏⴻⵙ, ⵎⴰⵛⴰ ⵡⴰⵔ ⵜᵉⵜⵜⴱⴻⴷⴷⵉ,

ⴰⴷ ⴷⴰⵢⴻⵙ ⵉⵛⴻⴱⴱⴰⵔ, ⵎⴰⵛⴰ ⵡⴰⵔ ⵜᵉⵜⵜⵖⵉⵎⵉ ⵜⴱⴻⴷⴷ.

16 ⵏⴻⵜⵜⴰ ⴷ ⴰⵥⵉⵥⴰ ⴷⵉ ⵜⴼⴰⵡⵜ ⵏ ⵜⴼⵓⵛⵜ,

ⵓ ⵍⴻⴼⵔⵓⵄ ⵏⵏⴻⵙ ⵉⵎⴻⵥⵢⴰⵏⴻⵏ ⵜⵜⴱⴻⵥⵥⴰⵄⴻⵏ ⵅ ⵡⴻⵃⵡⵉⵛ ⵏⵏⴻⵙ.

17 ⵉⵥⴻⵡⵔⴰⵏ ⵏⵏⴻⵙ ⵎⵎⵓⴷⴻⵏ ⵉⵅⴻⴼ ⵏⵙⴻⵏ ⵅ ⵉⵊⵊ ⵏ ⵓⵄⵓⵔⵔⵉⵛ ⵏ ⵢⴻⵥⵔⴰ,

ⵉⵜⵜⴰⵔⵊⴰ ⵉⵛⵜ ⵏ ⵜⴰⴷⴷⴰⵔⵜ ⵏ ⵢⴻⵥⵔⴰ ⵉ ⵢⵉⵅⴻⴼ ⵏⵏⴻⵙ.

18 ⵎⴰⵍⴰ ⵏⴻⵜⵜⴰ ⵉⵇⴻⴵⴻⵄ ⵉ-ⵜ ⵥⴻⴳ ⵡⴻⵎⵛⴰⵏ ⵏⵏⴻⵙ,

ⴰⴷ ⵜ ⵉⵏⴽⴰⵔ ⵡⴻⵎⵛⴰⵏ ⵏⵏⵉ, ⴰⴷ ⵢⵉⵏⵉ: ‘ⵄⴻⵎⵎⴰⵔⵚ ⵡⴰⵔ ⵛⴻⴽ ⵥⵔⵉⵖ!’

19 ⵅⵥⴰⵔ, ⵜⴰ ⵜⴻⴵⴰ ⴷ ⵍⴻⴼⵔⴰⵃⴻⵜ ⵏ ⵡⴻⴱⵔⵉⴷ ⵏ ⵜⵓⴷⴰⵔⵜ ⵏⵏⴻⵙ

ⵓ ⵉⵏⵏⴻⵖⵏⵉ ⴰⴷ ⵖⴻⵎⵢⴻⵏ ⵥⴻⴳ ⵓⵛⴰⵍ.

20 ⵅⵥⴰⵔ, ⴰⵔⴻⴱⴱⵉ ⵡⴰⵔ ⵉⵏⴻⵟⵟⴰⵔ ⵡⴻⵏⵏⵉ ⵉⴽⴻⵎⵍⴻⵏ

ⵓ ⵡⴰⵔ ⵉⵜⵜⵉⵛ ⴰⴼⵓⵙ ⵉ ⵉⵄⴻⴼⴼⴰⵏⴻⵏ.

21 ⵄⴰⴷ ⴰⴷ ⵉⵛⵛⵓⵔ ⴰⵇⴻⵎⵎⵓⵎ ⵏⵏⴻⴽ ⵙ ⵜⴹⴻⵃⵃⴰⵛⵜ,

ⵓ ⵉⵢⴻⵏⵛⵉⵛⴻⵏ ⵏⵏⴻⴽ ⵙ ⵓⵙⵍⵉⵡⵍⴻⵡ.

22 ⵉⵎⴻⵛⵔⴰⵀ ⵏⵏⴻⴽ ⴰⴷ ⵢⴰⵔⴹⴻⵏ ⵍⴻⴼⴹⵉⵃⴻⵜ,

ⵓ ⴰⵇⵉⴹⵓⵏ ⵏ ⵉⵄⴻⴼⴼⴰⵏⴻⵏ ⵡⴰⵔ ⵉⵜⵜⵉⵍⵉ ⵄⴰⴷ.