ⵍⴻⵃⴽⴰⵎⴻⵜ ⵉⵄⴻⴼⴼⵏⴻⵏ ⵏ ⵢⵓⵔⴰⵎ
21
1 ⵢⴰⵀⵓⵛⴰⴼⴰⵟ ⵉⴳⴳⴰ ⴰⴷ ⵢⴰⵔⴻⵢⵢⴻⵃ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⵜⵜⴰ ⵉⵜⵜⵡⴰⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ. ⵎⵎⵉⵙ ⵢⴰⵀⵓⵔⴰⵎ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. ■ 2 ⴰⵢⵜⵎⴰⵙ, ⵉⵃⴻⵏⵊⵉⵔⴻⵏ ⵏ ⵢⴰⵀⵓⵛⴰⴼⴰⵟ ⵜⵓⵖⴰ ⴰⵜⴻⵏ ⴷ ⵄⴰⵣⴰⵔⵢⴰ, ⵢⴰⵃⵉⵢⵉⵍ, ⵣⴰⴽⴰⵔⵉⵢⵢⴰ, ⵄⴰⵣⴰⵔⵢⴰⵀⵓ, ⵎⵉⵅⴰⵢⵉⵍ ⴷ ⵛⴰⴼⴰⵟⵢⴰ. ⵉⵏⴰ ⵎⴰⵔⵔⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵉⵙⵔⴰⵉⵍ. 3 ⴱⴰⴱⴰⵜⵙⴻⵏ ⵉⵡⵛⴰ ⴰⵙⴻⵏ ⴰⵟⵟⴰⵙ ⵏ ⵜⴻⵔⵣⵉⴼⵉⵏ ⵏ ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵇⵛⵓⵄ ⵉⵖⵍⴰⵏ ⵓⵍⴰ ⴷ ⵜⵉⵏⴻⴷⴷⴰⵎ ⵉⴼⴰⵔⵢⴻⵏ ⴷⵉ ⵢⴰⵀⵓⴷⴰ, ⵎⴰⵛⴰ ⵜⴰⴳⴻⵍⴷⵉⵜ ⵉⵡⵛⴰ ⵉ-ⵜⵜ ⵉ ⵢⴰⵀⵓⵔⴰⵎ, ⵎⴰⵖⴰⵔ ⵡⴰⵏⵉⵜⴰ ⵜⵓⵖⴰ ⴷ ⴰⵎⴻⵏⵣⵓ. 4 ⵓⵎⵉ ⵉⴽⴽⴰⵔ-ⴷⴷ ⵢⴰⵀⵓⵔⴰⵎ ⵅ ⵜⴳⴻⵍⴷⵉⵜ ⵏ ⴱⴰⴱⴰⵙ ⵓⵛⴰ ⵉⵎⵏⴻⵄ ⴷⵉ ⵜⵉⵣⴻⵎⵎⴰⵔ ⵏⵏⴻⵙ, ⵉⵏⵖⴰ ⵎⴰⵔⵔⴰ ⴰⵢⵜⵎⴰⵙ ⵙ ⵙⵙⵉⴼ, ⵓⵍⴰ ⴷ ⵛⴰ ⵏ ⵍⵃⵓⴽⴽⴰⵎ ⵏ ⵉⵙⵔⴰⵉⵍ. 5 ⵢⴰⵀⵓⵔⴰⵎ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⴷⵡⴻⵍ ⴷ ⴰⵊⴻⴵⵉⴷ. ⵏⴻⵜⵜⴰ ⵉⵃⴽⴻⵎ ⵜⵎⴻⵏⵢⴰ ⵏ ⵉⵙⴻⴳⴳⵯⵓⵙⴰ ⴷⵉ ⵓⵔⵛⴰⵍⵉⵎ. 6 ⵏⴻⵜⵜⴰ ⵢⵓⵢⵓⵔ ⴷⴻⴳ ⵡⴻⴱⵔⵉⴷ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ, ⴰⵎ ⵎⴰⵎⵎⴻⵛ ⵜⵓⵖⴰ ⵜⴻⴳⴳⴰ ⵜⴰⴷⴷⴰⵔⵜ ⵏ ⴰⵅⴰⴱ, ⵎⴰⵖⴰⵔ ⵢⴻⴵⵉⵙ ⵏ ⴰⵅⴰⴱ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵏⵏⴻⵙ. ⵏⴻⵜⵜⴰ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ. 7 ⵎⴰⵛⴰ ⵙⵉⴷⵉ ⵡⴰⵔ ⵉⵅⵙ ⴰⴷ ⵢⴰⵔⴻⴷⴷⴻⴵ ⴷⴰⵡⵓⴷ ⴷⵉ ⵟⵟⵡⴻⵄ ⵏ ⵍⵄⴰⵀⴷ ⵉ ⵉⴳⴳⴰ ⴰⴽ-ⴷ ⴷⴰⵡⵓⴷ, ⵓⵛⴰ ⵓⵍⴰ ⵓⵎⵉ ⴷ ⴰⵙ ⵜⵓⵖⴰ ⵉⵏⵏⴰ, ⴰⵇⴰ ⴰⴷ ⴰⵙ ⵉⵡⵛ ⵍⴻⴱⴷⴰ ⵉⵊⵊ ⵏ ⵍⴻⴼⵏⴰⵔ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ, ⵉ ⵏⴻⵜⵜⴰ ⵓ ⵉ ⵉⵃⴻⵏⵊⵉⵔⴻⵏ ⵏⵏⴻⵙ.
8 ⴷⴻⴳ ⵡⵓⵙⵙⴰⵏ ⵏⵏⴻⵙ ⵉⵅⵜⵓⵜⵜⴻⵍ ⵉⴷⵓⵎ ⵙ ⵓⵖⴻⵡⵡⴻⵖ ⵣⵉ ⵙⴰⴷⵓ ⵉⴼⴰⵙⵙⴻⵏ ⵏ ⵢⴰⵀⵓⴷⴰ, ⵓⵛⴰ ⴳⴳⵉⵏ ⵉⵊⵊ ⵏ ⵓⵊⴻⴵⵉⴷ ⵅ ⵢⵉⵅⴻⴼ ⵏⵙⴻⵏ. 9 ⵉⵄⴷⵓ ⵢⴰⵀⵓⵔⴰⵎ ⴰⴽ-ⴷ ⵎⴰⵔⵔⴰ ⵉⵎⴻⵇⵇⵔⴰⵏⴻⵏ ⵏⵏⴻⵙ ⴷ ⵎⴰⵔⵔⴰ ⵉⴽⴰⵔⵔⵓⵜⴻⵏ ⵏⵏⴻⵙ ⵏ ⵓⵎⴻⵏⵖⵉ. ⴰⵇⴰ ⵉⴽⴽⴰⵔ ⵙ ⴵⵉⵍⴻⵜ ⵓ ⵉⵖⵍⴻⴱ ⵅ ⴰⵢⵜ ⵏ ⵉⴷⵓⵎ ⵉⵏⵏⵉ ⵜⵓⵖⴰ ⵉ ⴷ ⴰⵙ ⴷⴷ-ⵉⵏⵏⴹⴻⵏ, ⵉ ⵏⴻⵜⵜⴰ ⵓ ⵉ ⵉⵎⴻⵇⵇⵔⴰⵏⴻⵏ ⵏ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ. 10 ⵡⴰⵅⵅⴰ ⴰⵎⴻⵏⵏⵉ ⵅⵜⵓⵜⵜⵍⴻⵏ ⴰⵢⵜ ⵏ ⵉⴷⵓⵎ ⵙ ⵓⵖⴻⵡⵡⴻⵖ ⵣⵉ ⵊⴰⵔ ⵉⴼⴰⵙⵙⴻⵏ ⵏ ⵢⴰⵀⵓⴷⴰ, ⴰⵍ ⴰⵙⵙ-ⴰ. ⴷⵉ ⵍⵡⴻⵇⵜ ⵏⵏⵉ ⴱⴻⵄⴷⴰ ⵉⵖⴻⵡⵡⴻⵖ ⵓⵍⴰ ⴷ ⵍⵉⴱⵏⴰ, ⵎⴰⵖⴰⵔ ⵜⵓⵖⴰ ⵢⴰⵀⵓⴷⴰ ⵉⵃⴻⵢⵢⴻⴷ ⵅ ⵙⵉⴷⵉ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵏⴻⵙ.
11 ⵉⴳⴳⴰ ⵢⴰⵀⵓⵔⴰⵎ ⵓⵍⴰ ⴷ ⵍⴻⴳⵄⵓⴷⵉ ⵅ ⵉⴷⵓⵔⴰⵔ ⵏ ⵢⴰⵀⵓⴷⴰ. ⵏⴻⵜⵜⴰ ⵢⴰⵔⵔⴰ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⴰⴷ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵙ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ, ⵡⴰⵀ, ⵜⵓⵖⴰ ⵉⵄⴰⵔⵏ ⵢⴰⵀⵓⴷⴰ ⵖⴰⵔ ⵎⴰⵏ ⴰⵢⴰ. 12 ⵜⵉⵡⴻⴹ-ⴷⴷ ⵖⴰⵔⴻⵙ ⵉⵛⵜ ⵏ ⵜⴻⴱⵔⴰⵜ ⵏ ⵓⵏⴰⴱⵉ ⵉⵍⵉⵢⴰ, ⵜⴻⵇⵇⴰⵔ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⴱⴰⴱⴰⵛ ⴷⴰⵡⵓⴷ: ‘ⵎⴰⵖⴰⵔ ⵡⴰⵔ ⵜⵓⵢⵓⵔⴻⴷ ⵅ ⵉⴱⵔⵉⴷⴻⵏ ⵏ ⴱⴰⴱⴰⵛ ⵢⴰⵀⵓⵛⴰⴼⴰⵟ ⵓ ⵅ ⵉⴱⵔⵉⴷⴻⵏ ⵏ ⴰⵙⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, 13 ⵎⴰⵛⴰ ⵜⵓⵢⵓⵔⴻⴷ ⵅ ⵉⴱⵔⵉⴷⴻⵏ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ, ⵓⵛⴰ ⵜⴰⵔⵔⵉⴷ ⵢⴰⵀⵓⴷⴰ ⴷ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⴰⴷ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵙ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ, ⴷⴻⴳ ⵡⴻⴱⵔⵉⴷ ⵏ ⴼⴰⵔⵇ-ⵛⵖⴻⵍ ⵏ ⵜⴰⴷⴷⴰⵔⵜ ⵏ ⴰⵅⴰⴱ, ⵓ ⵎⵉⵏⵣⵉ ⵛⴻⴽ ⵜⴻⵏⵖⵉⴷ ⵓⵍⴰ ⴷ ⴰⵢⵜⵎⴰⵛ ⵣⵉ ⵜⴰⴷⴷⴰⵔⵜ ⵏ ⴱⴰⴱⴰⵛ, ⵉⵏⵏⵉ ⵜⵓⵖⴰ ⵉⵛⵏⴰⵏ ⵅⴰⴽ, 14 ⵅⵣⴰⵔ, ⵅ ⵓⵢⴻⵏⵏⵉ ⵙⵉⴷⵉ ⴰⴷ ⵛⴻⴽ ⵉⵍⵇⴻⴼ ⵙ ⵉⵛⵜ ⵏ ⵜⴻⵛⵜⵉ ⴷ ⵜⴰⵎⴻⵇⵇⵔⴰⵏⵜ ⵊⴰⵔ ⵍⴳⴻⵏⵙ ⵏⵏⴻⵛ ⴷ ⵉⵃⴻⵏⵊⵉⵔⴻⵏ ⵏⵏⴻⵛ ⴷ ⵜⴻⵎⵖⴰⵔⵉⵏ ⵏⵏⴻⵛ ⴷ ⵎⴰⵔⵔⴰ ⴰⴳⵍⴰ ⵏⵏⴻⵛ. 15 ⵛⴻⴽ ⵙⵉⵎⴰⵏⵜ ⵏⵏⴻⵛ ⴰⴷ ⵜⴻⵡⴹⵉⴷ ⴷⴻⴳ ⵉⵊⵊ ⵏ ⵍⴻⵀⵍⴰⵛ ⵏ ⵜⴻⴽⵔⵉⵛⵜ ⵉⵇⴻⵙⵃⴻⵏ, ⴰⵍ ⴷⴷ ⵖⴰ ⵜⴻⴼⴼⴻⵖ ⵄⴰⴷ ⵜⴻⴽⵔⵉⵛⵜ ⵏⵏⴻⵛ ⵖⴰⵔ ⴱⴰⵔⵔⴰ ⵣⵉ ⵙⵙⵉⴱⴱⴻⵜ ⵏ ⵍⴻⵀⵍⴰⵛ ⵉ ⵉⵜⵜⴷⵓⵎⴰⵏ.’”
16 ⵙⵉⴷⵉ ⵉⵙⵙⴻⵀⵡⴻⵍ ⵅ ⵢⴰⵀⵓⵔⴰⵎ ⴰⵔⵔⵓⵃ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷ ⵡⴻⵄⵔⴰⴱⴻⵏ, ⵉⵏⵏⵉ ⵉⵣⴻⴷⵖⴻⵏ ⵅ ⵓⵖⴻⵣⴷⵉⵙ ⵏ ⴰⵢⵜ ⵏ ⴽⵓⵛ. 17 ⵏⵉⵜⵏⵉ ⴳⴻⵄⵄⴷⴻⵏ ⵖⴰⵔ ⵢⴰⵀⵓⴷⴰ, ⵓⴷⴼⴻⵏ ⵖⴰⵔ ⵜⴰⵎⵎⵓⵔⵜ ⵓ ⴽⵙⵉⵏ ⵎⴰⵔⵔⴰ ⴰⴳⵍⴰ ⵏⵏⵉ ⵉⴵⴰⵏ ⴷⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ, ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⴻⵎⵖⴰⵔⵉⵏ ⵏⵏⴻⵙ, ⴰⵍⴰⵎⵉ ⵡⴰⵔ ⴷ ⴰⵙ ⵉⵇⵇⵉⵎ ⵎⵖⵉⵔ ⵢⴰⵀⵓⵢⴰⵃⴰⵣ, ⴰⵎⴰⵥⵓⵥ ⵏ ⵉⵃⴻⵏⵊⵉⵔⴻⵏ ⵏⵏⴻⵙ. 18 ⴰⵡⴰⵔⵏⵉ ⴰⵢⴰ ⵉⵡⵜⴰ ⵉ-ⵜ ⵙⵉⴷⵉ ⵙ ⵢⵉⵊⵊ ⵏ ⵍⴻⵀⵍⴰⵛ ⵡⴰⵔ ⵉⵣⴻⵎⵎⴰⵔ ⴰⴷ ⵣⵣⴰⵢⴻⵙ ⵉⴳⴳⴻⵏⴼⴰ. 19 ⵓⵎⵉ ⵜⵓⵖⴰ ⵏⴻⵜⵜⴰ ⵉⵀⵍⴻⵛ ⴰⵎⵎⵓ ⴰⵙⵙ ⵉⴹⴼⴰⵔ ⵓⵎⴰⵙ, ⵓⵛⴰ ⵜⴻⵄⴷⵓ ⵍⵡⴻⵇⵜ ⴰⵍⴰⵎⵉ ⵄⴷⵓⵏ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ, ⵉⵎⵙⴰⵔ, ⴰⵇⴰ ⵜⴰⴽⵔⵉⵛⵜ ⵏⵏⴻⵙ ⵜⴻⴼⴼⴻⵖ-ⴷⴷ ⵖⴰⵔ ⴱⴰⵔⵔⴰ, ⵓ ⵏⴻⵜⵜⴰ ⵉⵎⵎⵓⵜ ⵙ ⵍⴻⵃⵍⵉⵇ ⴷ ⴰⵎⴻⵇⵇⵔⴰⵏ. ⵍⴳⴻⵏⵙ ⵏⵏⴻⵙ ⵡⴰⵔ ⴷ ⴰⵙ ⵉⵙⵙⴰⵔⵖ ⵛⴰ ⵜⵎⴻⵙⵙⵉ ⴰⵎ ⴳⴳⵉⵏ ⵜⵉⵎⴻⵙⵙⵉ ⵉ ⵍⴻⵊⴷⵓⴷ ⵏⵏⴻⵙ. 20 ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⴷⵡⴻⵍ ⴷ ⴰⵊⴻⴵⵉⴷ. ⵏⴻⵜⵜⴰ ⵉⵃⴽⴻⵎ ⵜⵎⴻⵏⵢⴰ ⵏ ⵉⵙⴻⴳⴳⵯⵓⵙⴰ ⴷⵉ ⵓⵔⵛⴰⵍⵉⵎ. ⵏⴻⵜⵜⴰ ⵉⴼⵏⴰ, ⵡⴰⵔ ⵅⴰⵙ ⵉⵏⴷⴻⴱ ⵃⴻⴷ. ⵏⴻⴹⵍⴻⵏ ⵜ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ, ⵎⴰⵛⴰ ⵡⴰⵔ ⵉⴵⵉ ⴷⴻⴳ ⵉⵎⴻⴹⵍⴰⵏ ⵏ ⵉⵊⴻⴵⵉⴷⴻⵏ.