ⵢⴰⵀⵓⵛⴰⴼⴰⵟ ⴷ ⵓⵎⵡⴰⵍⴰⵡ
19
1 ⵉⵄⵇⴻⴱ-ⴷⴷ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵖⴰⵔ ⵜⴰⴷⴷⴰⵔⵜ ⵏⵏⴻⵙ ⴷⵉ ⵓⵔⵛⴰⵍⵉⵎ ⴷⵉ ⵍⴻⵀⵏⴰ. 2 ⵢⴰⵀⵓ, ⵎⵎⵉⵙ ⵏ ⵃⴰⵏⴰⵏⵉ, ⴰⵎⵡⴰⵍⴰⵡ, ⵉⴼⴼⴻⵖ-ⴷⴷ ⵖⴰⵔⴻⵙ ⵃⵉⵎⴰ ⴰⴷ ⵜ ⵉⵍⵇⴰ, ⵉⵏⵏⴰ ⵉ ⵓⵊⴻⴵⵉⴷ ⵢⴰⵀⵓⵛⴰⴼⴰⵟ: “ⵎⴰ ⵛⴻⴽ ⵜⴻⴳⴳⵉⴷ ⵜⵡⵉⵣⴰ ⵉ ⵓⵄⴻⴼⴼⴰⵏ ⵓ ⴰⴷ ⵜⴻⵅⵙⴻⴷ ⵉⵏⵏⵉ ⵉⵄⵉⴼⴼⴻⵏ ⵙⵉⴷⵉ? ⴰⵎⵎⵓ ⵉ ⵅⴰⴽ ⴷⴷ-ⵢⵓⵙⴰ ⵓⴷⵓⵇⵇⴻⵣ ⵏ ⵡⴻⵖⴹⴰⴱ ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵙⵉⴷⵉ. 3 ⵡⴰⵅⵅⴰ ⴰⵎⴻⵏⵏⵉ ⵉⵜⵜⵡⴰⴼ ⴷⴰⵢⴻⴽ ⵎⵉⵏ ⵉⵚⴻⴱⵃⴻⵏ, ⵎⴰⵖⴰⵔ ⵜⴻⴽⴽⵙⴻⴷ ⵜⵉⵔⴻⴱⴱⵉⵏ ⵏ ⵛⵡⴰⵔⵜⵉ ⵣⵉ ⵜⴻⵎⵎⵓⵔⵜ ⵓⵛⴰ ⵜⴻⵙⵙⵡⴻⵊⴷⴻⴷ ⵓⵍ ⵏⵏⴻⵛ ⵉ ⵜⴰⵔⴻⵣⵣⵓⵜ ⵅ ⴰⵔⴻⴱⴱⵉ.” 4 ⵢⴰⵀⵓⵛⴰⴼⴰⵟ ⵉⵇⵇⵉⵎ ⵉⵣⴻⴷⴷⴻⵖ ⴷⵉ ⵓⵔⵛⴰⵍⵉⵎ ⵓⵛⴰ ⵉⴼⴼⴻⵖ ⵄⴰⵡⴻⴷ ⵊⴰⵔ ⵍⴳⴻⵏⵙ, ⵣⵉ ⴱⵉ’ⵔ-ⵙⴻⴱⵄⴰ ⵖⴰⵔ ⵉⴷⵓⵔⴰⵔ ⵏ ⵉⴼⵔⴰⵢⵉⵎ, ⵓⵛⴰ ⵢⴰⵔⵔⴰ ⵉ-ⵜⴻⵏ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵙⴻⵏ. 5 ⵏⴻⵜⵜⴰ ⵢⴰⵍⴻⵇⵇⴻⵎ ⵍⵇⵓⴹⴰⵜ ⴷⵉ ⵜⴻⵎⵎⵓⵔⵜ, ⴷⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵉⴼⴰⵔⵢⴻⵏ ⵏ ⵢⴰⵀⵓⴷⴰ, ⵣⵉ ⵜⴻⵏⴷⵉⵏⵜ ⴰⵍ ⵜⴰⵏⴷⵉⵏⵜ. 6 ⵏⴻⵜⵜⴰ ⵉⵏⵏⴰ ⵉ ⵍⵇⵓⴹⴰⵜ: “ⵅⵣⴰⵔⴻⵎ ⵎⵉⵏ ⵖⴰ ⵜⴻⴳⴳⴻⵎ, ⵎⴰⵖⴰⵔ ⵡⴰⵔ ⵜⵃⴻⴽⴽⵎⴻⵎ ⵉ ⵉⵡⴷⴰⵏ, ⵎⴰⵛⴰ ⵉ ⵙⵉⴷⵉ ⵓ ⵏⴻⵜⵜⴰ ⴰⵇⴰ ⵉⵃⴹⴰⵔ ⴰⴽⵉⴷⵡⴻⵎ ⴷⴻⴳ ⵡⴻⵃⴽⴰⵎ. 7 ⵅⴻⵏⵏⵉ ⵍⴻⵅⵅⵓ, ⴰⴷ ⵅⴰⵡⴻⵎ ⵜⵉⵍⵉ ⵜⵉⴳⴳⵯⵓⴷⵉ ⵏ ⵙⵉⴷⵉ. ⵃⴹⴰⵎ ⵓ ⴳⴳⴻⵎ ⵜ, ⵎⴰⵖⴰⵔ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵡⴰⵔ ⵉⴵⵉ ⵍⵖⴻⵛⵛ, ⵏⴻⵜⵜⴰ ⵡⴰⵔ ⵉⵜⵜⴻⴳⴳ ⵙ ⵡⵓⴷⵎⴰⵡⴻⵏ ⵓ ⵡⴰⵔ ⵉⴽⴻⵙⵙⵉ ⵜⵉⵔⵣⵉⴼⵉⵏ.”
8 ⵓⵎⵉ ⴷⴷ-ⵄⴻⵇⴱⴻⵏ ⵖⴰⵔ ⵓⵔⵛⴰⵍⵉⵎ, ⵉⴳⴳⴰ ⵢⴰⵀⵓⵛⴰⴼⴰⵟ ⴷⵉ ⵓⵔⵛⴰⵍⵉⵎ ⵄⴰⵡⴻⴷ ⵛⴰ ⵏ ⵉⵍⴰⵡⵉⵢⵢⴻⵏ ⴷ ⵉⴽⴻⵀⵀⴰⵏⴻⵏ ⴷ ⵉⵣⴻⴵⵉⴼⴻⵏ ⵏ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏ ⵉⵙⵔⴰⵉⵍ ⵉ ⵓⴷⴻⴱⴱⴰⵔ ⵏ ⵍⴻⵃⴽⴰⵎ ⵏ ⵙⵉⴷⵉ ⵓ ⵉ ⴷⴷⵄⴰⵡⵉ. 9 ⵏⴻⵜⵜⴰ ⵢⵓⵎⵓⵔ ⵉ-ⵜⴻⵏ, ⵉⵏⵏⴰ: “ⴳⴳⴻⵎ ⵙ ⵜⵉⴳⴳⵯⵓⴷⵉ ⵏ ⵙⵉⴷⵉ, ⵙ ⵍⴰⵎⴰⵏ ⵓ ⵙ ⵢⵉⵊⵊ ⵏ ⵡⵓⵍ ⵏⵉⵛⴰⵏ ⵉⵎⵓⵏ. 10 ⵖⴰⵔ ⴽⵓⵍ ⴷⴷⴻⵄⵡⴻⵜ ⵉ ⴷ ⴰⵡⴻⵎ ⵉ ⴷ ⵖⴰ ⵢⴰⵡⵢⴻⵏ ⴰⵢⵜⵎⴰⵜⵡⴻⵎ ⵏⵏⵉ ⵉⵣⴻⴷⴷⵖⴻⵏ ⴷⵉ ⵜⵏⴻⴷⴷⴰⵎ ⵏⵙⴻⵏ, ⵊⴰⵔ ⵉⴷⴰⵎⵎⴻⵏ ⴷ ⵉⴷⴰⵎⵎⴻⵏ ⵓ ⵊⴰⵔ ⵛⵛⴰⵔⵉⵄⴰ ⴷ ⵍⵓⵎⵓⵔ ⴷ ⵜⵡⴻⵚⵚⴰ ⴷ ⵍⴼⴰⵔⴰⵢⵉⴹ, ⵉⵜⵜⵅⴻⵚⵚⴰ ⴰⴷ ⴰⵙⴻⵏ ⵜⵄⴻⵍⵎⴻⵎ, ⵎⴰⵃⴻⵏⴷ ⵡⴰⵔ ⵅⴰⵡⴻⵎ ⵙⵙⴰⵔⴻⴱⴱⵓⵏ ⴷⴷⴻⵏⴱ ⵣⵣⴰⵜ ⵉ ⵙⵉⴷⵉ, ⴰⵍⴰⵎⵉ ⵅⴰⵡⴻⵎ ⴷⴷ ⵖⴰ ⵉⵡⴹⴰ ⵓⴷⵓⵇⵇⴻⵣ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵓ ⵅ ⴰⵢⵜⵎⴰⵜⵡⴻⵎ. ⴳⴳⴻⵎ ⴰⵎⴻⵏⵏⵉ, ⴰⵍⴰⵎⵉ ⵡⴰⵔ ⵜᵉⵙⵙⴰⵔⴻⴱⴱⵓⵎ ⴷⴷⴻⵏⴱ ⵅ ⵢⵉⵅⴻⴼ ⵏⵡⴻⵎ. 11 ⵅⵣⴰⵔⴻⵎ, ⴰⵎⴰⵔⵢⴰ ⴷ ⴰⴽⴻⵀⵀⴰⵏ ⴰⵎⴻⵇⵇⵔⴰⵏ ⵉ ⵅⴰⵡⴻⵎ ⵉⴵⴰⵏ ⴷⵉ ⵎⴰⵔⵔⴰ ⴷⴷⴻⵄⵡⴻⵜ ⵏ ⵙⵉⴷⵉ, ⵓ ⵣⴰⴱⴰⴷⵢⴰ, ⵎⵎⵉⵙ ⵏ ⵉⵙⵎⴰⵄⵉⵍ, ⵍⵃⴰⴽⴻⵎ ⵅ ⵜⴰⴷⴷⴰⵔⵜ ⵏ ⵢⴰⵀⵓⴷⴰ, ⴰⵇⴰ-ⵜ ⵅ ⴽⵓⵍ ⴷⴷⴻⵄⵡⴻⵜ ⵏ ⵓⵊⴻⴵⵉⴷ. ⵓⵍⴰ ⴷ ⵉⵎⴻⵃⴹⴰⵢⴻⵏ, ⵉⵍⴰⵡⵉⵢⵢⴻⵏ, ⴰⵇⴰ ⴰⵜⴻⵏ ⴷⵉⵏ ⵣⵣⴰⵜ ⵉ ⵡⵓⴷⴻⵎ ⵏⵡⴻⵎ. ⵉⵍⵉⵎ ⴷ ⵉⵔⵢⴰⵣⴻⵏ ⵓ ⴳⴳⴻⵎ ⵜ, ⵓⵛⴰ ⵙⵉⴷⵉ ⴰⴷ ⵢⵉⵍⵉ ⴰⴽ-ⴷ ⵡⴻⵏⵏⵉ ⵉⵚⴻⵍⵃⴻⵏ.”