ⵍⴻⵃⵍⴰⵛ ⵏ ⵀⴰⵣⴰⵇⵉⵢⴰ ⴷ ⵓⵙⴳⴻⵏⴼⵉ ⵏⵏⴻⵙ
20
1 ⴷⴻⴳ ⵡⵓⵙⵙⴰⵏ ⵏⵏⵉ ⵉⵃⵍⴻⵛ ⵃⵉⵣⵇⵉⵢⴰ ⵙ ⵉⵊⵊ ⵏ ⵍⴻⵃⵍⴰⵛ ⵉⵏⴻⵇⵇⴻⵏ. ⵢⵓⵙⴰ-ⴷⴷ ⵖⴰⵔⴻⵙ ⵓⵏⴰⴱⵉ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ, ⵉⵏⵏⴰ ⴰⵙ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⴻⵡⵛ ⵍⵓⵎⵓⵔⴰⵜ ⵉ ⵜⴰⴷⴷⴰⵔⵜ ⵏⵏⴻⵛ, ⵎⴰⵖⴰⵔ ⴰⴷ ⵜⴻⵎⵎⵜⴻⴷ, ⵡⴰⵔ ⵜᵉⵜⵜⵖⵉⵎⵉⴷ ⵜⴻⴷⴷⴰⵔⴻⴷ ⵄⴰⴷ ⴽⵜⴰⵔ.’ ” ■ 2 ⵅⴻⵏⵏⵉ ⵉⵏⵏⴻⵇⵍⴻⴱ ⵙ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵍⵃⵉⴹ ⵓⵛⴰ ⵉⵥⵓⴵ ⵉ ⵙⵉⴷⵉ, ⵉⵏⵏⴰ: 3 “ⴰ, ⵙⵉⴷⵉ, ⵄⵇⴻⵍ ⴰⵇⴰ ⵏⴻⵛⵛ ⵓⵢⵓⵔⴻⵖ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⵙ ⵍⴰⵎⴰⵏ ⵓ ⵙ ⵢⵉⵊⵊ ⵏ ⵡⵓⵍ ⵉⴽⴻⵎⵎⵍⴻⵏ ⵓ ⴳⴳⵉⵖ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵛ.” ⵓⵛⴰ ⵉⴱⴷⴰ ⵃⵉⵣⵇⵉⵢⴰ ⵉⵜⵜⵔⵓ ⵙ ⵊⵊⵀⴻⴷ. 4 ⵜⵓⵖⴰ ⵄⴰⴷ ⵡⴰⵔ ⵉⴼⴼⵉⵖ ⵉⵛⴰⵄⵢⴰ ⵣⵉ ⵍⵡⴻⵙⵟ ⵏ ⵜⴻⵏⴷⵉⵏⵜ, ⵍⴰⵎⵉ ⵖⴰⵔⴻⵙ ⴷⴷ-ⵢⵓⵙⴰ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 5 “ⵄⵇⴻⴱ, ⵉⵏⵉ ⵉ ⵃⵉⵣⵇⵉⵢⴰ, ⵍⵃⴰⴽⴻⵎ ⵏ ⵍⴳⴻⵏⵙ ⵉⵏⵓ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⴱⴰⴱⴰⵛ ⴷⴰⵡⵓⴷ: ⵏⴻⵛⵛ ⵙⵍⵉⵖ ⵉ ⵜⵥⴰⴵⵉⵜ ⵏⵏⴻⵛ ⵓ ⵥⵔⵉⵖ ⵉ ⵉⵎⴻⵟⵟⴰⵡⴻⵏ ⵏⵏⴻⵛ. ⵅⵣⴰⵔ, ⴰⴷ ⵛⴻⴽ ⵙⵙⴳⴻⵏⴼⵉⵖ. ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⴰⴷ ⵜⴳⴻⵄⵄⴷⴻⴷ ⵄⴰⵡⴻⴷ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ. 6 ⵏⴻⵛⵛ ⴰⴷ ⴰⵔⵏⵉⵖ ⵅⴻⵎⵎⴻⵙⵟⴰⵛ ⵏ ⵉⵙⴻⴳⴳⵯⵓⵙⴰ ⵉ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵛ ⵓ ⴰⴷ ⵛⴻⴽ ⴼⴻⴽⴽⴻⵖ ⵣⴻⴳ ⵓⴼⵓⵙ ⵏ ⵓⵊⴻⴵⵉⴷ ⵏ ⴰⵛⵛⵓⵔ, ⵓⵍⴰ ⴷ ⵜⴰⵏⴷⵉⵏⵜ. ⵏⴻⵛⵛ ⴰⴷ ⵙⵙⴻⵍⵇⵉⵖ ⵅ ⵜⴻⵏⴷⵉⵏⵜ-ⴰ ⴷⵉ ⵟⵟⵡⴻⵄ ⵉⵏⵓ ⵓ ⴷⵉ ⵟⵟⵡⴻⵄ ⵏ ⵓⵎⵙⴻⵅⵅⴰⵔ ⵉⵏⵓ ⴷⴰⵡⵓⴷ.’ ” 7 ⵅⴰⵙ ⵓⵛⴰ ⵉⵏⵏⴰ ⵉⵛⴰⵄⵢⴰ: “ⴽⵙⵉ ⵉⵊⵊ ⵏ ⵡⴻⵖⵔⵓⵎ ⵏ ⵜⴰⵣⴰⵔⵜ!” ⵏⵉⵜⵏⵉ ⵉⵡⵢⴻⵏ ⵜ-ⵉ-ⴷⴷ, ⵙⵙⴰⵔⵙⴻⵏ ⵅ ⵓⴱⵓⵄⵔⵓⵙ ⵓⵛⴰ ⵉⴷⵡⴻⵍ ⵉⴳⴳⴻⵏⴼⴰ. 8 ⵃⵉⵣⵇⵉⵢⴰ ⵎⴰⵛⴰ ⵉⵏⵏⴰ ⵉ ⵉⵛⴰⵄⵢⴰ: “ⵎⴰⵏ ⵍⴻⵄⵍⴰⵎⴻⵜ ⴰⵇⴰ ⵙⵉⴷⵉ ⴰⴷ ⴰⵢⵉ ⵉⵙⵙⴳⴻⵏⴼⴰ ⵓ ⵏⴻⵛⵛ ⴰⴷ ⴳⴻⵄⵄⴷⴻⵖ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ?” 9 ⵉⵏⵏⴰ ⵉⵛⴰⵄⵢⴰ: “ⴰⵢⴰ ⴰⴷ ⴰⵛ ⵜⵉⵍⵉ ⴷ ⵍⴻⵄⵍⴰⵎⴻⵜ ⵏ ⵙⵉⴷⵉ, ⴰⵇⴰ ⵙⵉⴷⵉ ⴰⴷ ⵉⵙⵙⴻⵇⴼⴻⵍ ⴰⵡⴰⵍ ⵏⵏⵉ ⵉⵙⵙⵉⵡⴻⵍ: ‘ⵎⴰ ⴰⴷ ⵜⵓⵢⵓⵔ ⵜⵉⵍⵉ ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ ⵖⴰⵔ ⵣⵣⴰⵜ ⵏⵉⵖ ⴰⴷ ⴷⴷ-ⵜⴻⵄⵇⴻⴱ ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ ⵖⴰⵔ ⴹⴻⴼⴼⴰⵔ?’ ” 10 ⵃⵉⵣⵇⵉⵢⴰ ⵉⵏⵏⴰ: “ⵉⵀⵡⴻⵏ ⵉ ⵜⵉⵍⵉ, ⵎⴰⵃⴻⵏⴷ ⴰⴷ ⵜⴻⵣⵣⵓⴳⴳⴰⵔ ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ, ⵍⵍⴰ, ⴻⵊⵊ ⵜⵉⵍⵉ ⴰⴷ ⵜⴻⵄⵇⴻⴱ ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ ⵖⴰⵔ ⴹⴻⴼⴼⴰⵔ.” □ 11 ⵓⵛⴰ ⵉⵍⴰⵖⴰ ⵓⵏⴰⴱⵉ ⵉⵛⴰⵄⵢⴰ ⵖⴰⵔ ⵙⵉⴷⵉ ⵓ ⵡⴰⵏⵉⵜⴰ ⵉⵊⵊⴰ ⵜⵉⵍⵉ ⴰⴷ ⵜⴻⵄⵇⴻⴱ ⵅ ⵜⵔⴻⴼⴼⵉⴷⵉⵏ ⵉ ⵅ ⵜⴻⵀⵡⴰ ⵅ ⴷⴷⵔⵓⵊ ⵏ ⴰⵃⴰⵣ: ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ ⵖⴰⵔ ⴹⴻⴼⴼⴰⵔ. ⵉⵔⴻⵇⵇⴰⵙⴻⵏ ⵣⵉ ⴱⴰⴱⵉⵍ
12 ⴷⵉ ⵍⵡⴻⵇⵜ ⵏⵏⵉ ⵉⵙⵙⴻⴽⴽ ⴱⴰⵔⴰⴷⵓⵅ-ⴱⴰⵍⴰⴷⴰⵏ, ⵎⵎⵉⵙ ⵏ ⴱⴰⵍⴰⴷⴰⵏ, ⴰⵊⴻⴵⵉⴷ ⵏ ⴱⴰⴱⵉⵍ, ⵜⵉⴱⵔⴰⵜⵉⵏ ⴷ ⵉⵛⵜ ⵏ ⵜⴰⵔⵣⴻⴼⵜ ⵖⴰⵔ ⵃⵉⵣⵇⵉⵢⴰ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵙⵍⴰ ⴰⵇⴰ ⵃⵉⵣⵇⵉⵢⴰ ⵉⵀⵍⴻⵛ. ■ 13 ⵃⵉⵣⵇⵉⵢⴰ ⵉⵙⵍⴰ ⴰⵙⴻⵏ ⵓⵛⴰ ⵉⵙⵙⵛⴻⵏ ⴰⵙⴻⵏ ⵎⴰⵔⵔⴰ ⵜⴰⴷⴷⴰⵔⵜ ⵏ ⵜⵅⵓⴱⴰⵢ ⵏⵏⴻⵙ: ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵄⵟⵓⵔ ⴷ ⵣⵣⴻⵛⵜ ⴷ ⵍⴻⵀⵔⵉ ⵏ ⵍⴻⵙⵏⴰⵃ ⵏⵏⴻⵙ ⴷ ⵎⴰⵔⵔⴰ ⵎⵉⵏ ⵉⵜⵜⵡⴰⴼⴻⵏ ⴷⴻⴳ ⵉⵅⵅⴰⵎⴻⵏ ⵏⵏⴻⵙ ⵏ ⵜⵅⵓⴱⴰⵢ. ⵡⴰⵔ ⵉⵇⵇⵉⵎ ⵡⴰⵍⵓ ⴷⵉ ⵜⴰⴷⴷⴰⵔⵜ ⵏⵏⴻⵙ ⵓ ⴷⵉ ⵎⴰⵔⵔⴰ ⵍⴻⵃⴽⴰⵎⴻⵜ ⵏⵏⴻⵙ ⵏⵏⵉ ⵡⴰⵔ ⵜⵓⵖⵉ ⴷ ⴰⵙⴻⵏ ⵜ ⵉⵙⵙⵛⴻⵏ.
14 ⵅⴻⵏⵏⵉ ⵢⵓⵙⴰ-ⴷⴷ ⵓⵏⴰⴱⵉ ⵉⵛⴰⵄⵢⴰ ⵖⴰⵔ ⵓⵊⴻⴵⵉⴷ ⵃⵉⵣⵇⵉⵢⴰ, ⵉⵏⵏⴰ ⴰⵙ: “ⵎⵉⵏ ⵏⵏⴰⵏ ⵉⵔⵢⴰⵣⴻⵏ ⵏⵏⵉ ⵓ ⵎⴰⵏⵉⵙ ⴷⴷ-ⵓⵙⵉⵏ ⵖⴰⵔⴻⴽ?” ⵃⵉⵣⵇⵉⵢⴰ ⵉⵏⵏⴰ: “ⵏⵉⵜⵏⵉ ⵓⵙⵉⵏ-ⴷⴷ ⵣⴻⴳ ⵉⵛⵜ ⵏ ⵜⴻⵎⵎⵓⵔⵜ ⵜⵉⴳⴳⵯⴻⵊ, ⵣⵉ ⴱⴰⴱⵉⵍ.” 15 ⵏⴻⵜⵜⴰ ⵉⵏⵏⴰ: “ⵎⵉⵏ ⵥⵔⵉⵏ ⵏⵉⵜⵏⵉ ⴷⵉ ⵜⴰⴷⴷⴰⵔⵜ ⵏⵏⴻⵛ?” ⵃⵉⵣⵇⵉⵢⴰ ⵉⵏⵏⴰ: “ⵏⵉⵜⵏⵉ ⵥⵔⵉⵏ ⵎⴰⵔⵔⴰ ⵎⵉⵏ ⵉⴵⴰⵏ ⴷⵉ ⵜⴰⴷⴷⴰⵔⵜ ⵉⵏⵓ. ⵡⴰⵔ ⵉⵇⵇⵉⵎ ⵛⴰ ⵣⵉ ⵎⵉⵏ ⵉⴵⴰⵏ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵉⵏⵓ, ⵡⴰⵔ ⴷ ⴰⵙⴻⵏ ⵜ ⵙⵙⴻⵛⵏⴻⵖ.” 16 ⵅⴻⵏⵏⵉ ⵉⵏⵏⴰ ⵉⵛⴰⵄⵢⴰ ⵉ ⵃⵉⵣⵇⵉⵢⴰ: “ⵙⴻⵍ ⵉ ⵡⴰⵡⴰⵍ ⵏ ⵙⵉⴷⵉ! 17 ‘ⴰⴷ ⴷⴷ-ⴰⵙⴻⵏ ⵡⵓⵙⵙⴰⵏ ⵎⴻⵍⵎⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷⵉ ⵜⴰⴷⴷⴰⵔⵜ ⵏⵏⴻⵛ ⵓⵍⴰ ⴷ ⵎⵉⵏ ⵢⴰⵔⵡⴻⵏ ⵍⴻⵊⴷⵓⴷ ⵏⵏⴻⵛ ⴰⵍ ⴰⵙⵙ-ⴰ, ⴰⴷ ⵜ ⴰⵡⵢⴻⵏ ⵖⴰⵔ ⴱⴰⴱⵉⵍ. ⵡⴰⵔ ⵉⵜⵜⵖⵉⵎⵉ ⵡⴰⵍⵓ, ⵉⵇⵇⴰⵔ ⵙⵉⴷⵉ. 18 ⴰⴷ ⴰⵡⵢⴻⵏ ⵓⵍⴰ ⵣⴻⴳ ⵉⵃⴻⵏⵊⵉⵔⴻⵏ ⵏⵏⴻⵛ ⵉⵏⵏⵉ ⴷⴷ ⵖⴰ ⵉⴼⴼⵖⴻⵏ ⵣⵣⴰⵢⴻⴽ, ⵉⵏⵏⵉ ⴷⴷ ⵖⴰ ⵜⴻⵊⵊⴻⴷ, ⵃⵉⵎⴰ ⴰⴷ ⵉⵍⵉⵏ ⴷ ⵉⵎⵙⴻⵅⵅⴰⵔⴻⵏ ⵉⵎⵛⴻⵏⵏⵄⴻⵏ ⴷⵉ ⵍⴻⵇⵚⴰⵔ ⵏ ⵓⵊⴻⴵⵉⴷ ⵏ ⴱⴰⴱⵉⵍ.’ ” 19 ⵃⵉⵣⵇⵉⵢⴰ ⵉⵏⵏⴰ ⵉ ⵉⵛⴰⵄⵢⴰ: “ⴰⵡⴰⵍ ⵏ ⵙⵉⴷⵉ ⵉ ⴷ ⴰⵢⵉ ⵜⴻⵏⵏⵉⴷ ⵉⵚⴱⴻⵃ.” ⵏⴻⵜⵜⴰ ⵉⵏⵏⴰ ⵄⴰⵡⴻⴷ: “ⵏⵉⵖ ⵍⵍⴰ, ⵎⴰⵍⴰ ⵅⴻⵏⵏⵉ ⴷⴻⴳ ⵡⵓⵙⵙⴰⵏ ⵉⵏⵓ ⴰⴷ ⴷⵉⵏ ⵢⵉⵍⵉ ⵍⴻⵀⵏⴰ ⴷ ⵍⴰⵎⴰⵏ!”
20 ⵉⵎⴻⵣⵔⵓⵢⴻⵏ ⵉⵇⵇⵉⵎⴻⵏ ⵏ ⵃⵉⵣⵇⵉⵢⴰ ⴷ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ ⵉⵎⴻⵃⴹⴻⵏ ⴷ ⵎⴰⵎⵎⴻⵛ ⵉⴳⴳⴰ ⴰⵢⴻⵍⵎⴰⵎ ⴷ ⵓⵇⴰⴷⵓⵙ ⵏ ⵡⴰⵎⴰⵏ ⵓ ⵎⴰⵎⵎⴻⵛ ⵉⵏⴷⴻⵀ ⴰⵎⴰⵏ ⴷⵉ ⵜⴻⵏⴷⵉⵏⵜ, ⵎⴰ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵜⵜⵡⴰⵣⴻⵎⵎⴻⵎ ⵛⴰ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ? ■ 21 ⵃⵉⵣⵇⵉⵢⴰ ⵉⴳⴳⴰ ⴰⴷ ⵢⴰⵔⴻⵢⵢⴻⵃ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵎⵎⵉⵙ ⵎⴰⵏⴰⵙⵙⴰ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ.