ⵢⴰⵀⵓ ⵉⵏⵖⴰ ⵍⴰⴵ ⵏ ⴰⵅⴰⴱ
10
1 ⴰⵅⴰⴱ ⵜⵓⵖⴰ ⵖⴰⵔⴻⵙ ⵙⴻⴱⵄⵉⵏ ⵏ ⵉⵃⴻⵏⵊⵉⵔⴻⵏ ⴷⵉ ⵙⴰⵎⴰⵔⵢⴰ. ⵢⴰⵀⵓ ⵢⵓⵔⴰ ⵜⵉⴱⵔⴰⵜⵉⵏ, ⵉⵙⵙⴻⴽⴽ ⵉ-ⵜⴻⵏⵜ ⵖⴰⵔ ⵙⴰⵎⴰⵔⵢⴰ ⵉ ⵉⵎⴻⵇⵇⵔⴰⵏⴻⵏ ⵏ ⵢⴰⵣⵔⴰⵄⵉⵍ, ⵉ ⵉⵎⵖⴰⵔⴻⵏ ⵓ ⵉ ⵢⵉⵏⵏⵉ ⵢⴰⵔⴻⴱⴱⴰⵏ ⵉⵃⴻⵏⵊⵉⵔⴻⵏ ⵏ ⴰⵅⴰⴱ. ⴷⴰⵢⵙⴻⵏⵜ ⵉⵏⵏⴰ: 2 “ⵎⴰⵍⴰ ⵍⴻⵅⵅⵓ ⵜⴰⴱⵔⴰⵜ-ⴰ ⵜⵓⵙⴰ-ⴷⴷ ⵖⴰⵔⵡⴻⵎ, ⴰⵎ ⵖⴰⵔⵡⴻⵎ ⵉⵃⴻⵏⵊⵉⵔⴻⵏ ⵏ ⵙⵉⴷⵉⵜⵡⴻⵎ ⵍⴰ ⴷ ⵉⴽⴰⵔⵔⵓⵜⴻⵏ ⴷ ⵢⴻⵢⵙⴰⵏ, ⴷ ⵉⵛⵜ ⵏ ⵜⴻⵏⴷⵉⵏⵜ ⵉⴼⴰⵔⵢⴻⵏ ⴷ ⵍⴻⵙⵏⴰⵃ, 3 ⴰⵔⵣⵓⵎ ⵅⴻⵏⵏⵉ ⵅ ⵢⵉⵏⵏⵉ ⵉⵚⴻⴱⵃⴻⵏ ⴷ ⵉⵏⵏⵉ ⵉⵎⴻⵃⴹⴻⵏ ⵇⴰⵄ ⵊⴰⵔ ⵉⵃⴻⵏⵊⵉⵔⴻⵏ ⵏ ⵙⵉⴷⵉⵜⵡⴻⵎ ⵓ ⵙⵖⵉⵎⴻⵎ ⵜ ⵅ ⵍⵄⴰⵔⵛ ⵏ ⴱⴰⴱⴰⵙ ⵓ ⵡⵜⴻⵎ ⴷⵉ ⵟⵟⵡⴻⵄ ⵏ ⵜⴰⴷⴷⴰⵔⵜ ⵏ ⵙⵉⴷⵉⵜⵡⴻⵎ.” 4 ⵎⴰⵛⴰ ⵏⵉⵜⵏⵉ ⴷⴻⵡⵍⴻⵏ ⵜⵜⴻⴳⴳⵯⴻⴷⴻⵏ ⴰⵟⵟⴰⵙ, ⵏⵏⴰⵏ: “ⵅⵣⴰⵔ, ⵜⵏⴰⵢⴻⵏ ⵏ ⵉⵊⴻⴵⵉⴷⴻⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵣⵣⴰⵜⴻⵙ, ⵎⴰⵎⵎⴻⵛ ⵉ ⵖⴰ ⵏⵣⴻⵎⵎⴰⵔ ⵏⴻⵛⵛⵉⵏ ⴰⴷ ⵏⴻⵇⵇⵉⵎ ⵏⴱⴻⴷⴷ?” 5 ⵉⵏⵏⵉ ⵉⴵⴰⵏ ⵅ ⵜⴰⴷⴷⴰⵔⵜ ⵓ ⵅ ⵜⴻⵏⴷⵉⵏⵜ, ⵉⵎⵖⴰⵔⴻⵏ ⴷ ⵢⵉⵏⵏⵉ ⵢⴰⵔⴻⴱⴱⴰⵏ ⵉⵃⴻⵏⵊⵉⵔⴻⵏ ⵏ ⴰⵅⴰⴱ, ⵙⵙⴻⴽⴽⴻⵏ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵢⴰⵀⵓ, ⵏⵏⴰⵏ: “ⵏⴻⵛⵛⵉⵏ ⴷ ⵉⵎⵙⴻⵅⵅⴰⵔⴻⵏ ⵏⵏⴻⵛ, ⵓ ⵎⴰⵔⵔⴰ ⵎⵉⵏ ⴷ ⴰⵏⴻⵖ ⵖⴰ ⵜⵉⵏⵉⴷ, ⴰⴷ ⵜ ⵏⴻⴳⴳ. ⵏⴻⵛⵛⵉⵏ ⵡⴰⵔ ⵏᵉⵜⵜⴻⴳⴳ ⵓⵍⴰ ⴷ ⵉⵊⵊ ⴷ ⴰⵊⴻⴵⵉⴷ. ⴻⴳⴳ ⵎⵉⵏ ⵜᵉⵜⵜⵡⴰⵍⵉⴷ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵛ.” 6 ⵅⴻⵏⵏⵉ ⵢⵓⵔⴰ ⵖⴰⵔⵙⴻⵏ ⵉⵛⵜ ⵏ ⵜⴻⴱⵔⴰⵜ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ, ⵉⵏⵏⴰ: “ⵎⴰⵍⴰ ⴰⵇⴰ ⴽⴻⵏⵏⵉⵡ ⵖⴰⵔ ⵓⵖⴻⵣⴷⵉⵙ ⵉⵏⵓ, ⴰⴷ ⵜⴻⵙⵍⴻⵎ ⵖⴰⵔ ⵎⵉⵏ ⵖⴰ ⵉⵏⵉⵖ, ⴽⵙⵉⵎ ⵅⴻⵏⵏⵉ ⵉⵣⴻⴵⵉⴼⴻⵏ ⵏ ⵉⵃⴻⵏⵊⵉⵔⴻⵏ ⵏ ⵙⵉⴷⵉⵜⵡⴻⵎ, ⵓ ⴰⵙⴻⵎ-ⴷⴷ ⵜⵉⵡⴻⵛⵛⴰ ⴰⵎⵎⵓ ⵖⴰⵔ ⵍⵡⴻⵇⵜ-ⴰ ⵖⴰⵔⵉ ⴷⵉ ⵢⴰⵣⵔⴰⵄⵉⵍ.” ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ, ⵙⴻⴱⵄⵉⵏ ⵏ ⵢⴻⵔⵢⴰⵣⴻⵏ, ⵜⵓⵖⴰ ⵣⴻⴷⴷⵖⴻⵏ ⵖⴰⵔ ⵉⵎⵛⴻⵏⵏⵄⴻⵏ ⵏ ⵜⴻⵏⴷⵉⵏⵜ, ⵉⵏⵏⵉ ⵜⴻⵏ ⵢⴰⵔⴻⴱⴱⴰⵏ. 7 ⵓⵎⵉ ⵖⴰⵔⵙⴻⵏ ⴷⴷ-ⵜⵉⵡⴻⴹ ⵜⴻⴱⵔⴰⵜ, ⵉⵎⵙⴰⵔ, ⴱⴻⵍⵍⵉ ⵏⵉⵜⵏⵉ ⵟⵟⴼⴻⵏ ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ, ⵏⵖⵉⵏ ⵜⴻⵏ ⵎⴰⵔⵔⴰ, ⵙⴻⴱⵄⵉⵏ ⵏ ⵢⴻⵔⵢⴰⵣⴻⵏ. ⵏⵉⵜⵏⵉ ⴳⴳⵉⵏ ⵉⵣⴻⴵⵉⴼⴻⵏ ⵏⵙⴻⵏ ⴷⵉ ⵍⴽⵓⵔⴱⴰⵜ ⵓⵛⴰ ⵙⵙⴻⴽⴽⴻⵏ ⵜⴻⵏⵜ ⵖⴰⵔⴻⵙ ⵖⴰⵔ ⵢⴰⵣⵔⴰⵄⵉⵍ. 8 ⵢⵓⵙⴰ-ⴷⴷ ⵓⵎⵙⴻⵅⵅⴰⵔ, ⵉⵙⵙⵉⵡⴻⴹ ⴰⵔⴻⵇⵇⴰⵙ, ⵉⵏⵏⴰ: “ⴰⵇⴰ ⵉⵡⵢⴻⵏ-ⴷⴷ ⵉⵣⴻⴵⵉⴼⴻⵏ ⵏ ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ.” ⵏⴻⵜⵜⴰ ⵢⴰⵔⵔⴰ-ⴷⴷ: “ⵙⴰⵔⵙⴻⵎ ⵜⴻⵏ ⴰⵍ ⵜⵉⵡⴻⵛⵛⴰ ⴷⵉ ⵜⵏⴰⵢⴻⵏ ⵏ ⵉⵄⵓⵔⵔⴰⵛ ⵖⴰⵔ ⵡⴰⴷⴰⴼ ⵏ ⵜⴻⵡⵡⴰⵔⵜ.” 9 ⵖⴰⵔ ⵜⵉⵡⴻⵛⵛⴰ, ⵓⵎⵉ ⵉⴼⴼⴻⵖ ⵖⴰⵔ ⴱⴰⵔⵔⴰ, ⵉⵎⵙⴰⵔ, ⴰⵇⴰ ⵉⴱⴻⴷⴷ ⴷⵉⵏ, ⵉⵏⵏⴰ ⵉ ⵎⴰⵔⵔⴰ ⵍⴳⴻⵏⵙ: “ⴽⴻⵏⵏⵉⵡ ⴷ ⵉⵎⵙⴻⴳⴳⴰⴷⴻⵏ. ⵅⵣⴰⵔⴻⵎ, ⴷ ⵏⴻⵛⵛ ⵉ ⵉⴳⴳⵉⵏ ⵉⵛⵜ ⵏ ⵜⵎⴻⵄⵎⵓⵍⵜ ⵅ ⵙⵉⴷⵉ ⵉⵏⵓ ⵓ ⵏⵖⵉⵖ ⵜ. ⵎⴰⵛⴰ ⵡⵉ ⵉⵏⵖⵉⵏ ⵎⴰⵔⵔⴰ ⵉⵏⴰ? 10 ⵙⵏⴻⵎ, ⴰⵇⴰ ⵡⴰⵔ ⵉⵡⴻⵟⵟⵉ ⵖⴰⵔ ⵜⴻⵎⵎⵓⵔⵜ ⵓⵍⴰ ⴷ ⵉⵊⵊ ⵏ ⵡⴰⵡⴰⵍ ⵏ ⵙⵉⴷⵉ ⵏⵏⵉ ⵉⵏⵏⴰ ⵙⵉⴷⵉ ⴹⵉⴷⴷ ⵉ ⵜⴰⴷⴷⴰⵔⵜ ⵏ ⴰⵅⴰⴱ, ⵎⴰⵖⴰⵔ ⵙⵉⴷⵉ ⵉⴳⴳⴰ ⵎⵉⵏ ⵜⵓⵖⴰ ⵉⵏⵏⴰ ⵙ ⵓⵇⴻⵎⵎⵓⵎ ⵏ ⵓⵎⵙⴻⵅⵅⴰⵔ ⵏⵏⴻⵙ ⵉⵍⵉⵛⴰⵄ.” □ ■ 11 ⵢⴰⵀⵓ ⵉⵏⵖⴰ ⵎⴰⵔⵔⴰ ⵡⵉ ⵉⵇⵇⵉⵎⴻⵏ ⵣⵉ ⵜⴰⴷⴷⴰⵔⵜ ⵏ ⴰⵅⴰⴱ ⴷⵉ ⵢⴰⵣⵔⴰⵄⵉⵍ ⵓⵍⴰ ⴷ ⵎⴰⵔⵔⴰ ⵉⵎⵛⴻⵏⵏⵄⴻⵏ ⵏⵏⴻⵙ ⴷ ⵉⵎⴻⴷⴷⵓⴽⴽⴰⵍ ⵏⵏⴻⵙ ⴷ ⵉⴽⴻⵀⵀⴰⵏⴻⵏ ⵏⵏⴻⵙ, ⴰⵍⴰⵎⵉ ⵡⴰⵔ ⵉⵊⵊⵉ ⴰⴷ ⵣⵣⴰⵢⴻⵙ ⵉⵇⵇⵉⵎ ⵓⵍⴰ ⴷ ⵉⵊⵊ ⵏ ⵓⵎⴰⵔⵡⴻⵍ.
12 ⵅⴻⵏⵏⵉ ⵉⴽⴽⴰⵔ ⵓⵛⴰ ⵉⵟⵟⴻⴼ ⴰⴱⵔⵉⴷ ⵖⴰⵔ ⵙⴰⵎⴰⵔⵢⴰ. ⵓⵎⵉ ⵜ ⵜⵓⵖⴰ ⵏⴻⵜⵜⴰ ⴷⴻⴳ ⵡⴻⴱⵔⵉⴷ, ⵉⵎⵙⴰⵔ ⴷⵉ ⵜⴰⴷⴷⴰⵔⵜ ⵏ ⵓⵎⴻⵍⵇⵉ ⵏ ⵉⵎⴻⴽⵙⴰⵡⴻⵏ, □ 13 ⴰⵇⴰ ⵉⵎⵎⴻⵍⵇⴰ ⵢⴰⵀⵓ ⴰⴽ-ⴷ ⴰⵡⵎⴰⵜⴻⵏ ⵏ ⴰⵅⴰⵣⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⵏⵏⴰ: “ⵎⵉⵏ ⵜⴻⵄⵏⴰⵎ ⴽⴻⵏⵏⵉⵡ?” ⵏⵉⵜⵏⵉ ⴰⵔⵔⵉⵏ-ⴷⴷ: “ⵏⴻⵛⵛⵉⵏ ⴷ ⴰⵡⵎⴰⵜⴻⵏ ⵏ ⴰⵅⴰⵣⵢⴰ ⵓ ⵏⴻⵀⵡⴰ-ⴷⴷ, ⵃⵉⵎⴰ ⴰⴷ ⵏⵙⴻⴵⴻⵎ ⵅ ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ ⴷ ⵉⵃⴻⵏⵊⵉⵔⴻⵏ ⵏ ⵜⵊⴻⴵⵉⴷⵜ.” ■ 14 ⵅⴻⵏⵏⵉ ⵉⵏⵏⴰ: “ⵟⵟⴼⴻⵎ ⵜⴻⵏ ⴷⴷⴰⵔⴻⵏ!” ⵟⵟⴼⴻⵏ ⵜⴻⵏ ⴷⴷⴰⵔⴻⵏ ⵓ ⵏⵖⵉⵏ ⵜⴻⵏ ⵖⴰⵔ ⵡⴰⵏⵓ ⵏ ⵜⴰⴷⴷⴰⵔⵜ ⵏ ⵉⵎⴻⴽⵙⴰⵡⴻⵏ. ⵜⵓⵖⴰ-ⵜⴻⵏ ⴷⵉ ⵜⵏⴰⵢⴻⵏ ⵓ ⴰⵔⴻⴱⵄⵉⵏ ⵏ ⵢⴻⵔⵢⴰⵣⴻⵏ. ⵡⴰⵔ ⵉⵊⵊⵉ ⵓⵍⴰ ⴷ ⵉⵊⵊ ⵣⵣⴰⵢⵙⴻⵏ ⵉⴷⴷⴰⵔ. 15 ⵏⴻⵜⵜⴰ ⵉⴼⴼⴻⵖ ⵙⵙⴻⵏⵏⵉ ⵓⵛⴰ ⵢⵓⴼⴰ ⵢⵓⵏⴰⴷⴰⴱ, ⵎⵎⵉⵙ ⵏ ⵔⵉⴽⴰⴱ, ⵡⴻⵏⵏⵉ ⴷⴷ-ⵉⴼⴼⵖⴻⵏ ⵉ ⵓⵎⵙⴰⴳⴰⵔ ⴰⴽⵉⴷⴻⵙ. ⵏⴻⵜⵜⴰ ⵉⵙⴻⴵⴻⵎ ⵅⴰⵙ, ⵉⵏⵏⴰ ⴰⵙ: “ⵎⴰ ⵓⵍ ⵏⵏⴻⵛ ⵉⵙⴻⴳⴳⴻⵎ ⴰⴽⵉⴷⵉ ⴰⵎ ⵎⴰⵎⵎⴻⵛ ⵉⵙⴻⴳⴳⴻⵎ ⵡⵓⵍ ⵉⵏⵓ ⴰⴽⵉⴷⴻⴽ?” ⵢⵓⵏⴰⴷⴰⴱ ⵢⴰⵔⵔⴰ-ⴷⴷ ⵅⴰⵙ: “ⴰⵎⴻⵏⵏⵉ, ⴰⵎⴻⵏⵏⵉ! ⴻⵡⵛ ⴰⵢⵉ-ⴷⴷ ⴰⴼⵓⵙ ⵏⵏⴻⵛ.” ⵏⴻⵜⵜⴰ ⵉⵡⵛⴰ ⴰⵙ ⴰⴼⵓⵙ ⵓⵛⴰ ⵉⵊⵊⴰ ⵉ-ⵜ ⴰⴷ ⴷⴷ-ⵉⵏⵉⵢ ⵖⴰⵔⴻⵙ ⴷⴻⴳ ⵓⴽⴰⵔⵔⵓ. 16 ⵏⴻⵜⵜⴰ ⵉⵏⵏⴰ: “ⴰⵙ-ⴷⴷ ⴰⴽⵉⴷⵉ ⵓⵛⴰ ⴰⴷ ⵜⵥⴰⵔⴻⴷ ⴰⵙⴰⵎ ⵉⵏⵓ ⵉ ⵙⵉⴷⵉ.” ⴰⵎⵎⵓ ⵉ ⵊⵊⵉⵏ ⵜ ⴰⴷ ⴷⴷ-ⵉⵏⵉⵢ ⴰⴽⵉⴷⴻⵙ ⴷⴻⴳ ⵓⴽⴰⵔⵔⵓ. 17 ⵓⵎⵉ ⵢⵉⵡⴻⴹ ⵖⴰⵔ ⵙⴰⵎⴰⵔⵢⴰ, ⵉⵏⵖⴰ ⵏⴻⵜⵜⴰ ⵎⴰⵔⵔⴰ ⵉⵏⵏⵉ ⵜⵓⵖⴰ ⵉⵇⵇⵉⵎⴻⵏ ⵏ ⴰⵅⴰⴱ ⴷⵉ ⵙⴰⵎⴰⵔⵢⴰ, ⴰⵍⴰⵎⵉ ⵜ ⵉⵇⴹⴰ ⵇⴰⵄ ⴰⵎ ⵎⴰⵎⵎⴻⵛ ⵉⵏⵏⴰ ⵡⴰⵡⴰⵍ ⵏ ⵙⵉⴷⵉ ⵏⵏⵉ ⵜⵓⵖⴰ ⵉⵏⵏⴰ ⵉ ⵉⵍⵉⵛⴰⵄ. ■
ⵢⴰⵀⵓ ⵉⵇⴹⴰ ⵅ ⵡⴻⵄⴱⴻⴷ ⵏ ⴱⴰⵄⴰⵍ
18 ⵢⴰⵀⵓ ⵉⵙⵙⵎⵓⵏ ⵎⴰⵔⵔⴰ ⵍⴳⴻⵏⵙ ⵓⵛⴰ ⵉⵏⵏⴰ ⴰⵙⴻⵏ: “ⴰⵅⴰⴱ ⵜⵓⵖⴰ ⵉⵙⴻⵅⵅⴰⵔ ⵉ ⴱⴰⵄⴰⵍ ⵛⵡⴰⵢⵜ, ⵎⴰⵛⴰ ⵢⴰⵀⵓ ⴰⴷ ⴰⵙ ⵉⵙⴻⵅⵅⴰⵔ ⴰⵟⵟⴰⵙ ⵄⴰⴷ. 19 ⵅⴻⵏⵏⵉ ⵍⴻⵅⵅⵓ, ⵍⴰⵖⴰⵎ-ⴷⴷ ⵅ ⵎⴰⵔⵔⴰ ⵉⵏⴰⴱⵉⵢⵢⴻⵏ ⵏ ⴱⴰⵄⴰⵍ ⴷ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵎⴰⵔⵔⴰ ⵉⴽⴻⵀⵀⴰⵏⴻⵏ ⵏⵏⴻⵙ, ⵎⴰⵃⴻⵏⴷ ⴰⴷ ⵖⴰⵔⵉ ⴷⴷ-ⴰⵙⴻⵏ. ⵃⴹⴰⵎ ⴰⵇⴰ ⴰⴷ ⵉⵇⵇⵉⵎ ⵃⴻⴷ, ⵎⵉⵏⵣⵉ ⵖⴰⵔⵉ ⵉⵛⵜ ⵏ ⵜⵖⴰⵔⵚⵜ ⴷ ⵜⴰⵎⴻⵇⵇⵔⴰⵏⵜ ⵉ ⴱⴰⵄⴰⵍ. ⵎⴰⵔⵔⴰ ⵡⵉ ⵖⴰ ⵉⵖⴰⴱⴻⵏ, ⵡⴰⵔ ⵉⵜⵜⵖⵉⵎⵉ ⵉⴷⴷⴰⵔ.” ⵢⴰⵀⵓ ⵎⴰⵛⴰ ⵉⴳⴳⴰ ⵜⴰ ⵙ ⵜⵃⵔⴰⵢⵎⴻⵛⵜ, ⵎⴰⵃⴻⵏⴷ ⴰⴷ ⵉⵇⴹⴰ ⵅ ⵉⵎⵙⴻⵅⵅⴰⵔⴻⵏ ⵏ ⴱⴰⵄⴰⵍ. 20 ⵅⴰⵙ ⵓⵛⴰ ⵉⵏⵏⴰ ⵢⴰⵀⵓ: “ⵙⵇⴻⴷⴷⵙⴻⵎ ⵉⵊⵊ ⵏ ⵓⵎⵓⵏⵉ ⵉⴼⴰⵔⵣⴻⵏ ⵉ ⴱⴰⵄⴰⵍ!” ⵓⵛⴰ ⵏⵉⵜⵏⵉ ⴱⴰⵔⵔⵃⴻⵏ ⵉ ⵎⴰⵏ ⴰⵢⴰ. 21 ⵉⵙⵙⴻⴽⴽ ⵢⴰⵀⵓ ⵉⵔⴻⵇⵇⴰⵙⴻⵏ ⴷⵉ ⵎⴰⵔⵔⴰ ⵉⵙⵔⴰⵉⵍ ⵓ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏ ⴱⴰⵄⴰⵍ ⵓⵙⵉⵏ-ⴷⴷ, ⵡⴰⵔ ⵉⵇⵇⵉⵎ ⵓⵍⴰ ⴷ ⵉⵊⵊ ⵡⴰⵔ ⴷⴷ-ⵢⵓⵙⵉ. ⵏⵉⵜⵏⵉ ⵓⴷⴼⴻⵏ ⵖⴰⵔ ⵣⵣⴰⵡⴻⵛⵜ ⵏ ⴱⴰⵄⴰⵍ ⴰⵍⴰⵎⵉ ⵜⴻⵛⵛⵓⵔ ⵣⵣⴰⵡⴻⵛⵜ ⵏ ⴱⴰⵄⴰⵍ ⵣⵉ ⵟⵟⴰⵔⴼ ⴰⵍ ⵟⵟⴰⵔⴼ. 22 ⵅⴻⵏⵏⵉ ⵉⵏⵏⴰ ⵉ ⵡⴻⵏⵏⵉ ⵉⴵⴰⵏ ⵅ ⵡⴻⵅⵅⴰⵎ ⵏ ⵡⴰⵔⵔⵓⴹ: “ⴰⵡⵉ-ⴷⴷ ⴰⵔⵔⵓⴹⴻⵏ ⵉ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏ ⴱⴰⵄⴰⵍ!” ⵓ ⵡⴰⵏⵉⵜⴰ ⵢⵉⵡⵉ ⴰⵙⴻⵏ-ⴷⴷ ⴰⵔⵔⵓⴹⴻⵏ.
23 ⵢⵓⴷⴻⴼ ⵢⴰⵀⵓ ⴰⴽ-ⴷ ⵢⵓⵏⴰⴷⴰⴱ, ⵎⵎⵉⵙ ⵏ ⵔⵉⴽⴰⴱ, ⵖⴰⵔ ⵣⵣⴰⵡⴻⵛⵜ ⵏ ⴱⴰⵄⴰⵍ ⵓ ⵏⴻⵜⵜⴰ ⵉⵏⵏⴰ ⵉ ⵉⵎⵙⴻⵅⵅⴰⵔⴻⵏ ⵏ ⴱⴰⵄⴰⵍ: “ⵅⵣⴰⵔⴻⵎ ⵎⵍⵉⵃ, ⴰⵇⴰ ⵡⴰⵔ ⵖⴰⵔⵡⴻⵎ ⵉⵜⵜⵉⵍⵉ ⵓⵍⴰ ⴷ ⵉⵊⵊ ⵣⴻⴳ ⵉⵎⵙⴻⵅⵅⴰⵔⴻⵏ ⵏ ⵙⵉⴷⵉ, ⵎⵖⵉⵔ ⵉⵎⵙⴻⵅⵅⴰⵔⴻⵏ ⵏ ⴱⴰⵄⴰⵍ ⵡⴰⵀⴰ.” 24 ⵓⵎⵉ ⵉⵡⴹⴻⵏ, ⵎⴰⵃⴻⵏⴷ ⴰⴷ ⴷⵉⵏ ⴰⵡⵢⴻⵏ ⵜⵉⵖⴰⵔⵚⴰ ⴷ ⵜⵖⴰⵔⵚⴰ ⵏ ⵡⴻⵛⵎⴰⴹ, ⵜⵓⵖⴰ ⵉⵙⵙⴱⴻⴷⴷ ⵢⴰⵀⵓ ⵜⵎⴻⵏⵢⵉⵏ ⵏ ⵢⴻⵔⵢⴰⵣⴻⵏ ⵉ ⵢⵉⵅⴻⴼ ⵏⵏⴻⵙ ⴷⵉ ⴱⴰⵔⵔⴰ, ⵉⵏⵏⴰ: “ⵣⴻⴳ ⵡⴻⵔⵢⴰⵣ ⵏⵏⵉ ⵉ ⵖⴰ ⵢⴻⵊⵊ ⴰⴷ ⵉⵏⵊⴻⵎ ⵉⵊⵊ ⵣⴻⴳ ⵢⴻⵔⵢⴰⵣⴻⵏ ⵏⵏⵉ ⴳⴳⵉⵖ ⴷⴻⴳ ⵉⴼⴰⵙⵙⴻⵏ ⵏⵡⴻⵎ, ⴰⴷ ⵉⴷⵡⴻⵍ ⵍⴻⵄⵎⴰⵔ ⵏⵏⴻⵙ ⴷⴻⴳ ⵡⴻⵎⵛⴰⵏ ⵏ ⵍⴻⵄⵎⴰⵔ ⵏⵏⵉ.”
25 ⵍⴰⵎⵉ ⵉⵇⴼⴻⵍ ⵓⵙⴻⵡⵊⴻⴷ ⵏ ⵜⵖⴰⵔⵚⵟ ⵏ ⵡⴻⵛⵎⴰⴹ, ⵉⵎⵙⴰⵔ ⴱⴻⵍⵍⵉ ⵏⴻⵜⵜⴰ ⵉⵏⵏⴰ ⵉ ⵉⵔⴻⵇⵇⴰⵙⴻⵎ ⵏ ⵜⴰⵣⵍⴰ ⵓ ⵉ ⵍⵇⴻⴱⵟⴰⵏⴰⵜ: “ⴰⴷⴼⴻⵎ, ⵡⵜⴻⵎ ⵜⴻⵏ, ⵡⴰⵔ ⵜⵜⴻⵊⵊⵉⵎ ⵓⵍⴰ ⴷ ⵉⵊⵊ ⴰⴷ ⵉⵏⵊⴻⵎ!” ⵏⵉⵜⵏⵉ ⵏⵖⵉⵏ ⵜⴻⵏ ⵙ ⵍⴻⵇⴹⴻⵄ ⵏ ⵙⵙⵉⴼ ⵓ ⵍⵇⴻⴱⵟⴰⵏⴰⵜ ⵏⴹⴰⵔⴻⵏ ⵜⴻⵏ ⴱⴰⵔⵔⴰ. ⵏⵉⵜⵏⵉ ⵓⴷⴼⴻⵏ ⵖⴰⵔ ⵓⵍ ⵏ ⵣⵣⴰⵡⴻⵛⵜ ⵏ ⴱⴰⵄⴰⵍ. 26 ⵏⵉⵜⵏⵉ ⴽⴽⵙⴻⵏ ⵉⵎⴰⵢⴹⵓⵜⴻⵏ ⵉⵇⴻⴷⴷⵙⴻⵏ ⵣⵉ ⵣⵣⴰⵡⴻⵛⵜ ⵏ ⴱⴰⵄⴰⵍ ⵓⵛⴰ ⵙⵙⴰⵔⵖⴻⵏ ⵜⴻⵏ. 27 ⵏⵉⵜⵏⵉ ⴰⵔⵥⵉⵏ ⴰⵎⴻⵢⴹⴰ ⵉⵇⴻⴷⴷⵙⴻⵏ ⵏ ⴱⴰⵄⴰⵍ. ⵀⴻⴷⵎⴻⵏ ⵄⴰⵡⴻⴷ ⵣⵣⴰⵡⴻⵛⵜ ⵏ ⴱⴰⵄⴰⵍ ⵓⵛⴰ ⴳⴳⵉⵏ ⵜⵜ ⴷ ⵉⵛⵜ ⵏ ⵜⵣⵓⴱⴰⵛⵜ ⴰⵍ ⴰⵙⵙ-ⴰ. 28 ⴰⵎⵎⵓ ⵉ ⵉⵎⵃⴰ ⵢⴰⵀⵓ ⴱⴰⵄⴰⵍ ⵣⵉ ⵉⵙⵔⴰⵉⵍ. 29 ⵎⴰⵛⴰ ⵢⴰⵀⵓ ⵡⴰⵔ ⵉⴱⴻⴷⴷ ⵣⴻⴳ ⵡⴻⴹⴼⴰⵔ ⵏ ⴷⴷⵏⵓⴱ ⵏ ⵢⴰⵔⵓⴱⵄⴰⵎ, ⵎⵎⵉⵙ ⵏ ⵏⴰⴱⴰⵟ, ⵡⴻⵏⵏⵉ ⵢⴰⵔⵔⵉⵏ ⵉⵙⵔⴰⵉⵍ ⴰⴷ ⵉⵅⴹⴰ: ⵉⵄⴻⵊⵎⵉⵢⵢⴻⵏ ⵏ ⵡⵓⵔⴻⵖ ⵏⵏⵉ ⵉⴵⴰⵏ ⴷⵉ ⴱⴰⵢⵜ-ⵉⵍ. □ ■
30 ⵙⵉⴷⵉ ⵉⵏⵏⴰ ⵉ ⵢⴰⵀⵓ: “ⵎⵉⵏⵣⵉ ⵜⴻⴳⴳⵉⴷ ⵏⵉⵛⴰⵏ ⵓⵎⵉ ⵜⴻⴳⴳⵉⴷ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵉⵏⵓ, ⵓⵛⴰ ⵜⴻⴳⴳⵉⴷ ⴰⴽ-ⴷ ⵜⴰⴷⴷⴰⵔⵜ ⵏ ⴰⵅⴰⴱ ⵎⴰⵔⵔⴰ ⵎⵉⵏ ⵖⴰⵔⵉ ⴷⴻⴳ ⵡⵓⵍ, ⴰⴷ ⵇⵇⵉⵎⴻⵏ ⵉⵃⴻⵏⵊⵉⵔⴻⵏ ⵏⵡⴻⵎ ⵅ ⵍⵄⴰⵔⵛ ⵏ ⵉⵙⵔⴰⵉⵍ ⴰⵍ ⵊⵊⵉⵍ ⵡⵉⵙⵙ ⴰⵔⴻⴱⵄⴰ.” ■ 31 ⵎⴰⵛⴰ ⵢⴰⵀⵓ ⵡⴰⵔ ⵉⵃⴹⵉ ⵛⴰ ⵎⴰⵃⴻⵏⴷ ⴰⴷ ⵢⵓⵢⵓⵔ ⵄⵍⴰⵃⵙⴰⴱ ⵛⵛⴰⵔⵉⵄⴰ ⵏ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵙ ⵎⴰⵔⵔⴰ ⵓⵍ ⵏⵏⴻⵙ. ⵏⴻⵜⵜⴰ ⵡⴰⵔ ⵉⵃⴻⵢⵢⴻⴷ ⵅ ⴷⴷⵏⵓⴱ ⵏ ⵢⴰⵔⵓⴱⵄⴰⵎ ⵡⴻⵏⵏⵉ ⵢⴰⵔⵔⵉⵏ ⵉⵙⵔⴰⵉⵍ ⴰⴷ ⵉⵅⴹⴰ.
32 ⴷⴻⴳ ⵡⵓⵙⵙⴰⵏ ⵏⵏⵉ ⵉⴱⴷⴰ ⵙⵉⴷⵉ ⴰⴷ ⵉⵙⵙⴻⵎⵥⵉ ⵉⵙⵔⴰⵉⵍ. ⵃⴰⵣⴰⵢⵉⵍ ⵉⵡⵜⴰ ⵉ-ⵜⴻⵏ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⵙⵔⴰⵉⵍ, 33 ⵣⵉ ⵍ’ⵓⵔⴷⵓⵏ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ, ⵎⴰⵔⵔⴰ ⵜⴰⵎⵎⵓⵔⵜ ⵏ ⵊⵉⵍⵄⴰⴷ, ⵜⴰⵎⵎⵓⵔⵜ ⵏ ⵉⵊⴰⴷⵉⵢⵢⴻⵏ ⴷ ⵉⵔⵓⴱⵉⵏⵉⵢⵢⴻⵏ ⴷ ⵉⵎⴰⵏⴰⵙⵙⵉⵢⵢⴻⵏ, ⵣⵉ ⴰⵔⵓⵄⵉⵔ ⵡⴻⵏⵏⵉ ⵉⴵⴰⵏ ⵖⴰⵔ ⵜⴻⵖⵣⴰⵔⵜ ⵏ ⴰⵔⵏⵓⵏ, ⵓⵍⴰ ⴷ ⵊⵉⵍⵄⴰⴷ ⴷ ⴱⴰⵛⴰⵏ.
34 ⵉⵎⴻⵣⵔⵓⵢⴻⵏ ⵉⵇⵇⵉⵎⴻⵏ ⵏ ⵢⴰⵀⵓ, ⴷ ⵎⴰⵔⵔⴰ ⵎⵉⵏ ⵉⴳⴳⴰ ⴷ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ ⵉⵎⴻⵃⴹⴻⵏ, ⵎⴰ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵜⵜⵡⴰⵣⴻⵎⵎⴻⵎ ⵛⴰ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ? 35 ⵢⴰⵀⵓ ⵉⴳⴳⴰ ⴰⴷ ⵢⴰⵔⴻⵢⵢⴻⵃ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⴹⵍⴻⵏ ⵜ ⴷⵉ ⵙⴰⵎⴰⵔⵢⴰ. ⵎⵎⵉⵙ ⵢⴰⵀⵓⵢⴰⵃⴰⵣ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. 36 ⵓⵙⵙⴰⵏ ⵉ ⴷⵉ ⵜⵓⵖⴰ ⵢⴰⵀⵓ ⵉⵃⴻⴽⴽⴻⵎ ⴷⵉ ⵙⴰⵎⴰⵔⵢⴰ ⴰⵇⴰ ⴰⵜⴻⵏ ⴷⵉ ⵜⵎⴻⵏⵢⴰ ⵓ-ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ.