ⵍⴻⵇⵚⴰⵔ ⵏ ⵙⵓⵍⵉⵎⴰⵏ
7
1 ⴷⵉ ⵜⴰⴷⴷⴰⵔⵜ ⵏⵏⴻⵙ ⵉⴱⵏⴰ ⵙⵓⵍⵉⵎⴰⵏ ⵜⵍⴻⵟⵟⴰⵛ ⵏ ⵉⵙⴻⴳⴳⵯⵓⵙⴰ, ⵓⵛⴰ ⵉⴽⴻⵎⵎⴻⵍ ⵎⴰⵔⵔⴰ ⵜⴰⴷⴷⴰⵔⵜ ⵏⵏⴻⵙ. ■ 2 ⵏⴻⵜⵜⴰ ⵉⴱⵏⴰ ⵜⴰⴷⴷⴰⵔⵜ ⵏ ⵡⴻⵣⵖⴰⵔ ⵏ ⵍⵓⴱⵏⴰⵏ. ⵜⵓⵖⴰ-ⵜⵜ ⴷⵉ ⵎⵢⴰ ⵏ ⵉⵖⴰⴵⴻⵏ ⵏ ⵜⵓⵣⵣⴻⴳⴳⴰⵔⵜ ⵓ ⵅⴻⵎⵙⵉⵏ ⵏ ⵉⵖⴰⴵⴻⵏ ⵏ ⵜⵉⵔⵓ ⵓ ⵜⵍⴰⵜⵉⵏ ⵏ ⵉⵖⴰⴵⴻⵏ ⵏ ⵍⵓⵄⵍⴰ, ⵜᵉⵜⵜⵡⴰⴳⴳ ⵅ ⴰⵔⴻⴱⵄⴰ ⵏ ⵉⵙⴻⴷⴷⵉⵢⵢⴻⵏ ⵏ ⵉⴱⵉⵍⴰⵔⴻⵏ ⵏ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ ⵓ ⵜⵜⵡⴰⵙⵙⴰⵔⵙⴻⵏⵜ ⵜⵃⴻⵏⵢⴰ ⵏ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ ⵜⵉⵡⴰ ⵉ ⵉⴱⵉⵍⴰⵔⴻⵏ. □ 3 ⵜⵓⵖⴰ ⵙ ⵉⵛⵜ ⵏ ⵜⵣⴻⵇⵇⴰ ⵣⴻⴳ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ ⵜⵉⵡⴰ ⵉ ⵜⵃⴻⵏⵢⴰ ⵏ ⵓⵄⴰⵔⵔⴻⴹ ⵏⵏⵉ ⵉⴵⴰⵏ ⵅ ⵅⴻⵎⵙⴰ ⵓ-ⵔⴻⴱⵄⵉⵏ ⵏ ⵉⴱⵉⵍⴰⵔⴻⵏ ⵏⵏⵉ, ⴰⵇⴰ ⵅⴻⵎⵎⴻⵙⵟⴰⵛ ⵏ ⵜⵃⴻⵏⵢⴰ ⵅ ⵉⵊⵊ ⵏ ⵓⵙⴻⴷⴷⵉ ⵏ ⵉⴱⵉⵍⴰⵔⴻⵏ. 4 ⵜⵓⵖⴰ ⵜⵉⵡⵡⵓⵔⴰ ⵏ ⵍⴻⴽⵡⴰⵣⵉ ⴷⵉ ⵜⵍⴰⵜⴰ ⵏ ⵉⵙⴻⴷⴷⵉⵢⵢⴻⵏ, ⵉⵛⵜ ⵏ ⵜⴱⵓⵔⵊⴻⵜ ⴰⵊⴻⵎⵎⴰⴹ ⵉ ⵜⴱⵓⵔⵊⴻⵜ ⵏⵏⴻⵖⵏⵉ, ⵜⵍⴰⵜⴰ ⵏ ⵜⵡⴰⵍⴰⵡⵉⵏ. 5 ⵎⴰⵔⵔⴰ ⵜⵉⵡⵡⵓⵔⴰ ⴷ ⵍⴻⴹⵔⵓⴼ ⵏⵙⴻⵏⵜ ⵖⴰⵔ ⵉⵖⴻⵣⴷⵉⵙⴻⵏ ⵜⵓⵖⴰ ⴰⵜⴻⵏ ⴷ ⴰⴽⵡⴰⴷⵔⵓⵏ, ⵓⵛⴰ ⴰⵔⵣⴰⵎ ⵏ ⵉⵛⵜ ⵏ ⵜⴻⵡⵡⴰⵔⵜ ⵜⵓⵖⴰ-ⵜⵜ ⴰⵊⴻⵎⵎⴰⴹ ⵏ ⵡⴰⵔⵣⴰⵎ ⵏ ⵉⵛⵜ ⵏ ⵜⴻⵡⵡⴰⵔⵜ ⵏⵏⴻⵖⵏⵉ, ⵜⵍⴰⵜⴰ ⵏ ⵜⵡⴰⵍⴰⵡⵉⵏ. 6 ⴰⵙⵇⵉⴼ ⵉⴳⴳⴰ ⵉ-ⵜ ⵙ ⵉⴱⵉⵍⴰⵔⴻⵏ ⵖⴰⵔ ⵣⵣⴰⵜ ⵏ ⵜⴰⴷⴷⴰⵔⵜ, ⵅⴻⵎⵙⵉⵏ ⵏ ⵉⵖⴰⴵⴻⵏ ⵏ ⵜⵓⵣⵣⴻⴳⴳⴰⵔⵜ ⵓ ⵜⵍⴰⵜⵉⵏ ⵏ ⵉⵖⴰⴵⴻⵏ ⵏ ⵜⵉⵔⵓ. ⵖⴰⵔ ⵡⵓⴷⴻⵎ ⵏ ⵉⴱⵉⵍⴰⵔⴻⵏ ⵏⵏⵉ ⵜⵓⵖⴰ ⵉⵛⵜ ⵏ ⵜⴻⵙⵇⵉⴼⵜ ⵏⵏⴻⵖⵏⵉ ⴰⴽ-ⴷ ⵉⴱⵉⵍⴰⵔⴻⵏ, ⵓⵛⴰ ⵄⴰⵡⴻⴷ ⵓⵍⴰ ⴷ ⵉⵊⵊ ⵏ ⵓⵙⴻⵇⵇⴻⴼ ⵖⴰⵔ ⵡⵓⴷⴻⵎ ⵏ ⵉⴱⵉⵍⴰⵔⴻⵏ ⵏⵏⵉ. 7 ⵏⴻⵜⵜⴰ ⵉⴳⴳⴰ ⵄⴰⵡⴻⴷ ⴰⵅⵅⴰⵎ ⵉ ⵍⵄⴰⵔⵛ ⵎⴰⵏⵉ ⵜⵓⵖⴰ ⵉⵛⴰⵔⵔⴻⵄ, ⴰⵅⵅⴰⵎ ⵏ ⵜⴰⴷⴷⴰⵔⵜ ⵏ ⵛⵛⵔⴰⵄ, ⵓⵛⴰ ⵉⵙⵙⴷⵓⵔⵉⵢ ⵉ-ⵜ ⵣⵉ ⵜⵉⵙⵉ ⵙⵡⴰⴷⴷⴰⵢ ⴰⵍ ⵜⵉⵙⵉ ⵏⵏⴻⵖⵏⵉ ⵙⴻⵏⵏⴻⵊ ⵙ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ. 8 ⵜⴰⴷⴷⴰⵔⵜ ⵏⵏⴻⵙ, ⵎⴰⵏⵉ ⵜⵓⵖⴰ ⵉⵣⴻⴷⴷⴻⵖ, ⴷⵉ ⵍⴻⵎⵔⴰⵃ ⵏⵏⴻⵖⵏⵉ ⵏⵏⵉ ⵉⴵⴰⵏ ⴽⵜⴰⵔ ⵖⴰⵔ ⴷⴰⵅⴻⵍ ⵣⴻⴳ ⵡⴻⵅⵅⴰⵎ ⵏ ⵜⴰⴷⴷⴰⵔⵜ ⵏ ⵛⵛⵔⴰⵄ, ⴰⵇⴰ ⵜᵉⵜⵜⵡⴰⴳⴳ ⴰⵎⴻⵏⵏⵉ. ⵏⴻⵜⵜⴰ ⵉⴳⴳⴰ ⵄⴰⵡⴻⴷ ⵉⵛⵜ ⵏ ⵜⴰⴷⴷⴰⵔⵜ ⵉ ⵢⴻⴵⵉⵙ ⵏ ⴼⵉⵔⵄⵓⵏ, ⵜⴻⵏⵏⵉ ⵢⵉⵡⵉ ⵙⵓⵍⵉⵎⴰⵏ ⴷ ⵜⴰⵎⵖⴰⵔⵜ, ⴰⵎ ⵡⴻⵅⵅⴰⵎ-ⴰ ⵡⴰⵏⵉⵜⴰ. ■ 
ⵝⴰⵔⵉⵟⴰ ⵏ ⵜⴰⴷⴷⴰⵔⵜ ⵏ ⵡⴻⵣⵖⴰⵔ ⴷ ⵍⴻⵇⵚⴰⵔ ⵏ ⵙⵓⵍⵉⵎⴰⵏ ⴷ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ (1 ⴽⵏ. 7)
9 ⵎⴰⵏ ⴰⵢⴰ ⵎⴰⵔⵔⴰ ⵜⵓⵖⴰ-ⵜ ⵣⵉ ⵜⵚⵓⴹⴰⵔ ⵉⵖⵍⴰⵏ, ⵜⵜⵡⴰⵙⵙⵓⵢⴷⴰⵏⵜ ⵄⵍⴰⵃⵙⴰⴱ ⵍⴻⵇⵢⴰⵙ, ⵣⵉ ⴷⴰⵅⴻⵍ ⵓ ⵣⵉ ⴱⴰⵔⵔⴰ ⵜⵜⵡⴰⵏⵛⴰⵔⴻⵏ ⵙ ⵍⵎⴻⵏⵛⴰⵔ, ⵓ ⵎⴰⵏ ⴰⵢⴰ ⵣⵉ ⴷⵙⴰⵙ ⴰⵍ ⵉⵥⵔⴰ ⵏ ⵙⴻⵏⵏⴻⵊ ⵇⴰⵄ ⵓ ⵣⵉ ⴱⴰⵔⵔⴰ ⴰⵍ ⵍⴻⵎⵔⴰⵃ ⴰⵎⴻⵇⵇⵔⴰⵏ. 10 ⴷⵙⴰⵙ ⵉⵜⵜⵡⴰⴳⴳ ⵙ ⵜⵚⵓⴹⴰⵔ ⵉⵖⵍⴰⵏ, ⵉⵥⵔⴰ ⵉⵎⴻⵇⵇⵔⴰⵏⴻⵏ, ⵉⵥⵔⴰ ⵏ ⵄⴻⵛⵔⴰ ⵏ ⵉⵖⴰⴵⴻⵏ ⵓ ⵉⵥⵔⴰ ⵏ ⵜⵎⴻⵏⵢⴰ ⵏ ⵉⵖⴰⴵⴻⵏ, 11 ⵓ ⵜⵉⵡⴰ ⵏⵙⴻⵏ ⵜⵉⵚⵓⴹⴰⵔ ⵉⵖⵍⴰⵏ, ⵜⵜⵡⴰⵙⵙⵓⵢⴷⴰⵏⵜ ⵄⵍⴰⵃⵙⴰⴱ ⵍⴻⵇⵢⴰⵙ, ⵓⵍⴰ ⴷ ⴰⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ. 12 ⵍⴻⵎⵔⴰⵃ ⴰⵎⴻⵇⵇⵔⴰⵏ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵜⵓⵖⴰ-ⵜ ⵄⴰⵡⴻⴷ ⵣⵉ ⵜⵍⴰⵜⴰ ⵏ ⵉⵙⴻⴷⴷⵉⵢⵢⴻⵏ ⵏ ⵜⵚⵓⴹⴰⵔ ⵉⵜⵜⵡⴰⵙⵙⵓⵢⴷⴰⵏ ⴷ ⵉⵊⵊ ⵏ ⵓⵙⴻⴷⴷⵉ ⵏ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ, ⴰⵎ ⵎⴰⵎⵎⴻⵛ ⵉ ⵍⴻⵎⵔⴰⵃ ⵏ ⴷⴰⵅⴻⵍ ⵉ ⵜⴰⴷⴷⴰⵔⵜ ⵏ ⵙⵉⴷⵉ ⴰⵎ ⵉ ⵡⴻⵙⵇⵉⴼ ⵏ ⵡⴰⴷⴰⴼ ⵏ ⵜⴰⴷⴷⴰⵔⵜ.
ⵍⵅⴻⴷⵎⴻⵜ ⵏ ⵃⵉⵔⴰⵎ ⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ
13 ⴰⵊⴻⴵⵉⴷ ⵙⵓⵍⵉⵎⴰⵏ ⵉⵙⵙⴻⴽⴽ ⵖⴰⵔ ⵃⵉⵔⴰⵎ ⵣⵉ ⵚⵓⵔ, ⵃⵉⵎⴰ ⴰⴷ ⴷⴷ-ⵢⴰⵙ. ■ 14 ⵡⴰⵏⵉⵜⴰ ⵜⵓⵖⴰ ⴷ ⵎⵎⵉⵙ ⵏ ⵉⵛⵜ ⵏ ⵜⴰⵊⵊⴰⵍⵜ ⵣⵉ ⵜⴻⵇⴱⵉⵍⵜ ⵏ ⵏⴰⴼⵜⴰⵍⵉ ⵓ ⴱⴰⴱⴰⵙ ⵜⵓⵖⴰ-ⵜ ⴷ ⵉⵊⵊ ⵏ ⵡⴻⵔⵢⴰⵣ ⵣⵉ ⵚⵓⵔ, ⵉⵊⵊ ⵏ ⵡⴻⵎⵣⵉⵍ ⵏ ⵏⵏⵃⴰⵙ. ⵏⴻⵜⵜⴰ ⵜⵓⵖⴰ ⵉⵛⵛⵓⵔ ⵙ ⵍⴻⴼⵀⴰⵎⴻⵜ ⴷ ⵍⴻⵄⵇⴻⵍ ⴷ ⵜⵓⵙⵙⵏⴰ ⵃⵉⵎⴰ ⴰⴷ ⵉⵙⵙⵓⴼⴼⴻⵖ ⵇⴰⵄ ⵍⵅⴻⴷⵎⴻⵜ ⵏ ⵏⵏⵃⴰⵙ. ⵏⴻⵜⵜⴰ ⵢⵓⵙⴰ-ⴷⴷ ⵖⴰⵔ ⵓⵊⴻⴵⵉⴷ ⵙⵓⵍⵉⵎⴰⵏ ⵓ ⵎⴰⵔⵔⴰ ⵎⵉⵏ ⵉⴳⴳⴰ, ⵉⴳⴳⴰ ⵉ-ⵜ ⵏ ⵏⵏⵃⴰⵙ. ■
15 ⵏⴻⵜⵜⴰ ⵉⴳⴳⴰ ⵜⵏⴰⵢⴻⵏ ⵏ ⵉⴱⵉⵍⴰⵔⴻⵏ ⵏ ⵏⵏⵃⴰⵙ. ⵍⵓⵄⵍⴰ ⵏ ⵉⵊⵊ ⵏ ⵓⴱⵉⵍⴰⵔ ⵜⵓⵖⴰ-ⵜⵜ ⵜⵎⴻⵏⵟⴰⵛ ⵏ ⵉⵖⴰⴵⴻⵏ ⵓⵛⴰ ⵙ ⵢⵉⵊⵊ ⵏ ⵓⴼⵉⵍⵓ ⵏ ⵜⴻⵏⵄⴰⵛ ⵏ ⵉⵖⴰⴵⴻⵏ ⵉⵣⴻⵎⵎⴰⵔ ⴰⴷ ⵉⵏⵏⴻⴹ ⵉ ⵓⴱⵉⵍⴰⵔ ⵏⵏⴻⵖⵏⵉ. ■ 16 ⵏⴻⵜⵜⴰ ⵉⴳⴳⴰ ⵜⵏⴰⵢⴻⵏ ⵏ ⵜⵜⵉⵊⴰⵏ ⵏ ⵏⵏⵃⴰⵙ ⵉⴼⴻⵙⵢⴻⵏ ⵃⵉⵎⴰ ⴰⴷ ⵜⴻⵏ ⵙⵙⴰⵔⵙⴻⵏ ⵅ ⵉⵣⴻⴵⵉⴼⴻⵏ ⵏ ⵉⴱⵉⵍⴰⵔⴻⵏ. ⵍⵓⵄⵍⴰ ⵏ ⵉⵊⵊ ⵏ ⵜⵜⴰⵊ ⵜⵓⵖⴰ-ⵜ ⵅⴻⵎⵙⴰ ⵏ ⵉⵖⴰⴵⴻⵏ ⵓ ⵍⵓⵄⵍⴰ ⵏ ⵜⵜⴰⵊ ⵏⵏⴻⵖⵏⵉ ⵜⵓⵖⴰ-ⵜ ⵓⵍⴰ ⴷ ⵅⴻⵎⵙⴰ ⵏ ⵉⵖⴰⴵⴻⵏ. 17 ⵓⵍⴰ ⴷ ⵜⵉⵊⴻⵟⵟⴰⵢⵉⵏ ⵜⵜⵡⴰⴳⴳⴻⵏⵜ ⵙ ⵉⵛⵜ ⵏ ⵍⵅⴻⴷⵎⴻⵜ ⵏ ⵓⵎⵓⴷⵉ, ⴰⵎ ⵉⴼⵉⵍⴰⵏ ⴳⴳⵉⵏ ⵜⴻⵏⵜ ⵙ ⵙⵙⵏⴰⵙⴻⵍ ⵉ ⵜⵜⵉⵊⴰⵏ ⵉ ⵉⴵⴰⵏ ⵅ ⵉⵣⴻⴵⵉⴼⴻⵏ ⵏ ⵉⴱⵉⵍⴰⵔⴻⵏ. ⵙⴻⴱⵄⴰ ⵉ ⵢⵉⵊⵊ ⵏ ⵜⵜⴰⵊ ⵓ ⵙⴻⴱⵄⴰ ⵉ ⵜⵜⴰⵊ ⵏⵏⴻⵖⵏⵉ. 18 ⵉⴳⴳⴰ ⵉⴱⵉⵍⴰⵔⴻⵏ ⴷ ⵜⵏⴰⵢⴻⵏ ⵏ ⵉⵙⴻⴷⴷⵉⵢⵢⴻⵏ ⵏ ⵉⵔⴻⵎⵎⴰⵎⴻⵏ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵉ ⴷⴷ-ⵢⵓⵙⵉⵏ ⴰⴽ-ⴷ ⵍⵅⴻⴷⵎⴻⵜ ⵏ ⵓⵎⵓⴷⵉ ⵉ ⵉⵜⵜⵡⴰⴳⴳⴻⵏ ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵉⵙⵙⴷⵓⵔⵉⵢ ⵜⵜⵉⵊⴰⵏ ⵉ ⵉⴵⴰⵏ ⵜⵉⵡⴰ ⵉ ⵉⵙⴻⴷⴷⵉⵢⵢⴻⵏ ⵏ ⵉⵔⴻⵎⵎⴰⵎⴻⵏ. ⴰⵎⵎⵓ ⵉ ⵉⴳⴳⴰ ⵓⵍⴰ ⵉ ⵜⵜⴰⵊ ⵏⵏⴻⵖⵏⵉ. 19 ⵜⵜⵉⵊⴰⵏ ⵅ ⵓⵣⴻⴵⵉⴼ ⵏ ⵉⴱⵉⵍⴰⵔⴻⵏ ⵏⵏⵉ ⵉⴵⴰⵏ ⵖⴰⵔ ⵡⴻⵙⵇⵉⴼ ⵏ ⵡⴰⴷⴰⴼ ⵜⵜⵡⴰⴳⴳⴻⵏ ⴰⵎ ⵜⵍⵉⵍⵍⵉⵛⵉⵏ, ⵙ ⵉⵊⵊ ⵏ ⵍⵓⵄⵍⴰ ⵏ ⴰⵔⴻⴱⵄⴰ ⵏ ⵉⵖⴰⴵⴻⵏ. □ 20 ⵜⵜⵉⵊⴰⵏ ⵉ ⵉⴵⴰⵏ ⵅ ⵜⵏⴰⵢⴻⵏ ⵏ ⵉⴱⵉⵍⴰⵔⴻⵏ ⴷⴻⵡⵍⴻⵏ ⵙⴻⵏⵏⴻⵊ ⴰⴽ-ⴷ ⵡⵓⴷⴻⵎ ⵏ ⵓⵇⵓⵔⴰⵔ ⵏⵏⵉ ⵜⵓⵖⴰ ⵉ-ⴷⴷ-ⵉⵜⵜⴰⵙⴻⵏ ⴰⴽ-ⴷ ⵍⵅⴻⴷⵎⴻⵜ ⵉⵎⵓⴷⴻⵏ. ⵓⵛⴰ ⵎⵉⵜⴰⵢⴻⵏ ⵏ ⵉⵔⴻⵎⵎⴰⵎⴻⵏ ⵇⵓⵡⵡⴰⵔⴻⵏ ⴰⵙⴻⵏ-ⴷⴷ ⵙ ⵜⵏⴰⵢⴻⵏ ⵏ ⵉⵙⴻⴷⴷⵉⵢⵢⴻⵏ, ⵓⵍⴰ ⵅ ⵜⵜⴰⵊ ⵏⵏⴻⵖⵏⵉ. 21 ⵅⴻⵏⵏⵉ ⵉⵙⵙⴱⴻⴷⴷ ⵏⴻⵜⵜⴰ ⵉⴱⵉⵍⴰⵔⴻⵏ ⵖⴰⵔ ⵡⴻⵙⵇⵉⴼ ⵏ ⵡⴰⴷⴰⴼ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ. ⵉⵙⵙⴱⴻⴷⴷ ⴰⴱⵉⵍⴰⵔ ⴰⴼⵓⵙⵉ, ⵉⴳⴳⴰ ⴰⵙ ⵢⴰⵅⵉⵏ, ⵓⵛⴰ ⵉⵙⵙⴱⴻⴷⴷ ⵓⵍⴰ ⴷ ⴰⴱⵉⵍⴰⵔ ⴰⵣⴻⵍⵎⴰⴹ, ⵉⴳⴳⴰ ⴰⵙ ⴱⵓⵄⴰⵣ. 22 ⵅ ⵓⵣⴻⴵⵉⴼ ⵏ ⵉⴱⵉⵍⴰⵔⴻⵏ ⵜⵓⵖⴰ ⴷⵉⵏ ⵉⵛⵜ ⵏ ⵍⵅⴻⴷⵎⴻⵜ ⵉⵣⴻⵡⵡⵇⴻⵏ ⴷⵉ ⴼⵓⵔⵎⴰ ⵏ ⵉⵊⵊ ⵏ ⵍⴽⴰⵙ ⴰⵎ ⵉⵛⵜ ⵏ ⵜⵍⵉⵍⵍⴻⵛⵜ. ⴰⵎⵎⵓ ⵜᵉⵜⵜⵡⴰⴽⴻⵎⵎⴻⵍ ⵍⵅⴻⴷⵎⴻⵜ ⵏ ⵉⴱⵉⵍⴰⵔⴻⵏ.
23 ⵏⴻⵜⵜⴰ ⵉⴳⴳⴰ ⵜⴰⵔⵉⵎⴰⵏⵜ ⵉⴼⴻⵙⵢⴻⵏ ⵉ ⵡⴰⵎⴰⵏ. ⵜⵓⵖⴰ-ⵜ ⵍⴻⵄⴱⴰⵔ ⵏⵏⴻⵙ ⵣⵉ ⵟⵟⴰⵔⴼ ⴰⵍ ⵟⵟⴰⵔⴼ ⵏⵏⴻⵙ ⵏⵏⴻⵖⵏⵉ ⵄⴻⵛⵔⴰ ⵏ ⵉⵖⴰⴵⴻⵏ, ⴷ ⴰⵇⵓⵔⴰⵔ ⵇⴰⵄ, ⵓⵛⴰ ⵜⵉⴷⴷⵉ ⵏⵏⴻⵙ ⵜⵓⵖⴰ-ⵜ ⴷⵉ ⵅⴻⵎⵙⴰ ⵏ ⵉⵖⴰⴵⴻⵏ ⵓ ⵜⵣⴻⵎⵎⴰⵔⴻⴷ ⴰⴷ ⴰⵙ ⵜⴻⵏⵏⴹⴻⴷ ⵙ ⵉⵛⵜ ⵏ ⵓⴼⵉⵍⵓ ⵏ ⵍⴻⵄⴱⴰⵔ ⵏ ⵜⵍⴰⵜⵉⵏ ⵏ ⵉⵖⴰⴵⴻⵏ. □ ■ 24 ⵙⵡⴰⴷⴷⴰⵢ ⵉ ⵜⵎⴰ ⵏⵏⴻⵙ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵇⴰⵄ, ⵜⵓⵖⴰ ⴷⵉⵏ ⵜⵉⵄⴻⴱⴱⵓⵣⵉⵏ ⴰⴽ-ⴷ ⵏⵏⵓⵡⵡⴰⵔⴰⵜ ⵢⴰⵔⴻⵣⵎⴻⵏ. ⵄⴻⵛⵔⴰ ⴷⵉ ⴽⵓⵍ ⵉⵊⵊ ⵏ ⵓⵖⵉⵍ ⵏⵏⴹⴻⵏⵜ ⵉ ⵜⵔⵉⵎⴰⵏⵜ. ⵜⵏⴰⵢⴻⵏ ⵏ ⵉⵙⴻⴷⴷⵉⵢⵢⴻⵏ ⵏⵏⵉ ⵏ ⵜⵄⴻⴱⴱⵓⵣⵉⵏ ⴰⴽ-ⴷ ⵏⵏⵓⵡⵡⴰⵔⴰⵜ ⵢⴰⵔⴻⵣⵎⴻⵏ ⵜⵓⵖⴰ ⵜⵜⵡⴰⴼⴻⵙⵢⴻⵏ ⴰⴽⵉⴷⴻⵙ. ■ 25 ⵜⴰⵔⵉⵎⴰⵏⵜ ⵜⴱⴻⴷⴷ ⵅ ⵜⴻⵏⵄⴰⵛ ⵏ ⵉⴼⵓⵏⴰⵙⴻⵏ. ⵜⵍⴰⵜⴰ ⵣⵣⴰⵢⵙⴻⵏ ⴰⵔⵔⵉⵏ ⵙ ⵡⵓⴷⴻⵎ ⵏⵙⴻⵏ ⵖⴰⵔ ⵛⵛⴰⵎⴰⵍ, ⵜⵍⴰⵜⴰ ⵣⵣⴰⵢⵙⴻⵏ ⴰⵔⵔⵉⵏ ⵙ ⵡⵓⴷⴻⵎ ⵏⵙⴻⵏ ⵖⴰⵔ ⵍⵖⴰⵔⴱ, ⵜⵍⴰⵜⴰ ⵣⵣⴰⵢⵙⴻⵏ ⴰⵔⵔⵉⵏ ⵙ ⵡⵓⴷⴻⵎ ⵏⵙⴻⵏ ⵖⴰⵔ ⵍⵊⴰⵏⵓⴱ ⵓ ⵜⵍⴰⵜⴰ ⵣⵣⴰⵢⵙⴻⵏ ⴰⵔⵔⵉⵏ ⵙ ⵡⵓⴷⴻⵎ ⵏⵙⴻⵏ ⵖⴰⵔ ⵛⵛⴰⵔⵇ. ⵜⴰⵔⵉⵎⴰⵏⵜ ⵜⴰⵔⵙⴰ ⵅⴰⵙⴻⵏ ⵓ ⵎⴰⵔⵔⴰ ⵣⵣⵄⴻⵏⵇⵓⵇⴰⵜ ⵏⵙⴻⵏ ⵜⵓⵖⴰ ⴷⴻⵡⵍⴻⵏⵜ ⵅⴻⵣⵣⴰⵔⴻⵏⵜ ⵖⴰⵔ ⴷⴰⵅⴻⵍ. 26 ⵜⴻⴳⴷⴰⵔ ⵏ ⵜⵔⵉⵎⴰⵏⵜ ⴷ ⵉⵊⵊ ⵏ ⵓⴼⵓⵙ ⵓ ⵜⵎⴰ ⵏⵏⴻⵙ ⵜⵓⵖⴰ ⴰⵎ ⵍⵅⴻⴷⵎⴻⵜ ⵉⵣⴻⵡⵡⵇⴻⵏ ⵏ ⵜⵎⴰ ⵏ ⵉⵊⵊ ⵏ ⵓⴼⴻⵏⵊⴰⵍ, ⴰⵎ ⵜⵏⴻⵡⵡⴰⵛⵜ ⵏ ⵜⵍⵉⵍⵍⴻⵛⵜ. ⵜⵡⴰⵡⵉⵜ ⵏⵏⴻⵙ ⵜⵓⵖⴰ ⴰⵍⴼⴰⵢⴻⵏ ⵉⴱⴰⵜⵓⵜⴻⵏ. □
27 ⵏⴻⵜⵜⴰ ⵉⴳⴳⴰ ⵄⴻⵛⵔⴰ ⵏ ⵜⴽⴰⵔⵔⵓⵜⵉⵏ ⵏ ⵏⵏⵃⴰⵙ. ⵜⵓⵖⴰ ⵜⵓⵣⵣⴻⴳⴳⴰⵔⵜ ⵏ ⵉⵛⵜ ⵏ ⵜⴽⴰⵔⵔⵓⵜ ⴰⵔⴻⴱⵄⴰ ⵏ ⵉⵖⴰⴵⴻⵏ ⵓ ⵜⵉⵔⵓ ⵏⵏⴻⵙ ⴰⵔⴻⴱⵄⴰ ⵏ ⵉⵖⴰⴵⴻⵏ ⵓ ⵍⵓⵄⵍⴰ ⵏⵏⴻⵙ ⵜⵍⴰⵜⴰ ⵏ ⵉⵖⴰⴵⴻⵏ. 28 ⴰⵎⵎⵓ ⵉ ⵜⵜⵡⴰⴳⴳⴻⵏⵜ ⵜⴽⴰⵔⵔⵓⵜⵉⵏ. ⵏⵉⵜⴻⵏⵜⵉ ⵜⵓⵖⴰ ⵖⴰⵔⵙⴻⵏⵜ ⵜⵉⵍⵡⵉⵃⵉⵏ ⵄⴰⵔⵔⴹⴻⵏⵜ ⵓ ⵜⴻⵍⵡⵉⵃⵉⵏ ⵄⴰⵔⵔⴹⴻⵏⵜ ⵜⵓⵖⴰ ⴰⵜⴻⵏⵜ ⵊⴰⵔ ⵛⵛⴰⴼⵓⴷ. 29 ⵅ ⵜⴻⵍⵡⵉⵃⵉⵏ ⵄⴰⵔⵔⴹⴻⵏⵜ ⵊⴰⵔ ⵛⵛⴰⴼⵓⴷ, ⵜⵓⵖⴰ ⴷⵉⵏ ⴰⵔⵛⴰⵎⴻⵏ ⵏ ⵡⴻⵢⵔⴰⴷⴻⵏ, ⵉⴼⵓⵏⴰⵙⴻⵏ ⴷ ⵉⴽⵉⵔⵓⴱⴻⵏ. ⵖⴰⵔ ⵙⴻⵏⵏⴻⵊ ⵅ ⵛⵛⴰⴼⵓⴷ ⵜⵓⵖⴰ ⴷⵉⵏ ⵉⵊⵊ ⵏ ⵓⵙⴻⵏⵏⴰⴷ. ⵙⴰⴷⵓ ⵡⴻⵢⵔⴰⴷⴻⵏ ⴷ ⵉⴼⵓⵏⴰⵙⴻⵏ ⵜⵜⵡⴰⴳⴳⴻⵏⵜ ⵜⵉⵙⴻⴷⴷⵉⵢⵉⵏ ⵏ ⵜⴻⴼⵔⴰⵢ ⵏⵏⵉ ⵢⵓⵢⵍⴻⵏ ⵖⴰⵔ ⵡⴰⴷⴷⴰⵢ . 30 ⵉⵛⵜ ⵏ ⵜⴽⴰⵔⵔⵓⵜ ⵜⵓⵖⴰ ⵖⴰⵔⴻⵙ ⴰⵔⴻⴱⵄⴰ ⵏ ⵜⵊⴰⵔⵔⴰⵔⵉⵏ ⵏ ⵏⵏⵃⴰⵙ ⴷ ⵍⴻⵃⵣⴰⵎⴰⵜ ⵏ ⵏⵏⵃⴰⵙ. ⴰⵔⴻⴱⵄⴰ ⵏ ⵉⴹⴰⵔⴻⵏ ⵜⵓⵖⴰ ⵖⴰⵔⵙⴻⵏ ⵜⵉⵖⴰⵔⴹⵉⵏ. ⵜⵉⵖⴰⵔⴹⵉⵏ ⵉⴼⴻⵙⵢⴻⵏ ⵏⵏⵉ ⵜⵓⵖⴰ ⴰⵜⴻⵏⵜ ⵙⴰⴷⵓ ⵉ ⵜⴱⴰⵏⵢⵓⵜ ⵉ ⵓⵙⵉⵔⴷ, ⵣⵣⴰⵜ ⵉ ⴽⵓⵍ ⵜⴰⵖⴰⵔⴹⵜ ⵜⵓⵖⴰ ⴷⵉⵏ ⵜⵉⵙⴻⴷⴷⵉⵢⵉⵏ ⵏ ⵜⴻⴼⵔⴰⵢ. 31 ⴰⵇⴻⵎⵎⵓⵎ ⵏⵏⴻⵙ ⵜⵓⵖⴰ-ⵜ ⵖⴰⵔ ⴷⴰⵅⴻⵍ ⵏ ⵜⵜⴰⵊ ⵏ ⵜⴽⴰⵔⵔⵓⵜ, ⵉⵊⵊ ⵏ ⵓⵖⵉⵍ ⵖⴰⵔ ⵙⴻⵏⵏⴻⵊ. ⴰⵇⴻⵎⵎⵓⵎ ⵏⵏⴻⵙ ⵜⵓⵖⴰ-ⵜ ⴷ ⴰⵇⵓⵔⴰⵔ, ⵉⵊⵊ ⵏ ⵓⵖⵉⵍ ⴷ ⵡⴻⵣⵢⴻⵏ, ⴰⵎⵎⵓ ⵉ ⵉⵜⵜⵡⴰⴳⴳ. ⵅ ⵓⵇⴻⵎⵎⵓⵎ ⵜⵓⵖⴰ ⴷⵉⵏ ⵄⴰⵡⴻⴷ ⵜⵉⵏⵇⴰⵛⵉⵏ, ⵓ ⵜⵉⵍⵡⵉⵃⵉⵏ ⵏⵙⴻⵏ ⵄⴰⵔⵔⴹⴻⵏⵜ ⵜⵓⵖⴰ ⴰⵜⴻⵏⵜ ⵙ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ, ⵡⴰⵔ ⴵⵉⵏⵜ ⴷ ⵜⵉⵇⵓⵔⴰⵔⵉⵏ. 32 ⴰⵔⴻⴱⵄⴰ ⵏ ⵜⵊⴰⵔⵔⴰⵔⵉⵏ ⵜⵓⵖⴰ ⴰⵜⴻⵏⵜ ⵙⴰⴷⵓ ⵜⴻⵍⵡⵉⵃⵉⵏ ⵄⴰⵔⵔⴹⴻⵏⵜ ⵓ ⵍⴻⵃⵣⴰⵎⴰⵜ ⵏ ⵜⵊⴰⵔⵔⴰⵔⵉⵏ ⵜⵓⵖⴰ ⴰⵜⴻⵏⵜ ⵛⴻⴷⴷⵏⴻⵏⵜ ⵖⴰⵔ ⵜⴽⴰⵔⵔⵓⵜ. ⵍⵓⵄⵍⴰ ⵏ ⵉⵛⵜ ⵏ ⵜⵊⴰⵔⵔⴰⵔⵜ ⵜⵓⵖⴰ-ⵜ ⵉⵊⵊ ⵏ ⵓⵖⵉⵍ ⴷ ⵡⴻⵣⵢⴻⵏ. 33 ⵜⵉⵊⴰⵔⵔⴰⵔⵉⵏ ⵜⵜⵡⴰⴳⴳⴻⵏⵜ ⴰⵎ ⵜⵜⵡⴰⴳⴳⴻⵏⵜ ⵜⵊⴰⵔⵔⴰⵔⵉⵏ ⵏ ⵉⵊⵊ ⵏ ⵓⴽⴰⵔⵔⵓ. ⵍⴻⵃⵣⴰⵎⴰⵜ ⵏⵙⴻⵏⵜ, ⵢⴰⵏⵜⴰⵜ ⵏⵙⴻⵏⵜ, ⴰⵔⵔⴰⴷⵢⴰⵡⴰⵜ ⵏⵙⴻⵏⵜ ⴷ ⵉⵖⵓⵍⴰⴼ ⵏ ⵍⴻⵃⵣⴰⵎⴰⵜ ⵏⵙⴻⵏⵜ ⵜⵜⵡⴰⴼⴻⵙⵢⴻⵏⵜ ⵎⴰⵔⵔⴰ. 34 ⵜⵓⵖⴰ ⴷⵉⵏ ⴰⵔⴻⴱⵄⴰ ⵏ ⵜⵖⴰⵔⴹⵉⵏ ⵖⴰⵔ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵉⵛⵜ ⵏ ⵜⴽⴰⵔⵔⵓⵜ. ⵜⵉⵖⴰⵔⴹⵉⵏ ⵏⵏⴻⵙ ⴼⴼⵖⴻⵏⵜ ⵣⵉ ⵜⴽⴰⵔⵔⵓⵜ. 35 ⵙⴻⵏⵏⴻⵊ ⵉ ⵜⴽⴰⵔⵔⵓⵜ ⵜⵓⵖⴰ ⴷⵉⵏ ⵉⵊⵊ ⵏ ⵟⵟⴰⵔⴼ ⵏ ⵡⴻⵣⵢⴻⵏ ⵏ ⵓⵖⵉⵍ ⵉⴱⴻⴷⴷ ⵉⵇⵓⵡⵡⴰⵔ ⴰⵙ-ⴷⴷ ⵣⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏⵏⴻⵙ. ⵙⴻⵏⵏⴻⵊ ⵉ ⵜⴽⴰⵔⵔⵓⵜ ⵜⵓⵖⴰ ⴷⵉⵏ ⵄⴰⵡⴻⴷ ⵉⴼⴰⵙⵙⴻⵏ ⵖⴰⵔ ⵜⴻⵍⵡⵉⵃⵉⵏ ⵏⵏⴻⵙ. 36 ⵅ ⵜⴻⵍⵡⵉⵃⵉⵏ ⴰⴽ-ⴷ ⵉⴼⴰⵙⵙⴻⵏ ⵏⵙⴻⵏⵜ ⵓ ⵅ ⵜⴻⵍⵡⵉⵃⵉⵏ ⵜⵉⵇⴻⴱⴱⴰⵔⵉⵏ ⵏⵙⴻⵏⵜ ⵉⵏⵇⴻⵛ ⵉⴽⵉⵔⵓⴱⴻⵏ, ⵉⵢⵔⴰⴷⴻⵏ ⴷ ⵜⵛⴻⵊⵊⵓⵔⴰ ⵏ ⵜⵉⵏⵉ, ⵅ ⴽⵓⵍ ⵉⵊⵊ ⵏ ⵡⴻⵎⵛⴰⵏ ⵉⵅⵍⴰ, ⵓⵍⴰ ⴷ ⵜⵉⵙⴻⴷⴷⵉⵢⵉⵏ ⵏ ⵜⴻⴼⵔⴰⵢ ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ. 37 ⴰⵎⵎⵓ ⵉ ⵉⴳⴳⴰ ⵏⴻⵜⵜⴰ ⵄⴻⵛⵔⴰ ⵏ ⵜⴽⴰⵔⵔⵓⵜⵉⵏ, ⵎⴰⵔⵔⴰ ⵙ ⵢⵉⵊⵊ ⵏ ⵡⴻⴱⵔⵉⴷ ⵏ ⵓⴼⴻⵙⵢⵉ, ⵙ ⵢⵉⵊⵊ ⵏ ⵍⴻⵇⵢⴰⵙ, ⵙ ⵢⵉⵊⵊ ⵏ ⵡⴰⴷⴷⵓⴷ.
38 ⵉⴳⴳⴰ ⵄⴰⵡⴻⴷ ⵄⴻⵛⵔⴰ ⵏ ⵜⴱⴰⵏⵢⵓⵜⵉⵏ ⵏ ⵏⵏⵃⴰⵙ. ⵉⵛⵜ ⵏ ⵜⴱⴰⵏⵢⵓⵜ ⵉⴽⵙⵉ ⴰⵔⴻⴱⵄⵉⵏ ⵉⴱⴰⵜⵓⵜⴻⵏ. ⵉⵛⵜ ⵏ ⵜⴱⴰⵏⵢⵓⵜ ⵜⵓⵖⴰ-ⵜⵜ ⴷⴰⵢⴻⵙ ⴰⵔⴻⴱⵄⴰ ⵏ ⵉⵖⴰⴵⴻⵏ. ⵅ ⵇⴰⵄ ⵉⵛⵜ ⵣⵉ ⵄⴻⵛⵔⴰ ⵏ ⵜⴽⴰⵔⵔⵓⵜⵉⵏ ⵏⵏⵉ ⵜⵓⵖⴰ ⵜⴻⴽⴽⴰⵔ ⴰⵙ-ⴷⴷ ⵉⵛⵜ ⵏ ⵜⴱⴰⵏⵢⵓⵜ. □ ■ 39 ⵉⴳⴳⴰ ⵅⴻⵎⵙⴰ ⵏ ⵜⴽⴰⵔⵔⵓⵜⵉⵏ ⵖⴰⵔ ⵓⵖⴻⵣⴷⵉⵙ ⵏ ⵣⵣⴰⵜ ⴰⴼⵓⵙⵉ ⵏ ⵜⴰⴷⴷⴰⵔⵜ ⵓ ⵅⴻⵎⵙⴰ ⵖⴰⵔ ⵓⵖⴻⵣⴷⵉⵙ ⵏ ⵣⵣⴰⵜ ⴰⵣⴻⵍⵎⴰⴹ ⵏ ⵜⴰⴷⴷⴰⵔⵜ, ⵎⴰⵛⴰ ⵜⴰⵔⵉⵎⴰⵏⵜ ⵜⴰⵎⴻⵇⵇⵔⴰⵏⵜ ⵉ ⵡⴰⵎⴰⵏ ⵉⴳⴳⴰ ⵉ-ⵜ ⵖⴰⵔ ⵓⵖⴻⵣⴷⵉⵙ ⵏ ⵣⵣⴰⵜ ⴰⴼⵓⵙⵉ ⵏ ⵜⴰⴷⴷⴰⵔⵜ, ⵖⴰⵔ ⵓⵖⴻⵣⴷⵉⵙ ⵏ ⵛⵛⴰⵔⵇ, ⵖⴰⵔ ⵍⵊⴰⵏⵓⴱ ⵏⵏⴻⵙ. 40 ⵉⴳⴳⴰ ⵃⵉⵔⴰⵎ ⵄⴰⵡⴻⴷ ⵜⵉⴱⴰⵏⵢⵓⵜⵉⵏ ⵉ ⵓⵙⵉⵔⴷ, ⵉⵖⴻⵏⵊⴰⵢⴻⵏ ⴷ ⵟⵟⴰⵡⵢⴰⵜ ⵉ ⵓⵔⵓⵛⵛⵉ. ⵉⴽⴻⵎⵎⴻⵍ ⵃⵉⵔⴰⵎ ⵎⴰⵔⵔⴰ ⵍⵅⴻⴷⵎⴻⵜ ⵏⵏⵉ ⵉⴳⴳⴰ ⵉ ⵓⵊⴻⴵⵉⴷ ⵙⵓⵍⵉⵎⴰⵏ ⵉ ⵜⴰⴷⴷⴰⵔⵜ ⵏ ⵙⵉⴷⵉ:
41 ⵜⵏⴰⵢⴻⵏ ⵏ ⵉⴱⵉⵍⴰⵔⴻⵏ ⴷ ⵜⵏⴰⵢⴻⵏ ⵏ ⵉⵇⵓⵔⴰⵔⴻⵏ ⵏ ⵜⵜⵉⵊⴰⵏ ⵏⵏⵉ ⵉⴵⴰⵏ ⵅ ⵉⵣⴻⴵⵉⴼⴻⵏ ⵏ ⵜⵏⴰⵢⴻⵏ ⵏ ⵉⴱⵉⵍⴰⵔⴻⵏ ⵏⵏⵉ, ⵓⵍⴰ ⴷ ⵜⵏⴰⵢⴻⵏ ⵏ ⵍⴻⵅⴷⴰⵢⴻⵎ ⵏ ⵓⵎⵓⴷⴷⵉ ⵉ ⴷ ⴰⵙⴻⵏⵜ-ⵉ-ⴷⴷ-ⵉⵏⵏⴹⴻⵏ ⵉ ⵜⵏⴰⵢⴻⵏ ⵏ ⵉⵇⵓⵔⴰⵔⴻⵏ ⵏ ⵜⵜⵉⵊⴰⵏ ⵉⵏⵏⵉ ⵉⴵⴰⵏ ⵅ ⵉⵣⴻⴵⵉⴼⴻⵏ ⵏ ⵜⵏⴰⵢⴻⵏ ⵏ ⵉⴱⵉⵍⴰⵔⴻⵏ, 42 ⴰⵔⴻⴱⵄⴰ-ⵎⵢⴰ ⵏ ⵉⵔⴻⵎⵎⴰⵎⴻⵏ ⵉ ⵜⵏⴰⵢⴻⵏ ⵏ ⵍⴻⵅⴷⴰⵢⴻⵎ ⵏ ⵓⵎⵓⴷⴷⵉ ⵜⵜⵡⴰⵎⵎⵙⴻⴱⴹⴰⵏ ⵅ ⵜⵏⴰⵢⴻⵏ ⵏ ⵉⵙⴻⴷⴷⵉⵢⵢⴻⵏ ⵏ ⵉⵔⴻⵎⵎⴰⵎⴻⵏ ⵉ ⴽⵓⵍ ⵍⵅⴻⴷⵎⴻⵜ ⵏ ⵓⵎⵓⴷⴷⵉ ⵉ ⵣⵉ ⴷⵍⵉⵏ ⵏⵉⵜⵏⵉ ⵜⵏⴰⵢⴻⵏ ⵏ ⵉⵇⵓⵔⴰⵔⴻⵏ ⵏ ⵜⵜⵉⵊⴰⵏ ⵉⵏⵏⵉ ⵅ ⵡⵓⴷⴻⵎ ⵙⴻⵏⵏⴻⵊ ⵏ ⵉⴱⵉⵍⴰⵔⴻⵏ, 43 ⴷ ⵄⴻⵛⵔⴰ ⵏ ⵜⴽⴰⵔⵔⵓⵜⵉⵏ ⴷ ⵄⴻⵛⵔⴰ ⵏ ⵜⴱⴰⵏⵢⵓⵜⵉⵏ ⵏⵏⵉ ⵉⴵⴰⵏ ⵅ ⵜⴽⴰⵔⵔⵓⵜⵉⵏ ⵏⵏⵉ, 44 ⴷ ⵜⴰⵔⵉⵎⴰⵏⵜ ⴷ ⵜⴻⵏⵄⴰⵛ ⵏ ⵉⴼⵓⵏⴰⵙⴻⵏ ⵙⴰⴷⵓ ⵉ ⵜⵔⵉⵎⴰⵏⵜ, 45 ⴷ ⵜⴻⵢⴷⵓⵔⵉⵏ ⴷ ⵉⵖⴻⵏⵊⴰⵊⴻⵏ ⴷ ⵟⵟⴰⵡⵢⴰⵜ ⵉ ⵓⵔⵓⵛⵛⵉ.
ⵎⴰⵔⵔⴰ ⵍⴻⵇⵛⵓⵄ-ⴰ ⵉ ⵉⴳⴳⴰ ⵃⵉⵔⴰⵎ ⵉ ⵓⵊⴻⴵⵉⴷ ⵙⵓⵍⵉⵎⴰⵏ ⵉ ⵜⴰⴷⴷⴰⵔⵜ ⵏ ⵙⵉⴷⵉ, ⵜⵓⵖⴰ ⴰⵜⴻⵏ ⵣⵉ ⵏⵏⵃⴰⵙ ⵉⵜⵜⵡⴰⵙⵙⵓⵢⴷⴰⵏ. 46 ⴰⵊⴻⴵⵉⴷ ⵉⴽⴻⴱⴱ ⵉ-ⵜⴻⵏ ⴷⴻⴳ ⵓⴷⴻⵡⵡⴰⵔ ⵏ ⵍ’ⵓⵔⴷⵓⵏ ⴷⵉ ⵜⵍⴰⵅⵜ ⵉⴳⴷⴰⵔⴻⵏ ⵊⴰⵔ ⵙⵓⴽⴽⵓⵜ ⴷ ⵚⴰⵔⵜⴰⵏ. ■ 47 ⵙⵓⵍⵉⵎⴰⵏ ⵉⵙⵙⵄⵉⵣⵣ ⵅ ⵡⴻⵡⵣⴰⵏ ⵏ ⵎⴰⵔⵔⴰ ⵍⴻⵇⵛⵓⵄ-ⴰ ⴷⵉ ⵙⵙⵉⴱⴱⴻⵜ ⵏ ⵍⵇⴻⴷⴷ ⵏⵙⴻⵏ ⴷ ⴰⵎⴻⵇⵇⵔⴰⵏ ⴰⵟⵟⴰⵙ. ⵡⴰⵔ ⴱⴻⵇⵇⵛⴻⵏ ⴷⵉ ⵍⴻⵡⵣⴻⵏ ⵏ ⵏⵏⵃⴰⵙ.
48 ⵙⵓⵍⵉⵎⴰⵏ ⵉⴳⴳⴰ ⵎⴰⵔⵔⴰ ⵍⴻⵇⵛⵓⵄ ⵉ ⵜⴰⴷⴷⴰⵔⵜ ⵏ ⵙⵉⴷⵉ:
ⴰⵄⴰⵍⵟⴰⵔ ⵏ ⵡⵓⵔⴻⵖ, ⵜⴰⵣⴻⵡⴹⴰ ⵏ ⵡⵓⵔⴻⵖ ⵎⵉⵏ ⵅⴻⴼ ⵉⵜⵜⵡⴰⵙⵙⴰⵔⵙ ⵡⴻⵖⵔⵓⵎ ⵏ ⵡⴻⵙⵛⴰⵏ, ■ 49 ⵍⴰ ⴷ ⵍⴻⵇⵏⴰⴷⴻⵍ, ⵅⴻⵎⵙⴰ ⵖⴰⵔ ⵢⴻⴼⵓⵙ ⴷ ⵅⴻⵎⵙⴰ ⵖⴰⵔ ⵓⵣⴻⵍⵎⴰⴹ, ⵣⵣⴰⵜ ⵉ ⵡⴻⵅⵅⴰⵎ ⵏ ⴷⴰⵅⴻⵍ ⵏ ⵣⵣⴰⵡⴻⵛⵜ ⵣⴻⴳ ⵡⵓⵔⴻⵖ ⵉⵣⴻⴷⴳⴻⵏ, ⵍⴰ ⴷ ⵏⵏⵓⵡⴰⵔⴰⵜ ⵢⴰⵔⴻⵣⵎⴻⵏ ⴷ ⵍⴻⴼⵏⴰⵔⴰⵜ ⴷ ⵜⵊⴻⵇⵇⴰⴹⵉⵏ ⵏ ⵜⴻⴼⵜⵉⵍⵜ ⵏ ⵡⵓⵔⴻⵖ, 50 ⵓⵍⴰ ⴷ ⵟⵟⴰⵡⵢⴰⵜ ⴷ ⵜⵊⴻⵇⵇⴰⴹⵉⵏ ⴷ ⵟⵟⴰⵡⵢⴰⵜ ⵉ ⵓⵔⵓⵛⵛⵉ ⴷ ⵜⵖⴻⵏⵊⴰⵢⵉⵏ ⴷ ⵜⵎⴻⵊⵎⴰⵔⵉⵏ ⵏ ⵡⵓⵔⴻⵖ ⵉⵣⴻⴷⴳⴻⵏ. ⵅⴻⵏⵏⵉ ⵉⴳⴳⴰ ⵄⴰⵡⴻⴷ ⵍⴻⵎⴼⴰⵙⴻⵍ ⵉ ⵜⴻⵡⵡⵓⵔⴰ ⵏ ⵜⴰⴷⴷⴰⵔⵜ ⵏ ⴷⴰⵅⴻⵍ, ⵉ ⵡⴻⵇⴷⴰⵙ ⵅ ⵓⵇⴻⴷⴷⴰⵙ, ⵓⵍⴰ ⵍⴻⵎⴼⴰⵙⴻⵍ ⵉ ⵜⴻⵡⵡⵓⵔⴰ ⵏ ⵡⴻⵅⵅⴰⵎ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⵜⴰⴷⴷⴰⵔⵜ ⵣⴻⴳ ⵡⵓⵔⴻⵖ.
51 ⴰⵎⵎⵓ ⵉ ⵜᵉⵜⵜⵡⴰⴽⴻⵎⵎⴻⵍ ⵎⴰⵔⵔⴰ ⵍⵅⴻⴷⵎⴻⵜ ⵉ ⵉⴳⴳⴰ ⵓⵊⴻⴵⵉⴷ ⵙⵓⵍⵉⵎⴰⵏ ⵉ ⵜⴰⴷⴷⴰⵔⵜ ⵏ ⵙⵉⴷⵉ. ⵓⵛⴰ ⵙⵓⵍⵉⵎⴰⵏ ⵉⵙⵙⵉⴷⴻⴼ ⵜⵉⵡⵀⵉⴱⵉⵏ ⵉⵇⴻⴷⴷⵙⴻⵏ ⵏ ⴱⴰⴱⴰⵙ. ⵉⵙⵙⴰⵔⵙ ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵇⵛⵓⵄ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵜⴰⴷⴷⴰⵔⵜ ⵏ ⵙⵉⴷⵉ. □ ■