ⴷⴷⴻⵄⵡⴻⵜ ⵏ ⴰⵢⵜ ⵏ ⵊⵉⴱⵄⵓⵏ ⴹⵉⴷⴷ ⵉ ⵛⴰⵡⵓⵍ
21
1 ⴷⴻⴳ ⵡⵓⵙⵙⴰⵏ ⵏ ⴷⴰⵡⵓⴷ ⵜⵓⵖⴰ ⴷⵉⵏ ⵉⵊⵊ ⵏ ⵍⴰⵥ, ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ, ⴰⵙⴻⴳⴳⵯⴰⵙ ⴰⵡⴰⵔⵏⵉ ⵓⵙⴻⴳⴳⵯⴰⵙ. ⵓ ⴷⴰⵡⵓⴷ ⵢⴰⵔⵣⵓ ⵓⴷⴻⵎ ⵏ ⵙⵉⴷⵉ ⵓ ⵙⵉⴷⵉ ⵉⵏⵏⴰ: “ⴷ ⵎⴰⵏ ⴰⵢⴰ ⵅ ⵛⴰⵡⵓⵍ ⵓ ⵅ ⵉⴷⴰⵎⵎⴻⵏ ⵉ ⵉⵍⴻⵚⵇⴻⵏ ⴷⵉ ⵜⴰⴷⴷⴰⵔⵜ ⵏⵏⴻⵙ, ⵎⵉⵏⵣⵉ ⵏⴻⵜⵜⴰ ⵉⵏⵖⴰ ⴰⵢⵜ ⵏ ⵊⵉⴱⵄⵓⵏ.” 2 ⵅⴻⵏⵏⵉ ⵉⵍⴰⵖⴰ-ⴷⴷ ⵓⵊⴻⴵⵉⴷ ⵅ ⴰⵢⵜ ⵏ ⵊⵉⴱⵄⵓⵏ, ⵉⵙⵙⵉⵡⴻⵍ ⴰⴽⵉⴷⵙⴻⵏ. ⴰⵢⵜ ⵏ ⵊⵉⴱⵄⵓⵏ ⵡⴰⵔ ⴷⴷ-ⵇⵇⴰⵔⵚⴻⵏ ⵛⴰ ⵣⴻⴳ ⴰⵢⵜ ⵏ ⵉⵙⵔⴰⵉⵍ, ⵎⴰⵛⴰ ⵣⵉ ⵎⵉⵏ ⵄⴰⴷ ⵉⵇⵇⵉⵎⴻⵏ ⵣⴻⴳ ⵉⵎⵓⵔⵉⵢⵢⴻⵏ. ⴰⵢⵜ ⵏ ⵉⵙⵔⴰⵉⵍ ⵜⵓⵖⴰ ⵊⵊⵓⴵⴻⵏ ⴰⵙⴻⵏ, ⵎⴰⵛⴰ ⵛⴰⵡⵓⵍ ⵜⵓⵖⴰ ⵢⴰⵔⴻⵣⵣⵓ ⴰⴷ ⵜⴻⵏ ⵉⵡⵡⴻⵜ ⴷⴻⴳ ⵡⴻⵛⴹⴰⵔ ⵏⵏⴻⵙ ⵉ ⴰⵢⵜ ⵏ ⵉⵙⵔⴰⵉⵍ ⴷ ⵢⴰⵀⵓⴷⴰ. ■ 3 ⴷⴰⵡⵓⴷ ⵉⵏⵏⴰ ⵉ ⴰⵢⵜ ⵏ ⵊⵉⴱⵄⵓⵏ: “ⵎⵉⵏ ⴷ ⴰⵡⴻⵎ ⵉ ⵖⴰ ⴳⴳⴻⵖ ⵓ ⵙ ⵎⵉⵏ ⵣⵉ ⵖⴰ ⴳⴳⴻⵖ ⴰⵚⵍⴰⵃ, ⵎⴰⵃⴻⵏⴷ ⴰⴷ ⵜⴱⴰⵔⴽⴻⵎ ⵍⵡⴰⵔⵜ ⵏ ⵙⵉⴷⵉ?” 4 ⴰⵢⵜ ⵏ ⵊⵉⴱⵄⵓⵏ ⵏⵏⴰⵏ ⴰⵙ: “ⵡⴰⵔ ⴷ ⴰⵏⴻⵖ ⵉⵛⵇⵉ ⵏⵏⵓⵇⴰⵔⵜ ⵏⵉⵖ ⴷ ⵡⵓⵔⴻⵖ ⵣⵉ ⵛⴰⵡⵓⵍ ⵏⵉⵖ ⵣⵉ ⵜⴰⴷⴷⴰⵔⵜ ⵏⵏⴻⵙ. ⵄⴰⵡⴻⴷ ⵡⴰⵔ ⴷ ⴰⵏⴻⵖ ⴷⴷ-ⵉⴽⴽⴰⵔ ⴰⴷ ⵏⴻⵏⴻⵖ ⵛⴰ ⵏ ⵉⵊⵊ ⴷⵉ ⵉⵙⵔⴰⵉⵍ.” ⵓ ⵏⴻⵜⵜⴰ ⵉⵏⵏⴰ: “ⵎⵉⵏ ⵖⴰ ⵜⵉⵏⵉⵎ, ⴰⴷ ⴰⵡⴻⵎ ⵜ ⴳⴳⴻⵖ.” 5 ⵏⵉⵜⵏⵉ ⵏⵏⴰⵏ ⵉ ⵓⵊⴻⴵⵉⴷ: “ⵉⵛⵇⴰ ⴰⵏⴻⵖ ⵡⴻⵔⵢⴰⵣ ⵏⵏⵉ ⵉⵅⵙⴻⵏ ⴰⴷ ⵅⴰⵏⴻⵖ ⵉⵇⴹⴰ ⵓ ⵜⵓⵖⴰ ⵉⵏⵡⴰ ⴰⴷ ⵉⵎⵃⴰ ⴰⵖⵉⵎⵉ ⵏⵏⴻⵖ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⵙⵔⴰⵉⵍ. 6 ⴰⴷ ⴰⵏⴻⵖ ⵎⵎⴻⵡⵛⴻⵏ ⵙⴻⴱⵄⴰ ⵏ ⵢⴻⵔⵢⴰⵣⴻⵏ ⵣⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ, ⵃⵉⵎⴰ ⴰⴷ ⵜⴻⵏ ⴰⵢⵍⴻⵏ ⵣⵣⴰⵜ ⵉ ⵙⵉⴷⵉ ⴷⵉ ⵊⵉⴱⵄⴰ ⵏ ⵛⴰⵡⵓⵍ, ⵡⴻⵏⵏⵉ ⵉⵜⵜⵡⴰⴼⴰⵔⵣⴻⵏ ⵣⵉ ⵙⵉⴷⵉ!” ⵓⵛⴰ ⴰⵊⴻⴵⵉⴷ ⵉⵏⵏⴰ: “ⵏⴻⵛⵛ ⴰⴷ ⵜⴻⵏ ⵡⵛⴻⵖ.” 7 ⵎⴰⵛⴰ ⴰⵊⴻⴵⵉⴷ ⵉⵙⵙⵄⵉⵣⵣ ⵅ ⵎⴰⴼⵉⴱⵓⵛⴰⵜ, ⵎⵎⵉⵙ ⵏ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ, ⴷⵉ ⵟⵟⵡⴻⵄ ⵏ ⵜⵊⴰⴵⵉⵜ ⵉ ⵙⵉⴷⵉ, ⵜⴻⵏⵏⵉ ⵜᵉⵜⵜⵡⴰⴳⴳ ⵊⴰⵔ ⴰⵙⴻⵏ, ⵊⴰⵔ ⴷⴰⵡⵓⴷ ⴷ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ. ■ 8 ⴰⵊⴻⴵⵉⴷ ⵉⴽⵙⵉ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ ⵏ ⵔⵉⵚⴼⴰ, ⵢⴻⴵⵉⵙ ⵏ ⴰⵢⴰ, ⵉ ⴷⴷ-ⵜⵓⵔⵓⵡ ⵉ ⵛⴰⵡⵓⵍ, ⴰⵔⵎⵓⵏⵉ ⴷ ⵎⴰⴼⵉⴱⵓⵛⴰⵜ, ⴷ ⵅⴻⵎⵙⴰ ⵏ ⵉⵃⴻⵏⵊⵉⵔⴻⵏ ⵏ ⵎⵉⵔⴰⴱ, ⵢⴻⴵⵉⵙ ⵏ ⵛⴰⵡⵓⵍ, ⵉ ⴷⴷ-ⵜⵓⵔⵓⵡ ⵉ ⵄⴰⴷⵔⵉⵢⵉⵍ, ⵎⵎⵉⵙ ⵏ ⴱⴰⵔⵣⵉⵍⵍⴰⵢ ⵣⵉ ⵎⴰⵃⵓⵍⴰⵢ. 9 ⵏⴻⵜⵜⴰ ⵉⵡⵛⴰ ⵉ-ⵜⴻⵏ ⴷⴻⴳ ⵉⴼⴰⵙⵙⴻⵏ ⵏ ⴰⵢⵜ ⵏ ⵊⵉⴱⵄⵓⵏ ⵉⵏⵏⵉ ⵜⴻⵏ ⴰⵢⵍⴻⵏ ⵅ ⵡⴻⴷⵔⴰⵔ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⵙⴻⴱⵄⴰ ⵏⵏⵉ ⵡⴹⴰⵏ ⴷⴻⴳ ⵉⵛⵜ ⵏ ⵜⵡⴰⵍⴰ ⵓ ⵙ ⵉⵊⵊ ⵏ ⵡⴻⴱⵔⵉⴷ. ⵏⵉⵜⵏⵉ ⵜⵜⵡⴰⵏⵖⴻⵏ ⴷⴻⴳ ⵡⵓⵙⵙⴰⵏ ⵏ ⵜⵎⴻⵢⵔⴰ, ⴷⴻⴳ ⵡⵓⵙⵙⴰⵏ ⵉⵎⴻⵣⵡⵓⵔⴰ, ⵖⴰⵔ ⴱⴻⴷⴷⵓ ⵏ ⵜⵎⴻⵢⵔⴰ ⵏ ⵉⵎⴻⵏⴷⵉ.
10 ⵅⴻⵏⵏⵉ ⵜⴻⴽⵙⵉ ⵔⵉⵚⴼⴰ, ⵢⴻⴵⵉⵙ ⵏ ⴰⵢⴰ, ⵉⵛⵜ ⵏ ⵜⵅⴰⵏⵛⴻⵜ ⵜⴻⵙⵙⵓ ⵜⵜ ⵣⵣⴰⵜ ⵉ ⵢⵉⵅⴻⴼ ⵏⵏⴻⵙ ⵅ ⵉⵊⵊ ⵏ ⵊⵊⴰⵔⴼ. ⵣⵉ ⴱⴻⴷⴷⵓ ⵏ ⵜⵎⴻⵢⵔⴰ ⴰⵍ ⵅⴰⵙⴻⵏ ⴷⴷ-ⵣⴻⴵⵄⴻⵏ ⵡⴰⵎⴰⵏ ⵣⴻⴳ ⵓⵊⴻⵏⵏⴰ. ⵏⴻⵜⵜⴰⵜ ⵡⴰⵔ ⵜⴻⵊⵊⵉ ⵉⵊⴹⴰⴹ ⵏ ⵓⵊⴻⵏⵏⴰ ⴰⴷ ⵖⴰⵔⵙⴻⵏ ⴷⴷ-ⴰⵙⴻⵏ ⵙ ⵓⵣⵉⵍ ⵓⵍⴰ ⴷ ⵍⴻⵡⵃⵓⵛ ⵏ ⵍⴻⵅⵍⴰ ⵙ ⴵⵉⵍⴻⵜ.
11 ⵃⴰⵊⴰⵏ ⴰⵙ ⵉ ⴷⴰⵡⵓⴷ ⵎⵉⵏ ⵜⵓⵖⴰ ⵜⴻⴳⴳⴰ ⵔⵉⵚⴼⴰ, ⵢⴻⴵⵉⵙ ⵏ ⴰⵢⴰ, ⵜⴰⵢⵢⴰ ⵏ ⵛⴰⵡⵓⵍ. 12 ⵉⵟⵟⴻⴼ ⴷⴰⵡⵓⴷ ⴰⴱⵔⵉⴷ ⵎⴰⵃⴻⵏⴷ ⴰⴷ ⵉⴽⵙⵉ ⵣⴻⴳ ⵉⵎⴻⵣⴷⴰⵖ ⵏ ⵢⴰⴱⵉⵛ ⴷⵉ ⵊⵉⵍⵄⴰⴷ ⵉⵖⵓⵙⵙⴰⵏ ⵏ ⵛⴰⵡⵓⵍ ⴷ ⵉⵖⵓⵙⵙⴰⵏ ⵏ ⵎⵎⵉⵙ ⵢⵓⵏⴰⵜⴰⵏ ⵏⵏⵉ ⴷⴷ-ⴽⴽⵙⴻⵏ ⵏⵉⵜⵏⵉ ⵣⴻⴳ ⵡⴰⵣⵣⴰⵖ ⵏ ⴱⴰⵢⵜ-ⵙⴰⵏ, ⵎⴰⵏⵉ ⵜⴻⵏ ⵢⵓⵢⵍⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⴻⴳ ⵡⴰⵙⵙ ⵉ ⴷⵉ ⵖⴻⵍⴱⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵛⴰⵡⵓⵍ ⵅ ⵉⴷⵓⵔⴰⵔ ⵏ ⵊⵉⵍⴱⵓⵄⴰ. ■ 13 ⵏⴻⵜⵜⴰ ⵉⵙⵙⴳⴻⵄⵄⴻⴷ ⵙⵙⴻⵏⵏⵉ ⵉⵖⵙⴰⵏ ⵏ ⵛⴰⵡⵓⵍ ⴷ ⵉⵖⵙⴰⵏ ⵏ ⵎⵎⵉⵙ ⵢⵓⵏⴰⵜⴰⵏ. ⵏⵉⵜⵏⵉ ⵙⵙⵎⵓⵏⴻⵏ ⵄⴰⵡⴻⴷ ⵉⵖⵙⴰⵏ ⵏ ⵢⵉⵏⵏⵉ ⵉⵜⵜⵡⴰⵢⵍⴻⵏ. 14 ⵏⴻⴹⵍⴻⵏ ⵉⵖⵙⴰⵏ ⵏ ⵛⴰⵡⵓⵍ ⴷ ⵎⵎⵉⵙ ⵢⵓⵏⴰⵜⴰⵏ ⴷⵉ ⵜⴻⵎⵎⵓⵔⵜ ⵏ ⴱⵉⵏⵢⴰⵎⵉⵏ ⴷⵉ ⵚⴰⵢⵍⴰⵄ ⴷⴻⴳ ⵡⴻⵏⴹⴻⵍ ⵏ ⴱⴰⴱⴰⵙ ⵇⵉⵙ ⵓ ⵏⵉⵜⵏⵉ ⴳⴳⵉⵏ ⵎⴰⵔⵔⴰ ⵎⵉⵏ ⴷ ⴰⵙⴻⵏ ⵢⵓⵎⵓⵔ ⵓⵊⴻⴵⵉⴷ. ⴰⵡⴰⵔⵏⵉ ⵎⴰⵏ ⴰⵢⴰ ⵉⵊⵊⴰ ⴰⵔⴻⴱⴱⵉ ⴰⴷ ⵉⵜⵜⵡⴰⵙⵙⴻⵚⵍⴻⵃ ⵉⵅⴻⴼ ⵏⵏⴻⵙ ⴷⵉ ⵟⵟⵡⴻⵄ ⵏ ⵜⴻⵎⵎⵓⵔⵜ ⵙ ⵜⵥⴰⴵⵉⵜ ⵏⵙⴻⵏ ⵢⵓⴵⵖⴻⵏ.
ⴰⵎⴻⵏⵖⵉ ⴰⴽ-ⴷ ⴰⵢⵜ ⵏ ⵔⴰⴼⴰ
15 ⵉⴼⵉⵍⵉⵙⵟⵉⵏⵉⵢⵢⴻⵏ ⵎⵎⴻⵏⵖⴻⵏ ⵄⴰⵡⴻⴷ ⴰⴽ-ⴷ ⵉⵙⵔⴰⵉⵍ. ⴷⴰⵡⵓⴷ ⵉⵀⵡⴰ ⴷ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴰⴽⵉⴷⴻⵙ. ⵏⵉⵜⵏⵉ ⵎⵎⴻⵏⵖⴻⵏ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵉⴷⵡⴻⵍ ⴷⴰⵡⵓⴷ ⵢⵓⵃⴻⵍ ⴰⵟⵟⴰⵙ. ■ 16 ⵢⵉⵛⴱⵉ-ⴱⴰⵏⵓⴱ, ⵉⵊⵊ ⵣⴻⴳ ⵉⵃⴻⵏⵊⵉⵔⴻⵏ ⵏ ⵔⴰⴼⴰ, ⵡⴻⵏⵏⵉ ⵍⴰⵏⵙⴰ ⵏⵏⴻⵙ ⵜⴻⵡⵣⴻⵏ ⵜⴻⵍⵜ-ⵎⵢⴰ ⵛⵉⵇⵍⵓ ⵏ ⵏⵏⵃⴰⵙ ⵓ ⵡⴻⵏⵏⵉ ⵜⵓⵖⴰ ⵉⴱⵢⴻⵙ ⵙ ⵢⵉⵊⵊ ⵏ ⵙⵙⵉⴼ ⵏ ⵊⴷⵉⴷ, ⵉⵟⵟⵖⵉⵍ ⴰⵙ ⴰⴷ ⵉⵡⵡⴻⵜ ⴷⴰⵡⵓⴷ. 17 ⵎⴰⵛⴰ ⴰⴱⵉⵛⴰⵢ, ⵎⵎⵉⵙ ⵏ ⵚⴰⵔⵓⵢⴰ, ⵉⵡⵛⴰ ⴰⴼⵓⵙ ⵉ ⴷⴰⵡⵓⴷ, ⵉⵡⵜⴰ ⴰⴼⵉⵍⵉⵙⵟⵉⵏⵉ, ⵉⵏⵖⴰ ⵉ-ⵜ. ⵅⴻⵏⵏⵉ ⵊⵊⵓⴵⴻⵏ ⴰⵙ ⵢⴻⵔⵢⴰⵣⴻⵏ ⵏ ⴷⴰⵡⵓⴷ, ⵏⵏⴰⵏ: “ⵛⴻⴽ ⵡⴰⵔ ⴰⴽⵉⴷⵏⴻⵖ ⵜⴻⴼⴼⵖⴻⴷ ⵄⴰⴷ ⵖⴰⵔ ⵓⵎⴻⵏⵖⵉ, ⵡⴰⵔ ⵉⵄⴻⴷⴷⴻⵍ ⴰⴷ ⵜⵅⴻⵙⵢⵉⴷ ⵍⴻⴼⵏⴰⵔ ⵏ ⵉⵙⵔⴰⵉⵍ.”
18 ⴰⵡⴰⵔⵏⵉ ⴰⵙ ⵉⵎⵙⴰⵔ, ⴰⵇⴰ ⵉⴽⴽⴰⵔ ⵄⴰⵡⴻⴷ ⵓⵎⴻⵏⵖⵉ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵊⵓⴱ. ⵍⴻⵅⴷⴻⵏⵏⵉ ⵙⴰⴱⴽⴰⵢ, ⴰⵃⵓⵛⴰⵢⵉ, ⵉⵡⵜⴰ ⵙⴰⴼ, ⵡⴻⵏⵏⵉ ⴷ ⵉⵊⵊ ⵣⴻⴳ ⵉⵃⴻⵏⵊⵉⵔⴻⵏ ⵏ ⵔⴰⴼⴰ. ■
19 ⵄⴰⵡⴻⴷ ⵜⵓⵖⴰ ⴷⵉⵏ ⵓⵎⴻⵏⵖⵉ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵊⵓⴱ. ⵉⵍⵃⴰⵏⴰⵏ, ⵎⵎⵉⵙ ⵏ ⵢⴰⵄⵔⵉ-ⴰⵔⵊⵉⵎ, ⵣⵉ ⴱⴰⵢⵜ-ⵍⴰⵃⵎ, ⵉⵖⵍⴻⴱ ⵅ ⵓⵍⵜⵎⴰⵙ ⵏ ⵊⵓⵍⵢⴰⵜ ⵣⵉ ⵊⴰⵜ. ⴰⴽⴻⵛⵛⵓⴹ ⵏ ⵍⴰⵏⵙⴰ ⵏⵏⴻⵙ ⵉⴳⴳⴰ ⴰⵎ ⵢⵉⵊⵊ ⵏ ⵡⴻⵄⵎⵓⴷ ⵏ ⵓⴽⴻⵛⵛⵓⴹ ⵏ ⵓⵅⴻⵢⵢⴻⴹ.
20 ⵓⵛⴰ ⵉⴽⴽⴰⵔ ⵄⴰⵡⴻⴷ ⵓⵎⴻⵏⵖⵉ ⴷⵉ ⵊⴰⵜ. ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ ⴷ ⴰⵣⵉⵔⴰⵔ, ⵙ ⵙⴻⵜⵜⴰ ⵏ ⵉⴹⴻⵡⴹⴰⵏ ⵖⴰⵔ ⵉⴼⴰⵙⵙⴻⵏ ⵏⵏⴻⵙ ⵓ ⵙⴻⵜⵜⴰ ⵏ ⵜⴼⴻⴷⵏⵉⵏ ⵖⴰⵔ ⵉⴹⴰⵔⴻⵏ ⵏⵏⴻⵙ, ⵎⴰⵔⵔⴰ ⵍⵇⴻⴷⴷ ⵏⵙⴻⵏ ⴰⵔⴻⴱⵄⴰ ⵓ ⵄⵉⵛⵔⵉⵏ. ⵓⵍⴰ ⴷ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⵉ ⵔⴰⴼⴰ. 21 ⵏⴻⵜⵜⴰ ⵉⵙⵜⴻⵀⵣⴰ ⵣⵉ ⵉⵙⵔⴰⵉⵍ, ⵎⴰⵛⴰ ⵢⵓⵏⴰⵜⴰⵏ, ⵎⵎⵉⵙ ⵏ ⵛⵉⵎⵄⴰ, ⵓⵎⴰⵙ ⵏ ⴷⴰⵡⵓⴷ, ⵉⵖⵍⴻⴱ ⵅⴰⵙ.
22 ⴰⵔⴻⴱⵄⴰ-ⵢⴰ ⵜⵜⵡⴰⵅⴻⵍⵇⴻⵏ-ⴷⴷ ⴷⵉ ⵔⴰⴼⴰ ⴷⵉ ⵊⴰⵜ ⵓ ⵏⵉⵜⵏⵉ ⵡⴹⴰⵏ ⵙ ⵓⴼⵓⵙ ⵏ ⴷⴰⵡⵓⴷ ⵓ ⵙ ⵓⴼⵓⵙ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ.