ⵍⵎⴻⵡⵜ ⵏ ⵛⴰⵡⵓⵍ
31
1 ⵎⵎⴻⵏⵖⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴰⴽ-ⴷ ⵉⵙⵔⴰⵉⵍ. ⵉⵔⵢⴰⵣⴻⵏ ⵏ ⵉⵙⵔⴰⵉⵍ ⴰⵔⴻⵡⵍⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵡⴹⴰⵏ ⴷ ⵉⵎⴻⵜⵜⴰⵏ ⵅ ⵜⴻⵎⵎⵓⵔⵜ ⵏ ⵉⴷⵓⵔⴰⵔ ⵏ ⵊⵉⵍⴱⵓⵄⴰ. ■ 2 ⵉⴼⵉⵍⵉⵙⵟⵉⵏⵉⵢⵢⴻⵏ ⴹⴼⴰⵔⴻⵏ ⵛⴰⵡⵓⵍ ⴷ ⴰⵔⵔⴰⵡ ⵏⵏⴻⵙ ⴱⵍⴰ ⵇⴻⵟⵟⵓ ⵓⵛⴰ ⵉⴼⵉⵍⵉⵙⵟⵉⵏⵉⵢⵢⴻⵏ ⵏⵖⵉⵏ ⵢⵓⵏⴰⵜⴰⵏ ⴷ ⴰⴱⵉⵏⴰⴷⴰⴱ ⴷ ⵎⴰⵍⴽⵉⵛⵓⵄⴰ, ⴰⵔⵔⴰⵡ ⵏ ⵛⴰⵡⵓⵍ. 3 ⵉⴷⵡⴻⵍ ⵓⵎⴻⵏⵖⵉ ⴰⴽ-ⴷ ⵛⴰⵡⵓⵍ ⵉⵡⵄⴰⵔ. ⵉⵎⵊⴻⴱⴱⴰⴷⴻⵏ, ⵉⵔⵢⴰⵣⴻⵏ ⵙ ⵍⵇⴻⵡⵙ, ⵓⴼⵉⵏ ⵜ ⵓ ⵏⴻⵜⵜⴰ ⵜⵓⵖⴰ ⵉⵜⵜⴻⴳⴳⵯⴻⴷ ⴰⵟⵟⴰⵙ ⵣⴻⴳ ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ. 4 ⵅⴻⵏⵏⵉ ⵉⵏⵏⴰ ⵛⴰⵡⵓⵍ ⵉ ⵓⵃⴻⵎⵎⴰⵍ ⵏ ⵍⴻⵙⵏⴰⵃ ⵏⵏⴻⵙ: “ⵙⵓⴼⴼⴻⵖ-ⴷⴷ ⵙⵙⵉⴼ ⵏⵏⴻⵛ, ⵙⵏⵓⵇⵇⴻⴱ ⴰⵢⵉ ⵣⵣⴰⵢⴻⵙ! ⵏⵉⵖ ⴰⴷ ⵜⴰⵖ ⴰⴷ ⴷⴷ-ⴰⵙⴻⵏ ⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ, ⵎⴰⵃⴻⵏⴷ ⴰⴷ ⴰⵢⵉ ⵙⵙⵏⵓⵇⵇⴱⴻⵏ ⵓ ⴰⴷ ⵣⵣⴰⵢⵉ ⵙⵜⴻⵀⵣⴰⵏ.” ⵎⴰⵛⴰ ⴰⵃⴻⵎⵎⴰⵍ ⵏ ⵍⴻⵙⵏⴰⵃ ⵏⵏⴻⵙ ⵡⴰⵔ ⵉⵅⵙ ⴰⴷ ⵜⵜ ⵉⴳⴳ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⴳⴳⵯⴻⴷ ⴰⵟⵟⴰⵙ. ⵅⴻⵏⵏⵉ ⵉⴽⵙⵉ ⵛⴰⵡⵓⵍ ⵙⵙⵉⴼ ⵓⵛⴰ ⵉⵊⵊⴰ ⵉⵅⴻⴼ ⵏⵏⴻⵙ ⴰⴷ ⵅⴰⵙ ⵉⵡⴹⴰ. 5 ⵓⵎⵉ ⴰⵃⴻⵎⵎⴰⵍ ⵏ ⵍⴻⵙⵏⴰⵃ ⵉⵥⵔⴰ, ⴰⵇⴰ ⵛⴰⵡⵓⵍ ⵉⵎⵎⵓⵜ, ⵉⴳⴳⴰ ⵓⵍⴰ ⴷ ⵏⴻⵜⵜⴰ ⴰⴷ ⵉⵡⴹⴰ ⵙ ⵢⵉⵅⴻⴼ ⵏⵏⴻⵙ ⵅ ⵙⵙⵉⴼ ⵏⵏⴻⵙ ⵓⵛⴰ ⵉⵎⵎⵓⵜ ⴰⴽⵉⴷⴻⵙ. 6 ⴰⵎⵎⵓ ⵉ ⵉⵎⵎⵓⵜ ⵛⴰⵡⵓⵍ ⴷⴻⴳ ⵡⴰⵙⵙ ⵏⵏⵉ, ⵉⵎⵓⵏ ⴰⴽ-ⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵓ ⴰⴽ-ⴷ ⵓⵃⴻⵎⵎⴰⵍ ⵏ ⵍⴻⵙⵏⴰⵃ ⵏⵏⴻⵙ ⵓⵍⴰ ⴰⴽ-ⴷ ⵎⴰⵔⵔⴰ ⵉⵔⵢⴰⵣⴻⵏ ⵏⵏⴻⵙ.
7 ⵓⵎⵉ ⵥⵔⵉⵏ ⵢⴻⵔⵢⴰⵣⴻⵏ ⵏ ⵉⵙⵔⴰⵉⵍ, ⵉⵏⵏⵉ ⵜⵓⵖⴰ ⵖⴰⵔ ⵓⵖⴻⵣⴷⵉⵙ ⵏⵏⴻⵖⵏⵉ ⵏ ⵍⴻⵡⴹⴰ ⵏ ⵜⴻⵖⵣⵓⵔⵜ ⴷ ⵉⵏⵏⵉ ⵜⵓⵖⴰ ⵅ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ, ⴰⵇⴰ ⵉⵔⵢⴰⵣⴻⵏ ⵏ ⵉⵙⵔⴰⵉⵍ ⴰⵔⴻⵡⵍⴻⵏ ⵓ ⴰⵇⴰ ⵛⴰⵡⵓⵍ ⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵜⵜⵡⴰⵏⵖⴻⵏ, ⵙⴻⵎⵃⴻⵏ ⵏⵉⵜⵏⵉ ⴷⵉ ⵜⵏⴻⴷⴷⴰⵎ ⵏⵙⴻⵏ ⵓⵛⴰ ⴰⵔⴻⵡⵍⴻⵏ. ⵍⴻⵅⴷⴻⵏⵏⵉ ⵓⵙⵉⵏ-ⴷⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⴷⴻⵡⵍⴻⵏ ⵣⴻⴷⴷⵖⴻⵏ ⴷⴰⵢⵙⴻⵏⵜ. 8 ⵜⵉⵡⴻⵛⵛⴰ ⵏⵏⴻⵙ, ⵓⵎⵉ ⴷⴷ-ⵓⵙⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵃⵉⵎⴰ ⴰⴷ ⴽⴻⵛⵛⴹⴻⵏ ⵉⵏⵏⵉ ⵉⵜⵜⵡⴰⵏⵖⴻⵏ, ⵉⵎⵙⴰⵔ, ⴰⵇⴰ ⵓⴼⵉⵏ ⵛⴰⵡⵓⵍ ⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏⵏⴻⵙ, ⵉⵏⵏⵉ ⵜⵓⵖⴰ ⵉⵡⴹⴰⵏ ⵅ ⵡⴻⴷⵔⴰⵔ ⵏ ⵊⵉⵍⴱⵓⵄⴰ. 9 ⵏⵉⵜⵏⵉ ⵇⴻⵙⵙⴻⵏ ⴰⵙ ⴰⵣⴻⴵⵉⴼ, ⵙⵙⴰⵔⵅⵓⵏ ⴰⵙ ⵍⴻⵙⵏⴰⵃ ⵓⵛⴰ ⵙⵙⴻⴽⴽⴻⵏ ⵉⵔⴻⵇⵇⴰⵙⴻⵏ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵃⵉⵎⴰ ⴰⴷ ⵙⵙⵉⵡⴹⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵖⴰⵔ ⵜⴰⴷⴷⴰⵔⵜ ⵏ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵏⵙⴻⵏ ⵓ ⵊⴰⵔ ⵍⴳⴻⵏⵙ. ■ 10 ⵍⴻⵙⵏⴰⵃ ⵏ ⵛⴰⵡⵓⵍ ⵙⵙⴰⵔⵙⴻⵏ ⵜ ⴷⵉ ⵜⴰⴷⴷⴰⵔⵜ ⵏ ⵣⵣⴰⵡⴻⵛⵜ ⵏ ‘ⵄⴰⵛⵜⴰⵔⵓⵜⵉⵏ’, ⵓ ⵍⵅⴻⵛⴱⴻⵜ ⵏⵏⴻⵙ ⵓⵢⵍⴻⵏ ⵜⵜ ⵖⴰⵔ ⵍⵃⵉⴹ ⵏ ⴱⴰⵢⵜ-ⵛⴰⵏ.
11 ⵓⵎⵉ ⵉⵎⴻⵣⴷⴰⵖ ⵏ ⵢⴰⴱⵉⵛ-ⵊⵉⵍⵄⴰⴷ ⵙⵍⴰⵏ ⵎⵉⵏ ⴳⴳⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵛⴰⵡⵓⵍ, 12 ⴽⴽⴰⵔⴻⵏ ⵎⴰⵔⵔⴰ ⵉⵔⵢⴰⵣⴻⵏ ⵉⵎⴻⵃⴹⴻⵏ, ⵓⵢⵓⵔⴻⵏ ⴵⵉⵍⴻⵜ ⵜⵎⵓⵏ ⵓⵛⴰ ⴽⵙⵉⵏ ⵍⵅⴻⵛⴱⴻⵜ ⵏ ⵛⴰⵡⵓⵍ ⴷ ⵍⵅⴻⵛⴱⴰⵜ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵣⵉ ⵍⵃⵉⴹ ⵏ ⴱⴰⵢⵜ-ⵛⴰⵏ ⵓⵛⴰ ⵉⵡⴹⴻⵏ ⵖⴰⵔ ⵢⴰⴱⵉⵛ ⵓⵛⴰ ⵙⵙⵛⴻⵎⴹⴻⵏ ⵜⴻⵏⵜ ⴷⵉⵏⵏⵉ. 13 ⵅⴻⵏⵏⵉ ⴽⵙⵉⵏ ⵉⵖⵙⴰⵏ ⵏⵙⴻⵏ, ⵏⴻⴹⵍⴻⵏ ⵜⴻⵏ ⵙⴰⴷⵓ ⵜⴰⵛⴻⵊⵊⴰⵔⵜ ⵏ ⵜⵎⴰⵔⵉⵙⵜ ⵏ ⵢⴰⴱⵉⵛ ⵓⵛⴰ ⵥⵓⵎⵎⴻⵏ ⵙⴻⴱⵄⴰ ⵏ ⵡⵓⵙⵙⴰⵏ. □