ⴷⴰⵡⵓⴷ ⴷ ⵍⴱⴰⵛⴰⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ
29
1 ⵉⴼⵉⵍⵉⵙⵟⵉⵏⵉⵢⵢⴻⵏ ⵙⵙⵎⵓⵏⴻⵏ ⵎⴰⵔⵔⴰ ⵍⵄⴻⵙⴽⴰⵔ ⵏⵙⴻⵏ ⵖⴰⵔ ⴰⴼⵉⵇ ⵓⵛⴰ ⵉⵙⵔⴰⵉⵍ ⵜⵓⵖⴰ ⵉⵡⵜⴰ ⵉⵇⵉⴹⴰⵏ ⵏⵏⴻⵙ ⵖⴰⵔ ⵜⴰⵍⴰ ⵏⵏⵉ ⵉⴵⴰⵏ ⵖⴰⵔ ⵢⴰⵣⵔⴰⵄⵉⵍ. 2 ⵓⵛⴰ ⵍⴱⴰⵛⴰⵜ ⵏ ⵜⵏⴻⴷⴷⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵥⵡⴰⵏ ⵖⴰⵔ ⴷⵉⵏ ⵙ ⵍⵎⵢⴰⵡⴰⵜ ⴷ ⵍⵓⵍⵓⴼ ⵏⵙⴻⵏ ⵓⵛⴰ ⵉⵥⵡⴰ ⴷⴰⵡⵓⴷ ⴷ ⵢⴻⵔⵢⴰⵣⴻⵏ ⵏⵏⴻⵙ ⴰⴽ-ⴷ ⴰⵅⵉⵛ ⵖⴰⵔ ⵓⵖⴻⵣⴷⵉⵙ ⴰⵏⴻⴳⴳⴰⵔⵓ. 3 ⵅⴻⵏⵏⵉ ⵏⵏⴰⵏ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ: “ⵎⵉⵏ ⴷⴰ ⵜⵜⴻⴳⴳⴻⵏ ⵉⵄⵉⴱⵔⴰⵏⵉⵢⵢⴻⵏ-ⴰ?” ⵢⴰⵔⵔⴰ-ⴷⴷ ⴰⵅⵉⵛ ⵅ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ: “ⵎⴰ ⵡⴰ ⵡⴰⵔ ⵉⴵⵉ ⴷ ⴷⴰⵡⵓⴷ, ⴰⵎⵙⴻⵅⵅⴰⵔ ⵏ ⵛⴰⵡⵓⵍ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵡⴻⵏⵏⵉ ⵜⵓⵖⴰ ⵖⴰⵔⵉ ⵉⴵⴰⵏ ⴰⵙⴻⴳⴳⵯⴰⵙ ⴷ ⵡⴰⵙⵙ? ⵣⴻⴳ ⵡⴰⵙⵙ ⵉ ⵖⴰⵔⵉ ⴷⴷ-ⵢⴻⵄⴷⵓ ⴰⵍ ⴰⵙⵙ-ⴰ ⵏⴻⵛⵛ ⵡⴰⵔ ⴷⴰⵢⴻⵙ ⵓⴼⵉⵖ ⵓⵍⴰ ⴷ ⵉⵊⵊ ⵏ ⵍⵄⵉⴱ.” 4 ⴼⴼⵓⴳⴳⵎⴻⵏ ⵅⴰⵙ ⴰⵟⵟⴰⵙ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵏⵏⴰⵏ ⴰⵙ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ: “ⵙⴻⴽⴽ ⴰⵔⵢⴰⵣ ⴰⴷ ⵉⵄⵇⴻⴱ, ⵃⵉⵎⴰ ⴰⴷ ⵉⴷⵡⴻⵍ ⵖⴰⵔ ⵡⴻⵎⵛⴰⵏ ⵏⵏⴻⵙ ⵏⵏⵉ ⵉ ⴷ ⴰⵙ ⵜⴻⵙⵙⴻⵛⵏⴻⴷ. ⵡⴰⵔ ⵉⵣⴻⵎⵎⴰⵔ ⴰⴽⵉⴷⵏⴻⵖ ⵉⵀⵡⴰ ⵖⴰⵔ ⵓⵎⴻⵏⵖⵉ, ⵃⵉⵎⴰ ⵅⴻⵏⵏⵉ ⵡⴰⵔ ⵉⴷⴷⵉⴽⴽⵡⵉⵍ ⴷ ⵍⴻⵄⴷⵓ ⵏⵏⴻⵖ ⴷⴻⴳ ⵓⵎⴻⵏⵖⵉ. ⵎⴰⵖⴰⵔ ⵙ ⵎⵉⵏⵣⵉ ⵉⵣⴻⵎⵎⴰⵔ ⵡⴰⵏⵉⵜⴰ ⴰⴷ ⵉⵚⵍⴻⵃ ⴰⴽ-ⴷ ⵙⵉⴷⵉⵙ ⵏⵏⴻⵙ? ⵎⴰ ⵡⴰⵔ ⵉⴵⵉ ⴰⴽ-ⴷ ⵉⵣⴻⴵⵉⴼⴻⵏ ⵏ ⵢⴻⵔⵢⴰⵣⴻⵏ-ⴰ? ■ 5 ⵎⴰ ⵡⴰⵏⵉⵜⴰ ⵡⴰⵔ ⵉⴵⵉ ⴷ ⴷⴰⵡⵓⴷ ⵡⴻⵏⵏⵉ ⵅ ⵖⴻⵏⵏⵊⴻⵏⵜ ⴷ ⵛⴻⴹⵃⴻⵏⵜ ⵙ ⵏⵏⵓⴱⵜⴰⵜ, ⵏⵏⴰⵏⵜ: ‘ⵛⴰⵡⵓⵍ ⵏⴻⵜⵜⴰ ⵉⵖⵍⴻⴱ ⵅ ⵍⵓⵍⵓⴼ ⵏⵏⴻⵙ, ⵎⴰⵛⴰ ⴷⴰⵡⵓⴷ ⵏⴻⵜⵜⴰ ⵅ ⵄⴻⵛⵔⴰ ⵏ ⵍⵓⵍⵓⴼ ⵏⵏⴻⵙ?’ ” ■
6 ⵓⵛⴰ ⵉⵍⴰⵖⴰ-ⴷⴷ ⴰⵅⵉⵛ ⵉ ⴷⴰⵡⵓⴷ ⵉⵏⵏⴰ ⴰⵙ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⵛⴻⴽ ⴷ ⴰⵚⴷⵉⵇ. ⵓⴼⵓⵖ ⵏⵏⴻⵛ ⴷ ⵡⴻⵄⵇⴰⴱ ⵏⵏⴻⵛ ⴰⴽⵉⴷⵉ ⴷⵉ ⵍⵄⴻⵙⴽⴰⵔ ⴰⵇⴰ ⴰⵜⴻⵏ ⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵉⵏⵓ, ⵎⴰⵖⴰⵔ ⵏⴻⵛⵛ ⵡⴰⵔ ⴷⴰⵢⴻⴽ ⵓⴼⵉⵖ ⵓⵍⴰ ⴷ ⵛⴰ ⵏ ⵍⵖⴻⵛⵛ ⵣⴻⴳ ⵡⴰⵙⵙ ⵉ ⵖⴰⵔⵉ ⴷⴷ-ⵜⵓⵙⵉⴷ ⴰⵍ ⴰⵙⵙ-ⴰ. ⵎⴰⵛⴰ ⵛⴻⴽ ⵡⴰⵔ ⵜⴻⴵⵉⴷ ⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵏ ⵍⴱⴰⵛⴰⵜ ⵏ ⵜⵏⴻⴷⴷⴰⵎ. 7 ⵅⴻⵏⵏⵉ ⵍⴻⵅⵅⵓ, ⵄⵇⴻⴱ, ⵓⵢⵓⵔ ⴷⵉ ⵍⴻⵀⵏⴰ, ⵃⵉⵎⴰ ⵡⴰⵔ ⵜᵉⵜⵜⴻⴳⴳⴻⴷ ⵇⴰⵄ ⵛⴰ ⵏ ⵍⵖⴻⵛⵛ ⴷⵉ ⵜⵉⵟⵟⴰⵡⵉⵏ ⵏ ⵍⴱⴰⵛⴰⵜ ⵏ ⵜⵏⴻⴷⴷⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ.” 8 ⵅⴻⵏⵏⵉ ⵉⵏⵏⴰ ⴷⴰⵡⵓⴷ ⵉ ⴰⵅⵉⵛ: “ⵎⴰⵖⴰⵔ ⵎⵉⵏ ⴳⴳⵉⵖ? ⵎⵉⵏ ⵜⵓⴼⵉⴷ ⴷⴻⴳ ⵓⵎⵙⴻⵅⵅⴰⵔ ⵏⵏⴻⵛ ⵣⴻⴳ ⵡⴰⵙⵙ ⴰⵎⴻⵣⵡⴰⵔⵓ ⵉ ⴷ ⴰⵢⵉ ⵜⵓⵖⴰ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⴰⵍ ⴰⵙⵙ-ⴰ, ⴰⵍⴰⵎⵉ ⵡⴰⵔ ⵔⵓⵃⴻⵖ ⴰⴽⵉⴷⵡⴻⵎ ⴰⴷ ⵎⴻⵏⵖⴻⵖ ⴰⴽ-ⴷ ⵍⵄⴻⴷⵢⴰⵏ ⵏ ⵙⵉⴷⵉ ⵉⵏⵓ, ⴰⵊⴻⴵⵉⴷ?” 9 ⴰⵅⵉⵛ ⵢⴰⵔⵔⴰ-ⴷⴷ, ⵉⵏⵏⴰ ⵉ ⴷⴰⵡⵓⴷ: “ⵏⴻⵛⵛ ⵙⵙⵏⴻⵖ ⵜⵜ, ⵎⵉⵏⵣⵉ ⵛⴻⴽ ⴷ ⵍⴻⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵉⵏⵓ ⴰⵎ ⵢⵉⵊⵊ ⵏ ⵍⵎⴰⵍⴰⴽ ⵏ ⴰⵔⴻⴱⴱⵉ, ⵎⴰⵛⴰ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵏⵏⴰⵏ: ‘ⵏⴻⵜⵜⴰ ⵡⴰⵔ ⴰⴽⵉⴷⵏⴻⵖ ⵉⵜⵜⴻⴼⴼⴻⵖ ⵖⴰⵔ ⵓⵎⴻⵏⵖⵉ.’ 10 ⵙ ⵓⵢⴻⵏⵏⵉ ⴽⴽⴰⵔ ⵜⵉⵡⴻⵛⵛⴰ ⵣⵉⵛ ⵙ ⵉⵎⵙⴻⵅⵅⴰⵔⴻⵏ ⵏ ⵙⵉⴷⵉ ⵏⵏⴻⵛ, ⵉⵏⵏⵉ ⴰⴽⵉⴷⴻⴽ ⴷⴷ-ⵢⵓⵙⵉⵏ. ⵎⴰⵍⴰ ⵜⴻⴽⴽⴰⵔⴻⵎ ⵙ ⵡⴰⵙⵙ ⵣⵉⵛ ⵓⵛⴰ ⵉⵚⴱⴻⵃ ⵍⵃⴰⵍ, ⴼⴼⵖⴻⵎ ⵅⴻⵏⵏⵉ.” 11 ⴷⴰⵡⵓⴷ ⵉⴽⴽⴰⵔ ⵣⵉⵛ, ⵏⴻⵜⵜⴰ ⴷ ⵢⴻⵔⵢⴰⵣⴻⵏ ⵏⵏⴻⵙ, ⵃⵉⵎⴰ ⴰⴷ ⵓⵢⵓⵔⴻⵏ ⴷⵉ ⵚⵚⴱⴻⵃ, ⴰⴷ ⴷⴷ-ⵄⴻⵇⴱⴻⵏ ⵖⴰⵔ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵉⴼⵉⵍⵉⵙⵟⵉⵏⵉⵢⵢⴻⵏ ⵎⴰⵛⴰ ⴼⴼⵖⴻⵏ, ⴳⴻⵄⵄⴷⴻⵏ ⵖⴰⵔ ⵢⴰⵣⵔⴰⵄⵉⵍ.