ⴷⴰⵡⵓⴷ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ
27
1 ⵉⵏⵏⴰ ⴷⴰⵡⵓⴷ ⴷⴻⴳ ⵡⵓⵍ ⵏⵏⴻⵙ: “ⵍⴻⵅⵅⵓ ⵄⴰⴷ ⵉⵊⵊ ⵏ ⵡⴰⵙⵙ ⵓⵛⴰ ⴰⴷ ⵜⵜⵡⴰⵏⵖⴻⵖ ⵅ ⵓⴼⵓⵙ ⵏ ⵛⴰⵡⵓⵍ. ⵡⴰⵔ ⵉⵇⵇⵉⵎ ⵃⴰⵛⴰ ⴰⴷ ⴰⵔⴻⵡⵍⴻⵖ ⴷⴻⵖⵢⴰ ⵖⴰⵔ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵎⴰⵃⴻⵏⴷ ⴰⴷ ⵉⵇⴹⴻⵄ ⵉ ⵛⴰⵡⵓⵍ ⵍⴰⵢⴰⵙ ⵣⵉ ⵊⵊⵉⵀⴻⵜ ⵉⵏⵓ ⵎⴰⵃⴻⵏⴷ ⴰⴷ ⵅⴰⴼⵉ ⵢⴰⵔⵣⵓ ⵄⴰⴷ ⴽⵜⴰⵔ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⵙⵔⴰⵉⵍ. ⴰⵎⵎⵓ ⵉ ⵖⴰ ⵏⴻⵊⵎⴻⵖ ⵉ ⵓⴼⵓⵙ ⵏⵏⴻⵙ.” 2 ⴷⴰⵡⵓⴷ ⵉⴽⴽⴰⵔ, ⵏⴻⵜⵜⴰ ⴷ ⵙⴻⵜⵜⴰ-ⵎⵢⴰ ⵏ ⵢⴻⵔⵢⴰⵣⴻⵏ ⵏⵏⵉ ⵜⵓⵖⴰ ⵖⴰⵔⴻⵙ ⵉⴵⴰⵏ, ⵄⴷⵓⵏ ⵖⴰⵔ ⵎⵎⵉⵙ ⵏ ⵎⴰⵄⵓⴽ, ⴰⵊⴻⴵⵉⴷ ⵏ ⵊⴰⵜ. 3 ⵉⵇⵇⵉⵎ ⴷⴰⵡⵓⴷ ⵖⴰⵔ ⴰⵅⵉⵙ, ⵏⴻⵜⵜⴰ ⴷ ⵢⴻⵔⵢⴰⵣⴻⵏ ⵏⵏⴻⵙ, ⴽⵓⵍ ⴰⵔⵢⴰⵣ ⴰⴽ-ⴷ ⵜⴰⴷⴷⴰⵔⵜ ⵏⵏⴻⵙ. ⴷⴰⵡⵓⴷ ⵉⵣⴷⴻⵖ ⴷⵉⵏ ⴰⴽ-ⴷ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ ⵏⵏⴻⵙ, ⴰⵅⵉⵏⵓⵄⴰⵎ ⵣⵉ ⵢⴰⵣⵔⴰⵄⵉⵍ ⵓ ⴰⴱⵉⵊⴰⵢⵉⵍ, ⵜⴰⵎⵖⴰⵔⵜ ⵏ ⵏⴰⴱⴰⵍ, ⵣⵉ ⴽⴰⵔⵎⵉⵍ. 4 ⵓⵎⵉ ⵏⵏⴰⵏ ⵉ ⵛⴰⵡⵓⵍ, ⴰⵇⴰ ⴷⴰⵡⵓⴷ ⵢⴰⵔⵡⴻⵍ ⵖⴰⵔ ⵊⴰⵜ, ⵡⴰⵔ ⵢⴰⵔⵏⵉ ⵉⵇⵇⵉⵎ ⴰⴷ ⵅⴰⵙ ⵢⴰⵔⵣⵓ ⵄⴰⴷ ⴽⵜⴰⵔ. 5 ⵉⵏⵏⴰ ⴷⴰⵡⵓⴷ ⵉ ⴰⵅⵉⵛ: “ⵎⴰⵍⴰ ⵓⴼⵉⵖ ⵏⴻⵛⵛ ⵍⵅⴰⴹⴰⵔ ⴷⵉ ⵜⵉⵟⵟⴰⵡⵉⵏ ⵏⵏⴻⵛ, ⵅⴻⵏⵏⵉ ⴻⵡⵛ ⴰⵢⵉ ⵉⵊⵊ ⵏ ⵡⴻⵎⵛⴰⵏ ⴷⴻⴳ ⵉⵛⵜ ⵣⵉ ⵜⵏⴻⴷⴷⴰⵎ ⵏⵏⴻⵛ ⵏ ⵜⴻⵎⵎⵓⵔⵜ, ⵃⵉⵎⴰ ⵣⴻⵎⵎⴰⵔⴻⵖ ⴰⴷ ⵣⴻⴷⵖⴻⵖ ⴷⵉⵏ. ⵎⴰⵢⴻⵎⵎⵉ ⵉ ⵖⴰⵔⴻⴽ ⵉ ⵖⴰ ⵉⵣⴷⴻⵖ ⵓⵎⵙⴻⵅⵅⴰⵔ ⵏⵏⴻⵛ ⴰⴽⵉⴷⴻⴽ ⴷⵉ ⵜⴻⵏⴷⵉⵏⵜ ⵏ ⵓⵊⴻⴵⵉⴷ?” 6 ⴷⴻⴳ ⵡⴰⵙⵙ ⵏⵏⵉ ⵉⵡⵛⴰ ⴰⵙ ⴰⵅⵉⵛ ⵜⴰⵏⴷⵉⵏⵜ ⵏ ⵚⵉⵇⵍⴰⵖ. ⵙ ⵓⵢⴰ ⵜⵓⵖⴰ ⵜⴻⴵⴰ ⵚⵉⵇⵍⴰⵖ ⵏ ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ ⴰⵍ ⴰⵙⵙ-ⴰ. 7 ⵓⵙⵙⴰⵏ ⵉ ⵉⴽⴽⴰ ⴷⴰⵡⵓⴷ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵜⵓⵖⴰ ⴷ ⵉⵊⵊ ⵏ ⵓⵙⴻⴳⴳⵯⴰⵙ ⴷ ⴰⵔⴻⴱⵄⴰ ⵏ ⵉⵢⵓⵔⴻⵏ.
8 ⴷⴰⵡⵓⴷ ⵉⴼⴼⴻⵖ ⴰⴽ-ⴷ ⵉⵔⵢⴰⵣⴻⵏ ⵏⵏⴻⵙ ⵓ ⵏⵉⵜⵏⵉ ⴽⴻⵛⵛⴹⴻⵏ ⵉⵊⴰⵛⵓⵔⵉⵢⵢⴻⵏ ⴷ ⵉⵊⴰⵔⵣⵉⵢⵢⴻⵏ ⴷ ⴰⵢⵜ ⵏ ⵄⴰⵎⴰⵍⵉⵇ, ⵎⵉⵏⵣⵉ ⵉⵏⴰ ⵜⵓⵖⴰ ⵣⴻⴷⴷⵖⴻⵏ ⵣⴻⴳ ⵡⴻⵛⵃⴰⵍ ⵓⵢⴰ ⴷⵉ ⵜⴻⵎⵎⵓⵔⵜ, ⵊⵊⵉⵀⴻⵜ ⵏ ⵛⵓⵔ ⴰⵍ ⵜⴰⵎⵎⵓⵔⵜ ⵏ ⵎⵉⵚⵔⴰ. 9 ⴷⴰⵡⵓⴷ ⵉⵡⵜⴰ ⵜⴰⵎⵎⵓⵔⵜ ⵓ ⵡⴰⵔ ⵉⵊⵊⵉ ⴰⴷ ⵉⴷⴷⴰⵔ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵣ ⵏⵉⵖ ⵓⵍⴰ ⴷ ⵉⵛⵜ ⵏ ⵜⴻⵎⵖⴰⵔⵜ. ⵉⵟⵟⴻⴼ ⵄⴰⵡⴻⴷ ⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵢⴻⵖⵢⴰⵍ ⴷ ⵉⵍⴻⵖⵎⴰⵏ ⴷ ⵡⴰⵔⵔⵓⴹ ⵓⵛⴰ ⵉⵄⵇⴻⴱ, ⵢⵓⵙⴰ-ⴷⴷ ⵖⴰⵔ ⴰⵅⵉⵛ. 10 ⵓ ⴰⵅⵉⵛ ⵉⵏⵏⴰ: “ⵎⴰⵏⵉ ⵜⵔⵓⵃⴻⵎ ⴰⵙⵙ-ⴰ ⵎⴰⵃⴻⵏⴷ ⴰⴷ ⵜⴽⴻⵛⵛⴹⴻⵎ?” ⵉⵏⵏⴰ ⴷⴰⵡⵓⴷ: “ⵖⴰⵔ ⵍⵊⴰⵏⵓⴱ ⵏ ⵢⴰⵀⵓⴷⴰ!”, ⵏⵉⵖ: “ⵖⴰⵔ ⵍⵊⴰⵏⵓⴱ ⵏ ⵜⴻⵎⵎⵓⵔⵜ ⵏ ⵉⵢⴰⵔⵃⴰⵎⵉⵜⵉⵍⵉⵢⵢⴻⵏ!”, ⵏⵉⵖ: “ⵖⴰⵔ ⵍⵊⴰⵏⵓⴱ ⵏ ⵜⴻⵎⵎⵓⵔⵜ ⵏ ⵉⵇⵉⵏⵉⵢⵢⴻⵏ!” 11 ⵡⴰⵔ ⵉⵊⵊⵉ ⴷⴰⵡⵓⴷ ⴰⴷ ⵉⴷⴷⴰⵔ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵣ ⵏⵉⵖ ⵓⵍⴰ ⴷ ⵉⵛⵜ ⵏ ⵜⴻⵎⵖⴰⵔⵜ ⵃⵉⵎⴰ ⴰⴷ ⴷⴷ-ⵢⴰⵙ ⵖⴰⵔ ⵊⴰⵜ. ⵉⵏⵏⴰ: “ⵃⵉⵎⴰ ⵏⵉⵜⵏⵉ ⵡⴰⵔ ⵅⴰⵏⴻⵖ ⵜⵜⵄⵉⵡⵉⴷⴻⵏ ⵡⴰⵍⵓ, ⴰⴷ ⵉⵏⵉⵏ: ‘ⵜⴰ ⵉ ⵉⴳⴳⴰ ⴷⴰⵡⵓⴷ!’ ” ⴰⵎⵎⵓ ⵉ ⵉⵇⵇⵉⵎ ⵉⵜⵜⴻⴳⴳ ⴷⵉ ⵎⴰⵔⵔⴰ ⵓⵙⵙⴰⵏ ⵉ ⵉⴽⴽⴰ ⴷⵉ ⵊⵊⵡⴰⵢⴻⵀ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. 12 ⴰⵅⵉⵛ ⵉⵜⵜⵉⵇⵇ ⴷⵉ ⴷⴰⵡⵓⴷ, ⵉⵏⵏⴰ: “ⵙ ⵜⵉⴷⴻⵜⵜ ⵏⴻⵜⵜⴰ ⵉⵙⵙⴰⵔⵣⴻⴳ ⵉⵅⴻⴼ ⵏⵏⴻⵙ ⵖⴰⵔ ⵍⴳⴻⵏⵙ ⵏⵏⴻⵙ, ⵖⴰⵔ ⵉⵙⵔⴰⵉⵍ, ⵓⵛⴰ ⵅ ⵓⵢⴻⵏⵏⵉ ⴰⵇⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⵙⴻⵅⵅⴰⵔ ⵉⵏⵓ ⵉ ⵍⴻⴱⴷⴰ.”