ⴷⴰⵡⵓⴷ ⴷⵉ ⵇⴰⵄⵉⵍⴰ
23
1 ⵃⴰⵊⴰⵏ ⵉ ⴷⴰⵡⵓⴷ, ⵏⵏⴰⵏ: “ⴰⵇⴰ ⵉⴼⵉⵍⵉⵙⵟⵉⵏⵉⵢⵢⴻⵏ ⵜⵜⵎⴻⵏⵖⴰⵏ ⴰⴽ-ⴷ ⵇⴰⵄⵉⵍⴰ ⵓⵛⴰ ⵜⵜⴽⴻⵛⵛⴰⴹⴻⵏ ⵉⵏⴻⴷⵔⴰⵔ.” 2 ⵉⵙⵙⴻⵇⵙⴰ ⴷⴰⵡⵓⴷ ⵙⵉⴷⵉ, ⵉⵏⵏⴰ: “ⵎⴰ ⴰⴷ ⴼⴼⵖⴻⵖ ⴷⵉⵏ, ⴰⴷ ⵡⵜⴻⵖ ⵉⴼⵉⵍⵉⵙⵟⵉⵏⵉⵢⵢⴻⵏ?” ⵙⵉⴷⵉ ⵢⴰⵔⵔⴰ-ⴷⴷ ⵅ ⴷⴰⵡⵓⴷ: “ⴼⴼⴻⵖ, ⵡⵡⴻⵜ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⴼⴻⴽⴽ ⵇⴰⵄⵉⵍⴰ!” 3 ⵏⵏⴰⵏ ⴰⵙ ⵢⴻⵔⵢⴰⵣⴻⵏ ⵏ ⴷⴰⵡⵓⴷ: “ⵅⵣⴰⵔ, ⵏⴻⵛⵛⵉⵏ ⵏᵉⵜⵜⴻⴳⴳⵯⴻⴷ ⴷⴻⵖⵢⴰ ⴷⴰ ⴷⵉ ⵢⴰⵀⵓⴷⴰ, ⵎⴰⵎⵎⴻⵛ ⵄⴰⴷ ⵎⴰⵍⴰ ⵏⴻⵛⵛⵉⵏ ⵏⴻⴼⴼⴻⵖ ⵖⴰⵔ ⵇⴰⵄⵉⵍⴰ ⵖⴰⵔ ⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ.” 4 ⵓⵛⴰ ⴷⴰⵡⵓⴷ ⵉⵙⵙⴻⵇⵙⴰ ⵙⵉⴷⵉ ⵜⵡⴰⵍⴰ ⵏⵏⴻⵖⵏⵉⵜ ⵓ ⵙⵉⴷⵉ ⵢⴰⵔⵔⴰ-ⴷⴷ ⵅⴰⵙ, ⵉⵏⵏⴰ: “ⴽⴽⴰⵔ, ⵀⵡⴰ ⵖⴰⵔ ⵇⴰⵄⵉⵍⴰ, ⵎⵉⵏⵣⵉ ⵏⴻⵛⵛ ⴰⴷ ⴰⵛ ⵡⵛⴻⵖ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⴻⴳ ⵉⴼⴰⵙⵙⴻⵏ ⵏⵏⴻⵛ.” 5 ⵅⴰⵙ ⵓⵛⴰ ⵉⴼⴼⴻⵖ ⴷⴰⵡⵓⴷ ⴰⴽ-ⴷ ⵢⴻⵔⵢⴰⵣⴻⵏ ⵏⵏⴻⵙ ⵖⴰⵔ ⵇⴰⵄⵉⵍⴰ, ⵉⵎⵎⵏⴻⵖ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ. ⵏⴻⵜⵜⴰ ⵢⵓⵥⵥⴻⵍ ⵅ ⵜⵃⵉⵎⴰⵔⵉⵏ ⵏⵙⴻⵏ ⵓⵛⴰ ⵉⵡⵜⴰ ⵜⴻⵏ ⵙ ⵉⵛⵜ ⵏ ⵜⴻⵛⵜⵉ ⴷ ⵜⴰⵎⴻⵇⵇⵔⴰⵏⵜ. ⴰⵎⵎⵓ ⵉ ⵉⴼⴻⴽⴽ ⴷⴰⵡⵓⴷ ⵉⵎⴻⵣⴷⴰⵖ ⵏ ⵇⴰⵄⵉⵍⴰ. 6 ⵓⵎⵉ ⴰⴱⵢⴰⵜⴰⵔ, ⵎⵎⵉⵙ ⵏ ⴰⵅⵉⵎⴰⵍⵉⴽ, ⵢⴰⵔⵡⴻⵍ ⵖⴰⵔ ⴷⴰⵡⵓⴷ ⵖⴰⵔ ⵇⴰⵄⵉⵍⴰ, ⵉⵎⵙⴰⵔ, ⵏⴻⵜⵜⴰ ⴰⵇⴰ ⵉⵀⵡⴰ ⴰⴽ-ⴷ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷⴻⴳ ⵉⴼⴰⵙⵙⴻⵏ ⵏⵏⴻⵙ. ■
7 ⵃⴰⵊⴰⵏ ⴰⵙ ⵉ ⵛⴰⵡⵓⵍ, ⴰⵇⴰ ⴷⴰⵡⵓⴷ ⵢⵉⵡⴻⴹ ⵖⴰⵔ ⵇⴰⵄⵉⵍⴰ. ⵅⴻⵏⵏⵉ ⵉⵏⵏⴰ ⵛⴰⵡⵓⵍ: “ⴰⵔⴻⴱⴱⵉ ⵉⴳⴳⴰ ⴰⵢⵉ ⵉ-ⵜ ⴷⴻⴳ ⵓⴼⵓⵙ ⵉⵏⵓ, ⵎⵉⵏⵣⵉ ⵏⴻⵜⵜⴰ ⵉⵜⵜⵡⴰⵃⴻⴱⴱⴻⵙ ⴰⵍⴰⵎⵉ ⵢⵓⴷⴻⴼ ⵖⴰⵔ ⵉⵛⵜ ⵏ ⵜⴻⵏⴷⵉⵏⵜ ⵙ ⵜⴻⵡⵡⵓⵔⴰ ⴷ ⵣⵣⴻⴽⵔⵓⵏⴰⵜ.” 8 ⵉⵊⵊⴰ ⵛⴰⵡⵓⵍ ⴰⴷ ⵍⴰⵖⴰⵏ ⵅ ⵎⴰⵔⵔⴰ ⵍⴳⴻⵏⵙ ⵖⴰⵔ ⵓⵎⴻⵏⵖⵉ, ⵃⵉⵎⴰ ⴰⴷ ⵀⵡⴰⵏ ⵖⴰⵔ ⵇⴰⵄⵉⵍⴰ ⵎⴰⵃⴻⵏⴷ ⴰⴷ ⵏⵏⴹⴻⵏ ⵉ ⴷⴰⵡⵓⴷ ⴷ ⵢⴻⵔⵢⴰⵣⴻⵏ ⵏⵏⴻⵙ.
9 ⵍⴰⵎⵉ ⵢⴰⵔⴳⴻⴱ ⴷⴰⵡⵓⴷ ⴱⴻⵍⵍⵉ ⵛⴰⵡⵓⵍ ⵉⵙⵙⴻⵡⵊⴻⴷ ⴰⵙ ⵜⵓⵄⴻⴼⴼⵏⴰ-ⵢⴰ ⵙ ⵜⵏⵓⴼⴼⵔⴰ, ⵉⵏⵏⴰ ⵏⴻⵜⵜⴰ ⵉ ⵓⴽⴻⵀⵀⴰⵏ ⴰⴱⵢⴰⵜⴰⵔ: “ⴰⵡⵉ-ⴷⴷ ⴰⴱⴰⵍⵟⵓ ⵏ ⵓⴽⴻⵀⵀⴰⵏ ⴷⴰ!” 10 ⵉⵏⵏⴰ ⴷⴰⵡⵓⴷ: “ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⴰⵎⵙⴻⵅⵅⴰⵔ ⵏⵏⴻⵛ ⵉⵙⵍⴰ ⵏⵉⵛⴰⵏ, ⴰⵇⴰ ⵛⴰⵡⵓⵍ ⵉⵄⴻⵎⵎⴻⴷ ⴰⴷ ⴷⴷ-ⵢⴰⵙ ⵖⴰⵔ ⵇⴰⵄⵉⵍⴰ, ⵃⵉⵎⴰ ⴰⴷ ⵉⵅⴰⵔⵔⴻⴱ ⵜⴰⵏⴷⵉⵏⵜ ⴷⵉ ⵙⵙⵉⴱⴱⴻⵜ ⵉⵏⵓ. 11 ⵎⴰ ⴰⴷ ⴰⵢⵉ ⵙⵙⴻⵄⴷⵓⵏ ⵉⵎⴻⵣⴷⴰⵖ ⵏ ⵇⴰⵄⵉⵍⴰ ⴷⴻⴳ ⵓⴼⵓⵙ ⵏⵏⴻⵙ? ⵎⴰ ⴰⴷ ⵉⵀⵡⴰ ⵛⴰⵡⵓⵍ ⴰⵎ ⵎⴰⵎⵎⴻⵛ ⵉⵙⵍⴰ ⵓⵎⵙⴻⵅⵅⴰⵔ ⵏⵏⴻⵛ? ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵉⵏⵉ ⵜ ⵉ ⵓⵎⵙⴻⵅⵅⴰⵔ ⵏⵏⴻⵛ!” ⵙⵉⴷⵉ ⵢⴰⵔⵔⴰ-ⴷⴷ: “ⵏⴻⵜⵜⴰ ⴰⴷ ⵉⵀⵡⴰ.” 12 ⵅⴰⵙ ⵓⵛⴰ ⵉⵏⵏⴰ ⴷⴰⵡⵓⴷ: “ⵎⴰ ⵉⵎⴻⵣⴷⴰⵖ ⵏ ⵇⴰⵄⵉⵍⴰ ⴰⴷ ⵙⵙⴻⵄⴷⵓⵏ ⵏⴻⵛⵛ ⴷ ⵢⴻⵔⵢⴰⵣⴻⵏ ⵉⵏⵓ ⵉ ⵛⴰⵡⵓⵍ?” ⵉⵏⵏⴰ ⵙⵉⴷⵉ “ⵏⵉⵜⵏⵉ ⴰⴷ ⵛⴻⴽ ⵙⵙⴻⵄⴷⵓⵏ.” 13 ⵅⴰⵙ ⵓⵛⴰ ⵉⴽⴽⴰⵔ ⴷⴰⵡⵓⴷ ⴰⴽ-ⴷ ⵢⴻⵔⵢⴰⵣⴻⵏ ⵏⵏⴻⵙ, ⴰⵎⴻⵏⵏⵉ ⵙⴻⵜⵜⴰ ⵎⵢⴰ ⵏ ⵢⴻⵔⵢⴰⵣⴻⵏ, ⵓⵛⴰ ⴼⴼⵖⴻⵏ ⵏⵉⵜⵏⵉ ⵣⵉ ⵇⴰⵄⵉⵍⴰ, ⴷⴻⵡⵍⴻⵏ ⴳⴳⵓⵔⴻⵏ ⵎⴰⵏⵉ ⵎⴰ ⵣⴻⵎⵎⴰⵔⴻⵏ ⴰⴷ ⵓⵢⵓⵔⴻⵏ. ⵓⵎⵉ ⵉⵜⵜⵡⴰⵏⵏⴰ ⵉ ⵛⴰⵡⵓⵍ, ⴰⵇⴰ ⵉⵏⵊⴻⵎ-ⴷⴷ ⴷⴰⵡⵓⴷ ⵣⵉ ⵇⴰⵄⵉⵍⴰ, ⵉⵊⵊⴰ ⵣⴻⴳ ⵡⴻⴱⵔⵉⴷ ⵏⵏⴻⵙ, ⵡⴰⵔ ⵉⴼⴼⵉⵖ ⵛⴰ.
ⴷⴰⵡⵓⴷ ⴷⵉ ⵍⴻⵅⵍⴰ ⵏ ⵣⵉⴼ
14 ⴷⴰⵡⵓⴷ ⵉⵇⵇⵉⵎ ⴷⵉ ⵍⴻⵅⵍⴰ ⴷⵉ ⵍⵇⴻⵍⵄⴰⵜ ⵏ ⵉⴷⵓⵔⴰⵔ ⵓⵛⴰ ⵉⵇⵇⵉⵎ ⵅ ⵉⴷⵓⵔⴰⵔ ⴷⵉ ⵍⴻⵅⵍⴰ ⵏ ⵣⵉⴼ. ⵛⴰⵡⵓⵍ ⵢⴰⵔⵣⵓ ⵅⴰⵙ ⵎⴰⵔⵔⴰ ⵓⵙⵙⴰⵏ, ⵎⴰⵛⴰ ⴰⵔⴻⴱⴱⵉ ⵡⴰⵔ ⵜ ⵉⴳⴳⵉ ⴷⴻⴳ ⵓⴼⵓⵙ ⵏⵏⴻⵙ. 15 ⵓⵎⵉ ⵉⵥⵔⴰ ⴷⴰⵡⵓⴷ, ⴰⵇⴰ ⵛⴰⵡⵓⵍ ⵜⵓⵖⴰ ⵉⴼⴼⴻⵖ ⵃⵉⵎⴰ ⴰⴷ ⵅⴰⵙ ⵢⴰⵔⵣⵓ, ⵜⵓⵖⴰ ⴷⴰⵡⵓⴷ ⴷⵉ ⵍⴻⵅⵍⴰ ⵏ ⵣⵉⴼ ⴷⵉ ⵅⵓⵔⵉⵙⴰ. □ 16 ⵅⴻⵏⵏⵉ ⵉⴽⴽⴰⵔ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ, ⵓⵛⴰ ⵢⵓⵢⵓⵔ ⵖⴰⵔ ⴷⴰⵡⵓⴷ ⴷⵉ ⵅⵓⵔⵉⵙⴰ, ⵉⵙⵙⴻⵊⵀⴻⴷ ⴰⴼⵓⵙ ⵏⵏⴻⵙ ⴷⵉ ⴰⵔⴻⴱⴱⵉ. 17 ⵏⴻⵜⵜⴰ ⵉⵏⵏⴰ ⴰⵙ: “ⵡⴰⵔ ⵜⵜⴻⴳⴳⵯⴻⴷ ⵛⴰ, ⵎⵉⵏⵣⵉ ⴰⴼⵓⵙ ⵏ ⴱⴰⴱⴰ ⵛⴰⵡⵓⵍ ⵡⴰⵔ ⵛⴻⴽ ⴷⴷ-ⵉⵜⵜⵉⴽⴽⵯⵉⴹ ⵓ ⵛⴻⴽ ⴰⴷ ⵜⴷⴻⵡⵍⴻⴷ ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ ⵓ ⵏⴻⵛⵛ ⴰⴷ ⴷⴻⵡⵍⴻⵖ ⴷ ⵡⵉⵙⵙ ⵜⵏⴰⵢⴻⵏ ⵖⴰⵔⴻⴽ. ⵓⵍⴰ ⴷ ⴱⴰⴱⴰ ⵛⴰⵡⵓⵍ ⵉⵙⵙⴻⵏ ⴰⵢⴰ.” 18 ⵓ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴳⴳⵉⵏ ⵉⵊⵊ ⵏ ⵍⵄⴰⵀⴷ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⴷⴰⵡⵓⴷ ⵉⵇⵇⵉⵎ ⴷⵉ ⵅⵓⵔⵉⵙⴰ ⵓ ⵢⵓⵏⴰⵜⴰⵏ ⵢⴰⵔⴻⴳⴳⵯⴻⵃ ⵖⴰⵔ ⵜⴰⴷⴷⴰⵔⵜ ⵏⵏⴻⵙ.
19 ⵅⴰⵙ ⵓⵛⴰ ⴳⴻⵄⵄⴷⴻⵏ ⵢⴻⵔⵢⴰⵣⴻⵏ ⵣⵉ ⵣⵉⴼ ⵖⴰⵔ ⵛⴰⵡⵓⵍ ⴷⵉ ⵊⵉⴱⵄⴰ, ⵏⵏⴰⵏ: “ⵎⴰ ⵡⴰⵔ ⵉⵏⵏⵓⴼⴼⴰⵔ ⴷⴰⵡⵓⴷ ⵖⴰⵔⵏⴻⵖ ⴷⵉ ⵍⵇⴻⵍⵄⴰⵜ ⴷⴻⴳ ⵉⴷⵓⵔⴰⵔ ⴷⵉ ⵅⵓⵔⵉⵙⴰ, ⵅ ⵜⴻⵡⵔⵉⵔⵜ ⵏ ⵃⴰⵅⵉⵍⴰ, ⵖⴰⵔ ⵍⵊⴰⵏⵓⴱ ⵏ ⵜⵏⴻⵣⵔⵓⴼⵜ? □ 20 ⵅⴻⵏⵏⵉ ⵍⴻⵅⵅⵓ, ⴰ ⴰⵊⴻⴵⵉⴷ, ⵀⵡⴰ-ⴷⴷ ⵄⵍⴰⵃⵙⴰⴱ ⵎⴰⵔⵔⴰ ⵎⴻⵥⵔⵉ ⵏ ⵡⵓⵍ ⵏⵏⴻⵛ. ⴰⴷ ⵜⵉⵍⵉ ⵅⴻⵏⵏⵉ ⵜⵎⴻⵙⵍⴰⵛⵜ ⵏⵏⴻⵖ, ⵃⵉⵎⴰ ⴰⴷ ⵜ ⵏⴻⵙⵙⴻⵄⴷⵓ ⵖⴰⵔ ⵓⴼⵓⵙ ⵏ ⵓⵊⴻⴵⵉⴷ.” 21 ⵛⴰⵡⵓⵍ ⵉⵏⵏⴰ: “ⴰⴷ ⵜᵉⵜⵜⵡⴰⴱⴰⵔⴽⴻⵎ ⵣⵉ ⵙⵉⴷⵉ, ⵎⵉⵏⵣⵉ ⵛⵇⵉⵖ ⴰⵡⴻⵎ ⴰⵎⵎⵓ. 22 ⵓⵢⵓⵔⴻⵎ, ⵡⴻⵊⴷⴻⵎ ⵄⴰⴷ ⴽⵜⴰⵔ ⵓ ⵃⴹⴰⵎ ⵓ ⵙⵏⴻⵎ ⵓ ⵅⵣⴰⵔⴻⵎ ⴰⵎⵛⴰⵏ ⵎⴰⵏⵉ ⵉⴵⴰ ⵓⴹⴰⵔ ⵏⵏⴻⵙ ⵓ ⵎⴰⵏ ⵡⴻⵏ ⵉ ⵜ ⴷⵉⵏⵏⵉ ⵉⵥⵔⵉⵏ, ⵎⴰⵖⴰⵔ ⵇⵇⴰⵔⴻⵏ ⴰⵢⵉ, ⴰⵇⴰ ⵏⴻⵜⵜⴰ ⴷ ⴰⵃⵔⴰⵢⵎⵉ ⴰⵟⵟⴰⵙ. 23 ⵃⴹⴰⵎ ⵓ ⵙⵙⵏⴻⵎ ⵎⴰⵔⵔⴰ ⵉⵎⵓⵛⴰⵏ ⵏ ⵜⵏⵓⴼⴼⵔⴰ ⵎⴰⵏⵉ ⵉⵙⵙⵏⵓⴼⴼⴰⵔ ⵉⵅⴻⴼ ⵏⵏⴻⵙ ⵓ ⵄⴻⵇⴱⴻⵎ ⵎⴰⵍⴰ ⵜⴽⴻⵎⵎⵍⴻⵎ. ⵅⴻⵏⵏⵉ ⴰⴷ ⴽⵉⴷⵡⴻⵎ ⵓⵢⵓⵔⴻⵖ ⵓ ⵎⴰⵍⴰ ⵏⴻⵜⵜⴰ ⴷⵉ ⵜⴻⵎⵎⵓⵔⵜ, ⵏⴻⵛⵛ ⴰⴷ ⵅⴰⵙ ⴰⵔⵣⵓⵖ ⵊⴰⵔ ⵎⴰⵔⵔⴰ ⵍⵓⵍⵓⴼ ⵏ ⵢⴰⵀⵓⴷⴰ.” 24 ⴽⴽⴰⵔⴻⵏ ⵏⵉⵜⵏⵉ, ⵉⵣⵣⴰⵔⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵛⴰⵡⵓⵍ ⵖⴰⵔ ⵣⵉⴼ. ⴷⴰⵡⵓⴷ ⴷ ⵢⴻⵔⵢⴰⵣⴻⵏ ⵏⵏⴻⵙ ⵜⵓⵖⴰ ⴰⵜⴻⵏ ⴷⵉ ⵍⴻⵅⵍⴰ ⵏ ⵎⴰⵄⵓⵏ, ⴷⵉ ⵍⴻⵡⴹⴰ ⵖⴰⵔ ⵍⵊⴰⵏⵓⴱ ⵏ ⵜⵏⴻⵣⵔⵓⴼⵜ.
25 ⵛⴰⵡⵓⵍ ⴷ ⵢⴻⵔⵢⴰⵣⴻⵏ ⵏⵏⴻⵙ ⴼⴼⵖⴻⵏ ⵃⵉⵎⴰ ⴰⴷ ⵅⴰⵙ ⴰⵔⵣⵓⵏ. ⵏⵏⴰⵏ ⴰⵢⴰ ⵉ ⴷⴰⵡⵓⴷ ⵓ ⵏⴻⵜⵜⴰ ⵉⵀⵡⴰ-ⴷⴷ ⵣⵉ ⵍⴻⵊⵔⵓⴼ ⴷⵉ ⵍⴻⵅⵍⴰ ⵏ ⵎⴰⵄⵓⵏ. ⵓⵎⵉ ⵜ ⵉⵙⵍⴰ ⵛⴰⵡⵓⵍ, ⵍⴻⵅⴷⴻⵏⵏⵉ ⵉⴹⴼⴰⵔ ⵏⴻⵜⵜⴰ ⴷⴰⵡⵓⴷ ⴷⵉ ⵍⴻⵅⵍⴰ ⵏ ⵎⴰⵄⵓⵏ. 26 ⵛⴰⵡⵓⵍ ⵉⴽⴽⴰ ⵅ ⵉⵊⵊ ⵏ ⵓⵖⴻⵣⴷⵉⵙ ⵏ ⵡⴻⴷⵔⴰⵔ ⵓ ⴷⴰⵡⵓⴷ ⴷ ⵢⴻⵔⵢⴰⵣⴻⵏ ⵏⵏⴻⵙ ⴽⴽⴻⵏ ⵅ ⵓⵖⴻⵣⴷⵉⵙ ⵏⵏⴻⵖⵏⵉ ⵏ ⵡⴻⴷⵔⴰⵔ. ⵍⴰⵎⵉ ⵉⵇⴻⴵⴻⵇ ⴷⴰⵡⵓⴷ ⵎⴰⵃⴻⵏⴷ ⴰⴷ ⵢⴰⴳⴳⵯⴻⵊ ⵅ ⵡⵓⴷⴻⵎ ⵏ ⵛⴰⵡⵓⵍ, ⵉⵎⵙⴰⵔ, ⴰⵇⴰ ⵛⴰⵡⵓⵍ ⴷ ⵢⴻⵔⵢⴰⵣⴻⵏ ⵏⵏⴻⵙ ⵏⵏⴹⴻⵏ-ⴷⴷ ⵉ ⴷⴰⵡⵓⴷ ⴷ ⵢⴻⵔⵢⴰⵣⴻⵏ ⵏⵏⴻⵙ ⵃⵉⵎⴰ ⴰⴷ ⵜⴻⵏ ⵟⵟⴼⴻⵏ. 27 ⵎⴰⵛⴰ ⵢⵓⵙⴰ-ⴷⴷ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵛⴰⵡⵓⵍ ⵉⵏⵏⴰ: “ⴷⴻⵖⵢⴰ, ⴰⵙ-ⴷⴷ, ⵎⵉⵏⵣⵉ ⵉⴼⵉⵍⵉⵙⵟⵉⵏⵉⵢⵢⴻⵏ ⵀⴻⵊⵎⴻⵏ ⵅ ⵜⴻⵎⵎⵓⵔⵜ!” 28 ⵅⴻⵏⵏⵉ ⵉⵄⵇⴻⴱ-ⴷⴷ ⵛⴰⵡⵓⵍ ⵣⴻⴳ ⵡⴻⴹⴼⴰⵔ ⵏ ⴷⴰⵡⵓⴷ ⵓⵛⴰ ⵉⴼⴼⴻⵖ ⵖⴰⵔ ⵓⵎⵙⴰⴳⴰⵔ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ. ⵅ ⵓⵢⴰ ⵇⵇⴰⵔⴻⵏ ⴰⵙ ⵉ ⵡⴻⵎⵛⴰⵏ ⵏⵏⵉ ⵙⴰⵍⴰⵄ-ⵀⴰ-ⵎⴰⵅⵍⵉⴽⵓⵜ. □