ⵉⵜⵜⵡⴰⴷⵀⴻⵏ ⵛⴰⵡⵓⵍ ⴷ ⴰⵊⴻⴵⵉⴷ
10
1 ⵅⴰⵙ ⵓⵛⴰ ⵉⴽⵙⵉ ⵛⴰⵎⵡⵉⵍ ⵜⴰⵣⵉⵢⵢⴰⵜ ⵏ ⵣⵣⴻⵛⵜ, ⵉⵙⴻⵢⵢⴻⴱ ⵉ-ⵜⵜ ⵅ ⵓⵣⴻⴵⵉⴼ ⵏⵏⴻⵙ, ⵉⵙⵙⵓⴷⴻⵎ ⵉ-ⵜ, ⵉⵏⵏⴰ: “ⵎⴰ ⵅⴻⵏⵏⵉ ⵙⵉⴷⵉ ⵡⴰⵔ ⵛⴻⴽ ⵉⴷⵀⵉⵏ ⴷ ⵍⵃⴰⴽⴻⵎ ⵅ ⵍⵡⴰⵔⵜ ⵏⵏⴻⵙ? ■ 2 ⵅⵎⵉ ⵅⴰⴼⵉ ⵉ ⵖⴰ ⵜⵓⵢⵓⵔⴻⴷ ⴰⵙⵙ-ⴰ, ⴰⴷ ⵜⴰⴼⴻⴷ ⵜⵏⴰⵢⴻⵏ ⵏ ⵢⴻⵔⵢⴰⵣⴻⵏ ⵖⴰⵔ ⵡⴻⵏⴹⴻⵍ ⵏ ⵔⴰⵃⵉⵍ ⴷⵉ ⵚⴰⵍⵚⴰⵃ ⴷⵉ ⵜⴻⵎⵎⵓⵔⵜ ⵏ ⴱⵉⵏⵢⴰⵎⵉⵏ, ⵏⵉⵜⵏⵉ ⴰⴷ ⴰⵛ ⵉⵏⵉⵏ: ‘ⵜⵉⵖⵢⴰⵍ ⵉ ⵅ ⵜⵓⵖⴰ ⵜⴰⵔⴻⵣⵣⵓⴷ, ⵜⵜⵡⴰⴼⴻⵏⵜ ⵓⵛⴰ ⴱⴰⴱⴰⵛ ⵉⵙⵎⴻⵃ ⴷⵉ ⵜⵎⴻⵙⵍⴰⵛⵜ ⵏ ⵜⴻⵖⵢⴰⵍ, ⵎⴰⵛⴰ ⵏⴻⵜⵜⴰ ⴷⴰⵢⴻⵙ ⵍⴻⵅⵅⵓ ⴰⵎⵏⵓⵙ ⵅⴰⵡⴻⵎ, ⵉⵇⵇⴰⵔ: ⵎⵉⵏ ⵖⴰ ⴳⴳⴻⵖ ⵅ ⵎⵎⵉ?’ ” 3 ⵙⵙⴻⵏⵏⵉ ⴰⴷ ⵜⴰⵔⵏⵉⴷ ⴰⴷ ⵜⵓⵢⵓⵔⴻⴷ ⵓⵛⴰ ⴰⴷ ⵜⴰⵡⴹⴻⴷ ⵖⴰⵔ ⵜⵛⴻⵊⵊⴰⵔⵜ ⵏ ⵢⵉⴳⴳ ⵏ ⵜⴰⴱⵓⵔ. ⴷⵉⵏⵏⵉ ⵉ ⵖⴰ ⵜⴻⵎⵎⴻⵍⵇⵉⴷ ⴰⴽ-ⴷ ⵜⵍⴰⵜⴰ ⵏ ⵢⴻⵔⵢⴰⵣⴻⵏ ⵏⵏⵉ ⵉⵜⵜⴳⴻⵄⵄⴰⴷⴻⵏ ⵖⴰⵔ ⵙⵉⴷⵉ ⵖⴰⵔ ⴱⴰⵢⵜ-ⵉⵍ. ⵉⵊⵊⴻⵏ ⴰⴷ ⵢⴰⵔⴱⵓ ⵜⵍⴰⵜⴰ ⵏ ⵉⵖⴰⵢⴹⴻⵏ ⵉⵎⴻⵥⵢⴰⵏⴻⵏ, ⵉⵊⵊⴻⵏ ⴰⴷ ⵢⴰⵔⴱⵓ ⵜⵍⴰⵜⴰ ⵏ ⵜⴻⵛⵏⵉⴼⵉⵏ ⵓ ⵉⵊⵊⴻⵏ ⴰⴷ ⵢⴰⵔⴱⵓ ⵉⵛⵜ ⵏ ⵜⵅⴰⵏⵛⴻⵜ ⵏ ⴱⵉⵏⵓ. 4 ⵏⵉⵜⵏⵉ ⴰⴷ ⵙⵙⴻⵇⵙⴰⵏ ⵅ ⵓⵎⴻⴷⴷⵓⵔ ⵏⵏⴻⵛ ⵓⵛⴰ ⴰⴷ ⴰⵛ ⵡⵛⴻⵏ ⵜⵏⴰⵢⴻⵏ ⵏ ⵜⴻⵛⵏⵉⴼⵉⵏ ⵉ ⵖⴰ ⵜᵉⵟⵟⴼⴻⴷ ⵣⴻⴳ ⵓⴼⵓⵙ ⵏⵙⴻⵏ. ■ 5 ⴰⵡⴰⵔⵏⵉ ⴰⵙ ⴰⴷ ⴷⴷ-ⵜⴰⵙⴻⴷ ⵖⴰⵔ ⵜⴻⵏⴷⵉⵏⵜ ⵏ ⵊⵉⴱⵄⴰ ⵏ ⴰⵔⴻⴱⴱⵉ ⵎⴰⵏⵉ ⴱⴻⴷⴷⴻⵏⵜ ⵜⴻⵛⴱⴰⵔⵉⵏ ⵏ ⵜⵄⴻⵙⵙⴰⵙⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵅⵎⵉ ⴷⵉⵏⵏⵉ ⵉ ⵖⴰ ⵜⴰⵡⴹⴻⴷ ⵖⴰⵔ ⵜⴻⵏⴷⵉⵏⵜ, ⴰⴷ ⵉⵎⵙⴰⵔ ⴰⴷ ⵜⴻⵎⵎⴻⵍⵇⵉⴷ ⴰⴽ-ⴷ ⵉⵛⵜ ⵏ ⴽⵓⵍⴰ ⵏ ⵉⵏⴰⴱⵉⵢⵢⴻⵏ, ⵉⵏⵏⵉ ⴷⴷ-ⵉⵀⵡⴰⵏ ⵣⵉ ⵍⴳⴻⵄⵄⴷⴻⵜ, ⵓⵛⴰ ⵣⵣⴰⵜⵙⴻⵏ ⵍⵀⴰⵔⴱⴰ ⴷ ⵓⴱⴻⵏⴷⵉⵔ ⴷ ⵜⵥⴰⵎⴰⵔⵜ ⴷ ⵍⴳⴰⵎⴱⵔⵉ ⴰⵎ ⵜⵜⵏⴻⴱⴱⴰⵏ ⵏⵉⵜⵏⵉ. ■ 6 ⴰⴷ ⵅⴰⴽ ⴷⴷ-ⵉⵀⵡⴰ ⴰⵔⵔⵓⵃ ⵏ ⵙⵉⴷⵉ ⵓ ⵛⴻⴽ ⴰⴷ ⵜⵏⴻⴱⴱⴰⴷ ⴰⴽⵉⴷⵙⴻⵏ ⵓⵛⴰ ⴰⴷ ⵜⴷⴻⵡⵍⴻⴷ ⴷ ⵉⵊⵊ ⵏ ⴱⵏⴰⴷⴻⵎ ⵏⵏⴻⵖⵏⵉ. 7 ⴰⴷ ⵉⵎⵙⴰⵔ ⵅⵎⵉ ⵖⴰⵔⴻⴽ ⵉ ⴷⴷ ⵖⴰ ⵢⴰⵙⴻⵏ ⵍⴻⵄⵍⴰⵎⴰⵜ-ⴰ, ⴰⵇⴰ ⴰⴷ ⵅⴰⴽ ⵢⵉⵍⵉ ⵃⵉⵎⴰ ⴰⴷ ⵜⴻⴳⴳⴻⴷ ⵎⵉⵏ ⵖⴰ ⵢⴰⴼ ⵓⴼⵓⵙ ⵏⵏⴻⵛ, ⵎⵉⵏⵣⵉ ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⴻⴽ. 8 ⴰⴷ ⴰⵢⵉ ⵜⵉⵣⵡⴰⵔⴻⴷ ⴰⴷ ⴷⴷ-ⵜⴻⵀⵡⵉⴷ ⵖⴰⵔ ⵊⵉⵍⵊⴰⵍ, ⵓ ⵅⵣⴰⵔ, ⵏⴻⵛⵛ ⴰⴷ ⴷⴷ-ⵀⵡⵉⵖ ⵖⴰⵔⴻⴽ ⵃⵉⵎⴰ ⴰⴷ ⴷⵉⵏ ⵙⵙⴳⴻⵄⵄⴷⴻⵖ ⵜⵉⵖⴰⵔⵚⴰ ⵏ ⵡⴻⵛⵎⴰⴹ ⴷ ⵜⵖⴰⵔⵚⴰ ⵏ ⵍⴻⵀⵏⴰ. ⵙⴻⴱⵄⴰ ⵏ ⵡⵓⵙⵙⴰⵏ ⵉ ⴷⵉⵏ ⵉ ⵖⴰ ⵜⵔⴰⵊⵉⴷ ⴰⵍ ⴷⴷ ⵖⴰⵔⴻⴽ ⵉ ⵖⴰ ⵢⴰⵙⴻⵖ, ⴰⴷ ⴰⵛ ⴷⴷ-ⴱⴰⵔⵔⵃⴻⵖ ⵎⵉⵏ ⵖⴰ ⵜⴻⴳⴳⴻⴷ.” ■ 9 ⵓⵎⵉ ⵉⵙⵙⵏⴻⵇⵍⴻⴱ ⴰⵄⵔⵓⵔ ⵏⵏⴻⵙ ⵃⵉⵎⴰ ⴰⴷ ⵢⵓⵢⵓⵔ ⵅ ⵛⴰⵎⵡⵉⵍ, ⵉⵎⵙⴰⵔ ⴰⵇⴰ ⴰⵔⴻⴱⴱⵉ ⵉⴱⴻⴷⴷⴻⵍ ⵓⵍ ⵏⵏⴻⵙ ⴷⴻⴳ ⵉⵊⵊ ⵏ ⵡⵓⵍ ⵏⵏⴻⵖⵏⵉ. ⵎⴰⵔⵔⴰ ⵍⴻⵄⵍⴰⵎⴰⵜ-ⴰ ⵉⵎⵙⴰⵔⴻⵏ ⴷⴻⴳ ⵡⴰⵙⵙ ⵏⵏⵉ ⵙⵉⵎⴰⵏⵜ ⵏⵏⴻⵙ. 10 ⵓⵎⵉ ⵉⵡⴹⴻⵏ ⵏⵉⵜⵏⵉ ⵖⴰⵔ ⵊⵉⴱⵄⴰ, ⴰⵇⴰ ⵉⵍⵇⴰ ⵉ-ⵜ ⵉⵊⵊ ⵏ ⴽⵓⵍⴰ ⵏ ⵉⵏⴰⴱⵉⵢⵢⴻⵏ ⵓⵛⴰ ⴰⵔⵔⵓⵃ ⵏ ⴰⵔⴻⴱⴱⵉ ⵉⵀⵡⴰ-ⴷⴷ ⵅⴰⵙ ⵓⵛⴰ ⵏⴻⵜⵜⴰ ⵉⵏⴻⴱⴱⴰ ⴷⵉ ⵍⵡⴻⵙⵟ ⵏⵙⴻⵏ. ■ 11 ⵓⵛⴰ ⵉⵎⵙⴰⵔ, ⴰⵇⴰ ⵎⴰⵔⵔⴰ ⵉⵏⵏⵉ ⵜⵓⵖⴰ ⵜ ⵉⵙⵙⵏⴻⵏ ⵉⴹⴻⵏⵏⴰⴹ ⴷ ⴼⴰⵔⵉⴹⴻⵏⵏⴰⴹ, ⵥⵔⵉⵏ ⵎⴰⵎⵎⴻⵛ ⵜⵓⵖⴰ ⵉⵜⵜⵏⴻⴱⴱⴰ ⴰⴽ-ⴷ ⵉⵏⴰⴱⵉⵢⵢⴻⵏ, ⵓⵛⴰ ⵍⴳⴻⵏⵙ ⵉⵏⵏⴰ ⵊⴰⵔ ⴰⵙⴻⵏ: “ⵎⵉⵏ ⵢⵓⵖⵉⵏ ⵎⵎⵉⵙ ⵏ ⵇⵉⵛ? ⵎⴰ ⵓⵍⴰ ⴷ ⵛⴰⵡⵓⵍ ⵊⴰⵔ ⵉⵏⴰⴱⵉⵢⵢⴻⵏ?” 12 ⵉⵊⵊ ⵏ ⵡⴻⵔⵢⴰⵣ ⵙⵙⴻⵏⵏⵉ ⵢⴰⵔⵔⴰ-ⴷⴷ, ⵉⵏⵏⴰ: “ⵎⴰⵏ ⵡⴻⵏ ⵉⴵⴰⵏ ⴷ ⴱⴰⴱⴰⵜⵙⴻⵏ?” ⴰⵎⵎⵓ ⵉ ⵉⵇⵇⵉⵎ ⵡⴰⵡⴰⵍ-ⴰ ⵉⵜⵜⵡⴰⵙⵙⵏⴻⵏ: “ⵎⴰ ⵓⵍⴰ ⴷ ⵛⴰⵡⵓⵍ ⵊⴰⵔ ⵉⵏⴰⴱⵉⵢⵢⴻⵏ?” ■ 13 ⵓⵎⵉ ⵉⵙⵙⴱⴻⴷⴷ ⵉⵜⵜⵏⴻⴱⴱⴰ, ⵢⵓⵙⴰ-ⴷⴷ ⵖⴰⵔ ⵍⴳⴻⵄⵄⴷⴻⵜ. 14 ⵄⴻⵎⵎⵉⵙ ⵏ ⵛⴰⵡⵓⵍ ⵉⵏⵏⴰ ⴰⵙ ⵓ ⵉ ⵓⵎⵙⴻⵅⵅⴰⵔ ⵏⵏⴻⵙ: “ⵎⴰⵏⵉ ⵜⵓⵖⴰ ⵜᵉⵜⵜⵔⴰⵀⴻⵎ ⴽⴻⵏⵏⵉⵡ?” ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙ: “ⵏⴰⵔⴻⵣⵣⵓ ⵅ ⵜⴻⵖⵢⴰⵍ, ⵎⴰⵛⴰ ⵓⵎⵉ ⵏⴻⵥⵔⴰ, ⴰⵇⴰ ⵏⵉⵜⴻⵏⵜⵉ ⵡⴰⵔ ⴷⵉⵏⵏⵉ ⴵⵉⵏⵜ, ⵏⵉⵡⴻⴹ ⵖⴰⵔ ⵛⴰⵎⵡⵉⵍ.” 15 ⵅⴻⵏⵏⵉ ⵉⵏⵏⴰ ⵄⴻⵎⵎⵉⵙ ⵏ ⵛⴰⵡⵓⵍ: “ⵉⵏⵉ ⴰⵢⵉ, ⵄⴰⴼⴰⴽ, ⵎⵉⵏ ⴷ ⴰⵡⴻⵎ ⵉⵏⵏⴰ ⵛⴰⵎⵡⵉⵍ?” 16 ⵛⴰⵡⵓⵍ ⵢⴰⵔⵔⴰ-ⴷⴷ ⵅ ⵄⴻⵎⵎⵉⵙ: “ⵏⴻⵜⵜⴰ ⵉⵏⵏⴰ ⴰⵏⴻⵖ ⵏⵉⵛⴰⵏ, ⴰⵇⴰ ⵜⵉⵖⵢⴰⵍ ⵜⵜⵡⴰⴼⴻⵏⵜ.” ⵜⴰⵎⴻⵙⵍⴰⵛⵜ ⵏ ⵜⴳⴻⵍⴷⴰ ⵎⴰⵛⴰ ⵉ ⵅ ⵜⵓⵖⴰ ⵉⵙⵙⵉⵡⴻⵍ ⵛⴰⵎⵡⵉⵍ, ⵡⴰⵔ ⴷ ⴰⵙ ⵜⵜ ⵉⵄⵉⵡⴻⴷ ⵛⴰ.
17 ⵛⴰⵎⵡⵉⵍ ⵉⵍⴰⵖⴰ-ⴷⴷ ⵉ ⵍⴳⴻⵏⵙ ⵖⴰⵔ ⵙⵉⴷⵉ ⴷⵉ ⵎⵉⵚⴼⴰ. 18 ⵏⴻⵜⵜⴰ ⵉⵏⵏⴰ ⵉ ⴰⵢⵜ ⵏ ⵉⵙⵔⴰⵉⵍ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ: ‘ⵏⴻⵛⵛ ⵙⵙⵓⴼⴼⵖⴻⵖ-ⴷⴷ ⵉⵙⵔⴰⵉⵍ ⵣⵉ ⵎⵉⵚⵔⴰ ⵓ ⴼⴻⴽⴽⴻⵖ ⴽⴻⵏⵏⵉⵡ ⵣⴻⴳ ⵓⴼⵓⵙ ⵏ ⵉⵎⵉⵚⵔⵉⵢⵢⴻⵏ ⵓ ⵣⴻⴳ ⵓⴼⵓⵙ ⵏ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏⵏⵉ ⴽⴻⵏⵏⵉⵡ ⵉⵃⵚⴰⵔⴻⵏ. 19 ⵎⴰⵛⴰ ⴰⵙⵙ-ⴰ ⴽⴻⵏⵏⵉⵡ ⵜⴻⵏⴹⴰⵔⴻⵎ ⵙⵉⴷⵉ ⵏⵡⴻⵎ, ⵡⴻⵏⵏⵉ ⵜⵓⵖⴰ ⴽⴻⵏⵏⵉⵡ ⵉⴼⴻⴽⴽⴻⵏ ⵣⵉ ⵎⴰⵔⵔⴰ ⵣⵣⵄⴰⴼ ⵏⵡⴻⵎ ⵓ ⵣⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵡⴻⵎ. ⴽⴻⵏⵏⵉⵡ ⵜⴻⵏⵏⴰⵎ ⴰⵙ: ⴻⴳⴳ ⵉⵊⵊ ⵏ ⵓⵊⴻⴵⵉⴷ ⵅⴰⵏⴻⵖ! ⵅⴻⵏⵏⵉ ⵍⴻⵅⵅⵓ, ⴱⴻⴷⴷⴻⵎ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵄⵍⴰⵃⵙⴰⴱ ⵜⵉⵇⴻⴱⴱⴰⵍ ⵏⵡⴻⵎ ⴷ ⵍⵓⵍⵓⴼ ⵏⵡⴻⵎ!’ ” ■ 20 ⵛⴰⵎⵡⵉⵍ ⵉⵊⵊⴰ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ ⴰⴷ ⴷⴷ-ⵇⴰⵔⵔⴱⴻⵏⵜ ⵓⵛⴰ ⵜⴰⵇⴱⵉⵍⵜ ⵏ ⴱⵉⵏⵢⴰⵎⵉⵏ ⵜᵉⵜⵜⵡⴰⴽⴽⴻⵙ ⵣⵣⴰⵢⵙⴻⵏⵜ ■ 21 ⵅⴰⵙ ⵓⵛⴰ ⵉⵊⵊⴰ ⵜⴰⵇⴱⵉⵍⵜ ⵏ ⴱⵉⵏⵢⴰⵎⵉⵏ ⴰⴷ ⵜⵇⴰⵔⵔⴻⴱ, ⵄⵍⴰⵃⵙⴰⴱ ⵍⴰⴵⴰⵜ ⵏⵏⴻⵙ, ⵓⵛⴰ ⵉⵜⵜⵡⴰⴽⴽⴻⵙ ⵣⵣⴰⵢⴻⵙ ⵍⴰⴵ ⵏ ⵎⴰⵜⵔⵉ ⵓ ⵅⴻⵏⵏⵉ ⵉⵜⵜⵡⴰⴽⴽⴻⵙ ⵣⵣⴰⵢⴻⵙ ⵛⴰⵡⵓⵍ, ⵎⵎⵉⵙ ⵏ ⵇⵉⵛ. ⴰⵔⵣⵓⵏ ⵅⴰⵙ, ⵎⴰⵛⴰ ⵡⴰⵔ ⵣⴻⵎⵎⴰⵔⴻⵏ ⴰⴷ ⵜ ⴰⴼⴻⵏ. 22 ⵏⵉⵜⵏⵉ ⵙⵙⴻⵇⵙⴰⵏ ⵙⵉⴷⵉ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉⵜ: “ⵎⴰ ⵏⵉⵛⴰⵏ ⵢⵓⵙⴰ-ⴷⴷ ⵡⴻⵔⵢⴰⵣ ⵏⵏⵉ ⴷⴰⵏⵉⵜⴰ?” ⵙⵉⴷⵉ ⵢⴰⵔⵔⴰ-ⴷⴷ: “ⵅⵣⴰⵔ, ⵏⴻⵜⵜⴰ ⵉⴼⴼⴰⵔ ⵊⴰⵔ ⵍⴻⵃⵡⴰⵢⴻⵊ.” 23 ⵏⵉⵜⵏⵉ ⵓⵣⵣⵍⴻⵏ ⴷⵉⵏ, ⵉⵡⵢⴻⵏ ⵜ-ⵉ-ⴷⴷ ⵙⵙⴻⵏⵏⵉ. ⵓⵎⵉ ⴷⴷ-ⵢⵓⵙⴰ ⵏⴻⵜⵜⴰ ⵉⴱⴻⴷⴷ ⵊⴰⵔ ⵍⴳⴻⵏⵙ, ⵢⵓⵊⴰⵔ ⵏⴻⵜⵜⴰ ⵎⴰⵔⵔⴰ ⵍⴳⴻⵏⵙ ⵙ ⵜⵉⴷⴷⵉ ⵏ ⵓⵣⴻⴵⵉⴼ. ■ 24 ⵉⵏⵏⴰ ⵛⴰⵎⵡⵉⵍ ⵉ ⵎⴰⵔⵔⴰ ⵍⴳⴻⵏⵙ: “ⵎⴰ ⵜⴻⵥⵔⵉⵎ ⵍⴻⵅⵅⵓ ⵎⴰⵏ ⵡⴻⵏ ⵉⴼⴰⵔⵣ ⵙⵉⴷⵉ? ⵓⵍⴰ ⴷ ⵉⵊⵊⴻⵏ ⵣⵉ ⵍⴳⴻⵏⵙ ⵡⴰⵔ ⴷⴰⵢⴻⵙ ⵢⴰⵔⵡⵉⵙ.” ⵓⵛⴰ ⵉⵙⵍⵉⵡⵍⴻⵡ ⵎⴰⵔⵔⴰ ⵍⴳⴻⵏⵙ, ⵏⵉⵜⵏⵉ ⵏⵏⴰⵏ: “ⵜⵓⴷⴰⵔⵜ ⵉ ⵓⵊⴻⴵⵉⴷ!”
25 ⵛⴰⵎⵡⵉⵍ ⵉⵙⵙⵛⴻⵏ ⵉ ⵍⴳⴻⵏⵙ ⵍⵃⴻⵇⵇ ⵏ ⵜⴳⴻⵍⴷⴰ, ⵢⵓⵔⴰ ⵉ-ⵜ ⴷⴻⴳ ⵉⵊⵊ ⵏ ⵡⴻⴷⵍⵉⵙ ⵓⵛⴰ ⵉⵙⵙⴰⵔⵙ ⵉ-ⵜ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⵅⴻⵏⵏⵉ ⵢⴰⵔⵅⵓ ⵛⴰⵎⵡⵉⵍ ⵉ ⵎⴰⵔⵔⴰ ⵍⴳⴻⵏⵙ, ⴽⵓⵍ ⵉⵊⵊ ⵢⵓⵢⵓⵔ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. 26 ⵓⵍⴰ ⴷ ⵛⴰⵡⵓⵍ ⵢⵓⵢⵓⵔ ⵖⴰⵔ ⵜⴰⴷⴷⴰⵔⵜ ⵏⵏⴻⵙ ⵖⴰⵔ ⵊⵉⴱⵄⴰ ⵓⵛⴰ ⵉⵔⵓⵃ ⴰⴽⵉⴷⴻⵙ ⵡⴻⵣⵢⴻⵏ ⵏ ⵍⵄⴻⵙⴽⴰⵔ ⵏⵏⵉ ⵜⵓⵖⴰ ⵉⵃⴰⴷⴰ ⵙⵉⴷⵉ ⵓⵍ ⵏⵙⴻⵏ. ■ 27 ⵎⴰⵛⴰ ⴰⵢⵜ ⵉ ⵡⴰⵔ ⵉⵙⴻⴽⴽⵡⵉⵏ ⵏⵏⴰⵏ: “ⵎⴰⵎⵎⴻⵛ ⵉ ⴷ ⴰⵏⴻⵖ ⵖⴰ ⵉⴼⴻⴽⴽ ⵡⴻⵔⵢⴰⵣ-ⴰ?” ⵓ ⵏⵉⵜⵏⵉ ⵙⵙⴻⵃⵇⴰⵔⴻⵏ ⵜ ⵓ ⵡⴰⵔ ⴷ ⴰⵙ ⴷⴷ-ⵉⵡⵢⴻⵏ ⵛⴰ ⵜⴰⵔⵣⴻⴼⵜ, ⵎⴰⵛⴰ ⵏⴻⵜⵜⴰ ⵉⴳⴳⴰ ⴰⵅⵎⵉ ⵡⴰⵔ ⵉⵜⵜⴻⵙⵍⵉ. ■