ⴱⵓⵄⴰⵣ ⵉⴼⴷⵉ ⵉⵢⵢⴰⵔ ⵏ ⴰⵍⵉⵎⵉⵍⵉⴽ ⵓⵛⴰ ⵉⵎⵍⴻⵛ ⴰⴽ-ⴷ ⵔⴰⵄⵓⵜ
4
1 ⴱⵓⵄⴰⵣ ⵉⴳⴻⵄⵄⴻⴷ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵓⵛⴰ ⵉⵇⵇⵉⵎ ⴷⵉⵏⵏⵉ. ⵓ ⵅⵣⴰⵔ, ⵉⵄⴷⵓ-ⴷⴷ ⵓⵎⴻⴼⴷⵉ, ⵡⴻⵏⵏⵉ ⵅⴻⴼ ⵜⵓⵖⴰ ⵉⵙⵙⵉⵡⴻⵍ ⴱⵓⵄⴰⵣ. ⵏⴻⵜⵜⴰ ⵉⵏⵏⴰ ⴰⵙ: “ⴰ ⵛⴻⴽ, ⴷⵉⵀⴰ, ⴰⵙ-ⴷⴷ ⵖⴰⵔ ⵟⵟⴰⵔⴼ ⵏ ⵡⴻⴱⵔⵉⴷ ⵓ ⵜⴻⵇⵇⵉⵎⴻⴷ ⴷⴰⵏⵉⵜⴰ!” ⵢⵓⵙⴰ-ⴷⴷ ⵖⴰⵔ ⵟⵟⴰⵔⴼ ⵏ ⵡⴻⴱⵔⵉⴷ ⵓⵛⴰ ⵉⵇⵇⵉⵎ. 2 ⵢⵉⵡⵉ-ⴷⴷ ⴱⵓⵄⴰⵣ ⵄⴻⵛⵔⴰ ⵏ ⵢⴻⵔⵢⴰⵣⴻⵏ ⵣⴻⴳ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ, ⵉⵏⵏⴰ: “ⵇⵉⵎⴻⵎ-ⴷⴷ ⴷⴰⵏⵉⵜⴰ!”, ⵓⵛⴰ ⵇⵇⵉⵎⴻⵏ. 3 ⵅⴻⵏⵏⵉ ⵉⵏⵏⴰ ⵉ ⵓⵎⴻⴼⴷⵉ: “ⵏⴰⵄⵓⵎⵉ ⵜⴻⵏⵏⵉ ⴷⴷ-ⵉⵄⴻⵇⴱⴻⵏ ⵣⵉ ⵜⴻⵎⵎⵓⵔⵜ ⵏ ⵎⵓ’ⴰⴱ ⵜⴻⵅⵙ ⴰⴷ ⵜⴻⵣⵣⴻⵏⵣ ⵜⴰⴽⵉⵔⴰⵜ ⵏ ⵢⴻⵢⵢⴰⵔ ⵉ ⵜⵓⵖⴰ ⵖⴰⵔ ⵓⵎⴰⵜⵏⴻⵖ ⴰⵍⵉⵎⴰⵍⵉⴽ. 4 ⵏⴻⵛⵛ ⵅⴻⵎⵎⴻⵖ, ⵅⵙⴻⵖ ⴰⴷ ⵛⴻⴽ ⵅⴰⵙ ⵅⴻⴱⴱⴰⵔⴻⵖ ⵓⵛⴰ ⴰⴷ ⴰⵛ ⵉⵏⵉⵖ: ⵙⴻⵖ ⵉ-ⵜⵜ ⵣⵣⴰⵜ ⵏ ⵢⵉⵏⵏⵉ ⵉ ⴷⴰ ⵉⵇⵇⵉⵎⴻⵏ ⵓ ⵣⵣⴰⵜ ⵏ ⵉⵎⵖⴰⵔⴻⵏ ⵏ ⵍⴳⴻⵏⵙ. ⵎⴰⵍⴰ ⵜⴻⵅⵙⴻⴷ ⴰⴷ ⵜⵜ ⵜⴻⴼⴷⵉⴷ, ⴼⴷⵉ ⵜⵜ ⵓ ⵎⴰⵍⴰ ⵡⴰⵔ ⵜⴻⵅⵙⴻⴷ ⴰⴷ ⵜⵜ ⵜⴻⴼⴷⵉⴷ, ⵉⵏⵉ ⴰⵢⵉ ⵜ ⵃⵉⵎⴰ ⴰⴷ ⵙⵙⵏⴻⵖ, ⵎⵉⵏⵣⵉ ⵡⴰⵔ ⴷⴰ ⵃⴻⴷ ⵉⵣⴻⵎⵎⴰⵔ ⴰⴷ ⵜⵜ ⵉⴼⴷⵉ ⵎⵖⵉⵔ ⵛⴻⴽ ⵏⵉⵖ ⴷ ⵏⴻⵛⵛ, ⵓ ⵏⴻⵛⵛ ⵉ ⵉⴵⴰⵏ ⴰⵡⴰⵔⵏⵉ ⴰⵛ.” ⵅⴻⵏⵏⵉ ⵉⵏⵏⴰ ⵏⴻⵜⵜⴰ: “ⵏⴻⵛⵛ ⴰⴷ ⵜⵜ ⴼⴷⵉⵖ.”□ 5 ⴱⵓⵄⴰⵣ ⵢⴰⵔⵏⵉ ⵉⵏⵏⴰ: “ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵜⴻⵙⵖⴻⴷ ⵉⵢⵢⴰⵔ ⵣⴻⴳ ⵓⴼⵓⵙ ⵏ ⵏⴰⵄⵓⵎⵉ, ⵅⴻⵏⵏⵉ ⴰⴷ ⵜⴻⵙⵖⴻⴷ ⴰⴽⵉⴷⴻⵙ ⵓⵍⴰ ⴷ ⵔⴰⵄⵓⵜ, ⵜⴰⵎⵓ’ⴰⴱⴻⵛⵜ, ⵜⴰⵎⵖⴰⵔⵜ ⵏ ⵡⴻⵏⵏⵉ ⵉⵎⵎⵓⵜⴻⵏ, ⵃⵉⵎⴰ ⴰⴷ ⵜⴻⵃⴹⵉⴷ ⵉⵙⴻⵎ ⵏ ⵓⵎⴻⵜⵜⵉⵏ ⵅ ⵜⴻⵙⵖⴰⵔⵜ ⵏⵏⴻⵙ ⵏ ⵍⵡⴰⵔⵜ.” 6 ⵉⵏⵏⴰ ⵓⵎⴻⴼⴷⵉ: “ⵅⴻⵏⵏⵉ ⵏⴻⵛⵛ ⵡⴰⵔ ⵣⴻⵎⵎⴰⵔⴻⵖ ⴰⴷ ⵜ ⴼⴷⵉⵖ, ⵃⵉⵎⴰ ⵡⴰⵔ ⵜⵜⴹⵉⵢⵢⵄⴻⵖ ⵜⴰⵙⵖⴰⵔⵜ ⵉⵏⵓ. ⴼⴷⵉ ⵜ ⵛⴻⴽ ⵉ ⵢⵉⵅⴻⴼ ⵏⵏⴻⵛ ⵎⵉⵏ ⵅⴰⴼⵉ ⵎⴰⵃⴻⵏⴷ ⴰⴷ ⵜ ⴼⴷⵉⵖ, ⵎⴰⵖⴰⵔ ⵏⴻⵛⵛ ⵡⴰⵔ ⵣⴻⵎⵎⴰⵔⴻⵖ ⴰⴷ ⵜ ⴼⴷⵉⵖ.”
7 ⴰⵎⵎⵓ ⵜⵓⵖⴰ ⵜⵜⴻⴳⴳⴻⵏ ⵉⵏⵏⵉ ⵏ ⵣⵣⵎⴰⵏ ⵓⵎⵉ ⴳⴳⵉⵏ ⴰⴷ ⴱⴻⴷⴷⵍⴻⵏ ⵉⵢⵢⴰⵔ ⵊⴰⵔ ⴰⵙⴻⵏ ⵏⵉⵖ ⵓⵎⵉ ⵜ ⴼⴷⵉⵏ, ⴰⵇⴰ, ⵃⵉⵎⴰ ⴰⴷ ⵜⴻⵡⵛⴻⴷ ⵜⴰⵎⴻⵙⵍⴰⵛⵜ ⵣⵣⴰⵜ ⵉ ⵡⵓⴷⴻⵎ ⵏ ⵎⴰⵔⵔⴰ ⵉⵙⵔⴰⵉⵍ, ⴰⵇⴰ ⴰⵔⵢⴰⵣ ⵉⵜⵜⴻⴽⴽⴻⵙ ⵙⴰⵏⴷⴰⵍⴰ ⵏⵏⴻⵙ ⵓⵛⴰ ⵉⵜⵜⵉⵛ ⵉ-ⵜⵜ ⵉ ⵊⵊⴰⵔ ⵏⵏⴻⵙ. ⴷ ⵎⴰⵏ ⴰⵢⴰ ⵜⵓⵖⴰ ⵉⴵⴰⵏ ⴷⵉ ⵉⵙⵔⴰⵉⵍ. ■ 8 ⴰⵎⴻⴼⴷⵉ ⵉⵏⵏⴰ ⵉ ⴱⵓⵄⴰⵣ: “ⵙⴻⵖ ⵉ-ⵜ ⵉ ⵢⵉⵅⴻⴼ ⵏⵏⴻⵛ!” ⵓⵛⴰ ⵏⴻⵜⵜⴰ ⵉⴽⴽⴻⵙ ⵙⴰⵏⴷⴰⵍⴰ ⵏⵏⴻⵙ. 9 ⵅⴻⵏⵏⵉ ⴱⵓⵄⴰⵣ ⵉⵏⵏⴰ ⵉ ⵎⴰⵔⵔⴰ ⵉⵎⵖⴰⵔⴻⵏ ⵓ ⵉ ⵎⴰⵔⵔⴰ ⵍⴳⴻⵏⵙ: “ⴽⴻⵏⵏⵉⵡ ⴷ ⵍⴻⵛⵀⵓⴷ ⴷⴻⴳ ⵡⴰⵙⵙ-ⴰ, ⴰⵇⴰ ⵏⴻⵛⵛ, ⵎⴰⵔⵔⴰ ⵎⵉⵏ ⵉⴵⴰⵏ ⵏ ⴰⵍⵉⵎⴰⵍⵉⴽ ⵓ ⵎⴰⵔⵔⴰ ⵎⵉⵏ ⵉⴵⴰⵏ ⵏ ⴽⵉⵍⵢⵓⵏ ⵓ ⵏ ⵎⴰⵃⵍⵓⵏ, ⵙⵖⵉⵖ ⵜ ⵣⴻⴳ ⵓⴼⵓⵙ ⵏ ⵏⴰⵄⵓⵎⵉ. 10 ⵓⵍⴰ ⴷ ⵔⴰⵄⵓⵜ, ⵜⴰⵎⵓ’ⴰⴱⴻⵛⵜ, ⵜⴰⵎⵖⴰⵔⵜ ⵏ ⵎⴰⵃⵍⵓⵏ, ⵉⵡⵢⴻⵖ ⵜⵜ ⴷ ⵜⴰⵎⵖⴰⵔⵜ, ⵃⵉⵎⴰ ⴰⴷ ⵉⵇⵇⵉⵎ ⵉⵙⴻⵎ ⵏ ⵡⴻⵏⵏⵉ ⵉⵎⵎⵓⵜⴻⵏ ⵅ ⵜⴻⵙⵖⴰⵔⵜ ⵏ ⵍⵡⴰⵔⵜ ⵏⵏⴻⵙ, ⵎⴰⵃⴻⵏⴷ ⵉⵙⴻⵎ ⵏ ⵡⴻⵏⵏⵉ ⵉⵎⵎⵓⵜⴻⵏ ⵡⴰⵔ ⵉⵜⵜⴻⴽⴽⴻⵙ ⵊⴰⵔ ⴰⵢⵜⵎⴰⵛ ⵓ ⵣⵉ ⵜⴻⵡⵡⴰⵔⵜ ⵏ ⵡⴻⵎⵛⴰⵏ ⵏ ⵜⵣⴻⴷⴷⵉⵖⵜ ⵏⵏⴻⵙ. ⴷⴻⴳ ⵡⴰⵙⵙ-ⴰ ⴰⵇⴰ ⴽⴻⵏⵏⵉⵡ ⴷ ⵍⴻⵛⵀⵓⴷ.”
ⴱⵓⵄⴰⵣ ⵉⴼⴷⵉ ⵜⴰⵎⵎⵓⵔⵜ ⵓⵛⴰ ⵢⴰⵡⵉ ⵔⴰⵄⵓⵜ ⴷ ⵜⴻⵎⵖⴰⵔⵜ (ⵔⴰⵄⵓⵜ 4:9)
11 ⵎⴰⵔⵔⴰ ⵍⴳⴻⵏⵙ ⵏⵏⵉ ⵉⴵⴰⵏ ⴷⵉ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⴷ ⵉⵎⵖⴰⵔⴻⵏ ⵏⵏⴰⵏ:
“ⵏⴻⵛⵛⵉⵏ ⴷ ⵍⴻⵛⵀⵓⴷ! ⵉⵍⵉ ⵙⵉⴷⵉ ⴰⴷ ⵢⴻⴳⴳ ⵜⴰⵎⵖⴰⵔⵜ ⵏⵏⵉ ⵉ ⴷ ⵖⴰ ⵢⴰⴷⴼⴻⵏ ⵖⴰⵔ ⵜⴰⴷⴷⴰⵔⵜ ⵏⵏⴻⵛ ⴰⵎ ⵔⴰⵃⵉⵍ ⴷ ⵍⵉⵢⴰ, ⵜⵉⵏⵏⵉ ⵣⵣⴰⵢⵙⴻⵏⵜ ⵙ ⵜⵏⴰⵢⴻⵏ ⵜᵉⵜⵜⵡⴰⴳⴳ ⵜⴻⴷⴷⴰⵔⵜ ⵏ ⵉⵙⵔⴰⵉⵍ. ⴻⴳⴳ ⵙ ⵛⴹⴰⵔⴻⵜ ⴷⵉ ⵉⴼⵔⴰⵜⴰ ⵓⵛⴰ ⴰⴷ ⵉⵜⵜⵡⴰⴱⴰⵔⵔⴻⵃ ⵉⵙⴻⵎ ⵏⵏⴻⵛ ⴷⵉ ⴱⴰⵢⵜ-ⵍⴰⵃⵎ! □ ■ 12 ⵜⴰⴷⴷⴰⵔⵜ ⵏⵏⴻⵛ ⵜⴻⴳⴳⴰ ⴰⵎ ⵜⴰⴷⴷⴰⵔⵜ ⵏ ⴼⴰⵔⵉⵚ, ⵡⴻⵏⵏⵉ ⵜⵓⵔⵓⵡ-ⴷⴷ ⵜⴰⵎⴰⵔ ⵉ ⵢⴰⵀⵓⴷⴰ, ⵣⴻⴳ ⵡⴰⵔⵔⴰⵡ ⵉ ⴷ ⴰⵛ ⵖⴰ ⵉⵡⵛ ⵙⵉⴷⵉ ⵣⵉ ⵜⴻⴱⵍⵉⵖⵜ-ⴰ.” ■
13 ⴱⵓⵄⴰⵣ ⵢⵉⵡⵉ ⵔⴰⵄⵓⵜ ⵓⵛⴰ ⵏⴻⵜⵜⴰⵜ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⵢⵓⴷⴻⴼ ⵅⴰⵙ ⵓⵛⴰ ⵙⵉⴷⵉ ⵉⵡⵛⴰ ⴰⵙ ⴰⴷ ⵜⴻⴽⵙⵉ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⵉⵊⵊ ⵏ ⵓⵃⴻⵏⵊⵉⵔ. 14 ⵓⵛⴰ ⵏⵏⴰⵏⵜ ⵜⵉⵎⵖⴰⵔⵉⵏ ⵉ ⵏⴰⵄⵓⵎⵉ: “ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵡⴻⵏⵏⵉ ⵡⴰⵔ ⵛⴻⵎ ⵉⵊⵊⵉⵏ ⴰⵙⵙ-ⴰ ⵏⵀⵍⴰ ⵉⵊⵊ ⵏ ⵓⵎⴻⴼⴷⵉ. ⵉⵍⵉ ⴰⴷ ⵉⵜⵜⵡⴰⴱⴰⵔⵔⴻⵃ ⵉⵙⴻⵎ ⵏⵏⴻⵙ ⴷⵉ ⵉⵙⵔⴰⵉⵍ! 15 ⴰⴷ ⵖⴰⵔⵡⴻⵎ ⵢⵉⵍⵉ ⴰⵎ ⵡⴻⵏⵏⵉ ⴷⴷ-ⵉⵙⵙⴼⴰⵇⴻⵏ ⵍⴻⵄⵎⴰⵔ ⵏⵏⴻⵎ ⵓⵛⴰ ⴰⴷ ⵛⴻⵎ ⵉⵚⵓⵏ ⵅ ⵜⴻⵡⵙⴰⵔ ⵏⵏⴻⵎ, ⵎⴰⵖⴰⵔ ⵜⴰⵙⵍⵉⴼⵜ ⵏⵏⴻⵎ, ⵜⴻⵏⵏⵉ ⵛⴻⵎ ⵉⵜⵜⴻⵅⵙⴻⵏ, ⵜⵓⵔⵓⵡ ⵉ-ⵜ-ⵉ-ⴷⴷ, ⴰⵇⴰ ⵏⴻⵜⵜⴰⵜ ⵜⴻⵃⵍⴰ ⵅ ⵙⴻⴱⵄⴰ ⵏ ⵉⵃⴻⵏⵊⵉⵔⴻⵏ.”
16 ⵏⴰⵄⵓⵎⵉ ⵜⴻⴽⵙⵉ ⴰⵃⴻⵏⵊⵉⵔ, ⵜⴻⵙⵙⴰⵔⵙ ⵉ-ⵜ ⵅ ⵉⴷⵎⴰⵔⴻⵏ ⵏⵏⴻⵙ ⵓ ⵜⴻⴷⵡⴻⵍ ⵜⴻⵙⵙⵢⴰⵎ ⵉ-ⵜ. 17 ⵜⴰⵊⵊⴰⵔⵉⵏ ⵡⵛⵉⵏⵜ ⴰⵙ ⵉⵊⵊ ⵏ ⵢⵉⵙⴻⵎ, ⵏⵏⴰⵏⵜ: “ⵉ ⵏⴰⵄⵓⵎⵉ ⵉⵜⵜⵡⴰⵔⵡⵓⵡ ⴰⵙ-ⴷⴷ ⵉⵊⵊ ⵏ ⵓⵃⴻⵏⵊⵉⵔ!”, ⵓ ⴳⴳⵉⵏ ⴰⵙ ⵄⵓⴱⵉⴷ. ⵏⴻⵜⵜⴰ ⴷ ⴱⴰⴱⴰⵙ ⵏ ⵢⴰⵙⵙⴰ, ⴱⴰⴱⴰⵙ ⵏ ⴷⴰⵡⵓⴷ.
ⵍⴻⵊⴷⵓⴷ ⵏ ⴷⴰⵡⵓⴷ
18 ⵉⵏⴰ ⴷ ⵉⵏⵏⵉ ⴷⴷ-ⵉⵜⵜⵡⴰⵔⵡⴻⵏ ⵣⵉ ⴼⴰⵔⵉⵚ: ⴼⴰⵔⵉⵚ ⵉⵊⵊⴰ-ⴷⴷ ⵃⴰⵚⵔⵓⵏ, ■
19 ⵃⴰⵚⵔⵓⵏ ⵉⵊⵊⴰ-ⴷⴷ ⵔⴰⵎ, ⵔⴰⵎ ⵉⵊⵊⴰ-ⴷⴷ ⵄⴰⵎⵎⵉⵏⴰⴷⴰⴱ,■
20 ⵄⴰⵎⵎⵉⵏⴰⴷⴰⴱ ⵉⵊⵊⴰ-ⴷⴷ ⵏⴰⵃⵛⵓⵏ, ⵏⴰⵃⵛⵓⵏ ⵉⵊⵊⴰ-ⴷⴷ ⵙⴰⵍⵎⵓⵏ, ■
21 ⵙⴰⵍⵎⵓⵏ ⵉⵊⵊⴰ-ⴷⴷ ⴱⵓⵄⴰⵣ, ⴱⵓⵄⴰⵣ ⵉⵊⵊⴰ-ⴷⴷ ⵄⵓⴱⵉⴷ,■
22 ⵄⵓⴱⵉⴷ ⵉⵊⵊⴰ-ⴷⴷ ⵢⴰⵙⵙⴰ ⴷ ⵢⴰⵙⵙⴰ ⵉⵊⵊⴰ-ⴷⴷ ⴷⴰⵡⵓⴷ. ■