ⵉⵣⵍⵉ ⵏ ⵓⵖⴻⵍⵍⴻⴱ ⵏ ⴷⴰⴱⵓⵔⴰ ⴷ ⴱⴰⵔⴰⵇ
5
1 ⴷⴻⴳ ⵡⴰⵙⵙ ⵏⵏⵉ ⵖⴻⵏⵏⵊⴻⵏ ⴷⴰⴱⵓⵔⴰ ⴷ ⴱⴰⵔⴰⵇ, ⵎⵎⵉⵙ ⵏ ⴰⴱⵉⵏⵓⵄⴰⵎ, ⵏⵏⴰⵏ: 2 “ⴱⴰⵔⴽⴻⵎ ⵙⵉⴷⵉ ⵉ ⵉⵊⴻⵟⵟⴰⵢⴻⵏ
ⵏ ⵓⵛⴻⵡⵡⴰⴼ ⵉⵜⵜⵡⴰⴼⴻⵙⵙⵢⴻⵏ ⴷⵉ ⵉⵙⵔⴰⵉⵍ,
ⵙ ⵓⵟⴻⵡⵡⴻⵄ ⵏ ⵍⴳⴻⵏⵙ ⵙ ⵍⵅⴰⴹⴰⵔ!
3 ⵙⵍⴻⵎ, ⴽⴻⵏⵏⵉⵡ, ⵉⵊⴻⴵⵉⴷⴻⵏ,
ⵙⵃⴻⵙⵙⴻⵎ, ⴽⴻⵏⵏⵉⵡ, ⴰⵢⵜ ⵏ ⵊⵊⴻⵀⴷ!
ⵏⴻⵛⵛ ⴰⴷ ⵖⴻⵏⵏⵊⴻⵖ ⵉⵣⵍⴰⵏ ⵉ ⵙⵉⴷⵉ,
ⵏⴻⵛⵛ ⴰⴷ ⵣⴻⵀⵀⴷⴻⵖ ⵉ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ.
4 ⴰ ⵙⵉⴷⵉ, ⵓⵎⵉ ⵛⴻⴽ ⴷⴷ-ⵜⴻⴼⴼⵖⴻⴷ ⵣⵉ ⵙⴰⵄⵉⵔ,
ⵓⵎⵉ ⵛⴻⴽ ⵜⵓⵖⴰ ⵜⴻⴳⴳⵓⵔⴻⴷ ⵣⴻⴳ ⵉⵢⵢⴰⵔ ⵏ ⵉⴷⵓⵎ,
ⵜⴻⵏⵀⴻⵣⵣ ⵜⴻⵎⵎⵓⵔⵜ, ⵢⴰⵔⵊⵉⵊ ⵓⵊⴻⵏⵏⴰ,
ⵡⴰⵀ, ⵓⵍⴰ ⴷ ⵉⵙⴻⵢⵏⵓⵜⴻⵏ ⴼⴰⵔⵔⵖⴻⵏ-ⴷⴷ ⵙ ⵡⴰⵎⴰⵏ. ■
5 ⵉⴷⵓⵔⴰⵔ ⴼⴻⵙⵢⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ,
ⴰⴷⵔⴰⵔ ⵏⵏⵉ ⵏ ⵙⵉⵏⴰ, ⵉⴼⵙⵉ
ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ. ■
6 ⴷⴻⴳ ⵡⵓⵙⵙⴰⵏ ⵏ ⵛⴰⵎⵊⴰⵔ, ⵎⵎⵉⵙ ⵏ ⵄⴰⵏⴰⵜ,
ⴷⴻⴳ ⵡⵓⵙⵙⴰⵏ ⵏ ⵢⴰⵄⵉⵍ, ⵇⵇⵉⵎⴻⵏ ⵉⴱⵔⵉⴷⴻⵏ ⵅⵍⴰⵏ,
ⵓ ⵉⵏⵏⵉ ⵜⵓⵖⴰ ⵉⴳⴳⵓⵔⴻⵏ ⵅ ⵜⴻⴱⵔⵉⴷⵉⵏ,
ⵜⵜⴻⴽⴽⴻⵏ ⵉⵎⴻⵙⵔⴰⵇ ⵉⵄⴰⵔⵔⵇⴻⵏ.
7 ⵉⵎⵊⴰⵀⴻⴷⴻⵏ ⵡⴰⵔ ⵇⵇⵉⵎⴻⵏ,
ⵡⴰⵔ ⵇⵇⵉⵎⴻⵏ ⴷⵉ ⵉⵙⵔⴰⵉⵍ,
ⴰⵍⴰⵎⵉ ⴽⴽⴰⵔⴻⵖ ⵏⴻⵛⵛ, ⴷⴰⴱⵓⵔⴰ,
ⴰⵍⴰⵎⵉ ⴽⴽⴰⵔⴻⵖ ⵏⴻⵛⵛ, ⵢⴻⵎⵎⴰⵙ ⵏ ⵉⵙⵔⴰⵉⵍ.
8 ⵓⵎⵉ ⵉⴼⴰⵔⵣ ⵍⴳⴻⵏⵙ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ,
ⵅⴻⵏⵏⵉ ⵜⵓⵖⴰ ⴷⵉⵏ ⵉⵊⵊ ⵏ ⵓⵎⴻⵏⵖⵉ ⵉⵏⴻⵇⵇⴻⵏ
ⵖⴰⵔ ⵜⴻⵡⵡⵓⵔⴰ.
ⵜⴰⵙⴻⴷⴷⴰⵔⵜ ⵏ ⵓⵄⴻⵙⴽⴰⵔ ⴷ ⵓⵃⵔⵉⵛ,
ⵡⴰⵔ ⵉⵜⵜⵡⴰⵥⵔⵉ ⵄⴰⴷ ⵊⴰⵔ ⴰⵔⴻⴱⵄⴰ-ⴰⵍⴰⴼ
ⴷⵉ ⵉⵙⵔⴰⵉⵍ!
9 ⵓⵍ ⵉⵏⵓ ⴰⴽ-ⴷ ⵉⵎⴳⴻⵡⵡⴰⴷⴻⵏ ⵏ ⵉⵙⵔⴰⵉⵍ,
ⵉⵏⵏⵉ ⵉⵟⴻⵡⵡⵄⴻⵏ ⵉⵅⴻⴼ ⵏⵙⴻⵏ ⵊⴰⵔ ⵍⴳⴻⵏⵙ ⵙ ⵍⵅⴰⴹⴰⵔ,
ⵍⴱⴰⵔⴰⴽⴰ ⵉ ⵙⵉⴷⵉ!
10 ⴰ ⴽⴻⵏⵏⵉⵡ, ⵉⵏⵏⵉ ⵉⵏⵏⴰⵢⴻⵏ
ⵅ ⵜⴻⵖⵢⴰⵍ ⴷ ⵜⵉⵛⴻⵎⵍⴰⵍⵉⵏ,
ⴽⴻⵏⵏⵉⵡ ⵉⵏⵏⵉ ⵉⵜⵜⵖⵉⵎⴰⵏ ⵅ ⵜⵣⴰⵔⴱⵉⵢⵢⵉⵏ
ⴷ ⴽⴻⵏⵏⵉⵡ ⵉⵏⵏⵉ ⵉⴳⴳⵓⵔⴻⵏ ⴷⴻⴳ ⵡⴻⴱⵔⵉⴷ,
ⵙⵉⵡⵍⴻⵎ ⵅ ⵎⴰⵏ ⴰⵢⴰ!
11 ⵙ ⵜⵎⵉⵊⵊⴰ ⵏ ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ
ⵉ ⴷⵉⵏ ⵊⴰⵔ ⵡⴰⵏⵓⵜⴻⵏ,
ⴰⵇⴰ ⵉⵜⵜⵡⴰⵙⴻⵍ ⵡⴰⵡⴰⵍ
ⵅ ⵜⵎⴻⴳⴳⴰ ⵉⵙⴻⴳⴳⴷⴻⵏ ⵏ ⵙⵉⴷⵉ,
ⵜⵉⵎⴻⴳⴳⴰ ⵉⵙⴻⴳⴳⴷⴻⵏ ⵏ ⵓⵎⵊⴰⵀⴰⴷ ⵏ ⵉⵙⵔⴰⵉⵍ.
ⵅⴻⵏⵏⵉ ⵉⵀⵡⴰ-ⴷⴷ ⵍⴳⴻⵏⵙ ⵏ ⵙⵉⴷⵉ
ⵖⴰⵔ ⵜⴻⵡⵡⵓⵔⴰ ⵏ ⵜⴻⵏⴷⵉⵏⵜ.
12 ⵃⴹⴰⵜ, ⵃⴹⴰⵜ, ⴷⴰⴱⵓⵔⴰ,
ⵃⴹⴰⵜ, ⵃⴹⴰⵜ, ⵙⵉⵡⴻⵍ ⵙ ⵢⵉⵊⵊ ⵏ ⵉⵣⵍⵉ!
ⴽⴽⴰⵔ, ⴱⴰⵔⴰⵇ, ⴰⵡⵉ ⵉⵎⴻⵃⴱⴰⵙ ⵏⵏⴻⵛ,
ⴰ ⵛⴻⴽ, ⵎⵎⵉⵙ ⵏ ⴰⴱⵉⵏⵓⵄⴰⵎ!
13 ⵅⴻⵏⵏⵉ ⵉⵀⵡⴰ ⴽⵓⵍ ⵡⵉ ⵢⴰⵔⴻⵡⵍⴻⵏ
ⵖⴰⵔ ⴰⵢⵜ ⵏ ⵊⵊⴻⵀⴷ ⵏ ⵍⴳⴻⵏⵙ,
ⵙⵉⴷⵉ ⵉⵀⵡⴰ-ⴷⴷ ⵖⴰⵔⵉ ⴰⴽ-ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ.
14 ⵣⴻⴳ ⵉⴼⵔⴰⵢⵉⵎ ⵓⵙⵉⵏ-ⴷⴷ
ⵉⵏⵏⵉ ⴰⵥⵡⴰⵔ ⵏⵙⴻⵏ ⴷⵉ ⵄⴰⵎⴰⵍⵉⵇ
ⵓ ⴰⵡⴰⵔⵏⵉ ⴰⵛ ⵢⵓⵢⵓⵔ ⴱⵉⵏⵢⴰⵎⵉⵏ
ⵊⴰⵔ ⵍⵄⴻⵙⴽⴰⵔⴰⵜ ⵏ ⵢⴻⵡⴷⴰⵏ ⵏⵏⴻⵛ.
ⵣⵉ ⵎⴰⵅⵉⵔ ⵀⵡⴰⵏ ⵉⵎⴳⴻⵡⵡⴰⴷⴻⵏ,
ⵓ ⵣⵉ ⵣⴰⴱⵓⵍⵓⵏ ⵉⵏⵏⵉ ⵉⵟⵟⴼⴻⵏ
ⴰⵄⴻⴽⴽⴰⵣ ⵏ ⵡⴻⵏⵏⵉ ⵉⵃⴻⵙⵙⴱⴻⵏ.
15 ⵍⵃⵓⴽⴽⴰⵎ ⵏ ⵉⵙⵙⴰⴽⴰⵔ ⵀⵡⴰⵏ-ⴷⴷ ⴰⴽ-ⴷ ⴷⴰⴱⵓⵔⴰ,
ⵓⵛⴰ ⴰⵎ ⵎⴰⵎⵎⴻⵛ ⵉⵜⵜⵡⴰⵙⵙⴻⴽⴽ ⵉⵙⵙⴰⵅⴰⵔ,
ⴰⵎⵎⵓ ⵉ ⵉⵜⵜⵡⴰⵙⵙⴻⴽⴽ ⵓⵍⴰ ⴷ ⴱⴰⵔⴰⵇ
ⴷⵉ ⵍⴻⵡⴹⴰ ⵏ ⵜⴻⵖⵣⵓⵔⵜ.
ⴷⵉ ⵍⴻⵚⴼⵓⴼ ⵏ ⵔⵓⴱⵉⵏ
ⵜⵓⵖⴰ ⵉⵅⴰⵔⵔⵉⵚⴻⵏ ⵏ ⵡⵓⵍ ⴷ ⴰⵟⵟⴰⵙ.
16 ⵎⴰⵢⴻⵎⵎⵉ ⵜⴻⵇⵇⵉⵎⴻⴷ ⵊⴰⵔ ⵉⵖⴻⵏⴷⵉⴼⴻⵏ,
ⵜⴻⵙⵙⵃⴻⵙⵙⴻⴷ ⵖⴰⵔ ⵡⴻⵙⴱⵓⵄⵔⵉⵢ ⵏ ⵜⵃⵉⵎⵔⵉⵡⵉⵏ?
ⴷⵉ ⵍⴻⵚⴼⵓⴼ ⵏ ⵔⵓⴱⵉⵏ
ⴳⴳⵉⵏ ⴰⴷ ⴱⴻⵇⵇⵛⴻⵏⴷⴻⴳ ⵡⵓⵍ ⴰⵟⵟⴰⵙ.
17 ⵊⵉⵍⵄⴰⴷ ⵉⵇⵇⵉⵎ ⵉⵣⴻⴷⴷⴻⵖ
ⵅ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ
ⵓ ⵎⴰⵢⴻⵎⵎⵉ ⵉⵇⵇⵉⵎ ⴷⴰⵏ ⵖⴰⵔ ⵜⵖⴰⵔⵔⵓⴱⴰ?
ⴰⵛⵉⵔ ⵉⵇⵇⵉⵎ ⵖⴰⵔ ⵜⵎⴰ ⵏ ⵍⴻⴱⵃⴰⵔ
ⵓⵛⴰ ⵉⵇⵇⵉⵎ ⵉⵣⴷⴻⵖ ⵖⴰⵔ ⵉⴼⵜⴰⵙⴻⵏ ⵏⵏⴻⵙ.
18 ⵣⴰⴱⵓⵍⵓⵏ ⴷ ⵉⵊⵊ ⵏ ⵍⴳⴻⵏⵙ
ⵉⵙⴻⴱⴱⴻⵍ ⵜⵓⴷⴰⵔⵜ ⵏⵏⴻⵙ ⴰⵍ ⵍⵎⴻⵡⵜ,
ⴰⵎ ⵜ ⵉⴳⴳⴰ ⵓⵍⴰ ⴷ ⵏⴰⴼⵜⴰⵍⵉ
ⵅ ⵍⴻⴳⵄⵓⴷⵉ ⵏ ⵡⴰⵣⵣⴰⵢ ⵏ ⵓⵎⴻⵏⵖⵉ.
19 ⵉⵊⴻⴵⵉⴷⴻⵏ ⵓⵙⵉⵏ-ⴷⴷ, ⵎⵎⴻⵏⵖⴻⵏ.
ⵍⴻⵅⴷⴻⵏⵏⵉ ⵎⵎⴻⵏⵖⴻⵏ ⵉⵊⴻⴵⵉⴷⴻⵏ ⵏ ⴽⴻⵏⵄⴰⵏ
ⴷⵉ ⵜⴰⵄⵏⴰⴽ ⵖⴰⵔ ⵡⴰⵎⴰⵏ ⵏ ⵎⴰⵊⵉⴷⴷⵓ,
ⵎⴰⵛⴰ ⵡⴰⵔ ⴽⵙⵉⵏ ⵜⴰⴽⴻⵛⵛⴰⴹⵜ ⵏ ⵏⵏⵓⵇⴰⵔⵜ.
20 ⵎⵉⵏⵣⵉ ⵉⵜⵔⴰⵏ ⵎⵎⴻⵏⵖⴻⵏ ⵣⴻⴳ ⵓⵊⴻⵏⵏⴰ,
ⵎⵎⴻⵏⵖⴻⵏ ⴰⴽ-ⴷ ⵙⵉⵙⴰⵔⴰ ⵣⵉ ⵜⴻⴱⵔⵉⴷⵉⵏ ⵏⵙⴻⵏ.
21 ⵉⵖⵣⴰⵔ ⵏ ⵇⵉⵛⵓⵏ ⵉⵡⵢⵉ ⵉ-ⵜⴻⵏ,
ⵜⵉⵖⵣⴰⵔⵜ ⵏ ⵎⴻⵛⵃⴰⵍ ⵓⵢⴰ, ⵜⵉⵖⵣⴰⵔⵜ ⵏ ⵇⵉⵛⵓⵏ!
ⵓⵢⵓⵔ ⵙ ⵊⵊⴻⵀⴷ, ⴰ ⵍⴻⵄⵎⴰⵔ ⵉⵏⵓ.
22 ⵍⴻⵅⴷⴻⵏⵏⵉ ⵏⵏⵅⵓⵅⵍⴻⵏⵜ ⵜⵉⵛⴻⴹⵢⵉⵏ ⵏ ⵉⵢⵙⴰⵏ
ⵣⴻⴳ ⵓⵔⴰⴱⴻⵄ ⴱⵍⴰ ⵓⵇⴻⵟⵟⵓ
ⵣⴻⴳ ⴰⵢⵜ ⵏ ⴱⵓ-ⵚⵚⵓⵍⵟⴰ ⵏⵏⴻⵙ.
23 ⵏⴻⵄⵍⴻⵎ ⵎⵉⵔⵓⵣ, ⵉⵏⵏⴰ ⵍⵎⴰⵍⴰⴽ ⵏ ⵙⵉⴷⵉ,
ⵏⴻⵄⵍⴻⵎ ⵉⵎⴻⵣⴷⴰⵖ ⵏⵏⴻⵙ ⵙ ⵉⵛⵜ ⵏ ⵏⵏⴻⵄⵍⴻⵜ,
ⵎⵉⵏⵣⵉ ⵡⴰⵔ ⴷⴷ-ⵓⵙⵉⵏ
ⵃⵉⵎⴰ ⴰⴷ ⵡⵛⴻⵏ ⴰⴼⵓⵙ ⵉ ⵙⵉⴷⵉ,
ⵃⵉⵎⴰ ⴰⴷ ⵡⵛⴻⵏ ⴰⴼⵓⵙ ⵉ ⵙⵉⴷⵉ
ⵙ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵏⵙⴻⵏ.
24 ⵜⴻⵜⵜⵡⴰⴱⴰⵔⴻⴽ ⵢⴰⵄⵉⵍ, ⵜⴰⵎⵖⴰⵔⵜ ⵏ ⵃⴰⴱⵉⵔ, ⴰⵇⵉⵏⵉ,
ⵙⴻⵏⵏⴻⵊ ⵉ ⵎⴰⵔⵔⴰ ⵜⵉⵎⵖⴰⵔⵉⵏ.
ⵜⴻⵜⵜⵡⴰⴱⴰⵔⴻⴽ ⵏⴻⵜⵜⴰⵜ ⵙⴻⵏⵏⴻⵊ
ⵉ ⵎⴰⵔⵔⴰ ⵜⵉⵎⵖⴰⵔⵉⵏ ⵉⵣⴻⴷⴷⵖⴻⵏ ⴷⴻⴳ ⵉⵇⵉⴹⴰⵏ.
25 ⵏⴻⵜⵜⴰ ⵉⵜⵜⴰⵔ ⴰⵎⴰⵏ, ⵏⴻⵜⵜⴰⵜ ⵜⴻⵡⵛⴰ ⴰⵙ ⴰⵖⵉ,
ⵜⵉⵡⵉ ⴰⵙ-ⴷⴷ ⵜⵔⵓⵙⵙⵉ
ⴷⴻⴳ ⵉⵛⵜ ⵏ ⵟⵟⴻⴱⵚⵉ ⴷ ⴰⵎⴻⵇⵇⵔⴰⵏ ⴰⵟⵟⴰⵙ.
26 ⵙ ⵓⴼⵓⵙ ⵏⵏⴻⵙ ⵜⴻⵙⵙⵡⵉⵥⵥⴻⴹ ⵖⴰⵔ ⵍⴻⵡⵜⴻⴷ,
ⴰⴼⵓⵙ ⴰⴼⵓⵙⵉ ⵏⵏⴻⵙ ⵖⴰⵔ ⵡⴻⴼⴹⵉⵙ ⵏ ⵉⵅⴻⴷⴷⴰⵎⴻⵏ.
ⵏⴻⵜⵜⴰⵜ ⵜⴻⵡⵜⴰ ⵙⵉⵙⴰⵔⴰ,
ⵜⴻⵅⴱⴻⴹ ⴰⵙ ⵅ ⵓⵣⴻⴵⵉⴼ ⵏⵏⴻⵙ,
ⵜⴻⵍⴱⴻⵣ ⵓⵛⴰ ⵜⴻⵙⵙⵏⵓⵇⵇⴻⴱ ⴰⵙ
ⴰⵖⴻⵣⴷⵉⵙ ⵏ ⵓⵣⴻⴵⵉⴼ ⵏⵏⴻⵙ.
27 ⵉⴽⵎⵓⵎⵎⴻⵛ ⵊⴰⵔ ⵉⴹⴰⵔⴻⵏ ⵏⵏⴻⵙ,
ⵉⴱⴱⵓⵣⵣⴻⵍ, ⴰⵇⴰ ⵉⵣⵣⴻⵍ ⴷⵉⵏ.
ⴰⵇⴰ ⵉⴽⵎⵓⵎⵎⴻⵛ ⵊⴰⵔ ⵉⴹⴰⵔⴻⵏ ⵏⵏⴻⵙ, ⵉⴱⴱⵓⵣⵣⴻⵍ.
ⵓⵎⵉ ⵜⵓⵖⴰ ⵉⵜⵜⴻⴽⵎⵓⵎⵎⵓⵛ,
ⵉⵡⴹⴰ ⴷⵉⵏ, ⵓⵛⴰ ⵉⵡⴹⴰ-ⴷⴷ ⵉⵍⴻⵇⵇⴻⴼ!
28 ⵣⵉ ⵍⴽⴰⵣⵉ ⵏⵏⴻⵙ ⵜⴻⵅⵣⴰⵔ-ⴷⴷ ⵢⴻⵎⵎⴰⵙ ⵏ ⵙⵉⵙⴰⵔⴰ
ⵓⵛⴰ ⵜⴻⵙⵖⵓⵢ ⵊⴰⵔ ⵉⵇⴹⵉⴱⴻⵏ ⵏ ⵡⵓⵣⵣⴰⵍ
‘ⵎⴰⵢⴻⵎⵎⵉ ⵉⵄⴻⵟⵟⴰⵍ ⵓⴽⴰⵔⵔⵓ ⵏⵏⴻⵙ ⵏ ⵓⵎⴻⵏⵖⵉ
ⴰⵎⵎⵓ ⴰⵟⵟⴰⵙ?
ⵎⴰⵢⴻⵎⵎⵉ ⵉⵄⴻⵟⵟⴰⵍ ⴷⴷⵔⵉⵣ ⵏ ⵉⴽⴰⵔⵔⵓⵜⴻⵏ ⵏⵏⴻⵙ’
29 ⵉⵏⵏⵉ ⴷ ⵜⵉⵖⵎⵉⵙⵉⵏ ⴰⵟⵟⴰⵙ ⵊⴰⵔ ⵜⵊⴻⴵⵉⴷⵉⵏ ⵏⵏⴻⵙ
ⴰⵔⵔⵉⵏⵜ-ⵉ-ⴷⴷ,
ⵓⵛⴰ ⵓⵍⴰ ⴷ ⵏⴻⵜⵜⴰⵜ ⵙⵉⵎⴰⵏⵜ ⵏⵏⴻⵙ
ⵜⴰⵔⵔⴰ-ⴷⴷ ⵅ ⵎⵉⵏ ⵜⴻⵏⵏⴰ:
30 ‘ⵎⴰ ⵅⴻⵏⵏⵉ ⵏⵉⵜⵏⵉ ⵡⴰⵔ ⵓⴼⵉⵏ ⵡⴰⵍⵓ
ⵓⵛⴰ ⴰⵇⴰ ⴰⵜⴻⵏ ⵡⴰⵔ ⴱⴻⵟⵟⵉⵏ ⵜⴰⴽⴻⵛⵛⴰⴹⵜ?
ⵉ ⴽⵓⵍ ⴰⵔⵢⴰⵣ ⵉⵊⴻⵀⴷⴻⵏ ⵉⵛⵜ ⵏ ⵜⴻⵄⵣⴰⵔⴻⵛⵜ
ⵏⵉⵖ ⵜⵏⴰⵢⴻⵏ ⵏ ⵜⴻⵄⵣⴰⵔⵉⵢⵢⵉⵏ?
ⵜⴰⴽⴻⵛⵛⴰⴹⵜ ⵏ ⵉⴽⴻⵜⵜⴰⵏⴻⵏ ⵉⵜⵜⵡⴰⵙⵙⵇⴰⵔⴻⵇⵛⴻⵏ
ⵉ ⵙⵉⵙⴰⵔⴰ,
ⵜⴰⴽⴻⵛⵛⴰⴹⵜ ⵏ ⵉⴽⴻⵜⵜⴰⵏⴻⵏ ⵉⵜⵜⵡⴰⵙⵙⵇⴰⵔⴻⵇⵛⴻⵏ,
ⴰⴱⵓⵔⴹⴰ, ⵍⵅⴻⴷⵎⴻⵜ ⵏ ⵓⵎⵓⴷⵉ
ⵖⴰⵔ ⵜⵏⴰⵢⴻⵏ ⵏ ⵉⵖⴻⵣⴷⵉⵙⴻⵏ
ⵣⴻⴳ ⵓⴽⴻⵜⵜⴰⵏ ⵉⵜⵜⵡⴰⵙⵙⵇⴰⵔⴻⵇⵛⴻⵏ ⵉ ⵉⵔⴰⵡⴻⵏ,
ⴰⵎ ⵜⴽⴻⵛⵛⴰⴹⵜ?’
31 ⴰⵎⵎⵓ ⵉ ⵖⴰ ⵀⴻⵍⵍⴽⴻⵏ ⵍⵄⴻⴷⵢⴰⵏ ⵏⵏⴻⵛ, ⴰ ⵙⵉⴷⵉ,
ⵎⴰⵛⴰ ⵉⵏⵏⵉ ⵛⴻⴽ ⵉⵜⵜⴻⵅⵙⴻⵏ ⴰⴷ ⵉⵍⵉⵏ ⴰⵎ ⵜⴼⵓⵛⵜ
ⵉ ⴷⴷ-ⵉⵏⴻⵇⵇⴰⵔⴻⵏ ⴷⵉ ⵊⵊⴻⵀⴷ ⵏⵏⴻⵙ.”
ⴰⵡⴰⵔⵏⵉ ⴰⵢⴰ ⵜⴰⵔⴻⵢⵢⴻⵃ ⵜⴻⵎⵎⵓⵔⵜ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. ■