ⵍⵎⴻⵡⵜ ⵏ ⵎⵓⵙⴰ
34
1 ⵅⴻⵏⵏⵉ ⵉⴳⴻⵄⵄⴻⴷ ⵎⵓⵙⴰ ⵣⵉ ⵍⴻⵡⴹⴰⵜ ⵏ ⵎⵓ’ⴰⴱ ⵖⴰⵔ ⵡⴻⴷⵔⴰⵔ ⵏ ⵏⴰⴱⵓ, ⵖⴰⵔ ⵜⵇⵉⵛⵛⴻⵜ ⵏ ⴼⵉⵙⵊⴰ ⵏⵏⵉ ⵉⵡⴻⵊⵊⵀⴻⵏ ⴰⵔⵉⵃⴰ ⵓⵛⴰ ⵉⵙⵙⵛⴻⵏ ⴰⵙ ⵙⵉⴷⵉ ⵎⴰⵔⵔⴰ ⵜⴰⵎⵎⵓⵔⵜ, ⵣⵉ ⵊⵉⵍⵄⴰⴷ ⴰⵍ ⴷⴰⵏ, ■ 2 ⵎⴰⵔⵔⴰ ⵏⴰⴼⵜⴰⵍⵉ ⴷ ⵜⴻⵎⵎⵓⵔⵜ ⵏ ⵉⴼⵔⴰⵢⵉⵎ ⴷ ⵎⴰⵏⴰⵙⵙⴰ ⴷ ⵎⴰⵔⵔⴰ ⵜⴰⵎⵎⵓⵔⵜ ⵏ ⵢⴰⵀⵓⴷⴰ ⴰⵍ ⵍⴻⴱⵃⴰⵔ ⴷ ⵎⵉⵏ ⴷⵉⵏ ⴰⵡⴰⵔⵏⵉ ⴰⵙ, 3 ⴷ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⴷ ⵓⴷⴻⵡⵡⴰⵔ ⵏ ⵍⴻⵡⴹⴰ ⵏ ⴰⵔⵉⵃⴰ, ⵜⴰⵏⴷⵉⵏⵜ ⵏ ⵜⵛⴻⵊⵊⵓⵔⴰ ⵏ ⵜⵉⵏⵉ ⴰⵍ ⵚⵓⵖⴰⵔ. 4 ⵓⵛⴰ ⵉⵏⵏⴰ ⴰⵙ ⵙⵉⴷⵉ: “ⵜⴰ ⴷ ⵜⴰⵎⵎⵓⵔⵜ ⵏⵏⵉ ⵅ ⵊⵊⵓⴵⴻⵖ ⵉ ⵉⴱⵔⴰⵀⵉⵎ, ⴷ ⵉⵙⵃⴰⵇ ⴷ ⵢⴰⵄⵇⵓⴱ, ⵏⵏⵉⵖ: ‘ⵉ ⵣⵣⴰⵔⵉⵄⴻⵜ ⵏⵏⴻⵛ, ⴰⴷ ⵜⵜ ⵡⵛⴻⵖ!” ⵊⵊⵉⵖ ⵛⴻⴽ ⴰⴷ ⵜⵜ ⵜⵥⴰⵔⴻⴷ ⵙ ⵜⵉⵟⵟⴰⵡⵉⵏ ⵏⵏⴻⵛ, ⵎⴰⵛⴰ ⵡⴰⵔ ⵜⵥⴻⴽⴽⵯⵉⴷ ⵛⴰ ⴷⵉⵀⴰ.” ■ 5 ⴰⵎⵎⵓ ⵉ ⴷⵉⵏⵏⵉ ⵉⵎⵎⵓⵜ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⴷⵉ ⵜⴻⵎⵎⵓⵔⵜ ⵏ ⵎⵓ’ⴰⴱ, ⴰⵎ ⵎⴰⵎⵎⴻⵛ ⴰⵡⴰⵍ ⵉ ⴷⴷ-ⵉⴼⴼⵖⴻⵏ ⵣⴻⴳ ⵓⵇⴻⵎⵎⵓⵎ ⵏ ⵙⵉⴷⵉ. 6 ⵓⵛⴰ ⵏⴻⵜⵜⴰ ⵉⵏⴹⴻⵍ ⵉ-ⵜ ⴷⵉ ⵜⴻⵖⵣⵓⵔⵜ ⴷⵉ ⵜⴻⵎⵎⵓⵔⵜ ⵏ ⵎⵓ’ⴰⴱ ⵇⵉⴱⴰⵍⵜ ⵉ ⴱⴰⵢⵜ-ⴼⴰⵖⵓⵔ ⵓⵛⴰ ⵓⵍⴰ ⴷ ⵉⵊⵊ ⵉⵙⵙⴻⵏ ⴰⵎⵛⴰⵏ ⵏ ⵡⴻⵏⴹⴻⵍ ⵏⵏⴻⵙ ⴰⵍ ⴰⵙⵙ-ⴰ. 7 ⵜⵓⵖⴰ ⵎⵓⵙⴰ ⵖⴰⵔⴻⵙ ⵎⵢⴰ ⵓ-ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⵎⵎⵓⵜ. ⵜⵉⵟⵟ ⵏⵏⴻⵙ ⵡⴰⵔ ⵜⴻⵖⵔⵉ ⵛⴰ, ⵡⴰⵔ ⴷ ⴰⵙ ⵉⵔⵓⵃ ⵍⴻⵎⵄⴻⵣⵣ. 8 ⵙⵖⵓⵢⵢⴻⵏ ⴰⵢⵜ ⵏ ⵉⵙⵔⴰⵉⵍ ⵅ ⵎⵓⵙⴰ ⴷⵉ ⵍⴻⵡⴹⴰⵜ ⵏ ⵎⵓ’ⴰⴱ ⵜⵍⴰⵜⵉⵏ ⵏ ⵡⵓⵙⵙⴰⵏ ⵓⵛⴰ ⴰⵎⵎⵓ ⵉ ⵜⵜⵡⴰⴽⴻⵎⵎⵍⴻⵏ ⵓⵙⵙⴰⵏ ⵏ ⵉⵖⵓⵢⵢⴰⵏ ⴷ ⵡⴻⵛⴹⴰⵏ ⵏ ⵎⵓⵙⴰ.
9 ⵢⴰⵛⵓⵡⴰ, ⵎⵎⵉⵙ ⵏ ⵏⵓⵏ, ⵜⵓⵖⴰ ⵉⵛⵛⵓⵔ ⵙ ⴱⵓⵃⴱⴻⵍ ⵏ ⵜⵉⵖⵉⵜ, ⵎⵉⵏⵣⵉ ⵎⵓⵙⴰ ⵜⵓⵖⴰ ⵉⵙⵙⴰⵔⵙ ⵅⴰⵙ ⵉⴼⴰⵙⵙⴻⵏ ⵏⵏⴻⵙ ⵓ ⴰⵢⵜ ⵏ ⵉⵙⵔⴰⵉⵍ ⵙⵍⵉⵏ ⵖⴰⵔⴻⵙ ⵓⵛⴰ ⴳⴳⵉⵏ ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⵙⵉⴷⵉ ⵉ ⵎⵓⵙⴰ. ■ 10 ⵄⴻⵎⵎⴰⵔⵚ ⵄⴰⴷ ⵡⴰⵔ ⴷⴷ-ⵉⴽⴽⴰⵔ ⴰⵏⴰⴱⵉ ⴷⵉ ⵉⵙⵔⴰⵉⵍ ⴰⵎ ⵎⵓⵙⴰ, ⵡⴻⵏⵏⵉ ⵜⵓⵖⴰ ⵉⵙⵙⵏⴻⵏ ⵙⵉⴷⵉ ⵓⴷⴻⵎ ⵖⴰⵔ ⵡⵓⴷⴻⵎ, 11 ⵙ ⵎⴰⵔⵔⴰ ⵍⴻⵄⵍⴰⵎⴰⵜ ⵏⵏⵉ ⵣⵉ ⵜ ⵉⵙⵙⴻⴽⴽ ⵙⵉⴷⵉ, ⵃⵉⵎⴰ ⴰⴷ ⵜⴻⵏⵜ ⵉⴳⴳ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵣⵣⴰⵜ ⵉ ⴼⵉⵔⵄⵓⵏ ⴷ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵎⴰⵔⵔⴰ ⵜⴰⵎⵎⵓⵔⵜ ⵏⵏⴻⵙ, 12 ⵓ ⵙ ⵎⴰⵔⵔⴰ ⴰⴼⵓⵙ ⵏⵏⵉ ⵉⵊⴻⵀⴷⴻⵏ ⵓ ⵙ ⵎⴰⵔⵔⴰ ⵜⵉⵎⴻⴳⴳⴰ ⵉⵎⵖⴰⵔⴻⵏ ⵉⵙⵙⴰⴳⴳⵯⴰⴷⴻⵏ, ⵜⵉⵏⵏⵉ ⵉⴳⴳⴰ ⵎⵓⵙⴰ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵉⵙⵔⴰⵉⵍ.