ⵢⴰⵛⵓⵡⴰ ⵉⴽⵙⵉ ⴰⵎⵛⴰⵏ ⵏ ⵎⵓⵙⴰ
31
1 ⵉⵔⵓⵃ ⵎⵓⵙⴰ ⵓⵛⴰ ⵉⵙⵙⵉⵡⴻⵍ ⵙ ⵡⴰⵡⴰⵍⴻⵏ-ⴰ ⴰⴽ-ⴷ ⵎⴰⵔⵔⴰ ⵉⵙⵔⴰⵉⵍ, 2 ⵉⵏⵏⴰ ⴰⵙⴻⵏ: “ⴰⵙⵙ-ⴰ ⵏⴻⵛⵛ ⵖⴰⵔⵉ ⵎⵢⴰ ⵓ-ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ. ⵡⴰⵔ ⵣⴻⵎⵎⴰⵔⴻⵖ ⵄⴰⴷ ⴰⴷ ⴼⴼⵖⴻⵖ ⵓⵍⴰ ⴰⴷ ⴰⴷⴼⴻⵖ ⵓⵛⴰ ⵙⵉⴷⵉ ⵉⵏⵏⴰ ⴰⵢⵉ: ‘ⵡⴰⵔ ⵜⵥⴻⴽⴽⵯⵉⴷ ⵉⵖⵣⴰⵔ-ⴰ ⵏ ⵍ’ⵓⵔⴷⵓⵏ!’ ■ 3 ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⵉⵥⵡⴰ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. ⵏⴻⵜⵜⴰ ⴰⴷ ⵢⴰⵔⴻⴷⴷⴻⴵ ⵍⴻⴳⵏⵓⵙ-ⴰ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⵓⵛⴰ ⴰⴷ ⵜᵉⵟⵟⴼⴻⴷ ⵍⵡⴰⵔⵜ ⵏⵙⴻⵏ. ⵢⴰⵛⵓⵡⴰ ⴰⴷ ⵉⵥⵡⴰ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ, ⴰⵎ ⵎⴰⵎⵎⴻⵛ ⵉⵏⵏⴰ ⵙⵉⴷⵉ. ■ 4 ⵙⵉⴷⵉ ⴰⴷ ⴽⵉⵙⴻⵏ ⵉⴳⴳ ⴰⵎ ⵎⴰⵎⵎⴻⵛ ⵉⴳⴳⴰ ⴰⴽ-ⴷ ⵙⵉⵃⵓⵏ ⴷ ⵄⵓⵊ, ⵉⵊⴻⴵⵉⴷⴻⵏ ⵏ ⵉⵎⵓⵔⵉⵢⵢⴻⵏ, ⵉⵏⵏⵉ ⵢⴰⵔⴻⴷⴷⴻⴵ ⵏⴻⵜⵜⴰ ⵙ ⵜⵏⴰⵢⴻⵏ, ⵓ ⴰⵎ ⵎⴰⵎⵎⴻⵛ ⵉⴳⴳⴰ ⴰⴽ-ⴷ ⵜⴻⵎⵎⵓⵔⵜ ⵏⵙⴻⵏ. ■ 5 ⵅⵎⵉ ⵜⴻⵏ ⵖⴰ ⵉⵙⴻⵍⵍⴻⵎ ⵙⵉⴷⵉ ⵣⵣⴰⵜ ⵉ ⵡⵓⴷⴻⵎ ⵏⵡⴻⵎ, ⴰⴷ ⴽⵉⵙⴻⵏ ⵜⴻⴳⴳⴻⵎ ⵄⵍⴰⵃⵙⴰⴱ ⵎⴰⵔⵔⴰ ⵜⴰⵡⵚⴻⵢⵢⴻⵜ ⵏⵏⵉ ⵣⵉ ⴽⴻⵏⵏⵉⵡ ⵡⴻⵚⵚⵉⵖ■ 6 ⵉⵍⵉⵎ ⴷ ⵉⵔⵢⴰⵣⴻⵏ ⵓ ⵉⵍⵉⵎ ⵜⵎⴻⵃⴹⴻⵎ, ⵡⴰⵔ ⵜⵜⴻⴳⴳⵯⴻⴷⴻⵎ, ⵡⴰⵔ ⵜⵜⴰⵔⵊⵉⵊⴻⵎ ⵛⴰ ⵣⵣⴰⵜ ⵉ ⵡⵓⴷⴻⵎ ⵏⵙⴻⵏ, ⵎⵉⵏⵣⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴷ ⵡⴻⵏⵏⵉ ⴰⴽⵉⴷⴻⴽ ⵉⴳⴳⵓⵔⴻⵏ. ⵏⴻⵜⵜⴰ ⵡⴰⵔ ⴷⴰⵢⴻⴽ ⵉⵙⴻⵎⵎⴻⵃ ⵏⵉⵖ ⵛⴻⴽ ⵉⵜⵜⴻⵊⵊⵉ.” ■ 7 ⵉⵍⴰⵖⴰ ⵎⵓⵙⴰ ⵉ ⵢⴰⵛⵓⵡⴰ, ⵉⵏⵏⴰ ⴰⵙ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵉⵙⵔⴰⵉⵍ: “ⵉⵍⵉ ⴷ ⴰⵔⵢⴰⵣ ⵓ ⵉⵍⵉ ⵜⵎⴻⵃⴹⴻⴷ, ⵎⵉⵏⵣⵉ ⴰⴷ ⵜⴰⴷⴼⴻⴷ ⴰⴽ-ⴷ ⵍⴳⴻⵏⵙ-ⴰ ⵖⴰⵔ ⵜⴻⵎⵎⵓⵔⵜ ⵏⵏⵉ ⵉⵊⵊⵓⴵ ⵙⵉⴷⵉ ⵉ ⵍⴻⵊⴷⵓⴷ ⵏⵙⴻⵏ ⴰⴷ ⴰⵙⴻⵏ ⵜⵜ-ⵉ-ⴷⴷ-ⵉⵡⵛ ⵓⵛⴰ ⵛⴻⴽ ⴰⴷ ⵜⴻⵏ ⵜⴻⵊⵊⴻⴷ ⴰⴷ ⵜⵜ ⵟⵟⴼⴻⵏ ⴷ ⵍⵡⴰⵔⵜ. 8 ⵙⵉⴷⵉ, ⴷ ⵡⴻⵏⵏⵉ ⵢⵓⵢⵓⵔⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ, ⴷ ⵏⴻⵜⵜⴰ ⵉ ⵖⴰ ⵢⵉⵍⵉⵏ ⴰⴽⵉⴷⴻⴽ, ⵡⴰⵔ ⵛⴻⴽ ⵉⵜⵜⴻⵜⵜⵓ ⵛⴰ ⵏⵉⵖ ⴰⴷ ⴷⴰⵢⴻⴽ ⵉⵙⵎⴻⵃ. ⵡⴰⵔ ⵜⵜⴻⴳⴳⵯⴻⴷ ⵓ ⵡⴰⵔ ⵜⵜⴰⵔⵊⵉⵊⵉ.” ■
ⵎⵓⵙⴰ ⵉⵡⵛⴰ ⵛⵛⴰⵔⵉⵄⴰ ⵉ ⴰⵢⵜ ⵏ ⵍⴰⵡⵉ
9 ⵢⵓⵔⴰ ⵎⵓⵙⴰ ⵛⵛⴰⵔⵉⵄⴰ-ⵢⴰ ⵓⵛⴰ ⵉⵡⵛⴰ ⵉ-ⵜⵜ ⵉ ⵉⴽⴻⵀⵀⴰⵏⴻⵏ, ⴰⵢⵜ ⵏ ⵍⴰⵡⵉ, ⵉⵏⵏⵉ ⵢⴰⵔⴱⵓⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ, ⵓ ⵉ ⵎⴰⵔⵔⴰ ⵉⵎⵖⴰⵔⴻⵏ ⵏ ⵉⵙⵔⴰⵉⵍ. 10 ⵎⵓⵙⴰ ⵢⵓⵎⵓⵔ ⵉ-ⵜⴻⵏ, ⵉⵏⵏⴰ: “ⴰⵡⴰⵔⵏⵉ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ, ⴷⵉ ⵍⵡⴻⵇⵜ ⵉⵜⵜⵡⴰⴳⴳⴻⵏ ⵏ ⵓⵙⴻⴳⴳⵯⴰⵙ ⵏ ⵓⴼⴻⴽⴽⵉ ⵏ ⵉⵎⴻⵔⵡⵓⵙⴻⵏ ⴷⵉ ⵍⵄⵉⴷ ⵏ ⵉⵄⵓⵛⵛⵓⵜⴻⵏ, 11 ⵅⵎⵉ ⵖⴰ ⵉⵎⵓⵏ ⵎⴰⵔⵔⴰ ⵉⵙⵔⴰⵉⵍ ⵎⴰⵃⴻⵏⴷ ⴰⴷ ⵉⵃⴹⴰⵔ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴷⴻⴳ ⵡⴻⵎⵛⴰⵏ ⵏⵏⵉ ⵉ ⵖⴰ ⵢⵉⵅⴹⴰⵔ ⵏⴻⵜⵜⴰ, ⴰⴷ ⵜⵖⴰⵔⴻⴷ ⵙ ⵊⵊⴻⵀⴷ ⵛⵛⴰⵔⵉⵄⴰ-ⵢⴰ ⵣⵣⴰⵜ ⵉ ⵎⴰⵔⵔⴰ ⵉⵙⵔⴰⵉⵍ ⴷⴻⴳ ⵉⵎⴻⵣⵣⵓⵖⴻⵏ ⵏⵙⴻⵏ. ■ 12 ⴻⵊⵊ ⴰⴷ ⵉⵎⵓⵏ ⵍⴳⴻⵏⵙ, ⵉⵔⵢⴰⵣⴻⵏ ⴷ ⵜⴻⵎⵖⴰⵔⵉⵏ ⴷ ⵉⵃⴻⵏⵊⵉⵔⴻⵏ ⴷ ⵉⴱⴰⵔⵔⴰⵏⵉⵢⵢⴻⵏ ⵏⵏⵉ ⵉⴵⴰⵏ ⵖⴰⵔ ⴷⴰⵅⴻⵍ ⵏ ⵜⴻⵡⵡⵓⵔⴰ ⵏⵏⴻⵛ ⵃⵉⵎⴰ ⴰⴷ ⵙⵍⴻⵏ ⵓ ⵃⵉⵎⴰ ⴰⴷ ⵍⴻⵎⴷⴻⵏ ⴰⴷ ⴳⴳⵯⴻⴷⴻⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ ⵓⵛⴰ ⴰⴷ ⵃⴹⴰⵏ ⵎⴰⵔⵔⴰ ⴰⵡⴰⵍⴻⵏ ⵏ ⵛⵛⴰⵔⵉⵄⴰ-ⵢⴰ 13 ⵓ ⵃⵉⵎⴰ ⵉⵃⴻⵏⵊⵉⵔⴻⵏ ⵏⵙⴻⵏ, ⵉⵏⵏⵉ ⵡⴰⵔ ⵜⵜ ⵉⵙⵙⵉⵏⴻⵏ, ⴰⴷ ⵙⵍⴻⵏ ⵓⵛⴰ ⴰⴷ ⵍⴻⵎⴷⴻⵏ ⴰⴷ ⴳⴳⵯⴻⴷⴻⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ ⵎⴰⵔⵔⴰ ⵓⵙⵙⴰⵏ ⵏⵏⵉ ⵉ ⵖⴰ ⵜⴻⴷⴷⴰⵔⴻⵎ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏⵏⵉ ⵖⴰⵔ ⵖⴰ ⵜⴻⵥⵡⴰⵎ ⵅ ⵍ’ⵓⵔⴷⵓⵏ ⵎⴰⵃⴻⵏⴷ ⴰⴷ ⵜⵜ ⵜᵉⵟⵟⴼⴻⵎ ⴷ ⵍⵡⴰⵔⵜ.”
ⴰⴱⴰⵔⵔⴻⵃ ⵅ ⵍⵎⵓⵄⵚⵉⵢⵢⴻⵜ ⵉ ⴷⴷ ⵖⴰ ⵢⴰⵙⴻⵏ
14 ⵙⵉⴷⵉ ⵉⵏⵏⴰ ⵉ ⵎⵓⵙⴰ: “ⴰⵇⴰ ⵉⵡⴹⴻⵏ-ⴷⴷ ⵡⵓⵙⵙⴰⵏ ⵏⵏⴻⵛ ⵉ ⴷⵉ ⵖⴰ ⵜⴻⵎⵎⵜⴻⴷ. ⵍⴰⵖⴰ ⵉ ⵢⴰⵛⵓⵡⴰ ⵓ ⵙⴱⴻⴷⴷⴻⵎ ⵉⵅⴻⴼ ⵏⵡⴻⵎ ⴷⴻⴳ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵃⵉⵎⴰ ⴰⴷ ⵜ ⵓⵎⵓⵔⴻⵖ.” ⵎⵓⵙⴰ ⴷ ⵢⴰⵛⵓⵡⴰ ⵔⵓⵃⴻⵏ, ⴱⴻⴷⴷⴻⵏ ⴷⴻⴳ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. 15 ⵅⴻⵏⵏⵉ ⵉⴱⴰⵏ-ⴷⴷ ⵙⵉⴷⵉ ⴷⴻⴳ ⵓⵇⵉⴹⵓⵏ, ⴷⴻⴳ ⵉⵊⵊ ⵏ ⵓⵇⴻⵍⵍⵉⵊ ⵏ ⵓⵙⴻⵢⵏⵓ, ⵓⵛⴰ ⵉⴱⴻⴷⴷ ⵓⵇⴻⵍⵍⵉⵊ ⵏ ⵓⵙⴻⵢⵏⵓ ⵙⴻⵏⵏⴻⵊ ⵉ ⵡⴰⴷⴰⴼ ⵏ ⵓⵇⵉⴹⵓⵏ. 16 ⵙⵉⴷⵉ ⵉⵏⵏⴰ ⵉ ⵎⵓⵙⴰ: “ⴰⵇⴰ ⵛⴻⴽ ⴰⴷ ⵜᵉⵜⵜⵡⴰⵙⵙⵎⵓⵏⴻⴷ ⴰⴽ-ⴷ ⵍⴻⵊⴷⵓⴷ ⵏⵏⴻⵛ ⵓⵛⴰ ⵅⴻⵏⵏⵉ ⵍⴳⴻⵏⵙ-ⴰ ⴰⴷ ⵉⴽⴽⴰⵔ ⴰⴷ ⵉⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ ⴰⵎ ⵖⴰ ⵢⵓⵢⵓⵔ ⴰⵡⴰⵔⵏⵉ ⵉ ⵉⵔⴻⴱⴱⵉⵜⴻⵏ ⵏ ⵉⴱⴰⵔⵔⴰⵏⵉⵢⵢⴻⵏ ⵏ ⵜⴻⵎⵎⵓⵔⵜ ⵏⵏⵉ ⵖⴰⵔ ⵖⴰ ⵢⴰⴷⴻⴼ ⵍⴳⴻⵏⵙ ⴰⵍ ⵍⵡⴻⵙⵟ ⵏⵏⴻⵙ ⵓⵛⴰ ⵍⴳⴻⵏⵙ ⴰⴷ ⴷⴰⵢⵉ ⵉⵙⵎⴻⵃ, ⴰⴷ ⵢⴰⵔⵥ ⵍⵄⴰⵀⴷ ⵉⵏⵓ ⵡⴻⵏⵏⵉ ⴽⵉⴷⵙⴻⵏ ⴳⴳⵉⵖ. 17 ⴷⴻⴳ ⵡⴰⵙⵙ ⵏⵏⵉ ⴰⴷ ⵢⴰⵔⴻⵖ ⵡⴻⵖⴹⴰⴱ ⵉⵏⵓ ⵅ ⵍⴳⴻⵏⵙ ⵓⵛⴰ ⴰⴷ ⵜⴻⵏ ⵊⵊⴻⵖ, ⴰⴷ ⵣⵣⴰⵢⵙⴻⵏ ⴼⴼⴰⵔⴻⵖ ⵓⴷⴻⵎ ⵉⵏⵓ ⵓⵛⴰ ⴰⴷ ⵉⵜⵜⵡⴰⵚⴰⵔⴹ ⵍⴳⴻⵏⵙ ⵓⵛⴰ ⴰⴷ ⵅⴰⵙ ⴷⴷ-ⴰⵙⴻⵏ ⵡⴰⵟⵟⴰⵙ ⵏ ⵉⵛⴻⵍⵡⴰⵡⴻⵏ ⴷ ⵍⴻⵃⵚⴰⵔⴰⵜ, ⴰⵍ ⵖⴰ ⵢⵉⵏⵉ ⵍⴳⴻⵏⵙ ⴷⴻⴳ ⵡⴰⵙⵙ ⵏⵏⵉ: ‘ⵎⴰ ⵡⴰⵔ ⵅⴰⴼⵉ ⴷⴷ-ⵓⵙⵉⵏ ⵉⵛⴻⵍⵡⴰⵡⴻⵏ-ⴰ, ⵎⵉⵏⵣⵉ ⴰⵔⴻⴱⴱⵉ ⵡⴰⵔ ⴽⵉⴷⵉ ⵉⴵⵉ?’ □ 18 ⴷⴻⴳ ⵡⴰⵙⵙ ⵏⵏⵉ ⴰⴷ ⴼⴼⴰⵔⴻⵖ ⵓⴷⴻⵎ ⵉⵏⵓ ⵎⴰⵔⵔⴰ ⴷⵉ ⵙⵙⵉⴱⴱⴻⵜ ⵏ ⵍⵖⴰⵔ ⵏⵏⵉ ⵉⴳⴳⴰ ⵓⵎⵉ ⵉⴷⵡⴻⵍ ⵖⴰⵔ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ. 19 ⵍⴻⵅⵅⵓ ⵅⴻⵏⵏⵉ, ⴰⵔⵉ ⵜⵉⵣⵍⵉⵜ-ⴰ ⵉ ⵢⵉⵅⴻⴼ ⵏⵡⴻⵎ ⵓⵛⴰ ⵙⴻⵍⵎⴻⴷ ⵉ-ⵜⵜ ⵉ ⴰⵢⵜ ⵏ ⵉⵙⵔⴰⵉⵍ, ⴻⴳⴳ ⵉ-ⵜⵜ ⴷⴻⴳ ⵓⵇⴻⵎⵎⵓⵎ ⵏⵙⴻⵏ, ⵃⵉⵎⴰ ⵜⵉⵣⵍⵉⵜ-ⴰ ⴰⴷ ⵜⵉⵍⵉ ⴷ ⴰⵛⴻⵀⵀⴰⴷ ⴷⵉ ⵟⵟⵡⴻⵄ ⵉⵏⵓ ⴹⵉⴷⴷ ⵉ ⵉⵙⵔⴰⵉⵍ, 20 ⵎⵉⵏⵣⵉ ⵏⴻⵛⵛ ⴰⴷ ⵙⵙⵉⴷⴼⴻⵖ ⵍⴳⴻⵏⵙ-ⴰ ⵖⴰⵔ ⵜⴻⵎⵎⵓⵔⵜ ⵏⵏⵉ ⵅ ⵊⵊⵓⴵⴻⵖ ⵉ ⵍⴻⵊⴷⵓⴷ ⵏⵙⴻⵏ ⴰⴷ ⴰⵙⴻⵏ ⵜⵜ ⵡⵛⴻⵖ, ⵉⵛⵜ ⵏ ⵜⴻⵎⵎⵓⵔⵜ ⵉⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ, ⵓⵛⴰ ⴰⴷ ⵛⵛⴻⵏ, ⴰⴷ ⵊⵊⵉⵡⵏⴻⵏ, ⴰⴷ ⴷⴻⵡⵍⴻⵏ ⵇⴱⵓⴱⴱⵣⴻⵏ. ⵅⴻⵏⵏⵉ ⴰⴷ ⴷⴻⵡⵍⴻⵏ ⵖⴰⵔ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ, ⴰⴷ ⵅⴰⵙⴻⵏ ⵙⴻⵅⵅⴰⵔⴻⵏ ⵓⵛⴰ ⴰⴷ ⴰⵢⵉ ⵙⵙⴷⵓⵇⵣⴻⵏ, ⴰⴷ ⴰⵔⵥⴻⵏ ⵍⵄⴰⵀⴷ ⵉⵏⵓ. 21 ⵓⵛⴰ ⴰⴷ ⵉⵎⵙⴰⵔ ⵓⵎⵉ ⴷ ⴰⵙ ⴷⴷ-ⵓⵙⵉⵏ ⵉ ⵍⴳⴻⵏⵙ-ⴰ ⴰⵟⵟⴰⵙ ⵏ ⵉⵛⴻⵍⵡⴰⵡⴻⵏ ⴷ ⵍⴻⵃⵚⴰⵔⴰⵜ, ⴰⵇⴰ ⵅⴻⵏⵏⵉ ⵉⵣⵍⵉ-ⵢⴰ ⴰⴷ ⴷⴷ-ⵜⴰⵔⵔ ⴷⴻⴳ ⵡⵓⴷⴻⵎ ⵏⵏⴻⵙ ⴰⵎ ⵢⵉⵊⵊ ⵏ ⵓⵛⴻⵀⵀⴰⴷ, ⵎⵉⵏⵣⵉ ⵡⴰⵔ ⵜᵉⵜⵜⵉⵍⵉ ⵜᵉⵜⵜⵡⴰⵜⵜⵓ ⵣⴻⴳ ⵓⵇⴻⵎⵎⵓⵎ ⵏ ⵜⴰⵔⵡⴰ ⵏⵏⴻⵙ, ⵎⵉⵏⵣⵉ ⵏⴻⵛⵛ ⵙⵙⵏⴻⵖ ⴰⵅⴰⵔⵔⴻⵚ ⵏⵏⵉ ⵉⵃⴻⵟⵟⴰ ⵄⴰⴷ ⴰⵙⵙ-ⴰ ⴷⵉ ⴷⴰⵅⴻⵍ ⵏⵏⴻⵙ, ⵇⴱⴻⵍ ⵎⴰ ⴰⴷ ⵜ ⵙⵙⵉⴷⴼⴻⵖ ⴷⵉ ⵜⴻⵎⵎⵓⵔⵜ ⵏⵏⵉ ⵅ ⵊⵊⵓⴵⴻⵖ ⴰⴷ ⴰⵙⴻⵏ ⵜⵜ ⵡⵛⴻⵖ.” □
22 ⴷⴻⴳ ⵡⴰⵙⵙ ⵏⵏⵉ ⵢⵓⵔⴰ ⵎⵓⵙⴰ ⵜⵉⵣⵍⵉⵜ-ⴰ ⵓⵛⴰ ⵉⵙⵙⴻⵍⵎⴻⴷ ⵉ-ⵜⵜ ⵉ ⴰⵢⵜ ⵏ ⵉⵙⵔⴰⵉⵍ. 23 ⵓⵛⴰ ⵏⴻⵜⵜⴰ ⵢⵓⵎⵓⵔ ⵉ ⵢⴰⵛⵓⵡⴰ, ⵎⵎⵉⵙ ⵏ ⵏⵓⵏ, ⵉⵏⵏⴰ: “ⵉⵍⵉ ⴷ ⴰⵔⵢⴰⵣ, ⵉⵍⵉ ⵜⵎⴻⵃⴹⴻⴷ, ⵎⵉⵏⵣⵉ ⴰⴷ ⵜⴻⵙⵙⵉⴷⴼⴻⴷ ⴰⵢⵜ ⵏ ⵉⵙⵔⴰⵉⵍ ⴷⵉ ⵜⴻⵎⵎⵓⵔⵜ ⵏⵏⵉ ⵅ ⴷ ⴰⵙⴻⵏ ⵊⵊⵓⴵⴻⵖ ⵎⴰⵃⴻⵏⴷ ⴰⴷ ⴰⵙⴻⵏ ⵜⵜ ⵡⵛⴻⵖ ⵓⵛⴰ ⵏⴻⵛⵛ ⴰⴷ ⴰⴽⵉⴷⴻⴽ ⵉⵍⵉⵖ.” ■
24 ⵓⵛⴰ ⵉⵎⵙⴰⵔ ⵓⵎⵉ ⵉⴽⴻⵎⵎⴻⵍ ⵎⵓⵙⴰ ⵜⵉⵔⴰ ⵏ ⵡⴰⵡⴰⵍⴻⵏ ⵏ ⵛⵛⴰⵔⵉⵄⴰ-ⵢⴰ ⴷⴻⴳ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ, ⴰⵍ ⴰⵏⴻⴳⴳⴰⵔ ⵏⵙⴻⵏ, 25 ⴰⵇⴰ ⵎⵓⵙⴰ ⵢⵓⵎⵓⵔ ⵉⵍⴰⵡⵉⵢⵢⴻⵏ ⵏⵏⵉ ⵢⴰⵔⴱⵓⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ, ⵉⵏⵏⴰ: 26 “ⴽⵙⵉⵎ ⴰⴷⵍⵉⵙ-ⴰ ⵉⵜⵜⵡⴰⵏⴹⴻⵏ ⵏ ⵛⵛⴰⵔⵉⵄⴰ ⵓⵛⴰ ⵜⴻⴳⴳⴻⵎ ⵜ ⵣⵣⴰⵜ ⵉ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⵎⴰⵃⴻⵏⴷ ⴰⴷ ⴷⵉⵏ ⵢⵉⵍⵉ ⴷ ⴰⵛⴻⵀⵀⴰⴷ ⴹⵉⴷⴷ ⵏⵡⴻⵎ, ■ 27 ⵎⵉⵏⵣⵉ ⵏⴻⵛⵛ ⵙⵙⵏⴻⵖ ⴰⵖⴻⵡⵡⴻⵖ ⵏⵡⴻⵎ ⴷ ⵜⵖⴻⵏⵏⴰⵏⵜ ⵏⵡⴻⵎ. ⵅⵣⴰⵔ, ⵓⵎⵉ ⵏⴻⵛⵛ ⴷⴷⴰⵔⴻⵖ ⵄⴰⴷ ⴰⴽⵉⴷⵡⴻⵎ ⴰⵙⵙ-ⴰ, ⴽⴻⵏⵏⵉⵡ ⴰⵇⴰ ⵜⵖⴻⵡⵡⵖⴻⵎ ⵅ ⵙⵉⴷⵉ, ⵎⴻⵛⵃⴰⵍ ⵄⴰⴷ ⴽⵜⴰⵔ ⵉ ⵖⴰ ⵜⴻⴳⴳⴻⵎ ⴰⵡⴰⵔⵏⵉ ⵉ ⵍⵎⴻⵡⵜ ⵉⵏⵓ! 28 ⵙⵎⵓⵏⴻⵎ-ⴷⴷ ⵖⴰⵔⵉ ⵎⴰⵔⵔⴰ ⵉⵎⵖⴰⵔⴻⵏ ⵏ ⵜⵇⴻⴱⴱⴰⵍ ⵏⵡⴻⵎ ⴷ ⵉⵎⴻⵃⴹⴰⵢⴻⵏ ⵏⵡⴻⵎ, ⵅⴻⵏⵏⵉ ⴰⴷ ⵙⵙⵉⵡⵍⴻⵖ ⴰⵡⴰⵍⴻⵏ-ⴰ ⴷⴻⴳ ⵉⵎⴻⵣⵣⵓⵖⴻⵏ ⵏⵙⴻⵏ ⵓⵛⴰ ⴰⴷ ⴳⴳⴻⵖ ⴰⵊⴻⵏⵏⴰ ⴷ ⵜⴻⵎⵎⵓⵔⵜ ⴷ ⵍⴻⵛⵀⵓⴷ ⴹⵉⴷⴷ ⵏⵙⴻⵏ. 29 ⵎⵉⵏⵣⵉ ⵏⴻⵛⵛ ⵙⵙⵏⴻⵖ ⴰⵇⴰ ⴰⵡⴰⵔⵏⵉ ⵍⵎⴻⵡⵜ ⵉⵏⵓ ⴰⴷ ⵜⴼⴻⵙⴷⴻⵎ ⴰⵍ ⵟⵟⴰⵔⴼ ⵓⵛⴰ ⴰⴷ ⵜⴻⴼⴼⵖⴻⵎ ⵅ ⵡⴻⴱⵔⵉⴷ ⵏⵏⵉ ⵅ ⴽⴻⵏⵏⵉⵡ ⵓⵎⵓⵔⴻⵖ. ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ, ⴰⴷ ⵜⴻⴳⴳⴻⵎ ⵍⵖⴰⵔ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ ⴰⵍ ⵖⴰ ⵜ ⵜⴻⵙⵄⴰⵔⴻⵎ ⵙ ⵍⵅⴻⴷⵎⴻⵜ ⵉ ⵜⴻⴳⴳⵉⵎ ⵙ ⵉⴼⴰⵙⵙⴻⵏ ⵏⵡⴻⵎ.”
30 ⵅⴻⵏⵏⵉ ⵉⵙⵙⵉⵡⴻⵍ ⵎⵓⵙⴰ ⴷⴻⴳ ⵉⵎⴻⵣⵣⵓⵖⴻⵏ ⵏ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ ⵏ ⵉⵙⵔⴰⵉⵍ ⵙ ⵡⴰⵡⴰⵍⴻⵏ ⵏ ⵜⵉⵣⵍⵉⵜ-ⴰ ⴰⵍⴰⵎⵉ ⵜⴻⵏ ⵉⴽⴻⵎⵎⴻⵍ.