ⵜⴰⵙⵖⴰⵔⵜ ⵏ ⵍⵡⴰⵔⵜ ⵉ ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ
36
1 ⵣⵉ ⵍⴰⴵⴰⵜ ⵏ ⵉⵃⴻⵏⵊⵉⵔⴻⵏ ⵏ ⵢⵓⵙⵓⴼ ⵇⴰⵔⵔⴱⴻⵏ-ⴷⴷ ⵉⵣⴻⴵⵉⴼⴻⵏ ⵊⴰⵔ ⵉⴱⴰⴱⴰⵜⴻⵏ ⵏ ⵍⴰⴵ ⵏ ⵉⵃⴻⵏⵊⵉⵔⴻⵏ ⵏ ⵊⵉⵍⵄⴰⴷ, ⵎⵎⵉⵙ ⵏ ⵎⴰⴽⵉⵔ, ⵎⵎⵉⵙ ⵏ ⵎⴰⵏⴰⵙⵙⴰ ⵓⵛⴰ ⵏⵉⵜⵏⵉ ⵙⵙⵉⵡⵍⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵎⵓⵙⴰ ⵓ ⵣⵣⴰⵜ ⵉ ⵡⵓⴷⴻⵎ ⵏ ⵍⵃⵓⴽⴽⴰⵎ, ⵉⵣⴻⴵⵉⴼⴻⵏ ⵏⵏⴻⵖⵏⵉ ⵅ ⵉⴱⴰⴱⴰⵜⴻⵏ ⵏ ⵍⴰⴵⴰⵜ ⵏ ⴰⵢⵜ ⵏ ⵉⵙⵔⴰⵉⵍ 2 ⵓⵛⴰ ⵏⵉⵜⵏⵉ ⵏⵏⴰⵏ: “ⵙⵉⴷⵉ ⵢⵓⵎⵓⵔ ⵙⵉⴷⵉ ⵉⵏⵓ ⵎⴰⵃⴻⵏⴷ ⴰⴷ ⵉⵡⵛ ⵜⴰⵎⵎⵓⵔⵜ ⵙ ⵜⵇⴻⴷⴷⵓⵃⵜ ⵉ ⴰⵢⵜ ⵏ ⵉⵙⵔⴰⵉⵍ ⴷ ⵍⵡⴰⵔⵜ. ⵓⵛⴰ ⵢⵓⵎⵓⵔ ⵙⵉⴷⵉ ⵉ ⵙⵉⴷⵉ ⵉⵏⵓ ⴰⴷ ⵉⵡⵛ ⵜⴰⵙⵖⴰⵔⵜ ⵏ ⵍⵡⴰⵔⵜ ⵏ ⵓⵎⴰⵜⵏⴻⵖ ⵚⴰⵍⵓⴼⵃⴰⴷ ⵉ ⵢⴻⵙⵙⵉⵙ. ■ 3 ⵎⴰⵍⴰ ⴷⴻⵡⵍⴻⵏⵜ ⵏⵉⵜⴻⵏⵜⵉ ⴷ ⵜⵉⵏⴻⵎⵍⴰⵍⵜ ⴰⴽ-ⴷ ⵉⵊⵊⴻⵏ ⵣⴻⴳ ⵉⵃⴻⵏⵊⵉⵔⴻⵏ ⵏ ⵜⵇⴻⴱⴱⴰⵍ ⵏⵏⴻⵖⵏⵉ ⵏ ⴰⵢⵜ ⵏ ⵉⵙⵔⴰⵉⵍ, ⵅⴻⵏⵏⵉ ⴰⴷ ⵜᵉⵜⵜⵡⴰⴽⴽⴻⵙ ⵜⴻⵙⵖⴰⵔⵜ ⵏⵙⴻⵏⵜ ⴷⵉ ⵍⵡⴰⵔⵜ ⵏ ⵍⴻⵊⴷⵓⴷ ⵏⵏⴻⵖ ⵓⵛⴰ ⴰⴷ ⵜᵉⵜⵜⵡⴰⵔⵏⵉ ⵜⴰⵙⵖⴰⵔⵜ ⵏⵙⴻⵏⵜ ⵉ ⵜⴻⵙⵖⴰⵔⵜ ⵏ ⵜⴻⵇⴱⵉⵍⵜ ⵉ ⵖⴰⵔ ⵖⴰ ⵎⵓⵏⴻⵏⵜ ⵓⵛⴰ ⴰⵎⵎⵓ ⴰⴷ ⵉⵜⵜⵡⴰⵙⵙⴻⵎⵥⵉ ⵎⵉⵏ ⵉⴵⴰⵏ ⴷ ⵜⴰⵙⵖⴰⵔⵜ ⵏⵏⴻⵖ ⵙ ⵜⵇⴻⴷⴷⵓⵃⵜ. 4 ⵅⵎⵉ ⴷⴷ ⵖⴰ ⵢⴰⵙ ⵓⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ ⵉ ⴰⵢⵜ ⵏ ⵉⵙⵔⴰⵉⵍ, ⵅⴻⵏⵏⵉ ⴰⴷ ⵜᵉⵜⵜⵡⴰⵎⴰⵔⵏⵉ ⵜⴻⵙⵖⴰⵔⵜ ⵏⵙⴻⵏⵜ ⵉ ⵜⴻⵙⵖⴰⵔⵜ ⵏ ⵜⴻⵇⴱⵉⵍⵜ ⴰⴽ-ⴷ ⵡⵉ ⵖⴰ ⵎⵓⵏⴻⵏⵜ. ⴰⵎⵎⵓ ⵉ ⵖⴰ ⵜᵉⵜⵜⵡⴰⴽⴽⴻⵙ ⵅⴻⵏⵏⵉ ⵜⴻⵙⵖⴰⵔⵜ ⵏⵙⴻⵏⵜ ⴷⵉ ⵍⵡⴰⵔⵜ ⵏ ⵜⴻⵇⴱⵉⵍⵜ ⵏ ⵍⴻⵊⴷⵓⴷ ⵏⵏⴻⵖ.” 5 ⵅⴻⵏⵏⵉ ⵢⵓⵎⵓⵔ ⵎⵓⵙⴰ ⵉ ⴰⵢⵜ ⵏ ⵉⵙⵔⴰⵉⵍ ⵄⵍⴰⵃⵙⴰⴱ ⵍⵓⵎⵓⵔ ⵏ ⵙⵉⴷⵉ, ⵉⵏⵏⴰ: “ⴰⵇⴰ ⴷ ⵜⵉⴷⴻⵜⵜ ⴰⵎ ⵎⴰⵎⵎⴻⵛ ⵜⴻⵙⵙⵉⵡⴻⵍ ⵜⴻⵇⴱⵉⵍⵜ ⵏ ⴰⵢⵜ ⵏ ⵢⵓⵙⵓⴼ. 6 ⵡⴰ ⴷ ⴰⵡⴰⵍ ⵉ ⵣⵉ ⵢⵓⵎⵓⵔ ⵙⵉⴷⵉ ⵅ ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ, ⵉⵇⵇⴰⵔ: ‘ⴻⵊⵊ ⵉ-ⵜⴻⵏⵜ ⴰⴷ ⵎⴻⵍⵛⴻⵏⵜ ⴰⴽ-ⴷ ⵡⴻⵏⵏⵉ ⴷ ⴰⵙⴻⵏⵜ ⵢⴰⵔⴻⵛⵇⴻⵏ. ⵉⵜⵜⵅⴻⵚⵚⴰ ⵎⵖⵉⵔ ⴰⴷ ⵎⴻⵍⵛⴻⵏⵜ ⴷⵉ ⵍⴰⴵ ⵏ ⵜⴻⵇⴱⵉⵍⵜ ⵏ ⴱⴰⴱⴰⵜⵙⴻⵏⵜ. 7 ⵡⴰⵔ ⵉⵄⴻⴷⴷⴻⵍ ⴰⴷ ⵜⵔⴰⵃ ⵜⴻⵙⵖⴰⵔⵜ ⵏ ⴰⵢⵜ ⵏ ⵉⵙⵔⴰⵉⵍ ⵣⵉ ⵜⴻⵇⴱⵉⵍⵜ ⵖⴰⵔ ⵜⴻⵇⴱⵉⵍⵜ ⵏⵏⴻⵖⵏⵉ, ⵎⵉⵏⵣⵉ ⴽⵓⵍ ⴰⵔⵢⴰⵣ ⵏ ⴰⵢⵜ ⵏ ⵉⵙⵔⴰⵉⵍ ⴰⴷ ⵉⵇⵇⵉⵎ ⵉⵟⵟⴻⴼ ⴷⵉ ⵜⴻⵙⵖⴰⵔⵜ ⵏ ⵜⴻⵇⴱⵉⵍⵜ ⵏ ⵍⴻⵊⴷⵓⴷ ⵏⵏⴻⵙ. 8 ⵢⴻⴵⵉⵙ ⵏ ⴽⵓⵍ ⵉⵊⵊ ⵉ ⵖⴰ ⵉⵟⵟⴼⴻⵏ ⵉⵛⵜ ⵏ ⵜⴻⵙⵖⴰⵔⵜ ⵣⴻⴳ ⴰⵢⵜ ⵏ ⵉⵙⵔⴰⵉⵍ, ⵉⵜⵜⵅⴻⵚⵚⴰ ⴰⵙ ⴰⴷ ⵜⴻⵎⵍⴻⵛ ⴰⴽ-ⴷ ⵉⵊⵊ ⵣⴻⴳ ⵉⵊⵊ ⵏ ⵍⴰⴵ ⵣⵉ ⵜⴻⵇⴱⵉⵍⵜ ⵏ ⴱⴰⴱⴰⵙ, ⵃⵉⵎⴰ ⴽⵓⵍ ⵉⵊⵊ ⵣⴻⴳ ⴰⵢⵜ ⵏ ⵉⵙⵔⴰⵉⵍ ⴰⴷ ⵉⵡⴰⵔⵜ ⵜⴰⵙⵖⴰⵔⵜ ⵏ ⵍⴻⵊⴷⵓⴷ ⵏⵏⴻⵙ. □ 9 ⵡⴰⵔ ⵉⵄⴻⴷⴷⴻⵍ ⴰⴷ ⵜⵔⴰⵃ ⵜⴻⵙⵖⴰⵔⵜ ⵏ ⵉⵛⵜ ⵏ ⵜⴻⵇⴱⵉⵍⵜ ⵖⴰⵔ ⵜⴻⵇⴱⵉⵍⵜ ⵏⵏⴻⵖⵏⵉ, ⵎⵉⵏⵣⵉ ⵉⵜⵜⵅⴻⵚⵚⴰ ⵉ ⴽⵓⵍ ⵉⵛⵜ ⵣⵉ ⵜⵇⴻⴱⴱⴰⵍ ⵏ ⴰⵢⵜ ⵏ ⵉⵙⵔⴰⵉⵍ ⴰⴷ ⵉⵇⵇⵉⵎ ⵉⵟⵟⴻⴼ ⴷⵉ ⵜⴻⵙⵖⴰⵔⵜ ⵏⵏⴻⵙ.’ ”
10 ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ ⴳⴳⵉⵏⵜ ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⵙⵉⴷⵉ ⵉ ⵎⵓⵙⴰ. 11 ⵎⴰⵃⵍⴰ, ⵜⵉⵔⵚⴰ, ⵃⵓⵊⵍⴰ, ⵎⵉⵍⴽⴰ ⴷ ⵏⵓⵄⴰ, ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ, ⴷⴻⵡⵍⴻⵏⵜ ⴷ ⵜⵉⵏⴻⵎⵍⴰⵍⵜ ⴰⴽ-ⴷ ⵉⵃⴻⵏⵊⵉⵔⴻⵏ ⵏ ⵄⴻⵎⵎⵉⵜⵙⴻⵏⵜ. ■ 12 ⴷⴻⵡⵍⴻⵏⵜ ⴷ ⵜⵉⵏⴻⵎⵍⴰⵍⵜ ⴷⵉ ⵍⴰⴵⴰⵜ ⵏ ⴰⵢⵜ ⵏ ⵎⴰⵏⴰⵙⵙⴰ, ⵎⵎⵉⵙ ⵏ ⵢⵓⵙⵓⴼ. ⴰⵎⵎⵓ ⵉ ⵜⴻⵇⵇⵉⵎ ⵜⴻⵙⵖⴰⵔⵜ ⵏⵙⴻⵏⵜ ⴷⵉ ⵜⴻⵇⴱⵉⵍⵜ ⵏ ⴱⴰⴱⴰⵜⵙⴻⵏⵜ.
13 ⵜⵉⵏⴰ ⴷ ⵜⵉⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵏⵏⵉ ⵢⵓⵎⵓⵔ ⵙⵉⴷⵉ ⵙ ⵜⵙⴻⵅⵅⴰⵔⵜ ⵏ ⵎⵓⵙⴰ ⵉ ⴰⵢⵜ ⵏ ⵉⵙⵔⴰⵉⵍ ⴷⵉ ⵍⴻⵡⴹⴰⵜ ⵏ ⵎⵓ’ⴰⴱ, ⵖⴰⵔ ⵍ’ⵓⵔⴷⵓⵏ ⴰⵔⴻⵏⴷⴰⴷ ⵏ ⴰⵔⵉⵃⴰ.