ⵉⵙⵔⴰⵉⵍ ⴷ ⵍ’ⴰⵚⵏⴰⵎ ⵏ ⵢⴻⵙⵙⵉⵙ ⵏ ⵎⵓ’ⴰⴱ
25
1 ⵉⵣⴷⴻⵖ ⵉⵙⵔⴰⵉⵍ ⴷⵉ ⵛⵉⵟⵟⵉⵎ ⵓⵛⴰ ⵉⴱⴷⴰ ⵍⴳⴻⵏⵙ ⴰⴷ ⵉⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ ⴰⴽ-ⴷ ⵢⴻⵙⵙⵉⵙ ⵏ ⵎⵓ’ⴰⴱ. ■ 2 ⵄⴰⵔⴹⴻⵏ-ⴷⴷ ⵍⴳⴻⵏⵙ ⵖⴰⵔ ⵜⵖⴰⵔⵚⵉ ⵏ ⵉⵔⴻⴱⴱⵉⵜⴻⵏ ⵏⵙⴻⵏⵜ ⵓⵛⴰ ⵍⴳⴻⵏⵙ ⵉⵛⵛⴰ ⵣⵣⴰⵢⵙⴻⵏⵜ, ⵓⵛⴰ ⵏⵉⵜⵏⵉ ⴱⴻⵏⴷⵇⴻⵏ ⵉ ⵉⵔⴻⴱⴱⵉⵜⴻⵏ ⵏⵙⴻⵏⵜ. ■ 3 ⴰⵎⵎⵓ ⵉⵎⵓⵏ ⵍⴳⴻⵏⵙ ⴰⴽ-ⴷ ⴱⴰⵄⵍ-ⴼⴰⵖⵓⵔ ⵓⵛⴰ ⵢⴰⵔⵖⴰ ⵡⴻⵖⴹⴰⴱ ⵏ ⵙⵉⴷⵉ ⵅ ⵉⵙⵔⴰⵉⵍ. ■ 4 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴽⵙⵉ ⵎⴰⵔⵔⴰ ⵉⵔⵢⴰⵣⴻⵏ ⵏⵏⵉ ⵉⴵⴰⵏ ⴷ ⵉⵣⴻⴵⵉⴼⴻⵏ ⵏ ⵍⴳⴻⵏⵙ ⵓⵛⴰ ⴰⵢⴻⵍ ⵉ-ⵜⴻⵏ ⵣⵣⴰⵜ ⵉ ⵙⵉⴷⵉ ⴷⵉ ⵜⴼⵓⵛⵜ ⵉⵃⴰⵔⵔⴻⵏ, ⵅⴻⵏⵏⵉ ⴰⴷ ⵉⴳⴳⵯⴻⵊ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏ ⵙⵉⴷⵉ ⵅ ⵉⵙⵔⴰⵉⵍ.” ■ 5 ⵅⴻⵏⵏⵉ ⵉⵏⵏⴰ ⵎⵓⵙⴰ ⵉ ⵍⵇⵓⴹⴰⵜ ⵏ ⵉⵙⵔⴰⵉⵍ: “ⴻⵊⵊ ⴽⵓⵍ ⵉⵊⵊ ⴰⴷ ⵉⵏⴻⵖ ⵉⵏⵏⵉ ⵣⵉ ⵊⴰⵔ ⵢⴻⵔⵢⴰⵣⴻⵏ ⵏⵏⴻⵙ ⵉ ⵉⵎⵓⵏⴻⵏ ⴰⴽ-ⴷ ⴱⴰⵄⵍ-ⴼⴰⵖⵓⵔ!”
6 ⵓⵛⴰ ⵅⵣⴰⵔ, ⵉⵊⵊ ⵏ ⵡⴻⵔⵢⴰⵣ ⵣⴻⴳ ⴰⵢⵜ ⵏ ⵉⵙⵔⴰⵉⵍ ⵢⵓⵙⴰ-ⴷⴷ ⵓⵛⴰ ⵏⴻⵜⵜⴰ ⵢⵉⵡⵉ-ⴷⴷ ⵉⵛⵜ ⵏ ⵜⴻⵎⵖⴰⵔⵜ ⵜⵎⵉⴷⵉⵢⴰⵏⴻⵛⵜ ⵖⴰⵔ ⴰⵢⵜⵎⴰⵙ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⵓⵙⴰ ⵓ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ, ⴰⵎ ⵜⵜⵔⵓⵏ ⵏⵉⵜⵏⵉ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. 7 ⵉⵥⵔⴰ ⵉ-ⵜ ⴼⵉⵏⴰⵃⴰⵙ, ⵎⵎⵉⵙ ⵏ ⴰⵍⵉⵄⴰⵣⴰⵔ, ⵎⵎⵉⵙ ⵏ ⵀⴰⵔⵓⵏ. ⵏⴻⵜⵜⴰ ⵉⴽⴽⴰⵔ ⵣⵉ ⵍⵡⴻⵙⵟ ⵏ ⵜⵎⴻⵙⵎⵓⵏⵜ, ⵉⴽⵙⵉ ⵉⵊⵊ ⵏ ⵓⵃⵔⵉⵛ ⴷⴻⴳ ⵓⴼⵓⵙ ⵏⵏⴻⵙ ■ 8 ⵓⵛⴰ ⵉⵔⵓⵃ ⴰⵡⴰⵔⵏⵉ ⵉ ⵡⴻⵔⵢⴰⵣ ⵣⵉ ⵉⵙⵔⴰⵉⵍ ⵖⴰⵔ ⵓⵇⵉⴹⵓⵏ ⵙ ⵍⵇⵓⴱⴱⴻⵜ ⵓⵛⴰ ⵉⵙⵙⵏⵓⵇⵇⴻⴱ ⵉ-ⵜⴻⵏ ⵙ ⵜⵏⴰⵢⴻⵏ, ⴰⵎ ⵡⴻⵔⵢⴰⵣ ⵏⵏⵉ ⵣⵉ ⵉⵙⵔⴰⵉⵍ, ⴰⵎ ⵜⴻⵎⵖⴰⵔⵜ ⵙ ⵓⵄⴻⴷⴷⵉⵙ ⵏⵏⴻⵙ. ⵅⴻⵏⵏⵉ ⵜⴱⴻⴷⴷ ⵊⵊⵔⵉⵃⴻⵛⵜ ⵅ ⴰⵢⵜ ⵏ ⵉⵙⵔⴰⵉⵍ. 9 ⵓⵛⴰ ⵎⵎⵓⵜⴻⵏ ⴷⵉ ⵊⵊⵔⵉⵃⴻⵛⵜ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵉⵡⴷⴰⵏ. ■
10 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
11 “ⴼⵉⵏⴻⵃⴰⵙ, ⵎⵎⵉⵙ ⵏ ⴰⵍⵉⵄⴰⵣⴰⵔ, ⵎⵎⵉⵙ ⵏ ⵀⴰⵔⵓⵏ, ⴰⴽⴻⵀⵀⴰⵏ, ⵉⵙⵙⴻⴳⴳⵡⴻⵊ ⴰⵙⵄⴰⵔ ⵉⵏⵓ ⵅ ⴰⵢⵜ ⵏ ⵉⵙⵔⴰⵉⵍ, ⵎⵉⵏⵣⵉ ⵏⴻⵜⵜⴰ ⵜⵓⵖⴰ ⵉⵎⵃⴻⴹ ⴰⵟⵟⴰⵙ ⴷⵉ ⵍⵡⴻⵙⵟ ⵏⵙⴻⵏ ⴷⵉ ⵟⵟⵡⴻⵄ ⵏ ⵜⵓⵙⵎⵉ ⵉⵏⵓ ⵉⵇⴻⴷⴷⵙⴻⵏ, ⴰⵍⴰⵎⵉ ⵏⴻⵛⵛ ⵡⴰⵔ ⵀⴷⵉⵊⴻⵖ ⵄⴰⴷ ⴰⴷ ⵜⴻⵃⵃⵉⵖ ⴰⵢⵜ ⵏ ⵉⵙⵔⴰⵉⵍ ⴷⵉ ⵍⵡⴻⵇⵜ ⵏ ⵜⵓⵙⵎⵉ ⵉⵏⵓ ⵉⵇⴻⴷⴷⵙⴻⵏ. ■ 12 ⵙ ⵓⵢⴰ ⵉⵏⵉ: ‘ⵅⵥⴰⵔ, ⵏⴻⵛⵛ ⴰⴷ ⴰⵙ ⵡⵛⴻⵖ ⵍⵄⴰⵀⴷ ⵉⵏⵓ ⵏ ⵍⴻⵀⵏⴰ. ■ 13 ⵉ ⵏⴻⵜⵜⴰ ⵓ ⵉ ⵣⵣⴰⵔⵉⵄⴻⵜ ⵏⵏⴻⵙ ⴰⵡⴰⵔⵏⵉ ⴰⵙ ⴰⴷ ⵖⴰⵔⵙⴻⵏ ⵢⵉⵍⵉ ⵍⵄⴰⵀⴷ ⵏ ⵜⵓⴽⴻⵀⵀⴰⵏⵜ ⵉ ⵍⴻⴱⴷⴰ, ⵎⵉⵏⵣⵉ ⵏⴻⵜⵜⴰ ⵜⵓⵖⴰ ⵉⵎⵃⴻⴹ ⴷⵉ ⵟⵟⵡⴻⵄ ⵏ ⴰⵔⴻⴱⴱⵉ ⵏⵏⴻⵙ ⵓⵛⴰ ⵉⴳⴳⴰ ⴰⵚⵍⴰⵃ ⴷⵉ ⵟⵟⵡⴻⵄ ⵏ ⴰⵢⵜ ⵏ ⵉⵙⵔⴰⵉⵍ.’ ”
14 ⵉⵙⴻⵎ ⵏ ⵡⴻⵔⵢⴰⵣ ⵏ ⵉⵙⵔⴰⵉⵍ ⵏⵏⵉ ⵉⵏⵖⴰ ⴼⵉⵏⴻⵃⴰⵙ, ⵉ ⵜⵓⵖⴰ ⵉⵜⵜⵡⴰⵏⴻⵖ ⵊⵎⵉⵄ ⴰⴽ-ⴷ ⵜⴻⵎⵖⴰⵔⵜ ⵜⴰⵎⵉⴷⵢⴰⵏⴻⵛⵜ, ⵜⵓⵖⴰ-ⵜ ⴷ ⵣⵉⵎⵔⵉ, ⵎⵎⵉⵙ ⵏ ⵙⴰⵍⵓ, ⵉⵊⵊ ⵏ ⵍⵃⴰⴽⴻⵎ ⵅ ⵜⴰⴷⴷⴰⵔⵜ ⵏ ⴱⴰⴱⴰⵜⵙⴻⵏ, ⵅ ⵉⵛⵉⵎⵄⵓⵏⵉⵢⵢⴻⵏ. 15 ⵉⵙⴻⵎ ⵏ ⵜⴻⵎⵖⴰⵔⵜ ⵜⴰⵎⵉⴷⵢⴰⵏⵉⵛⵜ ⵉ ⵜⵓⵖⴰ ⵉⵜⵜⵡⴰⵏⵖⴻⵏ ⵜⵓⵖⴰ-ⵜⵜ ⴽⵓⵣⴱⵉ, ⵢⴻⴵⵉⵙ ⵏ ⵚⵓⵔ, ⵡⴻⵏⵏⵉ ⴷ ⵉⵊⵊ ⵏ ⵓⵣⴻⴵⵉⴼ ⵅ ⵜⵇⴻⴱⴱⴰⵍⵜ ⵏ ⵜⴰⴷⴷⴰⵔⵜ ⵏ ⵉⵊⵊ ⵏ ⵜⴱⴰⴱⴰⵜ ⵏ ⵉⵎⵉⴷⵢⴰⵏⵉⵢⵢⴻⵏ.
16 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
17 “ⵃⵚⴰⵔⴻⵎ ⵅ ⵉⵎⵉⴷⵢⴰⵏⵉⵢⵢⴻⵏ ⵓⵛⴰ ⵖⴻⵍⵍⴱⴻⵎ ⵅⴰⵙⴻⵏ,■ 18 ⵎⵉⵏⵣⵉ ⵏⵉⵜⵏⵉ ⵃⵚⴰⵔⴻⵏ ⴽⴻⵏⵏⵉⵡ ⵙ ⵜⴻⵃⵔⴰⵢⵎⴻⵛⵜ ⵏⵙⴻⵏ ⵙ ⵎⵉⵏⵣⵉ ⴽⴻⵏⵏⵉⵡ ⵣⴻⵍⵖⴻⵏ ⵣⵉ ⵊⵊⵉⵀⴻⵜ ⵏ ⴼⴰⵖⵓⵔ ⴷ ⴽⵓⵣⴱⵉ, ⵢⴻⴵⵉⵙ ⵏ ⵍⵃⴰⴽⴻⵎ ⵏ ⵎⵉⴷⵢⴰⵏ, ⵓⵍⵜⵎⴰⵜⵙⴻⵏ, ⵜⴻⵏⵏⵉ ⵉⵜⵜⵡⴰⵏⵖⴻⵏ ⴷⴻⴳ ⵡⴰⵙⵙ ⵏ ⵊⵊⵔⵉⵃⴻⵛⵜ ⴷⵉ ⵙⵙⵉⴱⴱⴻⵜ ⵏ ⴼⴰⵖⵓⵔ.” ■
19 ⵓⵛⴰ ⴰⵡⴰⵔⵏⵉ ⵉ ⵊⵊⵔⵉⵃⴻⵛⵜ ⵉⵎⵙⴰⵔ ⵎⵉⵏ ⴷⴷ-ⵉⴳⴳⵓⵔⴻⵏ.