ⵊⵊⵔⵉⵃⴻⵛⵜ ⵉⵏⴻⵇⵇⴻⵏ
17
1 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ: 2 “ⵉⵏⵉ ⵉ ⴰⵍⵉⵄⴰⵣⴰⵔ, ⵎⵎⵉⵙ ⵏ ⵓⴽⴻⵀⵀⴰⵏ ⵀⴰⵔⵓⵏ, ⴱⴻⵍⵍⵉ ⴰⴷ ⵉⴽⵙⵉ ⵜⵉⵎⴻⵊⵎⴰⵔⵉⵏ ⵣⴻⴳ ⵓⵃⴰⴷⵓⵇ ⵏ ⵜⵎⴻⵙⵙⵉ ⵓⵛⴰ ⴰⴷ ⵉⵙⵙⵓⵢⴻⵙ ⵎⵉⵏ ⵉⵇⵇⵉⵎⴻⵏ ⵏ ⵜⵎⴻⵙⵙⵉ ⴷⵉ ⵍⴰⴳⴳⵯⴰⵊ, ⵎⵉⵏⵣⵉ ⴰⵇⴰ ⵜⵉⵎⴻⵊⵎⴰⵔⵉⵏ ⵏⵏⵉ, ⵇⴻⴷⴷⵙⴻⵏⵜ ⵉ ⴵⴰⵏⵜ! 3 ⵊⵊⴻⵎ ⵜⴻⵏ ⴰⴷ ⴳⴳⴻⵏ ⵣⵉ ⵜⵎⴻⵊⵎⴰⵔⵉⵏ ⵏ ⵢⴻⵔⵢⴰⵣⴻⵏ-ⴰ, ⵉⵏⵏⵉ ⵜⵓⵖⴰ ⵉⵅⴻⵟⵟⴰⵏ ⴹⵉⴷⴷ ⵉ ⵍⴻⵄⵎⵓⵔ ⵏⵙⴻⵏ, ⵜⵉⵍⵡⵉⵃⵉⵏ ⴷ ⵜⵉⵣⵉⵔⴰⵔⵉⵏ ⵉ ⴷⴷⵓⵔⵉ ⵉ ⵓⵄⴰⵍⵟⴰⵔ, ⵎⵉⵏⵣⵉ ⵉⵡⵢⴻⵏ ⵜⴻⵏⵜ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵙ ⵓⵢⴰ ⵜⵜⵡⴰⵇⴻⴷⴷⵙⴻⵏⵜ ⵜⵉⵏⴰ. ⴰⴷ ⵉⵍⵉⵏⵜ ⴷ ⵉⵊⵊ ⵏ ⵓⵛⴻⵢⵢⴰⵔ ⵉ ⴰⵢⵜ ⵏ ⵉⵙⵔⴰⵉⵍ.” 4 ⵅⴻⵏⵏⵉ ⵉⴽⵙⵉ ⵓⴽⴻⵀⵀⴰⵏ ⴰⵍⵉⵄⴰⵣⴰⵔ ⵜⵉⵎⴻⵊⵎⴰⵔⵉⵏ ⵏ ⵏⵏⵃⴰⵙ ⵏⵏⵉ ⴷⴷ-ⵉⵡⵢⴻⵏ ⵢⵉⵏⵏⵉ ⵉⵜⵜⵡⴰⵛⴻⵎⴹⴻⵏ ⵉ ⵜⴻⵡⵀⵉⴱⵜ, ⵓⵛⴰ ⵜⴽⴻⵜⴽⴻⵏ ⵜⴻⵏⵜ ⵃⵉⵎⴰ ⴰⴷ ⵣⵣⴰⵢⵙⴻⵏⵜ ⴷⵍⴻⵏⵜ ⴰⵄⴰⵍⵟⴰⵔ 5 ⵉ ⵍⵉⴷⴰⵔⴻⵜ ⵉ ⴰⵢⵜ ⵏ ⵉⵙⵔⴰⵉⵍ, ⵃⵉⵎⴰ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵣ ⵡⴰⵔ ⵉⴵⵉⵏ ⵣⵉ ⵣⵣⴰⵔⵉⵄⴻⵜ ⵏ ⵀⴰⵔⵓⵏ, ⵡⴰⵔ ⴷⴷ-ⵉⵜⵜⵇⴰⵔⵔⵉⴱ ⵛⴰ ⴱⵍⴰ ⵜⵜⴻⵙⵔⵉⵃ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵃⵉⵎⴰ ⴰⴷ ⵉⵙⵙⴱⴻⵅⵅⴰⵔ ⵍⴻⴱⵅⵓⵔ, ⵎⴰⵃⴻⵏⴷ ⵡⴰⵔ ⴷ ⴰⵙ ⵉⵍⵇⴻⴼ ⵎⵉⵏ ⵉⵍⴻⵇⴼⴻⵏ ⵇⵓⵔⴰⵃ ⴷ ⵓⴱⴰⵔⵔⵓ ⵏⵏⴻⵙ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵙⵙⵉⵡⴻⵍ ⵙⵉⴷⵉ ⵙ ⵓⵇⴻⵎⵎⵓⵎ ⵏ ⵎⵓⵙⴰ.
6 ⵜⵉⵡⴻⵛⵛⴰ ⵏⵏⴻⵙ ⵜⵓⵖⴰ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ ⵜᵉⵜⵜⵏⴻⴷⵇⴰⵎ ⴹⵉⴷⴷ ⵉ ⵎⵓⵙⴰ ⴷ ⵀⴰⵔⵓⵏ, ⵏⵏⴰⵏ: “ⴽⴻⵏⵏⵉⵡ ⵜⴻⵏⵖⵉⵎ ⵍⴳⴻⵏⵙ ⵏ ⵙⵉⴷⵉ!” 7 ⵓⵛⴰ ⵓⵎⵉ ⵜⵎⵓⵏ ⵜⵎⴻⵙⵎⵓⵏⵜ ⴹⵉⴷⴷ ⵉ ⵎⵓⵙⴰ ⴷ ⵀⴰⵔⵓⵏ ⵓⵛⴰ ⴱⴷⴰⵏ ⵏⵉⵜⵏⵉ ⴳⴳⵓⵔⴻⵏ ⵖⴰⵔ ⵓⵇⵉⴹⵓⵏ ⵏ ⵓⵎⵙⴰⴳⴰⵔ, ⵅⵣⴰⵔ, ⴰⵇⴰ ⴷⵉⵏ ⴰⵙⴻⵢⵏⵓ ⵏⵏⵉ ⵜ ⵉⴷⵍⵉⵏ ⵓⵛⴰ ⵉⴱⴰⵏ-ⴷⴷ ⵓⵄⵓⴵⵉ ⵏ ⵙⵉⴷⵉ. 8 ⵢⵓⵙⴰ-ⴷⴷ ⵎⵓⵙⴰ ⴰⴽ-ⴷ ⵀⴰⵔⵓⵏ, ⴱⴻⴷⴷⴻⵏ ⵣⵣⴰⵜ ⵉ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. 9 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
10 “ⴽⴽⴰⵔⴻⵎ, ⴰⴳⴳⵯⴻⵊⴻⵎ ⵣⵉ ⵍⵡⴻⵙⵟ ⵏ ⵜⵎⴻⵙⵎⵓⵏⵜ ⵓ ⵏⴻⵛⵛ ⴰⴷ ⵜⴻⵏ ⵎⵃⵉⵖ ⴷⴻⴳ ⵉⵊⵊ ⵏ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ!” ⵅⴻⵏⵏⵉ ⵡⴹⴰⵏ ⵅ ⵡⵓⴷⴻⵎ ⵏⵙⴻⵏ. 11 ⵉⵏⵏⴰ ⵎⵓⵙⴰ ⵉ ⵀⴰⵔⵓⵏ: “ⴽⵙⵉ ⴷⴻⵖⵢⴰ ⵉⵊⵊ ⵏ ⵍⵎⴻⵊⵎⴰⵔ, ⴻⴳⴳ ⵅⴰⵙ ⵜⵉⵎⴻⵙⵙⵉ ⵏ ⵓⵄⴰⵍⵟⴰⵔ ⵓⵛⴰ ⵙⴰⵔⵙ ⵅⴰⵙ ⵍⴻⴱⵅⵓⵔ. ⴰⵣⵣⴻⵍ ⵖⴰⵔ ⵜⵎⴻⵙⵎⵓⵏⵜ ⵓⵛⴰ ⴻⴳⴳ ⴰⵚⵍⴰⵃ ⴷⵉ ⵟⵟⵡⴻⵄ ⵏⵙⴻⵏ, ⵎⵉⵏⵣⵉ ⵉⴼⴼⴻⵖ-ⴷⴷ ⵓⴷⵓⵇⵇⴻⵣ ⵏ ⵡⴻⵖⴹⴰⴱ ⵣⵉ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⴰⵇⴰ ⴷⴰ ⵊⵊⵔⵉⵃⴻⵛⵜ ⴰⵎ ⵜⴻⴱⴷⴰ ⵄⴰⴷ.” 12 ⵉⴽⵙⵉ ⵀⴰⵔⵓⵏ ⵍⵎⴻⵊⵎⴰⵔ, ⴰⵎ ⵎⴰⵎⵎⴻⵛ ⵉⵏⵏⴰ ⵎⵓⵙⴰ, ⵓⵛⴰ ⵢⵓⵣⵣⴻⵍ ⵖⴰⵔ ⵍⵡⴻⵙⵟ ⵏ ⵡⴻⴳⵔⴰⵡ ⵏ ⵍⴳⴻⵏⵙ, ⵓⵛⴰ ⵅⵣⴰⵔ, ⵊⵊⵔⵉⵃⴻⵛⵜ ⵜⵓⵖⴰ ⴰⵎ ⵜⴻⴱⴷⴰ ⵄⴰⴷ ⵊⴰⵔ ⵍⴳⴻⵏⵙ, ⵓⵛⴰ ⵏⴻⵜⵜⴰ ⵉⵙⵙⴰⵔⵙ ⴷⴰⵢⴻⵙ ⵍⴻⴱⵅⵓⵔ ⵓⵛⴰ ⵉⴳⴳⴰ ⴰⵚⵍⴰⵃ ⴷⵉ ⵟⵟⵡⴻⵄ ⵏ ⵍⴳⴻⵏⵙ. □ 13 ⵜⵓⵖⴰ ⵉⴱⴻⴷⴷ ⵊⴰⵔ ⵉⵎⴻⵜⵜⴰⵏ ⴷ ⵉⵎⵓⴷⴷⴰⵔⴻⵏ ⵓⵛⴰ ⵜᵉⵜⵜⵡⴰⵙⵙⴱⴻⴷⴷ ⵊⵊⵔⵉⵃⴻⵛⵜ. 14 ⵡⵉ ⵉⵎⵎⵓⵜⴻⵏ ⵣⵉ ⵊⵊⵔⵉⵃⴻⵛⵜ ⵜⵓⵖⴰ ⴰⵜⴻⵏ ⴷⵉ ⴰⵔⴱⴻⵄⵟⴰⵛ-ⴰⵍⴻⴼ ⵓ-ⵙⴻⴱⵄⴰ-ⵎⵢⴰ, ⴱⵍⴰ ⵉⵏⵏⵉ ⵉⵎⵎⵓⵜⴻⵏ ⴷⵉ ⵙⵙⵉⴱⴱⴻⵜ ⵏ ⵇⵓⵔⴰⵃ. 15 ⵉⴷⵡⴻⵍ ⵀⴰⵔⵓⵏ ⵖⴰⵔ ⵎⵓⵙⴰ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. ⴰⵇⴰ ⵜᵉⵜⵜⵡⴰⵙⵙⴱⴻⴷⴷ ⵊⵊⵔⵉⵃⴻⵛⵜ.
ⵜⴰⵖⵖⴰⵔⵛⵜ ⵉⵣⵣⴻⵢⵣⵓⵢⴻⵏ ⵏ ⵀⴰⵔⵓⵏ
16 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
17 “ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⴽⵙⵉ ⵣⵣⴰⵢⵙⴻⵏ ⵉⵛⵜ ⵏ ⵜⴻⵖⵖⴰⵔⵛⵜ ⵉ ⴽⵓⵍ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵣⵉ ⵎⴰⵔⵔⴰ ⵍⵃⵓⴽⴽⴰⵎ ⵏⵙⴻⵏ, ⵄⵍⴰⵃⵙⴰⴱ ⵍⵄⴰⴷⴰⴷ ⵏ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵜⴻⵏⵄⴰⵛ ⵏ ⵜᵉⵖⵖⴰⵔⵢⴻⵏ. ⵉⵜⵜⵅⴻⵚⵚⴰ ⴰⴷ ⵜⴰⵔⵉⴷ ⵉⵙⴻⵎ ⵏ ⴽⵓⵍ ⵉⵊⵊ ⵣⵣⴰⵢⵙⴻⵏ ⵅ ⵜⴻⵖⵖⴰⵔⵛⵜ ⵏⵏⴻⵙ. 18 ⴰⴷ ⵜⴰⵔⵉⴷ ⵉⵙⴻⵎ ⵏ ⵀⴰⵔⵓⵏ ⵅ ⵜⴻⵖⵖⴰⵔⵛⵜ ⵏ ⵍⴰⵡⵉ, ⵎⵉⵏⵣⵉ ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵜⴻⵖⵖⴰⵔⵛⵜ ⵉ ⵢⵉⵊⵊ ⵏ ⵓⵣⴻⴵⵉⴼ ⵏ ⵜⴰⴷⴷⴰⵔⵜ ⵏ ⵍⴻⵊⴷⵓⴷ ⵏⵙⴻⵏ. 19 ⴰⴷ ⵜⴻⵏⵜ ⵜⴻⴳⴳⴻⴷ ⴷⴻⴳ ⵓⵇⵉⴹⵓⵏ ⵏ ⵓⵎⵙⴰⴳⴰⵔ, ⵣⵣⴰⵜ ⵉ ⵛⵛⵀⴰⴷⴻⵜ, ⵎⴰⵏⵉ ⴽⵉⴷⵡⴻⵎ ⵖⴰ ⵎⵙⴰⴳⴰⵔⴻⵖ. ■ 20 ⵅⴻⵏⵏⵉ ⴰⴷ ⵉⵎⵙⴰⵔ, ⴰⵇⴰ ⴰⴷ ⵜⵏⵓⵡⵡⴰⵔ ⵜⴻⵖⵖⴰⵔⵛⵜ ⵏ ⵡⴻⵔⵢⴰⵣ ⵏⵏⵉ ⵉⵅⴹⴰⵔⴻⵖ ⵏⴻⵛⵛ ⵓⵛⴰ ⴰⴷ ⵙⵙⴱⴻⴷⴷⴻⵖ ⴰⵏⴻⴷⵇⴻⵎ ⴹⵉⴷⴷ ⵉⵏⵓ ⵉ ⵣⵉ ⵅⴰⵡⴻⵎ ⵏⵏⴷⴻⵇⵎⴻⵏ ⴰⵢⵜ ⵏ ⵉⵙⵔⴰⵉⵍ.”
21 ⵉⵙⵙⵉⵡⴻⵍ ⵎⵓⵙⴰ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ, ⵓⵛⴰ ⵎⴰⵔⵔⴰ ⵍⵃⵓⴽⴽⴰⵎ ⵏⵙⴻⵏ ⵡⵛⵉⵏ ⵉⵛⵜ ⵏ ⵜⴻⵖⵖⴰⵔⵛⵜ ⵉ ⵎⴽⵓⵍ ⵉⵊⵊ ⵏ ⵍⵃⴰⴽⴻⵎ, ⵄⵍⴰⵃⵙⴰⴱ ⵍⵇⴻⴷⴷ ⵏ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵜⴻⵏⵄⴰⵛ ⵏ ⵜⴻⵖⵖⴰⵔⵢⴻⵏ. ⵓⵛⴰ ⵜⴰⵖⵖⴰⵔⵛⵜ ⵏ ⵀⴰⵔⵓⵏ ⵜⵓⵖⴰ-ⵜ ⵊⴰⵔ ⵜᵉⵖⵖⴰⵔⵢⴻⵏ ⵏⵙⴻⵏ. 22 ⵎⵓⵙⴰ ⵉⵙⵙⴰⵔⵙ ⵜⵉⵖⵖⴰⵔⵢⴻⵏ ⵏⵏⵉ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⴷⴻⴳ ⵓⵇⵉⴹⵓⵏ ⵏ ⵛⵛⵀⴰⴷⴻⵜ. 23 ⵜⵉⵡⴻⵛⵛⴰ ⵏⵏⴻⵙ ⵢⵓⴷⴻⴼ ⵎⵓⵙⴰ ⵖⴰⵔ ⵓⵇⵉⴹⵓⵏ ⵏ ⵛⵛⵀⴰⴷⴻⵜ, ⵓⵛⴰ ⵅⵣⴰⵔ, ⵜⴰⵖⵖⴰⵔⵛⵜ ⵏ ⵀⴰⵔⵓⵏ ⴷⵉ ⵟⵟⵡⴻⵄ ⵏ ⵜⴰⴷⴷⴰⵔⵜ ⵏ ⵍⴰⵡⵉ ⵜⵓⵖⴰ ⵜⴻⴳⴳⴰ ⵜⴰⵛⵍⴰⵍⵜ ⵓⵛⴰ ⵜⴰⵄⴻⴱⴱⵓⵣⵜ ⵜⴻⵙⵙⵓⴼⴼⴻⵖ-ⴷⴷ ⵓⵛⴰ ⵏⵏⵓⵡⵡⴰⵔ ⵏⵏⴻⵙ ⵢⴰⵔⵣⴻⵎ ⵓⵛⴰ ⵢⵉⵡⵉ-ⴷⴷ ⴵⵓⵣ ⵢⵉⵡⴹⴻⵏ. 24 ⵅⴻⵏⵏⵉ ⵉⵙⵙⵓⴼⴼⴻⵖ ⵎⵓⵙⴰ ⵎⴰⵔⵔⴰ ⵜⵉⵖⵖⴰⵔⵢⴻⵏ ⵣⵉ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵖⴰⵔ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ. ⵥⵔⵉⵏ ⴰⵢⴰ ⵓⵛⴰ ⵟⵟⴼⴻⵏ ⴽⵓⵍ ⵉⵊⵊ ⵜⴰⵖⵖⴰⵔⵛⵜ ⵏⵏⴻⵙ.
25 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴰⵔⵔ ⵜⴰⵖⵖⴰⵔⵛⵜ ⵏ ⵀⴰⵔⵓⵏ ⵣⵣⴰⵜ ⵉ ⵛⵛⵀⴰⴷⴻⵜ, ⴰⴷ ⵜⵜ ⵜⴻⵃⴹⵉⴷ ⴰⵎ ⵢⵉⵊⵊ ⵏ ⵓⵛⴻⵢⵢⴰⵔ ⴹⵉⴷⴷ ⵉ ⵢⵉⵏⵏⵉ ⵉⵖⴻⵡⵡⵖⴻⵏ. ⴰⵎⵎⵓ ⵉ ⵖⴰ ⵜⴻⵙⵙⴱⴻⴷⴷⴻⴷ ⴰⵏⴻⴷⵇⴻⵎ ⵏⵙⴻⵏ ⴹⵉⴷⴷ ⵉⵏⵓ ⵎⴰⵃⴻⵏⴷ ⵏⵉⵜⵏⵉ ⵡⴰⵔ ⵜⵜⵎⴻⵜⵜⵉⵏ ⵛⴰ.” ■ 26 ⵓⵛⴰ ⵉⴳⴳⴰ ⵎⵓⵙⴰ ⴰⵎ ⵎⴰⵎⵎⴻⵛ ⴷ ⴰⵙ ⵢⵓⵎⵓⵔ ⵙⵉⴷⵉ, ⴰⵎⵎⵓ ⵉ ⵉⴳⴳⴰ ⵏⴻⵜⵜⴰ. 27 ⵅⴻⵏⵏⵉ ⵙⵙⵉⵡⵍⴻⵏ ⴰⵢⵜ ⵏ ⵉⵙⵔⴰⵉⵍ ⴰⴽ-ⴷ ⵎⵓⵙⴰ, ⵏⵏⴰⵏ: “ⵅⵣⴰⵔ, ⴰⴷ ⵣⵣⴰⵢⵏⴻⵖ ⵉⴼⴼⴻⵖ ⴱⵓⵃⴱⴻⵍ, ⴰⴷ ⵏⴻⵜⵜⵡⴰⵀⴻⵍⵍⴻⴽ, ⴰⴷ ⵏⴻⵜⵜⵡⴰⵀⴻⵍⵍⴻⴽ ⵎⴰⵔⵔⴰ ⵏⴻⵛⵛⵉⵏ! 28 ⵎⴰⵏ ⵡⴻⵏ ⵎⴰ ⵉ ⴷⴷ ⵖⴰ ⵉⵇⴰⵔⵔⴱⴻⵏ ⵖⴰⵔ ⵓⵇⵉⴹⵓⵏ ⵏ ⵙⵉⴷⵉ, ⴰⴷ ⵉⵎⵎⴻⵜ. ⵎⴰ ⴰⴷ ⵏⴻⵜⵜⵡⴰⵜⴻⵃⵃⴰ ⴰⵍ ⵣⵣⴰⵢⵏⴻⵖ ⵉⴼⴼⴻⵖ ⴱⵓⵃⴱⴻⵍ?”