ⵍⵡⵓⵄⵓⴷ ⴷ ⵓⴼⴻⴽⴽⵉ ⵣⵣⴰⵢⵙⴻⵏ
27
1 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ: 2 “ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵉⵏⵉ ⴰⵙⴻⵏ, ⴰⵇⴰ ⵎⴰⵍⴰ ⵉⵅⵙ ⵃⴻⴷ ⴰⴷ ⵉⴳⴳ ⵉⵊⵊ ⵏ ⵍⵡⴰⵄⴷ ⵉ ⴰⵔⴻⴱⴱⵉ, ⴰⴷ ⵢⵉⵍⵉ ⵜⵜⴰⵎⴰⵏ ⵏ ⵓⴼⴻⴽⴽⵉ ⵏ ⵍⴻⵄⵎⵓⵔ ⵉⵜⵜⵡⴰⵙⵙⵇⴻⴷⴷⵙⴻⵏ ⵉ ⵙⵉⴷⵉ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ. 3 ⵎⴰⵍⴰ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⴰⵇⴰ ⴷ ⵍⵇⴻⴷⴷ ⵏ ⵉⵊⵊ ⵏ ⵡⴻⵔⵢⴰⵣ ⵣⵉ ⵄⵉⵛⵔⵉⵏ ⴰⵍ ⵙⴻⵜⵜⵉⵏ ⵏ ⵉⵙⴻⴳⴳⵯⵓⵙⴰ, ⵅⴻⵏⵏⵉ ⴰⴷ ⵜⵉⵍⵉ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵅⴻⵎⵙⵉⵏ ⵛⵉⵇⵍⵓ ⵏ ⵏⵏⵓⵇⴰⵔⵜ ⵄⵍⴰⵃⵙⴰⴱ ⵛⵉⵇⵍⵓ ⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ. 4 ⵎⴰⵍⴰ ⴷ ⵉⵛⵜ ⵏ ⵜⴻⵎⵖⴰⵔⵜ, ⵅⴻⵏⵏⵉ ⴰⴷ ⵜⵉⵍⵉ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵜⵍⴰⵜⵉⵏ ⵛⵉⵇⵍⵓ.”
5 “ⵓⵛⴰ ⵎⴰⵍⴰ ⴷ ⵉⵊⵊ ⵏ ⵓⴱⵍⵉⵖ ⵣⵉ ⵅⴻⵎⵙⴰ ⴰⵍ ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ, ⵅⴻⵏⵏⵉ ⴰⴷ ⵜⵉⵍⵉ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵉ ⵢⵉⵊⵊ ⵏ ⵡⴻⵔⵢⴰⵣ ⵄⵉⵛⵔⵉⵏ ⵛⵉⵇⵍⵓ ⵓ ⵉ ⵢⵉⵛⵜ ⵏ ⵜⴻⵎⵖⴰⵔⵜ ⵄⴻⵛⵔⴰ ⵛⵉⵇⵍⵓ.”
6 “ⵎⴰⵍⴰ ⴷ ⵉⵊⵊ ⵏ ⵓⵃⴻⵏⵊⵉⵔ ⵣⴻⴳ ⵢⵉⵊⵊ ⵏ ⵓⵢⵓⵔ ⴰⵍ ⵅⴻⵎⵙⴰ ⵏ ⵉⵙⴻⴳⴳⵯⵓⵙⴰ, ⵅⴻⵏⵏⵉ ⴰⴷ ⵜⵉⵍⵉ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵉ ⵢⵉⵊⵊ ⵏ ⵡⴻⵔⵢⴰⵣ ⵅⴻⵎⵙⴰ ⵛⵉⵇⵍⵓ ⵏ ⵏⵏⵓⵇⴰⵔⵜ ⵓ ⵉ ⵢⵉⵛⵜ ⵏ ⵜⴻⵎⵖⴰⵔⵜ ⵜⵍⴰⵜⴰ ⵛⵉⵇⵍⵓ ⵏ ⵏⵏⵓⵇⴰⵔⵜ.”
7 “ⵎⴰⵍⴰ ⴷ ⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ ⵣⵉ ⵙⴻⵜⵜⵉⵏ ⵉⵙⴻⴳⴳⵯⵓⵙⴰ ⵏⵉⵖ ⵙⴻⵏⵏⴻⵊ, ⵅⴻⵏⵏⵉ, ⵎⴰⵍⴰ ⵏⴻⵜⵜⴰ ⴷ ⴰⵔⵢⴰⵣ, ⴰⴷ ⵜⵉⵍⵉ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵅⴻⵎⵎⴻⵙⵟⴰⵛ ⵛⵉⵇⵍⵓ ⵓ ⵎⴰⵍⴰ ⴷ ⵜⴰⵎⵖⴰⵔⵜ ⴰⴷ ⵜⵉⵍⵉ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵄⴻⵛⵔⴰ ⵏ ⵛⵉⵇⵍⵓ.”
8 “ⵎⴰⵍⴰ ⵜⵓⵖⴰ ⵉⵥⵍⴻⴹ ⴰⵟⵟⴰⵙ ⵓ ⵡⴰⵔ ⵉⵣⴻⵎⵎⴰⵔ ⴰⴷ ⵉⵡⵛ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ, ⵅⴻⵏⵏⵉ ⴰⴷ ⵜ ⵙⵙⴱⴻⴷⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵓⴽⴻⵀⵀⴰⵏ ⵓⵛⴰ ⵅⴻⵏⵏⵉ ⴰⴷ ⵉⵇⴻⴷⴷⴰⵔ ⵓⴽⴻⵀⵀⴰⵏ ⵍⵇⵉⵎⴻⵜ ⵏⵏⴻⵙ. ⴰⴷ ⵜ ⵉⵇⴻⴷⴷⴰⵔ ⵓⴽⴻⵀⵀⴰⵏ ⵄⵍⴰⵃⵙⴰⴱ ⵎⵉⵏ ⵉⵣⴻⵎⵎⴰⵔ ⴰⴷ ⵉⵙⵙⵎⵓⵏ ⵓⴼⵓⵙ ⵏ ⵡⴻⵏⵏⵉ ⵉⵡⵛⵉⵏ ⴰⵡⴰⵍ, ⴰⵎⵎⵓ ⵉ ⵜ ⵖⴰ ⵉⵇⴻⴷⴷⴰⵔ ⵓⴽⴻⵀⵀⴰⵏ.”
9 “ⵎⴰⵍⴰ ⴷ ⵍⴻⴱⵀⴰⵢⴻⵎ ⵉ ⵣⵉ ⵖⴰ ⵇⴻⴷⴷⵎⴻⵏ ⵜⴰⵡⵀⵉⴱⵜ ⵉ ⵙⵉⴷⵉ, ⵅⴻⵏⵏⵉ ⵎⴰⵔⵔⴰ ⵎⵉⵏ ⵣⵣⴰⵢⵙⴻⵏ ⵖⴰ ⵉⵡⵛ ⵏⴻⵜⵜⴰ ⵉ ⵙⵉⴷⵉ, ⴰⴷ ⵢⵉⵍⵉ ⵉⵇⴻⴷⴷⴻⵙ. 10 ⵡⴰⵔ ⵉⵜⵜⴱⴻⴷⴷⵉⵍ ⵓ ⵡⴰⵔ ⵉⵅⴻⴵⴻⴼ ⴰⵎⵓⴷⴷⴰⵔ ⵉⵛⵏⴰⵏ ⵅ ⵡⴻⵏⵏⵉ ⵉⵇⴻⴱⵃⴻⵏ ⵏⵉⵖ ⴰⵎⵓⴷⴷⴰⵔ ⵉⵇⴻⴱⵃⴻⵏ ⵅ ⵡⴻⵏⵏⵉ ⵉⵛⵏⴰⵏ. ⵎⴰⵍⴰ ⵉⴱⴻⴷⴷⴻⵍ ⵄⴰⴷ ⵉⵛⵜ ⵏ ⵍⴻⴱⵀⵉⵎⴻⵜ ⵙ ⵉⵛⵜ ⵏ ⵍⴻⴱⵀⵉⵎⴻⵜ ⵏⵏⴻⵖⵏⵉ, ⵅⴻⵏⵏⵉ ⵜⴰ ⴷ ⵜⴻⵏⵏⵉ ⵉ ⵅ ⵜⵜ ⵉⴱⴻⴷⴷⴻⵍ ⴰⴷ ⵉⵍⵉⵏⵜ ⵇⴻⴷⴷⵙⴻⵏⵜ. 11 ⵎⴰⵍⴰ ⵜⴻⴵⴰ ⴷ ⵉⵛⵜ ⵏ ⵍⴻⴱⵀⵉⵎⴻⵜ ⵜⴻⵅⵎⴻⵊ, ⵡⴰⵔ ⵉⵄⴻⴷⴷⴻⵍ ⴰⴷ ⵜⵜ ⵇⴻⴷⴷⵎⴻⵏ ⴷ ⵜⴰⵡⵀⵉⴱⵜ ⵉ ⵙⵉⴷⵉ, ⵅⴻⵏⵏⵉ ⴰⴷ ⵢⴰⵔⵔ ⵍⴻⴱⵀⵉⵎⴻⵜ ⵏⵏⵉ ⴰⴷ ⵜⴱⴻⴷⴷ ⵣⵣⴰⵜ ⵉ ⵡⵓⴷⴻⵎ ⵏ ⵓⴽⴻⵀⵀⴰⵏ. 12 ⴰⴽⴻⵀⵀⴰⵏ ⴰⴷ ⵉⵇⴻⴷⴷⴰⵔ ⵍⵇⵉⵎⴻⵜ ⵏⵏⴻⵙ ⵊⴰⵔ ⵎⵉⵏ ⵉⵛⵏⴰⵏ ⴷ ⵎⵉⵏ ⵡⴰⵔ ⵉⵃⵍⵉⵏ. ⵓⵛⴰ ⴰⵎ ⵎⴰⵎⵎⴻⵛ ⵉ ⵜⵜ ⵖⴰ ⵜⵇⴻⴷⴷⴰⵔⴻⴷ ⵛⴻⴽ, ⴰⵎ ⵓⴽⴻⵀⵀⴰⵏ, ⴰⵎⵎⵓ ⵉ ⵖⴰ ⵜⵉⵍⵉ. 13 ⵎⴰⵍⴰ ⵏⴻⵜⵜⴰ ⵉⵅⵙ ⵄⴰⴷ ⴰⴷ ⵜⵜ ⵉⴼⴷⵉ, ⴰⴷ ⵅⴰⵙ ⵢⴰⵔⵏⵉ ⵉⵛⵜ ⵏ ⵜⴻⵙⵖⴰⵔⵜ ⵏ ⵜⴻⵅⵎⵓⵙⴻⵛⵜ ⵏ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ.”□
14 “ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵉⵙⵙⵇⴻⴷⴷⴻⵙ ⵜⴰⴷⴷⴰⵔⵜ ⵏⵏⴻⵙ, ⵎⴰⵃⴻⵏⴷ ⴰⴷ ⵜⵉⵍⵉ ⵜⵇⴻⴷⴷⴻⵙ ⵉ ⵙⵉⴷⵉ, ⵅⴻⵏⵏⵉ ⴰⴷ ⵉⵇⴻⴷⴷⴰⵔ ⵓⴽⴻⵀⵀⴰⵏ ⵍⵇⵉⵎⴻⵜ ⵏⵏⴻⵙ ⵊⴰⵔ ⵎⵉⵏ ⵉⵛⵏⴰⵏ ⴷ ⵎⵉⵏ ⵉⵇⴻⴱⵃⴻⵏ. ⴰⵎ ⵎⴰⵎⵎⴻⵛ ⵉⵇⴻⴷⴷⴰⵔ ⵓⴽⴻⵀⵀⴰⵏ ⵍⵇⵉⵎⴻⵜ ⵏⵏⴻⵙ, ⴰⵎⵎⵓ ⵉ ⵖⴰ ⵜⵉⵍⵉ. 15 ⵎⴰⵍⴰ ⵡⴻⵏⵏⵉ ⵜⵜ ⵉⵙⵙⵇⴻⴷⴷⵙⴻⵏ ⵉⵅⵙ ⴰⴷ ⵉⴼⴷⵉ ⵜⴰⴷⴷⴰⵔⵜ ⵏⵏⴻⵙ, ⵅⴻⵏⵏⵉ ⵏⴻⵜⵜⴰ ⴰⴷ ⵅⴰⵙ ⵢⴰⵔⵏⵉ ⵉⵛⵜ ⵏ ⵜⴻⵙⵖⴰⵔⵜ ⵏ ⵜⴻⵅⵎⵓⵙⴻⵛⵜ ⵏ ⵍⵇⵉⵎⴻⵜ ⵉⵜⵜⵡⴰⴳⴳⴻⵏ ⵙ ⵏⵏⵓⵇⴰⵔⵜ ⵓⵛⴰ ⴰⴷ ⵜⵉⵍⵉ ⵏⵏⴻⵙ ⵄⴰⵡⴻⴷ.”
16 “ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵉⵙⵙⵇⴻⴷⴷⴻⵙ ⵉ ⵙⵉⴷⵉ ⵛⴰ ⵏ ⵜⴻⵙⵖⴰⵔⵜ ⵏ ⵢⴻⵢⵢⴰⵔ ⵏⵏⵉ ⵖⴰⵔⴻⵙ ⵉⴵⴰⵏ, ⵅⴻⵏⵏⵉ ⴰⴷ ⵜⵇⴻⴷⴷⴰⵔⴻⴷ ⵍⵇⵉⵎⴻⵜ ⵏⵏⴻⵙ ⵄⵍⴰⵃⵙⴰⴱ ⵣⵣⴰⵔⵉⵄⴻⵜ ⵏⵏⴻⵙ. ⵣⵣⴰⵔⵉⵄⴻⵜ ⵏ ⵉⵊⵊ ⵏ ⵓⵃⵓⵎⵉⵔ ⵏ ⵉⵎⴻⵏⴷⵉ ⴰⴷ ⴰⵙ ⴳⴳⴻⵏ ⵅⴻⵎⵙⵉⵏ ⵛⵉⵇⵍⵓ. □ 17 ⵎⴰⵍⴰ ⵜⵓⵖⴰ ⵉⵙⵙⵇⴻⴷⴷⴻⵙ ⵉⵢⵢⴰⵔ ⵏⵏⴻⵙ ⵣⴻⴳ ⵓⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ, ⵅⴻⵏⵏⵉ ⴰⴷ ⵜⴻⴷⵡⴻⵍ ⵍⵇⵉⵎⴻⵜ ⵏ ⵢⴻⵢⵢⴰⵔ ⵜⴱⴻⴷⴷ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ. 18 ⵎⴰⵍⴰ ⵜⵓⵖⴰ ⵉⵙⵙⵇⴻⴷⴷⴻⵙ ⵉⵢⵢⴰⵔ ⵏⵏⴻⵙ ⴰⵡⴰⵔⵏⵉ ⵉ ⵓⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ, ⵅⴻⵏⵏⵉ ⴰⴽⴻⵀⵀⴰⵏ ⴰⴷ ⴰⵙ ⵉⵀⵚⴻⴱ ⵍⵇⵉⵎⴻⵜ ⵙ ⵏⵏⵓⵇⴰⵔⵜ ⵏ ⵉⵙⴻⴳⴳⵯⵓⵙⴰ ⵉⵇⵇⵉⵎⴻⵏ ⴰⵍ ⴰⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ ⵉ ⴷⴷ ⵖⴰ ⵢⴰⵙⴻⵏ ⵓ ⵅⴻⵏⵏⵉ ⴰⴷ ⵜⵉⵍⵉ ⵍⵇⵉⵎⴻⵜ ⵇⴻⵍⵍ ⵅ ⵍⵇⵉⵎⴻⵜ ⵜⵎⵓⵏ ⵉ ⵜⵓⵖⴰ ⵜⵇⴻⴷⴷⴰⵔⴻⴷ ⵛⴻⴽ. 19 ⵎⴰⵍⴰ ⵡⴻⵏⵏⵉ ⵉⵙⵙⵇⴻⴷⴷⵙⴻⵏ ⵉⵢⵢⴰⵔ, ⵉⵅⵙ ⴰⴷ ⵜ ⵉⴼⴷⵉ ⵏⵉⵛⴰⵏ, ⵅⴻⵏⵏⵉ ⴰⴷ ⵢⴰⵔⵏⵉ ⵉⵛⵜ ⵏ ⵜⴻⵙⵖⴰⵔⵜ ⵏ ⵜⴻⵅⵎⵓⵙⴻⵛⵜ ⴷⵉ ⵏⵏⵓⵇⴰⵔⵜ ⵅ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⵓⵛⴰ ⵅⴻⵏⵏⵉ ⴰⴷ ⴰⵙ ⵢⵉⵍⵉ ⵄⴰⵡⴻⴷ.”
20 “ⵎⴰⵍⴰ ⵡⴰⵔ ⵉⵅⵙ ⴰⴷ ⵉⴼⴷⵉ ⵉⵢⵢⴰⵔ ⵏⵏⵉ ⵏⵉⵖ ⵎⴰⵍⴰ ⵉⵣⵣⴻⵏⵣ ⵉⵢⵢⴰⵔ ⵉ ⵢⵉⵊⵊ ⵏ ⵡⴻⵔⵢⴰⵣ ⵏⵏⴻⵖⵏⵉ, ⵅⴻⵏⵏⵉ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⴼⴷⵉ ⵄⴰⴷ ⵢⴻⵢⵢⴰⵔ. 21 ⴰⵡⴰⵔⵏⵉ ⵍⴰⵎⵉ ⴷⴷ-ⵉⴼⴼⴻⵖ ⴷⴻⴳ ⵓⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ, ⴰⴷ ⵢⵉⵍⵉ ⵉⵢⵢⴰⵔ ⵉⵇⴻⴷⴷⴻⵙ ⵉ ⵙⵉⴷⵉ ⴰⵎ ⵢⵉⵊⵊ ⵏ ⵢⴻⵢⵢⴰⵔ ⵉⵜⵜⵡⴰⵃⴰⵔⵔⵎⴻⵏ ⵇⴰⵄ. ⴰⴷ ⵢⵉⵍⵉ ⴷ ⴰⴳⵍⴰ ⵏ ⵓⴽⴻⵀⵀⴰⵏ.”
22 “ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵉⵙⵙⵇⴻⴷⴷⴻⵙ ⵉⵊⵊ ⵏ ⵢⴻⵢⵢⴰⵔ ⵏⵏⵉ ⵉⵙⵖⴰ ⵉ ⵙⵉⴷⵉ, ⵎⴰⵛⴰ ⵡⴰⵔ ⵉⴵⵉ ⵢⴻⵢⵢⴰⵔ ⵏ ⵡⴰⴳⵍⴰ ⵏⵏⴻⵙ, 23 ⵅⴻⵏⵏⵉ ⴰⴽⴻⵀⵀⴰⵏ ⴰⴷ ⴰⵙ ⵉⵃⵙⴻⴱ ⵜⵜⴰⵎⴰⵏ ⵏ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⴰⵍ ⴰⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ ⵓⵛⴰ ⵏⴻⵜⵜⴰ ⴰⴷ ⵉⵅⴻⴵⴻⵚ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⴷⴻⴳ ⵡⴰⵙⵙ ⵏⵏⵉ ⴷ ⵉⵊⵊ ⴰⵎ ⵉⵛⵜ ⵏ ⵜⵎⴻⵙⵍⴰⵛⵜ ⵜⵇⴻⴷⴷⴻⵙ ⵉ ⵙⵉⴷⵉ. 24 ⴷⴻⴳ ⵓⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ ⴰⴷ ⴷⴷ-ⵉⵄⵇⴻⴱ ⵢⴻⵢⵢⴰⵔ ⵄⴰⵡⴻⴷ ⵉ ⵡⴻⵏⵏⵉ ⵅ ⵜ ⵉⵙⵖⴰ, ⵉ ⵡⴻⵏⵏⵉ ⵜⵓⵖⴰ ⵖⴰⵔ ⵜⴻⴵⴰ ⵜⴻⵎⵎⵓⵔⵜ ⴷ ⴰⴳⵍⴰ. 25 ⴰⵇⴻⴷⴷⴰⵔ ⴰⴷ ⵢⵉⵍⵉ ⵄⵍⴰⵃⵙⴰⴱ ⵛⵉⵇⵍⵓ ⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ. ⴰⴷ ⵢⵉⵍⵉ ⵛⵉⵇⵍⵓ ⵄⵉⵛⵔⵉⵏ ⵊⵉⵔⴰ.”■
26 “ⵎⴰⵛⴰ ⴰⵎⴻⵏⵣⵓ, ⵡⴻⵏⵏⵉ ⵉⴼⴰⵔⵣⴻⵏ ⵉ ⵙⵉⴷⵉ ⵣⵉ ⵍⴻⴱⵀⴰⵢⴻⵎ ⴰⵎ ⵓⵎⴻⵏⵣⵓ, ⵡⴰⵔ ⵉⵄⴻⴷⴷⴻⵍ ⴰⴷ ⵜ ⵉⵙⵙⵇⴻⴷⴷⴻⵙ ⵓⵍⴰ ⴷ ⵉⵊⵊⴻⵏ, ⵏⵉⵖ ⴷ ⴰⴼⵓⵏⴰⵙ ⵉ ⵉⴵⴰ ⵏⵉⵖ ⴷ ⵉⵊⵊⴻⵏ ⵣⴻⴳ ⵡⵓⴵⵉ, ⴰⵇⴰ-ⵜ ⵉ ⵙⵉⴷⵉ. ■ 27 ⵎⴰⵛⴰ ⵎⴰⵍⴰ ⵜⵓⵖⴰ-ⵜ ⵣⴻⴳ ⵉⵛⵜ ⵏ ⵍⴻⴱⵀⵉⵎⴻⵜ ⵉⵅⴻⵎⵊⴻⵏ, ⵉⵣⴻⵎⵎⴰⵔ ⴰⴷ ⵜⵜ ⵉⴼⴷⵉ ⵄⵍⴰⵃⵚⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⵓⵛⴰ ⴰⴷ ⵅⴰⵙ ⵢⴰⵔⵏⵉ ⵉⵛⵜ ⵏ ⵜⴻⵙⵖⴰⵔⵜ ⵏ ⵜⴻⵅⵎⵓⵙⴻⵛⵜ. ⵎⴰⵍⴰ ⵡⴰⵔ ⵜᵉⵜⵜⵡⴰⴼⴻⴷⴷⵉ, ⵅⴻⵏⵏⵉ ⴰⴷ ⵜⴻⵎⵎⴻⵏⵣ ⵄⵍⴰⵃⵙⴰⴱ ⵍⵇⴻⴷⴷ ⵉ ⵜⵇⴻⴷⴷⴰⵔⴻⴷ ⵛⴻⴽ.”
28 “ⵎⴰⵛⴰ ⵓⵍⴰ ⴷ ⵉⵛⵜ ⵏ ⵍⵃⴰⵊⵊⴻⵜ ⵏⵏⵉ ⵉⵜⵜⵡⴰⵃⴰⵔⵔⵎⴻⵏ ⵣⴻⴳ ⵉⵊⵊ ⵏ ⵡⴻⵔⵢⴰⵣ ⵉ ⵙⵉⴷⵉ ⵣⵉ ⵎⴰⵔⵔⴰ ⵎⵉⵏ ⵖⴰⵔⴻⵙ ⵉⴵⴰⵏ ⵏ ⵉⵡⴷⴰⵏ ⴷ ⵍⴻⴱⵀⴰⵢⴻⵎ ⴷ ⵉⵢⵢⴰⵔⴻⵏ, ⵡⴰⵔ ⵉⵄⴻⴷⴷⴻⵍ ⴰⴷ ⵜⴻⵎⵎⴻⵏⵣ ⵏⵉⵖ ⴰⴷ ⵜᵉⵜⵜⵡⴰⴼⴷⵉ. ⵎⴰⵔⵔⴰ ⵎⵉⵏ ⵉⵜⵜⵡⴰⵃⴰⵔⵔⵎⴻⵏ, ⴰⴷ ⵢⵉⵍⵉ ⴷ ⴰⵎⵇⴻⴷⴷⴰⵙ ⵇⴰⵄ ⵉ ⵙⵉⴷⵉ. ■ 29 ⵎⴰⵔⵔⴰ ⵎⵉⵏ ⵉⵜⵜⵡⴰⵃⴰⵔⵔⵎⴻⵏ ⵇⴰⵄ ⵉ ⵓⵜⴻⵃⵃⵉ, ⵎⵉⵏ ⵉⵜⵜⵡⴰⵃⴰⵔⵔⵎⴻⵏ ⵣⴻⴳ ⵉⵡⴷⴰⵏ, ⵡⴰⵔ ⵉⵄⴻⴷⴷⴻⵍ ⴰⴷ ⵉⵜⵜⵡⴰⴼⴷⵉ, ⵎⴰⵛⴰ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴻⵖ ⵏⵉⵛⴰⵏ.”
30 “ⵎⴰⵔⵔⴰ ⵜⵉⵄⵛⵓⵔⴰⵢ ⵏ ⵜⴻⵎⵎⵓⵔⵜ, ⵣⵉ ⵣⵣⴰⵔⵉⵄⴻⵜ ⵏ ⵜⴻⵎⵎⵓⵔⵜ ⵓ ⵣⵉ ⵍⵖⵉⴵⴻⵜ ⵏ ⵜⵛⴻⵊⵊⵓⵔⴰ, ⴰⴷ ⵉⵍⵉⵏⵜ ⵉ ⵙⵉⴷⵉ, ⴰⵇⴰ ⴰⵜⴻⵏⵜ ⵇⴻⴷⴷⵙⴻⵏⵜ ⵉ ⵙⵉⴷⵉ. 31 ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵉⵅⵙ ⴰⴷ ⵉⴼⴷⵉ ⵛⴰ ⵣⵉ ⵍⴻⵄⵛⵓⵔ ⵏⵏⴻⵙ, ⵅⴻⵏⵏⵉ ⴰⴷ ⵅⴰⵙ ⵢⴰⵔⵏⵉ ⵉⵛⵜ ⵏ ⵜⴻⵙⵖⴰⵔⵜ ⴷⵉ ⵅⴻⵎⵙⴰ. 32 ⵅ ⵎⴰⵔⵔⴰ ⵜⵉⵄⵛⵓⵔⴰⵢ ⵣⴻⴳ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵡⵓⴵⵉ, ⵣⵉ ⵎⴰⵔⵔⴰ ⵎⵉⵏ ⵉⴽⴽⵉⵏ ⵙⴰⴷⵓ ⵓⵣⴻⴵⴰⴹ ⵏ ⵓⵎⴻⴽⵙⴰⵡ, ⴰⴷ ⵢⵉⵍⵉ ⵓⵎⵓⴷⴷⴰⵔ ⵡⵉⵙⵙ ⵄⴻⵛⵔⴰ ⵉⵇⴻⴷⴷⴻⵙ ⵉ ⵙⵉⴷⵉ. 33 ⵡⴰⵔ ⵉⵄⴻⴷⴷⴻⵍ ⴰⴷ ⵢⴰⵔⵣⵓ ⵎⴰⵎⵎⴻⵛ ⵜⴻⵛⵏⴰ ⵏⵉⵖ ⵎⴰⵎⵎⴻⵛ ⵡⴰⵔ ⵜⴻⵃⵍⵉ ⵉ ⵜⴻⴵⴰ, ⵓⵍⴰ ⵡⴰⵔ ⵜ ⵉⵜⵜⴱⴻⴷⴷⵉⵍ ⵛⴰ, ⵎⴰⵛⴰ ⵎⴰⵍⴰ ⵉⴱⴻⴷⴷⴻⵍ ⵉ-ⵜ, ⵅⴻⵏⵏⵉ ⴰⵎⵓⴷⴷⴰⵔ ⵏⵏⵉ ⴷ ⵡⴻⵏⵏⵉ ⵣⵉ ⵜ ⵉ ⵖⴰ ⵉⴱⴻⴷⴷⴻⵍ ⴰⴷ ⵉⵍⵉⵏ ⵇⴻⴷⴷⵙⴻⵏ. ⵡⴰⵔ ⵉⵄⴻⴷⴷⴻⵍ ⴰⴷ ⵉⵜⵜⵡⴰⴼⴷⵉ.”
34 ⴰⵇⴰ ⵜⵉⵏⴰ ⴷ ⵜⵉⵡⴻⵚⵚⴰ ⵏⵏⵉ ⵉ ⵣⵉ ⵉⵡⴻⵚⵚⴰ ⵙⵉⴷⵉ ⵉ ⵎⵓⵙⴰ ⵓ ⵉ ⴰⵢⵜ ⵏ ⵉⵙⵔⴰⵉⵍ ⴷⴻⴳ ⵡⴻⴷⵔⴰⵔ ⵏ ⵙⵉⵏⴰ.