ⵍⵄⴰⵀⴷ ⵏ ⴰⵔⴻⴱⴱⵉ ⴰⴽ-ⴷ ⵍⴳⴻⵏⵙ
24
1 ⵓⵛⴰ ⵉⵏⵏⴰ ⵏⴻⵜⵜⴰ ⵉ ⵎⵓⵙⴰ: “ⴳⴻⵄⵄⴻⴷ ⵖⴰⵔ ⵙⵉⴷⵉ, ⵛⴻⴽ ⴷ ⵀⴰⵔⵓⵏ ⴷ ⵏⴰⴷⴰⴱ ⴷ ⴰⴱⵉⵀⵓ, ⴷ ⵙⴻⴱⵄⵉⵏ ⵏ ⵉⵎⵖⴰⵔⴻⵏ ⵏ ⵉⵙⵔⴰⵉⵍ, ⵓⵛⴰ ⴱⴻⵏⴷⵇⴻⵎ ⵣⵉ ⵍⴰⴳⴳⵯⴰⵊ. 2 ⵎⵓⵙⴰ ⵡⴻⵃⵃⴷⴻⵙ ⴰⴷ ⴷⴷ-ⵉⵇⴰⵔⵔⴻⴱ ⵖⴰⵔ ⵙⵉⴷⵉ, ⵎⴰⵛⴰ ⵡⴰⵔ ⵉⵄⴻⴷⴷⴻⵍ ⴰⴷ ⵇⴰⵔⵔⴱⴻⵏ ⵏⵉⵜⵏⵉ. ⵓⵍⴰ ⴷ ⵍⴳⴻⵏⵙ ⵡⴰⵔ ⴽⵉⴷⴻⵙ ⵉⵜⵜⴳⵉⵄⵄⵉⴷ ⵛⴰ.” 3 ⵎⵓⵙⴰ ⵉⵄⵇⴻⴱ-ⴷⴷ ⵓⵛⴰ ⵉⵅⴻⴱⴱⴰⵔ ⵍⴳⴻⵏⵙ ⵅ ⵎⴰⵔⵔⴰ ⴰⵡⴰⵍⴻⵏ ⵏ ⵙⵉⴷⵉ ⵓ ⵅ ⵎⴰⵔⵔⴰ ⵍⴼⴰⵔⴰⵢⵉⴹ. ⵎⴰⵔⵔⴰ ⵍⴳⴻⵏⵙ ⵢⴰⵔⵔⴰ-ⴷⴷ ⵙ ⵢⵉⵊⵊ ⵏ ⵡⴰⵡⴰⵍ, ⵏⵏⴰⵏ: “ⵎⴰⵔⵔⴰ ⴰⵡⴰⵍⴻⵏ ⵉ ⵉⵏⵏⴰ ⵙⵉⴷⵉ ⴰⴷ ⵣⵣⴰⵢⵙⴻⵏ ⵏⴻⴳⴳ.” □ ■ 4 ⵎⵓⵙⴰ ⵢⵓⵔⴰ ⵎⴰⵔⵔⴰ ⴰⵡⴰⵍⴻⵏ ⵏ ⵙⵉⴷⵉ. ⵖⴰⵔ ⵚⵚⴱⴻⵃ ⵣⵉⵛ ⵉⴽⴽⴰⵔ ⵓⵛⴰ ⵉⴱⵏⴰ ⵉⵊⵊ ⵏ ⵓⵄⴰⵍⵟⴰⵔ ⵖⴰⵔ ⵉⴹⴰⵔⴻⵏ ⵏ ⵡⴻⴷⵔⴰⵔ ⵓⵛⴰ ⵉⴳⴳⴰ ⵜⴻⵏⵄⴰⵛ ⵏ ⵉⵎⴰⵢⴹⵓⵜⴻⵏ ⵏ ⵡⴻⵥⵔⵓ, ⵄⵍⴰⵃⵙⴰⴱ ⵍⵇⴻⴷⴷ ⵏ ⵜⴻⵏⵄⴰⵛ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ. 5 ⵉⵙⵙⴻⴽⴽ ⵉⵃⵓⴷⵔⵉⵢⵢⴻⵏ ⵣⴻⴳ ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵉⵙⵙⴱⴻⵅⵅⴰⵔⴻⵏ ⵜⵉⵖⴰⵔⵚⵉ ⵏ ⵡⴻⵛⵎⴰⴹ ⵓ ⵇⴻⴷⴷⵎⴻⵏ ⵜⵉⵖⴰⵔⵚⵉ ⵏ ⵍⴻⵀⵏⴰ ⵣⴻⴳ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⵉ ⵙⵉⴷⵉ. 6 ⵉⴽⵙⵉ ⵎⵓⵙⴰ ⴰⵣⵢⴻⵏ ⵏ ⵉⴷⴰⵎⵎⴻⵏ, ⵉⴳⴳⴰ ⵉ-ⵜ ⴷⵉ ⵟⵟⴱⴰⵚⵉ ⵓⵛⴰ ⴰⵣⵢⴻⵏ ⵏⵏⴻⵖⵏⵉ ⵏ ⵉⴷⴰⵎⵎⴻⵏ ⵉⵣⴻⴵⴻⵄ ⵉ-ⵜⴻⵏ ⵅ ⵓⵄⴰⵍⵟⴰⵔ. 7 ⵉⴽⵙⵉ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ ⵏ ⵍⵄⴰⵀⴷ, ⵉⵖⵔⴰ ⵉ-ⵜ ⵅ ⵉⵎⴻⵣⵣⵓⵖⴻⵏ ⵏ ⵍⴳⴻⵏⵙ ⵓⵛⴰ ⵏⵉⵜⵏⵉ ⵏⵏⴰⵏ: “ⵎⴰⵔⵔⴰ ⵎⵉⵏ ⴷ ⴰⵏⴻⵖ ⵉⵏⵏⴰ ⵙⵉⴷⵉ, ⴰⴷ ⵜ ⵏⴻⴳⴳ, ⴰⴷ ⵜ ⵏⵟⴰⵄ.” 8 ⵉⴽⵙⵉ ⵎⵓⵙⴰ ⵉⴷⴰⵎⵎⴻⵏ, ⵉⵔⵓⵛⵛ ⵉ-ⵜⴻⵏ ⵅ ⵍⴳⴻⵏⵙ, ⵉⵏⵏⴰ: “ⵅⵣⴰⵔ, ⵉⵏⴰ ⴷ ⵉⴷⴰⵎⵎⴻⵏ ⵏ ⵍⵄⴰⵀⴷ ⵏⵏⵉ ⵉⴳⴳⴰ ⵙⵉⴷⵉ ⴰⴽⵉⴷⵡⴻⵎ ⵅ ⵎⴰⵔⵔⴰ ⴰⵡⴰⵍⴻⵏ-ⴰ.” ■
9 ⵉⴳⴻⵄⵄⴻⴷ ⵎⵓⵙⴰ ⴰⴽ-ⴷ ⵀⴰⵔⵓⵏ ⴷ ⵏⴰⴷⴰⴱ ⴷ ⴰⴱⵉⵀⵓ ⴷ ⵙⴻⴱⵄⵉⵏ ⵏ ⵉⵎⵖⴰⵔⴻⵏ ⵏ ⵉⵙⵔⴰⵉⵍ. 10 ⵥⵔⵉⵏ ⴰⵔⴻⴱⴱⵉ ⵏ ⵉⵙⵔⴰⵉⵍ. ⵜⵓⵖⴰ ⵙⴰⴷⵓ ⵉⴹⴰⵔⴻⵏ ⵏⵏⴻⵙ ⴰⵎ ⵜⵉⵙⵉ ⵏ ⵣⵣⴻⵍⵍⵉⵊ ⵉ ⵉⵜⵜⵡⴰⴳⴳⴻⵏ ⵏ ⵚⴰⴼⴼⵉⵔ ⴰⵣⵉⵣⴰ, ⵉⵚⴼⴰ ⴰⵎ ⵓⵊⴻⵏⵏⴰ ⵙⵉⵎⴰⵏⵜ ⵏⵏⴻⵙ. ■ 11 ⵡⴰⵔ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵅ ⵉⵎⵛⴻⵏⵏⵄⴻⵏ ⵏ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵏⵉⵜⵏⵉ ⵅⵣⴰⵔⴻⵏ ⵖⴰⵔ ⴰⵔⴻⴱⴱⵉ, ⵛⵛⵉⵏ, ⵙⵡⵉⵏ.
12 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴳⴻⵄⵄⴻⴷ-ⴷⴷ ⵖⴰⵔⵉ ⵖⴰⵔ ⵡⴻⴷⵔⴰⵔ ⵓⵛⴰ ⵇⵇⵉⵎ ⴷⵉⵏ ⵓⵛⴰ ⵏⴻⵛⵛ ⴰⴷ ⴰⵛ ⵡⵛⴻⵖ ⵜⵉⵍⵡⵉⵃⵉⵏ ⵏ ⵡⴻⵥⵔⵓ, ⵛⵛⴰⵔⵉⵄⴰ ⴷ ⵍⵓⵎⴰⵔⴰⵜ ⵜⵉⵏⵏⵉ ⵓⵔⵉⵖ ⵅ ⵜⴻⵍⵡⵉⵃⵉⵏ, ⵃⵉⵎⴰ ⴰⴷ ⴰⵙⴻⵏ ⵜⴻⵏⵜ ⵜⴻⵙⵙⵍⴻⵎⴷⴻⴷ.” 13 ⵉⴽⴽⴰⵔ ⵎⵓⵙⴰ ⴰⴽ-ⴷ ⵢⴰⵛⵓⵡⴰ, ⴰⵎⵙⴻⵅⵅⴰⵔ ⵏⵏⴻⵙ, ⵓⵛⴰ ⵉⴳⴻⵄⵄⴻⴷ ⵎⵓⵙⴰ ⵖⴰⵔ ⵡⴻⴷⵔⴰⵔ ⵏ ⴰⵔⴻⴱⴱⵉ. 14 ⵉⵏⵏⴰ ⵉ ⵉⵎⵖⴰⵔⴻⵏ: “ⵔⴰⵊⴰⵎ ⴰⵏⴻⵖ ⴷⴰⵏⵉⵜⴰ ⴰⵍ ⴷⴷ ⵖⴰⵔⵡⴻⵎ ⵉ ⵖⴰ ⵏⴻⴷⵡⴻⵍ. ⵅⵣⴰⵔ, ⵀⴰⵔⵓⵏ ⴷ ⵃⵓⵔ ⴰⴽⵉⴷⵡⴻⵎ. ⵎⴰⵍⴰ ⴷⵉⵏ ⵃⴻⴷ ⵖⴰⵔⴻⵙ ⴷⴷⵄⴰⵡⵉ, ⵉⵜⵜⵅⴻⵚⵚⴰ ⴰⵙ ⴰⴷ ⵖⴰⵔⵙⴻⵏ ⵉⵔⴰⵃ.”
15 ⵅⴻⵏⵏⵉ ⵉⴳⴻⵄⵄⴻⴷ ⵎⵓⵙⴰ ⵖⴰⵔ ⵡⴻⴷⵔⴰⵔ, ⵓⵛⴰ ⵉⵊⵊ ⵏ ⵓⵙⴻⵢⵏⵓ ⵉⴷⵍⴰ ⴰⴷⵔⴰⵔ. 16 ⴰⵄⵓⴵⵉ ⵏ ⵙⵉⴷⵉ ⵜⵓⵖⴰ ⵉⵣⴻⴷⴷⴻⵖ ⴷⴻⴳ ⵡⴻⴷⵔⴰⵔ ⵏ ⵙⵉⵏⴰ ⵓ ⴰⵙⴻⵢⵏⵓ ⵉⴷⵍⴰ ⵉ-ⵜ ⵙⴻⵜⵜⴰ ⵏ ⵡⵓⵙⵙⴰⵏ ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵉⵍⴰⵖⴰ-ⴷⴷ ⵏⴻⵜⵜⴰ ⵅ ⵎⵓⵙⴰ ⵣⵉ ⵍⵡⴻⵙⵟ ⵏ ⵓⵙⴻⵢⵏⵓ. 17 ⴰⵙⵛⴰⵏ ⵏ ⵓⵄⵓⴵⵉ ⵏ ⵙⵉⴷⵉ ⵜⵓⵖⴰ-ⵜ ⴷⵉ ⵜⵉⵟⵟⴰⵡⵉⵏ ⵏ ⴰⵢⵜ ⵏ ⵉⵙⵔⴰⵉⵍ ⴰⵎ ⵜⵎⴻⵙⵙⵉ ⵉⵜⵜⴻⵜⵜⴻⵏ ⵅ ⵜⵇⵉⵛⵛⴰⵜ ⵏ ⵡⴻⴷⵔⴰⵔ. ■ 18 ⵢⵓⴷⴻⴼ ⵎⵓⵙⴰ ⵖⴰⵔ ⵍⵡⴻⵙⵟ ⵏ ⵓⵙⴻⵢⵏⵓ ⵓⵛⴰ ⵉⴳⴻⵄⵄⴻⴷ ⴰⴷⵔⴰⵔ. ⵜⵓⵖⴰ ⵎⵓⵙⴰ ⵉⵇⵇⵉⵎ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⴷ ⴰⵔⴻⴱⵄⵉⵏ ⵏ ⴵⵢⴰⵍⵉ ⴷⴻⴳ ⵡⴻⴷⵔⴰⵔ.