8
1 ⵉⵏⵏⴰ ⵙⵉⴷⵉ ⵄⴰⵡⴻⴷ ⵉ ⵎⵓⵙⴰ: “ⵉⵏⵉ ⵉ ⵀⴰⵔⵓⵏ: ‘ⵙⵡⵉⵥⵥⴻⴹ ⴰⴼⵓⵙ ⵏⵏⴻⵛ ⵙ ⵜⴻⵖⵖⴰⵔⵛⵜ ⵏⵏⴻⵛ ⵅ ⵉⵖⴻⵣⵔⴰⵏ, ⵅ ⵜⵖⴻⵣⵔⴰⵜⵉⵏ ⵓⵍⴰ ⵅ ⵉⵢⴻⵍⵎⴰⵎⴻⵏ, ⵙⴳⴻⵄⵄⴻⴷ ⵉⵇⴰⵔⵇⵔⵉⵡⴻⵏ ⵅ ⵜⴻⵎⵎⵓⵔⵜ ⵏ ⵎⵉⵚⵔⴰ.’ ” 2 ⵓⵛⴰ ⵉⵙⵙⵡⵉⵥⵥⴻⴹ ⵀⴰⵔⵓⵏ ⴰⴼⵓⵙ ⵏⵏⴻⵙ ⵅ ⵡⴰⵎⴰⵏ ⵏ ⵎⵉⵚⵔⴰ ⵓⵛⴰ ⴳⴻⵄⵄⴷⴻⵏ-ⴷⴷ ⵉⵇⴰⵔⵇⵔⵉⵡⴻⵏ ⵓⵛⴰ ⴷⵍⵉⵏ ⵜⴰⵎⵎⵓⵔⵜ ⵏ ⵎⵉⵚⵔⴰ. 3 ⵓⵛⴰ ⵓⵍⴰ ⴷ ⵜⴰⵔⵡⴰ ⵏ ⵜⵙⴻⵃⵃⴰⵔⵜ ⴳⴳⵉⵏ ⴰⵎⴻⵏⵏⵉ ⵙ ⵜⵎⴻⴳⴳⴰ ⵏⵙⴻⵏ ⵏ ⵙⵡⴰⴷⴷⴰⵢ ⵙⵡⴰⴷⴷⴰⵢ ⴷ ⵉⵛⵜ, ⵓⵛⴰ ⵙⵙⴳⴻⵄⵄⴷⴻⵏ-ⴷⴷ ⵄⴰⵡⴻⴷ ⵉⵇⴰⵔⵇⵔⵉⵡⴻⵏ ⵅ ⵜⴻⵎⵎⵓⵔⵜ ⵏ ⵎⵉⵚⵔⴰ. 4 ⵉⵍⴰⵖⴰ-ⴷⴷ ⴼⵉⵔⵄⵓⵏ ⵅ ⵎⵓⵙⴰ ⴷ ⵀⴰⵔⵓⵏ, ⵉⵏⵏⴰ ⴰⵙⴻⵏ: “ⵥⴰⴵⴻⵎ ⵙ ⵍⴰⴵⴰⵖ ⵉ ⵙⵉⴷⵉ ⵃⵉⵎⴰ ⴰⴷ ⵅⴰⴼⵉ ⵉⴽⵙⵉ ⵉⵇⴰⵔⵇⵔⵉⵡⴻⵏ ⵓ ⵅ ⵍⴳⴻⵏⵙ ⵉⵏⵓ, ⵓⵛⴰ ⵅⴻⵏⵏⵉ ⴰⴷ ⵊⵊⴻⵖ ⴰⴷ ⵉⴼⴼⴻⵖ ⵍⴳⴻⵏⵙ, ⵎⴰⵃⴻⵏⴷ ⴰⴷ ⵇⴻⴷⴷⵎⴻⵏ ⵜⵉⵖⴰⵔⵚⴰ ⵉ ⵙⵉⴷⵉ.” 5 ⵉⵏⵏⴰ ⵎⵓⵙⴰ ⵉ ⴼⵉⵔⵄⵓⵏ: “ⵟⵟⴻⴼ ⵅⴰⴼⵉ ⵍⵃⵓⵔⵎⴻⵜ ⵎⴻⵍⵎⵉ ⴷ ⴰⵢⵉ ⵖⴰ ⵜⵉⵏⵉⴷ ⴰⴷ ⵅⴰⴽ ⵥⵥⴰⴵⴻⵖ ⵓ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵛ ⵓ ⵅ ⵍⴳⴻⵏⵙ ⵏⵏⴻⵛ, ⵎⴰⵃⴻⵏⴷ ⴰⴷ ⵅⴰⴽ ⵇⴻⴹⵄⴻⵖ ⵉⵇⴰⵔⵇⵔⵉⵡⴻⵏ ⵓ ⵅ ⵜⵓⴷⵔⵉⵏ ⵏⵏⴻⵛ, ⴰⴷ ⵇⵇⵉⵎⴻⵏ ⴷⴻⴳ ⵉⵖⵣⴰⵔ ⵡⴰⵀⴰ.” 6 ⵢⴰⵔⵔⴰ-ⴷⴷ ⵅⴰⵙ: “ⵜⵉⵡⴻⵛⵛⴰ!” ⵉⵏⵏⴰ ⵎⵓⵙⴰ: “ⴰⴷ ⵢⵉⵍⵉ ⴰⵎ ⵎⴰⵎⵎⴻⵛ ⵜⴻⵏⵏⵉⴷ ⵃⵉⵎⴰ ⴰⴷ ⵜⴻⵙⵙⵏⴻⴷ ⴱⴻⵍⵍⵉ ⵡⴰⵔ ⴷⵉⵏ ⵉⴵⵉ ⵃⴻⴷ ⴰⵎ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ. 7 ⵓⵛⴰ ⵉⵇⴰⵔⵇⵔⵉⵡⴻⵏ ⴰⴷ ⵎⵎⴻⴽⵙⵉⵏ ⵅⴰⴽ ⵓ ⵅ ⵜⵓⴷⵔⵉⵏ ⵏⵏⴻⵛ ⵓⵍⴰ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵛ ⵓ ⵅ ⵍⴳⴻⵏⵙ ⵏⵏⴻⵛ, ⴰⴷ ⵇⵇⵉⵎⴻⵏ ⴷⴻⴳ ⵉⵖⵣⴰⵔ ⵡⴰⵀⴰ.” 8 ⵍⴻⵅⴷⴻⵏⵏⵉ ⵉⴼⴼⴻⵖ ⵎⵓⵙⴰ ⴷ ⵀⴰⵔⵓⵏ ⵅ ⴼⵉⵔⵄⵓⵏ ⵓⵛⴰ ⵉⵍⴰⵖⴰ ⵎⵓⵙⴰ ⵉ ⵙⵉⴷⵉ ⴷⵉ ⵙⵙⵉⴱⴱⴻⵜ ⵏ ⵊⵊⵔⵉⵃⴻⵛⵜ ⵏ ⵉⵇⴰⵔⵇⵔⵉⵡⴻⵏ ⵏⵏⵉ ⵜⵓⵖⴰ ⵉⴳⴳⴰ ⵅ ⴼⵉⵔⵄⵓⵏ. 9 ⵓⵛⴰ ⵉⴳⴳⴰ ⵙⵉⴷⵉ ⴰⵎ ⵎⴰⵎⵎⴻⵛ ⴷⴷ-ⵉⵜⵜⴰⵙ ⴰⴽ-ⴷ ⵡⴰⵡⴰⵍ ⵏ ⵎⵓⵙⴰ ⵓⵛⴰ ⵎⵎⵓⵜⴻⵏ ⵉⵇⴰⵔⵇⵔⵉⵡⴻⵏ ⵓⵛⴰ ⵡⴻⴷⴷⴰⵔⴻⵏ ⵣⵉ ⵜⵓⴷⵔⵉⵏ, ⵣⵉ ⵍⴻⵎⵔⴰⵃⴰⵜ ⵓ ⵣⴻⴳ ⵉⵢⵢⴰⵔⴻⵏ. 10 ⵓⵛⴰ ⵙⵙⵎⵓⵏⴻⵏ ⵜⴻⵏ ⴷ ⵉⵄⵓⵔⵔⴰⵛ ⵓⵛⴰ ⵜⵓⵔⵚⵓⴹ ⵣⵣⴰⵢⵙⴻⵏ ⵜⴻⵎⵎⵓⵔⵜ. 11 ⵍⴰⵎⵉ ⵉⵥⵔⴰ ⴼⵉⵔⵄⵓⵏ ⴱⴻⵍⵍⵉ ⴰⵇⴰ ⴱⵏⴰⴷⴻⵎ ⵉⵣⴻⵎⵎⴰⵔ ⴰⴷ ⵢⴰⵔⵔ ⵏⵏⴻⴼⵙ, ⵉⵙⵙⴻⵇⵙⴻⵃ ⵓⵍ ⵏⵏⴻⵙ ⵓⵛⴰ ⵡⴰⵔ ⵖⴰⵔⵙⴻⵏ ⵉⵙⵙⵃⴻⵙⵙ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵏⵏⴰ ⵙⵉⴷⵉ. ■ 12 ⵍⴻⵅⴷⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⵉⵏⵉ ⵉ ⵀⴰⵔⵓⵏ: ‘ⵙⵡⵉⵥⵥⴻⴹ ⵜⴰⵖⵖⴰⵔⵛⵜ ⵏⵏⴻⵛ, ⵜⴻⵡⵜⴻⴷ ⵣⵣⴰⵢⴻⵙ ⴰⵛⴰⵍ ⵏ ⵜⴻⵎⵎⵓⵔⵜ. ⵅⴻⵏⵏⵉ ⴰⴷ ⵉⴷⵡⴻⵍ ⴷ ⵏⵏⴰⵎⵓⵙ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ.’ ” 13 ⵓⵛⴰ ⴰⵎⵎⵓ ⵉ ⴳⴳⵉⵏ ⵏⵉⵜⵏⵉ. ⵉⵙⵙⵡⵉⵥⵥⴻⴹ ⵀⴰⵔⵓⵏ ⴰⴼⵓⵙ ⵏⵏⴻⵙ ⵙ ⵜⴻⵖⵖⴰⵔⵛⵜ ⵏⵏⴻⵙ ⵉ ⴷⴰⵢⴻⵙ, ⵉⵡⵜⴰ ⴰⵛⴰⵍ ⵏ ⵜⴻⵎⵎⵓⵔⵜ. ⵓⵛⴰ ⵢⵓⵙⴰ-ⴷⴷ ⵏⵏⴰⵎⵓⵙ ⴰⵎ ⵅ ⵉⵡⴷⴰⵏ ⴰⵎ ⵅ ⵍⵎⴰⵍ. ⵎⴰⵔⵔⴰ ⴰⵛⴰⵍ ⵏ ⵜⴻⵎⵎⵓⵔⵜ ⵉⴷⵡⴻⵍ ⴷ ⵏⵏⴰⵎⵓⵙ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ. ■ 14 ⵜⴰⵔⵡⴰ ⵏ ⵜⵙⴻⵃⵃⴰⵔⵜ ⴳⴳⵉⵏ ⵜⵉⵣⴻⵎⵎⴰⵔ ⵏⵙⴻⵏ ⴰⵎⴻⵏⵏⵉ ⵄⴰⵡⴻⴷ ⵙ ⵜⵎⴻⴳⴳⴰ ⵏⵙⴻⵏ ⵏ ⵙⵡⴰⴷⴷⴰⵢ ⵙⵡⴰⴷⴷⴰⵢ, ⵎⴰⵃⴻⵏⴷ ⴰⴷ ⵙⵙⵓⴼⴼⵖⴻⵏ ⵏⵏⴰⵎⵓⵙ, ⵎⴰⵛⴰ ⵡⴰⵔ ⵣⴻⵎⵎⴰⵔⴻⵏ. ⵓⵛⴰ ⵜⵓⵖⴰ ⵏⵏⴰⵎⵓⵙ ⵅ ⵉⵡⴷⴰⵏ ⴷ ⵍⵎⴰⵍ. 15 ⵍⴻⵅⴷⴻⵏⵏⵉ ⵏⵏⴰⵏ ⵜⴰⵔⵡⴰ ⵏ ⵜⵙⴻⵃⵃⴰⵔⵜ ⵉ ⴼⵉⵔⵄⵓⵏ: “ⵎⴰⵏ ⴰⵢⴰ ⴷ ⴰⴹⴰⴹ ⵏ ⴰⵔⴻⴱⴱⵉ!” ⵎⴰⵛⴰ ⵉⵙⵙⴻⵇⵙⴻⵃ ⵓⵍ ⵏ ⴼⵉⵔⵄⵓⵏ ⵓⵛⴰ ⵡⴰⵔ ⴷⴷ ⵖⴰⵔⵙⴻⵏ ⵉⵙⴻⴵ ⵛⴰ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵏⵏⴰ ⵙⵉⴷⵉ.
16 ⵓⵛⴰ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⵜⵉⵡⴻⵛⵛⴰ ⴽⴽⴰⵔ ⵣⵉⵛ, ⴰⴷ ⵜⴱⴻⴷⴷⴻⴷ ⵣⵣⴰⵜ ⵉ ⴼⵉⵔⵄⵓⵏ. ⵅⵣⴰⵔ, ⵏⴻⵜⵜⴰ ⴰⴷ ⵉⴼⴼⴻⵖ ⵖⴰⵔ ⵜⵎⴰ ⵏ ⵡⴰⵎⴰⵏ, ⴰⴷ ⴰⵙ ⵜⵉⵏⵉⴷ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⴻⵊⵊ ⴰⴷ ⵉⵔⴰⵃ ⵍⴳⴻⵏⵙ ⵉⵏⵓ, ⵃⵉⵎⴰ ⴰⴷ ⴰⵢⵉ ⵉⵄⴱⴻⴷ! 17 ⵎⵉⵏⵣⵉ ⵎⴰⵍⴰ ⵡⴰⵔ ⵜⴻⵊⵊⵉⴷ ⵍⴳⴻⵏⵙ ⵉⵏⵓ ⴰⴷ ⵉⵔⴰⵃ, ⵅⵣⴰⵔ, ⵏⴻⵛⵛ ⴰⴷ ⵅⴰⴽ ⵙⵙⴻⴽⴽⴻⵖ ⵉⵢⵍⴰⴼⴻⵏ ⵏ ⵉⴱⴻⵄⵄⴰⵛ, ⵅ ⵉⵎⵙⴻⵅⵅⴰⵔⴻⵏ ⵏⵏⴻⵛ, ⵅ ⵍⴳⴻⵏⵙ ⵏⵏⴻⵛ, ⵅ ⵜⵓⴷⵔⵉⵏ ⵏⵏⴻⵛ, ⴰⵍ ⵖⴰ ⵜⵜⵡⴰⵛⵛⵓⵔⴻⵏⵜ ⵜⵓⴷⵔⵉⵏ ⵏ ⵉⵎⵉⵚⵔⵉⵢⵢⴻⵏ ⵙ ⵉⵢⵍⴰⴼⴻⵏ ⵏ ⵉⴱⴻⵄⵄⴰⵛ ⵓⵛⴰ ⴰⵎⴻⵏⵏⵉ ⵓⵍⴰ ⴷ ⵜⴰⵎⵎⵓⵔⵜ ⵎⴰⵏⵉ ⵣⴻⴷⴷⵖⴻⵏ. 18 ⴷⴻⴳ ⵡⴰⵙⵙ ⵏⵏⵉ ⴰⴷ ⵙⵙⵃⵓⵣⴻⵖ ⵜⴰⵎⵎⵓⵔⵜ ⵏ ⵊⵓⵛⴰⵏ ⵎⴰⵏⵉ ⵉⵣⴻⴷⴷⴻⵖ ⵍⴳⴻⵏⵙ ⵉⵏⵓ, ⵃⵉⵎⴰ ⵡⴰⵔ ⴷⵉⵏ ⵜⵜⵉⵍⵉⵏ ⵡⴻⵢⵍⴰⴼⴻⵏ ⵏ ⵉⴱⴻⵄⵄⴰⵛ ⵃⵉⵎⴰ ⴰⴷ ⵜⴻⵙⵙⵏⴻⴷ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ ⴷⵉ ⵍⵡⴻⵙⵟ ⵏ ⵜⴻⵎⵎⵓⵔⵜ. 19 ⵓⵛⴰ ⴰⴷ ⴳⴳⴻⵖ ⵉⵊⵊ ⵏ ⵜⵜⴰⵎⴰⵏ ⵏ ⵡⴻⵚⵍⴰⵃ ⵊⴰⵔ ⵍⴳⴻⵏⵙ ⵉⵏⵓ ⴷ ⵡⴻⵏⵏⵉ ⵏⵏⴻⵛ. ⵜⵉⵡⴻⵛⵛⴰ ⴰⴷ ⵜⵉⵍⵉ ⵍⴻⵄⵍⴰⵎⴻⵜ-ⴰ.’ ” 20 ⵓⵛⴰ ⴰⵎⵎⵓ ⵉ ⵉⴳⴳⴰ ⵙⵉⴷⵉ. ⵓⵙⵉⵏ-ⴷⴷ ⵉⵢⵍⴰⴼⴻⵏ ⵉⵎⴻⵇⵇⵔⴰⵏⴻⵏ ⵏ ⵉⴱⴻⵄⵄⴰⵛ ⵅ ⵜⴰⴷⴷⴰⵔⵜ ⵏ ⴼⵉⵔⵄⵓⵏ, ⵅ ⵜⵓⴷⵔⵉⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵓ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ ⵓⵛⴰ ⵜᵉⵜⵜⵡⴰⵅⴰⵔⵔⴻⴱ ⵜⴻⵎⵎⵓⵔⵜ ⵙ ⵉⵢⵍⴰⴼⴻⵏ ⵏ ⵉⴱⴻⵄⵄⴰⵛ. ■ 21 ⵍⴻⵅⴷⴻⵏⵏⵉ ⵉⵍⴰⵖⴰ ⴼⵉⵔⵄⵓⵏ ⵉ ⵎⵓⵙⴰ ⴷ ⵀⴰⵔⵓⵏ, ⵉⵏⵏⴰ ⴰⵙⴻⵏ: “ⵔⵓⵃⴻⵎ, ⵜⵇⴻⴷⴷⵎⴻⵎ ⵜⴰⵖⴰⵔⵚⵜ ⵉ ⴰⵔⴻⴱⴱⵉ ⵏⵡⴻⵎ ⴷⵉ ⵜⴻⵎⵎⵓⵔⵜ-ⴰ.” 22 ⵉⵏⵏⴰ ⵎⵓⵙⴰ: “ⵡⴰⵔ ⴷⴷ-ⵢⵓⵙⵉ ⴰⴷ ⵏⴻⴳⴳ ⴰⵎⵎⵓ, ⵎⵉⵏⵣⵉ ⴰⴷ ⵏⵇⴻⴷⴷⴻⵎ ⵜⴰⵖⴰⵔⵚⵜ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵎⵉⵏ ⵉⴵⴰⵏ ⴷ ⵉⵛⵜ ⵏ ⵊⵊⵄⵉⴼⴻⵛⵜ ⵖⴰⵔ ⵉⵎⵉⵚⵔⵉⵢⵢⴻⵏ. ⵅⵣⴰⵔ, ⵎⴰⵍⴰ ⵏⵇⴻⴷⴷⴻⵎ ⴷ ⵜⴰⵖⴰⵔⵚⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵉⵎⵉⵚⵔⵉⵢⵢⴻⵏ ⵎⵉⵏ ⴷ ⴰⵙⴻⵏ ⵉⵜⵜⵖⵉⵍ ⴷ ⵊⵊⵄⵉⴼⴻⵛⵜ, ⵎⴰ ⵡⴰⵔ ⴷ ⴰⵏⴻⵖ ⵜⴰⵔⴻⵊⵊⵎⴻⵏ ⵛⴰ? ■ 23 ⴻⵊⵊ ⴰⵏⴻⵖ ⴰⴷ ⵏⵔⴰⵃ ⵜⵉⵛⵍⵉ ⵏ ⵜⵍⴰⵜⴰ ⵏ ⵡⵓⵙⵙⴰⵏ ⴷⵉ ⵍⴻⵅⵍⴰ, ⵃⵉⵎⴰ ⴰⴷ ⵏⵇⴻⴷⴷⴻⵎ ⵜⴰⵖⴰⵔⵚⵜ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴰⵎ ⵎⴰⵎⵎⴻⵛ ⴷ ⴰⵏⴻⵖ ⵢⵓⵎⵓⵔ ⵏⴻⵜⵜⴰ.” 24 ⵅⴻⵏⵏⵉ ⵉⵏⵏⴰ ⴼⵉⵔⵄⵓⵏ: “ⵏⴻⵛⵛ ⴰⴷ ⴽⴻⵏⵏⵉⵡ ⵊⵊⴻⵖ ⴰⴷ ⵜⵔⴰⵃⴻⵎ ⵓⵛⴰ ⴰⴷ ⵜⵇⴻⴷⴷⵎⴻⵎ ⵜⴰⵖⴰⵔⵚⵜ ⵉ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴷⵉ ⵍⴻⵅⵍⴰ, ⵎⴰⵛⴰ ⵡⴰⵔ ⵉⵄⴻⴷⴷⴻⵍ ⴰⴷ ⵜⵉⴳⴳⵯⵉⵊⴻⵎ ⴰⵟⵟⴰⵙ. ⵥⴰⴵⴻⵎ ⵓⵍⴰ ⵅⴰⴼⵉ.” 25 ⵎⵓⵙⴰ ⵉⵏⵏⴰ: “ⴰⵇⴰ ⴰⴷ ⵅⴰⴽ ⴼⴼⵖⴻⵖ, ⴰⴷ ⵥⵥⴰⴵⴻⵖ ⵉ ⵙⵉⴷⵉ, ⵃⵉⵎⴰ ⴰⴷ ⵉⴽⴽⴻⵙ ⵜⵉⵡⴻⵛⵛⴰ ⵉⵢⵍⴰⴼⴻⵏ ⵏ ⵉⴱⴻⵄⵄⴰⵛ ⵅ ⴼⵉⵔⵄⵓⵏ, ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵓⵍⴰ ⵅ ⵍⴳⴻⵏⵙ ⵏⵏⴻⵙ. ⵎⴰⵛⴰ ⵉⵜⵜⵅⴻⵚⵚⴰ ⴼⵉⵔⵄⵓⵏ ⵡⴰⵔ ⵉⵅⴻⴷⴷⴻⵄ ⵜⵡⴰⵍⴰ ⵏⵏⴻⵖⵏⵉ, ⵡⴰⵔ ⵉⵜⵜⴻⵊⵊⵉ ⴰⴷ ⵉⵔⴰⵃ ⵍⴳⴻⵏⵙ, ⵎⴰⵃⴻⵏⴷ ⴰⴷ ⵉⵇⴻⴷⴷⴻⵎ ⵜⴰⵖⴰⵔⵚⵜ ⵉ ⵙⵉⴷⵉ.” 26 ⵍⴻⵅⴷⴻⵏⵏⵉ ⵉⴼⴼⴻⵖ ⵎⵓⵙⴰ ⵅ ⴼⵉⵔⵄⵓⵏ ⵓⵛⴰ ⵉⵥⵥⵓⴵ ⵉ ⵙⵉⴷⵉ. 27 ⵉⴳⴳⴰ ⵙⵉⴷⵉ ⵄⵍⴰⵃⵙⴰⴱ ⴰⵡⴰⵍ ⵉ ⵉⵏⵏⴰ ⵎⵓⵙⴰ ⵓⵛⴰ ⵉⴽⴽⴻⵙ ⵉⵢⵍⴰⴼⴻⵏ ⵏ ⵉⴱⴻⵄⵄⴰⵛ ⵅ ⴼⵉⵔⵄⵓⵏ, ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵓⵍⴰ ⵅ ⵍⴳⴻⵏⵙ ⵏⵏⴻⵙ. ⵡⴰⵔ ⵉⵇⵇⵉⵎ ⵓⵍⴰ ⴷ ⵉⵊⵊ ⵏ ⵓⴱⴻⵄⵄⵓⵛ. 28 ⵎⴰⵛⴰ ⴼⵉⵔⵄⵓⵏ ⵉⵙⵙⴻⵇⵙⴻⵃ ⵓⵍ ⵏⵏⴻⵙ ⵜⵡⴰⵍⴰ-ⵢⴰ ⵄⴰⵡⴻⴷ, ⵡⴰⵔ ⵉⵊⵊⵉ ⴰⴷ ⵉⵔⴰⵃ ⵍⴳⴻⵏⵙ. ■